67. الفرق بين الموظف ومؤسس الشركة - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة مع أمين الخولي ضيفنا اللي مشرفنا لتاني مرة في كلام ينور بنتكلم عن الشركات الناشئة والأفكار الجديدة ، واللي بيحصل من تطورات في المجال الشركات الناشئة
Modus Capital أمين هو الرئيس التنفيذي للعمليات بشركة
شركة بتهتم بالشركات الناشئة ، وعندهم برامج دعم الشركات الناشئة والاستثمار في الشركات الناشئة
Elkholy @LinkedIn : تقدروا تتواصلوا مع أمين من خلال الرابط
هل في قاسم مشترك بين الناس اللي بتشتغل وظيفة ثابتة واللي بيشتغل في شركة ناشئة أو بيبدأ شركة ناشئة؟ -
السؤال اللي الناس كلها بتسأله ازاي أزود دخلي؟ -
لو واحد عنده موهبه معينه ممكن تتباع في كذا قطاع هل تنصحه يوظف موهبته دي في قطاع معين؟ -
إيه الفرق بين انك تبقى موظف أو رائد أعمال؟ -
في نموذجين من الناس يا إما فاتح شركته وعايز يرجع موظف أو الموظف اللي عايز يفتح شركته -
المغامر ممكن يكسر خط معين أو يعدي حاجز نفسي معين ولكن مش معناه إنه بيعمل حاجه مجنونه صح؟ -
هل الشخص المغامر أو رائد الأعمال ده بيتولد كده ولا في طباع في شخصيته ولا ممكن يتعلم مهارات معينة -
هل أنت شايف أن في تطور موجود فعلاً في المجال ده بين الأجيال الجديدة والقديمة؟ -
الناس مبقتش بتخاف تسيب شركات كبيرة بقالها سنين طويلة وتروح تجرب فكرة أصغر أو فريق هو مقتنع بيه او مصدق فيه -
الشركة بتستغل حب الراجل أو الست اللي بيشتغل في الشركة بقاله 15 سنة في الثبات بتاع الوظيفة والولاء للشركة -
ديماً بنصح الناس اللي بتخاف تغير شغلها الناس ممكن يكون الاستثمار السلبي هو الحل -
ده الجزء الأول من لقائنا مع أمين استنونا الأسبوع الجاي في الجزء التاني وإن شاء الله الحلقة دي تقدر تساعد أي حد عنده فكرة جديدة حابب يبدأها
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
عمر: اهلاً بيكوا في حلقة جديدة من بودكاست كلام ينور
Modus Capital النهاردة أنا معايا أمين الخولي ، أمين هو الرئيس التنفيذي للعمليات لـ
دي تاني مرة أمين يشرفنا في البوكاست وأنا سعيد جداً وإن شاء الله دي تكون حلقة من سلسلة حلقات مع أمين بنتكلم فيها عن الشركات الناشئة ، الأفكار ، اللي بيحصل ، المجال ده إيه التطور بتاعه لو عندك فكرة عايز تبتديها ازاي ممكن تبتدي الحلقة دي إن شاء الله تقدر تساعدكوا فعايز أرحب بأمين .. أزيك يا أمين
أمين: اهلاً بيك يا عمر وأنا سعيد إني معاك مره تانية
عمر: أنا أسعد والله ، مش بقولك كده بس عشان أنت معايا النهاردة بس حلقتك من الحلقات اللي أتسمعت كتير جداً وجالي عليها ردود أفعال كويس جداً جداً فأنا سعيد أنت مشرفني النهاردة بجد والله
أمين: الله يخليك
عمر: طيب تحب بقى نبتدي ازاي النهاردة من أخر مره احنا اتكلمنا ممكن نبتدي بحاجه بسيطة كده وهو أنت النهاردة لما بتبتدي شركة ناشئة أو واحد بيشتغل في مجال معين إيه الفروقات الأولانية اللي بتشوفهم بين النموذجين دول لأن ديماً الناس اللي بتكلمنا يا إما هو في وظيفة ثابتة يا إما هو في شركة ناشئة أو بيبتدي شركة ناشئة فهل في قاسم مشترك ما بينهم أو حاجه تقدر تكلمنا عليها النهاردة؟
