100. ١٠٠ حلقة في ٦٠ دقيقة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنحتفل معاكم بالحلقة رقم 100 من بودكاست كلام ينور، حبينا تكون حلقة مختلفة شوية عن العادى ، عملنالكم فلاش باك مدته 60 دقيقة على رحلتنا من اول ما بدأنا البودكاست، الحلقة يمكن تكون طويلة شوية عن العادى بس هي مقتطفات سريعة كده من الحلقات كلها
للناس اللي بتسمعنا النهاردة لأول مرة الحلقة دي ممكن تكون فرصة حلوة انكم تتعرفوا علينا بسرعة، وتعرفوا احنا قولنا إيه في الحلقات اللي فاتت ولو في أجزاء عجبتكم ممكن ترجعوا تسمعوا الحلقات بالكامل
www.kalamyenawar.com على الموقع بتاعنا
Transcript في الجزء الخاص بالـ
Hyperlink هتلاقوا الحلقة كلها مكتوبة بالدقايق وعنوان كل حلقة عبارة عن
هيوديكوا على طول على الحلقة عشان تقدروا تسمعوها أو تقرأوها كامله
وفي النهاية، من قلبنا بنشكر كل مستمعينا وضيوفنا وكل الناس اللي ساعدونا أن البودكاست ده يطلع للنور ويوصلكم بالشكل ده، شكرا جدا على استماعكم للبودكاست وعلى تفاعلكم معانا على مدار 100 حلقة اللي فاتوا، وديماً هنستنى منكم تبعتولنا آرائكم ومقترحاتكم وإيه المواضيع اللي حابين نتكلم فيها في الحلقات القادمة بإذن الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكوا في الحلقه رقم 100 من بودكاست كلام ينور وانا بقول الرقم انا طبعا مش مصدق ان احنا وصلنا لـ 100 حلقه ، الحلقه دي انا فكرت اعمل حاجه مختلفه عن العادي فكرت اعمل فلاش باك على اللي حصل من الاول هنخلي الحلقه دي مدتها 60 دقيقة ممكن تكون حلقه طويله بس هي هتبقى مقتطفات من كل الحلقات ، الناس اللي بتسمعنا لاول مره ممكن تعرف ايه اللي حصل قبل كده لو في حتت عجباها ممكن ترجع تسمع الحلقه بالكامل
بشكر كل الناس جدا مستمعينا وضيوفنا وكل الناس اللي بيساعدونا في البودكاست ان هو يوصلكم مكنتش متخيل ان احنا نوصل هنا بالسرعة دي الوقت عدى بسرعه جدا معاكم وشكرا جدا تاني على استماعكم للبودكاست
01:37
الحلقة (1) : ليه تسمع كلام ينوّر؟
الصحة المالية عموماً أو الصحة المالية هو جزء كبير جداً من الصحة النفسية بتاعتك ، يعني لو أنت سعيد في حياتك المالية بتساعدك على تحقيق السعادة في جوانب كتير جداً من حياتك لأن العلاقة بين الفلوس ومختلف جوانب الحياة علاقة ديماً كبيرة جداً ، يعني هتلاقي ديماً العلاقة دي في شغلك في تعاملك مع الأخرين في التخطيط للمستقبل الكلام ده كله ، فالسعادة المالية أعتقد هو جزء لا يتجزأ من سعادتك النفسية بشكل عام ودي حاجه أنا بحب أذكرها ديماً إن مش معنى أن انت بتتكلم في الفلوس انك مادي أو جشع ، كل اللي انت بتعمله انك بتحاول تنظم حياتك المالية فلازم تديها وقت في التفكير قبل التنفيذ مش لازم أخد مرتبي واصرفه كله مره واحده أيا كان الإجابة على السؤال المالي اللي انت بتطرحه ديماً
02:22
الحلقة (2) : علاقة الحياة المالية بالصحة النفسية
حلقة النهاردة بتتكلم على ازاي عدم تنظيم حياتك المالية ممكن يأثر على صحتك النفسية ، هنلاقي موضوع الصحة النفسية ده موجود بشكل كبير في السنين الأخيرة ، الناس بتتكلم عليه في مختلف المجالات ، النهاردة انا عاوز أتكلم عليه من الناحية المالية ، عايز اشوف شوية علامات اتكلم عليها ، لو العلامة دي بتحصلك يبقى أنت في تأثير جاي من الفلوس بيأثر بشكل سلبي على صحتك النفسية
02:50
الحلقة (3) : الفلوس وسيلة ام غاية؟
الفلوس هي وسيلة من الوسائل اللي احنا بنسهل بيها حياتنا زي الإنترنت ، زي العربية ، زي أي حاجه فإنك تبتدي تعمل خطة استثمارية تقدر تستخدمها على مدار الـ 10 ، 20 سنة الجايين دي حاجه مهمة جداً جداً جداً لازم تبقى من أولوياتك في حياتك ، لازم تبقى حاجه انت مقتنع انك لازم تعملها ، لازم تاخد خطوات بسيطة منها تجاه الهدف ده ومتبعدش نفسك بسبب ان أنا ملهاش لازم أعملها ، أو انت مش هتاخد معاك فلوس بعد عمر طويل معاك.. لأ انت جزء من حياتك انك تأمن عائلتك ، تأمن مجتمعك والحاجه الوحيدة اللي انت تقدر تعملها انك تبتدي تفكر في الفلوس بطريقة مختلفة
03:33
الحلقة (4) : سعادتك في الامتلاك المادي ولا اكتساب الخبرات؟
لما الحاجه تبقى سهلة في المقارنة ده بيخلقلك مشكلة تانية إنك بتشوف كل اللي حواليك عملوا ايه ، بيخلقلك مشكلة ضغط المجموعة أو الضغط المجتمعي فأنا ديماً بحاول أقارن نفسي وحبي للحاجه اللي اشتريتها دي هل هي أحسن حاجه مش بس بالنسبة للتكنولوجيا لأ ده بالنسبة لجاري عنده تليفزيون أحسن مني أو تليفونه أفضل مني.. وده بيساعد على عدم قناعتك بإن ده محققلك السعادة يبقى تاني حاجه هنا إن في حاجه اسمها الضغط المجتمعي وده بيسبب تعاسه كبيرة جداً للناس ديماً
04:07
الحلقة (5) : ١٠ أخطاء شائعة تمنعك من الاستثمار
أنا النهاردة في حاجات كتيرة جداً وأنا بدور إيه المفاهيم الخاطئة وبحاول أجمعهم وبحضر للحلقة دي في حاجات كتير جداً لقيتها ، أنا النهاردة أخترت 10 حاجات ، قسمتهم 5 حاجات تمنعك اصلاً أنك تبتدي تستثمر و 5 حاجات تانين لو ابتديت تستثمر وربنا كرمك وعديت المرحلة دي وابتديت تعمل أي حاجه ليها علاقة بالاستثمار في 5 مفاهيم تانية خاطئة ممكن تأخرك برده في طريقك للاستثمار فأنا النهاردة هبتدي وأنا تعمدت اتكلم على الحاجات دي بدري جداً في الحلقات بتاعتنا لأنهم مهمين جداً جداً في الطريق بتاعك في الاستثمار
04:30
الحلقة (6) : ما وراء شرا العربية
طيب الملخص بتاع الحلقة بتاعتنا دي إيه؟ أول حاجه العربية دي سلعة إستهلاكية مش إستثمار ، تاني حاجه حسابك في البنك هو الخسران في المدى الطويل ، محدش مهتم أنت راكب إيه وبكام كل دي حاجات في دماغك وكده كده اللي انت راكبة بعد شوية هيبقى قديم ، تكلفة الفرصة البديلة كبيرة جداً لأن ك ممكن تعمل حاجات تانية بالفلوس دي لو أنت مش واخد بالك أنا بحاول أخليك تاخد بالك إن الفلوس دي ليها قيمة في المستقبل أعلى بكتير جداً لو أنت وظفتها بطريقة صح عن إنك تستخدمها في طريقة إستهلاكية
05:01
الحلقة (7) : التقاعد
الملخص بتاع الحلقة دي إني عاوز أعرفك إن في مشكلة اسمها التقاعد عايز اشوف المناطق العربية شكلها عامل ازاي وعايز أقنعك إن بعد 30/40 سنة الشكل العام هيتغير في الدول دي ، يعني اللي أحنا شايفينة النهاردة في المجتمع كأجيال هيتغير لأن التركيبة السكانية كلها هتتغير ولو التركيبة السكانية هتتغير معناها مشكلة التقاعد هتبقى أكبر بكتير لأن الناس أكتر بكتير أنا محتاج أوفر موارد أكتر بكتير للناس فلو أنت بادي بدري لوحدك ومركز إنت عارف بتعمل إيه أنت ممكن يبقى عندك مميزات عن الإنسان المتوسط في المجتمع
05:38
الحلقة (8) : هل للوقت تأثير على الفلوس؟
بس هو التضخم ليه موجود؟
لو أنا عارف إن بعد سنتين الـ 100$ اللي معايا قيمتها هتبقى أكتر مش هصرفها دلوقتي! لو أنا عارف إن الـ 100$ دلوقتي هتجيبلي طاولة بس بعد سنتين هتجيبلي طاولتين هخليها معايا ومش هصرفها فهيبقى في ركود إقتصادي لأن مفيش استهلاك ولذلك الدولة ديماً هدفها تخلي في مستوى معين من التضخم وعشان كده المصارف المركزية بتستهدف تضخم معين للسنة.. متكونش كتير عالية عشان ميبقاش في تضخم زيادة فالناس متقدرش تصرف ولا كتير واطي عشان الناس تفضل تصرف وميحصلش ركود ، لأني لو عارف إن الفلوس اللي معايا قيمتها هتبقى أكبر بعد سنتين هخليهم معايا وأشتري أكتر بعد سنتين فديماً في تضخم مستهدف ، بين دولة ودولة أكيد بتفرق حسب كل دولة
06:23
الحلقة (9) : يوفوريا
بص يوفوريا بالعربي معناها النشوة او السعادة الزائدة يعني حاجه فيها حماس زيادة. وهو زي ما قولت في الأول كده صحيح هي قصة ورواية واشخاص وحياة وكل حاجه بس هي في الاخر مش بعيدة عن المجال اللي هو مجالي الاستثمار والاسهم وبرصه وحاجات كده اليوفوريا ديما مصطلح بنستخدمه لما السوق او المستثمرين يكونوا في مرحلة النشوة او الحماسة الزائدة اللي بتخليهم يبقوا متحمسين زيادة فيشتروا الأسهم بشكل عنيف جدا فتلاقي الاسعار بتطلع بشكل مبالغ فيه ، تفاؤل زيادة عن اللزوم ، هي دي المرحلة اللي بنسميها اليوفوريا او الحماسة الزائدة
