65. ما وراء كروت الائتمان (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
سألت نفسك قبل كده ليه عندك كارت ائتمان؟ ليه بتستخدم الأداة المالية دي؟ هل تعرف مزاياها وعيوبها؟ هل تعرف ازاي ممكن تستفيد بيها في حياتك؟ حلقة النهاردة بنتكلم فيها على البطاقات الائتمانية أو ما يطلق عليها (فيزا)
: في هذه الحلقة
02:10 ايه هي كروت الائتمان؟ وليه البنك بيديك كارت ائتمان وهتستفيد منه ازاي؟
02:50 الفرق بين البطاقة الائتمانية والقرض العادي اللي بتاخده من البنك؟
03:25 البنك بيحاسبك على كارت الائتمان ازاي؟
05:18 هيحصل إيه لو اتأخرت في سداد الفايدة على البطاقة الائتمانية؟
05:55 على أي اساس البنك بيفتحلك كارت الائتمان؟
07:33 ازاي البنك بيلعب على نفسية المتعاملين؟
09:45 دراسة أمريكية: 50% من مستخدمي كروت الائتمان بتخش ديماً في فوايد وهي مش واخده بالها
13:41 الناس بتصرف من الكروت الائتمانية على إيه؟
14:50 مساوئ الكروت الائتمانية؟
16:04 القوة الشرائية الخاطئة
17:33 ازاي البطاقات الائتمانية بتأثر عليك نفسياً؟
18:19 فوايد البطاقات الائتمانية؟
20:55 هل انت بحاجة لكارت ائتماني؟
22:03 هل مشترياتك بتستاهل كمية الفوايد اللي انت بتدفعها؟
22:42 ازاي اخرج من ديون البطاقة الائتمانية؟
25:45 قلل استهلاكك وسدد ديونك
27:35 ازاي توظف الديون اللي بتاخدها بطريقة استثمارية ذكية توصلك للحرية المالية
حلقة النهاردة مهمه جداً لأن عدم استخدامك للكروت الائتمانية بشكل صحيح هيدخلك في ديون ودي من أكتر الاسباب اللي بتمنعك توصل للحرية المالية وبتأخرك عن تحقق أهدافك سواء كان الهدف ادخار أواستثمار
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
المقدمة
اهلا بيكو في حلقة جديدة من بودكاست كلام ينور انا عمر شمس.. حلقة النهاردة حلقة مهمة جداً هنتكلم فيها على البطاقات الائتمانية أو بيطلق عليها فيزا.. مشهورة بكلمة فيزا ، اتشهرت بسبب شركة فيزا واحده من أكبر الشركات اللي بتقدم خدمة البطاقات الائتمانية ، برده الفيز دي بتتقدم من شركات تانية زي ماستركارد وأمريكان إكسبريس وفي شركات كتيره بتقدمها. الحلقة دي مهمه جداً بسبب أن من الحاجات اللي بتمنعك ديماً إنك توصل للحرية المالية أنك بتبقى دخلت في دايرة الديون ، دايرة الديون اللي مبتقدرش تخرج منها وبتأخرك على الأهداف بتاعة الادخار أوالاستثمار ، من الحاجات اللي بتمنعك ديماً ديماً من الاستثمار إن أنت بيبقى عليك ديون كتير لما بتدخل في الدايرة بتاعة الدين صعب جداً تخرج منها
01:52
أول حاجه عاوز اسألها هل أنت عمرك سألت نفسك انت عندك كارت ائتمان ليه؟ ليه بتستخدم الأداة المالية دي؟ هل عرفت مزاياها؟ هل عرفت عيوبها؟ عرفت انت ممكن تستفاد بيها ازاي في حياتك؟ في حلقة النهاردة هحاول أغطي الحاجات دي
02:10
إيه هي الفيزا أو كارت الائتمان
أولاً أنا عايز أعرف إيه هي الفيزا أو كارت الائتمان هو عبارة عن خط ائتمان ، خط ائتمان يعني البنك بيسمحلك في اي لحظه إن انت تسحب أو تصرف رقم معين أتفقت معاه ما بينك وبين البنك بتاعك أتفقت إنك تستخدم الكارت ده في شرا حاجات معينة من أي حته وبتستخدمه من نقاط البيع والشرا اللي هي موجوده في المحلات أو ممكن تستخدمها من خلال ماكينة صرف آلي ، يبقى أنت أول سؤال لازم تسأله لنفسك انت ليه عايزها؟ وليه البنك أدهالك أو انت هتستفيد منها ازاي؟
02:50
ايه الفرق بقى ما بين البطاقة الائتمانية والقرض العادي اللي بتاخده من البنك؟
القرض العادي اللي بتاخده من البنك هو قرض بمدة معينة متفقين مع بعض أنا والبنك إن احنا مثلا هناخد قرض على 3 سنين ، 5 سنين ، 10 سنين أيا كان مدته والقرض ده بدفعله مدفوعات شهريه ثابته متفق فيها مع البنك من أول يوم ولكن الفيزا هو خط ائتمان مفتوح تقدر تستخدمه بناءاً على احتياجاتك الشخصية يبقى ده أول فرق مهم ما بين القرض العادي واللي بتاخده من البنك والبطاقة الائتمانية
03:25
طيب البنك بيحاسبك عليها ازاي؟
في حاجة اسمها رسوم ثابتة وفي حاجة اسمها رسوم متغيرة على القرض ده أو خط الائتمان ده الرسوم الثابتة بتبقى أول نوع مثلاً حاجه اسمها مصاريف شهرية لإصدار الكارت ، ممكن مصاريف شهرية أو سنوية. الحاجه التانية انت ممكن تكون بتدفع فلوس على الحسابات اللي بيبعتهالك البنك ، ورسوم ثابتة تاني لو اتأخرت في المدفوعات ، لو حبيت ترفع الحد الائتماني بتاعك أو تنزله. فكل بنك عنده جدول المصاريف بتاعه تقدر تفتح الموقع بتاع البنك اللي انت تبعه وتبص على أنواع المصاريف الثابتة
الحاجه التانية ودي أكبر دخل بيخش للبنوك هي الفايدة اللي بتدفعها على القرض اللي انت بتستخدمه وهنا بنلاقي ان الفوايد على الكروت الائتمانية تعتبر من أعلى الفوايد الموجودة في السوق بمعنى أن انت ممكن تروح البنك بتاعك تستلف قرض سنوي ممكن نقول 10 ، 12 ، 15% ولكن كارت الائتمان بتتراوح أسعار فايدته وأنا بعمل بحث على الموضوع ده من 2% لـ 3.5% في الشهر فلو بصينا على الفايدة السنوية اللي انت بتدفعها أنت ممكن تلاقي نفسك بتدفع 30 أو 40% فوايد فدي أكبر خطورة موجودة في البطاقات الائتمانية إن الفوايد بتاعتها هي أضعاف أضعاف القرض العادي وده بالنسبالي من اسوأ الائتمان اللي أنت ممكن تاخدها لأن الفايدة أو المصروف عليها عالي جداً وهو ده أكتر حاجه البنك بيعمل منها فلوس.. المنتجات اللي بيقدمها للعملا بتاعته
05:18
الحاجه التانية المتغيرة لو انت حصل انك اتأخرت فالشهر اللي بعده انت بتدفع فايدة على الفايدة يعني مثلاً انا كنت مستلف 10000 ونزلي عليها فايدة 3% فنزلي عليها 300 الشهر اللي بعده أنا دفعت جزء صغير منه فانا هينزل عليا فايدة تاني على المبلغ الجديد اللي هو 10300 يبقى أنا هنا بحط فايدة على الفايدة ودي خطورة الكروت الائتمانية
05:55
البنك بقى بيصدرهالك بناءاً على أي اساس
بتلاقي واحد بيكلمك في التليفون من اللا شيء يا استاذ فلان الفلاني يا استاذة فلانة الفلانية حضرتك احنا هنديكوا بطاقة ائتمان ، البنك بيحدد بطاقة الائتمان دي بناءاً على ايه؟ اولاً بيحددها بناءاً على مرتبك ، أنت بتدخله دخل ثابت كل شهر فالراجل بيشوف عنده انك بتدخل ومعندكش أي قروض فيبتدي يحاول يقولك هنديك كارت ائتمان سهل في استخدامه خش وشوف ممكن تستخدمه ازاي ويبعتلك الكارت على البيت فبيحددلك اول حاجه نسبة من مرتبك بيديك الحد الائتماني ده
تاني حاجه بيبص على التاريخ الائتماني بتاعك هل انت بتدفع في الوقت المحدد لو أنت مثلاً عندك قروض معينه أو استخدمت شركات اخرى او بنوك اخرى لأن النظام بيبقى مربوط كله بدايرة زي في مصر حاجه اسمها اي سكور وده اللي هو المكتب الائتماني بتاع الدولة نفسها ، يبقى تاريخك الائتماني كله موجود فلو انت عميل كويس بتدفع في وقتك البنوك بتبقى متشجعة تسلفك فلوس وده تاني حاجه بيحددوا على اساسه ، سنك برده بيحدد حجم الائتمان بتاعك فدي حاجات من عوامل كتير بتخلي البنك يفتحلك الكارت الائتماني
07:33
طيب ، لقينا بقى أن البنك بيقولك في التليفون على فكرة حضرتك ممكن تدفع وتسدد في وقت محدد المبلغ اللي انت صرفته من غير فوايد ودي ديماً الحاجه اللي بتشد المستهلكين انهم ياخدوا خطوط ائتمانية بدون فايدة ولكن دي بتيجي بمشكلة كبيرة الفايدة اللي هي 0% اللي بيديهالك دي بيديهالك تقريبا يعني بيتراوح مثلاً 55 يوم من غير فايدة ودي بتتحسب ازاي؟ بتتحسب ان حضرتك بيطلعلك فاتورة البطاقة الائتمانية مثلاً يوم 1 في الشهر حضرتك نزلت يوم 5 في الشهر اشتريت حاجة يوم 1 في الشهر اللي بعده بيظهرلك فاتورة بتقولك حضرتك صرفت الشهر اللي فات كذا ادفع قبل 1 اللي جاي بدون فايدة فهنا الـ 55 يوم دول هم بس اللي بيبقوا من غير فوايد طيب بعد الـ 55 يوم ايه اللي بيحصل يبتدي البنك يحاسبك على فايدة زي ما قولنا من 2 لـ 3.5% في الشهر ودي فايدة كبيرة جداً
الناس بتبقى فاكرة وهي بتاخد كارت الائتمان اللي هو أنا هاخد وأدفع في الـ 55 يوم دول إن شاء الله وأكيد مش هحاسب على فوايد ولكن البنك بيلعب على نفسية المتعاملين إن الناس بعد شوية ممكن تدفع شهر شهرين تلاته ولكن بعد شوية ألتزامك بالدفع ده بيقل جامد فيبتدي يتراكم عليك فوايد وتاني قولنا دي من أخطر الحاجات اللي بتبعدك عن الوصول للحرية المالية ، فالحاجه اللي أنت فاكر أنك ممكن تعملها بتطلب مجهود نفسي وذهني جامد جداً إن انت تدفع كل شهر الحاجات اللي أنت صرفتها الشهر اللي قبله لأن كمان أنت ممكن يكون الحد الائتماني بتاعك كبير إن الجزء اللي أنت بتشيله شهرياً للدفع بالكارت مع الوقت بيبقى قليل بالنسبة للي أنت صرفته الشهر اللي قبله
09:45
ABA دراسة أمريكية أجرتها جمعية المصرفيين الأمريكيين
لقت ان لو عندنا 100% من الناس بيستخدموا بطاقات الائتمان لقت ان في 43% مبيقدروش يدفعوا في الوقت المحدد وبيتأخروا وبيزوقوا الحاجات اللي مفروض كانوا يدفعوها بدون فايدة للشهر اللي وراه وللشهر اللي وراه.. فيعتبر الـ 43% من الناس اللي بيدفعوا ديماً فوايد ، طيب لقوا 29% هم بس الناس اللي بيحافظوا على الدفع في الوقت ودول سموهم (المتعاملين) وبقية الـ27% اللي موجودين في الـ 100% مش بيستخدموا اصلاً الكروت ومبيصرفوش منه أي حاجه فمعنى كده إيه؟ ان تقريباً قرب نص الناس بيدفعوا الفوايد العالية جداً في بطاقات الائتمان أنا بستخدم هنا أرقام من الجمعية الأمريكية لأن الأسلوب الاستهلاكي في العالم مش هيختلف كتير أوي عن بعض البشر كلهم تقريباً بمختلف درجات التعليم والدخل في الاسلوب الاستهلاكي ممكن نلاقيهم شبه بعض شويه فأنا أخدت الإحصائية دي كرقم يمثل الشريحة الموجودة ، يبقى نص الناس اللي بيطلعلها كروت ائتمان بتخش ديماً في فوايد والناس مبتخدش بالها لأن النظام معقد جداً عشان تتابع انت نزل عليك فايدة إيه الشهر اللي فات انت كل اللي بتشوفه ان بيجيلك رسالة من البنك بتقولك أدفع الرقم الفلاني أو بتفتح الحساب ويقولك أدفع الرقم كذا لكن أنت مبتبصش كان في فايدة قد ايه نزلت عليا الشهر اللي فات ، ده كان في مصاريف تأخير نزلت عليا الشهر اللي فات وده بيساعدك أكتر تخش في الدوامة بتاعة الكروت الائتمانية
11:49
برده أنا هتكلم على شوية إحصائيات لقيتها طبعاً الحاجات دي على الدول المتقدمة زي أمريكا ، الدول المقتدمة من حيث النظام الائتماني عندهم هما أسرع من الدول العربية ولكن أنا بستخدم الأرقام دي ليه لأن التطور الطبيعي بتاع الدول العربية أو الناس اللي معندهاش أنظمة ائتمانية متكاملة ان هي هتتحول في يوم من الأيام وتوصل للأرقام دي فأنا بحاول اتكلم على الأرقام دي إن ده الأتجاه العام اللي احنا هنوصله حتى انتو لو تلاحظوا في المنطقة العربية النهاردة بقت كل حاجه بتتحول إننا مبنستخدمش الكاش بنحاول نستخدم سواء البطاقات الائتمانية أو البطاقات المصرفية. فمن الحاجات اللي أنا شوفتها إحصائية جايبها من شركة في أمريكا زي شركة فيزا وماستركارد وكده بيطلعوا إحصائيات على طريقة استخدام بتاعة المتعاملين للكروت فلقينا ان 45% بيستخدموا الكروت المصرفية في مقابل 35% بيستخدموا كروت الائتمان وبقية الناس اللي هي قرب الـ 10% دول بيستخدموا الكاش فهنلاقي إن الكاش بقى استخدامه قليل جداً جداً في بعض الدول المتقدمة أنا فاهم اننا في الدول العربية لسه بس احنا هنروح هناك. يبقى الكروت الائتمانية 35% من الحجم الاستهلاكي
13:41
طيب كان في سؤال مهم جداً في دماغي طب هي الناس بتصرف على إيه من الكروت الائتمانية؟
لقينا ان 48% من الناس بيستخدموه أونلاين ، 38% بيستخدموه في المحلات الكبيرة اللي بتبيع أي حاجه وكل حاجه من لبس ولعب واي حاجه ، 36% بيستخدموه في المطاعم ، 27% بيستخدموه في السوبر ماركت ، و 17% بيستخدموه في الوجبات السريعة ، وجزء كبير ابتدا برده يستخدمه في الاشتراكات الشهرية زي نتفليكس ، شاهد ، يوتيوب أي حاجه من خدمات البث الحاجات انت بتدفعلها اشتراكات ، آبل نفسه الحساب ، وجوجل ، أندرويد أيا كان المتجر اللي انت بتستخدمه. أبتدينا نشوف الناس بتستخدمها برده بنسب كبيرة في الحتت دي فدي الاستهلاكات ولو لحظتوا ان كل التصنيفات بتاعتها هي حاجات استهلاكية يعني مفيش فيها ولا حاجه من الحاجات الاستثمارية زي ما اتكلمنا
14:50
تعالوا نشوف إيه المساوئ بتاعة الكروت الائتمانية؟
اول حاجه من الحاجات دي إن بسبب طبيعتها انت بتسخدمها غلط للاستهلاك مش بتستخدمها لشرا أصول ليه؟ لأن طبيعة الدين ده هو دين قصير الأجل يعني أنا لازم ادفعه الشهر الجاي ، فأنا غالباً الشهر الجاي او الشهر اللي وراه أنا مش بخطط إني اشتري أصل استثماري ، لأن الأصل الاستثماري بيبقى حاجه طويلة الأجل حاجه هقعد فيها فترة طويلة عشان تبتدي تدخلي الدخل إنها ترجعلي فلوسي ولكن الدين ده دين بطبيعته قصير الأجل فأنا ديماً بستخدمه للأستهلاك اللي هو نزلت روحت السوبر ماركت اشتريت حاجه ، سافرت ، اشتريت لبس فطبيعة الدين ده استهلاكي وده اوحش أنواع الديون
15:48
تاني حاجه من المساوئ بتاعة بطاقات الائتمان الرسوم بتاعتها.. الرسوم بتاعتها تعتبر عالية جداً جداً زي ما اتكلمنا ان من 2 لـ 3.5% في الشهر ده رقم كارثي بالنسبة للفوايد اللي أنت ممكن تكون بتدفعها
16:04
تالت حاجه انه بيشجع على عادات انفاق سيئة وبيديك احساس ديماً ان انت معاك فلوس ، عادات سيئة زي ايه؟ بتساعدني على حاجه اتكلمنا عليها كتير قبل كده اللي هي الشراء الإندفاعي ، انت ممكن تقول لو بتقبض مرتبك كاش في البيت بتاخده كده وتروّح لما الكاش يخلص مش هتصرف لأن حضرتك معكش فلوس ولكن الكارت الائتماني ديماً بيخليك عندك قوة شرائية على جنب ف وأنت ماشي في المول او الشارع بتفكر تقول إيه ده أنا معايا كذا في الكارت أنا ممكن أروح اشتري فبيديك احساس خاطئ إن أنت عندك قوة شرائية
16:46
الحاجة الرابعة إن النظام نفسه معقد جداً إنك تفهمه يعني لازم تقعد تفتح حساب البنك بتاعك وتشوف تاريخ إصدار بتاع الفاتورة وتعرف انت المفروض تدفع لحد يوم كام والمصروف ده هينزل عليك امتى ولو دفعت بس حته يعني مثلاً انت عليك 10000 روحت دافع 3 يقوم البنك داخل محاسبك على ال10 بالكامل كفوايد فتكلمهم في التليفون تقوله طيب انا دفعت 3 حضرتك ليه حاسبتني عليها يقولك لأ مانت لازم تدفع المبلغ كله وحضرتك مضيت على الكلام ده وانت بتاخد الكارت فبتبتدي تخش في حاجات نفسيه ملهاش أي لازمه بس لأنك عاملت استهلاك بطريقة مش مظبوطه
17:33
خامس حاجة انها بتأثر عليك نفسياً بدرجة رهيبة لو أنت مش عارف تديرها كويس لأنك بتخش في الدوامة بتاعة الدين أو ان انا بخش في نفق مظلم أو دوامة مبعرفش أخرج منها لأن أنا ديماً حاسس إني عليا 10 آلاف في الفيزا 20 ألف ، 50 ألف في أيا كان حجمك عامل ازاي فديماً بتحس إن عليك دين والدين مبيخلصش ولازم أدفعه كل شهر ، بشكل عام الدوامة عمالة تزيد وأنت مش عارف تخرج منها وهي دي المساوئ بتاعة البطاقات الائتمانية
18:19
طيب إيه الفوايد؟ اللي هو السؤال اللي سألته في أول الحلقة هو أنا بفتحها ليه اصلاً؟
هنلاقي إن الاستخدام بتاعها سهل قوي ، أنت بتقف في المحل بتحط الكارت بتاعك يدفع ، بعد سهولة الأستخدام دي هنلاقي أنها مقبولة في كل مكان ، يعني النظام العالمي بتاع بطاقات الائتمان أتعمل للتسهيل وان انت تقدر تتقبل معاك في أي حتة في العالم يعني ممكن تبقى ماشي في حته مفهاش كهربا ولا ماية بس في واحد واقف بماكينة نقاط البيع ، ممكن تسافر دولة مش موجود عليها أي حاجه وبعدين تلاقي ماكينة صرف آلي في مكان عشوائي مفهوش أي حاجه يبقى هي مقبولة للدفع في أي حته وده برده حاجه بتخليك تتجه لكروت الائتمان
19:25
الحاجة التالثة اللي الناس ليه بتستخدم كروت ائتمان لأنها بتحاول تحسن مستوى الرصيد بتاعها أو تحسن الملف الائتماني بتاعها في البنوك المركزية لأن حضرتك لما تاخد كارت ائتمان وتدفعه في الوقت المحدد مستوى الرصيد بتاعك بيعلى ، هو مثلاً من 1 لـ 100 أنت حضرتك النهاردة بتدفع في الوقت المحدد من 90 لـ 100 المستوى بتاعك كويس من 80 لـ 90 ، من 70 لـ 80 وهكذا.. البنك لما تروح تقدم على قرض أخر يقولك اه انا هبص عليك أنت راجل بتدفع في الوقت المحدد ، فالناس ساعات بتستخدم الكروت الائتمانية عشان تحسن مستوى الرصيد بتاعها
20:14
الحاجة الأخيرة اللي الناس بتستخدم الكروت الائتمانية عشانها أنها بتحصل على حاجه اسمها استرداد نقدي أو اي نوع من الحوافز الاخرى بمعنى ان لو حضرتك صرفت في الشهر 5000 جنية تاخد 5000 نقطة تستخدمها في المطعم الفلاني أو المحل الفلاني ببلاش أو الكارت نفسه بينزلك عليه 1 أو 2% استرداد نقدي من الـ 5000 فتلاقي نزلك الشهر اللي وراه 50 جنية أو 100 جنية نازلين بس عشان حضرتك استهلكت فالناس بتتشد وبتنجذب للحوافز دي
20:55
احنا اتكلمنا على المزايا واتكلمنا على العيوب أنا مش ضد أو مع الكروت الائتمانية أنا ضد أو مع أنك متكونش فاهم الكروت دي معموله ليه وإيه انت شخصياً في حالتك دي في سنك ده استخدامها الأمثل في حياتك هو ده اللي أنا ضده انك متكونش فاهم المعلومة دي فأنت لازم تكون صادق جداً مع نفسك هل انت بحاجة للكارت ائتماني ده ولا لأ ، لأن حضرتك ممكن تستخدم كروت من أنواع اخرى كارت الحساب البنكي بتاعك أنك تدفع كل المصاريف بتاعتك من خلالها يعني الكارت الائتماني مش معمول بس عشان سهولة الاستخدام هتلاقي سهولة الاستخدام دي موجودة في كارت حسابك البنكي أنا بدفع من رصيدي بدفع من مرتبي بدفع من دخلي مش بدفع من قرض استلفته من البنك وده حاجه كبيرة جداً لأن حضرتك مابتدفعش اي فايدة على كارت حسابك البنكي
22:03
يبقى انت لازم تكون صادق مع نفسك هل اللي انت بتشتريه من المحل ده بيستاهل كمية الفوايد اللي انت بتدفعها يعني مثلا في تخفيضات في محل معين ففي حاجه بـ 100 جنية أو درهم وعليها 50% فنزلت بقى سعرها 50 فروحت رايح شاريها بس أنا مع الوقت الحاجه اللي بـ 50 دي بعد ما ادفع الفوايد اللي عليها في بطاقة الائتمان بعد فترة طويلة هلاقي نفسي اشتريت الحاجه دي بـ 70 ، 80 بـ 90 كل دي فوايد يبقى حضرتك موفرتش أي حاجه يبقى لازم تبقى فاهم جداً انت بتعمل إيه بالكارت الائتماني
22:42
طيب أنت دخلت في الدوامة بتاعة الديون انت بتسمع النهاردة وعندك الدوامة بتاعة الديون والدوامة دي جاية بس من البطاقة الائتمانية معندكش اي قروض تانية وبسمع وبشوف ناس كتير في حياتي بقابلها معندهمش أي ديون غير ديون بطاقة الائتمان ازاي اخرج منها؟
23:07
اول نوع من أنواع الخروج من دوامة كارت الائتمان ان حضرتك بتكلم شركات تانية أو بنوك أخرى بيكون عندهم كروت ائتمان بيقولك حضرتك أنا ممكن أخد الرصيد بتاعك اللي انت مش عارف تخرج منه ده بقالك سنة ، سنتين مش عارف تدفع بطاقة الائتمان دي وهحولهالك على بطاقة جديدة وهدفعك زيرو فايدة لمدة مثلا 3 شهور لـ 6 شهور أو سنة وفي بنوك ممكن تعملها أطول كمان هو هنا هدفه ايه؟ هدفه أنك تفتح بطاقة الائتمان الجديدة بتاعته بس أنا هدفي إيه؟ أنا هدفي اني احول الدين اللي بدفع عليه من 2 لـ 3% أوديه وادفع عليه 0% ومع الوقت أقفل الكارت ده ودي أول طريقة عشان أخرج من الدين ده بس لازم تبقى فاهم انك بعد كده لازم تحط في ميزانيتك الرقم اللي هيخرجك من الدين ده
24:07
طيب لقينا ان مثلاً إن 6 شهور دي فرصة مش كافية أنا عليا 10000 أو 20000 أو أيا كان الرقم ولقيت البنك بيقولك هديك كارت تاني بيدفع في 6 شهور فمثلاً هيدفعني على ال20000 مثلاً بدون فايدة هيدفعني 3000 وشوية كده كل شهر لقيت الرقم ده كبير عليا معنديش في ميزانيتي مكان يسمح أروح أعمل ايه؟ هروح أعمل قرض شخصي مع بنك واعمل القرض ده في مدة أطول سنة ، اتنين ، تلاتة أو اربعة بس عشان أدفع كارت الائتمان! آه بس عشان أدفع كارت الائتمان ، ليه؟ لأن وقتها الـ 20000 دي لما أمدها على 48 شهر أو على 60 شهر أو أيا كان مدة القرض الشخصي اللي حضرتك هتاخده هتلاقي إن المدفوعات نزلت من 3000 وشوية لرقم بسيط دي أول حاجه هقدر احطها في الميزانية بتاعتي أقدر أخرج من دين كارت الائتمان بتاعي وكمان في حاجه إني هستلف وقتها هنا بفايدة أقل بكتير من اللي أنا كنت بدفعها على الكارت الائتماني يبقى تاني حل اني هاخد قرض شخصي وأروح أقفل الرصيد بتاعي في بطاقة الائتمان دلوقتي حالاً مدفعش عليه أي فايدة واقلب الفوايد بتاعتي على قرض شخصي بفايدة أقل ومدة أطول وأدفعها بالراحة ولو حضرتك ربنا كرمك وجالك أي علاوة أو دخل غير إعتيادي أنت مش واخد بالك منه كان ممكن يجي ممكن وقتها تكلم البنك تقوله أنا عاوز أقفل القرض الشخصي ده دلوقتي حالاً
25:45
الحاجة الأخيرة إننا ممكن ابتدي ابص على البيت بتاعي أو الحته اللي أنا عايش فيها عندي لبس مبستخدموش عندي ألعاب مبستخدمها بتاعة ولادي عندي كتب ، عندي أي حاجه مبستخدمهاش في البيت النهاردة بقى في مواقع كتير جداً تقدر حضرتك تعرض عليها المنتجات بتاعتك دي المستعملة وتتباع أيا كان رقمها ايه هي مازالت أحسن من الصفر ، وتاخد المنتجات اللي أنت مبتستخدمهاش طبعاً لازم تكون ملهاش أي فايدة ليك وتاخد الفلوس دي وتروح تقفل الدين بتاع كارت الائتمان بتاعك وهقولك ده ليه لأن حضرتك لما بتخفف الحاجات اللي عندك في البيت أولاً بتقلل الاستهلاك ، لأنك بتعود نفسك تقلل من استهلاكك بتحاول تبطل تشتري الحاجات انت مش هتستخدمها عشان عشان لو هتشتري حاجه في المستقبل مش هتستخدمها هيكون طريقها ايه ده أنا مبستخدمش كل الحاجات دي أنا هبيعها في الاخر طب ليه اشتريها اصلاً + أنك بتدفع دين فوايدة عالية جداً جداً يعني انت ممكن يكون عندك حاجه قدامك في البيت تخلصك اصلاً من الدين حاجه اصلاً ملهاش أي قيمة عندك أيباد قديم أيفون قديم ، تليفون سامسونج أي حاجه موجوده عندك جوه البيت ملهاش اي معنى هي بس مش هتجيبلك تمنها في الحالة دي التكلفة بتاعتها أو تكلفة الفرصة البديلة بتاعتها مش تمنها بس أنا مش هبيعها بس بـ 100 دانا هبيعها بـ 100 وأقفل دين عليا بـ 120 أو 130 فدي الطريقة التالتة اللي أنا بنصح بيها انك ازاي تقفل الدين الكبير ليه فوايد عالية
27:35
اهم حاجه في الحلقة دي ان انت تبقى فاهم انت بتاخد الديون ليه بيتعمل بيها ايه هل بتوظفها بطريقة استثمارية ذكية بتوصلك للحرية المالية ولا لأ ، وبعد كده لازم تبقى عارف حقوقك كمستهلك القانون اللي بيتحط عليك لما بتفتح الديون دي لازم تبقى فاهمها بطريقة بسيطة وتبقى حاطتها في الميزانية بتاعتك بشكل صحيح
28:10
الخاتمة
لو عندك اي اسئلة ليها علاقة بالديون لو عاوز نصيحة شخصية معينة في حالتك انت لأن الناس حالتها مختلفة مفيش حد حالته زي التاني مالياً تقدروا ديماً تبعتولنا على الصفحة بتاعتنا على الإنستجرام احنا بنحاول ديماً نقرأ تعليقاتكم ونرد عليكو مباشرة مش لازم تبعتها في العلن ممكن تبعتها في رسالة مباشرة على الصفحة وشكراً جداً على وقتكم معانا النهاردة وأتمنى تكون حلقة مفيدة ومهمة لكل الناس لأن ده موضوع شخصياً بيهمني إن الناس اللي عندها ديون بفوايد عالية جداً ده من أكتر الحاجات اللي بتأثر عليه.. شكراً جداً
Translation of some words and terms:
Credit Cards بطاقة ائتمان
Targets أهداف
ATM ماكينة صرف آلي
Credit Line خط ائتمان
Bank Statements البيانات المصرفية
Products منتجات
System نظام
Credit Bureau المكتب الائتماني
Factors عوامل
Catchy جذب
American Bankers Association (ABA) جمعية المصرفيين الأمريكية
On Time الوقت المحدد
Transactor المتعامل هو المستهلك الذي يدفع رصيد بطاقته الائتمانية بالكامل وفي الوقت المحدد كل شهر
Cashless غير النقدية
Debit Cards (Bank Cards) هي بطاقة دفع تخصم الأموال مباشرة من حسابك الجاري عند استخدامها ويُطلق عليها ايضاً البطاقات المصرفية
Department store المتاجر الشاملة (محلات كبيرة)
Fast Food الوجبات السريعة
Streaming Services خدمات البث
Premium الممتازة
Store متجر
Categories التصنيفات
Short Term قصير الأجل
Impulsive spending الإنفاق المندفع
(POS) Point of Sale نقاط البيع
Credit Score مستوى الرصيد
Cash Back استرداد نقدي
Sale تخفيضات
Loans قروض
Debt دين
Bonus علاوة
Directly مباشرة
Publicly في العلن
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #كروت_الائتمان #إعادة