85. حوار مع مستثمر - اكت فاينانشال - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة معانا مصطفى عبد العزيز، مصطفى مش أول مرة يكون ضيف معانا في كلام ينور
لقائنا الأول بـ مصطفى كان في حلقة (يوفوريا) كانت حلقة جميلة اتكلمنا عن علاقة اليوفوريا بالمجال المالي ، النهارده بنتكلم مع مصطفى - الشريك المؤسس والعضو المنتدب لشركة أكت فاينانشال - وبنعرف منه أكتر عن طبيعة شغله كمستثمر محترف في السوق المصري
مصطفى عبد العزيز
شريك إداري ومؤسس لشركة ACT Financial
خبرة أكتر من 18 سنة في أسواق رأس المال في مصر والشرق الأوسط وشمال إفريقيا.
Mostafa Abdelaziz @LinkedInتقدروا تتواصلوا مع مصطفى على
ممكن تدينا خلفية سريعة كده عن "أكت فاينانشال" بتعملوا إيه؟
انت مستثمر عندك رأس مال شركتك وبتجيب رؤوس أموال تانية تستثمر معاك وتشتروا شركات.. مظبوط كده؟
إيه نوعية الشركات اللي انت بتستهدفها في الشراء بتاعك؟
لو استحوذت على 50% من الشركة تبقى كده حصة حاكمة؟
لو عندك حصة حاكمة بتبقى شريك وعندك كرسي على مجلس الإدارة وممكن تساعدهم في الإدارة؟
ازاى بتحدد المدة الزمنية في الاستثمار بتاعك؟
لما بتشتري أكتر من 5% من الشركة لازم تعمل إفصاح في السوق؟
هل المعلومات دي متاحة للناس أي حد يقدر يدخل على موقع البورصة يشوف الميزانية بتاعة الشركة؟
الاستحواذ اللي حصل على تويتر مؤخراً هو نفس الفكرة تقريباً؟
إيه الخطوات اليومية اللي بتمشوا فيها عشان تشتروا شركة جديدة؟
كلمنا أكتر على شخصية المحلل المالي؟
موجود حالياً منصات بتجمع آراء المحللين الماليين تقدر تتابعهم أونلاين؟
انتظروا الجزء الثاني من حوارنا مع مصطفى الأسبوع القادم
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
عمر: اهلاً بيكوا في حلقة جديدة من بودكاست كلام ينور ، النهاردة أنا معايا مصطفى عبد العزيز ، مصطفى هو شريك مؤسس لشركة أكت فاينانشال وهو العضو المنتدب
مصطفى النهاردة جاي معانا بصفته مستثمر وخاصة انهم مركزين على السوق المصري ، كنت برضه حابب أتكلم مع مستثمرين من وقت للتاني عشان أدي للناس كده فكرة ازاي المحترفين بيدوروا المحافظ بتاعتهم ، الأفكار ، الحاجات اللي بيمروا بيها فيارب الحلقة دي تكون مفيدة للناس اللي بتسمعنا
احنا هنقسم الحلقة دي على جزئين النهاردة الجزء الاول يارب تستمتعوا بيها
01:27
عمر: اهلاً بيك مرة تانية يا مصطفى أنت النهاردة معايا بصفة تانية غير المرة اللي فاتت ، المرة اللي فاتت كانت حلقة جميلة جداً وكنا بنتكلم على شخصية النهاردة أنت معايا بصفتك مستثمر وكنت عايز أبتدي سلسلة كده إني أتكلم مع ناس بيستثمروا مباشرة في الأسواق لأن أنا بحس إن الأمثلة دي والنماذج دي بتفيد ناس عايزة تبتدي حياتها في طريق الاستثمار
فأولاً برحب بيك.. أهلاً بيك معانا النهاردة
مصطفى: أهلاً بيك يا عمر وانا متابع البودكاست وماشاء الله شغال كويس جداً وبيضيف قيمة لناس كتير فشرف ليا أكون فيه ونتكلم إن شاء الله على تجربة الاستثمار في مصر وفي الأسواق عموماً يعني
عمر: ربنا يخليك يا مصطفى شكراً جداً وأنا سعيد جداً كالعادة يعني إن انت معايا النهاردة ، طبعاً احنا بره البودكاست بنتكلم وشوفت معلومات كتير جداً شايف إن الناس لو سمعتها ممكن تبقى مفيدة فأتمنى تكون حلقة مفيدة إن شاء الله
02:34
عمر: أنا عارف أنك كنت بتشتغل في مجال ، المجال المالي طبعاً بس قصدي في نوع معين من الشركات وبعدين تحولت مؤخراً - مؤخراً ده اللي هي كذا سنة برضه - لأكت فاينانشال
كلمني أولاً كده إيه هي أكت فاينانشال وبتعملوا ايه يعني بحب أخد خلفية كده عن الشركة الأول
