87. حوار مع صديق (بين الماضي والحاضر)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حوارنا النهاردة مع صديق الطفولة محمود ندا بنتكلم معاه بين الماضي والحاضر.. إيه الحاجات اللي كنا بنعملها زمان ، أتعلمنا إيه من تجاربنا في الحياة وفي الشغل ، إيه الحاجات اللي مرينا بيها سواء مالية أو غير مالية ، وازاي بنتعامل مع الفلوس
محمود ندا هو مدير أول - هندسة الأجهزة بشركة أبل
حاصل على بكالوريوس العلوم والهندسة الكهربائية من جامعة الإسكندرية
حاصل على الماجستير في العلوم والهندسة الكهربائية من جامعة يوتا بأمريكا
Mahmoud Nada @LinkedIn : تقدروا تتواصلوا مع محمود على
02:11 مين محمود ندا وبتعمل إيه؟ -
03:37 ايه الحاجه اللي بتقول ياريتني عرفتها وأتعلمتها من وانا صغير؟ -
04:56 هل في دولة زي أمريكا الناس برضه معندهاش الوعي المالي من سن صغير؟ -
06:30 إيه الحاجه اللي خلتك تغير رأيك وتبدأ في خطة التقاعد؟ -
08:00 إيه المهارات اللي كان نفسك تتعلمها من زمان؟ -
09:21 هل لغة زي الإنجليزي كمهارة بتفرق في شغلك؟ -
10:40 هل المهارات العاطفية ممكن تأثر معاك مهنياً؟ -
13:02 هل ممكن يجي الوقت اللي تقول فيه خلاص الوقت عدى واتأخر اني اتعلم حاجه جديدة؟ -
15:09 ايه المصادر اللي بتاخد منها معلوماتك؟ -
16:50 هل في رأيك المهارات اللي اتكلمنا عليها سواء مهنية او عاطفية لو كنت اتعلمتها من زمان كانت أثرت على حياتك الشخصية والإجتماعية؟ -
17:51 نصيحتك إيه للناس اللي بدأت متأخر أو اللي لسه مبدأش خالص؟ -
18:50 إيه الحاجات اللي الناس بتتعامل معاها انها مضمونة ومع الوقت بيكتشفوا انها حاجه مهمه جداً وصعبة ومش بتيجي بسهولة؟ -
20:13 هل تفتكر كل الحاجات اللي اتكلمنا عليها دي ممكن تؤثر عليك صحياً أو نفسياً؟ -
21:47 هل في نصيحة ازاي نربي ولادنا او نفهمهم ان الاستثمار حاجه مهمه؟ -
26:00 بعد ما شوفت مجالات الحياة وخبرتك وسعت وسافرت .. لو رجعت بالزمن كنت تحب تشتغل في إيه؟ -
يارب حلقة النهاردة تعجبكم وتكون مفيدة وملهمه ليكم هي تجربة جديدة ومختلفة شوية عن المعتاد.. ابعتولنا آرائكم وتجاربكم بين الماضي والحاضر كنتوا بتعموا إيه زمان وإيه الحاجات اللي تطورت معاكوا بالوقت.. استنونا الاسبوع الجاي في حلقة جديدة من كلام ينور
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور النهاردة أنا معايا ضيف محمود ندا هو صديق ليا ، فكرنا نعمل حلقة مع بعض كده مختلفة شوية نتكلم فيها على زمان كده إيه اللي كان بيحصل ، اتعلمنا إيه من تجاربنا وبسأله أكتر شخصياً على الحاجات اللي هو مر بيها حاجات مالية وحاجات غير مالية يارب تستمتعوا بيها
01:06
عمر: اهلاً بيك معانا النهاردة يا محمود ، سعيد جداً بالتجربة اللي احنا هنعملها النهاردة هي حلقة بشكل مختلفة عن اللي احنا بنعمله على طول في كلام ينور ولكن أنا تعمدت النهاردة أجيب حد عارفني من وأنا صغير وأنا أعرفه من وأنا صغير يعني المعرفة ما بينا ترجع لزمن طويل عشان موضوع النهاردة بيتكلم على حاجات ليها علاقة بزمان
أولاً عايز أرحب بيك يا محمود وشكراً جداً على وقتك معانا النهاردة
محمود: شكراً يا عمر أهلاً بيك ، أنا مبسوط اني معاك النهاردة وزي ما أنت قولت احنا نعرف بعض من واحنا صغيرين أوي تقريباً خامسة إبتدائي بس مش هقول بقى كام سنة عشان منحسش ان احنا عجزنا
01:45
عمر: النهاردة الموضوع غريب شوية وأعتقد زي ما قولنا كده المعرفة القديمة دي هتساعدنا اننا نجاوب على الاسئلة بتاعة النهاردة مع بعض ونمشي كده في الحلقة دي
موضوع حلقة النهاردة ان احنا عايزين نعرف إيه اللي ممكن كنا بنعمله زمان واحنا صغيرين بعد ما عدينا بالخبرات وبعد ما عدينا بالكارير والحياة وموضوع التعامل مع الفلوس والكلام ده كله إيه المعلومات اللي احنا ممكن نعرفها يعني عن نفسنا بعد الوقت ده كله
02:11
