86. حوار مع مستثمر - اكت فاينانشال - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بنكمل النهارده كلامنا مع مصطفى عبد العزيز - الشريك مؤسس وعضو منتدب لشركة أكت فاينانشال - وبنعرف منه أكتر عن طبيعة شغله كمستثمر محترف في السوق المصري..
مصطفى عبد العزيز
شريك إداري ومؤسس لشركة ACT Financial
خبرة أكتر من 18 سنة في أسواق رأس المال في مصر والشرق الأوسط وشمال إفريقيا.
Mostafa Abdelaziz @LinkedIn تقدروا تتواصلوا مع مصطفى على
عملت تحليلك عرفت هيكل الملكية شوفت أوضاع الشركة .. بتعمل إيه بعد كده؟ -
كلمني على تغير سعر العملة ازاى بتاثر على استثماراتك وإيه اللي ممكن يحمي الجنيه كأصل؟ -
هل الأسهم تعتبر من الأصول اللي بتحمي الانخفاض في قيم العملة على المدى الطويل؟ -
هل في شركات بتستفيد من انخفاض سعر الجنيه قصاد الدولار؟ -
لو عايزين نلخص تجربتك كلها في دقيقة -
بخبرتك كمستثمر هل انت شايف ان مصر تعتبر سوق غالي؟ -
ديماً بنصح اي حد مش متفرغ بشكل كامل أنه يستثمر في الصناديق الاستثمارية -
الاستثمار مبيجيش مره واحده انت بتستثمر اجزاء بتحط ارقام صغيرة كل شوية -
ازاي بتتعاملوا مع الخسارة؟ -
أنت لما بتبدل استثمارك أنت بتبدل حاجه بحاجه انت مش تتخارج تماماً من فكرة الاستثمار -
ناس كتيرة متعرفش ان فى ناس شغلانتها اليومية إنها تختار اسهم أو تستثمر او تستحوذ على شركات -
إن شاء الله حوارنا مع مصطفى هيكون بداية لسلسلة حلقات جاية نتكلم فيها مع مستثمرين محترفين بيستثمروا مباشرة في الأسواق.. ونعرف منهم أكتر ازاي بيفكروا ، شكل المحافظ بتاعتهم بيكون عامل ازاي ، والحاجات اللي بيمروا بيها لأن الأمثلة دي مفيدة للناس اللي عايزه تبدأ حياتها في طريق الاستثمار.
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور ، النهاردة هنكمل في الجزء التاني مع مصطفى كلامنا على محفظته وازاي بيستثمر والحاجات دي وبرضه هنشوف حاجات زي ازاي مثلاً تأثير سعر الصرف على استثماراته ، بيفكر في الحاجات دي ازاي خاصة في الأوضاع الموجودة النهاردة فهسيبكم مع الجزء التاني ويارب تستمتعوا بيه
عمر: طب انا كنت وقفتك عند المراحل معلش نرجع ليها تاني ، المراحل انت خلاص عملت تحليلك عرفت هيكل الملكية شوفت أوضاع الشركة سألت عليها أتكلمت مع الإدارة وعملت كل الحاجات بتعمل إيه بعد كده؟
مصطفى: زي ما قولتلك احنا كده بنبقى خلاص أخدنا القرار الاستثماري خلاص أنا قررت أستحوذ على حصة أقلية في الشركة ، القرار بيبدأ اننا بنبدأ نشوف بقى هنفذ ازاي عملية الاستحواذ دي ، زي ما أتفقنا ميزة انك تستحوذ من البورصة أنك تقدر تشتري من عالشاشة على طول يعني مش محتاج تروح تتكلم مع البياع وتتفق معاه وتعملوا عقود مع بعض وتقعدوا مع محامي عشان تتفقوا على نقل الملكية كل اللي عليك تعمله انك تقرر انك تشتري وتخش تطلب الأسهم على شاشة البورصة وتبدأ تشتري طبعاً مش بتستحوذ على حصص كبيرة مره واحده بس بتبدأ تبني وضعك واحدة فالتانية
أخدت ربع% بعدين أخد نص% وبعدين 1% وبعدين اخدت 2% وهكذا لحد ما بتوصل لنسبة معينة 5% أفصحت في السوق على فكرة يا جماعة انا عندي 5% من الشركة دي ، تبدأ زي ما اتفقنا تكون تحالفات مع بعض المستثمرين التانين التحالفات دي بتدينا قوة أكبر شوية لأن أنا مش ديماً بيبقى عندي رأس المال الكافي اني استثمر في حصص كبيرة في كل الشركات فلما بكون تحالفات بيبقى عندي امكانية وصول أكبر على حصة أكبر في الشركة اللي أنا بستثمر فيها فبيديني وضع أكتر داخل الشركة وده اللي بيحصل في التحالف