مصطفى: خليني سريعاً اقولك مرحلة التحول اللي أنت قولتها دي ونشرح شوية للناس مرحلة التحول اللي أنا عملتها من تجربة البيع إلى تجربة الشراء ، ودي يمكن حاجه معرفش انت اتكلمت فيها قبل كده ولا لأ بس أنا كنت شغال في مجال السمسرة اللي هو انت بتسوق لأسهم أو بتبقى سمسار تداول ما بين البائعين والمشترين اللي في سوق الأسهم فده يعتبر في جاب البيع الناحية اللي بتسوق للاستثمار للغير وتحولنا بعد كده لما أسسنا شركة أكت فاينانشال من حوالي 8 سنين نبقى في جانب الشراء يعني بقيت أنا المستثمر مش أنا اللي بسوق للمستثمر بمعنى إن شركة أكت فاينانشال هي شركة استثمار بتستثمر مباشرة في فئات أصول مختلفة في الأسهم وهشرح أكتر إيه نوع الاستثمار اللي بنعمله وإيه طريقة الاستثمار اللي احنا متخصصين فيها بس حبيت الأول أدي مقدمة على فكرة التحول من جانب البيع إلى جانب الشراء من خدمة المستثمرين لـ الاستثمار في نفسك
04:03
عمر: تمام.. فأنت النهاردة مستثمر ، يعني هنعتبرك مستثمر عندك رأس مال شركتك أو بتجيب رؤوس أموال تانية معاك بتستثمر وبتشتروا شركات.. صح كده؟
مصطفى: بالظبط كده ، أكت فاينانشال احنا مأسسينها فيها مجموعة من المساهمين ، المساهمين دول حاطين رأس مال ورأس المال ده بيستثمر رأس مال الشركة دي في استثمارات بشكل مباشر واحياناً بيبقى في تحالفات مع مستثمرين آخرين بحيث اننا نبقى بندير استثمارنا كرأس مال الشركة زائد اننا بننسق أو بنخش في تحالفات مع مستثمرين آخرين وهضرب أمثلة توضح التحالفات دي دلوقتي في استثمارات معينة
04:46
عمر: طيب سؤال قبل ما نخش هنا هل الشركات اللي انت بتشتريها دي هل هي مثلاً أفكار مشاريع خاصة ولا حاجات موجودة على البورصات يعني إيه نوع الشركات اللي انت بتستهدفها في الشرا بتاعك؟
مصطفى: بص احنا التفويض بتاعنا واسع فيه كذا فئة أصول بس احنا قررنا الفترة اللي فاتت دي من ساعة ما أسسنا الشركة دي اننا نركز في المرحلة دي في مصر ويمكن هتكلم برضه ليه اخترنا المرحلة دي في مصر وبنركز على فئة الأصل دي على حاجه اسمها
Private Investment in Public Equity (PIPE)
إن احنا بناخد حصص كـ استثمار خاص بس في أسهم مقيدة فبناخد الأسهم المقيدة ونعمل فيها نفس موقف الأسهم العامة إني باخد أسهم عادة بتبقى حصة أقلية عشان الأسهم مقيدة فمبيتسيطرش عليها فبناخد حصة أقلية مؤثرة في الشركات المقيدة سواء باخد الحصة دي برأس مال الشركة أو بأخد حصة برأس مال الشركة واخش في تحالفات مع مستثمرين آخرين يكون عندهم حصص في شركات المستهدفة اللي احنا بنستثمر فيها بحيث التحالف ده على بعضه يبقى عنده حصة مؤثرة ليست حاكمه ولكن مؤثرة بحيث يبقى في نوع من أنواع الاستثمار النشط اننا يبقى لينا دور في الشركة حتى لو احنا معندناش حصة حاكمة في الشركة بس بالسيطرة على حصة أقلية كبيرة في الشركات المقيدة بتقدر تأثر بطرق مختلفة وبرضه هحكيلك أمثلة يعني يعني في باقية الحلقة على بعض الاستثمارات اللي عملناها ازاى يبقى ليك دور في الاستثمار ده في التغير أو في التأثير على شكل أداء السهم في البورصة
06:33
عمر: الحصة الحاكمة اللي هي مثلاً 50 / 60 / 70 % مثلاً من الشركة؟ يعني أنت لو استحوذت على 50 / 60 % يبقى كده حصة حاكمة مظبوط؟
مصطفى: بالظبط ، احنا عادةً الحصة الحاكمة بتبقى فوق الـ 50% أي حد فوق الـ 50% بيبقى نظرياً عنده أغلبية فعنده سيطرة على مجلس الإدارة ، وسيطرة على التصويت فبيقدر ياخد معظم القرارات اللي في الشركة
في حصة حاكمة بيبقى فيها حاجه اسمها الأغلبية العظمى لو عندك أكتر من 75% بيبقى عندك تحكم أكبر وأكبر في الشركة وبيبقى عندك حقوق أغلبية أكتر شوية من لو عندك 50%
في الشركات المقيدة عادةً بنفضل اننا نستحوذ على حصص أقلية لأن الشركات المقيدة في السوق المصري يمكن بتختلف القواعد شوية من سوق لسوق بس السوق المصري طول ما انت عندك حصة أقل من 30% فأنت أقلية لو طلعت فوق الـ 33% بتعمل عرض شراء إجباري تشتري الشركة كلها فـ بتاخدها بره البورصة أو بتقلل وجودها في البورصة ودي بتبقى سكة تانية فعشان كده احنا بنفضل ديماً يبقى عندنا حصة أقل من 33% فتعتبر حصة أقلية ولكن عادة بتكون أقلية مؤثرة لأن الشركات اللي احنا بنستثمر فيها بيبقى فيها عدد كبير من المستثمرين والحصص متوزعة على مستثمرين كتير فحصة الأقلية بيبقى ليها تأثير شوية عـ المساهمين يعني