أمين: بص خلينا نبتدي بحاجه من اللي قولناها المره اللي فاتت احنا شبهنا في أوجه معينة إن الشركات فيها أوجه تشابه بينها وبين البشر إنها بتتخلق في وقت ما بعضها بعد عمر معين بينتهي وبيقفل وبتعدي بمراحل تطور وبتكبر فده أحد الأوجه اللي ممكن تقول إن الشركات فيها نوع من التشابه بينها وبين البشر
طيب خلينا أقولك إن في أوجه تشابه تانية يعني مثلاً أنا في رأيي إن كل الناس اللي بتسمعنا يعتبروا مستثمرين حتى اللي مش بيستثمر استثمار مالي وهقولك ازاي وكل الناس اللي بتسمعنا أو معظمها يقدروا يعتبروا نفسهم بيزنس حتى لو هما مش شركة ففي وجه تشابه من الناحية دي
خلينا ناخد فكرة الاستثمار أولاً عشان ده برده احنا بنتكلم فيه من ناحية الشركات والاستثمار في شركات ، أي حد بيعمل مجهود أو بيستغل حاجه من القدرات اللي عنده سواء حاجه مالية أو وقته أو مواهبه في حاجه معينه يعتبر بستثمر أنت لو بتدرس حتى لو طالب مدرسة انت بتستثمر وقتك ، او طالب جامعة أو حتى بعد كده ساعات ناس بتروح تدرس بتعمل ماجيستير أو كورس ده نوع من الاستثمار أنت بتقدم حاجه الأول مش بس مادياً ، بتقدم وقتك في سبيل إن هيرجع لك عائد عليها العائد ده ممكن يكون مادي او ممكن يكون إنك هتستمع بس في عندك عائد مادي أنت لو بتشتغل موظف وبعدين أخدت شهادة أو كورس أداك قدرات أو مهارات تانية ممكن هتاخد فلوس أكتر على شغلك اللي بتقدمه فده نوع من الاستثمار بس مش ديماً مالي بس برده كلنا ممكن نفهم إننا مش بس بنستثمر أموالنا بنستثمر وقتنا فلما تيجي تفكر زي ما أنت بتتكلم في البودكاست عن الصحة المالية أنا لما بستثمر وقتي بستثمره في إيه ، ولما حتى بشتري حاجه مانا بقدم فلوس ففيها نوع من الاستثمار هيرجعلي فايدة منها فده تشابه مهم اننا نتكلم
طيب خلينا نبص على فكرة إن البني أدمين وأعتقد في الوقت والزمن اللي أحنا فيه ده مهم إننا نبص على نفسنا كـبيزنيس مش بقول شركة ، بيزنس بمعنى إن في تعاملات تجارية أو مالية ما بينا وبين ناس تانية فخلينا ناخد مثل ممكن شخص يوظف شخص محتاج حد يسوق بيه مثلاً ففي بني آدم مع بني آدم بينهم عقد ساعات شفوي وساعات مكتوب مقابل خدمات بتتقدم الشخص ده بياخد فلوس
الموظف ده عبارة عن بيزنس هو متعاقد مع شركة معينة بيجيله مهيه بيجيله حاجات غير مادية زي التأمين الصحي ، إقامات مثلاً دي تعتبر معاملة تجارية بس في الحالة دي العميل الوحيد اللي بيشتري وقته وقدراته في فترة زمنية محدده الشخص ده العميل الوحيد اللي عنده
عمر: فاهم يعني هو بيبيع المنتج بتاعه اللي هو وقته لعميل واحد اللي هو بيشتغل عنده كل يوم
أمين: بظبط ويقدر يستثمر في إنه يحسن نفسه كبيزنس بإن هو ياخد خبره وياخد شهادات مثلاً خلاص ده شق الاستثمار
في حاجه تانية ممكن تبص عليها من ناحية إنه ممكن مثلاً طبيب بيفتح عيادة العيادة دي تجارة حتى لو مش شركة ، عنده أكتر من عميل إنما هو برده بيستغل قدراته والدراسة اللي درسها في إنه بيقدم خدمه وعنده عملا وبيحللهم مشكلة معينة
طبعاً لما الواحد بيبقى موظف بيبقى مش مدرك حتة العميل دي ومش مركز إن هو عنده عميل واحد وإنه ممكن غير من عميل لعميل بس المفيد لينا كلنا اننا نفكر في الحكاية دي لما نبص على حياتنا بصفة عامة وفي النهاية زمان الواحد كان بيروح يشتغل في جهة حكومية أو شركة يشتغل فيها 40 سنة ويتقاعد فكان سهل إننا ننسى موضوع إنه الشخص لازم يفكر في نفسه كتجارة فدي أول حاجه مفيده أعتقد المستمعين ممكن يبصوا على حياتهم بالشكل ده