07:16
الحلقة (10) : 10. ما يسأله المستمعون - الجزء الأول
احنا حاولنا نبعت في صفحتنا في انستجرام نقول للناس اللي بيسمعوا الحلقات من فضلكوا يا جماعة أبعتولنا فويس نوت بأسئلة وفي أول محاولة الحمدلله مجالناش ولا فويس نوت ولكن عملنا بوست تاني وقولنا ان احنا جالنا صفر % أقبال على الدعوة الأولى ويا جماعة من فضلكوا لو حد يقدر يبعتلنا فتقريباً صعبنا على الناس والحمدلله بعتولنا في 3 بعتولنا فويس نوت اللي هو هنشغلهم النهاردة ان شاء الله في الحلقة ودي أنا عايزها تبقى تجربة دايماً بتتكرر كل شوية يعني لو في عندكم أسئلة في أي وقت ياريت تبعتولنا من خلال صفحتنا في انستجرام
08:03
الحلقة (11) : ما وراء طلب القرض
النهاردة انا هتكلم على موضوع القرويازاي لو انت رايح البنك عاوز تقترض تبقى فاهم يعني ايه أقتراض تبقى فاهم أنت ليه بتقترض ازاي يجي في ميزانيتك قسط القرض بتاعك ايه الحاجات اللي الناس بتقترض ليها وعايز ابقى معاك في الرحلة بتاعة انا رايح البنك ومش فاهم أي حاجه والناس هتمضيني على ورق وحاجات صعبة جدا وحاجات مش مفهمومه انا بس بحاول اكسر المفاهيم الصعبه دي لحاجات بسيطة انت تفهمها وتعرف تأثيرها عليك هيبقى عامل ازاي
08:40
الحلقة (12) : هل أنت غني ام ثري
لو انت عاوز تتحول من راجل غني لراجل ثري.. اول حاجه لازم ابتدي احوش جزء من دخلي الجزء ده ممكن يبقى 10 /15 /20 /30% من دخلي حسب مقدرتك مينفعش تعيش بنسبه عاليه في الصرف بالنسبة للدخل ، تاني حاجه لازم تدفع كل الديون اللي عليك بالذات اللي بتدفع عليها فوائد ، مش لازم تقترض لو انت مش محتاج لأن بردة انا ممكن أكون غني وبقترض علشان أسافر واتفسح وأبين واعمل صور يعني ممكن أعمل حاجات كتير جدا ملهاش معنى بس عشان ابين اننا مبسوط ، فأبعد عن القروض أو الأستدانه او انك تعمل حاجات زي دي لأنها فالاخر سلع استهلاكية ، الحاجة اللي بعديها انك تبتدي تستثمر على طول يعني ايا كان نوع الأستثمار اللي انت هتعمله مع الوقت برده في الحلقات بتاعتنا هنناقش حاجات مختلفه ولكن ابتدي ، ابتدي بحاجات بسيطة ابتدي في الودايع ، ابتدي بشهادات الأستثمار ابتدي في الحاجات اللي انت تفهمها مش لازم تصعب الدنيا على نفسك
09:39
الحلقة (13) : بدايات الادخار - الجزء الأول
أعمل ايه؟؟
The Earlier The Better اول حاجه
يعني اشطر واحد بالنسبالي اللي مع أول مرتب في حياته هو ابتدى يحوش ودي الإجابة الأساسية اللي أي حد هيقولهالك ، طيب لو انت عندك 30 ، 40 ، 50 هل معاناها متحوش؟ لأ أكيد تحوش بس المشكلة إن كل ما بتتأخر كل ما الصعوبة بتاعة إنك تحقق الهدف بتاع التقاعد بيصعب. وهنمشي في كذا مثال يعني ايه الكلام ده طيب أول حاجه الغلطة اللي الناس بتعملها ديما واللي ممكن نتكلم فيها في حلقة لوحدها موضوع الإدخار بتاعك ده بيجي فين في مصاريفك الشهرية
10:19
الحلقة (14) : بدايات الادخار - الجزء الثاني
أعمل ايه لأولادي ؟ تاني انت لو عودت أبنك أن هو ياكل كويس من وهو صغير جزء كبير جدا من عاداته السيئة في الأكل مش هتحصل لو هو تقبل الموضوع ، لو هو شخصيته قبلت الموضوع ، علمته انه ياكل كويس ، لو علمته ينام كويس هيعرف ينام كويس ، لو علمته يحوش كويس هيحوش كويس بمعنى انت اولاً لازم تعرفه قيمة الفلوس ، ولازم تعرفه القيمة الإقتصادية بتاعة انك لما هتدفع في حاجه في تكلفة فرصة بديلة لما هتصرف على حاجه في حاجه تانية مش هتيجي ، بداية الموضوع ليه عشان أعلمهم من الأساس ان الـ 10 / 15% تيجي في الأولويات ، أن الادخار لازم أربيه في مخه ان ده من أولوياتك مع أول مرتب
11:05
الحلقة (15) : التحيز
النهاردة احنا هنتكلم عن موضوع التحيزات أو التحيز بشكل عام ، المهتم أوي بعلم النفس ودرس علم نفس هيبقى فاهم احنا بنتكلم على ايه أكتر ولكن احنا بنحاول نبسط المعلومات دي بشكل يفيدنا ازاي ممكن نستخدمة في الحياة المالية بشكل عام. هنلاقي إن الناس كلها ديماً بالذات في إتخاذ القرار بتتأثر ديماً بتتحيز معين أو بفكرة معينة بتبقى قريبة لشخصيتك أو أنت مقتنع بيها أو أتربيت عليها في الخلفية بتاعك ممكن أسباب كتير جداً تبقى مخلية عندك التحيز ده. أحنا النهاردة هنناقش بعض المفاهيم ومع الوقت برده ممكن نكتشف حاجات تانية ونتكلم فيها في حلقات آخرى
11:51
الحلقة (17) : رحلة داخل شركات السمسرة
النهاردة الحلقة بتغطي حاجة مهمة جداً انا عايز أعرف أكتر والناس اللي بتسمعنا عايزين نعرف أكتر عن القطاع نفسه بتاعك قطاع السمسرة ، لأنه جزء كبير جداً جداً من أي حد مهتم انه يعمل حاجات ليها علاقة بالادخار أو الاستثمار أعتقد شركة السمسرة هو جزء كبير من الموضوع يعني
12:12
الحلقة (18) : أمناء الحفظ
النهاردة أنت معانا بقى علشان تاخدنا كده في حاجة اسمها أمين الحفظ ، أنا كنا بنناقش الحلقة اللي فاتت شركات السمسرة ومن الحاجات اللي لازم يبقى عندك فيها حساب أو عقد معين هو شركات أمناء الحفظ ، وأنت خبرتك طويلة في المجال ده فأنا قولت تيجي معانا النهاردة بحيث الناس اللي بتسمعنا تعرف ايه هو أمين الحفظ
بص أمين الحفظ ده بالظبط زي أكنك أخدت صندوق في خزنة بنك وبيبقى معمول عن طريق حساب وبيتحط فيه محفظة الأسهم بتاعتك بحيث ان ميبقاش في أي مخاطرة ان حد يبعلك الأسهم وياخد الفلوس وهو اللي بيتعامل المعاملات المالية بتاعة الأسهم
12:58
الحلقة (19) : ما وراء اقتناء حيوان أليف
يعني الشراء الإندفاعي ده بيأثر عليا مادياً وبيحطني في مشاكل وكل الحاجات دي ولكن لما بعمل شراء إندفاعي لاقتناء حيوان أليف في البيت ده هنا مش بيأثر عليا أنا بس ده بيأثر على كائن حي له إحساس وله حياة تانية ممكن بالسالب ليه؟ لأن الشراء الإندفاعي من الحاجات اللي بتميزه إن أنت بعد ما بتقتني الحاجة خلاص متعتك منها بتروح فمبتفكرش فيها تاني وده بنشوفه بيحصل كتير جداً في اقتناء الحيوانات الأليفة
13:30
الحلقة (20) : ما يسأله المستمعون - الجزء الثاني
النهاردة الحلقة رقم 20 بنجاوب فيها على اسئلة المتابعين بتوعنا من خلال صفحتنا على السوشيال ميديا في كذا حد بعتلنا اسئلة احنا اختارنا النهاردة مجموعة من الاسئلة هنجاوب عليها احنا ديماً هنشجع الناس انها تبعت على الصفحة بتاعتنا من خلال رسالة مباشرة على السوشيال ميديا ، ممكن تبعتولنا الاسئلة مكتوبة أو من خلال رسالة صوتية بحيث إننا نشغلهم في الحلقات القادمة إن شاء الله
13:57
الحلقة (21) : الاستثمار العقاري.. هل يستحق؟ (شراء للتأجير)
النهاردة احنا هنتكلم على حاجة ليها علاقة بالاستثمار العقاري وخاصة الشراء للتأجير ، يعني أنا النهاردة عندي من الحاجات اللي أقدر استثمر فيها هي إني اشتري شقة أو بيت وأأجره أنا النهاردة مش بتكلم مفروض تشتري فين أو إيه الأماكن الأحسن من أماكن ، أنا بتكلم فقط من الناحية المالية ازاي أعرف العائد على الاستثمار بتاعي ، ازاي أقدر احسبه خاصة لو أنا مش عاوز أخش في تفاصيل كتير معقدة.. في حاجة اسمها )معدل العائد الداخلي( دي حاجة بتحسب التدفق النقدي اللي جاي من عقار معين وبتحوله لعائد سنوي ، طب أنا مش فاهم الحاجات دي والمواضيع دي معقدة جداً
14:46
الحلقة (22) : ما وراء كروت الائتمان
حلقة النهاردة حلقة مهمة جداً هنتكلم فيها على البطاقات الائتمانية أو بيطلق عليها فيزا.. مشهورة بكلمة فيزا ، واحده من أكبر الشركات اللي بتقدم خدمة البطاقات الائتمانية ، برده الفيز دي بتتقدم من شركات تانية زي ماستركارد وأمريكان إكسبريس وفي شركات كتيره بتقدمها. الحلقة دي مهمه جداً بسبب أن من الحاجات اللي بتمنعك ديماً إنك توصل للحرية المالية أنك بتبقى دخلت في دايرة الديون ، دايرة الديون اللي مبتقدرش تخرج منها وبتأخرك على الأهداف بتاعة الادخار أوالاستثمار ، من الحاجات اللي بتمنعك ديماً ديماً من الاستثمار إن أنت بيبقى عليك ديون كتير لما بتدخل في الدايرة بتاعة الدين صعب جداً تخرج منها
15:39
الحلقة (23) : خطوات إلى الاستقلال المالي