07:55
عمر: يعني مثال الحصة مثلاً عشان برضه الناس تبقى فاهمه كمثال رقمي كده لو الشركة بـ 100 مليون جنيه أو القيمة السوقية بتاعتها بـ 100 مليون جنيه وأنت واخد مثلاً 20% من الشركة دي معناها انك دفعت 20 مليون جنيه في الأسهم .. وأنت بتقدر تاخد مثلاً كرسي على مجلس الإدارة وتبقى شريك كبير تاخد كرسي على مجلس الإدارة أو تقدر تكلم الإدارة انهم مثلاً يحسنوا في الأداء في حاجة معينة انت شايفها وبتساعدهم في الإدارة.. مظبوط كده؟
مصطفى: بالظبط كده هي دي الفكرة بالظبط ، دى نفس فكرة الاستثمار المباشر بس ميزتها شوية عن الاستثمار المباشر في رأينا كذا حاجه
أول حاجه ان المرحلة دلوقتي في البورصة في السوق المصري يمكن لو حد متابع البورصة خلال الـ 10 سنين اللي فاتوا أداء السوق المصري كان ضعيف جداً فأسعار الشركات كانت رخيصة جداً ، يمكن الفترة اللي فاتت السوق بدأ يتحسن شوية بعد ارتفاع سعر الدولار و هنشرح برضه إيه اللي حصل لكن أسعار الأسهم كانت رخيصة جداً ، كان أرخص لك كتير أنك تلاقي فرص استثمارية بأسعار قليلة في البورصة عن انك تلاقيها في شركات غير مقيدة كاستثمار مباشر
يعني على سبيل المثال أوضحلك الفرق ، انت لما بتيجي تروح لحد عنده شركة وتقوله والله أنا عايز أشتري شركتك أو عايز اشتري حصة في شركتك لو الشركة ماشية كويس هيقولك والله أنا شركتي تساوي 100 جنيه فلو عايز تشتريها اشتريها بـ 100 جنيه دي قيمتها العادلة
في البورصة في بعض الأحيان لما يبقى السوق وحش عشان في أجانب بتبيع أو في بعض الصناديق بتسيل بعض الاستثمارات أو في ضعف سيولة لأي سبب من الأسباب فأحياناً بتبقى أسعار الأسهم شغالة في البورصة على قيم أقل من قيمتها العادلة فأنا بالنسبالي دي بتبقى فرصة أسهل اني أخش على شركة كويسة وميزانيتها كويسة ، ادائها المالي كويس وفي نفس الوقت سعرها غير عاكس للقيمة الحقيقية للشركة دي مش بسبب ضعف أداء الشركة بس بسبب عدم الكفاءة في أداء السوق نفسه فالحركة بتاعة السوق دي بتخلق فرصة تقييم كويسة للأسهم دي إني أدخل أخذ حصص فدي أول ميزة في اني ادخل اخد حصص في الشركات المقيدة عن الشركات الخاصة
تاني ميزة أني باخد حصة أقلية في الشركات المقيدة أسهل بكتير لأني في الأخر لو اختلفت لو معجبنيش الاستثمار لو حصل أي حاجه أقدر أبيع بسهولة في البورصة مش هحتاج يبقى عندي مشكلة سيولة وأنا في شركة غير مقيدة فدي ميزة تانية
تالت ميزة إن الشركات المقيدة أغلبها مبيبقاش فيها تحكم من مستثمر بعينه يعني بيبقى في هيكل ملكية مجزأ فواحد عنده 10% ، واحد عنده 5% وواحد عنده 3% فهي الشركة مش بتاعة حد فأنت بمجرد انك اخدت حصة صحيح هي حصة أقلية بس ممكن تلاقي نفسك أكبر شريك في الشركة فبيبقى عندك تأثير أكبر على الشركة ده طبعاً صعب تلاقيه في شركات غير مقيدة
برضه من الحاجات المهمة أوي في الشركات الغير مقيدة هي سهولة الفحص النافي للجهالة اللي انت تقدر تعمله على الشركة كل المعلومات منشورة قدامك تقدر تذاكر الشركة من غير حتى ما تكلم الشركة ومن غير حتى ما تكلم صحاب الشكرة ولا إدارة الشركة بحيث متعملش دوشة على الفاضي أنت تقدر تذاكر الشركة وتشوف ادائها المالي لأن طبعاً في إفصاحات على الشركات المقيدة في البورصة فبتقدر تعمل البحث بتاعك كله إلى حد كبير بطريقة سهلة فأحنا لقينا ان كل ده نموذج عمل لطيف ومناسب للمرحلة فعشان كده اشترينا حصص في شركات كتير مقيدة على مدار الـ 7 سنين اللي فاتو من ساعة ما أسسنا الشركة في 2015 وممكن اشرحلك أكتر بعض الأمثلة على استثمارات أخدنا الحصص ايه وعملنا ايه وكان إيه الدور بتاعنا في الاستثمارات اللي عملناها في السوق المصري
11:54
