62. داخل دماغ المستهلك
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
كتب الحلقة : مصطفى أحمد - من مستمعي كلام ينور
كنا نزلنا على إنستجرام سؤال: ازاي نقلل الصرف في السوبر ماركت؟
في الحقيقة جالنا إجابات كتير، وواقعياً هو موضوع مهم ويستحق اننا نتكلم عنه، لان زي ما كلنا عارفين الأكل والشرب أساس الحياة لأي انسان ، وفي جزء لا بأس به من الميزانية بيتصرف في البند ده ولكن مع الأسف نسبة كبيرة من الناس بتصرف على البند ده بطريقة غير عقلانية تماماً
كلنا بنحتاج نروح السوبرماركت نجيب طلبات البيت فخلينا نقول إن حلقة النهاردة موجهة لكل الناس اللى بتسمعنا باختلاف حالتهم الإجتماعية ومراحلهم العمرية، وضروري جداً تكون فاهم وواعي بالحيل التسويقية اللي بيلجألها أصحاب المحلات لجذبك كمستهلك
والسوبر ماركت هنا إشارة لأي مكان بنشتري منه احتياجاتنا الأساسية.. سوبر ماركت، محل بقالة، كشك.. أياً كان المسمى، أي مكان بتنزل تشتري منه بنفسك او اونلاين
: في حلقة بنقسم عملية الشراء بتاعتنا لـ 3 مراحل
مرحلة ما قبل السوبر ماركت -
مرحلة وأنت في السوبر ماركت -
مرحلة ما بعد السوبر ماركت -
الهدف من الحلقة مش اننا نقولك متشتريش خالص أو قلل إستهلاكك..لأ، الهدف انك تكون واعى بطريقة صرفك وتعرّف عقلك ازاى يفرق بين اللى أنت عاوزه واللي انت محتاجه.. والفرق بينهم كبير
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
انا عمر شمس اهلا بيكوا في حلقة جديدة من كلام ينور
الحلقة دي حلقة مختلفة جداً لأنها مكتوبة من الأستاذ مصطفى أحمد من مستمعين البودكاست
احنا كنا نزلنا على انستجرام بنسأل الناس : تفتكر ازاي ممكن تقلل الصرف في السوبرماركت
وهو بعتلي شاكراً على الصفحة بتاعة الانستجرام كذا تعليق جميل ، كان من أكتر الناس اللي ردت على السؤال والردود بتاعته كانت كويسة جداً وموضوعية جداً وبعدين كنت بشكره على إجاباته وكده فعرض عليا يكتب حلقة قالي إيه رأيك قولتله طبعاً ياريت دي حاجه تشرفني وفعلاً بعتلي شاكراً سكربت بتاعها بعديها بيوم عملنا عليه شوية تعديلات والنهاردة هنتكلم ونشوف إيه اللي كان مكتوب
فـ حلقة النهاردة موجهة تقريباً لكل الناس اللى بتسمعنا باختلاف حالتهم الإجتماعية ومراحلهم العمرية لأن من الضروري تكون فاهم وواعي بموضوع السوبر ماركت أو الشرا النهارده لانك غالباً بتشتري طلباتك من السوبرماركت بنفسك او بتشتري اونلاين
محدش فينا بيقدر يعيش من غير سوبر ماركت وممكن في حالات تانية تكون بتشتري من الكشك اللي جنبكوا أو اي حاجه.. ففي الحلقة دي عايزين نناقش بعض الأساليب والمفاهيم الخاطئة
زي ما كلنا عارفين السوبر ماركت أو الطلبات الأساسية في الحياة الأكل والشرب ، يعني لما أبص على الميزانية بتاعتي هلاقي إن الحاجات دي من الأساسيات مش من الكماليات احنا كلنا لازم نصرف جزء من فلوسنا هناك ، ولكن مع الأسف في ناس كتير جداً لما بتيجي تبص على الميزانية بتاعتها الحته دي بالذات مبتبقاش بتتصرف بعقلانية كاملة