عمر: زاوية فعلاً مختلفة زي ما بتقول زمان مكانش فيه فرص إنك تغير شغلك بسهوله يعني مثلاً النهاردة الراجل المبرمج ده ممكن يشتغل في قطاعات مختلفة ، زمان بتتخرج من الجامعة بتشغل في الزراعة بتشتغل في الزراعة أو طبيب بتشتغل طبيب بس النهاردة سوق العمل بقى مفتوح جداً فمعنى كده إن أنت السلعة دي أنت وقتك ده سلعة انت بتبيعها وبتاجر فيها دي التجارة بتاعتك
أمين: وبتستثمر فيها خد بالك يعني أنت بتحسنها وهكذا مش بس انها اسمها وظيفة ودي حاجه بسيطة مش عايزين نطول فيها اوي بس بقربها للناس اللي بتفكر طيب أفتح شركة ولا لأ وهندخل جزء الاستثمار فيها برده
عمر: حلو يبقى أنا النهاردة عرفت سعري كموظف وعرفت ساعة العمل بتاعتي سعرها كام وبحاول أطورها لأن برده الناس كلها بتسأل ازاي أزود دخلي ، الدخل نفسه يعلى ازاي فالاستثمار في النفس ده جزء من الموضوع
أمين: وحته صغيرة نزودها في الأخر كده لما أنت كنت بتتكلم على إن اللي بيطلع دخل وبيحط مدخرات على جانب بيستثمرها بتعمله نوع من العائد مش مضطر يشتغل فيه مش مضطر يبيع وقته بحيث إنه يوصل لمرحلة ميبقاش بيشتغل أو بيعمل اللي هو عاوزه أو بيشتغل في وظيفة وعنده دخل من مصدر تاني مجرد كمستثمر فنفرق بقى ما بين اللي بيستثمر وقته وجهده وده محدود منقدرش نشتغل أكتر من 24 ساعة مثلاً وإن هو الأموال اللي بيطلعها أو الأصول أو الاستثمارات أياً كان يقدر يستغلها بطريقة تعمله عائد وتجبله دخل برده فده نوع آخر من الاستثمار وكله في حلقة واحده تقريباً
عمر: طيب هل أنا ممكن أختار قطاعات معينة ، يعني أنت تنصح الناس مثلاً واحد عنده موهبة معينة يحاول يوظف موهبته دي في قطاع معين يعني نفس الخدمة دي أو السلعة دي ممكن تتباع في كذا قطاع في قطاعات معينة مثلاً أنت بتفكر فيها
أمين: أول ما الواحد يبتدي يبص على جزئية من حياته كتجارة ممكن يبتدي يبص على الحاجات دي برده دي بتساعدك إنك تستعد إنك تفتح شركتك خلاص أنت بتحل مشاكل لمين ، تسوى إيه وسوق العمل المفتوح قدامك إيه إنما بالنسبة للقطاعات اللي أصل الناس على فكرة بتاخد القرارات دي أنت لو بتقرر هتدرس إيه في الجامعة وفي بالك هتشتغل في أنهي مجال بعدين فانت بتحسب الحسبه دي واللي بيحول المسار المهني بتاعه إنه مثلاً يعمل ماجستير إدارة الأعمال عشان يغير من إنه كان في الهندسة وعايز يشتغل في الإدارة أو في المجال المالي ده بيتخذ نفس القرار اللي انت بتتكلم عليه ده واللي مبيغيرش مجال عمله بيغير الشركة مثلاً من شركة محلية يعملها عالمية أو بالعكس فدي القرارات اللي الواحد ديماً بيفكر فيها
أنا بالنسبالي إني أنصح في مجالات معينة مش تخصصي أوي أقول إيه المجال الاصلح ولكن الفكرة المفيدة لكل الناس إنه يبص لنفسه كتجارة أنه بيستثمر وقته مش بس فلوسه عايز يجيب العائد عليها اللي هو يرجعله مردود مالي ومردود صحي ونفسي هل أنا هشتغل عدد ساعات أقل أو هشتغل في حاجه بحبها أو مع ناس أحسن دي كلها أعتبارات الواحد بيفكر فيها لما بيبص على نفسه كتجارة أنا أقدر أطور التجارة دي ازاي
عمر: طيب لو روحنا بقى للناحية التانية ناحية الشركات أنت بتقول أنت يا موظف يا عندك شركة أوعندك فكرة