عمر: لو في مثلاً معلومات عن شركات أو فرص دخلتها يعني أنتو بتركزوا على شركة معينة بتعملوا الفحص بتاعكوا والتحليلات بتلاقوا ان القيمة العادلة أعلى من القيمة اللي في السوق وبتخش تاخد حصة ، ممكن تقولنا كده على حاجات حتى معروفه أو كان فيها إفصاح أنكو اشتريتو مثلاً اشتريتوا حصص ودخلتوا وخرجتوا برضه للناس اللي هي يعني أنا ديماً بنصح الناس وخاصة الغير متفرغة انها تشتغل (سلبي) أكتر تشتري مثلاً مؤشر في سوق معين أو تشتري صندوق استثمار بس برضه الهدف من الحلقة دي إن الناس اللي بتبص على شركات بعينها أو عايزة تاخد حصة في قطاع معين عاجبها عايز اسمعهم برضو وجهة نظر المستثمر بيبص على إيه ، بيدور على إيه الكلام ده كله يعني.. فممكن نبتدي بحاجه كنتو عملتوها أو حاجه معروفة معمولها إفصاح في السوق
مصطفى: أكيد ، هشرحلك بعض الأمثلة على الاستثمارات اللي عملناها وتم الإفصاح عنها في السوق بالفعل وحتى يمكن تخارجنا منها برضه يعني أول حاجه عملناها كانت الاستحواذ على حصة أقلية في شركة بلتون المالية واحد من بنوك الاستثمار في مصر ، كانت نفس الفكرة كنا شايفين خطة معينة أو طريقة معينة نقدر نحسن بيها أداء الشركة وبرضه على سبيل المثال اللي انا كنت بشرح لك فيه فكرة التحالف قدرنا نكون تحالف مع شركة أوراسكوم المالية اللي هي الذراع الاستثماري للمهندس نجيب ساويرس وكونا التحالف ده واستحوذنا على حصة كانت أكت عندها حصة أقلية وأوراسكوم كان عندها حصة أغلبية وتم التنسيق مع التحالف ده للاستثمار في 2015 بعقد تحالف لمدة 4 سنين وتخارجنا بالكامل من الاستثمار في 2019 ده طبعاً كان أول استثمار عملناه وده مفصح عنه
برضه في استثمار تاني عملناه ممكن يوضح المثال شوية احنا اخدنا نفس الفكرة بتاع شركة يكون هيكل ملكيتها مفكك ومفتت ما بين ناس كتير كانت شركة سوديك العقارية أحد أكبر المطورين العقاريين في مصر استحوذنا في سنة 2021 على حصة أقلية في شركة سوديك وتحالفنا مع بعض المستثمرين شركة حسن علام العقارية وشركة كونكريت بلس للمقاولات وهما شركات عاملة في المجال فبالنسبالهم كان الاستثمار في شركة سوديك استثمار منطقي وبيكملهم نموذج العمل بتاعهم وانا بالنسبالهم كنت شريك مالي بيديهم خلفية مالية مش عندهم وهما كانوا شريك استراتيجي بيدوني خلفية عقارية مش عندي و قدرنا نكون التحالف وصل يبقى عنده 18% من شركة سوديك ودي كانت أكبر حصة في الشركة باقي الحصص كانت متوزعة على مساهمين كتير حد عنده 12% حد عنده 9% حد عنده 7% متوزعة على عدد كبير من المستثمرين
عمر: يعني هنقول للتبسيط سوديك عندها 100 سهم ، أكت كان عندها مع التحالف بتاعها 18 سهم ، يعني كل 100 سهم عندكو 18 منهم ، والراجل اللي وراكم عنده 12 وهكذا لحد ما تتفتت وتنزل للمستثمرين الصغيرين صح كده؟
مصطفى: مظبوط ، فأنا حصة أقلية صحيح بس أنا أكبر مساهم في مساهمين الشركة فطبعاً بيبقى ليك دور إلى حد ما مؤثر في أنك تقدر تتكلم مع إدارة الشركة ، تقدر تقترح عليهم بعض الاقتراحات تقدر تتكلم مع مساهمين استراتيجيين أو شركات استراتيجية ، طبعاً تواجدنا في السهم وتواجد التحالف في السهم والاستثمار النشط شجع حتى مستثمرين استراتيجيين من المنطقة على الاستثمار في الشركة فجه بالفعل عرض شرا من شركة الدار العقارية على شركة سوديك وبالفعل تم تنفيذ الصفقة واحنا تخارجنا كتحالف كله في عرض الشرا ده فكان واحد من الاستثمارات الواضحة على فكرة انك تلاقي سهم بيتداول بأقل من قيمته العادلة وانك يبقى ليك دور نشط جوه الشركة دي في تطوير أدائها وتحسين صورتها قدام المستثمرين وفي أن انت تكون تحالف مع شركاء استراتيجيين وفي إدارة عملية الاستثمار وان احنا تخارجنا والحمد لله عملنا عائد كبير على الاستثمار
لأن احنا دخلنا في وقت كويس السوق نفسه كان مسعر السهم بأقل من القيمة العادلة مش عشان الشركة عندها مشكلة مالية أو مشكلة في الأداء المالي بتاع الشركة ولكن زي ما قولتلك مشاكل هيكلية في أداء البورصة نفسها عدم توافر سيولة ، تخارج بعض المستثمرين الأجانب لعدم توافر عملة او القلق على أي حاجة دي كانت الفرصة يعني والحمدلله قدرنا نحقق عائد كبير على الاستثمار
17:17