الأول عايزك بس تعرفني بنفسك ، تعرف الناس اللي بيسمعونا محمود مين وبيعمل إيه والكلام ده كله؟
محمود: أنا محمود ندا ، عايش في أمريكا بقالي 15 سنة ، أنا دلوقتي شغال مدير أول – هندسة الأجهزة في أبل في كاليفورنيا بقالي في أبل 7 سنين ، أنا أصلاً خريج هندسة اتصالات جامعة إسكندرية ، خلصت هندسة اسكندرية وسافرت على طول عملت ماجيستير في أمريكا في يوتا ، بعد الماجيستير روحت أشتغلت في كاليفورنيا في المجال بتاع الهندسة الكهربائية وبقالي في المجال بقى من ساعتها واخر 7 سنين في أبل بس ده الخلفية بتاعتي
02:55
عمر: برضه احنا نعرف بعض من خلال الرياضة برضه يعني اتعرفنا على بعض في مرحلة في حياتنا نعرف بعض من الرياضة ادينا سريعاً كده ايه اللي كان بيحصل؟
محمود: احنا بنلعب كرة سلة من زمان أوي ، أنا ابتديت مثلاً في 3 إبتدائي بتهيقلي انت أبتديت بعد كده بشوية
عمر: آه أنا أبتديت بعد كده
محمود: برضه كان في ناس مشتركين بينا بس برضه عرفنا بعض عن طريق الباسكيت ، أنا أكبر من عمر بسنة فكنا مبنلعبش مع بعض كل سنة يعني سنة بنلعب مع بعض وسنة مبنلعبش كنا بنقعد نبدل بس آه كنا صحاب من زمان
03:37
عمر: طيب أول حاجه بقى سؤال الحلقة إيه الحاجه المهمه الكبيرة اوي اللي ياريتك كنت عرفتها من وانت صغير واتعلمتها ولو رجعنا بالزمن ومحمود بتاع النهاردة قالها لمحمود الصغير كان هيقوله إيه؟
محمود: والله يا عمر حاجات كتيرة مش قادر أحدد حاجه بس بما ان البودكاست بتاعك عن الاستثمار عموماً محدش أدانا تعليم ان الاستثمار ده مهم جداً واننا المفروض نبتدي من واحنا صغيرين أو ما نبتدي الكارير بتاعنا فالواحد بيكتشف مع الوقت آه ده أنا المفروض كنت ابتدي من بدري ، وطبعاً انت اتكلمت في كذا حلقة عن الموضوع ده ازاي الفوائد المركبة وكل ما تبتدي بدري كل ما يبقى أحسن دي طبعاً نصيحة كنت أتمنى أرجع أديها لمحمود اللي عنده حاجه وعشرين سنة إن الموضوع ده مهم
النقطة التانية اللي بفكر فيها إن ممكن النصيحة دي تكون جتلنا بس الفكرة اننا مسمعنهاش وممكن تكون أتقالت لنا بطريقة ما بس أنت 20 سنة مش هتبقى مهتم انك تجهز للتقاعد بتاعك صعب أوي حد في السن الصغير يفكر بالطريقة دي بس هي نقطة مهمه وأتمنى لو حد صغير بيسمعنا يعرف انها حاجه مهمه ان الواحد يخطط للمستقبل بتاعة وان الاستثمار مهم في الحته دي
04:56
عمر: طيب أنت خلصت الجامعة وسافرت عملت ماجيستير بتاعك وأتعرضت نقول لثقافة تانية وبلد تانية والكلام ده كله ، هل هناك في الدول دي زي أمريكا برضه الناس معندهاش الوعي المالي من سن صغير؟
محمود: بنسبة كبيرة آه بس أحسن من عندنا بكتير ، أنا عشان خلفيتي من مصر وكده بقارن بمصر واللي أنا اتعلمته من وانا صغير فهقول لأ معظم الناس اللي قابلتهم عندهم وعي أكتر مننا في سن صغير
05:25
عمر: الوعي والتنفيذ يعني هل الناس عندها وعي ومبينفذوش ولا عندهم وعي وبينفذوا يعني إيه الوضع هناك؟
محمود: بتهيقلي الوعي موجود بس مش كله بينفذ بس أنا حاسس أن الوعي أكتر بكتير ، هقولك قصة جت في دماغي أفتكرتها دلوقتي واحنا بنتكلم انا أول شركة اشتغلت فيها أول ما روحت كان في زي توجيه كده أنهم بيشرحولنا ان في أمريكا في مفهوم اسمه (فور وان كيه) انك ممكن تطلع جزء من مرتبك كل شهر وبعدين تحطه في زي حساب تقاعد فأنا اللي أفتكرته دلوقتي واحنا بنتكلم ان انا لما اتشرحلي الموضوع ده كان كل اللي بيدور في دماغي ان الموضوع ده أكيد حد بيضحك عليا عشان ياخد فلوسي دلوقتي ويدوهاني 48 سنة وعلى فكرة أنا قعدت كتير أوي مبحطش في (الفور وان كيه) فترة كبيرة بس دلوقتي بعد ما فكرت فيها اني لو كان عندي وعي أو عندي أي تعليم كنت هحط في الحساب ده من وانا صغير أول ما أبتديت شغل
06:30
عمر: طب وإيه الحاجه اللي حصلتلك خلتك تغير الموضوع ده وتبتدي تحط؟