أمين: الفرق بين انك تبقى موظف أن انت عندك عميل واحد بينك وبينه عقد فأول خطوة انك تبقى تجارة حتى لو مش شركة هنرجع للشركة في خلال لحظة لما تبتدي تبقى تجارة ممكن زي ما قولت انت تبقى مثلاً في تخصصات معينة الطب المحاماة بتفتح مكتبتك مش ضروري يكون شركة ممكن يكون بأسمك أنت بس وممكن تبقوا مجموعة منكوا فتبتدي انك دخلت في الامور المهمه بتاعة التجارة هتبقى عايز تعمل مكتب ، هتبقى عايز تمسك حسابات لو أنت في شركة بيجيلك المهية في أخر الشهر ، بيجيلك جوابات من شئون العاملين خلاص أنت مش شايل بنفسك بس الحاجات دي كلها موجودة في الشركة
الشركة بقى كتجارة كاملة متكاملة بتتعاقد مع ناس جوه تشتغل عنده بتتعاقد مع عملاء بره عنده بقى قسم تمويل ، قسم بتاع شئون مستخدمين والحاجات دي فيبقى أنت ابتديت دي نواة شركة أنت لازم تدور على عميل ولازم تشوف هتدفعهم كام ودي مش بالضرورة بتخش فيها لو أنت شغال في شركة غير لو أنت تخصص مبيعات أو تسعير لو تخصصك في الجزء الفني خلاص في حد بيقرر الحاجات دي فلما يبتدي تفتح ذهنك تتوسع شوية طيب انا مش عايز أبقى جزء صغير أنا عايز أتوسع عايز أفكر في نفسي كتجارة انت حتى كموظف أنت برده تجارة من ناحية إيه في مشكلة من ناحية الشركة في حاجه مطلوب انها تتعمل فهما بيجيبوا حد يعملها فأنت بتوفرلهم قيمة معينة مقابل العقد اللي بيجيلك فدي نفس الفكرة
فلو أنت بتتكلم على محاسبين أو محامين أو أطباء عادتاً المطلوب منهم محدد بيبقى معروف ، المحاسب عايزة يعمل حسابات الشركات بتاعتك ، لو روحت لطبيب له تخصص عايز تتعالج فيه ، روحت لمحامي بيتخصص قانون شركات أحوال شخصية يعني حاجه محدده التجارة مفتوحة عن كده شوية فناخد الخطوة اللي وراها
إفرض إن أنت تخصص مبيعات لو سألت حد عادي في الشارع لو شركة إستشارات مبيعات بيعملوا إيه ، لو سألت سألت مكتب محاماة بيعملوا ايه بيترافع في قضايا ، بيجهزلك مذكرات معروفه في مجالات تانية مش من السهل أو من الطبيعي والضروري أنها تبقى شركة مستقله فلنقل مثلاً أنت وأصدقائك في فريق المبيعات هايل جداً في شركة معينة وقررتوا إنكو تقدروا تستقلوا بنفسكوا وتعملوا مكتب استشارة وتروحوا لشركات كبيرة تقولهم أحنا هناخد منكوا جزء بتاع المبيعات مثلاً مش حاجه تقليديه أوي بس موجودة فساعتها اصبحت انت بتدور على العملا بتوعك بدور على انك تبعتلهم لما تقدملهم الخدمة مش هيدفعلك مهية فهتبتدي تخش في حاجات تانية بس الفكرة الأساسية المهمه بالنسبالنا أنت عندك قيمة ممكن تروح تكلم شركة أو جهة معينة يبقى العميل بتاعك ميبقاش هو اللي موظفك هو العميل بتاعك والعلاقة متقاربة بس الموظف عنده عميل واحد زي ما قولنا واللي عنده شركته عنده أكتر من عميل فلازم يفكر في مبيعات وتسويق ويفكر في حاجات زيادة شوية ودي موجودة عن المبرمجين أنت أتكلمت على إن في ناس كتير دلوقتي بتخش على مواقع معينه مطلوب جزء برمجه يتعمل فبيشتغلوا لاكتر من عميل وبيشتغلوا في الوقت اللي هما عايزينه وبيبقى أحسن بالنسباله من أنه شغال في شركة يروح يشتغل في الجونه مثلاً قاعد مروق الشخص ده اخد خطوة انه يبقى شغل مش موظف فدي خطوة
عمر: يبقى احنا كده لو قولنا النهاردة هرجع كده سريعاً انا كموظف أنا عارف أنا بعمل إيه عندي عميل واحد عندي حاجه في النص كده اللي هي أنا صاحب مهنه معينه او صنعه محدده زي دكتور أو المحامي سهل أشرحها مفهاش مشكلة أقدر اروح لوحدي هخدم كذا عميل مش زي المثال الأول أو عندي أخر حاجه إني عندي شركة كبيرة بتعمل نشاطات متوسعة أكتر هي دي الـ 3 حاجات اللي فهمتهم منك