عمر: المدة اللي أنتو بتستثمروا فيها قد إيه؟ يعني أنت لم بتبص على فكرة بتبقى داخل وعايز تقعد في الفكرة بتاعتك دي قد ايه؟ سنة سنتين خمسة 6 شهور! يعني ازاي بتحدد المدة الزمنية في الاستثمار بتاعك؟
مصطفى: بص هو الاستثمار في سوق الأسهم المقيدة هي أنك تقدر تبقى مرن أكتر في المدة الزمنية اللي انت بتبقى مستهدف الاستثمار فيها بمعنى انك لو بتشتري في استثمار مباشر في شركة غير مقيدة مثلاً فالتخارج بتاعك عادة بيبقى من 5 لـ 7 سنين عشان تفكر في عملية التخارج تكون قدرت تلاقي مستثمر استراتيجي يشتركي منك حصتك أو قدرت تطرح السهم في البورصة بحيث ان انت تعرف تلاقي سيولة تتخارج عليها في البورصة المدة الزمنية انك تتخارج في السوق بتبقى اسرع شوية
فعادة احنا الهدف بيبقى من سنتين لتلاتة نكون قدرنا يبقى لينا دور أكبر شوية في الاستثمار ، قدرنا نطور شوية من أداء الشركة ونحسن من أداء السهم نكون عدينا في دورة معينة في البورصة قدرنا نحقق فيها عائد كويس على الاستثمار ونتخارج
فعادة بيبقى من سنتين لتلاتة ممكن يزيد ويقل حسب تطورات الأحداث بس ديماً السيولة متوفرة في سوق الأسهم فالمدة الزمنية القرار فيها بيبقى قرار مرن تقدر تطوله أو تقصره بمزاجك لأن السيولة ديماً موجودة
18:48
عمر: فأنت مثلاً في المثال بتاع سوديك من ساعة ما دخلتوا وتخارجتوا تقريباً كان قد إيه؟
مصطفى: سوديك احنا قعدنا سنة بس لأن حصل في النص عرض الشرا اللي جه لما جالك عرض الشر حصل تغير استراتيجي في الشركة لأن شركة الدار استحوذت على حوالي 85% من شركة سوديك
19:08
عمر: فالدار هنا جاية عايزة تشتري الشركة كلها وعايزة تدير وعايزة تعمل كل حاجه تبقى بتاعتها صح كده؟
مصطفى: بالظبط كده ، فغيرلي خطتي في الشركة عشان كده زي ما بنقول
A good Problem to Have
لأن احنا صحيح كان عندنا خطة اننا نقعد سنتين تلاته بس جالي مستثمر اشترى بسعر أغلى بكتير من سعر السوق لأن عادة عروض الشرا بتيجي على قيم إلى حد ما قريبة من القيم العادلة للشركة بتعكس قيم أعلى من القيم المتداولة في البورصة فداني فرصة أتخارج بدري شوية بس الحمدلله بس الحمدلله حققنا عائد كويس على الاستثمار فدي مثلاً حاجه سرعت الأداء
في بلتون مثلاً احنا قعدنا 4 سنين ، يعني الأتفاق مع التحالف اوراسكوم اننا نقعد 4 سنين كان في عقد إدارة بشكل معين ، القصة كان ليها شكل مختلف شوية وبعد كده تخارجنا فهي كل بيبقى ليه ظروفه بس زي ما بقولك ميزة الاستثمار في سوق البورصة انك في أي وقت حبيت تتخارج من الاستثمار في الأخر السيولة قدامك على الشاشة تقدر تدير عملية التخارج بتاعتك
20:15
عمر: تمام.. والحاجات دي بيبقى فيها إفصاح يعني أنت لما بتطلع فوق نسبة معينة في السوق - أعتقد في السوق المصري بتبقى 5% - بتشتري أكتر من 5% من الشركة لازم تعمل إفصاح مظبوط؟
مصطفى: بالظبط ، انت بتفصح ديماً عن شرائك أنت وأي مجموعات مرتبطة فاحنا ديماً بنفصح على طول بشكل دوري عن الأسهم بحيث الناس تبقى عارفه برضه ان في تحالف بيشتري للشركة دي الناس دي عندها خطة معينة ففي بقى جدول زمني للإفصاح ونسب معينة بشكل معين كل 5% بتفصح ، 10% بتفصح ، 15% بتفصح ، 20% تفصح وبعد كده تبدأ تفصح عن نيتك للبورصة اذا كنت ناوي تكمل ، هل عندك خطط استحواذ ولا لأ
بعد الـ 20% بتتعامل معاملة مجلس الإدارة حتى لو انت مش على مجلس الإدارة فلازم تفصح قبل الشرا وقبل البيع .. يعني ليها طرق معينة للإفصاحات بحيث السوق يبقى عارف ان في مستثمر كبير بيشتير حصة كبيرة في الشركة حتى لو هي حصة أقلية بس يبقى في شفافية في التغير بتاع هيكل الملكية ده بشكل دوري
21:20
عمر: والمعلومات دي موجودة على الموقع بتاع البورصة وفي الميزانية بتاعة الشركة والكلام ده كله صح؟ يعني أي حد يقدر يدخل ، النهاردة مثلاً شركة أياً كان سوديك كمثال انت قولت عليها ، دخلت على الميزانيات بتاعة سوديك هلاقي سوديك مفصحة أن الدار تمتلك 85% منها
