66. المجال المالي كوظيفه
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
لو أنت طالب في الجامعة أو خريج جديد أو بدأت تخطو خطوات في حياتك المهنية وعندك طموح تشتغل في المجال المالي .. إيه الحاجات اللي المفروض تعملها وتتعلمها وتركز عليها عشان تعرف إمكانياتك وتفهم نفسك ، وتكبر في المجال اللي أنت حابب تشتغل فيه
ضيفنا النهاردة هو وائل غنيم - مدير إدارة تداول المؤسسات في شركة ضمان للإستثمار بالإمارات - بيقدملنا شوية نصايح وكلام مهم من واقع خبرته ورحلته في المجال المالي
Wael Ghoneim @LinkedIn : تقدروا تتواصلوا مع وائل من هنا
01:58 لو حد عنده طموح يبدأ في المجال المالي تنصحه بإيه؟
05:56 إيه المصادر الآخرى الغير تقليدية اللي الناس ممكن تتعلم منها؟
07:16 إيه رأيك في اليوتيوب والبودكاست كمصادر للمعرفة؟
08:04 إيه رأيك في التجارب والخبرات.. يعني الخبرة مقابل المعرفة بتبص للموضوع ده ازاي؟
09:59 هل أنت مقتنع بقوة الفريق على المدى الطويل؟
10:50 مرحلة الإدارة الوسطى في الشركة بتشوفها ازي؟
12:03 إيه اللي بيميز المجال المالي عن غيره من المجالات؟
14:03 لو أنت مشتغتلش في المجال ده كنت هتشتغل في إيه؟
18:53 لو حد عايز يبدأ في المجال المالي يبدأ ولا يروح يدور على حاجه تانية؟
حلقة النهاردة فيها ملاحظات ونصايح مهمه ممكن تطبق في أي مجال حابب تشتغل فيه مش بس المجال المالي
حلقة النهاردة دردشة بسيطة لأي حد مهتم يشتغل في المجال المالي أو أي حد لسه بيحاول يكتشف نفسه والنصايح دي ممكن تطبق في أي مجال عموماً مش بس المجال المالي
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
اهلاً بيكوا في حلقة جديدة من بودكاست كلام ينور النهاردة ضيف حلقتنا الأستاذ وائل غنيم مدير إدارة تداول المؤسسات في شركة ضمان للإستثمار اللي موقعها في الإمارات وائل النهاردة هيكلمنا على ازاي لو أنت حابب تبتدي في المجال المالي ، لو المجال ده من طموحاتك إيه الحاجات اللي أنت ممكن تركز عليها إيه الحاجات اللي المفروض تعملها ورحلته في المجال ومن خبرته كمان هو شاف إيه ينصح الناس تعمل إيه
01:17
عمر: في الأول يا وائل عايز أرحب بيك
وائل: ازيك يا عمر ، عامل إيه؟
عمر: إيه الأخبار عامل إيه؟ مبسوط جداً إنك معايا النهاردة ، وائل العلاقة ما بينا ترجع لسنين طويله جداً يعني وائل من الناس اللي عرفتهم في أول حياتي واثر فيا جداً وأنا سعيد جداً جداً إنك معايا النهاردة
وائل: أنا كمان مبسوط إني معاك النهاردة ونحاول نقدم حاجه للناس يستفيدوا منها وطبعاً احنا علاقتنا ترجع يمكن فوق الـ 10 أو 15 سنة ، أنا أتعلمت منك حاجات وأنت أتعلمت مني حاجات واتعلمنا حاجات سوا مع بعض ياريت نقدر نفيد الناس بجزء من اللي احنا أتعلمناه د خلال حياتنا المهنية يعني
01:58
عمر: أنا عايز أبتدي معاك كده لو رجعت تاني لوقت ما أتقابلنا وأنا كنت لسه بتبتدي حياتي المهنية ، بعد بقى سنين الخبرة اللي أنت شوفتها وبعد ما أشتغلت في كذا حته وفي كذا دولة.. لو رجعت تكلمني تاني وقت ما أتقابلنا أكني لسه ببتدي حياتي النهاردة ، والناس اللي بيسمعونا لسه بيبتدوا حياتهم حتى لو بيبتدوا في مجال السمسرة أو إدارة الأصول أو البنوك بشكل عام المجال المالي.. تنصحهم بإيه؟