عمر: فالتحالف ده بتيجي تقوله يا عمر يا محمد يا حسين تعالو نعمل تحالف صغير كده ونستحوذ على حصة صغيرة ده معنى التحالف
مصطفى: بالظبط ، أنت النهاردة مثلاً عندك حصة في شركة كذا وأنا عندي حصة في شركة كذا طب ما نتحالف نمضي مع بعض عقد تحالف اننا متحالفين اننا مجموعة مرتبطة مصالحنا واحدة وبفصح بده في السوق لأن في الأخر السوق محتاج يعرف لو احنا مجموعة واحدة ومصالحنا واحدة وبنفكر بنفس الطريقة فخلاص بتفوضني اني احضر عندك الجمعية اني أصوت بصوتك في الجمعية وهكذا لو في تمثيل لمجلس الإدارة ممكن يبقى التمثيل جماعي على الحصص المشتركة للمجموعات المرتبطة وهكذا فبنبدأ نكون الوضع بتاعنا سواء براس مال الشركة أو برأس مال الشركة زائد بعض التحالفات مع بعض المستثمرين في الشركة وبندير عملية الافصاحات بنقعد مع إدارة الشركة وبنقعد مع بعض المستثمرين التانيين بحيث اننا نحاول نحسن من أداء الشركة طبعاً زي ما أتفقنا عندنا برضه المحللين داخل الشركة وبيبقى دورهم مش بس دراسة القيم العادلة للشركة بس هي دراسة ازاي تقدر تطور من القيمة العادلة زي ما قولتلك التقييم مبني على إفتراضات يعني أنت بتقول لو الشركة باعت المشروع المعين السنة اللي جايه هتقدر تكسب مبلغ كذا ففي الحالة دي قيمتها هتبقى كذا ده التقييم
في دور تاني أبعد شوية من التقييم انك تقول طيب لو خلتها بدل ما تبيع المشروع ده تعمل مشروعين أو تعمل مشروع وتغير من شكل مشروع أو بدل ما تبيع حته الأرض دي تأجرها وتاخد فلوسها تشتري بيهم حاجه تانية ، فتبدأ تقعد تغير في الأفتراضات دي
عمر: الكفاءة بتاعة الشركة ازاي تستخدم راس مالها أحسن اكنك أخدت مصنع ودورته أحسن بدل ما ينتج 1000 قطعه بقى بينتج 2000 مثلاً يعني
مصطفى: بالظبط وبتبدأ تحط ده في النظام اللي بيطلع القيمة العادلة وتشوف إيه احسن سيناريو يطلعلك قيمة عادلة أكبر للسهم لأن في الأخر احنا هدفنا أن قيمة الشركة تبقى أكبر عشان سعر السهم يبقى أعلى عشان الشركة تكسب ونبدا نتكلم مع الإدارة فـ ازاي نقدر نحسن ونطور الأداء ده بالفكرة دي وبس
فدي خطة الاستثمار لحد بعد كده بندير عملية التخارج في وقت معين سواء في عرض شرا حصل او سواء بنتخارج في البورصة على طول بشكل مباشر في السوق دي بتبقى إدارة عملية التخارج وديماً بيبقى عملية تخارج وفي نفس عملية دخول في استثمار جديد وهكذا
عمر: انت كلمتني دلوقتي على حاجات ليها علاقة بأداء الشركة مثلاً ارباحها ، ازاي تنتج أكتر سعرها يزيد والكلام ده كله ، في حاجه مؤثرة دلوقتي في مصر موضوع العملة سعر الجنية قصاد الدولار شوفنا مؤخراً عملية التعويم دي حاجات بره أيدك كمستثمر يعني أنت كمستثمر متقدرش تتوقع بنسبة كبيرة اوي التعويم بعد 5 سنين العملة هتبقى بكام ففي حاجات مش بأيدك فكلمني كده على عوامل اللي هي بره أيدك وأكبر حاجه فيها طبعاً هي العملة وازاي بتأثر على استثماراتك وقرارك في الدخول والخروج والحاجات دي لأن في ناس كتير جداً بتبقى بتفكر أنا معايا جنيه وعايز استثمره إيه اللي ممكن يحمي الجنيه بتاعي كأصل وهكذا يعني