الهدف من الحلقة مش انك متشتريش خالص أو أنك تقعد تقلل من استهلاكك مش ده هدف الحلقة خالص ، الهدف انك تكون واعى بطريقة صرفك وتعرّف عقلك ازاى بيفكر وازاي بيفرق بين اللى أنت عاوزه واللي انت محتاجه.. والفرق بينهم كبير! ممكن حاجه تكون عايزها وحاجه تكون محتاجها واحنا في الاساسيات هنا بنميل أكتر ناحية الأحتياجات
وكمان لازم تكون واعي بالحيل التسويقية.. يعني زمان المحلات كانت بتسوق للمنتج اللى انت محتاجه عشان تيجى تشترى لكن دلوقتى هما بيحاولوا يقنعوك اصلاً انك محتاج المنتج دا وانك لازم تشتريه وقد إيه الفرص دي جميلة والعروض دي هتخلص وتفوتك والكلام ده كله واحنا أتكلمنا في حلقة قديمة على الحيل التسويقية برده ممكن ترجعلها ديماً لو عايز تسمع أكتر عن الموضوع ده
خلينا نقسم عملية الشراء لـ 3 مراحل
أول مرحلة وهي قبل ما تروح السوبرماركت
في المرحلة دي لازم تكون مجهز ورقة بالطلبات والكميات اللى انت محتاجها تحديد الكميات هي أول خطوة لازم تعملها بعد ما تعرف المنتج نفسه يعني مفيش حاجة اسمها هشترى رز في حاجة اسمها هشترى 3 كيلو رز للأسبوع دا مثلاً
أنت كمان ممكن تحسب تكلفة الطلبات دى عن طريق استخدام تطبيقات للسوبرماركت وأغلب السوبرماركتس دلوقتي عندها ابلكيشن خاص بيها ، ودلوقتي كمان طلعت تطبيقات بتقارن السوبر ماركتس ببعضها فأنت مش محتاج تنزل من بيتكو أو تقوم من على الكنبة عشان تعرف سعر الحاجه دي ، برده أنت ممكن تجوجل وجوجل يطلعلك إقتراحات معينه لأن النهاردة بقى في حتة كاملة في جوجل اللي هي جوجل شوبينج تقدر توجهك ان انت تعرف ، احنا لسه في مرحلة الدراسة احنا لسه منزلناش احنا بنطلع احسن سعر للمنتج بتاعنا
دلوقتى انت معاك ورقة فيها الطلبات والأسعار والمكان عرفناه حددنا هنشتري من أنهي سوبر ماركت ، هنا هيختلف الناس بقى في ازاي أدفع.. واحد هيقولك أنا عايز أدفع بالفيزا واحد أدفع بطاقة ائتمان وواحد أدفع كاش.. لو انت بتقدر تتحكم في نفسك ، وعندك خطة دفع معينه للكريديت كارد وأشتريت بيها وقفلتها مثلاً لحظياً من التطبيق بتاعك عشان ما تدفعش فوايد أنا معنديش مشكلة ولكن الأفضل ديماً بالذات في البنود الأساسية في حياتك أنت بتاكل وبتشرب بنود اساسية لازم تطلع من ميزانيتك ، فأنا أفضل أنها تطلع من الكاش بتاعك أو من حساب البنك بتاعك على طول
الدفع الكاش عمتاً بيمنعك انك تشتري أي حاجة زيادة عن الطلبات اللى انت كاتبها في الورقة حتى لو قررت انك تشترى حاجة مش في الورقة ده معناه انك هتبتدي تحيد عن الحاجات الأساسية اللي أنت كاتبها وده غالباً هيجي على الحاجات اللي كنت محددها لنفسك عايز تستهاكها خلال الشهر
يعنى مثلاً فى شيكولاتة عجبتك وعايز تشتريها وانت مش كاتبها في ورقة الطلبات فهتخلي مخك يقارن هل أسيب الجبنة اللي أنا هستهلكها خلال الأسبوع كله عشان أكل حتة شيكولاتة هتقضيني في النص ساعة اللي جايه! فمخك هنا هيبص القيمة على الجبنة بمقابل الشيكولاتة وعشان كده احنا بنكتب ديماً لما بنكتب بنطلع كل الأفكار اللي جوه مخنا نحطها على ورق فالعاطفة بشوفها بقى هنا هل في هنا عاطفة مسيطرة عليا ، هل في قرار إنفعالي أنا هاخده اننا هلغي الجبنة بتاعتي الأسبوع ده كله عشان حتة شيكولاتة ولا لأ فالكتابة مهمه جداً انك تبقى مجهزها وهي الأداه بتاع التبرير بتاع قراراتك ديماً
