91. آراء المستمعين عن الوضع الحالي
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بما إن معظم مستمعي كلام ينور من مصر ، ونظراً للأزمة الإقتصادية الحالية حبينا نعرف من مستمعي كلام ينور ازاي بيواجهوا الأزمة الحالية من تضخم وغلاء في الأسعار من خلال استبيان عملناه على صفحات السوشيال ميديا سألناكم اسئلة ورديتوا علينا
في حلقة النهاردة بنسمع مع بعض إجابات وآراء المستمعين والأفكار اللي شاركوها معانا ولو فاتك الاستبيان ممكن تشاركنا بآرائك و إجاباتك للاسئلة اللي بنطرحها في حلقة النهاردة في رسالة على صفحات السوشيال ميديا بتاعتنا
: اسئلة الاستبيان
04:06 الناس ممكن تعمل إيه لمواجهة الوضع الإقتصادي الحالي؟ -
08:00 ازاي أقدم خدمة مش سلعة توصل بره وتدخلي دخل بالدولار؟ -
14:20 هل بدأت تدور على بدائل محلية لمستلزماتك؟ -
15:53 هل شايف إن الوقت ده صعب عليك ولا كنت جاهزله؟ -
16:40 هل ميزانيتك لسه قادرة تغطي إحتياجاتك؟ -
17:55 إيه الحاجه اللي وقفتها الفترة دي؟ -
18:46 حاجه كنت محتاج تشتريها بس قررت تأجلها السنادي؟ -
19:46 هل حاسس إن كلام ينور ساعدك في الفترة دي؟ -
احنا ديماً بنشجعكم تتكلموا معانا وتشاركونا آرائكم وأفكاركم لأن ده أولاً بيساعدنا نطور المحتوى وثانياً التفكير الجماعي والمناقشات هي اللي بتخلق افكار جديدة وحلول إيجابية للمشاكل والظروف اللي بنواجهها فشكراً جداً ليكم على مشاركتكم معانا في الاستبيانات اللي بننزلها واستنونا الاسبوع الجاي في حلقة جديدة
لو عندك وقت وحابب تساعد مستمعه لكلام ينور في رسالة الماجيستير شارك في استمارة استبيان بعنوان (العوامل المؤثرة على استخدام الشباب المصري للمدونات الصوتية "البودكاست")
👇
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور، في الأول عايز ابتدي كده بحاجه احنا عملناها على صفحة السوشيال ميديا انستجرام وفيسبوك ، مستمعه من مستمعي كلام ينور تواصلت معانا وهي بتعمل رسالة ماجيستير ليها علاقة بمستمعين البودكاست وتواصلت معايا من خلال الايميل وطلبت اننا نحط الإستبيان بتاعها ده على الصفحة بتاعتنا فبشكرها انها تواصلت معانا وطلبت مننا الموضوع ده والحمدلله جالها ردود أفعال من خلال (ستوري) حطناها وهي عدت العدد المطلوب بيه بس تاني
بس تاني انا هنزل في شو نوتس الحلقة بتاعة النهاردة هحط اللينك لو حد عنده وقت وحابب يعمل الاستبيان أعتقد كل ما الناس تشارك اكتر كل ما نتائج البحث بتاعها أعتقد هتتحسن فأنا بشكر طبعاً كل الناس اللي عملت الاستبيان ده وبشكر كل الناس اللي هتعمل
01:45
حلقة النهاردة بما إن معظم المستمعين بتوعنا من مصر فانا قررت كده الحلقة اللي بنعملها كل 10 حلقات مع المستمعين قررت اسأل الناس شوية اسئلة ليها علاقة بالوضع الحالي يعني في أزمة إقتصادية في غلاء في تضخم مصطلحات كنا اتكلمنا عليها في حلقات قبل كده وقولت أفكر معاكوا واشوف ردود فعل الناس هتبقى عاملة ازاي لأن انا بحس إن من جوه الأزمة ديماً الناس بتبقى مبدعه ، الفرص أصلاً بتتصنع جوه الأزمات