النهاردة الناس وخاصة لما بنتكلم في موضوع الميزانيات وازاي تتوقع الدخل بتاعك ديماً بلاقي الناس أصحاب الأعمال معندوش رؤية على الدخل السنوي بتاعهم قد إيه أو مفيش رؤية عن السنة دي انا هبيع بكام أو الشهر ده أنا هبيع بكام ولكن بنلاقي الراجل الموظف عارف لأنه عارف الحدود بتاعة دخله حتى لو طلعت هتتطلع فين ولو نزلت هتنزل لفين وبيبقى الأختلافات بسيطة جداً على المبالغ الثابتة فأنت إيه رأيك في الموضوع ده وازاي تنصح الناس برده يعني أنا لو بستثمر في نفسي ازاي تنصح الـ 3 مين ممكن ياخد فيهم مخاطرة أكتر من وجهة نظرك يعني؟
أمين: أنت كده دخلت في نقطة في صلب الموضوع اللي هو بيبقى الشخص اللي بيفكر يعمل شركة ويجبلها مموليين ويكبرها ويبيعها دخلت في جزء مهم جداً وعنصر اساسي من اللي الناس بتبص عليه حتى كمستثمرين
عمر: آه لأن أنا متأكد أن حتى اللي بيسمعونا النهاردة في ناس عايزة تتحرك من دي لدي أو من دي لدي في اللي فاتح شركته وعايز يرجع موظف وفي الموظف اللي عايز يفتح شركته فالأتنين بيسمعونا النهاردة أعتقد يعني
أمين: فخلينا نتكلم عن بعض الناس عندها تجربه عملية انه حاول وأتعلم دورس معينة والتاني بيفكر وخايف من حاجات معينة أنت دخلت في صلب الموضوع من ناحية أول قرار ممكن حد ياخده بيفكر يفتح شركة ولا لأ كلمة رائد أعمال بمعنى إيه ده اللي بيفرق عن الموظف إن أنا عندي استعداد والقدرة في سبيل اني هاخد مميزات وعائدات مالية وغير مالية إن أنا اخد خطوة زيادة ميبقاش عندي دخل ثابت (مضمون) هو مضمون غير لو حصل مشكلة في الشركة نقصوا عدد العاملين زودوا بس في إحساس عندك إن في جرعة ثابتة من الدخل الشهري بيجيلك وبالنسبة لبعض الناس دي حاجه مريحة وسهله وهي فعلاً مريحة وسهله حسب الدخل اللي بيجيلك لأن في ثبات وبعدين لما نتكلم في الاستثمارات هنتكلم على العائد من الاستثمار هيبقى في زيادة او نقص ده نوع من المخاطر بس الثابت ديماً أقل مخاطرة وده بيدفعلك أقل الحاجه الثابتة طالما مضمونه الناس مستعده تاخد أقل شوية لأنها مضمونه والحاجه المتغيرة هيبقى عايز عائد اعلى لأنه مش ضامن فلازم قبل ما الواحد يفكر هيغير الدخل اللي بيجيله من وظيفة لدخل ممكن يكون أعلى بإنه يعمل شركته هل الفروقات من شهر لشهر ولا من سنة لسنة هتأثر عليه ولا لأ فلازم توقعاته انه يجيله عائد أعلى أو يكون عنده مميزات تانية مستعد إنه يبقى في نوع من المخاطرة أنه ممكن شهر ما يجيش معاه كويس أو شهرين ولكن هو مرتاح في الشغل ده فده يعوض ده دي أول حسبه
عمر: اللي هو أنا لو هتغير من الثابت للمتغير المفروض بديهي يبقى في زيادة في الدخل
أمين: أو زيادة في مميزات تانية بس لازم توزن الثبات اللي أنا هضيعه أو ممكن يضيع عليا
عمر: يبقى حاجه منهم الدخل المادي وحاجه تانية اللي أنت قولتها وهي طريقة الحياة نفسها ومميزات اخرى تانية يبقى أنا لو بنقل من الثابت للمتغير من غير الحاجات دي يبقى قرار غلط
أمين: آه زي ما انت بتتكلم انك لازم تدرس قراراتك عشان تبقى ماشية صح من غير منعقدها ببساطة كده توزن دي قصاد دي من غير ما نعقدها ونعملها معادلات الموضوع بسيط
عمر: ولازم أبقى فاهم إن الناحية التانية دي الموج فيها أعلى شوية ، الرؤية بتاعتي مش فاهمها أوي ومش عارف بخبط في الاول وهكذا فدي برده لازم يبقى عندي استعداد كواحد بياخد الخطوة دي