وده مايمنعش انك تشترى اللى انت عاوزة الفكرة انك تشترى اللى انت عاوزه في نطاق الميزانية اللى انت حاططها انا مثلاً حاطط 100 جنيه للترفيه في ميزانيتى الشهرية وانا بروح السوبرماركت إسبوعياً فكل إسبوع أنا معايا 25 جنيه اقدر اكافئ بيهم نفسي طول ما أنا ملتزم بميزانيتي احنا هنا بنستخدم أي أرقام يعني ممكن الأرقام دي تبقى أعلى أو أقل ، الفكرة هنا إني وانا بجهز ميزانيتي أو بجهز قائمة المشتريات بتاعتي أنا عارف أنا المفروض أصرف ازاي
السؤال اللي بعده.. أنا جهزت كل حاجة وعرفت هجيب ايه منين و بكام ، السؤال اللي بعده بقى أروح إمتى السوبرماركت؟؟
طبعاً لو أونلاين معنديش مشكلة أوي لأني ممكن أحط الطلب في أي وقت بليل أو الصبح ، مفيش زحمة مبقابلش حد هحطه وهنام وهيجي وقت ما يجي ، بس طبعاً في أماكن من اللي طلعتلي في البحث بتاعي مش هلاقيها أونلاين.. أغلب الناس بتروح تشتري طلباتها في نهاية الإسبوع أو الأجازات.. الزحمة ممكن تخليك متوتر
يعني لو روحت سوبر ماركت في حته زحمة أنت ممكن تعمل شرا اندفاعي وأنت مش حاسس نتيجة الضغط اللي بيحصل عليك لما تشوف الناس حواليك بتشترى اكتر منك والعربيات مليانه حاجات وبيدفعوا فلوس كتير جداً وانت ماشي بالورقة اللى انت كاتبتها دى ملهاش لازمه والفلوس اللى معاك قليله وحياتي منظمه وتبص جانبك تلاقي واحد خارج بعربية قده مرتين وأبنه بيزق عربية تانية وراه.. يعني مش لازم ، ممكن تحاول توفر على نفسك كل الأحاسيس دي والمشاعر دي
انت ممكن تروح يوم خلال الإسبوع لو ده مناسب مع وقتك أو تروح الصبح بدري المكان هيكون فاضى ، حتى في الأجازات الصبح بدري أحسن من نص اليوم والزحمة طبعاً الحاجات دي معروفه وبتتكرر وهتلاقي على جوجل بيديك وقت الذروة بتاع كل مكان ، أمتى بيبقى زحمة وأمتى بيبقى فاضي فاحنا بننص ديماً انك تعمل شوبينج وأنت أعاصبك هادية وفي وقت لذيذ
برده من الحاجات اللي ناس كتير جداً ردت بيها على الانستجرام ان بلاش تروح و انت جعان لأن الجوع بيأثر على طريقة شراك بيخليك تشتري حاجات انت مش محتاجها بس عشان انت جعان! خاصة في رمضان قبل الفطار الواحد بيبقى جعان جداً طبعاً وبعدين متخيل ان هو عايز ياكل كل حاجه النهاردة فالمثال ده بالذات أنا بحس بيه شخصياً في رمضان فبحاول أبعد عن النزول وقت الصيام لأن أنت بتبقى متخيل انك ممكن تاكل حاجات كتير جداً وبطبيعة الحال انت مبتعرفش
تاني مرحلة وانت في السوبرماركت وفي المرحلة دي هنتكلم شوية على الحيل التسويقية اللي اتكلمنا عليها قبل كده في حلقة زي ما قولنا
أغلب السوبرماركتس بتتصمم بطريقة المتاهة زي ايكيا مثلاً بتخش تلاقي نفسك ماشي في طريق معين هو محددهولك عشان تتفرج على حاجات معينه ده طريق إجباري لازم تلف على كل الأقسام قبل ما تخرج ، جوا المتاهة دى انت بتشوف منتجات كتير انت ممكن اصلا متكونش محتاجها ، بس خليك فاهم ان العلاقة ما بين أنك تقعد جوه والصرف بتاعك هي علاقة كل ما نقعد أكتر كل ما هنشتري أكتر فمتنساش نفسك وتخلي الوقت ياخدك جوه دي حاجه خلي بالك منها.