محمود: لما أبتديت أتكلم مع الناس أكتر في المجال وناس برضه عايشين في البلد بقالهم سنين لقيت كله بيتكلم على إن (الفور وان كيه) مهم ، المفروض تركز في خطة التقاعد بتاعتك مهمه مينفعش تسيبها كده فأبتديت أفهم أن الموضوع مهم
06:50
عمر: هل لو مفيش نظام في البلد اللي انت عايش فيها هل في طرق بديلة يعني أو شوفت الناس بتعمل طرق بديلة ، هل كل الناس بنسبة 100% من الشعب هناك يقدر يحط في نظام التقاعد ده؟ فالطرق البديلة هل بتشوف ناس بتستخدم طرق بديلة ناس كتير بتسمعنا من حتت مختلفة ممكن ميبقاش فيها نفس النظام ده
محمود: بشوف ناس كتيرة بتستثمر في العقارات
عمر: كبديل؟
محمود: آه كبديل ، برضه خد بالك ميزة (فور وان كيه) في أمريكا إن الشركة اللي بتشتغل فيها عشان تشجعك انك تستثمر بتقولك انت هتحط كل شهر 50$ احنا كمان هنحط 50$ من عندنا عشان نشجعك تحط فلوسك في حساب التقاعد بتاعك
عمر: فالبدايل ممكن نقول العقارات أو أنظمة تأمينيه يعني لو في دولة مفهاش النظام ده ممكن أنت تعمل حتى لوحدك يعني
محمود: وفي برضه ناس شوفت كذا واحد بيستثمر بس في حاجات زي صندوق مؤشرات ويسبها مع الوقت
عمر: احنا برضه اتكلمنا كذا مره على موضوع صندوق المؤشرات وصناديق الاستثمار والصناديق المتداولة في البورصة والكلام ده كله
08:00
عمر: دي مثلاً معلومة أنت كنت عايز تقولها لنفسك زمان لو أتكلمنا بقى على المهارات ، لو قولنا لمحمود حتى في الكارير ، ممكن في الاستثمار أو غيره .. إيه المهارات اللي كان نفسك تبقى عندك وانت صغير؟
محمود: اهم حاجه مثلاً هقولك مفيدة دلوقتي في الشغل بالنسبالي مهارات التقديم انا حاسس ان تعليمي كان تقنياً قوي جداً لأن في هندسة باخد كورسات رياضة وكورسات فيزيا متقدمة جداً بس مكناش بناخد ازاي تعمل عرض تقديمي مهم ، ازاي تعرف تتكلم قدام الناس دي برضه حاجه مهمه جداً في الشغل في أي مجال مش بس الهندسة تعرف تقف قدام ناس وتقدم عرض وتاخد اسئلة وترد عليها دي حاجه متعلمنهاش من واحنا صغيرين
عمر: وهل دي كانت تفرق يعني لو معاك المهارة دي كانت فرقت معاك في الكارير بتاعك كانت ودتك في حتة تانية أو فرقت معاك يعني أنت شايف انها ليها تأثير كبير في الكارير بتاعك؟
محمود: فالأول أكيد آه ، لأن انا لما لقيت انها مهمه أبتديت أخد كورسات واقرأ كتير عن مهارة التقديم ، وأنا برضه اللي فادني ان أول شغل أشتغلته كنت بدي عروض تقديمية كتيرة فالشركة كانت بتوديني زي كورسات أتعلم ازاي أعمل عرض تقديمي فأنا أخدت زي تدريب كتير في المهارة العرض دي في أول الشغل بتاعي فادتني بعد كده في المجال المختلف
09:21
عمر: طيب هل موضوع اللغات وخاصة الإنجليزي أو اللغة اللي أنت روحت الدولة بتاعتها أو لو حد مسافر ألمانيا مثلاً اياً كانت اللغة ، هل اللغات بتفرق كمهارة تانية بتضيفها لشغلك؟
محمود: هو بما أن شغلي في أمريكا كله أنجليزي ، حتى لما بنتعامل مع شركات من بره أمريكا برضه بيتكلموا بالانجليزي بس اللي بلاحظة كتير لما شركة بتيجي تكلمنا معندهمش انجليزي كويس الموضوع بيبقى صعب أوي بيخلي التعامل بطئ إلى حد ما فالانجليزي مهم طبعاً ، الانجليزي لغة هقول انها هي الاساس بتاع كل الشركات المختلفة اللي بنتعامل معاها
10:04
عمر: طيب المهارات الشخصية بقى زي المزيكا هل تتمنى انك كنت لعبت مزيكا مثلاً آلة معينة أو أي مهارة تانية غريبة ملهوش علاقة بالشغل أوي أو حاسس انك ممكن تروح تعمله مع ولادك أو أي حاجه مختلفة؟
محمود: والله لا المزيكا مجتش في دماغي بس مؤخراً كنت بفكر في الرسم يعني عمري وانا صغير ما ركزت اني أنمي مواهبي في الرسم او في المجال ده عموماً ودي حاجه بقيت مهتم بيها مؤخراً ويمكن أحاول أعملها أكتر
10:40
عمر: طيب من الناحية العاطفية بقى المهارات العاطفية سواء بقى الصبر ، الغضب أياً كان بقى مهارات ليها علاقة بالعاطفة نفسها ، هل في حاجه كنت عايز تقولها لنفسك زمان؟