المشكلة في الحاجات المالية أنها بتتعب المخ ، الكلام كتير أوي أنا سمعت الحلقات ولقيت حاجات كتير أوي وابتديت أتوه ومش عارف أروح فين وأبتدي منين؟َ! أنت محتاج وقتها تقف مع نفسك وقفه لازم تعمل نظام بطريقة أنت تستمتع بيها وتتحمس لما تتكلم مع الناس عليها وتساعد نفسك بيها وتخليها جزء من حياتك دي الحاجه اللي هتخليك تبقى مركز وملتزم وبتفكر فيها ومقتنع بيها وتحاول تقولها للأخرين لو أنت مش مقتنع بالحاجه مش هتعملها.. يبقى هدفي في حلقة النهاردة أنك تقتنع أن انت تبتدي تحوش تبتدي يبقى عندك حرية مالية واستقلال كفكر. مش هقولك على الطريقة اللي هي بكره الصبح هتخليك غني أو معاك فلوس بسرعة لأن دي حاجه أنا مش مقتنع اصلاً أنها موجودة وحتى لو وصلت للحاجه اللي أنت عايزها بسرعة جداً لو أنت مش عارف أنت بتعمل إيه أنت بسهوله جداً ممكن تخسرها
16:36
الحلقة (24) : خُلاصة الحسابات البنكية
حلقة النهاردة أنا عايز أتكلم فيها على أنواع الحسابات الموجودة في البنوك ، الحسابات اللي حضرتك هتشوفها في اي بنك يعني مش هيفرق كتير يعني المسميات ممكن تكون مختلفة في كل بنك لكن الأهداف بتبقى هي هي تقريباًبعد ما اتكلمنا الحلقة اللي فاتت عن الحرية المالية والخطوات الأولية ، طيب أنا عايز انفذ بقى الكلام ده انفذه باستخدام إيه؟ يعني مفروض أنا اعمل إيه؟ أفتح إيه في الأول كخطوات أولية عشان أعرف انفذ الخطة المالية بتاعتي فالنهاردة أنا هبتدي بحسابات البنوك ، حسابات البنوك هي حاجه مهمه إن انت تنظم بيها فلوسك ، هي ميزتها انها هتنظم تفكيرك كمان لأن انت هيبقى عندك أهداف مختلفة ومحتاج أنواع من الحسابات المختلفة لتنفيذ أوتحقيق الأهداف دي
17:29
الحلقة (26) : ازاي تستفيد من صناديق الاستثمار؟
حلقة النهاردة هتبقى عن صناديق الاستثمار واللي خلاني أعمل الحلقة دي إني بلاقي ناس كتير جداً بتسألني احنا نفسنا نبتدي في البورصة ، نفسنا نستثمر في البورصة ولكن أنا مش عارف ابتدي ازاي ممكن يكون السؤال ده جه على دماغك مش عارف ابتدي ازاي.. اروح فين ، أفتح إيه ، إيه الخطوات ، ايه الأسهم أصلاً.. الموضوع معقد جداً هنلاقي إن صناديق الاستثمار هي الأداة أو الحاجة المعمولة للناس اللي معندهاش وقت تتابع استثماراتها أو تختار أسهم معينه ، هو عبارة عن توكيل لإتخاذ القرار بالنيابة عني كمستثمر لحد بيشتغل في المجال
18:10
الحلقة (27) : حكايتي مع المجال المالي
في حلقة النهاردة أنا عايز اتكلم عن البدايات بتاعتي وازاي ابتديت ، عايز احكي قصة سريعة أستغل المنصة بتاعة البودكاست ده إني احاول اقولكم القصة بتاعتي ممكن تلهم ناس معينة بتحاول تبتدي في المجال بتاعنا أو في العموم ، هي قصة عامة وفي الأخر هبتدي أتكلم على شوية نقط أنا اتعلمتها من خلال التجربة بتاعتي .. أنا هتكلم في الحلقة دي عن قبل ما ابتدي أشتغل.. ازاي ابتديت أشتغل
18:42
الحلقة (28) : اعجوبة العالم الثامنة : الفوائد المركبة
أنا عايز النهاردة زي ما اتكلمنا المرة اللي فاتت على مفهوم التضخم ، أنا عارف ان دي مصطلحات تقيلة شوية برده هنحاول نتكلم فيها بالعربي ، هنحاول نفك الموضوع شوية النهاردة انا عايز اتكلم على مفهوم الفوايد المركبة اي حد بيقرا كتب او مدونات في التمويل الشخصي ديماً الكلمة دي بتتكرر كتير ، يعني إيه الفوايد المركبة
أنا اول حاجه بتخطر على البالي لما اسمع كلمة الفوايد المركبة ، انك بتستثمر وبيطلعلك فايدة سنوية أو شهرية أيا كان ، تاني حاجه بتخطر على بالي لما أسمع كلمة فوايد مركبة أول شي بفكر فيه انه قد إيه بحتاج وقت عشان أضاعف فلوسي لو بستثمر بمعدل فايدة معين ودي هنتكلم عنها يعني ايه وازاي الواحد يحسبها
19:35
الحلقة (29) : الاكتتابات العامه
لو واحد النهاردة معندوش أي فكرة يعني إيه طرح عام تقدر تقوله إيه؟
الطرح العام هي عملية انك بتاخد شركة خاصة مملوكه لمجموعة أفراد او لمجموعة مؤسسات تاخدها للتداول العام في البورصة ، العملية دي بتتعمل عن طريق إنك بتدرج جزء من أسهم الشركة دي لكذا سبب أهم سببين السبب الأولاني أنك تزود رأس مال الشركة دي عن طريق انك تطرح مجموعة أسهم الشركة في السوق وتبتدي تعمل زيادة لرأس المال للشركة أو الجهة المالكة للشركة دي بتبقى عاوزة تتخارج بحصة من ملكيتها في الشركة دي لمجموعة أفراد مش لشخص بعينه والتداول فيها بيبقى تداول علني على المشاع لمجموعة مستثمرين أو لسوق معين فبالتالي بتاخد الشركة دي للتداول عام
20:30
الحلقة (30) : من أنتم؟ (نحن نعلم عنك الكثير)
حلقة النهاردة عنوانها من أنتم ، من أنتم مستمعين كلام ينور احنا عندنا على صفحة الانستجرام بتاعتنا بنعمل تقريباً كل اسبوع إقتراع أو حاجه بتدي فيها رأيك أنت كمستمع وبنسأل سؤال الإقتراع ده إجابتة بتبقى بـ آه أو لأ معظم الوقت الفكرة منها ان احنا بنحاول نعرف المستمعين بتوعنا بيفكروا في إيه ، حاسين بإيه ، إيه مشاكلهم في الحياة المالية ومن خلال الحاجات دي بنحاول نساعد في أختيار أنواع الحلقات أو الموضوعات اللي بنحس انه مهم بالنسبة للناس فأنا كنت عاوز أخد الفرصة في الحلقة دي احنا في العادي بنجاوب على اسئلة المستمعين في الحلقات العاشرية يعني حلقة 10 ، 20 ، 30 ، النهاردة في الحلقة رقم 30 انا هغير الموضوع شوية وهتكلم من أنتم ، أنتو مين اللي بيسمعونا
21:26
الحلقة (31) : ما وراء اختيار البنك
كنا اتكلمنا قبل كده عن البنوك وأنواع الأدوات الادخارية اللي احنا ممكن نستخدمها شهادات الاستثمار ، الودايع ، حسابات التوفير الحاجات دي كلها في حلقة قديمة ممكن ترجعوا ديماً تسمعوها النهاردة انا هتكلم على موضوع مختلف ازاي هختار البنك بقى نفسه ، يعني انت النهاردة في اول حياتك بتبتدي تسمع البودكاست ده انت طالب في الجامعة ولسه هتبتدي تتعامل مع الفلوس دي حلقة مهمه بالنسبالك ، انت بتتعامل مع البنوك بشكل يومي زي أي حد فينا في نص حياتك المهنية برده لازم تفهم ليه مختار البنك ده ، وليه بتتعامل مع البنك ده بالذات ، وايه المميزات لو انت هتنقل لبنك تاني أنا بس بفكر معاكوا وانا بعمل قائمة بالحاجات اللي انا عايزها في البنك ازاي أفكر فيها ، وطبعاً طبعاً زي كل مره كل واحد هيبقى عنده احتياجات مختلفة عن الأخر ، يعني مفيش واحد هيختار البنك زي التاني وده لأسباب كتير واضحه بالنسبالي واللي هنتناقش فيها في الحلقة دي النهاردة
22:25
الحلقة (32) : الخصومات وألوان الجمعة المختلفة : الحقيقة المُرة
بما اننا في موسم كده يعتبر موسم تسوق (شوبينج) عن طريق حاجه زي عيد الشكر الأمريكي أتشهرت في الفترة الأخيرة إن الفترة دي بيحصل فيها خصومات كبيرة على سلع معينة مبتحصلش طول السنة أتحولت في المناطق العربية بتاعتنا بيسموها الجمعة البيضاء أو الصفراء أيا كان اللون اللي حضرتك بتشوفه في الدعايا اللي بتحصل في المنطقة ، ولكن هما ديماً بيشجعوا في الفترة دي على التسوق وبرده موسم نهاية العام الكريسماس وأعياد الميلاد اللي حوالين الفترة دي فبتعتبر موسم تسوق أنا النهاردة بحاول أتكلم على حاجات معينة الناس بتعملها في أساليب الدعاية ، الطريقة دي بتخليك تحاول تستهلك أكتر مع أنك ممكن متكونش محتاج الحاجه أصلاً ولكن في حيل فرق التسويق بتعملها بحيث تحاول تخلي حضرتك تصرف أكتر ، طبعاً أنا مش ضد أي حاجه أنا بس بقول ان أنت تاخد بالك لو الحاجات دي بتحصلك يبقى دي علامة من العلامات إن انت ممكن تشتري حاجه انت مش محتاجها
23:31
الحلقة (33) : التكلفة الحقيقية للتدخين
النهاردة أنا هتكلم على عادة من العادات اللي احنا بنشوفها في المجتمع بتاعنا وهتكلم عليها من منظور مالي بحت حاجه من الحاجات اللي أنت ممكن تستخدمها إنها تساعدك في التقاعد ، حاجه من الحاجات اللي أنت ممكن تبتدي تشيلها من حياتك وتساعدك إنك تعيش حياة أفضل من الناحية المالية ، من الناحية الصحية طبعاً هي ليها فوايد كتير بس أنا مش هحاول أغطي الموضوع ده كتير النهاردة في الحلقة دي أنا هحاول أتكلم على الجانب المادي العادة اللي احنا بنتكلم عليها هي عادة التدخين ، وعادة التدخين هي من العادات طويلة الأجل اللي هو أنت بتلاقي المدخنين بيقعدوا 10 / 15 / 20 / 30 سنة مدخنين ، هي حاجه مش بتخلص في يوم وليلة وأنا متعمد أختار حاجه زي دي لأنها بتتواجد عند ناس كتير صعبه في تبطيلها طبعاً وصعب الخروج منها ولكن لو بصينا على الناحية المالية هنلاقي حاجات كتيره جداً مكناش واخدين بالنا منها
