64. مخاطر سوق الأسهم
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
من أكتر الاسئلة اللي بتجي من الناس اللي بالذات معندهاش خلفية عن الاستثمار : ازاي استثمر في الأسهم
في حلقة النهاردة بنتكلم بطريقة نوعاً ما علمية على مخاطر الاستثمار في البورصة أو في سوق الأسهم ، والمخاطر هنا مش بس إن السعر ينزل! إيه اللي بيخلي السعر ينزل أو يطلع بعيداً عن أداء الشركة نفسها؟
02:19 مخاطرة السوق
03:12 الأسواق الناشئة تعتبر من الأسواق اللي مخاطرة السوق فيها عالية جداً مقارنة بالأسواق المتقدمة
04:58 المستثمرين بيعملوا إيه عشان يبعدوا عن مخاطرة السوق؟
07:42 مخاطرة الفوايد
09:50 ازاي أتجنب المخاطرة كمستثمر؟
11:55 مخاطرة الأعمال (سهم في قطاع أو شركة)
13:19 مخاطرة الإدارة السيئة
14:27 ازاي اتجنب مخاطرة الأعمال والإدارة السيئة؟
4:57 مخاطرة وقف أو تعليق التداول على سهم معين
16:38 مخاطرة السيولة
18:03 مخاطرة العملة
19:32 مخاطرة سياسة الدولة
20:25 هل أنا كمستثمر هعرف أبعد نفسي عن المخاطر دي؟
دي بشكل عام المخاطر اللي جايه من السوق ومش هتقدر تسيطر عليها ، الفكرة اللي احنا بنتكلم فيها النهاردة مش بتقولك متستثمرش في الأسواق الخطر.. لأ بتقولك إنك لما تستثمر في الأسواق الخطر لازم محفظتك تبقى في مستوى معين تقدر تكون مرتاح وتنام وأنت مطمن
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
اهلا بيكوا في حلقة جديدة من بودكاست كلام ينور
من أكتر الاسئلة اللي بتجيلي من ناس بالذات معندهاش خلفية عن الاستثمار عموماً ازاي استثمر في الأسهم، يعني ممكن انت ميكونش عندك مدخرات كتير أو لسه بادي طريقك وسمعت أن في حاجه استثمار ديماً اللي بيشدك موضوع البورصة، أنا عايز استثمر في البورصة القصص ديماً بتاعة الاستثمار بتيجي عن طريق البورصة ومع الأسف ده كله بيبقى دافع من الأفلام أو القصص الجميلة واللي مش جميلة اللي الناس بتسمعها عن البورصة
فأنا عايز من خلال حلقة النهاردة أتكلم بس على المخاطرة بتاعة البورصة ، أفصص الموضوع كده وأقسمه لنقط صغيرة كتير بحيث إن انت تفهم أنك بتعرض نفسك لما بتخش البورصة لمختلف أنواع من المخاطر وهي مش بس مخاطرة إن السهم اللي بتشتريه ينزل أو يطلع، أنا عايز أعرفك النهاردة بطريقة نوعاً ما طريقة علمية المخاطرة هي بس مش إن سعرك ينزل، إيه اللي بيخلي سعرك ينزل أو يطلع بعيداً عن أداء الشركة نفسه في حاجات تانية حوالين الموضوع عايز أتكلم فيها النهاردة معاكو بإستفاضة
وأنا مش ضد إنك تستثمر في البورصة أنا ضد إنك تستثمر في حاجه أنت مش فاهم فيها أو مش عارف إيه المخاطرة اللي أنت بتحط نفسك جواها
23:14
أول نوع من المخاطرة اللي هنتكلم عليها النهاردة هو مخاطرة السوق نفسه.. يعني إيه مخاطرة السوق؟ يعني النهاردة حضرتك حبيت تشتري شركة آبل ، آبل دي شركة مدرجة في السوق الأمريكي أنت مش بتاخد بس أداء الشركة بسعر السهم بتاعك في جزء في الأداء أو سعر السهم ده بيتوصف من حالة السوق بشكل عام ففي حاجة اسمها مخاطرة السوق أو مخاطر نظامية ده بيكون جاي من الأداء الأقتصادي بتاع الدولة جغرافياً لو في عندك حاجات سياسية حاجات مجتمعياً ، اضطرابات اجتماعية أو مشاكل ليها علاقة بالدولة نفسها بتأثر على السوق بشكل عام فأول نوع من أنواع المخاطرة هو مخاطرة السوق
03:12
طبعاً لما السوق نفسه بيبقى خطر بنلاقي إن المستثمرين بيطلبوا عائد أعلى عشان بس يجوا الأسواق دي، هنلاقي الأسواق الناشئة تعتبر من الأسواق اللي مخاطرة السوق فيها عالية جداً مقارنة بالأسواق المتقدمة زي الدول من العالم الأول لأن أنت مثلاً في الأسواق الناشئة القوانين المنظمة للسوق تتغير في يوم وليلة، المستثمرين مثلاً ميعرفوش يحركوا رؤوس أموالهم دخولاً وخروجاً بسهولة زي مثلاً دولة تعتبر من الإقتصادات القوية من العالم الأول أو مصنفة
فهنا أنا كمستثمر عشان أروح للأسواق الناشئة هطلب عوائد أعلى عايز شركات ممكن مثلاً تعملي أرباح أكتر بكتير جداً ولكن ايه اللي يخليني أخد المخاطرة هناك مأنا ممكن أقعد في السوق المتقدم فأول حاجه واضحة ما بين السوقين هي الحالة الإقتصادية بتاعة الدولة الثبات بتاع القوانين ، لو في برده حروب أو مشاكل يعني شوفنا مثلاً لما حصلت الحرب بتاعة روسيا إن السوق على طول أتقفل ده مخاطرة سوق، المستثمر الأمريكي اللي كان بيستثمر في روسيا في الأسهم المدرجة فجأة فلوسة أختفت مقدرش ولا يبيع ولا يشتري أسهمه وفلوسه أتحبست هناك فدي حاجه مش بأيد المستثمر أوي لأن بيحصل حاجات ممكن ميبقاش بأيدي أقدر أتصرف فيها
04:58
طب المستثمرين بيعملوا إيه عشان يبعدوا عن المخاطرة دي؟ بيحاولوا يوزعوا استثماراتهم على دول مختلفة ، بمعنى إن مش كل استثماراتي في دولة واحدة مش كل استثماراتي حتى في الدولة اللي أنا عايش فيها يعني مثلاً أنا اتولدت في دولة معينة ، أنا من چامايكا ، أتولدت في چامايكا ، وفلوسي بتيجي من چامايكا ، بستثمر بس في السوق الچامايكي هنا في مشكلة بتحصل إننا معرض هنا لكل حياتي سواء دخلي اللي جاي من الشغل أو استثماراتي لنفس مخاطرة السوق الواحد فالناس بتعمل إيه؟ بتوزع إستثماراتها بتحاول تشوف اسواق آخرى مش نفس السوق، التوزيع جوه نفس السوق هنامش هيفرق معايا يعني عندك في چامايكا أو في بلدك اللي أنت عايش فيها 20 سهم أو 50 سهم هنا مخاطرة السوق مخاطرة واحدة
05:53
الطريقة التانية لو أنا مقدميش حلول إني استثمر في دول مختلفة إن أنت بتحد من استثمارك في هذا السوق بمعنى إيه أن انت بتحط نسبة معينة من محفظتك لا تتعدى مثلاً 20 / 25% من محفظتك بتحطها ده أخري اللي انا هاخده في السوق ده لان العوامل اللي هي بره أيدك زي ما أتفقنا اللي هي مخاطرة السوق نفسه ممكن تأثر على أدائك ودي حاجه مش بأيدك أنت تقدر تتصرف فيها
في ناس تانية بتعمل إيه مثلاً واحد يقول أنا عايز أستثمر في المنطقة العربية كلها مش عاوز استثمر في دولة عربية واحدة أنا عايز استثمر في المنطقة كلها بحيث لو في دولة عربية بتمر بمشاكل متأثرش على المحفظة بشكل كامل لأنها متوزعة في دول أخرى
واحد تاني يقولي لأ انا عايز منطقة أكبر كمان أنا عايز منقطة الأسواق الناشئة دي مجموعة أكبر من الأسواق مع بعض محطوطه في مؤشر واحد أو في محفظة واحدة
واحد يقولي أنا عايز كمان أكبر أنا عايز الأسواق الناشئة والغير ناشئة اللي هي المحفظة العالمية مثلاً فاحنا ممكن نطلع من دولة صغيرة وبعدين منطقة وبعدين العالم كله ، هتقولي ازاي اشتريه العالم كله؟ أنا ممكن اشترية في مؤشر واحد أو في صندوق استثمار واحد بيستثمر هو بطبيعته في العالم كله فهنا الصندوق العالمي بالنسبالي مخاطرة السوق اللي أتكلمنا عليها أقل بكتير جداً من مخاطرة الدولة الواحدة لو أنت بتستثمر في سوق واحد المعلومة دي مهمه جداً جداً أنا بشوف ناس كتيرة جداً عمرها ما بتفكر فيها بس أنا في توزيعتي ولما بفكر في الأسهم لازم أفكر في المخاطرة دي كنوع اول من المخاطرات
07:42
تاني نوع من المخاطرة في الأسهم برده الناس عمرها ما ربطتوا ببعض هو مخاطرة الفوايد بمعنى لو أنا بستثمر في دولة معينه هنقول مثلاً إن الفوايد بتاعتي 5% لو لقينا الفايدة في إتجاهها للصعود تفتكر الاستثمار في الأسهم هيبقى مغري أو غير مغري فكر كده معايا.. أنا النهاردة باخد 5% وفجأة الفوايد اللي في البنك بقت 10% فالبنك النهاردة بيديني زيادة 5% بس عشان أحط فلوسي فيه هل وقتها تفتكر إن الاستثمار في الأسهم هيبقى مغري؟ لأ لأن أنت هتسيل فلوسك اللي هي موجودة في المخاطرة الأعلى وهتاخد الـ 5% وتريح دماغك
طيب لو خدنا بشكل عكسي لو الفوايد 10% ، النهاردة لقيت البنك المركزي بتاع الدولة اللي أنا عايش فيها بيقطع الفوايد لتحت 10 – 8 وصلنا لـ 5 العائد الموجود في البنك بقى قليل فالناس بتاخد مخاطرة أعلى بتروح تاخد أسهم وتستثمر عشان هي بتشجع ليه؟ لانك هتروح البنك مش هتاخد الفوايد اللي انت كنت بتاخدها قبل كده
هنلاقي الكلام ده برده حصل في السوق الأمريكي في الـ 10 – 15 سنة اللي فاتوا يمكن من وقت 2008 حوالي 14 سنة هنلاقي إن البنك المركزي أو الفيدرالي الأمريكي هو ديماً بيقطع الفوايد عشان يشجع الناس على الأستثمار لحد ما الفوايد يمكن وصلت لصفر فالناس مكنش عندها أي أداة إستثمارية فبيروحوا يستثمروا في الأسهم فبنلاقي إن الإتجاة العام بتاع سعر الفايدة في العالم وفي الأخص الدولة اللي أنت عايش فيها أوبتسثمر فيها بيكون ليه آثر كبير على الأسهم يعني ممكن نقول إن الـ 12 سنة في أمريكا اللي فاتوا الأداء بتاع الأسهم كان قوي جداً جداً لأن الإتجاة العام للفايدة كانت نزول
09:50
طيب ازاي احاول أتجنب المخاطرة هنا كمستثمر وأنا بفكر كده المخاطرة بتاعة الفوايد لو أنا في إتجاة صاعد مثلاً في الفايدة المفروض اعمل حاجه ولو الدنيا بتنزل المفروض أعمل حاجه تانية ولكن أنا على المدى الطويل لو عندك محفظة متنوعة اللي احنا ديماً بنتكلم عليها أنت مش محتاج تعمل أوي الحاجات دي بس الكلام ده موجهه أكتر للناس اللي حابه تستمثر بإيديها أو تكون محفظتها
في قطاعات بشكل عام بتستفيد من صعود الفوايد وفي قطاعات مش بتستفيد ، السوق بشكل عام بيضر من صعود الفايدة ولكن في قطاعات دفاعية شوية في الوقت ده ممكن تكون بتستفيد ولو فترات قليلة من الفايدة دي فأللي أنت ممكن تعمله إنك توجه محفظتك من القطاعات اللي مش بتستفيد للقاطاعات اللي بتستفيد دي الطريقة العامة اللي المستثمرين بيعملوها عشان يعدوا فترة فيها صعود في الفايدة خلوا بالكوا هنا احنا بنتكلم على حاجات أو بشكل عام من فوق مخاطرة السوق مخاطرة الفوايد ونيجي لتالت حاجه المخاطرة العالمية اللي جاية من أسواق بره إيدي أنا يعني أنا عايش في دولة وزي ما قولنا الحرب بتاعة روسيا حصلت فالاسواق العالمية كلها حصل فيها نزول وهنا ليه؟ لأن بيبقى في خوف من المستثمرين إن الأسعار متقدرش تكمل طلوع فبيتجهوا للبيع أو التسييل السريع
11:30
يبقى ده 3 نوع من أنواع المخاطرة ، الـ 3 دول أنا كمستثمر مقدرش أعمل فيهم حاجه يعني لحد دلوقتي دول حاجات أنا ممكن أتحرك أظبط محفظتي شوية أزود الكاش عندي أعمل قطاعات دفاعية أوزع الأسواق بس هي من الاخر حاجات بتخبطني وأنا مش بأيدي أتحكم فيها أوي
11:55
هنلاقي بقى رقم 4 هنبتدي نخش على مخاطرة الأعمال وده خاص بقى بالشركة اللي أنا اشتريتها ، عملت محفظة وروحت أشتريت سهم في قطاع معين ، المخاطرة دي زي أي حاجه في الدنيا الشركة ممكن تتأثر أرباحها ، أرباحهها تنزل جامد أو تطلع في أي أتجاه بقى أياً كان والسبب ليه علاقة بالقطاع بتاعها
يعني بنشوف إن القطاع التكنولوجي مثلاً في الـ 5 أو 6 سنين اللي فاتوا كان من أحسن القطاعات عالمياً لأن لما حصلت الكورونا الناس قعدت في البيت بقى في أستخدام للتكنولوجيا أكتر وهكذا فالقطاعات دي استفادت جداً ولكن قطاع مثلاً زي البترول لحد يمكن من سنة كان في مشاكل كبيرة جداً لأن مثلاً الحاجات اللي طلعت جامد القطاع بتاع التكنولوجيا هي نفسها اللي موتت قطاع زي البترول ، وبعد كده السنة اللي فاتت الآية أتقلبت لما حصلت الحرب أي حاجه بقى ليها علاقة بالطاقة طلعت جامد والقطاعات التكنولوجية وقفت لأن خلاص بقى في توسع جامد في القطاع التكنولوجي
12:59
فهنا مخاطرة الأعمال اللي هو طبيعي اننا نتكلم فيه ملهوش علاقة بالبورصة ، ملهوش دعوة هي مدرجة ولا لأ أنت راجل عندك شركة في قطاع القطاع ده للأسف في حالة وحشة أو قطاع في حالة كويسة فده رابع نوع من أنواع المخاطرة اللي أنت بتاخدها في محفظتك لما بتشتري أسهم
13:19
المخاطرة الخامسة الحوكمة الوحشة أو الإدارة السيئة اللي هي بيكون نيتها أنها متديش عائد كويس للمستثمرين بتوعها ودي بنشوفها في شركات كتيرة جداً حتى من الشركات المدرجة إدارة معينة هي مسيطرة على قطاع معين بتعمل أرباح معينة وبيدفعوا ربح لناس موظفين مثلاً فلوس كتير جداً ومبيحاولوش يعدي فلوس للمستثمر اللي معاه في الشركة بطريقة صحيحة
وممكن نلاقي في حاجات تانية ممكن توصل لحالات من الأحتيال أو النصب أو بيعملوا المحاسبة بتاعتهم بطريقة مش صح عشان يخبي خساير معينة وبعد شوية يتكشف يخشوا السجن وقضايا كل الحاجات دي تندرج تحت الأحتيال ودي برده أنت كمستثمر لازم تبقى واخد بالك منها وواخد بالك من جودة الإدارة لأن ده مشروع أنت حاطت فيه فلوسك زي أي مشروع تاني أنت ممكن تكون بتعمله
14:27
طيب ازاي برده اتجنب الحاجتين اللي احنا اتلكمنا عليهم من شوية مخاطرة الأعمال والإدارة السيئة اني أعمل محفظة متنوعة ، هنلاقي إن معظم الحلول اللي بتعالج موضوع المخاطرة دي إن لو حتى أنا عايز استثمر في السوق اني ديماً أعمل محفظة متنوعة متبقاش مركزة على شركة معينة أو على قطاع معين أو النهاردة كمان عرفنا انها متبقاش مركزة على دولة معينة
14:57
سادس نوع من أنواع المخاطرة في حاجه اسمها تعليق التداول أو وقف تداول على سهم معين وده ممكن يكون ليه أسباب كتير جداً لو أنا مثلاً شاري شركة معينة والشركة دي أتوقفت بسبب انهم مثلاً منزلوش الميزانيات بتاعتهم أو أتاخروا أو عملوا مخالفة للوائح سوق المال ، أو عملوا في خبر مهم هيطلع عليها ومستنيين البورصة أو الهيئة تعلن عنه فهيوقفوا السهم يوم أو اتنين أو اسبوع فأنا عندي مخاطرة اسمها وقف التداول على السهم
وهل ده بيحصل؟ آه بيحصل من آن لأخر ، هل ده ممكن يكون احسن حاجه في الدنيا أو أوحش حاجه في الدنيا؟ معرفش بس ده من المخاطر اللي بتحصل وبنشوفها ، ممكن نلاقي بالصدفة فترة ودي حصلت قبل كده قدامي في 2008 الأسهم كانت بتنزل جامد جداً وفي شركة كانت موقوفه عشان هما بيعملوا تحقيق في حاجه معينه او مستنين يعلنوا نتايج معينة فالورقة دي أتوقفت 10 أيام على بال ما الدنيا فتحت تاني مع الورقة دي كان السوق نفسه نزل 20 أو 25% بسبب الأزمة العالمية وفي مشاكل فمع الأسف الشركة دي مكنش فيها أي مشاكل الـ 10 أيام دول النزول اللي كانت محبوسة فيه المستثمرين مش عارفين يطلعوا فيها فلوس خدت نزول قوي جداً في الفترة دي بس عشان تعوض اللي حصل في السوق ، مع أنك لو السوق كان فاتح في أول يوم أو أتنين كنت ممكن تخرج بأسعار أحسن من كده بكتير فده يعتبر من أنواع المخاطر وده سادس نوع من أنواع المخاطر
16:38
المخاطرة رقم 7 مخاطرة السيولة يمكن دي مبتحصلش أوي على المحافظ الصغيرة يعني مثلاً لو أنت عندك حصة صغيرة جداً في شركة مئات من الأسهم أو أقل كمان مش هتحس بيها أوي لأن أنت حجمك في البيع والشرا هو صغير هتعرف تنفذه
ولكن بنلاقي محافظ معينة بتبقى أكبر شوية أو لو أنت ابتديت تحوش في شركة أو لو أنت راجل صاحب شركة حتى ونزلت السوق وأنت عندك حصة فيها أياً كان في حاجه اسمها مخاطرة السيولة إن الأسهم نفسها ساعات مبتنفذش كتير وخاصة في الشركات الصغيرة أوي وخاصة في الأسواق الناشئة يعني يمكن الأسواق المتقدمة بنلاقي فيها معظم الأسهم بتبقى بتنفذ كتير يومياً ولكن في الأسواق الناشئة مبنلاقيش الموضوع ده
ففي سيولة اللي هو أنا النهاردة عاوز أبيع ومش لاقي حد يشتري مني أو أنا النهاردة عاوز اشتري ومش لاقي حد يبيعلي فبنلاقي إن مخاطرة السيولة موجودة في الاسواق دي ، مع الأسف مخاطرة السيولة دي عشان اشتري لازم اذق السهم أو أطلع بسعري فوق عشان أعرف أنفذ أو وأنا ببيع لازم أذوق السهم لتحت فهبيع أرخص فهيحقق خسارة فمخاطرة السيولة دي حاجه برده لازم ناخد بالنا منها وهي موجودة أكتر في الأسواق الناشئة
18:03
نيجي بعد كده لمخاطرة بتاعة العملة وهو مهم جداً بالنسبالي برده ليه؟ لأن أحنا مثلاً شوفنا عبر التاريخ أسواق كتير جداً مثلاً فنزويلا، الأرجنتين، لبنان حتى للأسف بيحصل في فترات معينة إن العملة بتفقد جزء كبير جدأً من قيمتها ومع الأسف برده الأسهم في حالات معينة مبتقدرش تعوض الضعف القوي جداً في العملة دي فبنلاقي ممكن مثلاً العملة نزل 90 / 95% وبنلاقي الأسهم مبتقدرش تطلع عشان تعوض الفرق ده بالدولار ، ففي هنا مخاطرة العملة اللي أنت بتستثمر بيها
على المثال اللي هو أنت من چامايكا وروحنا بدلت أنا راجل عندي دولار بدلت فلوسي بعملة محلية وأشتريت بيها اسهم چامايكي النهاردة الأسهم دي مع الأسف ديماً هفكر فيها بالدولار لأن أنا مستثمر خارج الدولة هي دي الطريقة اللي الناس بتبص عليها
19:11
في كمان مخاطرة تانية إني معرفش أحول العملة تاني أرجعها دولار ، أنا لو بستثمر في سوق ممكن أبعتله من دولار لعملته المحلية بعد شوية يحصل مشكلة في العملة معرفش أجيب الدولار بتاعي تاني فدي مخاطرة لازم أحسبها لازم أبقى فاهمها وعارف إنه جزء من قراري الاستثماري
19:32
المخاطرة التاسعة اللي هنتكلم عليها النهاردة اللي هو المخاطرة بتاعة السياسة بتاعة الدولة نفسها اللي أنت محفظتك فيها ، إن ممكن الحكومات تصدر تشريعات جديدة أو قوانين متكونش في مصلحة المساهمين يعني مثلاً هنفرض ضرايب على المساهمين النهاردة مكناش مثلاً بنفرضها هنلاقي الأسهم بتنزل أو بالعكس هنشيل ضرايب كانت بتحصل على المساهمين فالأسهم بتطلع جامد وهكذا فالقرارات دي عبارة عن مخاطرة أنا موافق إني أخدها ، هي حاجات مش متوقعة ولكن هي في الأخر بتأثر على الأداء بتاع محفظتي الحاجات دي كلها منقدرش طبعاً نحسبها ومنقدر نتوقعها ولكن كل اللي أنا عايز أقولهولك تاني إن محفظتك معرضه لكل هذه المخاطر
20:25
احنا أتكلمنا النهاردة على مخاطرات كتير يمكن 9 مخاطرات لحد دلوقتي ، هل أنا كمستثمر هعرف أبعد نفسي عن المخاطرات دي؟ مستحيل ، أي استثمار فيه مخاطرة كل اللي أنا بحاول أعمله هنا إني بحاول أعدل شكل محفظتي وأحط حدود معينة Limits تمنعني إني أكون واخد مخاطرة كبيرة وأحاول مش أتجنبهم بس ميدمرونيش أو ميوصلونيش لمرحلة كبيرة ديماً بنقول أنت متحطش فلوسك في حاجه أنت متعرفش تنام وانت قلقان أنا حاسس أن استثماري كبير اوي في الأسهم مثلاً مش عارف أنام يبقى أنا هنا عندي مشكلة يبقى قراري الاستثماري في الأول غلط
21:16
لما أقعد أحط المخاطرات بتاعي وأشوف مثلاً تقولي قيملي دولتين جنب بعض أستثمر في الدولة دي ولا الدولة دي أنا همشي كده على المخاطر اللي اتكلمنا فيها وهيبان لي بعد المثل ده مين الدولة الأقل مخاطرة ومين الأعلى مخاطرة فلما هحط فلوسي في الدولة الأعلى مخاطرة يبقى أولاً أنا وافقت اني اخد مخاطرة يبقى المفروض يبقى المفروض استنى منها عائد أعلى
21:41
الفكرة اللي احنا بنتكلم فيها النهاردة هي مش بتقولك متستثمرش في الأسواق الخطر أنا بقولك لما تستثمر في الأسواق الخطر أولاً لازم تحد من محفظتك ، محفظتك تبقى في مستوى تقدر تستريح وتقدر تنام وأنت مطمن ثانياً تطلب عائد أعلى من العادي يعني مش هقولك روح خد سندات أمريكية بتديك مثلاً 3% وأروح استثمر في دولة ناشئة وهتاخد 4% أو 5% بالعقل كده مينفعش يبقى لازم لما أروح للدولة الناشئة يبقى عندي فائض من العوائد يخليني أستحمل كل أنوع المخاطر اللي أحنا اتكلمنا عليها النهاردة
22:20
برده القرار اللي أنت ممكن تاخده اننا لو معندناش وقت ومجهود مش لازم نشتري أسهم فردية ، أروح اشتري آبل أو جوجل لأ أنا ممكن أشتري محفظة متنوعة وممكن تكون جغرافيا موزعة على دول مختلفة ، مخاطرة الشركات بتاعي هنا برده القطاعات هتبقى متوزعة ولو حصل لا قدر الله ان شركة بتعمل عملية احتيال هتبقى جزء صغير ، تعليق التداول مع السيولة الحاجات دي كلها المخاطرة هتبقى متوزعة فيها لأن أنا مش هبقى مجمع نفسي في حته واحدة فالميزة في المحافظ المتنوعة انها بجد بتحاول تنوعلك المخاطر اللي احنا اتكلمنا فيها
والمحفظة المتنوعة دي ممكن تاخدها زي ما قولنا على منطقة زي آسيا ، أمريكا اللاتينية ، المنطقة العربية كمنطقة بالكامل أو ممكن نروح حاجه أكبر عالمياً ممكن ناخد اسهم أمريكية مع أسهم عالمية زي ما نحب وانا شوفت أمثلة وكنت مبسوط بيها انهم بيبعتولي حتى الناس بقت تقسم النطاق بتاعهم في الأسهم بطريقة زكية جداً وده بيبقى راجع برده من أنهم بيحاولوا ينوعوا استثماراتهم
برده متخليش كل حياتك مرتبطة بعملة واحدة عشان لا قدر الله لو شوف سيناريوهات في العملات ميبقاش عندك مخاطرة في عملة واحدة بعينها
23:57
دي كانت بشكل عام المخاطرة اللي جايه من السوق أو الحاجات اللي بره ايدك شوية مش هتقدر تسيطر عليها في حاجات أعمق من كده لو دخلنا في كل شركة زي مثلاً لما حد يكون خبير مثلاً في قطاع النقل والطرق وفي شركة بتبني كباري فبيبتدي يحلل هل هي ارباحها بقى والكلام ده كله يعني أحنا لسه في الاستثمار في شركات ، احنا هنا بنتكلم بشكل عام على الشكل من بره ايه اللي ممكن انت متكونش شايفه مخاطرة انت بتاخدها الحاجات التانية دي بتبقى تحليل مالي أو تحليل اساسي للميزانيات والأرباح والتوقع بتاعها وده موضوع تاني ممكن نبقى نغطية في حلقة تانية بس أنا النهاردة بكلمك بشكل عام المخاطر الأكبر والأعلى اللي أنت بتاخدها وانت مش واخد بالك وتاني هرجع أكررها لازم تكون واخد عوائد أعلى كل ما بترفع المخاطر اللي انت بتاخدها
شكراً جداً جداً على وقتكوا الاسبوع ده وان شاء الله اشوفكوا الاسبوع الجاي
Translation of some words and terms:
Saving مدخرات
Systematic Risk مخاطر السوق
Socially إجتماعياً
Social unrest الاضطرابات الاجتماعية
Developed markets الأسواق المتقدمة
Geopolitical Risk المخاطر الجيوسياسية (الجغرافيا السياسية)
Overnight فجأة
Home Country الوطن
Emerging Markets (EM) الأسواق الناشئة
Interest Risk مخاطرة الفوايد
Macro دقيق
Global risks مخاطر عالمية
Sell off بيع
Business Risk مخاطرة الأعمال
Sector قطاع
Energy طاقة
Misgovernment سوء الحكم
Bonus علاوة / ربح
Shareholder شريك
Fraud أحتيال
Trading suspension تعليق التداول
Liquidity risk مخاطرة السيولة
Currency risk مخاطرة العملة
Convert تحويل
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #مخاطر_سوق_الأسهم