محمود: الصبر ، يعني أنا دلوقتي ممكن أقول على نفسي صبور فالشغل بس من أول ما أبتديت مكنتش كده ودي نقطة مهمه ، في قرارات كتيرة بتتاخد في الشغل لو أنت هتاخدها في ساعتها من غير ما تفكر هتبقى غلط لازم تاخد الوقت انك تفكر مع نفسك ودي نصيحة برضه أديها لأي حد متاخدش قرار على طول ، يعني ساعات بيجيلك إيميلات بتنرفزك بتبقى عايز ترد بسرعة لما بتاخد الوقت وبتهدا وتقرا الإيميل تاني وتحاول تفهم المنظور بتاع الشخص الأخر اللي هو انت لما تبص عليها من ناحيتك غالباً هتبقى شايف الشخص التاني غلطان او انه بيحاول يجي عليا بطريقة أو آخرى بس لما بتبصله بالمنظور بتاع الشخص الأخر ممكن تتفهم هو بيعمل كده ليه هو ممكن يكون تحت ضغط مخليه ياخد قرار زي ده ولما تفهم المنظور بتاعه غالباً هتاخد قرار سليم أكتر ده محتاج صبر وهدوء شوية انك تستوعب اللي بيحصل وبعد كده ترد عليه
عمر: وهل الكلام ده أختلف؟ يعني أي حد بيبتدي بيبقى لسه مبتدئ بيكلم مديرين الكلام ده كله لما انت وصلت في الشغل يبقى عندك ناس شغاله تحتك برضه المنظور ده أتغير عندك؟
محمود: أتغير طبعاً ، حاجه برضه أتغيرت بعد ما بقى عندي ناس تحتي الحاجه اللي ممكن أديها نصيحة لنفسي لما أرجع أن أنا كتير ببقى عايز الناس اللي شغاله معايا انهم يتكلموا معايا ولما اقولهم حاجه ميخدوهاش اللي هو لازم نعملها ببقى عايز انهم يقولولي رأيهم بصراحة في كتير ساعات بتحس انه خلاص مدام مديري قالي أعمل كده هعمل كده وهو مش مقتنع وأنا كتير كنت بعمل كده مع مديري القديم خلاص هعملها من غير ما أقتنع بس دلوقتي بعد ما أتعلمت وشوفت الموضوع ده أنا كتير بروح لمديري واقوله انا مش مقتنع بالموضوع ده عشان كذا كذا كذا فبقى عندي الجرأه والشجاعة اني اقول كده ودي حاجه معظم المديرين مش بيضايقوا منها بالعكس انت بتوريهم المنظور بطريقة مختلفة فغالباً هو الموضوع ده وهتخلي الشغل أحسن
13:02
عمر: هل في وقت متأخر انك تتعلم حاجه؟ يعني هل بيجي وقت تقول خلاص الوقت عدى اني اعمل حاجه معينه أو فكرة معينه وخاصة كمان انك بتشتغل في شركة فيها أعداد موظفين كبيرة ، فيها منافسة يعني مش أعداد ناس قليلة فهل انت على المستوى الشخصي هل بتحس ان عمرك خلاص اتأخرت مش هعمل كده ملهاش لازمه هل بتوصل للمرحلة دي؟
مصطفى: لأ صراحة لأ اي حاجه بالذات الشغل التقني ديماً بحس اني مهتم أتعلم وساعات باخد كورسات يمكن الحاجه الوحيدة اللي استقتلها لما كبرت انا زمان كتير كنت بفكر اني عايز اعمل دكتوراه يعني انا عملت ماجيستير بس مكملتش الدكتوراه دلوقتي ساعات بفكر انه خلاص يعني غالباً مش هقضي 5 سنين من حياتي في دكتوراه وقت كبير شوية بس يعني غير كده أي حاجه بتيجي في المجال بتاعي ببقى عايز أتعلمها وأعرفها مبحسش انها متأخرة وغير المهارات التقنية بيكون في مهارات شخصية لما تخش في الكارير بتاعك وبتقعد تكبر مع الوقت ، لما تبقى مدير مثلاً بتلاقيك محتاج مش بس مهارة التقديم ، محتاج كمان مهارات إنسانية محتاج تعرف تتكلم مع ناس أكتر ، محتاج تعرف ازاي تختصر انت بيجيلك معلومات كتيرة من تحت وعايز تلخصها عشان تديها للناس اللي فوق دي مهارة آخرى اتعلمتها مؤخراً
برضه لما بقيت مدير في مهارة تانية كانت مفيدة جداً التفويض بالذات المدير الجديد انت متعود تعمل الحاجات بأيدك بس أنت دلوقتي معاك فريق على الأقل 4 أو 5 مينفعش تقعد تعمل حاجات بأيدك كتير عشان مش هيبقى عندك وقت فلازم تعرف تاخد مسؤولية من مسؤولياتك وتديها لواحد من الناس اللي شغاله تحتيك فدي حاجه برضه مش سهلة بالذات للناس اللي بتشتغل بأيديها كتير وفي كتب كتيرة عن الموضوع ده
15:09
عمر: أنا برضه كنت هسألك المصادر اللي بتستخدمها هل انت بتحب القراية بتحب تتفرج على فيديو يعني بتاخد معلوماتك منين؟
مصطفى: أنا عموماً بحب القراية بحب لو اخد معلومة من حاجه يا إما مقالة يا إما أبحاث سواء تقنية أو لأ بحب اقرأ بس مؤخراً اكتشفت البودكاست وفي فيديوز كتير ممكن نستفيد بيها بس أنا كمحمود بحب امسك حاجه واقراها وعندي كتب كتير في المجال اللي أنا شغال فيه