24:28
الحلقة (35) : من وراء كلام ينور - مزيكا
النهاردة هي حلقة مختلفة هنتكلم مع حد من الناس اللي ساعدونا اننا نعمل البودكاست ده هدف حلقة النهاردة أنها تديك فكرة أن البودكاست ده في فريق وراه والنهاردة هنستضيف أول واحد من الفريق ده برده يشجعك على انك لو عاوز تبتدي حاجه ازاي ممكن تبتدي وتعرف التجربة اللي احنا بنمر بيها عشان نطلع البودكاست ده يارب تكون حلقة ملهمه لأي حد بيسمعنا أو حاجه تلهمك تبتدي حاجتك سواء بتعمل محتوى أو عندك فكرة عاوز تطبقها واستخدام الغير يعني مش لازم يبقى عندك شركة كبيرة أو عندك فريق كبير عشان تنتج حاجه شكلها متميز أو محطوط فيها مجهود ممكن تستخدم ناس في الخارج فيارب الحلقة دي تنول حسن رضاكم وهنكرر الموضوع ده مع ناس تانية ساعدتنا في البودكاست
25:21
الحلقة (36) : ازاي تبدأ شركتك الناشئة
انت كنت في استثمارات ليها علاقة بالأسهم اللي في الأسواق المدرجة ودي بتبقى أنواع شركات معينه وصلت لمرحلة من النمو انها تقدر تنزل على بورصة وهكذا.. مؤخراً نقلت روحت للشركات الناشئة وفكرتي النهاردة أنا عايز أشوف انا كواحد صغير لسه ببتدي مشروعي او فكرتي ، ببتدي حاجه بحبها ازاي أنت كمستثمر بتبصله من جميع النواحي من الناحية المالية من ناحية الإدارة ، جودة الإدارة ، جودة عرض الفكرة كل الحاجات دي .. فأنا النهاردة ببتدي فكرة وعايزك كمستثمر تبص عليا هعمل إيه أول خطوة؟
26:05
الحلقة (37) : ميزانيتك : إزاي وليه؟
بمناسبة بداية السنة الجديدة حبيت ابتدي معاكوا السنة إن احنا نتكلم على الميزانية ازاي ممكن تعمل ميزانية؟ إيه فوايدها؟ إيه اللي أنت محتاج تحققه؟ إيه أهدافها؟ وكل الحاجات دي ، ومن أكتر الاسئلة اللي بتجلنا ديماً اننا مش عارفين نعمل ميزانية ، أبتدي منين؟ فتعمدت كده مع بداية السنة إن الناس تبتدي تفكر في 2022 بطريقة مختلفة ، تعمل ميزانية في أول السنة وتحاول تلتزم بيها أنا عن نفسي بقعد كل يناير تقريباً أعمل العادة دي فتعمدت أعملها معاكوا واحده واحده كده نمشي مع بعض بخطوات بسيطة نشوف احنا ممكن نوصل لإيه
26:48
الحلقة (38) : ميزانيتك: الخطوات والتفاصيل
حلقة النهاردة هي تكمله للحلقة اللي فاتت اللي اتكلمنا فيها على الميزانيات ، الخطوط العريضة اللي أتكلمنا عليها في الميزانية بتاعة (50 - 30 - 20) اللي هي 50% بتروح على المصاريف الأساسية 30% بتروح على الكماليات أو الحاجات اللي أنت عايزها و20% على الأقل بتروح للاستثمار ودفع الديون بس برده لازم أقول تاني إن كل واحد في مرحلة معينة من حياته أشكال الدخل بتختلف المصروف بتاعك هيبقى شكله مختلف برده فحضرتك لازم تبقى عارف إن السنادي الميزانية بتاعتك هتختلف عن السنة الجاية هتختلف عن السنة اللي وراها احنا مش بنبني ميزانيات أكتر من سنة بنمشي سنة بسنتها لأن بيبقى عندنا نظرة على السنة بالكامل إيه اللي ممكن يحصل فيها ومتوقع قد إيه في كل بند من البنود اللي احنا هنتكلم عليها
27:37
الحلقة (40) : ما يسأله المستمعون - الجزء الثالث
حلقة النهاردة زي ما اتعودنا هي حلقة ليها علاقة بالاسئلة اللي جايه من خلال صفحتنا على السوشيال ميديا احنا سألنا الناس إيه أكبر تساؤلات في حياتهم المالية هنحاول نرد على أكبر عدد من الاسئلة احنا بنجمعهم وكل 10 حلقات بنحاول نرد عليكم فيها
27:55
الحلقة (41) : ما يسأله المستمعون - الحزء الرابع
الحلقة اللي فاتت بصراحة كان عندنا اسئلة كتير جداً جداً في الحلقة رقم 40 ومعرفناش نغطي كل الاسئلة الموجودة فغصب عننا كسرنا النظام بتاعنا وعملنا حلقة تابعه للحلقة 40 بقت الحلقة 41 اللي هي حلقة النهاردة برده بنحاول نغطي فيها اسئلة وشوفنا كلامكوا إن الناس ممكن تبقى عايزة أكتر اننا نغطي الاسئلة بتاعتكوا فيارب تستمتعوا بالحلقة دي برده وتبعتولنا ديماً احنا على جنب كده بنجمع الاسئلة لو حاجه مغطينهاش بنحاول نغطيها في حلقات قدام
28:31
الحلقة (42) : الزكاة 101 (نادر التهامي)
اهلاً بيكوا في حلقة جديدة من بودكاست كلام ينور حلقة النهاردة هي حلقة مختلفة شوية لأول مرة أنا بستضيف حد صانع محتوى Halal Stock Tok أنا لقيت حساب بالصدفة كده على إنستجرام اسمه وتواصلت مع صاحب الحساب أستاذ نادر ودعيته اننا نعمل بودكاست وهو شاكراً يعني رد عليا على طول وكان الموضوع سهل جداً أننا نتواصل مفهوم الزكاة هو مفهوم مش سهل ، طريقة حساب الزكاة خاصة لما نخش في فئات الأصول المختلفة زي الأسهم ، العملات المشفرة أو أي حاجه أنت بتاخدها للاستثمار فكنت عايز ألاقي حد يشرحلنا المفهوم ده وعندي اسئلة كتير في دماغي هسألها لأستاذ نادر أنا مبسوط جداً أنه معايا النهاردة أنا طبعاً مفيش سابق معرفه فأتبسطت جداً اني أول ما بعتله هو رد عليا وهنعمل الحلقة دي مع بعض
29:30
الحلقة (43) : ازاي تقيم أدائك في البورصة
حلقة النهاردة حلقة بنتكلم فيها على موضوع ليه علاقة شوية بالبورصة أو الاستثمار بشكل عام وكنت عايز ابتدي بسؤال اسأله ليك كده : هل عمرك فكرت ازاي الأسواق أدائها بيتقاس؟ يعني سوق أسهم في بلد معينه ازاي بنقسيه؟ بنقول هو طالع بشكل كويس أو نازل كتير.. ازاي يعني؟ يعني هل في طريقة معينة الناس أتفقت عليها أنها تقيس الأداء ده وده اللي أنا هحاول أغطيه النهاردة إن شاء الله في الحلقة
30:07
الحلقة (44) : الحرية المالية ومفاهيمها (من كلوب هاوس)
زي ما قلنا كده الاسبوع اللي فات ان احنا كنا بنحاول نبتدي نعمل لايف سيشنز او نشوف منصات نطلع عليها لايف بحيث يبقى في تفاعل مع الناس اللى بيسمعونا الاسبوع ده انا عملت سيشن على كلوب هاوس مع صديقي عمرو عبد الفتاح هو CO بتاع طياري، اتكلمنا فيها عن الحرية المالية ازاي توصل لها، المفاهيم اللي حواليها والنهارده في حلقه بتاعه النهارده قررنا ان احنا الناس اللي ما حضرتش السيشن دي ممكن تسمعوها وهنبتدي نعلن على السوشيال ميديا بتاعتنا امتى السيشن الجايه اتمنى ان انتم تستمتعوا بيها انا كانت تجربه اول مره اطلع لايف وكانت تجربة لذيذة جداً بصراحه وهستناكم ان شاء الله الاسبوع الجاي
30:57
الحلقة (45) : من هو المستثمر الأفضل .. الرجل أم المرأة؟
حلقة النهاردة بتجاوب على سؤال : مين كمستثمر أفضل الرجل ولا المرأه؟ وهنا أنا مش بسأل السؤال عشان أقارن ما بين مجموعة من الناس ضد بعض أو اني اشوف مين كسبان والكلام ده ولكن هو بيسلط الضوء على موضوع مهم بالنسبالي إن في تحيزات معينة للراجل وفي تحيزات معينة للمرأه ومن خلال الحلقة دي هنفهم ازاي التحيزات دي ممكن تأثر على القرارات الإستثمارية بالنسبة للرجل وازاي التحيزات دي بتأثرعلى القرارت الإستثمارية بالنسبة للمرأه وبالمرة كده نشوف مين كسبان مين عرف يعمل عوائد على المدى الطويل وعملها ليه وتفاصيل تانية كتيرة من خلال الحلقة دي
31:41
الحلقة (46) : الحرية المالية للمرأة وأهميتها (من كلوب هاوس)
عمر احنا المره اللي فاتت عملنا حلقه بتتكلم عن الحرية المالية بشكل عام للرجالة والستات وكل حاجه النهارده احنا بمناسبة اليوم العالمي للمرأة حابين ناخذ المنظور ده ونربطه اكتر بالمرأة فممكن سريعا كده تشرح لنا وبعد كده نبتدي نربط الموضوع بالمرأة
31:58
الحلقة (47) : العائد على المجهود