مصطفى: آه طبعاً بيتم الافصاح في الميزانيات وحتى قبل الميزانيات هو بمجرد الوصول للنسب لازم الإفصاح ينزل في يوميها على طول فبينزل على شاشات البورصة وكل الشاشات بتاعة أخبار الأسهم يعني في منصات اللي عليها الاسهم وعليها الأخبار بتاعة الأسهم والمواقع بتاعة الشركات نفسها فبيحصل بشكل دوري بمجرد ما بيتم الافصاح عن الوصول لنسبة بتنزل على كل الشاشات بتاعة أخبار السهم نفسه
22:13
عمر: أنا برضه هدي مثال كده يمكن الناس عرفاه مؤخراً الاستحواذ اللي حصل على تويتر هو تقريباً نفس الحاجه هو يمكن هنا إيلون ماسك اخد نسبة مش أقلية أخد الشركة كلها شركة مقيدة على البورصة حط عرض شرا ودخل خدها فأعتقد هي نفس الطريقة؟
مصطفى: مظبوط يعني الفرق الوحيد بس زي ما انت قولت اننا بنشتغل على حصة اقلية وهو أخد حصة أغلبية ويمكن الفرق كبير في الاستثمار بعد كده لأن انت لما بتستحوذ على حصة أغلبية خلاص الشركة بتبقى شركتك فأنت بتديرها وبتدمجها جوه أرقامك خلاص بتعتبر استحواذ على الشركة بالكامل حتى لو لم تمتكلها بالكامل بس بمجرد انك استحوذت على حصة أغلبية بتبقى خلاص جزء من نشاطك
لكن حصص الأقلية أقرب شوية لنموذج وارن بافت لو حد من المستمعين متابعة ده من أشهر المستثمرين في العالم عنده نفس الفكرة بيستحوذ على حصص أقلية في شركات مقيدة فعنده حصة كبيرة في شركة آبل ، عنده حصة في شركة كوكاكولا وهكذا وموجود عليها على المدى الطويل والشركات موجودة في البورصة وفي نفس الوقت هو عنده حصص أقلية فيها فده نوع من أنواع الاستثمار في الأسهم المقيدة بالأقلية شوية مختلف عن نموذج الاستحواذ الكامل اللي عمله إيلون ماسك أو اللي عملته شركة الدار على شركة سوديك في المثال اللي انا عملته
23:50
عمر: هنا المثال الدار زي ماسك في تويتر كده هما اشتروا حصة حاكمة كبيرة وهو عمل نفس الحاجه يعني
مصطفى: بالظبط
24:01
عمر: تمام ، كده احنا اتكلمنا على التاريخ اللي حصل ، تجارب أنت عملتها ، طيب تعالى نقول النهاردة لو انت لسه جاي تشتري شركة جديدة وأعتقد دي حاجه أنتو بتعملوها على طول ممكن تكلمني على الطريقة اللي بتبصوا بيها على الشركات اولاً ازاي بتشوف الشركات الموجودة في السوق اللي انت عايز تشتريها بتعملوا ايه وبعد كده لما بيقع أختياركوا على شركة معينة ايه الخطوات اللي انتو بتاخدوها عشان تشتروا وبعدين ازاي بتشتروا يعني امشي معايا كده في الخطوات اليومية بتاعتك؟
24:37
مصطفى: بص هو في كذا معيار بنبص عليه ومتهيقلي دي أي مستثمر بيعملها وفي حاجات مناسبة أكتر للمستثمر النشط اللي هو ليه دور فيما بعد الاستثمار بس في خطوات كل المستثمرين بيعملوها كده كده عشان يستثمر في أي حاجه
ففي خطوات معينة زي مثلاً اننا بنعمل مسح للسوق نشوف فرص معينة في قطاعات معينة أحياناً بنبقى مركزين على قطاعات معينة شايفين مثلاً ان في فرصة في قطاع معين في الفترة دي نتيجة حاجه احنا شايفنها في القطاع ده شايفين اننا هنستفيد منها في الفترة اللي جاية عايزين نبقى متواجدين في القطاع ده و ده اللي بنسميه النهج من أعلى إلى أسفل بمعنى انك بتشوف الصورة الأكبر الأشمل وبعدين تبدأ تعمل تركيز وتكبير على الفرصة الموجودة في المحيط اللي انت بتدور عليه
زي مثلاً لما تقول انا عايز استثمر مثلاً في قطاع التعليم في مصر ، انا عايز استثمر في قطاع البنية التحتية لأني شايف أن في بنية تحتية كبيرة بتحصل في مصر دلوقتي فأنا عايز أبقى واخد عرض للاستثمار ده على سبيل المثال
فده اللي بنسمية من أعلى إلى أسفل ، ماخترتش الشركة انا اخترت القطاع اللي أنا عايز استثمر فيه وبعدين ابدأ أدور جوه هذا القطاع مين أكتر شركات ممكن أستفيد منه وبعدين نبدأ نركز على الشركة المستهدفة ونشوف الشركات اللي يكون فيها اتجاه صعودي مهم للقيم العادلة بتاعتها ، القيم العادلة كده كده في افصاح من معظم بنوك الاستثمار وشركات السمسرة اللي عندها مراكز بحوث بتصدر قيم عادلة للشركات فتقدر بسهوله تشوف رأي المحلل المالي في الشركة دي إن السهم ده والله سعره النهاردة جنيه بس المحلل شايف انه يساوي 2 جنيه فأنت كده عندك صعود 100% للقيمة العادلة فأنت شايف السهم ده النهاردة بيتداول أقل من قيمته فبيشجعك