هتلاقي أغلب السوبرماركتس العربيات بتاعتها حمولة 100 كيلو ودي من الحيل التسويقية أن كل ما العربية بقت كبيرة هيكون هدفك تملاها على الأقل عشان منظرك قدام الناس! فلو السوبرماركت حاطت كذا حجم للعربيات حاول تاخد عربية على قد احتياجاتك
برده من الحاجات اللي دايما هتلاقى في السوبر ماركت أو في حته قريبة جداً منه هتلاقي ماكينة صراف آلي وهتلاقيهم بيهتموا ديماً في الاعياد والأجازات أن المكان ده يبقى متغذي بالفلوس عشان تسحب براحتك و تشترى اللى نفسك فيه وطبعاً دلوقتي المكن بتاع الفيزا موجود على كل الكاشيرات وده برده بيساعدك أكتر أنك تصرف فتوفير السيولة في مكان السوبر ماركت ده مهم جداً بالنسبالهم أنهم يساعدوك انك تصرف أكتر
العروض.. العروض برده طريقة مشهورة جداً في الترويج النهاردة الحمدلله احنا عندنا عروض طول السنة يعني احنا زمان واحنا صغيرين مكنش في العروض دي كتير النهاردة الحمدلله احنا عندنا عروض طول السنة روح في أي وقت هتلاقي عروض يعني أنا اتحدى أي حد يروح محل كبير من المحلات وميلاقيش فيها عرض ديماً في عرض حتى لو على قسم صغير
عرض هنا مش معناها بتشتري السلعة أرخص ، ممكن هو يكون اصلاً منزلها بسعر غالي وبعدين يحط عليها عرض عشان بس يحسسك انك بتشتريها الحمدلله أرخص شوية من السعر اللي بتتباع بيها بس دي ممكن متكونش حقيقية وخلي بالك انت كرئيس شركة بتدور الشركة بتاعتك انت مش هتخسر عشان العميل بتاعك! كده كده أنت بتعمل هامش ربحية على الحاجات اللي انت بتبيعها هتسميها بقى في عرض أو مش في عرض كده كده أنت مش هتخسر
في بعض الأحيان العروض الحقيقة بتكون عروض على منتجات انت عارف سعرها فعارف انها كده فعلاً رخيصة وان دا عرض عشانه هتيجى السوبرماركت في الحقيقة العروض دى موجودة بس بكمية قليلة و لفترة محدودة هدفها بس إنك تيجى وغالباً لما تيجي هتشترى حاجات تانية كتير فحتى لو لقيت عرض فعلاً حقيقي حاول تلتزم أو تاخد ده ومتعملش شرا إندفاعي في حاجه جانبية ملهاش لازمه لأن هو ده هدف السوبر ماركت هو بيجيبك بالحاجات دي
طبعاً برده الحمدلله كل حاجه النهاردة بالتقسيط هنلاقي عروض تقسيط لو دفعت فيزا بس لازم تشتري بأكتر من 1000 جنيه أنا مع التقسيط في حاجات معينه لو هناخد مثلاً أصل استثماري آه أنا ممكن أقسطه لأنه هيجيب دخل والكلام ده كله لكن أكلي وشربي اللي هو جاي من الميزانية بتاعتي في حاجه أساسية أنا المفروض أكل منها كل شهر وجايه من دخلي اللي بيجيلي كل شهر فالطبيعي المفروض مقسطش آه هي بتبقى حاجه مغريه هدفع النهاردة 1000 جنيه وهاخدهم منك 15 جنيه في الشهر لمدة 8 سنين أنا بقول أي ارقام لكن لأ ده استهلاكي الشهري بتاع أكلي فانا مش عايز بس أنخدع اني أعمل حاجه زي كده ، أصل أنا وانا بجيب الفطار بتاع الشهر ده لقيت تليفزيون رائع 65 بوصه عليه عرض فهدفع 100 جنيه في الشهر كل الكلام ده جميل وحلو بس أنا نسيت أنا جاي ليه أنا كده باخد قرار عشوائي من غير أي نوع من أنواع التفكير ، لأ ممكن أرجع البيت وأفكر واشوف بند بتاع التلفزيونات بتاعتي في ميزانيتي شكله عامل ازاي وبعد كده اروح اجيب نفس التلفزيون عادي بس مش لازم يكون قرار عشوائي
فى السوبرماركت وخاصة في المحلات الكبيرة هنلاقي المنتجات مش بتتحط بشكل عشوائي كده لأ الموضوع وراه تحليل نفسي وعلم نفس وسلوك بشري بيعمل إيه في المواقف دي ، والتطور بتاعها والأحسن كمان في التطبيقات خلاص هو بيعرفك ، بيعرف أنت بتعمل شوبينج فين بيشوف المنتجات اللي انت بتحبها إيه فبيطلعهالك في أول صفحة في النصايح اللي ممكن تشتريها فهما بيعرفوا شخصيتك أكتر كمان من خلال المواقع الإلكترونية والتطبيقات ولكن برده بشكل عام السوبر ماركت بيرتب المنتجات بطريقة معينة