في حلقة النهاردة هتكلم على مفهوم مختلف يمكن الناس عمرها ما فكرت فيه بس دي حاجه أنا ديماً بحطها في الحسبان بتاعي وأنا ببص على أي فكرة إستثمار وهي العائد على المجهود اللي أنا هعمله بمعني إن ممكن يبقى عندي فكرة كويسة في مختلف فئات الأصول اللي احنا أتكلمنا عليها كذا مرة ولكن أنا ديماً بقعد أقارن ما بين العائد على الإستثمار بس والله الفكرة دي هتعملي 20% في السنة والله الفكرة دي هتعملي 10% في السنة ، فالفكرة اللي هتعملي 20 تعتبر فكرة أحسن من 10 ولكن مبناخدش بالنا من إن في حاجه اسمها المجهود اللي أنا بعمله.. أنا كمستثمر لازم أعمل نوع معين من المجهود.. وهنتكلم وهنحاول نجزأ إيه الأسئلة اللي ممكن أسئلها لنفسي عشان أعرف هل فعلاً الـ 20% دي أحسن ولا الـ 10% من منظور مختلف بتمثلي فرصة إستثمارية بشكل أحسن
32:53
الحلقة (49) : ما وراء صناديق الاستثمار المتداولة
ETFs النهاردة موضوعنا متعلق بصناديق الاستثمار وعايز أتكلم على الصناديق المتداولة على البورصة اللي بتتسمى
احنا أتكلمنا في حلقة قبل كده عن صندوق الاستثمار مين بيبعه ، ازاي تقدر تشتريه التفاصيل دي كلها ممكن تقدر ترجع للحلقة اللي فاتت وتسمع أكتر عن صندوق الاستثمار ولكن احنا النهاردة هنزود ونقارن بين صندوق الاستثمار العادي المتعارف عليه بحاجه اسمها صناديق المؤشرات أو الصناديق المتداولة على البورصة
33:25
الحلقة (50) : ما يسأله المستمعون - الحزء الخامس
حلقة النهاردة زي ما اتعودنا هي حلقة ليها علاقة بالأسئلة اللي جايه من خلال صفحتنا على السوشيال ميديا هنحاول نرد على أكبر عدد من الأسئلة احنا بنجمعهم وكل تقريباً 10 حلقات بنحاول نرد عليكم فيها
33:40
الحلقة (51) : السندات / الأسهم
في حلقة النهاردة عايز أرجع كده لمفاهيم أساسية بسيطة يمكن متغطتش في الحلقات اللي قبل كده وده عشان عايز الناس تفهم معايا الفكرة ورا الأسهم والسندات.. يعني مقارنة بسيطة كده يعني إيه أسهم ويعني إيه سندات لأن أنت ممكن تكون حابب تستثمر في الحاجات دي وأنت مش فاهم النظرية الأساسية هي ليه أتعملت ، ليه موجودة ، ليه كمستثمرين بنحاول نبص على الحاجات دي.. وازاي مع الوقت بتحقق العوائد فعايز أبتدي في الأول يعني إيه اصلاً سهم ويعني إيه سند
34:15
الحلقة (52) : بعد سنة
النهاردة الحلقة رقم 52 ودي تعني إن احنا الحمدلله قفلنا سنة يمكن إسبوعياً الحمدلله بنزل حلقة كل إسبوع فقررت أقف مع نفسي وقفه كده بعد سنة وأحاول أمشي معاكوا كده في أنا أتعلمت إيه من التجربة دي وإيه المفيد فيها وازاي تقدر تاخد حاجات منها وتحاول تعملها في شغلك أو في فكرك الإستثماري بشكل عام يارب بس متكونش ممله يعني نوعاً ما احنا بنحاول نحتفل مع بعض بالسنة دي وأعتقد الحمدلله في ناس بتبعتلي وشايفه من ردود الأفعال اللي بيجيلي على البودكاست ده قد إيه هي حاجات بسيطة ممكن تغير الفكر بتاعك أنا بس مش عاوزك تكون بتسمع البودكاست من غير ما تنفذ أنا أهم حاجه عندي إن المعلومات اللي جايه دي تقدر تاخدها وتترجمها في حاجه تقدر تأثر بيها على حياتك أنا مش من النوع اللي بيحب يعرف المعرفه للمعرفه يارب تكون السنة دي فرقت معاكوا ولو مفرقتش معاكوا إن شاء الله السنة اللي جايه دي تفرق معاكوا
35:15
الحلقة (53) : رؤية للحياة المالية في سنة - عيد ميلاد كلام ينور (من كلوب هاوس)
هاي يا عمرو ازيك
كل سنه وانت طيب الاول يا عمر
وانت طيب يا عمرو ربنا يخليك
خلينا نبدا مقدمه سريعه كده عن انت بتعمل ايه وحياتك وبتشتغل ايه والخلفية بتاعتك وبعدين نبدأ نتكلم عن كلام ينور.. اوكي احنا من سنه كده ابتدينا بودكاست اسمه كلام ينور بتناقش مواضيع ليها علاقة بالحياة المالية ، الثقافة المالية ، الحرية المالية وازاي تتعامل مع الفلوس والحاجات دي
35:41
الحلقة (56) : أهمية العائد على الاستثمار وتطبيقه على العقارات
النهاردة أنا عايز أتكلم على موضوع يمكن اتكلمنا عليه قبل كده وهو العائد على الإستثمار ولكن عاوز أبص عليه من منظور آخر يعني أول حاجه ازاي أقدر أحسب العائد على الإستثمار بتاعي أو أنا ليه بأحسب العائد على الإستثمار لأن دي الحاجه الأساسية اللي أنا قبل ما أخش إستثمار أياً كان شكله سواء في الأسهم أو صناديق الإستثمار أو العقار والنهاردة هركز في الحلقة دي أكتر على العقار لازم يبقى عندي إجابة للعائد على الإستثمارر فأختلفت الأسباب هنا بس القياس هيفضل ديماً بالنسبالي واحد وهو العائد على الإستثمار
36:17
الحلقة (57) : كل ما تريد معرفته عن ثاندر - الجزء الأول
حلقة النهاردة من الحلقات المهمه جداً بالنسبالي لأن من أكتر الاسئلة اللي بتجيلنا من الناس إنها عايزة تبتدي تستثمر مش عارفين يستثمروا فين ، مش عارفين يفتحوا حسابهم فين .. إيه المنصات اللي احنا ككلام ينور يعني ممكن ننصح بيها ، ولكن أنا ديماً بقول أنا بحاول أبقى حيادي على قد ما أقدر قبل ما أرشح حد لازم نعمل معاه على الأقل لقاء نعرف هو بيعمل إيه ، بيقدم إيه للناس ، إيه المزايا إيه العيوب ، إيه اللي بيحاول يبنيه
36:44
الحلقة (58) : كل ما تريد معرفته عن ثاندر - الجزء الثاني
زي ما أنتو عارفين الاسبوع اللي فات أتكلمنا مع أحمد حمودة المؤسس الرئيسي لمنصة ثاندر للتداول ، أحمد هياخدنا برده النهاردة في رحلة تاني جوه ثاندر ، هنغطي مواضيع زي عمليات التداول نفسها بتتم ازاي ، تحويلات الفلوس ، إيه الجهة الرقابية اللي بتراقب على ثاندر .. مواضيع مختلفة كتير أنا ديماً ببص عليها لو هبص على أي شركة سمسرة أو منصة تداول ، ازاي أطمن كمستثمر النهاردة هنكمل حديثنا معاه
37:12
الحلقة (59) : 8مراحل في الطريق للحرية المالية
بعد ما أتكلمنا كتير في مواضيع مالية مختلفة ومبدأ الحرية المالية والمصطلحات الكتير اللي أتكلمنا عليها حاولت النهاردة أجهز حاجه بتكلمك على الطريق نفسه بقى كله شكله عامل ازاي يعني النهاردة بعد ما تسمع الحلقة أنت ممكن تكون عارف مكانك أو حضرتك ممكن تكوني عارفه مكانك في الطريق بتاع الوصول للحرية المالية ، نقدر نعرّف مراحل مختلفة إيه اللي بيميزها ، إيه العيوب في كل واحده فيهم ، تقدر تحط نفسك على الطريق ازاي وهكذا لأن برده طول ما أحنا ماشيين كده وأنت مش عارف أنت واقف على أي أرض أو في أي مكان أعتقد الموضوع صعب شويه.. فأنا النهاردة هتكلم على 7 مراحل ومرحلة صفر يعني 8 مراحل تقريباً في الطريق بتاع الحرية المالية
37:58
الحلقة (60) : ما يسأله المستمعون - الحزء السادس
كنا نزلنا بوست في شهر مارس عن الناس اللي هي مهتمة تتكلم معايا او عندها اي اسئله شخصيه يبعتوا لنا بس على الصفحة بتاعتنا بحاجات مثلا عملوها في الفتره اللي فاتت وناس كثير بعتت لنا الحمد لله احنا كنا عاملين الدعوه دي لخمس افراد بس احنا بسبب العدد اللي بعت لنا احنا خلينا اعتقد احنا اتكلمنا مع 10 هنبتدي نذيع أجزاء من اللقاء بتاعنا معاهم في الحلقات الجايه ان شاء الله وانا اتبسطت جدا جدا مع الناس لان الاسئله كانت بصراحه جميله جدا وبعدين مش كده بس انا اللي بسطني اكثر التطور في الفكر بتاع الناس هو ده الهدف بجد بتاع البودكاست من اللقاءات دي اتمنى ان هو يلهم الناس انها بعد برده تاخد خطوات في نفس الاتجاه
38:49
الحلقة (61) : ما يسأله المستمعون - الحزء السابع
النهارده احنا هنكمل بقية الاسبوع اللي فات نفس الموضوع اللي بنتكلم مع المستمعين بتوعنا في حلقة النهارده بالذات كمان النماذج اللي فيها مخليني عندي امل ان الناس اتغيرت انت برضه لو بتسمع حاجه النهارده تكتشفوا ان الموضوع ممكن يكون سهل الموضوع ممكن يتعمل في نماذج قدامنا ملهمة للناس انها تبتدي النهارده انا هسيبه تستمتع بجزء من اللقاءات دي ويارب الحلقه هتعجبكم
39:20
الحلقة (62) : داخل دماغ المستهلك
الحلقة دي حلقة مختلفة جداً لأنها مكتوبة من الأستاذ مصطفى أحمد من مستمعين البودكاست احنا كنا نزلنا على انستجرام بنسأل الناس : تفتكر ازاي ممكن تقلل الصرف في السوبرماركت. وهو بعتلي شاكراً على الصفحة بتاعة الانستجرام كذا تعليق جميل ، كان من أكتر الناس اللي ردت على السؤال والردود بتاعته كانت كويسة جداً وموضوعية جداً وبعدين كنت بشكره على إجاباته وكده فعرض عليا يكتب حلقة قالي إيه رأيك قولتله طبعاً ياريت دي حاجه تشرفني وفعلاً بعتلي شاكراً سكربت بتاعها بعديها بيوم عملنا عليه شوية تعديلات والنهاردة هنتكلم ونشوف إيه اللي كان مكتوب.
