92. ميزانيتك: الخطوات والتفاصيل (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة (إعادة) للحلقة 38 اللي بنتكلم فيها على التفاصيل الداخلية في كل بند من بنود الميزانية الأشهر (50 - 30 - 20) اللي هي 50% أساسيات 30% كماليات و20% توفير بشكل عملي ومفصل أكتر
هتلاقي ملف أكسل تحت حلقة النهاردة تقدر تنزله وتشوف التفاصيل اللي احنا بنتكلم عليها تمشي خطوه خطوه في البنود دي وتحفظه عندك والسنة الجاية تغيره وتعمل ملف جديد وهكذا كل سنة وإن شاء الله يكون بفايدة للناس اللي بتسمعنا
03:18 بند الدخل -
06:22 بند المصاريف الأساسية 50 -
07:35 بند السكن -
09:37 بند الأكل والشرب -
10:35 بند المواصلات -
12:08 بند التأمينات -
13:06 بند الأولاد -
15:02 بنود الكماليات 30 -
17:40 بنود التوفير 20 -
22:11 هل أوزع استثماري في بنود التوفير كلها ولا أركز على بند واحد بس؟ -
24:33 اللي عنده فائض 50% من دخله هيعمل إيه؟ -
25:10 ليه متابعة الميزانية مهمه؟ -
خليك عارف إن ميزانيتك السنة دي هتختلف عن السنة الجاية واللي وراها لأننا مش بنبني ميزانية لأكتر من سنة ، أهم حاجه وأنت بتتوقع حط زيادة شوية للأمان يعني متحطش الرقم بالظبط ، لأن ممكن يحصل زيادة في إستهلاكك أو يحصل زيادة في الأسعار
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة هنعمل إعادة للحلقة رقم 38 اللي اتكلمنا فيها على الميزانية خاصة في الظروف الاستثنائية اللي بتمر بيها مثلاً دولة زي مصر حبيت بس أرجع أتكلم تاني عن أهمية وجود الميزانية في حياتك ، أهمية وجود تخطيط لطريقة صرفك للفلوس حلقة مهمه أنصح الناس لو مسمعتهاش تسمعها تاني من خلال اننا بنعمل إعادة ليها تاني النهاردة فهطلع للناس اللي يمكن كمان مسمعتش كل الحلقات القديمة بتاعتنا فاتمنى انها تكون مفيدة ، الناس اللي سمعتها تاني ممكن تسمعها بشكل مختلف المرادي وتطلع بمعلومات جديدة وعايز أكرر وأقول ان الميزانية مهمه جداً في الأوقات الصعبة وفي الأوقات العادية يعني لما تكون الحياة كويسة ومفيش مشاكل والكلام ده كله مهم برضه انك تكون مهتم بميزانيتك فاسيبكوا مع الحلقة النهاردة واتمنى تعجبكوا
01:44
اهلاً بيكوا في حلقة جديدة من بودكاست كلام ينور حلقة النهاردة هي تكمله للحلقة اللي فاتت اللي اتكلمنا فيها على الميزانيات ، الخطوط العريضة اللي أتكلمنا عليها في الميزانية بتاعة (50 - 30 - 20) اللي هي 50% بتروح على المصاريف الأساسية 30% بتروح على الكماليات أو الحاجات اللي أنت عايزها و20% على الأقل بتروح للاستثمار ودفع الديون بس برده لازم أقول تاني إن كل واحد في مرحلة معينة من حياته أشكال الدخل بتختلف المصروف بتاعك هيبقى شكله مختلف برده فحضرتك لازم تبقى عارف إن السنادي الميزانية بتاعتك هتختلف عن السنة الجاية هتختلف عن السنة اللي وراها احنا مش بنبني ميزانيات أكتر من سنة بنمشي سنة بسنتها لأن بيبقى عندنا نظرة على السنة بالكامل إيه اللي ممكن يحصل فيها ومتوقع قد إيه في كل بند من البنود اللي احنا هنتكلم عليها
النهاردة هتكلم أكتر على التفاصيل الداخلية في كل بند من البنود دي وكل واحد تاني لازم يبقى عارف عنده إيه ، بيصرف ازاي ويحاول يصرف بطريقة أذكى فتعالوا نبتدي مع بعض كده إننا نبص على التفاصيل دي
احنا عملنا ملف أكسيل هنحطه على الموقع بتاع كلام ينور تحت الحلقة بتاعة النهاردة تقدر تنزله وتشوف التفاصيل اللي احنا بنتكلم عليها وواحده واحده تمشي معايا خطوه خطوه في البنود دي وتحفظه عندك وتروح السنة الجاية تغيره وتعمل ملف جديد لـ 2023 وهكذا وإن شاء الله يكون بفايدة للناس اللي بتسمعنا
03:18
احنا هنتكلم شهري يعني هنتكلم كل حاجه بالشهر ، هنحط الميزانية الشهرية بتاعتنا فأول بند هو الدخل بتاعك مرتبك الثابت بعد خصم كل أنواع التأمينات والضرايب وكل حاجه بيخشلك رقم معين هتحطه ده أول نوع من أنواع الدخل
تاني نوع من أنواع الدخل هو راتب التقاعد (المعاش) لو حضرتك الشغل بتاعك بيدفعلك حاجه مثلاً بتروح في مكافئة نهاية الخدمة أو حاجه بتحوشها يعتبر دخل جيلك في وقت ما بما إنك موجود جوه الشركة دي
طيب الناس اللي معندهمش وظيفة ثابتة هيحاول يشوف الدخل السنوي بتاعه وهيحاول يقسمة على 12 ويحط الرقم الأول بدل ما تحط المرتب هتحط الدخل بتاعك فالخانة دي
هنيجي للبند التالت من أنواع الدخل اللي ممكن مثلاً يبقى عندك عقار ، حضرتك عندك شقة صغيرة بتأجرها بتجبلك دخل فده يعتبر دخل شهري طبعاً هناخد صافي الدخل هنا مش هناخد الرقم بالكامل اللي داخلك هناخد بعد خصم المصروفات يعني مثلاً عندي شقة بتتأجر بـ 5000 درهم أو جنية وعندي مصاريف مثلاً من ضريبة ، من أعمال صيانة الحلقة اللي احنا اتكلمنا فيها على العقار أتكلمنا إيه المصروف المتعلق بالوحدة الإيجارية بتاعتك فـ من الحلقة دي أنت ممكن تشوف كل الحاجات المتعلقه وتخصمها وهطلع صافي الدخل بتاعك وهتحطه كرقم داخلك كل شهر
طيب في ناس تانية ليها علاقة مثلاً بالمبيعات أو قطاعات معينة بتقبض علاوة عندها رقم بتقبضه مثلاً 3 شهور في السنة أو 5 شهور في السنة ، شهر في السنة أياً كان الرقم اللي أنت بتاخده في كعلاوة ، هتحط بالتقريب كده ده معناه قد إيه في الشهر
فإفتراضاً مثلاً أنت بتاخد في الشهر على السنة مثلاً مرتبك 10000 فالشهر ده هناخده نقسمة على 12 هيطلعلك 800 وشوية ده هنحطه أكنه دخل شهري أنا هنا بحاول أجمع بالتقريب أنا بيخشلي قد إيه في الشهر أنا ببني ميزانية فلازم أبقى عارف إيه المدخلات كلها
طيب إيه البند اللي بعد العلاوة اللي بتاخدها في آخر السنة ، لو عندك أي استثمار (سلبي) يعني عندك محفظة فيها ودايع ، الوديعة دي بتدخلك فايدة في الشهر رقم كذا أو محفظة أسهم بالتقريب هقول مثلاً انا بعمل في الأسهم دي 8% في السنة ، 8% دي بالتقريب هيبقى دخلي منها قد كده هحط الرقم ده
وبعدين أنا حاطط بند بعد كده البند الأخير أي نوع من أنواع الدخل اللي أنت متخيل بيجيلك من حتت مختلفة تانية حتى لو كان أنت مثلاً في الجامعة وعندك مصروف بتاخده أو أي حاجه مش فارقه معايا هو جايلك منين ولكن ده البند النهائي
طيب كده أنا جمعت الرقم اللي أنا هبتدي أوزعه على الميزانية بتاعتي أنا عرفت أنا دخلي بالكامل في الشهر قد إيه
06:22
هنيجي بقى لبنود المصاريف نفسها بقى أول حاجه المصاريف اللي قولنا الأساسيات اللي في الحياة ودي نسبتها زي ما أتفقنا 50% من الميزانية بتاعتك ، بحد أقصي 50% طبعاً لو قلت معنديش مشكلة ولكن ده الحد الأعلى
طيب الأساسيات اللي فالحياة هي عبارة عن إيه مأوى بيت يعني ، أكل وشرب طبعاً ، التحركات من النقطة أ للنقطة ب محتاج فلوس عشان أتحرك ، أي نوع من أنواع التأمين أو الحاجات العلاجية ده بند كمان ، وآخر حاجه الأولاد المصاريف الأساسية للأولاد أعتقد ده بشكل عام الـ 5 حاجات اللي موجودة اللي تخليك أساسياً في الحياة أنت تقدر تعيش ، يبقى تاني المأوى ، الأكل والشرب ، التحركات ، التأمينات اياً كان نوعها إيه ، والمصاريف الأساسية للأولاد
طبعاً لو حضرتك في الجامعة أو صغير في أول حياتك معندكش بنود معينه أنا بتكلم هنا من أوسع نقطة عشان أشمل كل الناس اللي بتسمعنا أنت ممكن تتغاضى عن الحاجات اللي ملهاش علاقة بميزانيتك
07:35
هنخش أول حاجه على المأوى بتاعك أو بيتك إيه اللي أنا محتاجه أو بصرفه جوه البيت وانا حطيت هنا بالتقريب النطاق المستهدف بتاعي في البند بتاع البيت ده حاطط من 0 لـ 30% ده النطاق بتاعك داخل الـ 50% من الميزانية بالكامل أنا ممكن أطلع لـ 30% يعني تقريباً ثلثي الـ 50% دي ممكن يروحوا للبيت ، طيب أمتى هيروحوا بنسبة كبيرة كده لو أنا عندي أسرة وأولاد ومحتاج بيت كبير والكلام ده كله وأمتى هيبقى 0% وأنا مش محتاج حاجه لو أنا لسه مخلص جامعتي وفي أول حياتي ولسه عايش في بيت أهلي فأنا مش بدفعلهم ولا إيجار ولا شاري بيت ولا أي حاجه أنا عايش معاهم فمش بدفع أي حاجه عشان كده النطاق بتاعي من 0 لـ 30 وده هتلاقوه في الخانة التانية الموجودة في الميزانية
يبقى في البيت هنا أنا بدفع إيه الإيجار أو الرهن العقاري أو بدفع قسط البيت بمنتهى البساطة أي قسط طالع مني رايح عشان أعرف أعيش ده أول بند في الميزانية
تاني بند لو أنا عندي أي نوع من التأمينات ، لو أنا شاري الوحدة بتاعتي وعندي نوع من أنواع مصاريف الصيانة السنوية ، يعني في بعض البيوت في حتت معينه يقولك مصروف العمارة بتاعي كذا أو مصروف البيت كذا عشان يعملوا الخدمات العامة لازم أدفع كده فحط الرقم ده شهرياً قد إيه بيكلفني
بعد كده هحط الحاجات اللي هتخلي البيت ده يبقى شغال زي فاتورة الماية ، الكهربا ، الغاز ، فاتورة الإنترنت ، فاتورة التليفون ، وأي حاجه خدمية أنا بعملها جوه البيت ثابتة أنا عارفها
المجموع بتاع الحاجات دي كلها مع بعض ميعديش الـ 30% ده أول حاجه جوه الميزانية أو المصاريف الأساسية للحياة
09:37
تاني حاجه هنخش عليها الأكل والشرب ، الأكل والشرب لو بصينا عالمياً هنلاقي الناس بتنصح من 10 لـ 15% من ميزانيتك بالكامل تروح في بند الأكل والشرب وده بيتضمن البقالة والسوبر ماركت او الحاجات الأساسية اللي أنت عايز تعيش بيها جوه البيت
هنا بقى تقولي أنت الـ 10 – 15% دي هاجي أول الشهر وأطلعهم وأصرفهم كلهم مثلاً في تسوق بالجملة معين أروح أصرف الـ 10 – 15% من مرتبي هناك ولا أقسمهم بالأسبوع ولا أعمل إيه بالظبط ! دي ترجع لكل واحد يعني في ناس بتحب تجيب أستهلاكها كل اسبوع ، في ناس بتجيب كل يوم ، كل شهر مش مشكلتي أنت بتعملها ازاي النهاردة أنا مشكلتي أنك تبقى عارف الحدود بتاعتك في الميزانية فالناس بتنصح إن النطاق بتاعك يبقى من 10 لـ 15%
10:35
البند اللي بعده المواصلات ، المواصلات هنا متقسمه حاجتين في مواصلات عامة ومواصلات خاصة ، لو حضرتك بتستخدم مواصلات عامة فحسبتك هتبقى بسيطة هنبقى عارفين احنا مثلاً بنتحرك من النقطة أ لـ ب كل يوم في الشهر كام مره ، سعر المواصلة دي قد إيه ، بحسب أنا بعمل قد إيه وبحط عليها حاجه زيادة يعني لو أنا بروح حتت تانية مختلفة ممكن أحط 20% كمان زيادة على الرقم اللي طلعلي ده إن دي مثلاً خروجات في حتت غير الشغل
المواصلات سواء عامة أو خاصة حجمها قد إيه تقريباً من الميزانية بتاعتي برده تقريباً زي الأكل والشرب من 10 لـ 15%
طيب الراجل اللي عنده مواصلة خاصة بيعمل إيه ، برده في حلقة بتاعة العربية اللي احنا اتلكمنا فيها على ازاي تشتري عربية هتلاقي 7 بنود كانوا موجودين إن انت تحسب التكلفة بتاعتك بتاعة العربية مكلفاك قد إيه فأنت ممكن تسمع الحلقة دي وتحط الرقم الحقيقي اللي بيكلفك فتعرف العربية دي مكلفاك قد إيه وتحاول تتأكد انها حوالين الـ 10 ـ 15%
طيب لو قولتلي أنا حسبت الحسبة دي وطلعت 5% مواصلات أو 3% مواصلات ده كده خير وبركة كده أنت عامل توفير في البند ده
في المواصلات الخاصة سريعاً قسط العربية ، التأمين بتاعها ، موقف السيارة ، البنزين ، الصيانة والحاجات دي برده زي ما قولنا هتلاقوها موجودة في الحلقة 19 أو في بوست موجود على الإنسجرام كان فيه مقسم الـ 7 بنود موجودة هناك
12:08
كده احنا اتكلمنا على المواصلات ، والأكل والشرب ، والسكن بتاعك يجي بعد كده بند التأمين في دول معينة بيبقى عندك تغطية شاملة صحيه فأنت بتدفع كل شهر رقم لشركة التأمين بتاعتك وتقدر تستخدم الحاجه دي في أي مستشفى أو عيادة وفي دول تانية أنت بتحوش رقم على جنب من ميزانيتك لو جالك حالة طارئة أنت ممكن تروح تدفع من الرقم ده
لما بنبص على النطاق اللي الناس بتحطها في البند ده بتحط من 5 لـ 10% وده يشمل التأمين على الحياة ويشمل التأمين الصحي ويشمل أي حاجات طارئة محتاجها دوا ، صيدلية أياً كان ده برده جزء من الميزانية بتاعتك
13:06
البند الأخير واللي مش هيبقى عند كل الناس اللي هو بند الأولاد في حاجات أساسية للأولاد وفي حاجات فرعية طبعاً الحاجات الأساسية بتبقى مصروف المدرسة أو الحضانة ، لو بياخد حاجه مساعدة دراسية للي هو بيعمله ، عندك حد بيجي يساعدك في البيت ، حد بيجي يعمل مجالسة أطفال ، أيا كان نوع الحاجات اللي أنت أخترتها للأولاد بتاعتك أساسيات في حياتك جمع البنود دي كلها وحطها والبند ده ساعات بيوصل لحد 30% من الميزانية
طيب هتقولي أنا النهاردة ازاي ممكن أكون عندي ولاد بياخدوا 30% من ميزانيتي وعندي البيت بياخد 30% من ميزانيتي فلو جمعت كل الحاجات دي أنا هطلع أكيد فوق الـ 50% دي حقيقة ولكن لو أخدنا أن انت في أول حياتك مثلاً مبيبقاش عندك بند السكن خالص لسه أنت بتبتدي حياتك فانت معندكش المصروف العالي ده فميزانيتك بيبقى شكلها مختلف لما بتكبر شوية ويبقى عندك أولاد السكن ده مع الوقت المفروض يقل يا أما بتكون أشتريت بيت او عملت مثلاً رهن عقاري على مثلاً 20 / 25 سنة أو اشتريت البيت بالكامل ودفعته فالبند بتاع السكن ده قدام شوية في حياتك المفروض إنه يقل والبند بتاع الأولاد بيجي مكانه
طبعاً في دول تانية بتديك مدارس ببلاش وتعليم مجاني أو أيا كان الحاجه اللي بتعملها فهنلاقي برده هنا في الحالة دي ممكن يكون البيت تأجيره عالي أو المصروف اللي عالبيت عالي ولكن عند الأولاد الدنيا بتقل شوية
دي طبعاً خطوط عريضة إرشادية للموضوع ولكن كل واحد زي ما قولنا عنده ظروفه ، كل واحد البلد اللي هو عايش فيها القوانين اللي بتحكمه احنا بنحاول نعمل حاجه عامه تطبق في كل الدول مع أختلاف الوضع
15:02
بعد كده هنروح على الكماليات بقى ، الكماليات زي ما قولنا عندنا 30% ، طيب الـ 30% دي بنلاقي إن الناس ساعات مش بتحتاج تصرف أصلاً الـ 30% في الكماليات يعني في ناس لما بيقعدوا يبصوا على الميزانية بتاعتهم بيلاقوا إن الكماليات بتاعتهم 20% طيب ده معناه إيه؟ إن في 10% فائض في الكماليات دي هو ممكن يطلعها فوق في الأساسيات تبقى 60% أو ينزلها تحت في التوفير بتاعه يروح يحوشها لو هو مش محتاجها في أساسياته ، فلو أنت قلقت من الجزء الأول وحسيت إن لأ أنا اكيد الأساسيات بتاعتي أعلى من 50% يبقى هنخش على البند التاني اللي هو الكماليات هنشوف جواه إيه وممكن من الـ 30% دي تطلع حته ليك فوق في الأساسيات وتعيش بيها في الحاجات الأساسية
إيه اللي موجود جوه الكماليات هنلاقي اللبس ، السلع اللي بتجيبها زي الساعة ، الخاتم كل دي من الكماليات حاجات أنت ممكن تعيش من غيرها مش لازم كل شهر تجيبها ولكن أنت بتشوف أنت هتصرف على البند ده في السنة قد إيه وبترجع تقسمه تقريباً شهرياً ، حط رقم حتى لو الرقم ده غلط ومع الوقت أنت هتعرف أنه غلط محتاج تعليه أو توطيه
تاني حاجه الخروج إن أنا مثلاً خارج أتعشى مع ناس او خارج مع أصحابي رايح أتفسح أو أي حاجه ده برده من الكماليات ، لو طلبت اكل أو طلبت أكله أغلى من الأكله العادية اللي بتطلبها دي تعتبر كماليات ، لو خرجت روحت سينما ، لو عندك أشتراك في الجيم ، لو عندك سفر ، لو عندك خدمات زي نتفليكس ، يوتيوب أي حاجه بتدفعلها اشتراك ، بتشتري حاجات للبيت ترابيزة جديدة أو لمبة أي حاجه دي برده من الكماليات ، ألعاب للأولاد ، أعياد ميلاد من الكماليات ، رياضة أو حصص مزيكا للأولاد كل دي تعتبر كماليات
احنا حطناهم كلهم في الملف تقدر تبص عليهم وتقدر تجمع بالتقريب أنت بتصرف قد إيه وتحط الرقم اللي أنت عايزة هناك ، يبقى كده أنا وصلت إني عرفت بالتقريب كده صرفت 80% من مرتبي اللي هما 50% أساسيات و 30% كماليات ، عندك الحرية أنك تغير مابينهم براحتك بس تبقى على الأقل عارف المؤشر الأساسي
17:40
هننزل بقى على الـ 20% لو ربنا كرمك وعرفت توصل أن أنت معاك 20% ، أنا مش بقولك حوش 20% بس أنا بقولك حاول حوش 20% أو أكتر
طيب هنرتبهم ازاي؟ هصرف الـ 20% أو هستثمرهم ازاي؟ أنا مرتبهم هنا بالأولويات من وجهة نظري فلوسك تروح فين الأول
أول حاجه بتروح عليها في الحتة دي هي بطاقات الائتمان ، لو أنت عندك دين على بطاقة الائتمان ده زي ما اتفقنا أحسن استثمار ليك أنك تدفع كل الديون اللي عليك من بطاقة الائتمان خاصةً ، يبقى أول حاجه من الفائض بتاعي بروح أدفع بطاقة الائتمان ليه؟ لأن احنا في الحلقة بتاعة بطاقات الائتمان أتكلمنا على إن الفوايد اللي بتنزل على بطاقة الائتمان هي فوايد عالية جداً من مثلاً 25% ممكن توصل لـ 45% في السنة فأنت بتدفع لنفسك استثمار لما بتدفع القرض بتاعك في بطاقة الائتمان بتدفع لنفسك عائد 25% في السنة اللي هو بصعوبه جداً هتعرف تجيبه في السوق
طيب أنا قفلت الائتمان بتاعي أو أنا اصلاً معنديش كارت ائتمان فمعنديش البند ده هروح أدفع البند التاني اللي هو الديون اللي عندي ، يعني أنا أفضل أن الناس تدفع الديون الأول قبل ما تستثمر إلا اذا أنت راجل محترف وعارف أنت بتعمل إيه لكن لو أنت بتبتدي لأ حاول أدفع ديونك الأول لأن لو أنت مش محترف برده الديون هتبقى الاستلاف بتاعك بنسب عاليا فمن فضلك أدفع الدين الأول قبل ما تحاول تعمل استثمارات
هنروح النقطة اللي بعديها بعد ما ربنا كرمني ودفعت بطاقة الائتمان ودفعت كل الديون اللي عليا بالفوايد بتاعتها قفلت واستريحت هبتدي أبني صندوق الطوارئ بتاعي واحنا اتكلمنا عليه قبل كده في حلقة ممكن يكون من 3 لـ 6 شهور من دخلي عشان افتراضاً لا قدر الله أنا راجل بشتغل وسبت شغلي فجأة ، طبعاً ممكن يبقى عندك نهاية خدمة أو عندك حاجه بتاخدها من الشغل ولكن وجود صندوق الطوارئ في حياتك بيخليك تعرف تفكر ازاي أدور على شغل تاني أو ازاي أبقى نفسياً مش قلقان لو الحاجه دي حصلتلي
صندوق الطوارئ ده حساب توفير أو حاجه تقدر تسيلها بمنتهى السرعة ، ممكن تحطها في صندوق استثمار أو اي حاجه ولكن أنا بالنسبالي التسييل بتاعي هو أهم حاجه في الموضوع ، من 3 لـ 6 شهور ده الاستهداف بتاعي يبقى عندك قد إيه في الصندوق ده
بعد ما أخلص صندوق الطوارئ بتاعي هعمل إيه أو هروح فين؟ هبتدي بقى ابص على صندوق التقاعد بتاعي ، أنا ممكن الشغل بتاعي يكون عاملي صندوق تقاعد عندي معاشات بس زي ما أتكلمنا قبل كده هو مش هيوصلني للأهداف اللي أنا عايزها ، فهبتدي أعمل حساب توفير للتقاعد أو خطة تقاعدية في صناديق الاستثمار أو أي حاجه أني أخدها مثلاً بعد 10 – 15 – 20 – 30 سنة على حسب سنك قد إيه ودي برده ممكن نرجع فيها للحلقة بتاعة التقاعد ممكن تعرفوا أكتر عن الموضوع ولكن أنا بحط هنا قد إيه من ميزانيتي هحطه لحساب التقاعد بتاعي وهلتزم بقى بيه لأن أنا كتبته هنا اخدت بالي إني هقدر استحمل إني أدفعه وشايف ميزانيتي بالكامل النهاردة فعرفت الإجابة على سؤال أنا أقدر أدفع قد إيه لأن انا بيجيلي سؤال مهم ناس بتسألني أنا مش عارف أحوش قد إيه في صندوق التقاعد لما تقعد تبص على ميزانيتك وتعرف السنادي أنت عندك قد إيه فائض ومن الفائض ده أنت هتودي قد إيه لصندوق التقاعد يبقى كده جاوبت على السؤال أنا مش هجاوب على السؤال ومحدش هيجاوبك على السؤال إيه اللي يجاوب على السؤال أنك تقعد تبص على الميزانية ، طيب لو السنة اللي وراها بقى عندك دخل فائض أكبر هتقدر تزود حساب التقاعد بتاعك ليه؟ لأنك خلصت الحاجات اللي قبليها وهكذا فأنا مش هرد على أي أسئلة مش عشان أنا مش عايز أرد يعني عشان الإجابة ديماً بتبقى عند الواحد نفسه لما يقعد يحسب حساباته ، شوفت حساب التقاعد بتاعي حطيت فلوسي وخلصت النقطة دي
احنا هنا يا جماعة بنتكلم على الاهمية من الأول للأخر يبقى بطاقة الائتمان أول حاجه ، الديون العالية بعديها ، أكون صندوق الطوارئ بتاعي ، أكون صندوق التقاعد
22:11
طيب حد هيسألني كده احنا وصلنا لحد 4 أنواع من التوفير بتاعي هيروح فين ، السؤال المكرر كتير أعمل واحده وأركز عليها بس ولا أعمل في الـ 4 مع بعض ولا إيه؟ أنا مش وجهة نظري بطاقة الائتمان لو موجودة تدفعها هي فقط لا غير ، وبعد كده تبتدي تنوع وتوزع ، يعني لو خلصت الائتمان وبعدين عندك دين بسيط عايز تدفعله حته من التحويش بتاعك وحته تانية تروح لصندوق التقاعد معنديش مشكلة يعني دي مش كارثة كبيرة بالنسبالي لكن الكارثة بالنسبالي أنك تبتدي تستثمر وتحوش للمستقبل وأنت عليك دين في بطاقة الائتمان دي بالنسبالي هي الكارثة الأكبر
بعد كده في إيه أهداف تانية بنحطها برده أنت عندك الحرية تحط الأهداف اللي أنت عايزها أنا بس هنا بديك أفكار في ناس بتقول أنا عندي أولاد عندهم 5 / 10 سنين هيخشوا الجامعة بعد 10 سنين وأنا غالباً مش هيبقى معايا فلوس الجامعة بتاعتهم عشان عايز ادخلهم جامعة معينه فالناس بتقول لأ أنا هاخد 5% أو 3% من دخلي أحطهم في الإسهام بتاع الجامعة بتاعة الأولاد بتاعتي ده مثال عايز تحطه حطه لأن ده يعتبر استثمار في المستقبل بالنسبالك ولكن هتحطه لما تغطي البنود الـ 4 اللي احنا اتكلمنا عليهم ، وخلي بالك إن التقاعد بتاعك لازم حساباتك توصلك للأرقام اللي أتكلمنا عليه في الحلقة اللي هو يخليك تتقاعد بشكل مريح في المستقبل
في إيه تاني أنواع لو أنا مثلاً عندي رهن عقاري عندي 25 سنة وخلصت البنود بتاعتي وبقى عندي فائض والرهن العقاري بتاعته فايدته واطية أوي 2-3% ولكن أنا معنديش أي أفكار تانية أعملها فممكن أروح أدفع الرهن العقاري
فحط زي ما أنت عايز الأنواع اللي أنت هتودي فيها التوفير بتاعك ، واحد قالي عايز أحط 5% من دخلي محفظة بتاعة عملة مشفرة شهرياً احط 5% كل شهر حط اللي أنت عايزه يعني أنا هنا بالنسبالي كونك عملت الـ 4 حاجات الأساسيين في طريقة التحويش بتاعتك اللي هتوصلك إن شاء الله للحرية المالية أو على الأقل هتحطك على أول الطريق قسم الفائض بتاعك زي ما انت عايز
24:33
طيب واحد جه قعد كده بص على الأرقام بتاعته ولقى نفسه عنده فائض عالي 50 ، 60% من دخله وأنا بيجيلي رسايل من ناس بيسمعونا عندهم فائض 50 و 60% من دخله طبعاً انت هتقول ازاي عنده 50% من دخله فائض أكيد بيقبض أرقام كبيرة لأ هي ملهاش دعوة انت بتقبض كام هو ممكن واحد يكون في أول حياته بقاله 3 سنين بيشتغل عايش مع أهله مواصلاته مش عاليا شغله جنب البيت بيعرف يحوش 50% من دخله مع إن ممكن يكون دخله صغير ، طيب الراجل اللي عنده 50% من دخله هيعمل إيه هيبتدي يحط فلوسه بالطريقه اللي احنا اتكلمنا عليها
25:10
طبعاً انا تعمدت أأخر حلقة الميزانية دي في الأخر شوية إن احنا نكون على الأقل غطينا معظم البنود دي في حلقات منفصله قبل كده
طيب بنيت ميزانيتي عرفت الأرقام سواء بقى فرحت أو زعلت ، أتخضيت والأرقام طلعت وحشه أو جميلة ، أنا فرحان بنفسي أو زعلان من نفسي أي شعور أنا مش عايزك تخش في حتة أصل أنا حاسس أصل أنا مش حاسس والكلام ده كله على الأقل أنت النهاردة وصلت للأرقام اللي أنت بتصرفها وتوقعت أنك بتصرفها هنعمل إيه بقى في باقية الميزانية بتاعتي الجزء التاني هنعمل متابعة أو حساب أنا بجد صرفت قد إيه ، يعني هنمشي في شهور السنة حاطين نفس البنود دي ونحط فيها الرقم اللي حصل في الشهر
هنا المتابعة مهمه ليه على الأقل أول سنة لأن وقتها هتشوف الفرق ما بين توقعاتك واللي حصل حقيقتاً في الشهر هنلاقي انك هتتعلم منها حاجات تانيه ، هتتعلم ازاي اصلاً تتوقع أول السنة يعني لما نقعد 2023 ، 2024 ، 2025 ربنا يديكوا طولة العمر هتشوف انت توقعاتك كانت ليه غلط أنا وقتها كنت حاسب اني بخرج قد كده بس مخرجتش ، أو كنت حاسب إن العربية هتكلفني كذا بس مكلتفتنيش أياً كان أنت بتعمل إيه
وزي ما بقول ديماً كل بند من البنود وأنت بتتوقع من فضلك حط حتة زيادة شوية للأمان يعني متجبش الرقم بالظبط ، يعني لو فاتورة تليفونك بتجيلك 100 جنية في الشهر حطت 110 أو 105 لأن أنت ممكن يحصل زيادة في السنة في الإستهلاك أو يحصل زيادة في الأسعار انت متعرفش عنها حاجه
وطبعاً بشكل عام أتمنى أن الناس ديماً تركز على دخلها مش ديماً لازم تركز على مصاريفك فقط عشان تزود فرص إنك تحوش أنت برده ممكن تبقى مركز على دخلك أنك عايز تزود دخلك سواء بتكلم معاهم في الشغل اني عايز ازود دخلي أو بعمل حاجه جانبية أو ببيع حاجه ، تشتري عقار أياً كان اللي هتعمله عشان تزود بيه دخلك واحنا اتكلمنا على البنود دي في الأول الحلقة
27:30
مش عايزك تبقى قلقان أو خايف من الأرقام بتاعتك دي كلها احنا بنديها للناس ان هي تحاول ترشد نفسها بيها وفي الأخر بعد ما تحط كل الأرقام بتاعتك هيطلعلك في الأخر النسب بتاعتك قد إيه أساسيات وقد إيه كماليات وقد إيه توفير والنسب بتاعتهم تقدر تحسبها على طول تعرف انا فاضلي قد إيه عشان أقول الحته دي ممكن أذوق إيه من هنا لهنا وجرب لو الموضوع صعب عليك في الاكسل أعملها في ورقة او في دماغك زي ما تحب دي بس كانت طريقة نفكر بيها مع بعض ازاي ممكن أبص على ميزانيتي
دي ميزانية الـ 50 – 30 – 20 ممكن قدام نحاول نجيب أنواع ميزانيات أخرى ولكن دي من أكتر الحاجات اللي بتستخدم عشان كده تعمدت إني اتكلم عليها
وعايز أشكركم جداً جداً على وقتكوا معايا احنا مؤخراً ابتدينا ننزل الصفحة بتاعة تويتر وفيسبوك فلو حابب تتابع أخبارنا هتلاقينا موجودين هناك وأشوفكوا الاسبوع الجاي شكراً
Translation of some words and terms:
Sheet ورقة
Update تحديث
Pension راتب التقاعد (معاش)
Realized أدرك
Maintenance أعمال صيانة
Sales مبيعات
Sectors قطاعات
Bonus علاوة
Passive Investment استثمار سلبي
Up to لحد
Budget الميزانية
Transportation المواصلات
Housing سكن
Target Range النطاق المستهدف
Mortgage الرهن العقاري
Insurance تأمينات
Grocery البقالة
Bulk Shopping التسوق بالجملة
Parking موقف السيارة
life insurance التأمين على الحياة
health insurance التأمين الصحي
Babysitting مجالسة الأطفال
Guiding إرشاد
Streaming services خدمات البث
Guideline معيار/توجيه
Credit Card payment الدفع ببطاقة الائتمان
Emergency Fund صندوق الطوارئ
Contribution إسهام
Crypto Currency عملة مشفرة
Tracking تتبع
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الميزانية #إعادة