101. رحلة لعالم الدفع الإلكتروني - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة ميعادنا مع رحلة جديدة بنتعرف فيها على جزء مهم من قطاع التكنولوجيا المالية، معانا النهاردة ضيف جديد في كلام ينور أ/ أحمد عنايت الرئيس التنفيذي لشركة الأهلي ممكن، شركة مصرية مرخصة للمدفوعات الإلكترونية
في الوقت الحالي، كلنا تقريباَ بقينا بنستخدم كروت إئتمان أو كروت الخصم المباشر أو محافظ الإلكترونية، في حلقة النهاردة بنتناقش مع ضيفنا في موضوع الأمن الإلكتروني وأمن الشبكات، ازاي بياناتنا بتكون محمية، وإيه المعايير اللي الناس بتدور عليها عشان يشتغلوا في شركات الدفع الإلكتروني
أ/ أحمد عنايت خبرة طويلة في مجال التكنولوجيا المالية فوق الـ 20 سنة
Ahmed-Enayet @LinkedIn : تقدروا تتواصلوا مع ضيفنا من هنا
02:38 لو هتعرّف الأهلي ممكن، إيه هي شركة الأهلي ممكن؟ -
03:42 إيه هو الدفع الإلكتروني؟ -
05:11 الشركة دي معمولة لمين، يعني مين اللي ممكن يستخدم الأهلي ممكن؟ -
07:30 هل شوفت إتجاهات عالمية سواء من فيزا أو ماستركارد بتقلل الاحتيال أو السرقة؟ -
10:30 هل البيانات اللي عندك في الشركة بتكون مشفرة؟ -
13:08 إيه المتطلبات الأولية اللي بتحتاجها من العميل عشان يفتح حساب عندك؟ -
14:26 هل بتشوف التطور بتاع العميل بتاعك؟ -
16:25 السؤال اللي بسأله لأي حد عنده شركة أنت بتعمل فلوس ازاي، العائد بتاعك بيجي منين؟ -
20:34 ازاي كصاحب محل يبقى عندي جهاز "نقاط البيع"؟ -
استنونا الاسبوع الجاي في الجزء الثاني من رحلة لعالم الدفع الإلكتروني
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور، النهاردة أنا معايا الرئيس التنفيذي لشركة الأهلي ممكن للمدفوعات الإلكترونية، شركة مصرية مرخصة بتساعد الناس على تنفيذ عملياتهم إلكترونياً أنا بالنسبالي كان الموضوع جديد عليا، عايز اعرف برضه في الخلفية إيه اللي بيحصل، كلنا طبعاً بنعمل عمليات من خلال كروت الإئتمان أو من خلال كروت الخصم المباشر أو المحافظ الإلكترونية ولكن هنلاقي إن في أطراف كتير ورا الموضوع ده
هناقش مواضيع زي الأمن الإلكتروني وأمن الشبكات، هناقش موضوع البيانات، موضوع الناس اللي بتشتغل ازاي الناس بتتعين مثلاً في الشركات دي وإيه المعايير اللي الناس بتدور عليها عشان يشتغلوا في الشركات دي
أحمد خبرة طويلة في المجال فوق الـ 20 سنة، وعنده خبرة كبيرة في مجال التكنولوجيا المالية فأنا مبسوط جداً ان انا استضفت أحمد النهاردة ويارب الحلقة تعجبكم
عمر: أولاً يا أحمد أنا عايز أرحب بيك في كلام ينور، انا مبسوط جداً انك أديتني من وقتك النهاردة، احنا يمكن عرفنا بعض مؤخراً وكنت من الناس اللي كان نفسي ييجوا يحضروا معانا حلقة من حلقات كلام ينور، عايز أرحب بيك أول حاجه أهلاً بيك يا أحمد
أحمد: ربنا يخليك، ميرسي يا عمر، أنا كمان أنبسط جداً اننا قابلتك وأتعرفنا على بعض وكان ما بينا حوار خفيف ولطيف ومتطلع ان احنا نعمل مع بعض أول نقاش دي يعني ونعمل مع بعض نقاشات تانية كتير لأنه باين أن بينا قواسم مشتركة كتير زي ما بيقولوا كده في طريقة التفكير واللي عاوزين نعمله للمجتمع زي ما بيقولوا
عمر: ميرسي جداً جداً يا أحمد على وقتك
02:38
أولاً أنا ديماً بحب أبتدي بالسؤال ده أنت النهاردة الرئيس التنفيذي بتاع الأهلي ممكن، لو هتعرف الأهلي ممكن في 10 / 20 ثانية إيه هي الأهلي ممكن؟
أحمد: أكيد، الأهلي ممكن هي شركة مدفوعات إلكترونية، شركة شغالة في السوق المصري بقالها سنين كتير، كانت شغالة في المود اللي بيسموه "وضع ريادة الأعمال" عاملها 3 شركاء، كانت عاملة شغل كويس أوي لفتت نظر ناس كتير البنك الأهلي اشترى الشركة في أبريل 2021 من خلال شركة الأهلي كابيتال اللي هي الزراعي الاستثماري للبنك الأهلي، الشركة حصل فيها تطور رهيب جداً في تفاعل بتاعها، في المبيعات، في الوضع بتاع الشركة في السوق يعني أقدر أقول وأنا مستريح ان احنا الحمد لله بقينا من أكبر 3 شركات دفع إلكتروني موجودة في مصر ولسه متطلعين اننا نعمل أكتر من كده إن شاء الله يعني
03:42
عمر: طيب هنزل معاك مستوى تحت كده شوية، إيه هو الدفع الإلكتروني؟ يعني إيه كلمة دفع إلكتروني؟
أحمد: الدفع الإلكتروني لو هرجع معاك خطوة لورا كده ديماً علاقة الناس بالمدفوعات هي الكاش وإن أنا بروح ادفع الكاش ده عند مقدم خدمة، يعني مثلاً طول عمرنا كنا متعودين زمان إن الراجل محصل الكهربا بيجيلي البيت، محصل الكهربا ده بيقولي الفاتورة بتاعتك أهي يقوم مديني ورقة الفاتورة كام 67 جنيه أتفضل يا باشا الـ 67 جنيه
فكرة الدفع الإلكتروني إن أنت بدل ما بتروح للراجل بتاع الكهربا أو بتاع الكهربا بيجيلك أو بتاع الغاز يجيلك، تروح لبتاع المحمول، أو بتاع أي حاجة تانية.. الأقساط انت بتلم كل ده للعميل في الأخر في حته واحده بيقدر يخلص منها كل مدفوعاته ده كان بداية فكرة الدفع الإلكتروني في مصر أن أنت بتلم المدفوعات الإلكترونية للعميل كلها في مكان واحد يقدر يدفع بقى موبايله، فاتورته لو عليه أقساط، يشحن حتى كارت الكهربا والغاز وبعد كده الموضوع بدأ يتطور أن انت دلوقتي بقيت بتحاول على قد ما تقدر ان مثلاً الراجل عايز يشتري حاجه فالحاجه دي ممكن يشتريها ويدفع والشحن يتم وكل ده من غير ما تتحرك من بيتك فهو الموضوع بيبقى عبارة عن تطور بيواكب التطور التكنولوجي اللي بيحصل في اي حته في الدنيا، التكنولوجيا جي في الأخر بتخدم كل القطاعات العملية في مصر اللي منها قطاع بتاع الأموال زي ما بيقولوا وطلع من هنا مصطلح التكنولوجيا المالية اللي هي الدفع الإلكتروني اللي طلع جزء منها يعني
05:11
عمر: أنت في الأول لما تفكر كده الشركة دي معمولة لمين؟ يعني انت متخيل مين ممكن يستخدم الأهلي ممكن؟
أحمد: بص المفروض الناحية المفاهيمية زي ما بنتكلم يمكن الشركة كانت في الفترة اللي فاتت كلها شغالة على الدفع نقدا، الدفع نقداً ده انت بتتكلم على اللي احنا بنسميهم العملاء اللي مش مرتبطين بـ المنظومة البنكية في مصر اللي كل تعاملاتهم بتبقى كاش، بيشتغل وبيقبض كاش وبيبقى عايز ياخد خدماته كلها كاش ودول يمكن يعني لحد أخر أرقام قريتها السنة اللي فاتت احنا بنتكلم في 49% أو يمكن أكتر شوية كمان دول الغير متعاملون مع البنوك الشركة كانت بداية عايزة تخدم العملا دي بس الحقيقة ان احنا بنحاول نبقى جزء من المنظومة العامة بتاعة الدولة والتوجه الاستراتيجي بتاع الدولة ككل إن احنا يبقى عندنا شمول مالي، يعني إيه شمول مالي يعني ميبقاش عندنا تيارات موازية، يبقى كل العمليات المالية اللي بتتم الناس بتقدر تشوفها ويبقى مقاس في الاقتصاد العام بتاع الدولة نفسها
معلش انا روحت بعيد شوية عن السؤال مين العميل بتاعي، أنا العميل بتاعي خلال الفترة اللي فاتت كان الراجل اللي في إيده كاش، والاستراتيجية بتاعتي اننا أروح بعد كده لأي حد عايز يعمل أي خدمة أو يدفع بأي طريقة بغض النظر عن الوسيلة إيه كاش أو كارت أو محفظة إلكترونية المفروض اني أقبل منه بعد كده كل الطرق الدفع اللي يقدر يستخدمها عشان ياخد الخدمة اللي هو عايزها
عمر: طرق الدفع المختلفة يعني نقول مثلاً الكريديت كارد، المحافظ الإلكترونية والكلام ده كله؟ يعني أنت ممكن تاخد فلوس من الناس من كل الجهات دي صح كده؟
أحمد: مظبوط، بالظبط كده، يمكن لحد دلوقتي انا لسه بعمل ده على نطاق ضيق شوية بس هو ده اللي احنا المفروض لازم نروح له كلنا عشان هو ده المستقبل، الكاش كده كده المفروض انه مع الوقت لازم استخدامه يقل لأن استخدام وسائل الدفع التانية سواء الكريديت كارد أو المحافظ الإلكترونية أو الحاجات اللي بتتلبس في الأيد علشان تدفع بيها الكلام ده كله أأمن وأوفر وفي الأخر بيحسن منظومة الدفع الإلكتروني عمتاً للبلد كلها يعني
07:30
عمر: طيب أنا مش خبير اوى فى المجال ده يعني أنا معنديش خبرة كبيرة في حتة الأمن المالي، وأمن الشبكات بالذات كمان اللي هو أنا مثلاً بدفع بكارت زمان الناس كانت ديماً بتخاف تقولك لأ مش عايز استخدم فلوسي أونلاين، مش عايز استخدم الكريديت كارد بتاعي عشان ممكن الحاجه تتسرق.. أنا ملاحظ شخصياً إن الحاجات دي مبقتش بتحصل زمان مثلاً من 5 ، 10 سنين كنت ممكن كل شوية تغير بطاقة الائتمان أو بطاقة الخصم المباشر عشان حصل مثلاً اختراق عليها، العالم بقى بتاع أمن الشبكات هل أنت شايف ان في تغير جذري خلى الحاجات دي متحصليش أنا شخصياً في السنتين تلاتة اللي فاتوا، يعني هل أنت شايف إن في اتجاهات عالمية بتزود الأمان؟ أو بتطمن الناس انها تقبل أصل هو جزء من الموضوع أنا مش هاجي أدفعلك حاجه غير لو انا عارف ان حماية بتاعتك عالي مظبوط؟
أحمد: أكيد صح
عمر: هل أنت شوفت تغيرات في العالم مثلاً سواء جايه من فيزا أو ماستر كارد، أنا برضه معنديش تقنيات ورا الموضوع ده هل هما استخدموا حاجات جديدة قللت الاحتيال أو السرقة؟
أحمد: بص هو في الآخر المنظومة بتاعة أمن الشبكات برضه ده جزء من التطور التكنولوجي اللي بيحصل في أي صناعة في العالم فزي ما أنت قلت أنت أديت مثال لطيف أوي أنك كنت مثلاً بتستخدم الكريديت كارد بتاعك زمان وكان كل شوية حد فينا ألحق وتلاقي الكريديت كارد فيه حاجات بتحصل عليه فلأ أنا لازم أرجع تاني أقفل الكارت ده وأغيره
دلوقتي يعني افكار كتير كانت بسيطة جداً اللي احنا دلوقتي واخدينها بطريقة مضمونة إن أي معاملات على الكريديت كارد بيجيلك رساله على الموبايل فيها رقم سري عشان المعاملات دي تكمل لازم تقوم مدخل اللي هما بيسموها OTP أو كلمة السر لمرة واحدة فدي فكرة بسيطة ان انت بتزود حاجة تانية اللي هو بيسموها المستوى الثاني من المصادقة على المعاملات
أنت عارف بقى الإتجاه كله عامه في القصه دي لما تيجي تعمل أي معاملات مالية ان انت بتستخدم حاجتين حاجه اسمها "شيء لديك" وحاجه تانيه اسمها "شيء تعرفه" ليه لان انا ممكن الاقي كارت في الشارع بس لو الكارت اللي في الشارع ده مش معايا الـ PIN بتاعه ولو معايا مش هشوف الـ OTP فهي لازم دايما يبقى في حاجتين بتصدق بيهم على أي معاملات مالية انت بتعملها
وتاني ده كان جزء زي ما انت من التطور اللي حصل في ماستر كارد وفيزا بقت المصادقة أمر رسمي والبنوك بقت مضطرة تخش في الحتة بتاعة المصادقة دي كمان، غير أن البنوك نفسها بقى بيجلها تعليمات من البنوك المركزية حول العالم اللي هو مثلاً انت عايز تشتغل مع شركة الأهلي ممكن، شركة الأهلي ممكن عشان تقبل مدفوعات بالكريديت كارد لازم يبقى معاها شهادة اسمها PCI اللي هما بيسموها شهادة صناعة بطاقات الدفع اننا كشركة شركة مؤهلة إن انا استقبل مدفوعات بتتم بكريديت كارد وأن الأنظمة بتاعتي فيها الحد الأدنى من مستويات الأمان بتؤمن المعلومات بتاعة الكروت اللي هتمشي على الأنظمة بتاعة الشركة دي
10:30
عمر: تمام وانت كشركة هل المعلومات يعني هل أنت بتحتفظ بالبيانات دي ولا بتكون مشفرة بطريقة معينة فبيبقى فيها حماية يعني انا برضه بحاول اتكلم اللي عندك في الحتة دي بالذات ليه لأن جزء من أن الناس تقبل التطور التكنولوجي انهم يبقوا مستريحين للأمان بتاعتها مظبوط، فدي من الحاجات اللي أنا ديماً بفكر فيها أنا ايش ضمني أنك أخدت كارتي ما انت ممكن تستخدمه، أحمد مثلاً صاحب الشركة تاخد الكارت بتاع عمر وتستخدمه مثلاً
أحمد: صح والله معاك حق، زي ما احنا بنفكر في البنوك كده نفس فكرة اننا حسابي ده موجود في البنك وموجود على نظام عندهم اسمه الخدمات المصرفية الأساسية، طب ماهو ممكن أي موظف من البنك ده يقوم فاتح حسابي ومحول لنفسه مهو نفس الفكرة ما هي هنا بقى بتيجي الفكرة زي ما بقولك بتاعة حاجه زي الشهادة اللي بقولك عليها دي انت كشركة عشان يبقى عندك الشهادة دي انك تقدر تعمل معالجة للبطاقات ده بيبقى ليها شوية متطلبات اللي منها على سبيل المثال حاجه زي اللي انت قولتها دي ان انا عندي نقاط البيع اللي بندفع بيها كلنا في المحلات دي الماكينة دي أول ما الكارت بيمر عليها هى بتقرأ الرقم بتاع الكارت وبعدين بتعمله تشفير، وبعدين التشفير ده بيروح معلومة رقم الكارت بتمشي مشفرة على كل الأنظمة لحد ما توصل للبنك في الأخر اللي انا بقوله اخصملي من الكارت ده 100 جنيه مفيش ولا نظام من الأنظمة اللي في النص دي بيشوف رقم الكارت اصلا
ولنفترض مثلاً ان انت بتستخدم تطبيق زي أوبر وكريم انت بتسجل الكارت انت في الحقيقة حاطت الكارت بتاعك ومسجلة على السيرفرات بتاعة أوبر وكريم بس الكارت ده محفوظ عندهم مفتاح أو رمز التشفير جوه على الانظمة بتاعته لو حب يبص مبيشوفش 16 رقم بتوع الكارت بتاعك فحتى انا لو الموظف بتاعي بيقدر يخش على السيرفر ميقدرش يشوف البيانات
ناهيك بقى عن أن الموظف يخش على السيرفر دي ليها شوية ضوابط تانية ليها علاقة بمين بيوصل لإيه ولو حد عايز يخش على حاجه لازم يبقوا اتنين ملهمش علاقة ببعض فالقصة وما فيها فيها ضوابط كتيرة اوي مبيبقاش عارف تفاصيلها غير اللي شغالين في الصناعة يعني
عمر: بالظبط وعشان كده أنا بسألك يعني أكيد دي يمكن بالنسبالك أسئلة بديهية أو بسيطة بس أنا عن نفسي لأني بره المجال المدفوعات ده بالنسبالي دي معلومات جديدة
13:08
عمر: طيب انت النهاردة العميل بتاعك عايز منه ايه؟ عايز يبقى عنده محفظة مثلاً أو كريديت كارد أو عنده حساب بنك عشان يقدر يبتدي يستخدم الخدمة بتاعتك؟ يعني إيه المتطلبات الأولية اللي بتحتاجها من العميل عشان يفتح حساب عندك؟
أحمد: بص انا دلوقتي كشركة الأهلي ممكن أنا زي ما بقولك انا العميل اللي عايزه يجي يعمل معاملات عندي انا كنت بدور على العميل اللي هو معندهوش حساب في البنك ده معناه اني مش عايز منك حاجه مش عايز يبقى معاك كارت، أنا مش عايز يبقى معاك محفظة، أنا مش عايز يبقى معاك حاجه انا عايزك تؤدي خدمة بدل ما أنت كنت بتروح المصلحة ما اللي انت عايز تعملها وتقف في الطابور وتروح على الشباك تدفع الـ 100 جنيه لأ انا عايزك تشوف كل خدماتك اللي انت عايز تدفعها وتدفعها من نقاط البيع الواحدة اللي انا لامملك فيها كل حاجه ده كخطوة أولية تعالى وادفع كاش