حاجه مهمه جداً الناس لازم تبقى عرفينها إن الوضع متغير طول العمر يعني انت عمرك ما هتبقى عايش جوه أزمه 100% من الوقت وعمر الدنيا ما هتبقى ظريقة طول الحياة وأنا من خلال كاريري شوفت أزمات إقتصادية وفي دول كبيرة ومتقدمة وقريب احنا بنجهز لحلقة بنتكلم على تاريخ الأزمات عالمياً عامل ازاي ، لأن الناس بتبقى متخيلة إن هي أول مره الأزمة دي تحصل انت بتبقى مركز على حياتك أو منظور الدنيا من خلال وجهة نظرك فقط فبتبقى متخيل إن الأزمة دي مش متكرره ولكن هنلاقي إن في دول حتى من الدول المتقدمة دخلت مرحلة الحروب البلد أتجابت على الأرض مكنش في إقتصاد ورجعوا نموا وطلعوا من الأزمات
فـ وضعت الإقتصادي النهاردة غير وضعك بعد 10 أو 20 سنة أنا فاهم إن جوه الظروف الصعبة ديماً الصورة بتبقى غامقة وديماً الناس مبتبقاش شايفة غير الحاجه السلبية ولكن أنا تعمدت من الحلقة دي إني أنقل أفكار لناس بيمروا بنفس الموضوع فتبقى شايف انك مش لوحدك في المشكلة دي في ناس تانية بتمر بنفس الظروف دي فكروا ازاي وطلعوا أفكار إبداعيه لأن انا بصراحة من الحاجات اللي أتكتبتلي لقيت فيها حاجات أولاً ملهمه وبنشوف الناس بتفكر ازاي وبتلاقي حلول إبداعيه ودي ميزة اننا نفكر بطريقة جماعية ، يعني العقل الجماعي والمناقشات ، التواصل واستخدام المنصة دي اننا نتكلم مع بعض أداني افكار جديدة لأن انا في الأخر معنديش كل التجارب بتاعة كل الناس فالنهاردة الحلقة دي هنتكلم على الموضوع ده
04:06
فمثلاً سؤال سألنا الناس ممكن تعمل إيه في الفترة دي؟
احنا أدينا أقتراحات هل مثلاً بتبدل الحاجات المستوردة بالحاجات محلية الصنع ولا لأ وسألنا الناس يا جماعة قولولنا انتو شايفين إيه ..
في مثلاً استاذ محمود قالي مراجعة الفواتير الشهرية ، شرا المستعمل لبعض الأغراض هو أتجه للحته دي ، أستاذة جنة بتقول ندعم فكرة إعادة التدوير Recycling حتى بينا وبين بعض نطلع الهدوم اللي صغرت علينا وحالتها كويسه بدل مضطر أشتري ممكن اديله الهدوم دي وممكن تكون بتتباع بأسعار احسن كتير من الحاجات الجديدة وقالت برضه هنا إن لازم حالتها تكون كويسه طبعاً
استاذ شريف قال بجيب اللبس الشتوي في الصيف لما بينزل عليه عروض والعكس يعني هو بيستغل إن الحاجات دي مش بتتباع في هذا الموسم فابتدا يغير طريقة الشرا أو نمط الشرا بتاعه ودي حاجه من الحاجات الزكية في الشرا ، استاذ شريف برضه بيقول خلصت كل الفلوس اللي عليا في الكريديت كارد عشان أقلل ألتزاماتي الشهرية اللي بتطلع من مرتبي
أستاذ محمود تاني غير الأولاني بيقولي أعدت توزيع مدخراتي وزدوت نسبة الاستثمار في البورصة
في إجابة تانية بتقول طول مانا لوحدي بقيت بعمل مشاويري من غير العربية عشان أحافظ عليها وأقلل مصروفاتها وبقيت بركب أي مواصلات وهنا هو ممكن يكون حسب في المشاوير القصيرة ان التكلفة بتاعته أرخص لو أخد مواصلات عامه ضد انه يحط كيلو متر على العربية أو تكلفة صيانة أو بنزين أو الكلام ده كله فهو بدل هنا العربية عشان يحافظ على قيمة العربية من الاهلاك
الاستاذة سارة بتقول مفيش أكل من بره غير مره في الشهر وبتقلل شرا الهدوم
أستاذ بسام برضه بيقول نقلل أكل من بره ونعتمد على حاجات جاهزة في البيت وتتحضر في الأجازة ونستخدمها طوال الأسبوع يعني يوم الجمعة والسبت مثلاً انت بتحضر الوجبات بتاعتك وتبقى زي سريعة التسخين