عمر: في برضه حاجه انت قولتها ودي حاجه يمكن مش منتشرة في الوطن العربي اوي او انا مخبطتش فيها كتير وانا في مصر موضوع بيبقى معمول في شكل بحثي سواء بقى في رسالة ماجيستير أو دكتوراه أو حتى مش لازم تبقى رسايل ممكن حد يكون عامل بحث بطريقة منظمة ميزة الابحاث دي انها بتبقى منظمة وليها شكل علمي في حاجه هو بيدور عليها وبيحاول يجاوب عليها فبرضه ده مصدر ظريف جداً وأعتقد مع وجود الانترنت بقى في أبحاث كتيرة جداً في جميع المجالات يعني
مصطفى: طبعاً وبالذات في حاجات التقنية أكتر ودي حاجه أتعلمتها في الجامعة أول ما جيت ان الابحاث دي بتبقى متقسمة بطريقة معينه فأنت بعد شوية لما بتتعود ازاي تقراها انت مش بتقرأ البحث كله انت بتبقى عارف تقرأ الحته الأولانية بسرعة المقدمة وعارف الحته اللي النتيجة هتتقال فيها ، عارف الاستنتاج هيتقال فين بيبقى ليها شكل معين بيخليك تعرف تبص عليها بسرعة وتقرر اذا كان البحث ده هيبقى مفيد ليك ولا لأ
16:50
عمر: طيب المهارات بقى اللي احنا أتكلمنا عليها دي سواء العاطفية أو في الشغل أو في اي حاجه تفتكر كانت أثرت على علاقاتك باصحابك بالناس إجتماعياً في البيت هل تفتكر الحاجات دي كانت هتنعكس عليك برضه بشكل إيجابي في حياتك الشخصية؟
محمود: سؤال جميل ، أكيد يعني فالتربية مثلاً انا عندي أولاد وفي مهارات كتير بحس اني بتعلمها في الشغل ممكن تطبق في التربية
الصبر مثلاً انك محتاج تبقى صبور في حاجات كتير مع أولادك مينفعش تاخد رد فعل سريع ازاي برضه تعلمهم وتمشي معاهم براحه لحد ما يوصلوا هما للنتيجة من غير ما تقولهالهم على طول دي حاجه كتير بنستخدمها في الشغل أكيد لو كنت اتعلمت الحاجات دي بدري كانت هتفرق برضه ده المثال اللي جه فمخي على طول التربية والأولاد
عمر: إجابة كويسة أوي بصراحة يعني انك تعكس على الولاد مكنتش متوقع الإجابة تبقى بالشكل ده بس لأ إجابة حلوة جداً
17:51
عمر: انت النهاردة قولتلي برضه من الحاجات اللي كان نفسك تتعلمها من زمان الوعي المالي بشكل عام وده أكتر حاجه بتجيلي تقريباً من الناس اللي بيسمعونا يارتنا سمعنا من زمان أو حد قالنا واحنا أصغر بس انا برضه مقتنع وأعتقد انت برضه ممكن تكون مشاركني نفس الرأي ان الناس حتى لو اتأخرت وأبتدت في نص التلاتينات أو الأربعينات يعني عايزك برضه تقولي هل بتشوف نماذج أبتدت متأخر أو فاقت متأخر حتى عنك يعني انت ممكن متكونش أبتديت متأخر اوي بس في ناس اتأخرت عنك نصيحتك ليهم إيه؟
محمود: طبعاً لازم تبتدي الفكرة انه بمجرد ان بقى عندك وعي ومبدأتش هي دي المشكلة ، لو معندكش الوعي ممكن يبقى عندك عذرك مش عارف لسه بس لو عندك الوعي لازم تبتدي وفي أي سن وكل ما تبتدي بدري بيبقى أحسن زي ما انت قولت بس طول ما انت عندك وقت تستثمر هيبقى مفيد
18:50
عمر: السؤال اللي بعده إيه الحاجات اللي الناس بيصحوا الصبح يلاقوها يعني مضمونه ومع الوقت لما بيكبروا بيكتشفوا ان دي حاجه مهمه جداً وازاي انا اصلاً كانت جيالي ببلاش وبسهولة يعني إيه الحاجات اللي بتشوفها اللي الناس بتاخدها بطريقة مضمونه ومستريحين ومطمنين وحاسين انها حاجه سهله بس هي في الحقيقة هي صعبة جداً معرفش فهمت سؤالي ولا لأ؟
محمود: سؤال مش سهل ، طب ما تديني مثال قولي انت مثلاً ايه اللي جه فدماغك
عمر: ان واحد مثلاً بياخد مصروف مثلاً ، اللي هو أنا عندي حد بيصرف عليا وبعدين لما بيطلع في الحياة العملية بيكتشف ان ايه ده في مجهود كبير اوي بيحصل .. هل عندك مثال شوفتها بنفس الطريقة؟