بالإضافة إلى إن في تحليلات وتقييمات للأسهم الموجودة في السوق احنا بنعمل عندنا داخل الشركة من فريق المحللين اللي عندنا بحيث اننا نتأكد اننا حاطين افتراضات معينة على أداء الشركة وأداء القطاع في المستقبل بحيث اننا نوصل لقناعة معينة على التقييم بتاع الأسهم دي
ومن ضمن المعايير اللي بنبص عليها كويس هي هيكل الملكية بتاع السهم ده مين اللي بيمتلك السهم ده ، السهم ده فيه سيولة عاملة ازاي ، بيتم التداول عليه بشكل كبير كل يوم ، هل نقدر نستحوذ على حصص كبيرة في السهم ده ولا في بعض المستثمرين مستحوذين على أغلبية حصص الشركة فيبقى في الأخر صعب علينا اننا نستحوذ على حصص كبيرة في الشركة دي دي برضه من المعايير المهمه
وكل ما هيكل الملكية بيبقى مفتت على مجموعات كبيرة ومتعددة من المستثمرين كل ما بيسهل دورنا اني ابقى مؤثر لاني لو موجود في شركة مملوكة منها 70 أو 80% لمستثمر واحد ففي الأخر هو اللي بيبقى متحكم في الدفة بشكل أكبر فأنت دورك بيبقى أقل وأقل عكس اللي هيكل ملكيته متوزع على مساهمين كتير فأنت بيبقى تواجدك أكبر ودورك مؤثر بشكل أكبر
28:00
عمر: طب أنا هقف عندك هنا معلش في حتة انت قولت القيم العادلة وفي محللين بيغطوا الشركات يعني انتو بتعتمدوا على الحاجات الداخلية وفي نفس الوقت بتشوف السوق بيقول إيه.. ممكن معلش تكلم الناس شوية عشان ممكن الناس متبقاش عندها خلفية اوي يعني إيه محلل مغطي الشركة؟
مصطفى: بص هو اللي بيحصل إيه في حاجه اسمها تقييم في الشركة إن كل شركة ليها قيمة عادلة ، القيمة العادلة دي نسبية يعني كل محلل بيقعد يدرس الشركة ويطلعلها قيمة عدلة في طرق كتير للتقييم ممكن نتكلم عليها في فرصة تانية لكن في الأخر الخلاصة انه بيوصل يقولك قيمة الشركة دي تساوي مليار جنية ، الشركة دي تساوي 10 مليون جنية ، قيمة الشركة على بعض النهاردة تساوي كذا فمين اللي بيطلع بالتقييم ده المحلل المالي
28:58
عمر: مين هو المحلل المالي و شغال فين؟ كلمنا بقى على شخصية المحلل المالي ده
مصطفى: في نوعين من المحللين في واحد مستثمر وواحد مسوق للاستثمار فأنا مستثمر ، شركة أكت فاينانشال شركة استثمار فأنا عندي محللين ماليين داخل الشركة دورهم انهم يدرسوا الشركات ويطلعوا قيم عادلة دي غير قابلة للنشر دي بتتعرض على لجنة الاستثمار داخل الشركة عندنا عشان ناخد قراراتنا الاستثمارية فده أداء داخلي المحللين عندنا بيطلعوا دراسات للشركات اللي بنستثمر فيها عشان نستخدمها احنا في قراراتنا الاستثمارية فده نوع المحلل اللي في جانب الشراء فالمستثمر بيحلل لنفسه
في نوع تاني من المحللين مسوقين الاستثمار زي شركات السمسرة زي بنوك الاستثمار الناس دي بتسوق للاستثمار يعني بتبيع منتجاتها للغير للمستثمرين اللي عايزين يستثمروا فبيطلعوا بحوث وتقارير عن السوق وعن الشركات المقيدة فيه ويبدأ يقولك والله انا شايف القطاعات دي قطاعات واعدة للاسباب الفلانية ، الاسهم دي شايفها بتداول أقل من قيمها العادلة عشان انا شايف ان القيم العادلة تساوي كذا فأنا شايف ان الشركة دي هتنموا بشكل كبير في المستقبل بسبب 1 ، 2 ، 3 افتراضات معينة فيبدأ يحلل ويدرس الشركة وينشر التقارير دي لعملاء الشركة بتاعته بحيث انه يشجعهم على اتخاذ قراراتهم الاستثمارية فيستفيد منهم في المقابل انه ياخد أتعاب إدارة استثماراتهم أو تنفيذ استثماراتهم داخل بنك الاستثمار
عمر: آه يعني أنا غالباً لو عندي حساب في شركة سمسرة ، الشركة دي غالباً بتقدم الخدمة دي من مجموعة خدمات اللي أنا بخدها كمستثمر واعتقد برضه إن في منصات بتجمع آراء المحللين دول يعني أنا شوفت مثلاً شركة سمسرة رقم 1 بتقول كذا ، شركة سمسرة رقم 2 بتقول كذا فانت كمستثمر وانت قاعد في البيت ممكن تخش على المنصات دي وتشوف مجمعين الآراء دي ازاي مظبوط