وائل: إن الواحد يشتغل على نفسه دي أول حاجه الواحد المفروض يركز فيها بعد ما يتخرج من الجامعة على طول لأن وانت بتتخرج أو جوه السنين الدراسية بتاعتك الجامعة أنت بتبقى عينك على أنت عايز تروح في أنهي إتجاه ، فأحنا هنقول مثلاً إنك عايز تشتغل في مجال الحياة المالية سواء كان على مستوى شركات الوساطة ، سواء كان على مستوى شركات الأصول ، سواء على مستوى صناديق الإستثمار أنت في حته معينة كده أنت شايف نفسك هناك فـ على اساسه أنت بتقدر تاخد فترة تدريبية في الصيف في فترة الأجازة بتاعتك تاخد إسبوعين تلاتة شهر في مكان كويس تقدر تستفيد منه
في معظم الأحيان الناس مش بتدي أهمية أوي للحتة دي ولكنها مهمه جداً جداً لأنها بتقدر تديلك صورة حقيقية عن طبيعة العمل في المكان ده وإيه الحتت اللي هو هتبتدي بقى تحط عينك على الحته دي أنا شايف نفسي هنا بس مش هنا أنا أقدر أعمل دي أحسن من دي ، أنا أقدر أغطي الأسواق دي أكتر من الأسواق دي ، انا بحب مثلاً الحاجات الإدارية أكتر من الحاجات العملية في ناس تحب الحاجات العملية أكتر زي السماسرة ليهم دور معين اللي هما منفذي العمليات وفي مديرين الحسابات وفي الناس اللي بتشتغل في إدارة العمليات ، وفي الناس اللي بتشتغل في الإمتثال اللي هما المراقبين أو المراجعين الداخليين كل دي إدارات جوة الشركة انت في فترات التدريبة بتاعتك خلال الصيف وأنت في الجامعة بتخليك تقدر تشوف نفسك في أنهي حته أحسن
وعليه أول ما بتخلص اعتقد يعني ودي من النصايح اللي نصحتها لأخويا وهو بيبتدي حياته المهنية قولتله عندنا في مصر مثلاً بعد ما الناس تخلص دراسة في ناس بتروح التجنيد وناس لا وعليه بتخلص ده وبعدين تبتدي تعمل دراسات عليا اياً كان في الإتجاه ده اللي هو يفيدك في الحتة اللي أنت عايز تكبر فيها وده لا ينتهي يعني لو عملنا دراسات عليا لمدة سنة سنتين ، أخدت شهادة ماجستير فده على مستوى إنك بتاخد شهادة هي مبتقفش هنا برده لأن العلم مبيخلصش وكل شوية الديناميكية بتاعة الصناعة نفسها بتتغير والمعطيات بتتغير وكل حاجه بتتغير فلازم يبقى بإستمرار فيه ما يسمى بالتنمية البشرية إنك بتشتغل على نفسك وتقعد تنمي نفسك تشوف كورسات ، شهادات ومش شرط انها تبقى الحاجات اللي هي على درجة علمية يعني المهم بس إنك تبقى ملم ومواكب وديماً تطور من نفسك ومتحددش نفسك في حته واحده بس لازم تقعد تكبر الأفق بتاعك ومداركك وازاي تقدر تكبر في الشغلانة
عمر: احنا برده بنشوف مؤخراً في إقبال على شهادات زي محلل مالي معتمد CFA
حاجات معينة كده اللي انت تقدر تذاكرها لوحدك في البيت يعني مبقاش الموضوع لازم تروح جامعة أو حته معينة ، بقى في شهادات معتمدة دولياً ، وبرده أعتقد الجامعات مع كوفيد واللي حصل وقت الكورونا الجامعات ابتدت تبقى أكتر أونلاين كمان أعتقد ده شجع ناس
05:56
عمر: إيه تاني يعني هل تفتكر إيه المصادر الآخرى الناس ممكن تتعلم منها ، مصادر غير تقليدية؟
وائل: المصادر كانت زمان إنك بتروح تسجل في كورس أو جمعية وتروح تحضر حاجات بمواعيد بعد الشغل أو وسط النهار أو بليل ، الدنيا أتطورت شوية طبعاً احنا بنحصل التطور اللي الغرب سابقنا فيه من سنين طويلة موضوع التعليم الذاتي اللي هو الأونلاين إنك تقدر تخش تسجل على موقع وتدفع الفلوس ويبعتولك المواد بتاعتك تذاكرها حتى بيبقى في حاجات بتبقى عند الطلب اللي هو بتروح تفتح الحصة الدراسية مدته مثلاً 20 دقيقة بتشغله وترجعه وتسمعه مرة وأتنين وتلاتة فده كويس جداً بالعكس ده أفيد وبيوفر عليك الوقت انك تنزل تركب عربية تركب مواصلات تروح من مكان لمكان في الزحمة وترجع تعبان لأ طبعاً ده سهل على الناس كتير اوي فاليومين دول أعتقد إن فرص الناس أو القنوات المتاحة للناس بتسهل حاجات كتيرة أوي فمبقاش حد عنده عذر أنه معندهوش وقت لأنه الوقت موجود في مكانك
07:16
عمر: طيب رأيك إيه في الحاجات اللي زي اليوتيوب أو البودكاست كمصادر للمعرفة؟
وائل: هايل.. اليوتيوب حاجه مرئية ففي ناس بترتاح كده أكتر انه لازم يقعد يشوف المدرب أو المحاضر بيكلمه بيشوف عينه وبيشوف ريأكشن وشه وطريقته في الكلام ، الإلقاء شكلة يريحه فدي ناس بترتاح كده إنه لازم يشوف ، في ناس بترتاح أكتر على السمع ، في ناس طبيعة عملها مش بتتيح له إنه يتفرج كتير فيسمع فكل واحد بقى بينقي ودي متعة الحاجات المتاحة إن بقى في لكل اللي عايز حاجه يلاقيها ويقدر يستهلكها بالشكل اللي هو عاوزة
08:04
عمر: دي ناس ابتدت شغلها والناس ديماً بتتطور في الناحية التعليمية ، من ناحية الخبرة أو التجارب.. إيه رأيك في الخبرة يعني الخبرة تمثل قد إيه من قوتك النهاردة بعد 10/20/30 سنة في الشغل .. الخبرة VS المعرفة بتبص للموضوع ده ازاي؟
وائل: الخبرة مهمه جداً ودي هتكتسبها مع الوقت ، وهتكتسبها أكتر وهيبقى ليها ثقل لأن ممكن يبقى في خبرات مع الأسف مش مهمه أوي لأن أنت محطتش الوقت الصح في المكان الصح عشان تخدم نفسك وتزود خبراتك ، برده الوقت الصح والمكان الصح والناس الصح زمايلك في العمل في منهم اللي هيفيدك وفي منهم اللي مش هيفيدك في منهم اللي هتقدر تستفيد منه بشكل يومي وفي منهم اللي المجال العمل مش هيتيح لك تحتك بكل الناس كل يوم لكن أنت هتنقي كده مين يقدر يثقلك الخبرات بتاعتك دي وتحاول تقرب منه ودي حاجه كويسة مش حاجه وحشه
عمر: يعني أنت مقتنع إن الفريق اللي أنت بتشتغل فيه هو جزء كبير جداً من تكوين الخبرات؟
وائل: مليون في المية ، الوقت اللي احنا ابتدينا فيه مع بعض ، قعدنا 5 أو 6 سنين كده ده كان أقوى فريق بيشتغل الشغلانة دي في السمسرة في الأوراق المالية يعني في مصر يمكن كنا بنافس مركز أول وتاني في شركات الوساطة بس الفريق اللي احنا كنا شغالين معاه عشان كده كل الناس على اختلاف كانوا بيعملوا إيه وقتها النهاردة كلهم في حتت كبيرة في شركاتهم وناس ليها اسم ووزن في الشغلانة
09:59
عمر: يعني النهاردة أنت بتقولي لو أنا قدامي كذا شغلانة بفكر فيها وفي مثلاً واحدة بتدفع فلوس أكتر ولكن التانية الفريق بتاعها أقوى على المدار الطويل أنت مقتنع بقوة الفريق أكتر صح؟
وائل: أنا أختار مديري قبل ما أختار الشركة ، مديري أهم من الشركة لأن ده اللي هتعلم منه المفروض يعني مديرك أو الفريق اللي أنت شغال فيه ده أهم من هتاخد كام في المراحل الأولية طبعاً وهتشتغل في شركة كبيرة ولا لأ ، لكن الفريق والتناغم ما بين الناس وبعضها ومدير الفريق ده بيساعدهم ازاي وبيفيدهم ازاي ومدير الفريق مش شرط يكون فنياً جامد اوي بس المهم يبقى عنده إدارة الأفراد كويسة لأنها مش سهلة
عمر: مظبوط طبعاً يعني إدارة الناس إنك تعرف توظف وتطلع من كل واحد القوة بتاعته اللي في شخصيته دي حاجه طبعاً مش سهله خالص
10:50
عمر: يعني نقدر نقول اننا أول 10 سنين أنت بتتعلم وبتنموا كفرد وبعدين بتبتدي تخش في مرحلة تانية اللي هي مرحلة الإدارة الوسطى اللي هو أنت مش صاحب الشركة ومش متخذ القرار وبرده مش أصغر واحد في الشركة ، المرحلة دي بتشوفها ازي؟
وائل: المرحلة دي مهمه جداً إنك بتبتدي تطور من نفسك من إن انت موظف جديد لسه بادئ الشغلانة لإن انت بقيت الموظف القديم اللي في ناس جديدة جايه محتاجه تتعلم منك مش شرط إنك تبقى المدير عليهم بس هما بيبصولك إن أنت قديم هنا فعايزين يتعلموا منك حاجه فإن انت تساعد الناس الجديدة دي حاجه كويسة جداً ليهم وليك في نفس الوقت دي طبعاً لو في إدارة واعية ومركزة وشايفين الناس بتعمل إيه يبتدوا هما ينقوا الكوادر اللي هيقدروا يستعملوهم في المستقبل إنهم يبقوا مديرين أكبر في حيثيات أكبر أو في مراكز أكبر في الشركة عشان هما دول اللي بيساعدوا الناس وبيطوروهم وهو ده عصب أي شركة ناجحة
12:03
عمر: طيب أنت بتشوف المجال المالي بيختلف عن المجالات الأخرى يعني كإدارة كفكر كضغط يعني إيه اللي بيميز المجال المالي عن غيره؟
وائل: خلينا نقول إنها مش مسألة بيميز أو لأ كل شغلانة ليها ضغوطاتها ، ولكن الفكرة في المجال المالي أو بالذات في المجال الأوراق المالية إن انت بتتعامل مع حاجه سريعة جداً بتتحرك كل يوم ، كل يوم في أفكار مختلفة ، بتتحط تحت ضغوطات مش سهله لأن برده أن مطالب تبقى دقيق جداً في الكلام اللي بتقوله ، سريع جداً في التعامل مع الموقف لأنك في الاخر برده بتتعامل في فلوس ناس فدي مسؤولية كبيرة مش قليلة فالنصيحة لازم تبقى مش متأثره بأي حاجه تانية
عشان كده من أهم النصايح اللي بنقولها للناس اللي بتشتغل في الشغلانة دي إنهم ميبقوش عندهم إنتمائات أو ميبقاش عندك تركيز ديماً في محفظتك الشخصية لأن ده هيأثر على قراراتك مع العملاء بتوعك الناس اللي بتشتغل على مستوى محافظ الأفراد أو مدير الحساب بيبقى معاه 10 أو 15 عميل طبعاً هو لازم يبقى عنده فكرة والفكرة دي هو بيتبناها وبيدرسها وبيحاول يبيعها للناس بتوعه طبعاً بدعم من إدارة البحوث في الشركة ، بدعم من الإدارة الفنية ، بدعم من التيم اللي معاه بيتكلموا مع بعض كل يوم فأنت بتقعد تجمع الحاجات دي كلها وبعدين تكون أنت وجهة نظرك بس لازم تبقى بتتكلم لغة واحدة زي بقية التيم بتاعك لأن مينفعش تبقى أنت بتقول حاجه وزميل بيقول حاجه تانية فكده مفيش مصداقية لأن في الاخر دي هتوصل ودي هتوصل فكده الشركة هتفقد مصداقيتها لأن في اتنين جوه بيقولوا حاجتين عكس بعض
فده مهم جداً للشركات ومهم جداً ليك أنت على المستوى الشخصي فدي من الحاجات اللي أنا بشوفها ضغط مش سهل إن الواحد يتعامل معاه ولكن أول ما تعرف ازاي تفصل حياتك الشخصية ومشاكلك كلنا بنروح الشغل الصبح وعندنا ضغوطاتنا في الحياة بره الشغل ، جوه الشغل أنت محتاج تفصل كويس أوي
عمر: العاطفة.. يبقى عندك ثبات إنفعالي
وائل: مفيش عاطفة خالص.. في شغلنا مفيش عاطفة ، محتاج تتعامل مع المكاسب بمنتهى الحزم يعني لازم تكون واخد قراراتك وعامل سيناريوهاتك لو شاري حاجه والحاجه دي سعرها أرتفع لازم تبقى حاطت سيناريوهات مينفعش كله يبقى وليد اللحظة لأن أولاً السوق مش هيسمحلك تاخد قرارات لحظية لازم تبقى باني قراراتك وباني سيناريوهات في الإتجاهين لو أشتريت حاجه ومشيت صح ولو أشتريت حاجه ومشيت غلط ونفس الكلام لو بعتها.. لو بعتها والسعر أتحرك عليك والسعر أتحرك عليك لفوق أو لو بعتها والسعرأتحرك عليك لتحت في سيناريوهات لو أنت مش جاهز والكلام ده مترتب وأنت مأهل العملاء بتوعك نفسياً ومجهزهم إن لما يحصل كده هنعمل كده أعتقد في امور كتير هتكون هربانة منك وأنت مش مسيطر على أفكارك أنت وطريقة تعاملك مع العملاء عاملة ازاي
14:03
عمر: طيب لو أنت مشتغتلش في المجال ده كنت هتشتغل في إيه؟ سؤال مفاجئ
وائل: قريت مرة بحث كده عن المتداولين لو مكانوش أشتغلوا الشغلانة دي كانوا أشتغلوا إيه فلقوا إن أقرب شغلانة يشتغلها التاجر هي الناس اللي بيتشغلوا في برج التحكم في المطار لانها فيها بيانات كتير وحاجات بتنور وحاجات بتطفي وأرقام بتتغير فهو مستوى التركيز ينفعوا يشتغلوا الشغلانة دي
بس أنا وائل ممكن أكون ينفع اشتغل إيه أعتقد إني ممكن أشتغل في حاجه ليها علاقة بالتحريات في السلك القضائي أكتر يعني
عمر: بتحب اللي هو تقصي الحقائق وتدور على حاجه معينة ، معلومة تعمل أبحاث الكلام ده كله
وائل: لأ مش أبحاث أعتقد في المباحث أكتر من ابحاث ، مش على مستوى الشرطة بس على مستوى القضائي أعتقد يعني لأن أنا بهتم بالتفاصيل وبحب أقعد ألف في أحتمالات كتير وأفكر وأبعد
16:16
عمر: عارف أنا في حاجه برده أتعلمتها مع الوقت خاصة في الشغل كل ما بتكبر وبيبقى عندك خبرة أنت بتفهم نفسك أكتر وبتبقى فاكر وانت صغير إنك ينفع تشتغل شغلانة شغلانات معينة ومع الوقت والخبرة لما بتكبر بتعدي بتجارب معينة بتشوف إن رأيك القديم ده مكنش له أي معنى
وائل: أنا طول عمري بفكر فيها وبحبها ولحد النهاردة كان نفسي أعملها بس هي حاجه مرهقة جداً بعد ما كبرت وفهمت الدنيا صح الطيران المدني بس هي شغلانة مش سهلة بالمره هي مش فسحة ومش هيه هنركب طيارة وكده لأ الموضوع صعب الموضوع محتاج دراسة مستمرة لأن الطرازات بتتغير والطيرات بتكبر ودي مسؤولية كبيرة أوي لانك معاك ارواح ناس ومواعيد وألتزام ووزن وهي قاسية جداً لأنها بتاخدك من حياتك انت تقريباً عدد الأيام اللي أنت بتشتغلها وعدد الايام اللي انت بتبقى فيها مستعد على حسب بيبقى في جداول في الصناعة دي فهي حياة قاسية جداً ، هي بتبقى مجرد فكرة حلوة في دماغك أنت الله أنا عايز أشتغل كده
عمر: واحنا صغيرين كان كل الناس عايزة تشتغل طياريين
وائل: بس هل أنت بقى في التفاصيل اللي جوه الموضوع تقدر تعمل كده ولا لأ وهي تقدر على الحياة القاسية دي لو أنت مكتشفتش الحاجه دي في شخصيتك بدري وعرفت تقدر تعمل إيه أحسن من إيه وإيه الأفيد لك والأنسب لك اللي تقدر تفيد بيه نفسك وتفيد بيه الناس اللي حواليك لأن هي مش كل حاجه أنك رايح الشغل وجاي من الشغل وأنت كده مبسوط لأ في جوانب كتير في الحياة لازم تبقى واخد بالك وانت بتاخد قرار زي ده
عمر: أنا برده مش عايز واحد عنده 21 سنة يبقى عارف هو هيعمل إيه بس اللي بنحاول نقوله النهاردة إن الخطوط العريضة اللي في شخصيتك واضحة ، الخطوط اللي هي الثبات الإنفعالي ، التوافق في حاجات كده بتبقى واضحة في شخصيتك زي ما أنت بتقول واحد مثلاً هيفضل الحياة العملية أو حياة مش عملية ، واحد عايز يبقى في الشارع على طول هو ده اللي أنت المفروض تبقى على الأقل عارفه في أول حياتك يعني
وائل: الإجابة على كل الاسئلة دي تطوير الذات ، كل ما أتعلمت أكتر كل ما مداركك أتوسعت أكتر كل ما قدرت تاخد قرارات أحسن لأن أنت عن علم مش عن مجرد هواء ، العلم والمعرفة هي اللي بتخليك تفهم كل حاجه احسن وتشوفها بصورة أفضل وساعتها قرارك هيبقى مبني على أسس وأقرب إنه ينجح
18:53
عمر: ختاماً كده لو حد عايز يبدأ في المجال المالي يبتدي في المجال المالي ولا يروح يدور على حاجه تانية يعملها
وائل: لو حد عايز يبتدي في المجال المالي نفهم من كده إنه عمل الحاجات اللي قولنا عليها دي درس كويس ، أخد فرصة التدريبة في شركات فشاف محدش حكاله
عمر: ومتفرجش على أفلام
وائل: الأفلام دي معالجة درامية بتزود وبتنقص عشان الناس تنبسط يعني لكن الحياة العملية مش أفلام ، الأفلام دي أتفرج عليها مع الكلام ده عشان تقدر تربط هو ده حقيقة ولا مش حقيقة لكن لو حد وصل لقناعة إنه يشتغل في المجال المالي طبعاً أشجعه جداً لأنه مجال متغير مش ملل كل يوم في جديد
يبتدي ازاي؟ ميبتديش من الأول ، يبتدي من الآخر ليه؟ لأن من أهم الحاجات اللي بتخليك ليك وزن في الشغلانة إنك تبقى فاهم الدورة العملية من أول الناس اللي في مواجهة العملاء للناس اللي بتقفل الشغل في الخطوط الخلفية
عمر: آه تبقى عارف الخط الإنتاج كله
وائل: كل حاجه تبقى عارف كل حاجه ، سهل أوي أكلم عميل أقوله اشتري دي أو بيع دي بس بعد ما يشتري دي ويبيع دي بيحصل وراها إيه من فواتير لتسويات لعمولات للو حصل خطأ في التنفيذ بنحله ازاي ، تحويل الفلوس المصري ولا الدولار يعني كل حاجه لازم تبقى فاهم كويس أوي الدوره المستندية والعملية من ساعة ما العملية تحصل وتتنفذ لحد ما العميل يستلم فاتورته
20:30
عمر: مش عارف أشكرك قد إيه يا وائل النهاردة أنا بس كده في دردشة بسيطة للناس المهتمه تشتغل في المجال ده أو حد لسه بيحاول يكتشف نفسه أو ممكن ياخد الكلام ده وهو بيشتغل في مجال تاني خالص بيسمعنا وهو بيبتدي في مجال تاني خالص برده أعتقد إنك أدتنا النهاردة شوية ملاحظات ممكن أي حد يطبقها في أي مجال مش المجال المالي بس يعني هي دي طريقة في التفكير أكتر ما هي ليها علاقة بالمجال المالي أعتقد.. لو في حاجه عايز تختم بيها
وائل: من ضمن الحاجات المهمه جداً إن من القرارات المهمه جداً إستثمارياً يعني أي حد عايز يستثمر يعني إن الفلوس دي تبقى حره ميبقاش عليها ضغوط وكنا شوفنا الحاجات دي زمان اللي هو واحدة ست كان عندها مقتنيات دهب فدول عايزة تجهز بيهم بنتها فبعتهم وقالت فرصة أكبر المبلغ ده شوية في ظروف مش ملائمة فخسرتهم ففاهم قصدي ديماً الناس لازم الفلوس معلهاش ضغوط
الاستثمار رفاهية فلازم تبقى فلوس على جانب لا سلفنها ولا بتاعة حد ولا لميين فلوس من ناس ولا اي حاجه من الحاجات دي لأن ده بيحط عليك ضغوط في قراراتك الاستثمارية لأنك بتبقى عايز تعمل مكاسب سريعة وهي مش كده ابدأ
عمر: احنا ديماً بنقول في كل الحلقات بتاعتنا لازم تبقى محقق النسب الأعلى من التحويش الأول اللي هي مدخرات خارجه من فلوسك عشان تبتدي تستثمرها مش مع إن الناس زي ما أنت بتقول بالظبط ميبقاش عندها العلم أو الدراية أو القدرة حتى على الخسارة في الفلوس دي انها تبتدي تستثمر اصلاً
وائل: وأن أنت هتقدر تستحمل الخسارة دي لحد فين ، لما دي تبقى فلوسك ومحوشها يعني هي في مقولة كده بتقول إن الثروة هي المدخرات فأنت لازم الأول تقتص جزء من دخلك اياً كان إيه هو واحنا سمعنا الكلام ده في الحلقات قبل كده بس مهم جداً إنك تقدر تحوش جزء من دخلك وبعدين تقدر تقف عليه وساعتها أنت هتبقى حر تاخد فيه قرارك وتاخد فيه نسب المخاطرة اللي أنت تقدر تستحملها وبرده على ناحية المكاسب برده في ناس بتقدر تتعامل مع المكاسب الكبيرة السريعة وفي ناس مبتقدرش تستحمل ومبتصدقش فبتاخد مخاطرات أعلى فيخسر ده وده فلازم الناس تبقى ملتزمة جداً نفسياً مع نفسها والموضوع كله جواك
عمر: ميرسي جداً يا وائل على وقتك معانا النهاردة
وائل: شكراً يا عمر إنك أتحتلي الفرصة النهاردة إني أتكلم معاك في امحيط ده شرف ليا طبعاً ابقى معاك ومع الناس اللي بتسمعنا واشكرك جداً على الوقت .. شكراً
عمر: ميرسي جداً يا وائل.. شكراً
Translation of some words and terms:
Throughout our careers طوال حياتنا المهنية
Personal Development تطوير الذات
Internships فترة تدريب
Identify التعرف
Compliance امتثال
Direction إتجاه
Degree شهادة / الدرجة العلمية
(CFA) Chartered Financial Analyst محلل مالي معتمد
Self-learning التعلم الذاتي
on Demand على الطلب
Developed بتتطور
Experiences التجارب
Fast Forward بسرعة إلى الأمام
Team فريق
Technically فنيا
Middle Management الإدارة الوسطى
Team Leader قائد فريق
Traders المتداولين / التجار
Control Tower برج التحكم
Data بيانات
Attention الانتباه
Stand by مستعد
Consistency التوافق
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #المجال_المالي #وظيفه