محمود: آه اللي جه في دماغي دلوقتي أول مره سبت بيت عيلتي ورحت عشت لوحدي اكتشفت ان في مصاريف كتيرة جداً بطريقة مختلفة مكنتش عامل حسابي عليها حاجات بسيطة طبعاً فاتورة الماية والكهربا في حاجات بتاخدها وانت عايش مع أهلك بطريقة مضمونه بتيجي كده زي ما هي وبتكتشف انها جزء مش قليل مثلاً بتيجي تخطيط أنا فاكر أول مرتب اخدته وانا بشتغل في الجامعة كنت متخيل انه هيكفيني بسهولة بس أكتشفت ان في حاجات كتيرة مش عامل حسابي عليها
20:13
عمر: حاجة تانية اسألك عليها هل شايف ان الحاجات دى بتأثر على صحتك البدنية يعنى الحاجات اللى احنا اتكلمنا فيها دى مثلاً لو عدينا فيها هل بتفرق زى ما احنا قولنا مثلاً هل بتأثرعلى اجتماعياً عاطفياً الكلام ده كله هل بقى بتأثر صحياً عليك؟
محمود: بص هو فى زى المثال اللي جه فى مخى دلوقتى كده واحنا بنتكلم على الصحة والكارير عموماً يعنى فى كذا مثال شوفتهم فى الشغل عندى ناس مش كبار قوى ممكن اول الاربعينات اخر الاربعينات فى الرينج ده وانا بقى عندى صداقة بيهم شخصية فاتكلمت معاهم اكتشفت ان هما ابتدوا استثمار من بدرى
هضرب مثالين واحد في سوق الأسهم و واحد فى العقارات والاتنين ناجحين جداً فى الكارير بتاعهم اللى انا حسيته انك لو انت بتستثمر من بدرى وبقى عندك شعور داخلى انك مستقر المالي بيخليك تاخد قرارات فى الشغل اسهل واحسن
انا متخيل ان هو وصل لمرحلة لو مديره متدايق منه ومشاه مش هيفرق معاه هو ممكن عنده استقرار مالي فبيبقى واثق فى الشغل بطريقة معينة انه يعرف ياخد قرارات متخليهوش يبقى مجبر يعمل حاجة زى واحد مش مستقر مالياً ف دى جت فى دماغى وانت بتسأل السؤال
عمر: ودى بتفرق طبعاً فى الصحة النفسية بتاعتك وبتفرق فى الصحة الجسدية والضغط وان انت متبقاش قلقان
21:47
محمود: بالظبط ...و انا ممكن اسألك سؤال بما ان احنا اتكلمنا شوية على الأولاد والاطفال هل عندك نصيحة ازاى ممكن نربى اولادنا ونحط فيهم المفهوم بتاع الاستثمار وخد بالك فى فرق بين الاستثمار والتحويش
عمر: مظبوط
محمود: واحنا صغيرين كنا بنتعلم نحوش نحط فلوسنا واحطها فى الحصالة بعدين اروح اشترى لعبة بس انك تفهم الأولاد ان الاستثمار ده برضه حاجة مهمة فهل عندك اى نصيحة او اى طريقة؟
عمر: بص انا مع الأولاد بالذات انا ببتدى او بحب يعنى اوى لما حد يسألنى السؤال ده بحب اتكلم عن تكلفة الفرصة البديلة ، ازاى تعلم الولاد تكلفة الفرصة البديلة
انت حوشت فانت ممكن تروح تشترى لعبة انا مشكلتى فى قرار اللعبة نفسها انهى لعبة! بمعنى إن كل لعبة عندها منفعة معينة او عندها حاجة بتحقق متعه للى هيستخدمها طيب المتعة دى ممكن تبقى 5 دقايق او ممكن تبقى سنة انا بفضل اني اوجه ابنى للحاجة اللى ممكن تقعد سنة
الاتنين ممكن يبقوا نفس السعر فانا هنا مش خسران حاجة انا هادفع نفس الحاجة وامشى من المحل فانا بحاول ازقه على المنفعة الاعلى ، المنفعة ده مبدأ اقتصادى معروف والمنفعة بتوصل لمرحلة معينة انت ممكن تقعد تحسن تحسن تحسن وبعدين خلاص مفيش منفعة بعد كده مش هنعرف نجيب حاجة اعلى من كدة يبقى انت كده وصلت للذروة بتاعة المنفعة بتاعتنا
انت برضه متجيبلوش حاجة هتضايقه ممكن تقعد معاه سنة وهيبقى بيكرهها انت مش عايز كده برضه فانت بتحاول تحسن الحاجة اللى هى هتمتعه وهتبسطه و فنفس الوقت متبقاش حاجة هتتكسر وهتترمى فى الزبالة بعديها ب 5 دقايق او هو هيضيع وقته بيها برضه ممكن تبقى حاجة تعليمية فانا بشكل غير مباشر علمته حاجة واتبسط وقعدت معاه وقت طويل شوية فكده انا حققت المثالية او دخلت زاوية تالتة في تكلفة الفرصة البديلة لو اخدت دى مش هتاخد دى .. دى اول حاجة
وبعدين بقى الحد الأقصي بتاع المنفعة نفسها دى الطريقة اللى اعلمهاله وبعدين دى طريقة اكتر هتعلمه يعمل ياخد قرار احسن ، فلو اخدنا الكلام ده وربطناه بقى الولد كبر وربنا كرمه وابتدى هو يشترى اول بيت والكلام ده هو هيفكر بنفس الطريقة انا مش بقولك ان انا هعلمه الكلام ده وهو صغير بس انت لو اديتله طريقة التفكير
محمود: انه يفكر بالطريقة دى
عمر: بالظبط ، هو هيفكر بيها لما يقع فى مشكلة
انت ممكن تساعده ياخد قرار بس انت عمرك ماهتشكل شخصيتة 100% انت بس بتديله إرشاد ازاى يفكر
معرفش برضه هل دى اجابة مختلفة ، يعنى هل انت سمعتها قبل كده ولا لاء بس معرفش دى اللى جات فى دماغى
محمود: لا لا الاجابة عجبتنى قوى لان انا كنت بفكر انت مش هتعرف تروح لواحد عنده 8 سنين مثلاً وتشرحله الفوايد المركبة انت لما تحط دلوقتى وتقعد تعمل ... يعنى الفكرة مستحيلة للاطفال ان يفهموها بس انت انك تعلمه طريقة تفكير معينة دى اكيد اسهل من انك تفهمه المفهوم الصعب
عمر: بالظبط .. وبعدين ممكن كمان تروح تجيبله الحاجة اللى هو بيحبها انت هنا بتعمل تحسين مستوى جديد اللى هو واحد مثلاً بيحب الكورة فانت بتحاول تجيبله حاجة فى الاتجاة بتاع الكورة علشان تنمى مثلاً مهارته فى الكورة فمثلاً جبتله جزمة كورة او تيشيرت وبعد شوية هتفاجأ بحاجة ان لو ابنك فهم المفاهيم دى هتلاقيه هو بعد كده بيفاجئك بالقرار اد ايه هو قوى واد ايه انت مش مصدق لان هو اتعلم خلاص
محمود: صح
عمر: معرفش هل الذكاء الاصطناعي بيشتغل كده؟ ماهو الذكاء الاصطناعي برضه بيتعلم ، يعنى فى التكنولوجيا لما بتمرن الذكاء الاصطناعي بتاعك على حاجة معينة او بطريقة معينة بيبتدى هو يعظم النتايج بتاعة الاختيار بتاعك فاهم قصدى ف بحس كده ان هى برضه فى ربط بين الذكاء الاصطناعي والطفل بتاعك ، انت بتمرنه ف اعتقد هو ده يعنى
محمود: التعلم الالي يعني
عمر: بالظبط انت بتمرن مخ الولد بس تانى دايماً خلى الاطفال هما اللى يختاروا يعنى متجبرهوش على حاجة متزقهوش خليه هو يبقى حاسس ان هو اللى بيختار الحاجة علشان برضه ميقفلش منك وميقفلش من اللعبة وميقفلش من الهدية عموماً يعنى
محمود: طبعاً
26:00
عمر: محمود انا عندى سؤال تانى لو انت بقى مكنتش بتعمل اللى انت بتعمله النهاردة وشوفت الكارير بتاعك ده .. وانا ممكن برضه اجاوبك على السؤال ده من ناحيتى .. ورجعت تقول انا كنت عايز ابقى ايه بعد ماشوفت مجالات الحياة وخبرتك وسعت وسافرت كنت عايز تبقى ايه هتى لو هى شغلانة غريبة او حاجة غريبة او بره المعتاد يعنى؟
محمود: دا سؤال جميل طب انا هسيبك انت تجاوبه الاول علبال ما افكر شكلك عندك اجابة
عمر: انا عندى اجابة اه ومش عارف انا لو كنت عملتها ويمكن لو حد بيعمل الشغلانة دى اتمنى ان هو اولاً يبعتلى علشان مبلاقيهمش كتير يعنى بس انا كنت نفسى ابقى كيميائى كنت نفسى اشتغل فى الكيميا عموماً يعنى دى كانت من اكتر الحاجات اللى انا حبيتها وانا بدرسها وبحس ان هى بلا حدود فى التفكير يعنى انا عارف ان فى ناس بتعز الفيزيا جدا والرياضة والكلام ده كله بس انا بحس ان الكيميا فعلاً هى الاصل يعنى هى التعريف بتاع المادة والمادة هى كل حاجة فى الحياة يعنى كل حاجة متكونة من مادة أياً كانت هى ايه ف كان نفسى اروح فى الحتة دى كنت نفسى اشتغل فى معمل او حاجة كيميائية ايه بالظبط معنديش اى فكرة يعنى بس المفهوم بتاع الكيميا نفسه بحبه جداً يعنى
محمود: اه تحطت يعنى حاجتين على بعض وتشوف اللى هيطلع ايه
عمر: انت ممكن تعمل اى حاجة بقى فاهم يعنى تطلع بقى ب خمسين الف حاجة معرفش ممكن تخترع حاجات جديدة ولا لاء مش متأكد يعنى بس الحتة دى كانت غاويانى جدا يمكن كل الناس بتكره الكيميا بالذات بنيجى عند الكيميا وغالباً كل الناس اللى بتسمع دلوقتى برضه هيبقوا غالباً بيكرهوا الكيميا
محمود: غالباً بيكرهوا الكيميا جداً
عمر: اه ف هى دى انت بقى كنت
محمود: لاء بص انا الصراحة انا بحب المجال بتاعى جداً ويعنى لغاية دلوقتى كل يوم بتعلم فيه حاجات جديدة فانا مجال الهندسة الكهربائية وبالأخص حاجة اسمها الكهرومغناطيسية لو فى مهندسين بيسمعونا مادة الكهرومغناطيسية دى عادة المادة اللى الناس بتكرهها اللى هو لما بتيجى تخش فى الكلية اول ما بتيجى مادة الكهرومغناطيسية الناس بتقول مش هناخد المادة دى بيحاولوا يبعدوا عنها بس انا بحبها وغالباً كنت هكمل فيها
بس الحاجة اللى بفكر فيها مختلفة ان انا يعنى من واحنا صغيرين كان دايماً بيتقالنا انت لازم تبقى مهندس او تبقى دكتور او لازم تبقى فى مجالات معينه لازم تشتغل فيها وفى مجالات مينفعش تشتغل فيها دى اللى ممكن اغيرها
ان لو عندك الأختيار انك فعلاً تشوف الحاجة اللى انت بتحبها وتمشى وراها انا مقتنع دلوقتى جداً ان كل واحد لو راح فى الحتة اللى هو بيحبها هيبدع فيها سواء هى ايه بقى مش شرط لازم تبقى فى مجال معين علشان تجيب فلوس اكتر الفلوس ممكنة بس تروح فى الحتة اللى انت بتحبها وده يعنى مفهوم مش موجود كتير حتى فى امريكا هنا دايماً الناس بتفكر فى مجالات معينة هى اللى بتجيب فلوس بس انا شايف ان انت لو روحت فى الحتة اللى انت بتحبها وانت عندك شغف انك تديها هتحط وقت فيها ولما تحط وقت فيها هتجيبلك فلوس
عمر: بالظبط.. وبعدين فى كل المجالات فى اللى ناجح فيها وفى اللى بيعمل فلوس يعنى ممكن تلاقي مجال مثلاً مبيدفعش فلوس كتير جداً بس اللى ناجح فيه جدا جدا جدا هو غالباً اللى بيعمل فلوس
محمود: بالظبط
29:13
عمر: طيب علشان نقفل بقى حلقة النهاردة لو لخصنا كده اهم ثلاث حاجات اقول مثلاً ايه فكر فى الفلوس من بدرى على قد ماتقدر؟ واحد
فكر فى التقاعد حتى وانت عندك 20 سنة مستحيل بس حاول
ايه تانى؟
محمود: المهارات الشخصية ، المهارات التقنية فى المجال مهم بس المهارات الشخصية مهمة حاول تتعلمها من وانت صغير
عمر: والشغف اعتقد تالت نقطة
محمود: الشغف بتاعك اه
عمر: انا برضه هسيب فى الشو نوتس بتاعة الحلقة اللينك بتاعك لوحد عايز يبعتلك مثلاً حاجة على السوشيال ميديا او حاجة
محمود: اكيد
عمر: وشكراً جداً جداً يا محمود على وقتك معانا النهاردة
محمود: شكراً يا عمر
عمر: ويارب تكون انبسطت معانا فى الحلقة دى
محمود: اتبسطت جداً
عمر: وكل الناس اللى بيسمعونا شكراً ان انتوا وصلتوا معانا لحد هنا واشوفكوا إن شاء الله الاسبوع الجاى
Translation of some words and terms:
Format شكل
Experiences خبرات
Career وظيفة
Engineering manager مدير هندسي
Masters ماجيستير
Feld مجال
Electrical engineering الهندسة الكهربائية
Background خلفية
Basketball كرة سلة
common مشترك
alternate تبادل
Investment استثمار
Education تعليم
Compound Interest الفوائد المركبة
Plan خطة
Culture ثقافة
Orientation توجيه
Concept مفهوم
Real State عقارات
Match تطابق
Index fund صندوق مؤشر
ETFs صناديق الاستثمار المتداولة
Skills مهارات
presentation skills مهارات التقديم
Technical تقني
Math رياضة
Physics فيزياء
Advanced متقدم
Soft skills مهارات شخصية
Interested مهتم
Emotional عاطفي
Junior مبتدئ
Appreciate تقدير
Competition مقارنة
Personal Level مستوى شخصي
People Skills مهارات إنسانية
Summaries تلخيص
Delegation تفويض
Team فريق
Resources مصادر
Article مقال
White Paperبحث
Introduction مقدمة
Result نتيجة
Conclusion استنتاج
Social إجتماعي
Apply تطبيق
Reaction رد فعل
Example مثال
Reflection إنعكاس
Financial independence إستقلال مالي
Once بمجرد
Guaranteed مضمون
Physically بدنياً
stock market سوق الأسهم
successful ناجح
financially stable مستقر مالياً
stress ضغط
opportunity cost تكلفة الفرصة البديلة
utility منفعة
Optimize تحسين
Peak ذروة
Indirectly بشكل غير مباشر
Optimization مثالية
Maximizing الحد الأقصى
decision making اتخاذ قرار
mental model نموذج ذهني
guidance إرشاد
Direction إتجاة
machine learning التعلم الالي
AI = Artificial Intelligence الذكاء الاصطناعي
Chemistry كيمياء
Lab معمل
Specifically بالأخص
Electromagnetics الكهرومغناطيسية
passion شغف
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #حوار_مع_صديق