مصطفى: بالظبط ، يعني موجود كذا حاجه في ناس بتنشر ملخصات التقارير دي يعني عادة بنوك الاستثمار بتفضل انها تشارك عملاءها بالتقرير الشامل المفصل فبتلاقي ديماً بسهولة على المنصات بتاعة الابحاث وأخبار البورصة ان شركات كذا مطلعة قيم عادلة على مثلاً زيادة متوقعة في قيمة سهم بنسبة 70% ، 90% بنسبة 100% فبتبدأ تشوف آه والله ده في فرصة استثمارية أنا هنا بشتري حاجه أرخص من تمنها فأنا غالباً باخد قرار استثماري صح فده بيساعدك على اتخاذ القرارات الاستثمارية ودي حاجه من المعايير المهمه لأي مستثمر وعلشان كده بنعتمد عليها ، بنعتمد دراسة التقارير الموجودة في السوق وناخد رأي المحللين الموجودين في السوق بكل مقدمي الخدمة وفي نفس الوقت بنعمل تحاليلينا داخل الشركة بما اننا برضه يعني شركة وعندنا قسم كبير للاستثمار فالمحللين عندنا بيعملوا زي تحقق من الافتراضات ودراسة التقييمات العادلة بتاعة الاسهم اللي بنشتري فيها قبل ما ناخد قرار الاستثمار
32:33
عمر: المحلل بتاعك بيروح يتحقق من المحللين التانيين يشوف آرائهم صح أو غلط أو مستخدمين الحاجات اللي ليها معنى ، معلش أنا وقفت في الحتة دي لأن الحتة دي بالنسبالي مهمة لأن اللى بيسمعنا برضه ممكن يبقى عايز يحاول يشوف زي مانت بتقول مثلاً واحد زي بافيت كان بيعمل كده او انت بتعمل كده او مستثمرين كتير بيعملوا كده فعايزة يعرف انتو بتبصوا على إيه و بتستخدموا ايه
مصطفى: طبعاً المستثمر الفرد صعب انه يحلل الأسهم بنفسه بسهولة زي ما احنا بنعمل يعني لأن احنا عندنا فريق من المحللين ، لكن المستثمر الفرد أو اللي بيستثمر على مساحة أصغر شوية عادة بيعتمد على المحللين بيقدر يسأل السمسار بتاعة أو يسأل أدارة شركة الاستثمار بتاعته عن آرائها الاستثمارية في بعض الشركات طبعاً أشجع الناس انها تقرأ البحوث دي في منها حاجات مبسطة بحيث تبقى عارف هي ليه الشركة دي شايفة مثلاً ان سهم فلان فيه صعود 100% والمفروض السهم يطلع أكتر من كده وإن قيمته العادلة المفروض تبقى ضعف تمنه فيبدأ يقرأ مثلاً الافتراضات اللي هما بنو عليها القيمة العادلة أو التقييم بتاعهم في الشركة دي وهكذا ودي طبعاً خطوة مهمه في الاستثمار بحيث تبقى فاهم بتستثمر في إيه في الأخر
عمر: تمام.. حلو أوي ، شكراً على وقتكوا معانا النهاردة ده كانت الحلقة الجزء الأول في حلقة مصطفى وإن شاء الله نشوفكم الاسبوع الجاي
Translation of some words and terms:
Personal شخصي
Series سلسلة
it's doing very well يعمل بشكل جيد للغاية
Adding a lot of value إضافة الكثير من القيمة
Background خلفية
Sale side جانب البيع
Buy side جانب الشراء
different asset classes فئات أصول مختلفة
Introduction مقدمة
Servicing investors خدمة المستثمرين
Investing in yourself الاستثمار في نفسك
Mandate امر رسمى
Public Equity Attitude موقف الأسهم العامة
Minorities الأقليات
An active investment استثمار نشط
Shareholder شريك
Management إدارة
Majority أغلبية
Control سيطرة
Voting التصويت
Super majority الأغلبية العظمى
Inefficiency عدم الكفاءة
Private الخصوصية
Minority الأقلية
Fragmented Ownership ملكية مجزأة
Analysis التحليلات
Due Diligence إجراءات لإرضاء المتطلبات
Disclosure إفصاح
Business model نموذج العمل
Mismatch عدم تطابق
Flexible مرن
Time Frame الإطار الزمني
Platforms منصات
Consolidate دمج
Process طريقة
Criterias المعيار
Scanning مسح
Top down approach من أعلى إلى أسفل النهج
zoom in تكبير
Focus التركيز
Opportunity فرصة
Within ضمن
Landscape محيط
Infrastructure Sector قطاع البنية التحتية
Exposure عرض
Upside الاتجاه الصعودي
Significant مهم
Fair Value القيم العادلة
Addition بالإضافة
Assumptions افتراضات
Shareholding Structure هيكل المساهمين
Analyst المحلل
Aggregate إجمالي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #حوار_مع_مستثمر #الجزء_الأول