40:00
الحلقة (63) : خطوات تنفيذ الميزانية
حلقة النهاردة من الحلقات اللي بعتبرها من التجارب العملية بتاعتي يعني حاجه أنا يمكن بقالي كتير بعملها توصلتلها بمجهوداتي الشخصية طبعاً من قرايات أو بشوف ناس تانية بتعملها ازاي بس ده نظام أنا بحاول أوصله وبحاول ألتزم بيه عشان يسهل عليا درايتي المالية شكلها عامل ازاي شهرياً بتعامل مع الفلوس ازاي وهي التطبيق العملي التنفيذي للميزانية
40:27
الحلقة (64) : مخاطر سوق الأسهم
فأنا عايز من خلال حلقة النهاردة أتكلم بس على المخاطرة بتاعة البورصة ، أفصص الموضوع كده وأقسمه لنقط صغيرة كتير بحيث إن انت تفهم أنك بتعرض نفسك لما بتخش البورصة لمختلف أنواع من المخاطر وهي مش بس مخاطرة إن السهم اللي بتشتريه ينزل أو يطلع، أنا عايز أعرفك النهاردة بطريقة نوعاً ما طريقة علمية المخاطرة هي بس مش إن سعرك ينزل، إيه اللي بيخلي سعرك ينزل أو يطلع بعيداً عن أداء الشركة نفسه في حاجات تانية حوالين الموضوع عايز أتكلم فيها النهاردة معاكو بإستفاضة وأنا مش ضد إنك تستثمر في البورصة أنا ضد إنك تستثمر في حاجه أنت مش فاهم فيها أو مش عارف إيه المخاطرة اللي أنت بتحط نفسك جواها
41:13
الحلقة (66) : المجال المالي كوظيفة
النهاردة ضيف حلقتنا الأستاذ وائل غنيم مدير إدارة تداول المؤسسات في شركة ضمان للإستثمار اللي موقعها في الإمارات وائل النهاردة هيكلمنا على ازاي لو أنت حابب تبتدي في المجال المالي ، لو المجال ده من طموحاتك إيه الحاجات اللي أنت ممكن تركز عليها إيه الحاجات اللي المفروض تعملها ورحلته في المجال ومن خبرته كمان هو شاف إيه ينصح الناس تعمل إيه
41:39
الحلقة (67) : الفرق بين الموظف ومؤسس الشركة - الجزء الأول
تحب بقى نبتدي ازاي النهاردة من أخر مره احنا اتكلمنا ممكن نبتدي بحاجه بسيطة كده وهو أنت النهاردة لما بتبتدي شركة ناشئة أو واحد بيشتغل في مجال معين إيه الفروقات الأولانية اللي بتشوفهم بين النموذجين دول لأن ديماً الناس اللي بتكلمنا يا إما هو في وظيفة ثابتة يا إما هو في شركة ناشئة أو بيبتدي شركة ناشئة فهل في قاسم مشترك ما بينهم أو حاجه تقدر تكلمنا عليها النهاردة؟
42:01
الحلقة (68) : الفرق بين الموظف ومؤسس الشركة - الجزء الثاني
طيب لو روحنا تاني لناحية الشركات ، أنا راجل فتحت شركة وقدرت أعدي الناحية التانية وعرفت أجيب الفريق وعملت الحاجات دي .. أنت من أكتر الناس في المنطقة هنا قابلت فرق مختلفة في قطاعات مختلفة في أعمار مختلفة في مراحل شغل مختلفة أنت إيه النصايح اللي المهمه اللي بتديها للناس ازاي بتخلي الشركة تفكر في العائد على الوقت بتاعها بقى من ناحية الشركة؟
42:34
الحلقة (69) : استضافة مع خمسة بيزنس - الجزء الأول
الأول كده هحكي قصة سريعة اللي خلتني أتعرف على مش بقى ضيف حلقة النهاردة هو مقدم حلقة النهاردة يعتبر لان انا كنت مستضاف عنده في الحلقة بتاعته في البودكاست بتاعه القصة دي ابتدت لما ابتديت أفكر أعمل البودكاست أول يوم أخد كده فترة أنا يمكن ذكرت الموضوع ده قبل كده في حلقة من الحلقات القديمة إني أعمل كده دراسة للسوق أشوف إيه اللي بيحصل ، البودكاست العربي عامل ازاي مين بيقدم محتوى شكله عامل ازاي وهكذا من البودكاستس اللي أنا لقيتها ولقيتها كويسة جداً بصراحة طريقة العرض ، الصفحة بتاعة البودكاست ، ازاي اصلاً تعرف يعني إيه بودكاست الراجل نفسه عايز يعرفك هو بيعمل إيه قبل ما يديك المحتوى ، الرسالة اللي هو بيحاول يقدمها ، المواضيع الكلام ده كله كان بودكاست خمسة بيزنس النهاردة هنذيع الجزء الأول منها
43:24
الحلقة (70) : استضافة مع خمسة بيزنس - الجزء الثاني
النهاردة هنكمل اللقاء بتاع الاسبوع اللى فات الميزة في اللقاء ده اللي عجبني فيه بصراحة ان يوسف مش في المجال المالي يعني يوسف بيشتغل في حاجه بعيدة عن المجال ده ، هو استشاري في النمو الرقمي وده طبعا من المجالات المهمه جدا جدا في وقتنا الحاضر لان انت طبعا ممكن يكون معاك سلعة كويسه ممكن يبقى معاك فكره كويسه بس انت محتاج تقدمه للعالم و الديجيتال ميديا عموما أهميته يوم عن يوم بتزيد كمان البودكاست بتاع يوسف ورجع حتى للناس اللي عايزها تعرف اكثر عن المجال ده فإنه يجي يحاورني ويسالني انا عجبني قوي الزاويه ونواعد الاسئله فيا رب تكونوا استمتعتوا بحلقة اللي فاتت و اسيبكوا مع حلقة الاسبوع ده
44:06
الحلقة (71) : ما يسأله المستمعون - الحزء الثامن
هكرر نفسي كالعاده احنا بنعمل الحلقات دي للمستمعين اللي عندهم اي اسئله فورمات مختلفة ساعات يبعتولنا فويس نوت او ساعات بنعمل سيشنز معاهم او يبعتولنا اسئله على الصفحه واحنا بنحاول نقرا نقرأ الاسئلة فالنهارده هتبقى من الفورمات بتاعه السيشنز عملنا لقاءات جميلة مع ناس بتبتدي حياتها او في نص طريقها في الاستثمار أنا سعيد جدا جدا بالتجربه دي وسعيد ان انا بتعرف على الناس اكتر واسيبكم ان شاء الله تستمتعوا بالحلقة بتاعه النهارده
44:43
الحلقة (72) : ما وراء القطاعات
حلقة النهاردة أنا حاسس إنها مهمه جداً لكل الناس ، الناس اللي عايزة تستثمر ، الناس اللي عايزة تبتدي شغل ، الناس اللي عايزة تستثمر مع أصحابها ، أو حتى المديرين اللي قاعدين في الشركة اللي بيخططوا لمستقبل الشركة والكلام ده .. ليه لأن النهاردة احنا هنتكلم عن القطاعات والقطاعات هي من أهم الحاجات اللي أنت لازم تفهمها في مجال الأعمال يعني النهاردة أنا لما أروح أفتح مطعم ، المطعم ده هو بينتمي لقطاع جوه الإقتصاد ، يعني إيه قطاع يعني مجموعة من الأنشطة بتعمل نفس الحاجه هنلاقي مثلاً لو روحت فتحت سوبر ماركت فأنا مرتبط هن بقطاع التجزئة مثلاً ، فتحت مثلاً المواد الغذائية يبقى ممكن تبقى تصنيع أو زراعة يبقى هنا التصنيع حاجه والزراعة حاجه تانية خالص ليه لازم أفهم القطاع بتاعتي لأن ده هيأثر على قرارات كتير جداً في طريقة الإستثمار ، حجم الإستثمار بتاعي ، محفظتي .. حاجات كتير جداً هنحاول نغطيها النهاردة في الحلقة
45:38
الحلقة (73) : توزيعات الأرباح في البورصة
النهاردة احنا بنحاول نغطي موضوع بالنسبة للناس اللي بتستثمر في أول حياتها وعايزة تعرف إيه العمليات غير الشراء والبيع اللي أنت ممكن تشوفها في محفظتك وبالنسبالك ممكن تبقى معقدة شوية ومش فاهمها .. يعني أنا في أول حياتي أتذكر وانت ممكن كمان أول مره نشوف الحاجات دي بالنسبالنا برضه كانت غريبه ، فأنا في ناس كتير من اللي بيسمعونا لأول مره بيستثمروا وبيبعتولي رسايل فأنا عايز أتكلم كده وابتدي معاك في أول نوع على أرباح الشركات بشكل عام..ازاي الشركة بتوزع أرباحها في السوق؟ يعني لو أنا عندي حصة في شركة وعندي أسهم.. ازاي الشركة بتوزع الأرباح بتاعتها؟
46:19
الحلقة (74) : تقسيم، شطب، إدراج الأسهم في البورصة