استاذة هبه بتقول تقليل السفريات عن طريق إني مسبش نفسي أوصل للإرهاق في الشغل استراحات مدروسه وبالهداوة هنا معناها إن هي بتوضب أو بتعمل تخطيط احسن للسفريات بتاعتها وبتحاول توازن ما بين الشغل والسفر عشان الضغط النفسي ميحصلهاش إرهاق من الشغل
برضه من الإجابات اللي فيها إبداع جداً اللي عجبتني بيقول على العكس بقيت اشتري من البقالات الصغيرة اصحابها محتاجين أكتر ومنعت الفصال تماماً مع أي حد في الشارع يعني حتى في الظروف الصعبة هنا هو وجه فكره للحاجه اللي تزود القيمة المنتج المحلي أو حد عنده بقاله صغيرة ده واحد مش مثلاً شركة كبيرة أو حد جاي من بره فاتح سوبر ماركت لأ ده حاجه صغيرة يساعدها ويساعد انهم ميقفولش فربنا يجعله طبعاً في ميزان حسانتك مساعدتك للناس في الفترة الصعبة يعني انت بس مفكرتش في نفسك فكرت في الناس التانية بس دي من أكتر الإجابات اللي عجبتني بصراحة
استاذة هبة بتقول عملت إلغاء لمتابعة كل السوشيال ميديا اللي بتخليني أشتري ، البلوجرز بأنواعهم والمحلات إلى أخره ، دي برضه إجابة مبدعة لأن هي ممكن تكون بتعمل شراء إندفاعي من الحاجات دي برضه بتقول هركز في عمل الصيانة للعربية واخلي بالي منها لأن طبعاً تكلفة بتاع تبديل حاجات زي العربية النهاردة بقى أصعب ، الأكل في البيت وتقليل طلبات الأكل من بره
08:00
برضه في حسابين بعتولي بيقول ازاي ابدأ شغل بيقدم خدمة مش سلعة وازاي توصل بره وتدخل دخل بالدولار والحساب التاني بيقول لازم يبقى في دخل بالدولار.. دخل بالدولار يعني غالباً انت بتصدر وبتجيب العملة الصعبة من بره فده يعتبر تصدير ، والتصدير نوعين تصدير سلع وتصدير خدمات زي ما الاستاذ بيسأل
تصدير الخدمات ممكن يكون مع وجود الإنترنت في شغلانات عن بعد كتير جداً فده من مصادر الدخل بالدولار وفي الفترة الأخيرة شوفت حاجات كتير جداً ونماذج كتير جداً سواء بقى على صناعة المحتوى في مصر أو على التصميم أو مساعد شخصي أو حتى خدمات معقدة أكبر من كده بتتعمل والناس بقت بتشتغل عن بعد ، في ناس في مجالات تكنولوجيا المعلومات في البرمجة كل دي تعتبر خدمات تقدر تصدرها لأن انت لما بتبيع بره أنت تعتبر أكنك بتصدر انت التكلفة بتاعتك محلية انت عايش في دولة زي مصر وتكلفة المعيشة بتاعتك بالجنيه ولكن انت بدخل دخل بالظبط زي الراجل اللي بيصدر فدي الطريقة اللي انت تقدر تجيب بيها خدمات من الخارج والنهاردة في مواقع كتير جداً وبرضه قريب هنبتدي نتكلم أكتر على موضوع الشغل الحر وازاي تبتدي فيه وازاي تعمله حتى شغل جانبي جنب شغلك وهنضطرق للموضوع ده في حلقة تانية قدام ان شاء الله
استاذ محمود أنا زي مانا الحمدلله بقالي فترة ماشي بإسلوب عيش عيشة أهلك اللي أتولدت لقيتها لقيتني عايش مرتاح ومصاريفي قلت كتير مبسوط يا استاذ محمود انه عارف يسيطر على مصاريفه وعارف يبقى مبسوط في نفس الوقت ومش ديماً يا جماعة والله لما بتقلل مصاريفك ده بيقلل سعادتك يعني كونك بتشيل الحاجات الزيادة اللي ملهاش لازمه وبتحقق أهدافك تانيه انت كنت عايز تعملها فممكن يكون النتيجة فالاخر نتيجة إيجابية
في حد تاني بيقول هعيش براحتي بس هقلل تفاهات الشرا لو انا بشتري حاجه ملهاش معنى