أمين: بالظبط في الاول يمكن الموج يكون عالي بعد ما تعدي الشط وتطلع بره تلاقي الماية أسهل شوية قبل ما تخش في الغويط يعني ولازم لما تخش جوه تبقى المركب كبرت شوية يعني هي مراحل
في حاجه مهمه أوي هنا بقى وهي في عليها نوع من الأختلاف شخصية الشخص اللي هو مستعد يفتح شركته أنت الشركات الناشئة الاستثمار فيها اسمه رأس المال المغامر ففي نوع من المغامرة شركة ناشئة مش عارفين هتكمل ولا لأ ففي جزء المخاطر اللي ديماً بيمشي مع الجزء بتاع العائد
عمر: والمغامر هنا مش معناه أنه مجنون أو مش عاقل صح؟
أمين: بالعكس
عمر: يعني المغامرة هنا تختلف عشان بيقولك ده مجنون ده ساب شغله وراح يفتح مش عارفه ايه هي ديماً مبتبقاش كده بس المغامر ممكن يكسر خط معين أو يعدي حد معين حاجز نفسي معين ولكن مش معناه إنه بيعمل حاجه مجنونه صح؟
أمين: بالظبط وناخد مثل بسيط أوي الناس اللي بتحب السباحة مبتحبش تبقى في الجزء اللي هو واقف فيه هو بيحب يخش في الغويط ويبقى مستمتع أكتر بس لازم يبقى عنده القدرات اللي يخليه يقدر يستمتع بحاجه زي كده ومش كل الناس عندها إستعداد ولا عايزة تعمل كده فدي حاجه شخصية
الحاجه اللي بقولك عليها فيها إختلاف هل الشخص اللي هو المغامر رائد الأعمال ده بيتولد كده ولا في طباع في شخصيته ولا ممكن يتعلم مهارات معينة ودي في عليها اختلاف
عمر: ده سؤال كنت لازم أنا اسئلة بس أنت سألته
أمين: ما ده سؤال طبيعي احنا بنتكلم على موضوع بيزنس ان احنا كلنا بيزنس بس مستوى المخاطر مختلف هل أنت في سبيل الدخل الثابت سايب حد تاني ياخد المخاطر أضمن وأنت مرتاح كده مفيش مشكلة بس في مخاطر واقعة عليه في شركتة برده لسه أنت متعرضلها يعني حتى اللي بيبقى موظف حكومة الحكومة قررت مش هنعين ناس جديدة مش هنعمل ترقيات ماهو في برده أمور مادية لها علاقة بالشغل والجو العام بتأثر علينا كلنا السؤال احنا متعرضين ليها ولا عايزين نبعد عنها ونسيب حد تاني يشيل المخاطر دي وفي سبيل إن صاحب الشركة اللي احنا بنشتغل فيها بيشيل عننا المخاطر دي فهي فيها عائد أعلى برده فهي فيها نوع من التوازن
فأول حاجه الواحد يفكر فيها هل أنا عندي روح المغامرة دي ومش لازم تبقى مغامرة مجنونة بالعكس ولذلك مهم ان اللي يفكر يعمل الشغل بتاعة يشوف هو إيه مميزات بتاعتة اللي هتمشي في المجال ده بالذات لما طبيب يفتح عيادة غير لما طبيب يفتح مثلاً رسام مثلاً ممكن يكون عنده الموهبه دي حاجه لكن مش مجاله فالمخاطرة في واحدة أقل من التانية بس محسوب
عمر: الأجيال الجديدة كمان الشباب الصغير اللي بيفتح شركات وعنده أفكار أنا ملاحظ إن الناس بتبقى عاملة الحسابات بتاعتها عاملة دراسات الجدوى أكتر بكتير من زمان أعتقد بقى في معلومات كتير أونلاين وبقى في مؤسسات بتساعد الناس انها تعمل أفكارها يعني زمان لما ابتديت اشتغل كان اللي بيعمل فكرة ممكن شوية فلوس ويجرب لكن أنت شايف أن التطور ده موجود فعلاً يعني أنت لامسه في المجال عندكو؟
أمين: هقولك على حاجه بمنتهى البساطة احنا كمودس بنحاول وفي محادثات مع جهات معينة هل نقدر نعمل حاجه تبقى مبسطة بما يكفي ولكن برده عمليه إننا نقدر نتكلم مع الأطفال في المدارس بعد سن معين ازاي نعلمه دي حاجه مبنتعلمهاش في مدارس خالص احنا بنتعلم علوم وحاجات كده ازاي ياخد فكرة عن ريادة الأعمال بنفكر نعمل كورسات عملية ودي محادثة ماشية معانا بنشوف نقدر احنا نساعد في مشروع زي ده ولا لأ فده تحول جزري في توجه فعلاً موجود
طبعاً زمان الكلام كان على اللي هو التعليم كله ميبقاش كله أكاديمي قالوا نعمل فني صنايع وبتاع هو مش الفكرة إنك هتشتغل صنعه بالعكس هو ممكن فعلاً يبقى عامل شركته لانه انك تعمل شركة دي لو الشركة في مجال انت مش متخصص فيه لكن فاهم بيزنس ده برده نوع من الحرفه بمعنى إن انت هتتخذ المسار ده كمهنه في كلام جدي غير إن بقى في شركات زي بتاعتنا احنا تخصصنا في الشركات الناشئة اللي لسه مبتديه ويمكن لسه موصلتش لمرحلة إن المستثمر المغامر العادي عادتاً بيستنى الشركة تكون أبتدت وجاب عملا واثبتت إنها ممكن تنمو وبعدين بيروحلها
احنا في مودس بنتكلم على شركات قبل المرحلة دي وبنساعدهم انهم يعملوا حاجات معينة ، بيجوا بخبراتهم وتخصصاتهم طبعاً بنعمل اختيار نشوف الفكرة كويسة ولا لأ إيه الجزء اللي هما جيبيه متخصصين في حاجات معينة عندهم فكرة كويسة طيب ناقصهم إيه مثلاً الجزء بتاع البرمجه الكمبيوتر عندنا فريق ممكن يعمل حاجه زي كده عايزين يتأكدوا السوق شغال ولا لأ كويس ولا لأ عندنا فريق بيعمل أختبار
هديك مثل من ضمن الحاجات اللي حد أقترحها على مؤسس الشركة بتاعتنا إنه كان عايز يعمل فكرة في نيويورك إن الناس تيجي تحلق في المكتب فالفكرة في ظاهرها كويسة وقتها هو عمل حاجه بسيطة جداً دفعوا كام ألف دولار عملوا موقع إلكتروني وجهزوا اتنين تلاتة حلاقين جاهزين يعملوا الحكاية دي وشافوا الاستجابة هتكون قد إيه نشروها طبعاً
المواقع اليومين دول مبتكلفش كتير انك تعمل تسويق أونلاين مبيكلفش كتير شافوا البيانات اللي جت جالهم أو ناس دخلت على الموقع كتير ولكن في النهاية اللي حجزوا 3 فراحوا للراجل بعد ما كانو صرفوا 2000 دولار قالوله بص الفكرة جربناها مختبر في واقع الحياة ومنفعتش فاحنا جزء من اللي احنا بنعمله إننا نجرب الأفكار دي قبل ما نروح نعمل الشركة ونصرف كتير ويطلع مفيش عملا لأ في أساليب وفي شركات بتساعدك تختبر الموضوع ده خصوصاً الموضوع مع الأونلاين وأنت عارف قد إيه موضوع البودكاست وتفاعل المستمعين ، البيانات اللي بتجيلك قد إيه بتساعدك تحسن المحتوى وتوصل للي أنت عايزة في فعلاً على أرض الواقع حتى عندنا في المنطقة دلوقتي حاجات كتير جداً بتشجع على الموضوع ده في توجه قوي مدعوم بمشاريع وبفلوس إنه تشجع الناس انها تسهل عليها الخطوة دي فده فعلاً أتغير في الكام سنة اللي فاتوا
عمر: أنا بحس حتى الناس مبقتش بتخاف أوي ان هي مثلاً تسيب شركة كبيرة بأسامي كبيرة بقالها سنين طويلة وتروح تجرب مع فكرة أصغر شوية أو فريق هو مقتنع بيه او مصدق فيه
أمين: مش بس إن بقى في دعم أكتر الناس بقت تحس أكتر جداً بالمخاطر الموجودة في الشركات العادية حتى في وظيفة لأن السوق نفسه بقى فيه متغيرات كتير زي ما أتكلمنا يمكن جيل أهالينا هو حتى جدودنا كانوا ممكن يخشوا يشتغل في شركة أو جهة حكومية يقعد فيها عمره كله دلوقتي نادر ما بيحصل فالمخاطر اللي بره أبتدت تنعكس وتوصل حتى للموظف أكتر من الأول فمن الناحية دي الناس شايفه مخاطر أكتر في الوظايف فمن ناحية تانية شايفين انه بقى اسهل هو ده الانتشار اللي ما بينهم يمكن نقص ولكن مازال طبعاً اللي هيروح ويبقى رائد أعمال أو مغامر ويفتح شركته المغامرة مش ديماً سيئة ولكن أنا مش عايز أستخدم كلمة مغامر دي عشان أخوف الناس بس هي فيها مخاطر أكتر لازم تتحسب دي الفكرة كلها