النهاردة هنكمل على الموضوع اللي احنا ابتديناه الحلقة اللي فاتت وهو تصرفات المؤسسات بمعنى إيه الحاجات اللي ممكن تحصلك لو بتستثمر في البورصة وخاصة الأسهم ، إيه الحاجات اللي الشركات بتعملها أنت مش محتاج طبعاً تعمل فيها أي حاجه لأن دي بتبقى جايه من مجلس الإدارة وكده ولكن دي بتأثر على الحساب بتاعك المره اللي فاتت أتكلمنا على الأرباح النهاردة هنتكلم على أنواع تانية زي مثلاً تقسيم الأسهم وحاجات تانية كتير هنتكلم عليها النهاردة في الحلقة
46:47
الحلقة (75) : حلقاتك برجالاتك
النهاردة أنا هتكلم على موضوع ليه علاقة بالزيادة بتاعة الفلوس بشكل متضاعف بسبب الوقت ، النهاردة أنا هتطرق للموضوع بطريقة مختلفة شوية بإننا هبص على مين أكتر واحد عنده وقت في الدنيا – طبعاً الأعمار بيد الله زي ما أحنا عارفين – ولكن العمر المتوقع لطفل لسه مولود هو يعتبر أكتر من والده أو والدته بس إحصائياً مش بتكلم على هل دي حقيقة ولا لأ بس إحصائياً العمر بتاعه أطول
47:20
الحلقة (77) : مؤشر شرا المستهلك - مقياس التضخم
النهاردة أنا هتكلم على موضوع مهم يمكن بيمس كل واحد فينا بيسمع البودكاست النهاردة وهو موضوع التضخم ، احنا أتكلمنا قبل كده يعني إيه تعريف التضخم ، وليه التضخم اصلاً موجود في الأسعار أو في حياتنا وسريعاً كده احنا بنقول التضخم هدفه إنه يخلي الناس ديماً تبقى بتصرف ، الحكومات بيبقى عندها معدل للتضخم مستهدف اللي هو مثلاً في أمريكا 2% سنوياً ان احنا عايزين يبقى في زيادة في الأسعار ولو بسيطة عشان تشجع المستهلكين ديماً إنهم يصرفوا الفلوس اللي بتجيلهم ومن الصرف ده بنقدر نزود الأقتصاد والعجلة الأقتصادية تقدر تدور لأن لو مفيش تضخم أنت هتبطل تستهلك ، يعني لو أنت عارف إن الأسعار بتاعة الحاجه اللي هتشتريها السنادي هي أرخص السنة اللي وراها أو السنة اللي وراها ده معناها إنك ممكن متبقاش عايز تصرف
48:14
الحلقة (78) : العقارات كاش ولا تقسيط
حلقة النهاردة عن قطاع العقارات عموماً بالذات الناس اللي عايزة تشتري بيوت أو أول مره تاخد القرار ده ازاي تقدر تقارن ما بين كذا مشروع ، النهاردة احنا عارفين إن في مشاريع كتيره جداً بتطرح خطط للدفع طويلة ابتدت تظهر في السوق وبنشوف حاجات لحد 15 سنة فإزاي مثلاً تقدر تقارن خطة دفع 8 سنين و 15 سنة ، يعني أنا لو جيت قولتلك في بيت قدامك ممكن تاخده قسط على 8 سنين أو على 15 سنة هل الحاجه اللي هتفرق ما بينهم بالنسبالي هو السعر ولا لأ؟
48:50
الحلقة (79) : من أنتم 2
زي ما أتعودنا ديماً الحلقة اللي بنسمع فيها آرائكم سواء بتبعتولنا أسئلة أو بنستضيف ناس من اللي بيسمعونا ، النهاردة قررت أعمل حاجه زي استقصاء بسيط كده على إنستجرام حطينا كذا "ستوري" نشوف رد الفعل ، التأثير اللي احنا بنعمله ، برضه هشارك معاكوا تجارب ناس تانية بتسمعنا والهدف منها إنك لما تسمع تجارب الناس ده ممكن يوجه فكرك لحته معينة وتشوف المجموعة بتفكر ازاي أو إيه المشاكل اللي عندنا ، إيه المميزات فاحنا عملنا الاسبوع اللي فات على الانستجرام حطينا كذا ستوري
49:30
الحلقة (80) : نتحاسب بعدين
النهاردة هتكلم على موضوع شوفناه في الفترة الأخيرة وأنتشر واعتقد الناس كلها بتشوفه في الأماكن اللي فيها شوبينج اللي هو تشتري دلوقتي وتقسط مش مع التاجر نفسه أو الراجل اللي بيبيعلك لأ مع شركات مختصة لتمويل الأفراد تمويل ممكن نسميه متناهي الصغر أو صغير
49:56
الحلقة (81) : ما وراء السندات
النهاردة أنا هتكلم على موضوع يمكن مبيأثرش في الناس بشكل مباشر كأداة استثمارية الناس يمكن ميكونش عندها خلفية ازاي تستثمر فيها أو ما سمعتش عنها قبل كده بالتفاصيل اللي احنا هنحاول نتكلم بيها النهاردة عليها ، ولكن هو بيأثر في حياتنا كلنا لأسباب مختلفة هو نوع من أنواع التمويل بيأثر في سعر الأقتراض أو السعر اللي الناس بتستلف بيه وبالتالي بيأثر عليك وبيأثر على الدخل اللي بيخشلك لو أنت عامل نوع معين من الاستثمارات
50:26
الحلقة (82) : المحفظة الكلاسيكية (60-40)
النهاردة أنا هتكلم على محفظة كلاسيكية المستشارين الماليين تاريخياً بينصحوا بيها في المجال الاستثماري عموماً وخاصة بتكلم على الأسواق زي السوق الأمريكي اللي هو فيه تاريخ طويل من الاستثمار المحفظة دي اسمها "محفظة متوازنة" أو محفظة (60/40) 60% من المحفظة دي محفظة أسهم متنوعة متمثله بقى في صندوق استثمار بيستثمر في الأسهم أو بيستثمر في صندوق مؤشرات على شكل صندوق استثماري ممكن تاخده من البنوك العادية اللي هي بتبيعهالك أو عن طريق صندوق استثمار متداول استثمار متداول ، الـ 40% الباقية بتبقى محفظة من أدوات الدخل الثابت اللي هي المحفظة اللي بتشتري سندات وبرضه السندات دي بتبقى متنوعة لأنك كمستثمر صغير مبتقدرش تروح تشتري سندات بشكل مباشر عشان بيبقى فيها حد أدني كبير فصنديق الاستثمار اتعملت عشان تحل المشكلة دي
51:22
الحلقة (84) : بدايات الكلام عن الأكل والفلوس
النهاردة حلقة غريبة شوية بالنسبالي وهي جايه من سؤال من حد من المتابعين بتوعنا على الانستجرام بعتلي بيقولي احنا عايزين نسمع حلقة عن علاقة الأكل بالفلوس يعني اللي هو زي الأكل الصحي والوجبات السريعة الغير صحية والحاجات دي كلها عايز بس قبل ما ابتدي الحلقة اقول إني عمري ما درست طب ومليش علاقة بالطب ، ومش بتكلم هنا من الناحية العلمية على قد ما ببص للموضوع من ناحية فلسفية بشوف إيه المعطيات اللي قدامي أكني بدردش معاكو أو مع واحد صاحبي قاعدين كده بنتكلم في الموضوع
52:02
الحلقة (85) : حوار مع مستثمر - اكت فاينانشال - الجزء الأول
النهاردة أنا معايا مصطفى عبد العزيز ، مصطفى هو شريك مؤسس لشركة أكت فاينانشال وهو العضو المنتدب مصطفى النهاردة جاي معانا بصفته مستثمر وخاصة انهم مركزين على السوق المصري ، كنت برضه حابب أتكلم مع مستثمرين من وقت للتاني عشان أدي للناس كده فكرة ازاي المحترفين بيدوروا المحافظ بتاعتهم ، الأفكار ، الحاجات اللي بيمروا بيها فيارب الحلقة دي تكون مفيدة للناس اللي بتسمعنا
52:32
الحلقة (86) : حوار مع مستثمر - اكت فاينانشال - الجزء الثاني
النهاردة هنكمل في الجزء التاني مع مصطفى كلامنا على محفظته وازاي بيستثمر والحاجات دي وبرضه هنشوف حاجات زي ازاي مثلاً تأثير سعر الصرف على استثماراته ، بيفكر في الحاجات دي ازاي خاصة في الأوضاع الموجودة النهاردة فهسيبكم مع الجزء التاني ويارب تستمتعوا بيه
52:50
الحلقة (87) : حوار مع صديق (بين الماضي والحاضر)
النهاردة أنا معايا ضيف محمود ندا هو صديق ليا ، فكرنا نعمل حلقة مع بعض كده مختلفة شوية نتكلم فيها على زمان كده إيه اللي كان بيحصل ، اتعلمنا إيه من تجاربنا وبسأله أكتر شخصياً على الحاجات اللي هو مر بيها حاجات مالية وحاجات غير مالية يارب تستمتعوا بيها
53:06
الحلقة (88) : ما وراء سعر الصرف
النهاردة هنتكلم على موضوع سعر الصرف أو سعر تغيير عملة دولة معينة او دول معينة ، هنتكلم عن المبادئ الأساسية اللي بتأثر في سعر الصرف .. ناس كتير بتسأل على الموضوع ده أنا النهاردة هحاول أتكلم عليها من الناحية الإقتصادية يعني إيه اللي بيحصل بيخلي في تغيير في أسعار الصرف ، ليه دول بتلجأ لأنظمة صرف معينة وهكذا