مصطفى: طبعاً من مزايا الاستثمار في سوق الأسهم هو أنك بتقدر بسهولة نسبية تغير من الواقع اللي بره أيدك يعني النهاردة مثلاً حصل قرارات معينة تضر صناعة معينة وانت مستثمر في الصناعة دي هتتخارج من السهم ده وتشتري سهم تاني في صناعة تانية عشان أنت شايف دلوقتي التوقعات بتاعة القطاع ده لمدة سنتين تلاته الجايين مش هتبقى مناسبة بسبب ظروف خارجه عن إرادتك انت كشركة وخارجة عن إرادتك أنت كمستثمر
عكس انك تكون مستثمر في مصنع بشكل مباشر ففي الحالة دي ظروف التخارج والدخول في استثمار جديد حاجه صعبة او مش حاجه هتقدر تعملها بشكل دوري فديماً احنا عنينا بتبقى على فكرة انه مفيش استثمار جيد في كل وقت بكل طريقة
طبعاً على المدى الطويل لو انت في شركة صح في قطاع صح المفروض بتكسب بس ساعات بيبقى من الناحية الفنية أنت محتاج تعيد وضعك في استثمار معين في أوقات معينه وده طبعاً مبيحصلش بشكل يومي ولا اسبوعي ولا شهري بس في أوقات معينة بتيجي تقول لا والله أنا دلوقتي مش صح اني اكون موجود في القطاع ده عشان في ظروف خارجه عن ايدي سواء الظروف دي كانت اقتصادية خاصة بالبلد او ظروف دولية خاصة بحالة بتحصل في العالم أو ظروف ليها علاقة بأسعار مواد خام أو بأسعار عمله او بأسعار بترول أو بأسعار فايدة عالية أو فايدة واطية بتاثر على قطاعات معينه
فالحاجات اللي بره ايدك دي أنت بتبدأ تعملها تقييم وبتبدأ تشوف هل انت في القطاع الصح ولا في القطاع الغلط ده سؤال مهم جداً ، النهاردة انت مثلاً ضربت مثال على موضوع سعر العملة ، سعر العملة النهاردة من الحاجات المؤثرة بشكل إيجابي وبشكل سلبي على أداء الأسهم بشكل مهم جداً
أمتى تأثر بشكل إيجابي وأمتي تأثر بشكل سلبي؟
أول إيجابية بالنسبة لسعر العملة اللي حصل في مصر إن سعر الدولار أرتفع جداً قصاد سعر الجنيه فالجنيه بقى أضعف فالنهاردة قيمة الشركات الموجودة في البورصة لازم قيمتها تعلى ، يعني النهاردة مثلاً اللي عنده عربية النهاردة قيمتها أغلى هي نفس العربية اللي أنت جايبها من 10 سنين راكنه تحت البيت النهاردة بشكل افتراضي كده سعرها أرتفع بمجرد أن قيمتها أو تكلفة الاستبدال بتاعتها أو قدرتك على تغيرها بعربية تانية جديدة بقت سعرها أغلى ففي إعادة تعديل للقيمة بيحصل بشكل تلقائي مع إنخفاض سعر العملة فأي حاجه عندك كانت تساوي 10 جنيه النهاردة بقت تساوي 12 جنيه 15 جنيه على حسب السعر الجديد بتاعها كام
فاللي عنده عقار النهاردة سعره غالباً أغلى من سعره قبل كده ، اللي عنده عربية النهاردة سعرها أغلى من قبل كده ، اللي عنده دهب سعره بقى أغلى فكل الأصول بيحصلها إعادة تعديل للقيمة الجديدة فده التأثير الإيجابي اللي بيجي من سعر الدولار على أسعار الأسهم عشان كده لو حد متابع أداء البورصة المصرية خلال الشهرين اللي فاتوا مع الخفض اللي حصل في سعر الجنيه المصري قصاد الدولار هتلاقي إن البورصة أرتفعت بشكل كبير جداً لأن في الأخر قيم الأسهم دي مينفعش تبقى الشركة مثلاً كانت قيمتها 150 مليون جنيه يعني 10 مليون دولار فمره واحده لو قيمتها بقت 250 مليون جنيه هي لازالت 10 مليون دولار لمجرد ان سعر العملة أتغير فده التأثير الإيجابي اللي بيحصل على أسعار الأسهم