في 7 رسايل ورا بعض كده من استاذ مصطفى بيقول فيهم بحاول أوفر في استهلاك الكهربا والغاز وبحاول مزودش استهلاكي لأن الفاتورة بتزيد دي أول نقطة ، تاني نقطة بتقول في ناس بتجمع بعض وتروح الشغل في عربية واحده ، وناس بتجمع طلباتها وتشتريها بسعر الجملة ، تالت نقطة قللت السوشيال ميديا عشان الصحة النفسية ولو هستهلك على السوشيال ميديا استهلك المحتوى التعليمي ، النقطة الرابعة طلبات البيت بطلبها من خلال تطبيقات التوصيل موجود كذا محل بقدر اقارن واختار الأفضل عن طريق المحلات كلها وكمان بوفر وقتي والبنزين أو المواصلة اللي هركبها عشان أروح المكان ده ، وطبعاً كمان بنلاقي على التطبيقات دي ممكن نلاقي عروض لو في تطبيق جديد بيفتح او حد عايز يكسب ذبون يعني بينزل عروض ممكن متكونش موجوده نفسها في المحل ، بيقول برضه استاذ مصطفى لو المشوار ينفع استخدم مواصلات عامة بدل العربية معندوش مشكلة يعمل كده ، الخروجات قلت كمان عشان الجو في الشتا بيبقى برد فبختار يوم الجو كويس ، وأخر حاجه اي اشتراكات زي نتفليكس ، باقة النت والتليفون قللت السعة واخدت بالي من استهلاكي وظبطت فواتيري على هذا الاساس
بعد كده الأستاذة أمينة بتقول اكلي كله بيتي فطار وغدا وحتى أبتديت اعمل سناكس عشان أبقى شبعانه ومضطرش أكل بره وفي نفس الوقت الأكل ده بيبقى غالباً صحياً احسن كتيرعلى المدى الطويل هتلاقي الحاجه دي انت عارف مصدرها عارف انت حاطت فيها إيه فحتى على المدى الطويل هو مش بس موضوع توفر ، برضه أستاذة أمينة قالت حاجه برضه من الرسايل اللي عجبتني بشتري الحاجه بعد تفكير 48 ساعة عايزاها محتجاها ليها بدايل هل في حاجه أفضل منها دلوقتي هل هينزل عليها خصم قدام الـ 48 ساعة دي أعتقد انتي وصلتي زي ما بيقولك كده هنام واصحى تاني يوم اشوف احساسي بالحاجه دي عامل ازاي وده بيخليك تشغل عقلك مش العقل الإندفاعي اللي بياخد قرارات سريعة لأ بتخليك تفكر في الحاجه وتقارن ما بينها وبين حاجات تانية وما بينك وبين نفسك هل فعلاً محتاج الحاجه دي ولا لأ فأعتقد برضه دي من الإجابات اللطيفة وهي عدم السرعة في إتخاذ القرار في العموم
أستاذة شاهندا بتقول بدأت أتجه لشرا المستعمل في الملابس بجانب المحلي وده حلو لكذا سبب اتعلمت ده وهي ذكرت حساب على انستجرام لحد اسمه نوران البنان
بعد كده الأستاذة دينا برضه من الإجابات اللطيفة في الهدايا بفضل انها تبقى كروت الهدايا يعني انت مثلاً عايز تدي حد هدية 100 جنيه أو 500 جنيه ممكن تروح لمحل معين أياً كان المحل ده موجود في مول بيبقى عندهم حاجه اسمها كروت الهدايا ، كروت الهدايا دي بتشتريها انك تصرفها في هذا المحل فقط أو مثلاً في كروت هدايا بتبقى في المول كله اللي هو انت ممكن تصرفها في أي محل موجود في هذا المول ، هي عملت إيه هنا هي خلت كل شخص يقدر يشتري حاجته ودي نقطة جميلة بصراحة انا شوفتها في من إجاباتكم يعني أنا النهاردة ممكن اروح أهادي حد في عزومه مثلاً جايبله حاجه سواء هو مش هيبقى عايزها أو حاجه بالنسباله مش لطيفه لو أنا أديتله الفلوس بس في شكل برضه محرج كارت الهدية ده من الأفكار اللذيذة وممكن حتى أخد الفلوس دي اروح أجيب بيها الحاجات الأساسية أو حاجات من البنود الرئيسية بتاعتي في الميزانية فبرضه شكراً استاذة دينا لهذه الفكرة الجميلة