53:29
الحلقة (89)
النهاردة أنا معايا صديق من أصدقاء الطفولة أدهم السيد ، أدهم هو مدير عام مبيعات في شركة من الشركات متعددة الجنسيات اللي بتشتغل في
FMCG = Fast-Moving Consumer Goods
ودي حاجه أنا لسه عارفها النهاردة أنا عارف المصطلح ده من زمان ، أدهم هيكلمنا بقى إيه هو عالم الـ (إف إم سي جي) يعني أنا أعرفه من زمان بس عمرنا ما أتكلمنا فنياً أوي في شغله فالنهاردة فرصه مع الناس نسمع إيه هو المجال ده ، الناس اللي عايزة تبتدي في المجال ده أو بتفكر تخش المجال ده أعتقد مفيش أحسن من أدهم يساعدنا في المعرفه
54:14
الحلقة (89)
النهاردة الجزء التاني من الحلقة اللي بنتكلم فيها على الـ (إف إم سي جي) والعالم ده ، معايا برضه أدهم السيد ، الحلقة اللي فاتت الحمدلله كانت من أحسن الحلقات اللي فيها ردود الأفعال عايز برضه أقولكم على حاجه احنا إن شاء الله قريب هنعمل لايف مع المستمعين على تويتر هسيبلكم في الشو نوتس عنوانا في تويتر لو تقدر تعملنا متابعة هناك بحيث اننا لما نروح لايف يجيلك نوتفكيشن هسيبكوا إن شاء الله تستمتعوا بالجزء التاني
54:40
الحلقة (91) : آراء المستمعين عن الوضع الحالي
حلقة النهاردة بما إن معظم المستمعين بتوعنا من مصر فانا قررت كده الحلقة اللي بنعملها كل 10 حلقات مع المستمعين قررت اسأل الناس شوية اسئلة ليها علاقة بالوضع الحالي يعني في أزمة إقتصادية في غلاء في تضخم مصطلحات كنا اتكلمنا عليها في حلقات قبل كده وقولت أفكر معاكوا واشوف ردود فعل الناس هتبقى عاملة ازاي لأن انا بحس إن من جوه الأزمة ديماً الناس بتبقى مبدعه ، الفرص أصلاً بتتصنع جوه الأزمات حاجه مهمه جداً الناس لازم تبقى عرفينها إن الوضع متغير طول العمر يعني انت عمرك ما هتبقى عايش جوه أزمه 100% من الوقت وعمر الدنيا ما هتبقى ظريقة طول الحياة
55:23
الحلقة (93) : وهم السيطرة
حاجه في حاجه اسمها وهم السيطرة اني مسيطر او الافعال اللي انا هعملها هتأثر في النتيجة وبنشوف الوهم ده في أفراد بيبقى عندهم ثقه زائده أن قراراتهم دي هتؤدي الى نتائج ايجابية مثلا ولكن في الطبيعي أن الحاجات اللي بتطلع النتيجه بتاعه الحاجات دي هي مش من السيطرة بتاعتهم هي من عوامل تانية في البيئة المحيطة بالمشكلة دي
55:52
الحلقة (94) : وهم المعرفة
وهم المعرفة هو إحساس الناس انها فاهمه عن موضوع بطريقة عميقة ولكن الوهم ده بيتكون ان انت مبتبقاش حطيت وقتك ولا مجهودك ولا معرفتك في الحته دي ولا فكرت بطريقه فيها تفكير نقدي هل الكلام اللي الراجل بيقوله ده اصلا صح ولا غلط انا باخد قشور معرفة من حاجات سطحية ، سمعت واحد في التلفزيون بيتكلم عن حاجه سمعت عمر بيقول حاجه فحسيت بنفسي ان انا عندي المعرفة ، والمعرفة دي مع الاسف بتظهر حاجه اللي هي دايما بنقول عليها الفهلوة ان انا اخدت معلومات بسيطه جدا جدا على موضوع معين وبقيت فهلوي وبقيت بعرف اتصرف وابقى عارف اخد قرارات وبقيت خبير وبقيت كل الكلام ده ، في حاجات طبعا ممكن تتعلمها بسرعه ومش محتاج تبذل فيها مجهود ولكن في حاجات وحاجات مهمه جدا وقرارات بتاثر على حياتك بشكل جامد جدا مينفعش تاخذها بالفهلوه
56:50
الحلقة (95) : الإدراج المزدوج
الحلقة دي كانت جايه عن طريق سؤال لمستمع بعتلنا على انستجرام وقالنا عايز يفهم اكتر عن موضوع الإدراج المزدوج للأسهم في بورصتين معينين بمنتهى البساطه الشركات لما بتيجي تطرح أسهمها في بورصة بتختار بورصة معينة وتروح تقدم ورقها وتقول يا بورصة ايه طلبات إدراج السهم بتاعي عندكم انتم عايزين ايه وبتبقى عملية واضحة مطلوب اوراق معينه بتقدم طلب والطلب ده بيخش ياخد موافقة وبتدي البورصة دي ميزانيتك وحاجات تانيه كتير وبيعتمدوا الادراج بتاعك والاسهم بتنزل في البورصة دي بس بنلاحظ ان في شركات بتبقى مدرجة على بورصتين وثلاثه واربعه كمان يعني ايه الكلام ده بقى
57:39
الحلقة (96) : استصافة مع يوماً ما - الجزء الأول
في الحلقه بتاعه الاسبوع ده والاسبوع الجاي احنا هنذيع استضافة حصلت معايا في بودكاست تاني اسمه يوم ما البودكاست ده بيقدمه عمر المجالي ، انا اتعرفت على عمر من خلال صديقه مشتركه ما بينا هي عرفتني على عمر ووصلتنا ببعض هو بيستضيف الناس اللي عندها افكار او رواد أعمال في المنطقة بشكل عام الحلقه جميله اسئله عمر كانت كويسه جدا اتكلمنا على الثقافة المالية بشكل عام ، انا بدات البودكاست ليه ، الضيوف بتوعنا بنتكلم معاهم ازاي بنجيبهم ازاي الكلام ده كله واسئله تانيه كتير وموضوعات في المجال المالي لطيفة جداً انا اتبسطت جدا بلقائي مع عمر ، عمر عنده قناة على اليوتيوب هنحط اللينك بتاعها في الشو نوتس و اسيبكم تستمتعوا بالحلقة
58:33
الحلقة (97) : استصافة مع يوماً ما - الجزء الثاني
النهاردة الجزء التاني من الحلقه بتاعة بودكاست يوماً ما اللي هي كانت استضافة مع عمر المجالي انا بس عايزه اقول ان البودكاست ده بشكل عام ، يعني حتى مكتوب في الوصف بتاعه ان هو بيحاول يلهم المستمعين لو حد عنده هدف معين بيساعدك ان انت تحط أهداف معينة في مجالك أو في مجال معين انت مهتم بيه ، بيساعدك توصل لناس ممكن تتعرف على رواد أعمال تانيين كويسين في مجالهم مش في دولة واحدة لأن عمر بيستضيف ناس من الوطن العربي كله فيا رب تستمتعوا بالجزء التاني واسيبكم عمر
59:06
: الحلقة (98)
بما اننا في شهر مارس و امبارح كان اليوم العالمي للمرأة ، حبينا كده نسلط الضوء على نموذج مشرف ، مصري ماري تيريز من الناس اللي انا اعرفها من زمان Flat6labs واشتغلت معاها فترة احنا هنسيب طبعاً كل التفاصيل بتاعتها في الشو نوتس لو حابين تتواصلوا معاها ماري كانت مديرة صندوق لـ
دي من آخر الحاجات اللي كانت بتعملها ، ماري كانت بتعمل استثمارات في الشركات الناشئة النهاردة حلقة مهمه جداً ومميزة بالنسبالي لأن أنا عن نفسي عايز أفهم المجال ده من ناحية الراجل اللي بيدير الصندوق بيعمل إيه ، رواد الأعمال مطلوب منهم يعملوا إيه عشان ياخدوا التمويل ، وأنا كمستثمر لو عايز استثمر في الشركات اللي تعتبر فيها مخاطرة عالية ازاي بيفكروا وازاي بيبصوا على الناس دي انت محتاج تجهز إيه لو رايح لهم كل الحاجات دي وحاجات تانية كتير هنغطيها في الحلقة دي
59:47
: الحلقة (99)
النهارده معانا الجزء التاني من حلقة مع ماري بنتكلم فيها عن القطاع بتاع الشركات الناشئة ، لو مسمعتش الجزء الاول وبتسمعنا النهارده لاول مره اتمنى ترجع تسمع الجزء اللي فات الاول لان الحلقتين متصلتين ببعض ، السياق بتاعهم يعني بيكمل بعض ولو انت سمعت الحلقه اللي فاتت يارب تكون عجبتكم واسيبكم مع الجزء التاني
شكرا جدا على وقتكم معانا النهارده ويا رب تكون الحلقه عجبتكم وهستنى استفساراتكم واسئلتكم على صفحتنا على السوشيال ميديا واشوفكم الاسبوع الجاي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #100