102. رحلة لعالم الدفع الإلكتروني - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنكمل الجزء التاني من لقائنا مع أ/ أحمد عنايت الرئيس التنفيذي لشركة الأهلي ممكن، شركة مصرية مرخصة للمدفوعات الإلكترونية وبنتعرف معاه أكتر على جزء مهم من قطاع التكنولوجيا المالية، هو قطاع الدفع الإلكتروني
أ/ أحمد عنايت خبرة طويلة في مجال التكنولوجيا المالية فوق الـ 20 سنة
Ahmed-Enayet @LinkedIn : تقدروا تتواصلوا مع ضيفنا من هنا
01:20 كلمنا على البيانات كواحد بتدير شركة بالحجم ده بتبص على البيانات ازاي؟ -
04:24 عايز اعرف مين أحمد.. دخلت المجال ازاي؟ عملت ايه وصلك لـ"ممكن"؟ -
05:55 هل بتعتبر من القطاعات اللي بتعين موظفين كتير ولا استخدام التكنولوجيا بيقلل عدد الموظفين؟ -
07:00 ايه اللي انت بتعمله جديد، يعني ايه اللي انت مركز عليهم كشركة؟ -
10:10 كرائد أعمال ومدير في شركة كبيرة زي الاهلي ممكن،ازاي بتعيين العنصر البشري بتاعك؟ -
12:40 ايه النصايح بشكل عام اللي تديها لأحمد وهو صغير؟ -
15:33 ايه اللي بيخليك مبسوط على الصعيد الشغل؟ -
16:46 العكس بقى ايه اكتر حاجة بتضايقك او اكتر حاجه في الشغل مبتحبش تشوفها؟ -
19:55 على الصعيد الشخصي بتحب تعمل ايه بره الشغل؟ -
21:28 لو مكنتش بتعمل اللي انت بتعمله النهارده كان نفسك تعمل ايه؟ -
ابعتولنا اسئلتكم واستفسارتكم واستنونا الإسبوع الجاي في حلقة جديدة من كلام ينور
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
عمر: طيب أنت كشركة طبعاً عندك نظام عشان تراقب حركة المندوبين بالكامل صح؟ يعني بتبقى عارف نقاط البيع دي بتبيع كويس ولا لأ؟
أحمد: طبعاً
01:20
عمر: طيب كلمنا بقى على البيانات الضخمة والتحليلات في العالم ده؟يعني انتو بتلموا بيانات طول اليوم اكيد من المدفوعات ومتوسط المدفوعات، الحاجه اللي بتستهلك والكلام ده كله، كلمنا بقى انت كواحد بتدير شركة بالحجم ده بتبص على البيانات ازاي؟
أحمد: هقول لحضرتك بص احنا خلينا بس متفقين على خط عريض إن العالم كله بشكل عام احنا بقالنا يمكن 3 أو 4 سنين موضوع البيانات ده ابتدى الشركات حتى متوسطة الحجم يبصوا عليه بس في اللي جاي مفيش حد هيشتغل من غير تحليل بيانات خلاص، يعني أنت لو مش بتحلل وبتبص على البيانات فانت مش هتعرف تكمل
هديك مثال بسيط انا راجل بشتغل في شركة من شركات الدفع الإلكتروني فانا عايز اعرف انا بعمل كويس ولا وحش انا مش عارف، أنا شايف اني بعمل ارقام بس انا معرفش الأرقام دي حلوة ولا وحشه فبعمل ايه انا مثلاً ببص اننا عندي ماكينة نقاط البيع في القاهرة مثلاً بتعمل 10000 جنيه في اليوم معاملات وعندي ماكينة زيها موجودة في مرسى مطروح بتعمل 15 ألف جنيه الأرقام كأرقام ممكن تكون كويسة بس ازاي مرسى مطروح بتعمل أكتر من القاهرة وهل ده منطقى ولا لأ فلازم أربطه بإيه اشوف انا اصلاً شكل تعداد السكان عندي في القاهرة زي شكل السكان عندي في مرسى مطروح، طيب هي مرسى مطروح دي بتعمل الـ 15 ألف دول في أيام الصيف ولا في الصيف وفي الشتا لأن في الصيف الدنيا مختلفة فأنت في الأخر البيانات دي حكاية فلازم متبقاش بتبص على حاجه من غير ما يكون عندك الصورة الكبيرة لكل الحكاية لازم أكون متأكد أني رابط كل أجزاء المعلومات ببعض، القاهرة حلوة وجميلة وأكتر وفيها 20 مليون مواطن بس في مواطنين ساكنين في حتت بيبقى فيها كثافة سكانية عالية ممكن تكون بتعمل معاملات كتير بس متوسط المعاملة الواحدة مش عالي وممكن يبقى عندي مناطق تانية أقل بكتير اوي بس المفروض متوسط المعاملة الواحدة يبقى أعلى مع إن عدد المعاملات قليل فهي لازم تكون بتبص على البيانات من منظور شامل، كامل متبصش بس الماكينة دي بتعمل أرقام حلوة ولا وحشه كحقيقة مجردة كده من غير ما تربطها بباقية العناصر بتاعة الحكاية كلها عشان تعرف تاخد قرار
واحنا يمكن برضه الشركة بيحصل فيها معاملات كبيرة أوي خلال السنة ونص اللى فاتوا دول واحنا لسه هنبتدي الاستخدام بتاعنا للبيانات يبقى فيه تحسينات كبيرة اوي يبقى في زي ما بتقول كده مفيش قرار بيتاخد في البيزنس مبيتراجعش الأول بناءاً على بيانات من العمليات اللي احنا بنشوفها على الأرض غير كده هيبقى احنا اه ممكن القرار اللي احنا بناخده يكون صح بس ممكن يطلع غلط برضه لأنه مش مبني على معطيات
عمر: آه يعني مثلاً عندك حته معينه فيها نمو أو عدد المكن مش كفاية فهتبتدي توجه صرفك أو تحاول تفتح حسابات جديدة في المنطقة الفلانية عشان هي مستوعبة.. حاجات من هذا النوع يعني قرارات من هذا النوع يعني تمام؟
أحمد: بالظبط كده
04:24
عمر: تمام، هرجع بقى معلش 3-4 خطوات لورا وعايز اعرف بقى مين أحمد احنا متكلمناش عن أحمد يعني أبتديت ازاي؟ دخلت المجال ده ازاي؟ عملت ايه اول حاجه وصلتك لممكن؟
أحمد:طيب انا خريج هندسة اتصالات 2002 انا كنت راجل طول عمري تكنيكال يعني راجل بتاع أنظمة واشتغلت في شركات كلها بتدور حوالين الدعم الفني، وكان جالي فرصة ان انا انضم لشركة من شركات الدفع الإلكتروني من قبل ما الدفع الالكتروني يبقى حاجه الناس كلها عارفه ايه فأخذت الخبرة نفسها من البدايه اللي هو لما كنا بننزل يعني لما حد كان بيسالني انت بتشتغل ايه مكنتش بعرف اشرح له اصلا انا بشتغل ايه لان الناس مكنتش عارفه لسه الدفع الالكتروني ده ايه والحمد لله الدنيا مشيت كويس والشركه اللي انا كنت فيها بقت من من أكبر الشركات الموجودة في الشرق الاوسط كله واتحركت بعد كده على شركه من الشركات المالتى ناشيونال وبعدين جيت الاهلي ممكن في اكتوبر 21 وانا موجود في الاهلي ممكن بقالي حوالي سنة ونص وشايف بعيني تغييرات عظيمة بتحصل في الشركه ومتطلع اننا نعمل اكتر من كده يعني
05:55
عمر: انتوا قد ايه يعني هل تعتبر من القطاعات اللي بتعين موظفين كتير ولا بتستخدموا التكنولوجيا كتير فـ عدد الموظفين بتبقى قليله؟
أحمد: لا احنا الشركات الدفع الالكتروني اللي بيبقى ليها مكن موجود على الأرض بشكل عام من الشركات اللي بتحتاج عدد كبير، يعني انا عندي الشركه بتاعتي دلوقتي تقريبا حوالي 1000 موظف يمكن حوالي 700 او 800 منهم عبارة عن وكيل مبيعات موجودين على الأرض والتكنولوجي بقى والمكتب حوالي ما بين الـ 200 و 300 موظف بس بشكل عام يعني شركات الدفع الإلكتروني كلها اللي ليها ماكينات على الأرض عدد الموظفين فيها عاليه
عمر: ودي برضه حاجه لطيفه، بتخلق فرص عمل بأعداد مش قليله يعني اعتقد انت اه بتسهل على شركة الكهرباء تقلل الموظفين وكده بس انت في نفس الوقت شركات الدفع الإلكتروني بتخلق سوق جديد، تكنولوجيا جديدة وبرضه محتاجه ناس تدورها وتشتغل منها يعني
07:00
طيب انت النهاردة عندك التطبيق قلتلي عندي حاجات بعملها جديده او بتطوروا دايما صح كده يعني احنا بنتحول من المرحله الاولى للمرحله التانيه وان شاء الله يبقى في مراحل تانيه نوصل فيها للسوبر اب.. ايه اللي انت بتعمله جديد، يعني ايه اللي عندك خلال السنتين، تلاته اللي جايين مركز عليهم كشركة؟
أحمد: انا زي ما كنت قلت لك في بداية الكلام انا لحد النهارده انا الناس اللي بتدفع عندي بتدفع كاش عندي ان شاء الله في خلال السنه دي هقبل الدفع بالكارت كمان ان انا اخلي اللي جاي عندي يدفع بالكارت، يدفع بمحفظه الكترونيه، يدفع بكاش ده ان شاء الله السنه دي هنعمل ده
وابتداءاً من السنه الجايه هبتدي اركز قوي في الحته بتاعه ان يبقى عندي تطبيق المستهلك ان الراجل يقدر وهو ان هو قاعد في بيتهم يخلص كل المعاملات اللي ليها علاقة بالدفع الالكتروني من هو قاعد في البيت من غير ما يحتاج ينزل ونبتدي نبني على الموضوع ده اننا نوصل لفكره اللي احنا كنا بنتكلم عليها اللي هي السوبر اب
بس دايما عايزه عايز ناخد في الاعتبار ان احنا دايما بنجتهد وبعدين ممكن يحصل عندك حاجات في التكنولوجيا والتطورات تلاقيك لا يا جماعه خلاص انا مش هينفع امشي في الاتجاه ده انا لازم اغير نفسي بسرعه ولأ لو الاستراتيجي بتاعتي كانت إن أنا أعمل على المدى الطويل 2 3 4 لا خدوا بالكم اللي جاي ده مهم اوي فلازم نلحق نوضبله من دلوقتي علشان هو المجال بتاعنا ده التغيرات في ديناميكية جداً وميزة ان انت تبقى في شركه من شركات التكنولوجيا المالية دي ان انت يبقى عندك المرونة الكافية انك تغير أهدافك الاستراتيجية حتى لو هي اهداف كبيره لو لقيت ان السوق حواليك بيتحول لحته تانيه لازم يبقى عندك المرور انك تتحول مع السوق ده عشان يبقى عندك تعرف تاخد الفرصة بتاعتك كشركة
عمر: برضو نرجع ونقول المعطيات اللي قدامك هي اللي بتغير تفكيرك مش معنى ان انت بتغير في الاستراتيجية بتاعتك ان انت صح او غلط لأ زي ما واحد بيلعب ماتش ومدرب ينزل لاعب معين في وقت معين ويخرج التاني والكلام ده كله فاعتقد الاداره في الوضع جديد يعني زمان كنت ممكن اقولك ده عنده خبير في المجال ده بس هي النهارده الناس بتستخدم المعطيات او المعلومات بشكل عام
أحمد: أنا آسف لمقاطعتك بس أنا عايز أضيف نقطه مهمه هنا بص احنا الشغلانه بتاعتنا، المجال بتاعنا ده بيسموه فنتك كلمة "تك" دي نص شغلنا تكنولوجي والتكنولوجيا دي دلوقتي بقى التغيير فيها يعني زمان كان في مقولة كده شفناها لعالم اللي كانوا بيشتغلوا مع بيل جيتس أن التغيير اللي في التكنولوجي مبيبقاش منحنى بيبقى منحنى أسي يعني كل ما الوقت يعدي كل ما سرعه التغيير بتزيد قوي قوي يعني زمان عشان تطلع من بنتيوم 2 لبنتيوم 3 قعدوا 10 سنين، دلوقتي عشان تطلع من كور اي 7 لكور اي 9 حصل في سنتين فأنت لازم يبقى عندك نفس الديناميكية عشان تقدر تكمل زي ما انت قولت كده بالظبط خلاص مبقاش في حاجه اسمها خبير في حاجه اسمها حد اشتغل الشغلانه دي بس لازم يقعد كل يوم يتعلم يا اما خلاص هيبقى قديم
10:10
عمر: مفهوم، طب بالنسبه بقى للحته دي في حاجه مهمه قوي انا بحسها في اي شركة العنصر البشري بتاعك ازاي بتعين؟ ازاي بتدور على الموهوبين كشركة يعني بيبصوا لها ازاي؟ وتقديرك للموضوع ده ازاي كرائد أعمال ومدير في شركة كبيرة زي الاهلي ممكن؟
أحمد: ده سؤال جميل اوي يا عمر، بص انا في جمله كده لطيفه اوي دايما بنتبادلها احنا وزمايلنا في المكتب.. التكنولوجيا عامل مساعد في الشركه، المكن عامل مساعد في الشركه، كل حاجه بتبقى عامل مساعد في الشركه بس في الاخر الشركه دي عباره عن بني ادمين، الشركه ناس، انت لما بتروح شركة وتيجي تمشي منها اللي بتفتكروا منها بتفتكر الناس اللي انت اتعلمت منها اللي تأثرت بيهم وتأثروا بيك احنا اكتر حاجه بنحاول نركز عليها عندنا ان احنا نخلى دايما متوسط أعمار الشركه عندنا صغير، فـ عندنا فرصه ان انت لما تنضم للأهلي ممكن يكون سنك صغير وبتغلط
احنا اغلب الناس اللي موجودين في الاداره اشتغلوا في المجال ومن هم صغيرين فعارفين اهمية ان انك تشتغل وتغلط عشان تتعلم عشان لما تيجي بعد كده تاخد قرار تكون واخد القرار ده بناء على خبرات شفتها قبل كده اهم حاجه بالنسبه لنا
احنا عندنا فريق التوظيف برضو شباب صغيرين شاطرين قوي، طبعا مهم ان يبقى في حد أدنى من مستوى التكنولوجيا لو انت راجل جاي تشتغل في التكنولوجيا بس الاهم من ده كله ان انت تبقى عندك مبادرة ومسؤولية دي حاجه محدش هيعلمهالك لو انت جاي الشغل عشان انت عندك مسؤولية عن الشغلانه اللي انت بتعملها هتتعلم مالية، هتتعلم اتش ار، هتتعلم تسويق هتتعلم كل حاجه بس المهم يبقى عندك مبادرة ومسؤولية دي اكتر حاجه بتدور عليها في التعيينات، الراجل ده يا جماعة عنده تحمل للمسؤولية؟ آه يبقى خلاص هاته واي حاجه بعد كده تانيه هنعلمهاله
عمر: اه المسؤولية انك تبقى راجل مسؤول حتى لو دورك صغير في الشركه فأنت مسؤول ولو حد جاي اتكلم معاك في الحته دي فأنت شايل مسؤوليتها صح
أحمد: مظبوط، اللي هو انا جاي الصبح شغلانتي كل يوم الصبح اجي ادوس على الماوس 10 كليكات لو أنا مش فاهم أنا جاي بدوس على الـ 10 كليكات دول كل يوم ليه ودور الـ 10 كليكات في الصورة الكبيرة لتطور الشركة لقدام يبقى في حاجه غلط لأ أنا مهم أوي تبقى مقتنع ان الـ 10 كليكات دول هيخلوا الشركة دي تمنها مليار دولار لو أنت مش مقتنع يبقى في حاجه غلط
12:40
عمر: مفهوم، طيب ده برضه هيخليني اسال لان برضه في ناس بيسمعونا كتير اعتقد بيبتدوا حياتهم، لسه مش عارفين هما عايزين يعملوا ايه.. انت كأحمد لو رجعت حتى تقول لنفسك وقتها.. ازاي يجهز للشركة زي عندك غير ان هو يبقى مسؤول وشخصية والكلام ده كله هل في مهارات فنية المفروض يطور نفسه فيها؟ هل يركز على حاجه معينه؟ يعنى ايه النصائح بشكل عام اللي تديها لأحمد وهو صغير؟
أحمد: اهم حاجه انك متبقاش معتمد على اللي انت اتعلمته وشفت ان هو ده خلاص انا كده خلصت تعليمي، انت لازم تعمل حسابك ان انت عشان شغلك يتطور وحياتك تتطور وتحس ان انت عندك اللي بيسموه اكتفاء ذاتي وشايف ان انت بتنجز لازم تبقى عامل حسابك انك كل يوم تتعلم، ان انت كل يوم الصبح خصص من وقتك 10 دقايق، ربع ساعه الصبح شوف كده أخبار الصناعه اللي انت شايف ان انت هتشتغل فيها لو انت بتتكلم على التكنولوجيا المالية مثلا حاجه زي الاهلي ممكن شوف الناس دي بتعمل ايه كل يوم، لو انت راجل عايز تشتغل في اللي بيسموه دلوقتي "انشورتك" تكنولوجيا التأمين اقرأ كل يوم الصبح كده 10 دقائق على تكنولوجيا التأمين شوف الناس بتعمل إيه بره، ممكن يكون الدنيا مختلفه بس عمرك ما هتبقى عندك رؤيه انك تتطور من غير ما تعرف الناس اصلا بتعمل ايه لان في الاخر احنا مش بنخترع العجلة في تجارب اتعملت لو ما تعلمناش من التجارب اللي اتعملت يبقى احنا بنفتقد الكتير، لازم تتعلم لازم تفضل تتعمل ولازم تبقى عامل حسابك انك هتفضل على طول تتعلم
لو انت راجل بتاع تكنولوجي مثلاً أنا شايف زي ما احنا كنا بنتكلم إن البيانات دي من أهم الحاجات اللي ليها مستقبل في خلال الفتره اللي جايه دي انت حاول ان يكون شغلك في التكنولوجيا ليها علاقة بعلم البيانات وتحليلات البيانات والكلام ده كله لان ده المستقبل في التكنولوجيا
الراجل بتاع الماليه انت مينفعش تعمل حسابك انك فقط هتشتغل محاسب، لا لازم تبقى عامل حسابك انك محاسب بس انت كمان شويه هيبقى محاسب بس بيفهم في البيزنس عشان يعرف ياخد قرار في الحسابات بتاعته يساعد الناس او يساعد الشركة اللي هو فيها ان هو تجاريا تبقى احسن مفيش حاجه اسمها شغلانه كده المنافسة بقت كتير وعدد الخارجيين بقى كتير فلازم تصنع لنفسك جانب زيادة يخلي الشركات هي اللي بتدور عليك لو انت مؤهل كويس صدقني هتلاقي فيه 1000 شركة بتجري عليك
عمر: لأ إجابة هايلة وروعة وأنا بحب جداً ان كل واحد يدور على القوة بتاعته فين وتكملة لكلامك طبعاً زي ما انت قولت يطور ويبقى قابل للتغير وفاتح دماغه بجد والله كلام كويس جداً جداً وقابل للتطبيق كمان يعني أنا اعتقد الناس لازم يبقى عندها العقلية دي
15:33
هسألك برضه سؤال تاني ايه اللي بيخليك مبسوط على صعيد الشغل مش على الصعيد الشخصي هنتكلم على الشخصي بعد كده بس انت بتصحى الصبح تقول أنا مبسوط اننا عملت كذا، أو أنا مبسوط إن الأهلي ممكن حققت كذا.. إيه اللي بيبسطك؟
أحمد: دايما دي نقطه مهمه قوي قوي الواحد أتعلمها من الشغل بطبيعة حياتنا انا بروح الشغل كل يوم صباح الخير النهارده مشاكلنا ايه، النهارده هنحل مشكلة مين، النهارده في عندنا نظام في مشكله فين، النهارده عندنا حاجه جديده لازم نجري نعملها بسرعه يا اما مش هنبقى الشركة الرائدة في السوق زي ما احنا عايزين
اكتر حاجه بتحسس الواحد بالرضا انك تشوف شكل شركتك من عيون الناس اللي براها لما تقعد مع حد مش بيشتغل معاك في الاهلي ممكن يقول لك ما شاء الله عليكم، الناس كلها بتتكلم عليكم كويس قوي ده انا رحت النهارده واستخدمت الخدمه بتاعتكم وانبسطت جدا ان انا شفتها ده اكتر حاجه احنا كاشخاص بنشتغل في شركات وانا منهم اكتر حاجه بتحسسني بالرضا وبتحسسني ان انا كده ماشي في الطريق المظبوط
16:46
عمر: طيب والعكس بقى ايه اكتر حاجة بتضايقك او اكتر حاجه في الشغل مبتحبش تشوفه؟
أحمد: ان انا الاقي حد داخلي بمشكلة من غير ما يكون عنده اقتراح لحلها حتى لو غلط عارف انت كرتون توم وجيري لما كان بيجي ماسك قنبله يديها للي بعده واللي بعده طب حد فيكم حاول يسد فتيل القنبلة لا ما حدش حاول طب يا جماعه ما انت صدقني لو مسكت فتيل القنبلة بصباعك القنبلة هتنطفي لكن لكن انت بتباصي المشكلة، لا انا مبحبش كده معنديش مشكله انك تخش لي كل نص ساعه، حتى لو غلط بس تبقى على الاقل حاولت تفكر انك تحل المشكله دي وعجزت فأنا ده بالنسبه لي شابوه انت حاولت بس كده خلاص
عمر: برضه اجابه مميزه مكنتش متخيل برضه بس فاهمك انت الثقافة بتاعتك انت عايز الناس تفكر وميبقاش عندهم خوف من الخطأ، يعني الخطا مش هو المشكلة، المشكلة في عدم التفكير
أحمد: عشان انا اتعلمت كده، انا اتعلمت ازاي انا اخدت قرار غلط مره واتنين وتلاته واربعه وخمسه ومديريني قالولي واحد واتنين وتلاته واربعه غلط واللي اتخانق معايا ومش عارف ايه ما هو انا معنديش طريقة تانية عشان أتعلم لازم تغلط عشان تتعلم
عمر: انا برضه هستخدم الحلقه دي في الناس بتاعة الأهلي انهم يبقوا سامعين الكلام ده كله لو عايز توصلهم رساله تبقى من خلالنا
أحمد:ما هي دي رسالة ضمنية، انا هبعتلهم ميل ان كلكم لازم تسمعوا الحلقة غصب عنكوا دلوقتي
عمر: انت فاهم برضو ان انا زي ما احنا قلنا في اول الحلقه الأهداف، الاهلي ممكن بتحاول تعمل شمول مالي فانا مقتنع ان انت من غير توعيه مالية وصولك للشمول المالي صعب كدولة أو كمجتمع عربي بشكل عام فهو دور البودكاست هنا ان هو يحاول يثقف الناس ويعلم الناس ان في حاجات بالشكل ده ودوركوا أن شركات زيكو ان الناس تنفذ بقى عندكم فاهم قصدي يعني أعتقد هو دور مكمل فياريت طبعاً الناس اللي عندك وفي الشركات وفي السوق ياريت يحاولوا يثقفوا نفسهم واحنا بنحاول نعلم الناس من خلال المنصة دي
أحمد: ودي من أكتر الحاجات اللي خلتنا مبسوطين ان احنا نعمل مع بعض اللقاء ده ونعمل كمان في المستقبل لقاءات كتير يعني ان احنا مصدقين في اللي انت بتعمله
عمر: ربنا يخليك يا أحمد والله وأنا عارف احنا اتكلمنا كذا مره وان شاء الله هيبقى في بينا تعامل برضه هنعلنه للمستمعين بتوعنا قريب حاجه هنعملها بالتنسيق معاكوا يعني مساعدة اننا نوصل أكتر للناس الموجودة خاصة في مصر وخاصة في السوق عندك في مصر و إن شاء الله ده يبقى أفضل للصالح العام يعني أعتقد وجود شركتك سواء من توفير فرص عمل أو حتى مساعدتهم إنهم ينظموا حياتهم الماليه دي حاجه مهمه جدا ودي من الحاجات اللي انا متوقع انها تكون من الأجندة بتاعتك كرجل أعمال أو كرائد اعمال يعني..
19:55
طيب على الصعيد بقى الشخصي قول لنا بقى حاجه كده او حاجتين شخصية بقى انت بتعمل بتحب تعمل ايه بره الشغل؟
أحمد: والله انا بره الشغل مش بعمل حاجات كتير يعني انا من الناس اللي بيسموهم فاميلي جاي -رجل عائلي- بحب اخد مراتي وبناتي وأخرج أزور أهلي، والدتي واخواتي وقرايبي
بحب اتفرج على الكوره جدا كل انواع واشكال الكوره واحنا بنسجل الحلقه دي وليفربول كان كسبان مانشستر يونايتد 7 امبارح فدي كانت حاجه لطيفه جدا
عمر: يمكن دي حاجه مخلياك في مود أحسن للحلقه
أحمد: ده حقيقي، لأن طبعاً انا واحد من الناس مكنتش بشجع ليفربول غير من ساعه ما محمد صلاح راح، طبعا فصلاح أثر في العالم العربي كله خلي الناس كلها تتفرج على ليفربول وتشجع ليفربول طبعا من غير ما نبخس حق الناس اللي كانت بتشجع ليفربول من زمان يعني، انا طول عمري راجل أرسنلاوي ولكني بشجع دلوقتي ليفربول عشان خاطر صلاح
عمر: طبعاً لا هو الصراحه يعني اللي بيعملوا كل شويه بيفاجئ الناس وانا اعتقد التأثير بتاعه كبير جدا على الناس بشكل عام سواء الأولاد الصغيرين أو الناس الكبيره حتى
وامبارح اعتقد انه كسر رقم جديد او حاجه كده كان حد بيقولى ان هو لو جاب جون
أحمد: اه اه هو بقى الهدّاف التاريخي لليفربول في الدوري
21:28
عمر: طب دي الحاجات اللي انت بتعملها بره.. آخر سؤال هسالهولك سؤال شخصي لو مكانش احمد بيعمل اللي هو بيعمله النهارده وموضوع الماليات بقى وظروف الحياه وكل الكلام ده كله متشاله برضه كنت هتعمل ايه يعني ايه اللي كنت هتعمله بره اللي أحمد بيعمله النهارده؟ يعني انا مثلا قلتها يمكن في حلقة قبل كده ان انا كان نفسي أعمل حاجات لها علاقة بالكيمياء انا بحب جدا الكيمياء حتى لو مجال غريب جدا بره قدراتك النهارده بس كنت كان نفسك تعمل إيه؟
أحمد: أنا كنت متخيل ان انا هقدر اعمل ستاند اب كوميدي او اعمل توك شوز اشتغل في الميديا يعني
عمر: حلو، بس الهندسه خدتك يعني انت حبيت الهندسة والتكنولوجيا ورحت الناحيه دي
أحمد: بس الهندسه خدتني اه زي النداهة ندهتني كده
عمر: آه والله هي متفهمش بتبقى عايز حاجات كده معينه وبعدين حاجة بتشدك وبتكمل وبتلاقي نفسك ناجح فيها فبتزود عليها وكده ومش معنى كده انك مبتحبش اللي انت بتعمله أكيد انت بتحب اللي انت بتعمله لأنه واضح من اللي انت بتبنيه يعني المرتين اللي اتقابلنا فيهم واضح حبك للي انت بتعمله انت مش بتعمل كده وخلاص عشان وظيفة يعني أنا متأكد من كده يعني
أحمد: بص ممكن تحافظ لشوية وقت بس مش هتعرف تاخد مسيرة طويلة في كارير مفيش فيه حب أو شغف في الكارير يعني مش هتعرف تكمل فترة طويلة يعني ممكن تقعد فتره صغيره بس انا راجل بيشتغل في التكنولوجيا المالية داخل في 17 سنه يعني
عمر: وان شاء الله تقعد وقت اكتر من كده وتوصل للي انت عاوزه وتحقق اللي انت عايز تحققه وتبقى مؤثر كويس لكل اللي بتشتغل معاهم انت معاك فريق كبير وان شاء الله يبقوا كلهم في مكانه احسن كنهم بيشتغلوا معاك
السؤال اللي بسأله اخيرا ايه اللي انا مسألتهوش كنت متوقع اسأله او حاجه حابب تتكلم عنها؟
أحمد: لا الحقيقه يا عمر مفيش حاجه في دماغي يعني ما شاء الله عليك غطيت تقريبا كل جانب من النقاش التمهيدي مع بعض .. لأ مفيش حاجه في دماغي يعني ماشاء الله عليك غطيت كل حاجه ممكن نفكر فيها
عمر: ميرسي جداً جداً يا أحمد أنا مش عايز اخد من وقتك أكتر من كده أنا عارف انت مشغول وشكراً على وقتك بجد اللي انت أديتهولنا النهاردة كنت ضيف جميل وبشكر كل الناس اللي وصلوا معانا لآخر الحلقة وأشوفكم إن شاء الله الاسبوع الجاي .. شكراً يا أحمد
أحمد: ميرسي يا عمر .. شكراً
Translation of some words and terms:
Big Data البيانات الضخمة
Analytics تحليلات
Average متوسط
Medium Size متوسطة الحجم
Going Forward المضي قدما
Pieces Of Information أجزاء من المعلومات
Average Per Transaction متوسط المعاملة الواحدة
Usage الاستخدام
Technical Support الدعم الفني
Sales Agent وكيل مبيعات
Consumer App تطبيق المستهلك
Consideration الاعتبار
Changes التغييرات
Dynamic ديناميكية
Fintech التكنولوجيا المالية
Shift التحول
Grab خطف
Curve منحنى
Exponential آسي
Dynamicity ديناميكية
Outdated عفا عليه الزمن
Human Capital رأس المال البشري
Hiring Team فريق التوظيف
Ownership مبادرة ومسؤولية
Technical Skills مهارات تقنية
Self-sufficient الاكتفاء الذاتي
Industry الصناعة
Insur Tech - Insurance Technology تكنولوجيا التأمين
Vision رؤية
data science علم البيانات
data analysis تحليل البيانات
Finance الماليه
Commercially تجاريا
Competition منافسة
Edge جانب
Caliber عيار
Market leader الشركة الرائدة في السوق
Satisfaction الرضا
Culture الثقافة
family guy رجل عائلي
Effect أثر
Influence تأثير
Sustain الحفاظ
Aspect جانب
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الدفع_الإلكتروني #الجزء_الثاني