وأعتقد كده الأفكار إبداعية انا بس مش عايز أطول أكتر من كده في إجابات أكتر من كده بس أنا هكتفي بهذا القدر من الإجابات في هذا السؤال وهبتدي أخش على السؤال التاني
14:20
السؤال التاني هو تصويت سألنا سؤال وأدينا 4 أختيارات عشان نشوف الناس جاوبت ازاي السؤال بيقول : هل بدأت تدور على بدائل محلية لمستلزماتك؟
42% قالوا لسه محتاج أعمل كده فده معناه انهم شايفين انهم شايفين ان دي فكرة لطيفة ممكن يحاولوا يجربوها ، 22% قالوا أيوة ومبسوط بالنتيجة يعني هو غير لحاجه محلية واتبسط من اللي شافه ، 28% قال أيوة لكن غير راضي يعني هو جرب المنتج المحلي ومعجبهوش ، 8% قالوا لأ انا مش محتاج انا مبسوط باللي أنا بستهلكه من بره بقى أو أياً كان ومش عايز يغير اصلاً
النسب دي كنت اتمنى انها تطلع أعلى من كده شوية يعني هنا تقريباً النص جرب والنص مجربش او بيفكر يجرب ، ولكن المشجع إن في 42% يمكن يتجهوا للإنتاج المحلي ، ونفس الفكرة دي المثال بتاع السوبرماركت المستمع بتاعنا قال ان انت برضه بتشجع الإنتاج المحلي بتشجع حد فاتح فكرة جديدة او صغيرة فأنا بنصح ان ديماً الناس حتى في الأزمات أو غير الأزمات انا أفضح اني استخدم الإنتاج المحلي وأبعد عن زي ما بيقولوا بقى عقدة الخواجة أو حاجات بره بالذات في الحاجات اللي بجد هعرف اشتريها محلياً مش لازم الحاجات المعقدة زي مثلاً التليفون الحاجات دي مش بتنتج محلياً يعني قصدي الحاجات اللي في التكنولوجيا عالية مش لازم تجيبها إنتاج محلي
15:53
السؤال اللي بعده بيقول : هل شايف إن الوقت ده صعب عليك ولا كنت جاهزله؟
42% قالوا الوضع صعب جداً ، 7% قالوا كنت مستعد من فترة ، 30% بيقولوا بحاول استعدله ، و 21% الإجابة الرابعة بيقولوا الحمدلله وخلاص يعني مداش إتجاه من ده ولا ده بس اللي عاجبني برضه في الإحصائية دي إن في 30% عندهم إستعداد أو بيحاولوا يستعدوا يعني انا مبسوط إن الإجابة مجتش 100% ان الوضع ده صعب جداً لأ انا لقيت إن في جزء كبير من الإجابات ناس عندها إستعداد أو أبتدت تعمل الحاجات دي لتغير الوضع
16:40
السؤال اللي بعده وده سؤال لطيف وهيبين حاجات بالنسبالي لطيفة يعني اتبسطت من الأرقام : هل ميزانيتك لسه قادرة تغطي إحتياجاتك؟
طبيعي في الوقت ده ممكن تقول لأ واتوقع إن الأغلبية بتقول لأ ولكن الإجابات جتلنا ازاي 22% قالوا اه الميزانية بتاعتي مازالت تسمح انها تغطي الوضع ده ، 42% قالوا مع شوية تعديلات في الميزانية بتاعتي آه أنا ممكن أستحمل الوضع الحالي ومفيش مشكلة ودي نسبة كبيرة ، 37% قالوا للأسف لأ
وهرجع وأقول إن الـ 37% أو لأي حد انت بس مش لازم تقفل المصروفات أو تقعد تقلل المصروفات بتاعتك انت لازم تدور على فرصة ازاي تزود دخلك يعني ديماً احنا بنتكلم في الناحيتين وديماً انا بقول في حلقة الميزانية وفي حلقات تانية كتير يا جماعة احنا لازم نتكلم على ازاي تزود دخلك وفي نفس الوقت تبقى مركز في مصاريفك الموضوع مش بس قطع مصروف مش الهدف من البودكاست اني بقطع مصروف لأ انا بحاول أعمل الناحيتين مع بعض بالتوازي