عمر: وفي نماذج برده يا أمين اللي هما مابيغيروش يعني مثلاً واحد قعد 15 سنة في شركة معينة أو 20 سنة في شركة معينة بتلاقي مرتباته مبتطلعش بسرعة مع مثلاً التضخم أو الشركة نفسها لو حبت تجيب حد جديد في نفس المركز بتاعة وراحة السوق هتعين حد أغلى منه يعني أنا بشوف نماذج وللأسف الشركات بتستغل الولاء بتاع الموظف ده
أمين: وسعر الثبات التمن اللي أنت بتدفعه للثبات بيزيد مع الوقت إلا لو حظك كويس ومفيش في التخصص بتاعك كتير بتيجي شركات تعرض عليك فيقولك لأ عايزين نحتفظ بيك بس بصفة عامة بيحصل اللي أنت بتقول عليه بالظبط
عمر: اللي هو مع الأسف الراجل اللي بيعين بيستغل الموقف ده بيستغل حب الراجل ده أو الست في الثبات بتاع الوظيفة
أمين: والراحة والأستقرار وبيدفعه تمنها مادياً
عمر: من ردود الأفعال اللي بشوفها ديماً أنا بقالي سنين بشتغل في المكان ده ومش عارف ازود دخلي وحاولت أتكلم كذا مره مع الشركة ومبيزودونيش والجيل القديم والجيل الجديد
أمين: الأقدميه والكلام ده مبقاش له معنى مبيحصلش دلوقتي زي زمان
عمر: بالظبط وعلى فكرة في قطاعات زي مثلاً القطاع التكنولوجي في أمريكا أعتقد الدوران سنة ونص أو سنتين يعني الموظف بيقعد سنة ونص أو سنتين وبيغير طبعاً ده على الصعيد العكسي تماماً عكس الـ 40 سنة
أمين: وبرده لو رجعنا لمثل أن الشخص نفسه بيزنس انت لو أخدت مخاطرة وشوفت شغلانة أحسن أو استثمرت انك حسنت من مهاراتك وروحت من شركة للتانية ففيها مخاطرة انت الشركة اللي بتبقى قاعد فيها عارف أولها من أخرها وفي نوع من الثبات اللي بيغير ويروح شغلانه جديدة بياخد مخاطرة على ما يتأقلم ويشوف هياخد على الناس اللي معاه ولا لأ بياخد خطر بس بيكون له عائد أولاً زي ما أنت قولت ممكن يجيله حد من بره ممكن مهيته بتزيد في مقابل المخاطر دي ثانياً بياخد خبره في حاجات تانية فبرده فيها نوع من الاستثمار واخد بالك بس احنا برده عايزين نرجع نركز في موضوع الشركات واللي هيفتح شغل بتاعه مش موظف بس حتى على مستوى إن الواحد بيفكر في نفسه كشغل ويفضل موظف ممكن تاخد مخاطر أكتر في سبيل عائد أكتر من ان انت تدور على مكان تاني ، تحاول تترقى بإنك تزود معلوماتك وهكذا
عمر: انا ديماً بنصح الناس اللي بتخاف تغير شغلها الناس اللي بتقف عند حته معينه مش عارفه تكبر منها ممكن يكون الاستثمار بالسالب زي ما انت قولت انا النهاردة لازم ادور على العائد على شغل أو وقتي
أمين: ما ده برده من ضمن الأصول اللي عندي وده اهم حاجه عندنا وقتنا
عمر: بالظبط الوقت ديماً هو أهم حاجه
ده كان الجزء الأول من لقائي مع أمين هستناكوا الأسبوع الجاي وشكراً جداً جداً على وقتكوا النهارده
Translation of some words and terms:
Feedback ردود أفعال
Model نموذج
Business مشروع / شركة
Client عميل
Skills مهارات
Income دخل
Career مسار مهني
MBA ماجستير إدارة الأعمال
Multinational متعددة الجنسيات
Sales مبيعات
Risk مخاطره
Entrepreneur رائد أعمال
Stability الثبات
Staff العاملين
Life style نمط الحياة
Venture Capital رأس المال المغامر
Selection أختيار
Market Validation التحقق من صحة السوق
Response الاستجابه
Spread الانتشار
Loyalty ولاء
Turn over دوران
Assets أصول
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #الموظف #مؤسس_الشركة #الجزء_الأول