عمر: الأسهم تعتبر من الأصول اللي بتحمي الأنخفاض في قيم العملة على المدى الطويل
مصطفى: طبعاً انت النهاردة عادة لما بيبقى في إنخفاض في سعر العملة إيه اللي بيحصل؟ هو الأنفخاض محصلش بسعر الحياة هو الانخفاض حصل في سعر العملة يعني الورقة اللي في أيدك دي هي اللي سعرها قل ده مش معناه إن في انخفاض حصل في القيمة بتاعة الحاجه نفسها فكل اللي معاه ورقه جنيه في أيده هو خسر لكن كل اللي معاه أصل مكانها هو نظرياً مخسرش لأنه في الأخر بيحصل زي ما قولتلك إعادة تعديل للقيمة فاللي عنده عربية وده مثال بضربه عشان كلنا عايشينه في مصر فأي حد في مصر عنده عربية كان شاريها من سنتين ومشي بيها 1000 كيلو النهاردة يبيعها ويكسب فيها أكتر بكتير من التمن اللي دفعوا فيها فاللي حصل ان الانخفاض في سعر العملة نفسها طول مانت معاك العملة فأنت بتخسر أو بتكسب على سعر العملة لكن لو معاك الأًصل مفروض الأصل يحصله إعادة تقييم
فاللي يحصل دلوقتي أن الأسهم دي تعتبر أصول تعتبر دي حصص في شركات فبيحصلها إعادة تقييم عشان كده أداء البورصة المصرية أرتفع جامد مع الإنخفاض اللي حصل في سعر العملة الفترة اللي فاتت فبيعوض الفرق اللي حصل في سعر العملة
عمر: وفي كلمة انت قولتها تكلفة الاستبدال لو حد النهاردة جاي عايز يفتح مصنع من الأول هو ده الاستبدال؟
مصطفى: بالظبط ، الاستبدال هو نفس الفكرة اللي كنت بضربهالك على فكرة العربية انت النهاردة عندك عربية كيا سيراتو أنت كنت جايبها بـ 100 ألف جنيه النهاردة انت تقدر تبيعها بـ 300 ألف جنيه مع انك جايبها بـ 100 ألف جنيه مش عشان هي تمنها زاد العربية بتاعتك انت شخصيا استهلكتها ولكن عشان تكلفة الاستبدال بتاعتها.. عشان تجيب واحده جديدة النهاردة بقى تمنها نص مليون جنيه فعشان كده أنت بتبيع بتاعتك بـ 300
نفس الفكرة المصنع النهاردة النهاردة انت عشان تعمل مصنع جديد وتأسسه النهاردة بالأسعار الجديدة وتشتري الطوب بالأسعار الجديدة والأسمنت بالأسعار الجديدة بتاعة النهاردة والحديد بالاسعار بتاعة النهاردة والمكن تستورده بالدولار بتاع النهاردة فده هيكلفك 100 جنيه مقابل انك كنت بانيه مثلاً بـ 20 جنيه بس زمان عشان الاسعار كانت رخيصة فالنهاردة عشان تعمل واحد جدي تكلفة استبدال القيمة بتاعته 100 جنيه فلازم يحصل انك تقرب شوية من القيمة الحقيقية للأصل بتاعك مش للقيمة التاريخية أو الدفترية اللي انت مأيدها عندك وشاري بيها
عمر: تمام .. طيب في شركات تانية بتستفيد في الأوقات دي؟ اللي هي شركات مصدره مثلاً؟ أو لو حد بيبيع بالعملة الصعبة أو بالدولار وهو في نفس الوقت مصاريفة بالجنيه هنلاقي الشركات دي مستفيده مظبوط؟
مصطفى: مظبوط ، أنا قولتلك أنك عندك شقين في شق اللي هو ان الأصول لازم سعرها يحصله اعادة تقييم شوية عشان في الأخر في استبدال للقيمة وفي تعديل ان الاصل ده لازم يحصله تطور في قيمته شوية بسبب ضعف الجنيه المصري فالمقابل بتاعه لازم يعلى
في بقى شركات بتستفيد مالياً وفي شركات بتضر مالياً ، تيجي مثلاً تقولي في شركة بتصدر فدي داخلها عملة صعبة وبتدفع التكلفة بالجنيه المصري فدي شركة هتستفيد ، في شركة تانية العكس شركة تانية بتستورد ومش عارفه تستورد والدولار تكلفته زاد عليها ومش عارفه ترفع أسعارها في مصر فالشركة بتضر مالياً وهكذا