17:55
السؤال اللي بعده بيقول : إيه الحاجه اللي وقفتها الفترة دي؟
46% قالوا الشراء الإندفاعي ، 25% قالوا الخروج بدون لازمه ، 15% قالوا مصاريف سفر وهوايات ، 14% قالوا كماليات البيت
أنا بالنسبالي أخطر حاجه في الحاجات دي كلها ديماً الشراء الإندفاعي فمبسوط انها جات أعلى نقطه 46% لأن تاني الشرا الإندفاعي انت بتكتشفه بعديها ان انت مكنتش عايز الحاجه دي اصلاً او انت مش مبسوط بيها أو مش دي الحاجه اللي هتحققلي السعادة ، الحاجات التانية الخروج بدون لازمه ومصاريف السفر والهوايات ، كماليات البيت بالنسبالي أقل وطأة من الشراء الإندفاعي والشراء الإندفاعي هو بيحصل متكرر على طول فمبسوط ان حاجه زي دي الناس ابتدت تاخد بالها منها
18:46
حاجه محتاجها بس عايز تأجلها السنادي؟
42% قالوا هأجل شرا لبس جديد ، 37% قالوا شرا عربية ، 16% تغيير الشغل ، 4% قالوا إقتناء حيوان أليف ، هما مش هيعملوا الحاجه دي السنادي وشرا لبس جديد يعتبر من الحاجات الإستهلاكيه ممكن الناس تبتدي تفتح الدولاب بتاعها وتستخدم الحاجات اللي مكنتش بتلبسها أو اي أفكار انت ممكن في الوضع العادي تكون قاعد عمال تشتري وتجيب حاجات وممكن يبقى عندك حاجات اصلاً وانا متأكد إن الناس كلها عندها أياً كان المستوى الإجتماعي وأياً كان الدخل أكيد في حاجات عندك مبتلبسهاش واسعة عليك أو ضيقه أو اي حاجه انا عن نفسي بتحصلي كل فترة اني أكتشف إن في حاجه مثلاً كانت عندي ومستخدمتهاش لأسباب بسيطة جداً وأقدر أحط شوية وقت وأطلع الحاجه دي واستخدمها بشكل أفضل
19:46
هل حاسس إن كلام ينور ساعدك في الفترة دي؟
33% قالوا طبعاً يعني الحمدلله ان احنا بنساعدكوا ، 47% قالوا بستفيد لكن لسه محتاج أطبق فأنا بشجع الناس انها تطبق ، 20% بيقولوا ممكن يساعدني أكتر معنى كده إن في حاجات احنا مش بنجاوب عليها أو محتاجين نركز أكتر في المحتوى وسألنا الناس برضه إيه هي الحاجات دي عشان نطور في المحتوى أكتر
ومن السؤال الأخير ده ومن أسئلتكوا اللي ديماً بتبعتولهولنا احنا هناخد الحاجات دي وهنحاول على قد ما نقدر ونسمع الناس ونطور المحتوى ولو في حاجه انا مغطتهاش او مغطيها بشكل مش واضح أو بغطيها حتى بشكل غلط أو اتلخبطت أبعتلي قولي ديماً بشجع الناس انها تتكلم معانا لمساعدة وصول المحتوى ده كمان لأكتر ناس عشان ممكن يحل مشاكل معينه في ظروف معينه فبشكركوا جداً على مشاركتكوا معانا في الاستبيانات اللي احنا بننزلها على الصفحة بتاعة الانستجرام والفيسبوك وديماً زي ما بقولكم هستنى اسئلتكوا واستفساراتكوا وان شاء الله اشوفكوا الاسبوع الجاي
Translation of some words and terms:
Negative سلبي
Creativeمبدع
Inspiringملهم
Platform منصة
Burnoutإحتراق / إرهاق
Planningتخطيط
Optimization تحسين
Unfollow إلغاء متابعة
Cost تكلفة
Remote عن بعد
Content Creation صناعة المحتوى
Design تصميم
Personal Assistantمساعد شخصي
IT تكنولوجية المعلومات
Programming برمجة
Freelancing العمل الحر
Offers عروض
Gift Card كارت هدية
Pattern نمط
Voting تصويت
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي#استبيان