الخطوة التانية مع بعض مش انت خلاص عرفت وبقيت واثق انك ممكن تيجي تؤدي الخدمة دي وتعملها من عندي، طب إيه رأيك بقى بدل ما تيجي تحط كاش ما تيجي تدفع المعاملات دي بالكارت دي الخطوة التانية بتاعتنا
طيب بعد كده انا عايزك بدل ما تنزل وتروح منفذ تعمل فيها الخدمات دي إيه رأيك تنزل التطبيق وتعمل تسجيل لنفسك وتربط الكريديت كارد بتاعك وتعمل كل المعاملات اللي انت عايزها دي من وانت قاعد على الكنبه في البيت فهي منحنى تعلم بناخده مع بعض انا والعميل
14:26
عمر: تمام، طيب هل بتشوف التطور بتاع العميل بتاعك؟ يعني بتشوفه كان في الاول بيعمل كده وبعدين ابتدى ينزل يعني بتتابعوا الحاجات دي؟ أو بتشوف مثلاً في الحجم بتاعك كشركة بالكامل كنت في الأول عندي كاش قد كده النهاردة ابتدى يتحول يبقى كده وبعد كده وبعدين اتحول بقى في المرحلة التالتة بتحللو الأرقام دي؟
أحمد: بص هو الإجابة النموذجية إني هقولك آه بس هو الموضوع بيبقى معقد أكتر من كده شوية يا عمر لأن انت في الآخر بتتكلم عن نظام بيئي كامل ممكن تكون انت شايف جزء منه كشركة أو كمنظومة في عدد عملا معين بس إنت في الآخر بتبص على تحول كامل للدولة يعني أنا مثلاً مكنش هينفع اننا اشوف الاستخدام بتاع كروت الائتمان وكروت الخصم المباشر كتيره غير لما الدولة ابتدت تفرض على الناس مثلاً ان انت لو عايز تعمل معاملات في مصلحة حكومية بزيادة عن مبلغ 500 جنيه مثلاً لأ لازم تعمل ده بكارت فده خلى الناس تتجه انها غصب عنها تروح تطلع كارت فده أنعكس عليا في إيه ان الراجل فعلياً بقى في فـ أيده كارت فأكتشف أنه طب مانا ممكن أدفع بالكارت وانا في البيت وده بالنسبالي أجمل كتير أوي من اني انزل وادفع كاش فانت عارف هو نظام بيئي كامل بيطلع كله لقدام مع بعض أو بيعلى كله مع بعض مش شركة لوحدها
عمر: تمام فهمت وانتو طبعاً عندكم تنبؤ لمثلاً بعد 5 سنين متوقعين أن الدولة كلها بالتطور اللي بيحصل ده ان العمليات هتبقى بالشكل الفلاني بعد 5 سنين صح يعني بيبقى عندكم زي إتجاهات او تقارير بتقولكوا انكم المفروض الناس رايحة في الإتجاه ده يعني بتاخد الإتجاه العام من الدولة بتعرفه
أحمد: مظبوط
عمر: وبتبتدي تبني الأنظمة بتاعتك على هذا الأساس
أحمد: مظبوط، لان انا الاستراتيجية بتاعتي كشركة في الكبر وفي العائد لازم تبقى حاطة ده في الاعتبار يعني لأن أنا مثلاً ممكن أكون بستثمر في منتج مبيقبلش كريديت كارد اصلاً مع اننا شايف الدولة كلها المفروض رايحة كمان 5 سنين ان ميبقاش في كاش فلازم ابقى مواكب الخطة اللي الدولة حطاها للشمول المالي بشكل عام
16:25
عمر: طيب السؤال برضه اللي بسأله لأي حد عنده شركة أنت بتعمل فلوس ازاي، العائد بتاعك بيجي منين؟
أحمد: أنا بشكل عام الفكرة بتاعة الراجل بتاع الدفع الإلكتروني فلنفترض ان في شركة من شركات الكهرباء الشركة دي العميل بتاعها علشان يشحن كارت الكهربا بتاعه كان مفيش اختيار عنده غير انه ياخد الكارت ينزل يروح بيه لحد الشركة بتاعة الكهربا اللي هي مقعداله موظف 24 ساعة في 7 أيام لان الكهربا دي ممكن تخلص في أي وقت فيروح يشحن كارت بتاعه ويركب المواصلة بتاعته يروح لحد مصلحة الكهرباء يشحن الكارت ويرجع تاني بيتهم عشان يحط الكارت في العداد يشحن بيه الكهربا بتاعته
طيب هنا العميل أتحمل فكرة انه اضطر ينزل يركب مواصلات ويروح لحد المكان الفلاني يشحن الكارت بتاعه، والشركة بتاعة الكهربا علشان تخدم ولنفترض انك عندك 10 مليون كارت كهربا دلوقتي فأنت محتاج ان شركة الكهرباء يبقى عندها موظفين يقدروا يخدموا 10 مليون عميل يشحنوا كارت الكهربا بتاعهم
فدخل الإلكتروني في النص قالتلهم أنا عندي فكرة انا هوفر عليك يا عميل المشوار وهوفر عليكي يا شركة الكهربا إن يبقى عندك موظفين يخدموا الـ 10 مليون عميل، هنشرلك أنا منافذ في النص بمقابل اننا هاخد عمولة تقديم الخدمة هاخدها من العميل ويا شركة الكهربا بدل ما تعيني 10 موظفين لأ عيني موظف واحد بس وانا هاخد منك جزء اللي هو رسوم تقديم الخدمة اللي هاخدها من الشركة فهما دول المصدرين بتوع العائد للشركات الدفع الإلكتروني عمتاً باخد جزء من العميل اللي بيدفع وباخد جزء من الشركة اللي أنا بوفرلها منافذ تقديم الخدمة
عمر: أنا بتخيل النهاردة لو فتحت التطبيق بتاعك او المكان اللي هقدر ادفع منه انت بتوفر لي بتقولي انا عندي شركة الكهربا وعندي شركات الأتصالات اهي وعندي مثلاً المرور معرفش أنا بقول أي حاجه يعني أنا معرفش إيه الموجود هل ده التخيل بشكل التطبيق بتاعك؟
أحمد: آه أنا لسه معنديش تطبيق ان شاء الله ده في الخطة بتاعتي السنادي، أنا الدفع عندي بيتم من خلال نقاط البيع، وكلمة نقاط البيع دي عشان برضه الناس اللي سامعانا يبقوا عارفين يعني إيه ده الجهاز اللي بيبقى موجود لما تروح تشتري هدوم أو اي حاجه الماكينة اللي بتروح تعدي فيها الكريديت كارد، فالماكينة دي شركات الدفع الإلكتروني مطورة عليها انها حاطه عليها خدمات زي اللي انت ذكرتها دي بالظبط الكهرباء والمرور وشحن الموبايل والكلام ده كله تقدر تقول ان ده إصدار 0.1 من الدفع الإلكتروني اني اقدر ادفع فواتير الإصدارات اللي بعد كده او اللي جاي انه ان شاء الله التطبيق ده عليه ايه تخفيضات عليها يعني انا عايز الناس تبقى تدور وتبص أونلاين على التطبيقات اللي في الهند اللي هي الدول اللي شبهنا حاجه اسمها PTM والتطبيق اللي أغلب الناس سامعه عنها وي تشات وعلي باي بتاعة الصين شوف التطبيقات دي فيها ايه تاني غير الدفع الإلكتروني ده الإصدار اللي بيسموه سوبر تطبيق اللي حلم كل شركة دفع إلكتروني انها توصل له انها متبقاش دفع بس انها يبقى عندها 10000 خدمة مختلفة كلها ملمومه في تطبيق واحد
عمر: أوكيه، هنا بقى أنا هتحول للراجل التاني اللي أنت قولت عليه بقى بتاع نقاط البيع يعني أنا النهاردة اتكلمت على الراجل العادي اللي ماشي في الشارع وعايز يستخدم الخدمة بتاعتك يعني بالنسبالي انا وبالنسبة للناس اللي بتسمع في المنظور بتاع الميزانية بتاعتي الشهرية انا كده كده الناس لما بنتكلم معاها بنتكلم ان كل واحد عنده ميزانية وعنده بنود ثابته انت هنا بتسهل اننا اخش انفذ على طول ويبقى عندي سجل تاريخي أقدر اشوف فاتورة الكهربا بتاعتي كانت مدفوعه قد إيه والكلام ده كله فده أول استخدام من وجهة نظري اشوفه لحاجه زي كده ان انت بتسهل القاعدة الشهرية بتاعتك انا مش عايز اوجع دماغي انا عايز اعمل ميزانية وادفع اللي عليا وخلاص
20:34
طيب هقلب الوضع بقى للراجل اللي عنده نقاط بيع ازاي كصاحب محل يبقى عندي جهاز "نقاط البيع"؟
أحمد: بص فكرة نقاط البيع دلوقتي بقى خلاص في حاجتين الحاجه الاولانية انه عمتاً الإتجاه لنشر بطاقات الائتمان والخصم المباشر وميزة ابتدى ينتشر جداً فبقيت بتخش أي محل دلوقتي حتى لو سوبر ماركت ممكن تكون بتشتري حاجات وتقولوا لا انا عايزه ادفع بالكارت لان الكريديت كارد ده ممكن يكون البنك بتاعك بيديك عليه نقط تجيب حاجات تانيه فده بيحفزك يبقى عندك كريديت كارد فبالتالي هو زي ما بتقول كده الطلب هو الراجل صاحب المحل او صاحب السوبر ماركت او صاحب الكشك بيسعى انه يبقى عنده نقاط بيع عشان يعمل عليها معاملات ده واحد
اتنين الراجل ده لو ما عندوش نقاط بيع وعايز يشحن هيعمل ايه هيجيب كروت الخدش بتاعه زمان دي ويقعد بقى يخدش بصباعه عشان يبيع الكروت الشحن ودلوقتي محدش بيهتم بالقصة دي لأن هما تاني نوعية الكروت دي كأداة شحن هو غالي لأن فيه بلاستيك وصناعة لكن انت لما يبقى عندك جهاز إلكتروني بيطلعلك كروت الشحن دي على طول ده بالنسبالك أوفر كتير فهو بقى الموضوع في الاخر تاني هرجع للنقطة اللي قولتلك عليها هو نظام بيئي كله بيغير بعضه مع بعضه يعني الراجل لما بيلاقي عنده طلب انه يخش حد يقوله انا عايز اشتري من عندك ايه ده انت معندكش كريديت كارد لأ يبقى انا مش هينفع اشتري من عندك، إيه ده انت مينفعش تشحنلي المحمول وهتديني كارت لأ انا مش عايز فبالتالي بيخلي صاحب المحل نفسه أما حد من مندوبي شركات الدفع الإلكتروني يروحله يقوله انت عايز ماكينة يقوله أه طبعاً انا عايز ماكينة وممكن تخش محل تلاقي عنده دلوقتي ماكينة واتنين وتلاته من مقدمي دفع إلكتروني مختلفين
عمر: طيب أنا محتاج يبقى عندي إيه؟ يعني انا قولتلك والله يا أحمد انا نفسي يبقى عندي جهاز نقاط بيع انا نفسي أعرض الخدمات دي هجيلك أقولك إيه؟ او الراجل هيطلب مني ورق إيه؟
أحمد: ولا أي حاجه، الراجل بيكلم الكول سنتر يقول أنا موجود في الحتة الفلانية وعايز جهاز أعمل من عليه المعاملات هنطلب منك شوية حاجات طيب مفيش مشكلة هنبعتلك حد يشوف المحل، ياخد فاتورة من فواتير المرافق فاتورة الكهربا ولا بتاع وصورة البطاقة وخلص الموضوع الموضوع بسيط جداً يعني مفيهوش اي تعقيدات
عمر: طيب هخش معاك في تفاصيل أكتر شوية عشان الراجل ده ممكن مثلاً انت أديتله ماكينة ممكن يقوم داخل شاحن تليفونه بمليون جنيه .. يعني أفكار بديهية جداً بسيطة يمكن بس
أحمد: لأ لأ طبعاً معاك حق، بص شركات الدفع الإلكتروني كلها عمتاً بتشتغل بنظام مسبقة الدفع، يعني أحمد عنايت عنده محل وراح أخد ماكينة من شركة الأهلي ممكن فالماكينة دي معايا عليها خدمات 1 2 3 4 بس خدمات 1 2 3 4 دي لازم المكنه نفسها تتشحن رصيد عشان اقدر اعمل المعاملات منها فايه اللي بيحصل احمد عنايه نزل له المكنه من شركه الاهلي ممكن راح المندوب بتاع المبيعات المسؤول عن المنطقه لاحمد عنايت قال له انت عايز تشغل مكنه اه طيب انت متخيل هتشغلها بكام انا مثلا هشغلها ب 2000 جنيه النهارده يوم احمد عنايت صاحب المحل مدي 2000 جنيه للمندوب بتاع شركه الاهلي ممكن مندوب شركه الاهلي ممكن معاه الابلكيشن بتاعته يشحن بها المكنه بتاعه احمد عنايت ب 2000 جنيه فكده احمد عنايت مع 2000 جنيه في المكنه 2000 جنيه دول يقدر يعمل بيهم حركات بقى يشحن يدفع فواتير يعمل اي معاملات هو عايزها لحد ما 2000 جنيه دول يخلصوا وبعدين بقى مع الوقت ايه اللي بيحصل ايه زي اي حاجه في الدنيا ان انت بتشتغل مع شركه الاهلي ممكن بقالك ست شهور او بقالك سنه او سنه ونص فممكن يبقى ليك حاجه زي حد الحد الائتماني اللي هو حتى لو الرصيد خلص ممكن اخليك تشتغل ب 2000 جنيه مثلا زي ما بيحصل دلوقتي في نظام البنك اللي هو ممكن حسابي يبقى فاضي وممكن حساب يقلب سلبي لان البنك عارف ان انا القبض بتاعي نازل كمان ثلاث اربع ايام فما فيش مشكله استلف منهم 300 جنيه لحد اما اقبض وهكذا وهو ده النموذج اللي شغال في شركات الدفع الالكتروني كلها شغاله بيه يعني
عمر: تمام يعني انا النهاردة زي ما بشتري بضاعه كده انا ال 2000 جنيه دي يعتبر ستوك مخزون عندي في المحل لخدمات انا هبيعها لاي حد داخل عندي بالظبط كده طيب انت النهارده معلش لو الاسئله بسيطه بس انا برده بحاول افهم منك من تحت قوي النهارده انا صرفت ال 2000 المندوب بتاعك هيجي لي امتى ثاني يديني ال 2000 بقى ما انا صرفت 2000 صح
أحمد: ما هو بقى بيبقى على حسب الاستخدام، سوري آنا آسف لمقاطعتك انا دايما منفعل كده وبنط في الكلام
عمر: لا لا براحتك نط براحتك.. هتجيلي امتى كل تلات كل يومين كل اثنين كل يوم ازاي يعني بعرف الم فلوسي ازاي؟
أحمد: بص هي في الاخر بتبقى دورة مستقلة ، المندوب وصاحب المحل بيتعودوا على بعض يقوله ان انا مثلا دورة الشحن بتاعتي اني هعدي عليك 3 مرات في الإسبوع فمثلاً هعدي عليك حد وتلات وخميس فانت الاستخدام بتاعك في اليوم 1000 جنيه هقوم معدي عليك يوم الحد يبقوا 2000 هعدي عليك يوم التلات 2000 ومع الوقت بيبقى في علاقة كده مع المندوب والتاجر فاللي هو مش لازم يعدي عليه يقوله طب انا هحولك الـ 2000 جنيه وهدي عليك بليل أخدهم يعني انت عارف زي أي حاجه لازم يبقى في جزء كده تفاعلات بشرية وبيتعودوا على بعض فالدنيا بتمشي ما بينهم وبين بعض
لو وصلتوا معانا لحد الحتة دي انا بشكركوا جداً على وقتكوا وإن شاء الله هنكمل الاسبوع الجاي مع أحمد في باقية الاسئلة اللي بتدور حوالين المدفوعات الإلكترونية شكراً جداً على وقتكوا
Translation of some words and terms:
Criteria معايير
Data بيانات
Conversation حوار
Looking Forward نتطلع
Discussions المناقشات
Ceo الرئيس التنفيذي
Entrepreneurship Mode وضع ريادة الأعمال
Interaction تفاعل
Position موضع
Shipment الشحن
Addressable عنونه
Conceptually الناحيه المفاهيميه
Cash Payment الدفع نقدا
Unbanked الغير مصرفي
Unbanked Populations الغير متعاملون مع البنوك
Wallet محفظة
Wearables الأجهزة القابلة للارتداء
Cyber Security أمن الشبكات
Debit Card بطاقة الخصم
Credit Card بطاقة الائتمان
Hack اختراق
Technicality التقنية
Fraud الاحتيال
Guaranteed مضمون
Transactions المعاملات
One Time Password كلمة السر لمرة واحدة
Second Level Of Authentication المستوى الثاني من المصادقة
Something You Have شيء لديك
Something You Know شيء تعرفه
Mandate أمر رسمي
Payment Card Industry Certification شهادة صناعة بطاقات الدفع
Minimum Levels Of Security الحد الأدنى من مستويات الأمان
Core Banking الخدمات المصرفية الأساسية
Card Processing معالجة البطاقات
Point Of Sale نقاط البيع
Encryption Token / Key رمز / مفتاح التشفير
Controls ضوابط
Outlet مَنفَذ
Registration تسجيل
Learning Curve منحنى التعلم
Volume حجم
Usage الاستخدام
Projection تنبؤ
Conveyance Fees رسوم النقل
Log سجل
Demand الطلب
Scratch Card بطاقة الخدش
Prepaid مسبقة الدفع
Credit Limit الحد الائتماني
Cycle Independent دورة مستقلة
Human Interactions التفاعلات البشرية
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الدفع_الإلكتروني #الجزء_الأول