فبتبدأ بقى تبص على شركات معينه بتسفيد وفي شركات معينه بتضر في قطاعات معينه بتستفيد وفي قطاعات معينه بتضر دي بقى بتبقى مرحلة أعمق شوية من التحليل عشان كده قولتلك ان في بعض الشركات هتستفيد مالياً وفي بعض الشركات هتضر مالياً لكن في أغلب الأحوال الأسهم بيحصلها إعادة تقييم طبعاً مش كلها بنفس النسب لأن الشركات اللي بتستفيد مفروض تستفيد أكتر كقيم عادلة والشركات اللي بتضر صحيح هتضر مالياً على المدى القصير بس برضه قيمتها بالجنيه بتتحسن شوية عشان هي فالأخر قيمتها الحقيقية تساوي أكتر من قيمتها الدفترية المكتوبة بالجنيه
عمر: أنا ديماً بحس ان الناس لو بصينا على أي إحصائيات أو لقينا الناس بتستثمر ازاي هنلاقي ديماً الناس بتخاف من الأسهم ومبتستثمرش في الأسهم يعني هدف برضه من أهداف البودكاست إن الناس تبتدي تفهم إن ده أصل من الأصول زي بيتك زي الأمثلة اللي انت بتضربها وخاصة لو عرفت تنقي القطاعات الصح أو الأسهم الصح ده كمان بيحطلك عوائد أعلى فالتجربة بتاعتك النهاردة اننا عايزين نشوف المستثمرين بيعملوا ايه وان شاء الله دي متبقاش أخر مره انت موجود معانا فيها اننا نتكلم بالشكل ده أو نتكلم حتى مع مستثمرين تانيين نشوف تجاربهم ونشوف هما بيعملوا ايه بيفكروا ازاي بيبصوا للشركة ازاي .. فتعالى كده لو عايزين نلخص حلقة النهاردة ايه النقط المهمه اللي اتكلمنا فيها لو عايزين في دقيقة نلخص التجربة كلها
مصطفى: والله بص هي زي ما أتفقنا يعني ان تقييمات بتاعة الأسهم دي حاجه مهمه جداً انك تبص عليها لأن في الأخر زي ما قولتلك ميزة السوق عن الشركات إن مش ديماً السعر بيعكس القيمة الحقيقية للأسهم لأن سعر الشركة أو سعر السهم في البورصة بيبقى نتيجة عوامل كتيرة أوي اغلبها الشرا والبيع أو الطلب والعرض على الأسهم فمش ديماً بتبقى فعالة فأحياناً كتيرة بيبقى السوق بيخلق فرص ساعات الأسهم بتداول بسعر أعلى من قيمتها العادلة وساعات السوق بيتداول بأقل من القيم العادلة للأسهم
عمر: طب النقطة دي تفتكر مصر دلوقتي برضه ده سؤال عام كده ، الأسهم بشكل عام بخبرتك كمستثمر بتداول أعلى من قيمتها العادلة انت شايفين ان مصر تعتبر سوق غالي ولا يتعتبر سوق رخص بيتداول أقل من القيم العادلة
مصطفى: لأ إحصائياً مصر النهاردة تعتبر من أقل مستوياتها التاريخية بالنسبة للقيم العادلة فالنهاردة مصر سوق رخيص إحصائياً بالمقارنة بنفس السوق في أوقات كتير تاريخية وبالمقارنة باسواق شبهه كتير في المنطقة أو بأسواق ناشئة بشكل عام فانت مصر كتقيمات عموماً للأسهم المقيدة فيها بتتداول بأرخص بكتير من الطبيعي بتاعها تاريخياً في مصر وبتداول بأقل بكتير من المؤشرات اللي بتداول عليها باقي اسهم العالم بالنسبة للأسواق الناشئة اللي شبهها
عمر: تمام ، أنا بسأل ديماً السؤال ده ليه لأن انت أيدك في الموضوع دي شغلتك انت شايف الشركات بتداول ازاي
مصطفى: بالظبط ، طبعاً اهم حاجه زي ما قولتلك انك تركز في تقييم الشركات اللي انت عارف انك بتشتري ايه تقرأ التقييمات اللي جايه لو انت قررت تشتري أسهم بعينها ، وانك متبقاش مضطر انك تشوف سعر السهم بيتحرك بشكل معين في توقيت معين انت لو شاري حاجه أرخص من تمنها فـ إن شاء الله المفروض في وقت ما هتعمل عليها فلوس كويسة وتوصل لتمنها بس أحياناً الوقت ده بيجي بدري بيجي متأخر على حسب الواردات الكتيرة اللي بتتغير في السوق نفسه وفي حركة السوق
عمر: انا كمان بنصح الناس ان لو حد مثلاً مش متفرغ بشكل كامل لو هو عمل استثمار مثلاً في صندوق استثمار او حط فلوس لحد دورهاله هو كده بياخد بشكل عام النمو بتاع السوق يعني لو قولنا ان مصر النهاردة من الأسواق الرخيصة فهو كده من خلال صندوق الاستثمار ده هيمتلك جزء من العوائد
لو حابب بقى تستثمر جزء من محفظتك في شركة معينة في قطاع معين زي ما انت قولت كده في قطاعات معينه بتزدهر في أوقات معينة وهو فاهم هو بيعمل إيه وأخد احسن شركة في القطاع ده وحط فيها فلوس أعتقد ده توازن لطيف غير لو حد شغلته بس انه بيحاول يحلل يعني أعتقد الموضوع ده صعب على الأفراد العادية
مصطفى: معاك حق وبصراحة كمان القرار الأسهل دلوقتي اني زي ما أتفقنا مع بعض إن إحصائياً السوق المصري النهاردة رخيص جداً فأنت مش محتاج تتعب نفسك اوي وتحاول تدور على سهم رخيص جوه السوق لأن السوق كله على بعضه بمجمله رخيص فأنت لو اشتريت السوق انت إلى حد ما في أمان على عكس ان في أوقات معينه السوق غالي في بعض الاسواق في المنقطة وبعض الاسواق العالمية تقييماتها عالية ومع ذلك فيها اسهم جوها رخيصة فساعتها القرار بيكون أصعب لأن انت مش عايز تشتري السوق كله لأن السوق غالي بس عايز تختار أسهم معينه فيمكن دي مش مناسب في المرحلة دي بالسوق أوي في مصر لأن السوق رخيص فانت مش محتاج تتعب نفسك اوي عشان تدور على السهم الرخيص اللي فيه فرصة لأن السوق كله على بعضه فيه فرصة فأنت خد في السوق وانت كده ان شاء الله هتكون في فرصة استثمارية كويسة من غير ما تتعب نفسك تدور على سهم بعينه
عمر: واحنا ديماً بنقول برضه انك عمرك ما هتستثمر مره واحده انت بتستثمر اجزاء بتحط ارقام صغيرة كل شوية يعني قصدي الناس مش لازم تكون في توجه معين كل حاجه لازم تبقى اسهم انا مش عايز كده انا عايز الناس تاخد الموضوع بمنتهى البساطة
أخر حاجه هسألك عليها يا مصطفى أوقات الخسارة انتو بتخشوا في أوقات بتبقوا خسرانين بتتعاملوا ازاي مع الخسارة نفسياً معنوياً ، الأفلام كلها القديمة الأبيض وأسود اللي هو راجل بيطلع انا خسرت كل فلوسي في سوق القطن
مصطفى: وينتحر عادة
عمر: آه ديماً بينتهي بالأنتحار كلمني كده على الخسارة وازاي بتتعاملوا مع الخسارة وبتحسوا بإيه والكلام ده يعني
مصطفى: بص زي ما قولتلك في نوعين من الخسارة في خسارة على الورق انت بتشوفها أحياناً ودي بتحصلنا كتير ساعات تشتري سهم وتلاقي نفسك بعد شهر خسران في السوق عشان في مشكلة حصلت ، الكورونا أثرت على أداء الشركة أو القطاع ، اصل دلوقتي في مستثمر أجنبي بيبع في السوق فالسهم نازل بغض النظر عن السبب دي خسارة غير مؤثرة لأنها خسارة ورقية انت محققتش خسارتك بالبيع فعلاً ، انت كنت شاري حاجه بـ 10 جنيه النهاردة تمنها بقى 8 جنيه فانت خسران 20% بس انت مبعتش ففي الأخر انت لسه محققتش خسارتك ، في يوم من الأيام السهم بقى بـ 15 جنيه فأنت كسبان 50% ونسيت خالص الـ 2 جنيه اللي نزلهم السهم وطلعهم تاني دول لأن انت محققتهمش فدي خسارة المفروض غير مؤثرة وعشان كده أنا كنت نصحت الناس من شوية ان اللي يخش ميحصلوش توتر بفكرة انا أمتى محتاج ابيع لو السهم نزل شوية أو لو السهم طلع شوية لأننا خلاص انا عارف انا شاري فين ورايح فين والهدف بتاعي ان الشركة دي تساوي كذا فأنا في مرحلة زمنية معينه هتخارج من السهم ده بالشكل ده فدي الخسارة
لكن أحياناً آخرى بتحصل خسارة حقيقية وده وارد في البورصة ووارد في الحياة بس الناس مبتحبش تشوف انت فالاخر ممكن تعمل مشروع وتفشل ، تخش تشارك واحد في شركة والشركة تفلس دي مواضيع بتحصل
عمر: الناس ديماً بتخاف تخش البورصة بس بمنتهى السهولة بيخش مع واحد صاحبه يعمل مشروع ويخسر كل فلوسه
مصطفى: بالظبط انت بتنسى هي فالاخر زيها زي بالظبط انك دخلت مع واحد صاحبك مشروع ، لكن حتى بقى الميزة في البورصة ان في افصاحات فديماً عارف أداء الشركة ، في مراقب حسابات بيحقق في أداء الشركة وبيفصحلك كل حاجه في أخبار بتطلع عن الشركة في تداولات موجودة كل يوم فأنت تقدر تقرر تخرج او تدخل في البورصة في اي وقت انت عايزة فدي أميز بكتير من الاستثمار في شركات مغلقة بس زي ما قولتلك ممكن يحصل فالاخر قرار مثلاً انت والله مستثمر في قطاع معين والقطاع ده أتاثر مثلاً زي ما في قطاعات معينة مثلاً اتأثرت جامد في وقت الكورونا انت خلاص اتاثرت مالياً واسعار الاسهم نزلت والكلام ده وقتها القرار الصعب والقرار الأصعب اذا كنت أنت بتعمل حاجه اسمها وقف خسارة اللي هو خلاص يا جماعة انا خسرت بس أنا قررت اتخارج من الاستثمار واحقق خسارتي هنا وانا مدرج اننا خسران في الاستثمار ده وهعوضها في حته تانية لأن خلاص الاستمرار في الاستثمار في هذه الشركة وهذا القطاع خطأ ، لو انت وصلت للنتيجة دي وده وارد وبيحصل عشان الناس لازم تبقى متفهمه ان ده جزء من تجربة الاستثمار في البورصة وتجربة الاستثمار عموماً انت واخد المخاطرة
هو على فكرة نظرياً حتى وانت مش حاطط فلوسك في البنك أنت واخد إلى حد ما مخاطر البلد أي بلد في الدنيا يعني فالأخر نسبة المخاطرة انت اللي بتحددها لكن ده وارد انك في الأخر تضطر يحصلك خسارة في الحالة دي انت بتقرر توقف خسارتك او تحقق خسارتك دي وتعوضها في حاجه تانية وده بيحصل كتير وحصل معانا مليون مره قبل كده ان انت تخش في استثمار والاستثمار مينجحش وتقرر انك تتخارج من الاستثمار ده وتخش في استثمار تاني المهم ان بشكل عام العائد بتاع استثمارك يبقى جيد ومفيش أي مستثمر فالدنيا مبيخسرش على فكرة يعني أنجح مستثمرين العالم بيعملوا استثمارات ناجحه واستثمارات فاشلة والشطارة انك في الأخر مجمل استثمارك مديك عائد كويس
عمر: وأنت لما تبدل استثمارك تاني بيبقى في يوميها او في اللحظة دي أنت بتبقى شايف ان الاستثمار الجديد هيطلع او الاداء بتاعه أوضح أو اسهل أو هيعمل فلوس أكتر من الأستثمار الاساسي اللي انت قاعد عليه انت حقيقة بتبدل حاجه بحاجه انت مش بتخرج وبتقعد بالفلوس كاش وتتخارج تماماً من فكرة الاستثمار يعني
مصطفى: بالظبط ، الموضوع مش انك بتزهق وتقول لأ خلاص أنا حرمت لأ خالص هو في الأخر دي كانت خطوة غلط وعلى فكرة في بعض الأحيان مبتبقاش خطوة غلط بيبقى في حاجه أتغيرت في المعطيات بتاعة قرارك الاستثماري مكنتش موجودة وانت بتاخد قرار الشرا ، إدارة اتغيرت قوانين اتغيرت ظروف عالمية اتغيرت أسعار مواد خام أتغيرت أياً كانت القصة غيرتلك أداء الشركة والمعطيات بتاعة قرارك الاستثماري اتغير ففي الحالة دي خلاص أنت ساعتها بتحتاج تاخد قرار جديد
طبعاً الموضوع مينفعش يبقى برضه متكرر ، اللي هو كل ما حاجه تحصل تشتري وكل ما حاجه وحشه تخرج لأن في الأخر في حاجات بتبقى تأثيرها سيء بس على المدى القصير بس فبيبقى المصلحة الأكبر انك تستحملها عشان كده بيبقى مهم انك لو قررت تستثمر في اسهم معينه ان يبقى في تحليلات مالية بتتابعها فتعرف في الأخر هل المشكلة اللي حاصلة في السهم ده هل دي مشكلة مؤثته ولا مشكلة هيكلية تستدعي التخارج من الاستثمار ده وفي فرصة أحسن
عمر: هي بس الفكرة ان الناس لازم تبتدي تتعامل مع الخسارة يعني المفهوم ده لازم يبقى في دماغ كل واحد يعني ممكن تبقى قاعد فترات وسنين ممكن تبقى قاعد خسران وممكن تبقى بتحوش في صندوق استثمار وهو بينزل عليك او في شركة او اي حاجه وبعد شوية الدنيا تتظبط والعوائد تجيلك كلها في سنين قصيرة يعني
مصطفى: طبعاً ده اسلوب حياة
عمر: بالظبط وانا حبيت اسمع من حد متمرس وحد بيشتغل الشغلانة دي ان ممكن ناس كتيرة اوي متعرفش ان في ناس شغلانتها اليومية انها تختار اسهم أو تستثمر او تستحوذ على شركات لأن اعتقد النماذج دي موجودة بسهولة في الميديا يعني وده هدف برضه ان احنا نحاول من خلال البودكاست ده نعرف الناس دي
طبعاً زي ما بنقول احنا هنسيب في الشو نوتس لو حد عايز يتواصل معاك لو حد عنده سؤال عايز يرجعلك بعد كده ممكن مره تيجي معانا نغطي مواضيع تانية زي مثلاً لو حد عايز يعرف ازاي ممكن تساعدة الشركات فإن شاء الله تيجي معانا مره تانية يا مصطفى ونتكلم في حاجات تانية مفيدة ان شاء الله وشكراً جداً جداً على وقتك ولو عايز تختم انا ممكن أخليك تختم انت النهاردة
مصطفى: تمام ، شكراً يا عمر جداً وزي ما أنت قولت اتمنى ان الناس تغير وجهة نظرها بالنسبة لمبدأ المكسب والخسارة لأن دي جزء من الحياة وأهم حاجه بس أنك تعرف استيعابك للمخاطرة وهو ده على اساسه اللي بتحدد بيه توزيع ثروتك او توزيع النقدية اللي معاك على أنواع اصول مختلفة سواء كنت سايبها في عملتك المحلية او عملة اجنبيه او في اسهم او في اصول عقارية فأنت بتبدأ توزعها بناءاً على المخاطرة بتاعتك عشان تبقى متأمن على المفاجأت اللي بتحصل بره ايدك بسبب التغيرات الكتير اللي بتحصل سواء داخلياً او خارجياً او إقليمياً او عالمياً في الفترة اللي فاتت دي
عمر: شكراً جداً يا مصطفى
مصطفى: شكراً يا عمر
شكراً جداً على وقتكوا لو وصلتوا معانا للحته دي لو عندك اي اسئلة تقدر تبعتلي أو تبعت لمصطفى احنا في الشو نوتس بنحط ازاي توصل لمصطفى يارب تكونوا اتبسطوا من الحلقتين دول واشوفكوا ان شاء الله الاسبوع الجاي
Translation of some words and terms:
position وضع
Access وصول
Efficiencies الكفاءة
management إدارة
Factors عوامل
outlook الآفاق
Long Term المدى الطويل
technically فنياً
reposition إعادة وضع
Assessment تقييم
By Default بشكل افتراضي
Replacement cost تكلفة الاستبدال
Readjustment of Value إعادة تعديل القيمة
Assets أصول
Depreciation الاستهلاك
Equivalent مقابل
Efficient فعالة
Imports الواردات
Capture يمتلك
Returns عوائد
Balance توازن
Relevant ذو صلة
Target الهدف
Frequent متكرر
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #حوار_مع_مستثمر #الجزء_الثاني