يعني مثلاً اغلب المنتجات المهمة و الغالية هتلاقيها على ايدك اليمين وانت داخل عشان انت بستخدم ايدك اليمين اكتر من ايدك الشمال فالأسهل ليك تاخد المنتج اللى على ايدك اليمين على الرغم ان اللي على ناحية الشمال منتج أفضل ممكن هتاخده فهما بيعملوا حاجات معينة في طريقة التوزيع ممكن يكون الأرباح بتاعهم أعلى في الحاجه دي عن الحاجه دي
المنتجات برده بتتوزع على الرفوف افقياً يمين شمال و غالبا بتكون أنواع مختلفة لنفس الماركة يعني مثلاً أنواع شيكولاته سادة ، بالبندق ، بيضه ، غامقة كلهم لنفس الشركة فبيبقى السؤال بدل ما اشترى شيكولاته ولا لأ.. اشترى انهى نوع! يعني هو بيوزع كل حاجه بطريقة علمية وبعدين بيغيروا الترتيب ده ويشوفوا إيه اللي بيبيع أكتر يعني هحط ترتيب الشيكولاتة من نوع مختلف ولا لأ ، دي عليها ربحية أكتر اللي عليها ربحية أكتر أو عليها طلب أكتر ممكن أعلي السعر شوية وهكذا هو بيلعب بكل الطرق عشان يزود الأرباح بتاعته
ندخل بقى على المرحلة اللي بعدها وهي بعد ما تخرج من السوبرماركت
بعد ما تخلص شرا خلي الفاتورة معاك ممكن تطلب منه يبعتهولك على الإيميل لو مثلاً مش عايز ورق تضيع أو تاخد الورقة حتى هتبص في الورقة تشوف الحاجات المتكررة اللى انت بتشتريها كل أسبوع ممكن تعمل التحليل ده لفترة بسيطة أنا مش عايزك تقعد طول حياتك بتعمل تحليل أنت بتشتري إيه والحاجات دي كلها أنت بعد شوية هتعرف أنت عايز إيه بعد شوية مثلاً هتكتشف إن في سلعة بتشتريها اكتر أو أقل من احتياجك انت بتستهلك أكتر أو أقل .. الخطوة دي هتساعدك تبتدي تكتب القايمة بتاعة الشهر الجاي أو الاسبوع الجاي هتكتبها منين من التحليل اللي بتعمله من ما بعد الشرا
وفي النهاية عاوز أقول - طبعاً أنا مش خبير تغذية ولكن أغلب الأمراض اللي بنعاني منها زي السكر والضغط والسمنة وأمراض القلب غالباً بتكون من عادات الأكل الخاطئة فغير إنها بتأثر على صحتك هي كمان بتكلفك علاج ودكاترة! ففي تكلفة غير مباشرة من الأكل الوحش اللي احنا بنعمله كلنا فخليك واعى وانت بتشتري أعرف إيه المفيدة ليك ولصحتك وتوفر فلوسك مش بس عشان توفير الميزانية والكلام ده كله ولكن عشان تحمي نفسك من المرض اللي ممكن تجيلك وممكن تصرف عليها لفترة قدام بشكل اعلى مهم جداً جداً الموضوع ده يا جماعة أنا برده مبتكلمش باستفاضة على الأكل والكلام ده كله بس أنا مش عايز الناس تصرف يقولك احنا المفروض ناكل لحمه كام مره في الاسبوع أنا مش مع أو ضد انت بتاكل كتير أو قليل ولكن انت لازم تبقى عارف فوايد انك تاكل لحمه كل يوم والضرر بتاعتها وفي نفس الوقت لو أنت قللت استهلاكك منها خليتها يوم أو يومين ممكن بالفلوس بتاعتها أجيب حاجات مفيدة أقدر أكل بيها دايت صحي أكتر تساعدني على صحتي وتخليني إنسان في حالة نفسيه وسعادة أعلى فحتى الميزانية والشوبينج بتاعك مش عايزك تتأثر بالحاجات الموجودة في المجتمع المتعارف عليها عايزك تخش تقرا لو أنا بكون طبق سلطة ازاي أقدر اكونه بطريقة علمية صحيحة وفي نفس الوقت طعمها يبقى حلو ولذيذ أنا مش خبير تغذية ولكن الحاجات دي الميزة فيها انها متوفرة أونلاين
وحاجه اخيره حابب أختم بيها كلامي.. ناس كتير بتنصح أنك ما تاخدش أولادك معاك عشان ممكن يشبطوا فى اى حاجة وده هيخليك تصرف أكتر ولكن بالعكس جزء كبير من تعليم ابنك لأي حاجة في الحياة هو إنه يشوفك بتتصرف ازاي ويقلدك زي ما اتكلمنا في حلقة بدايات الاستثمار ، وانت فى السوبرماركت أدي إبنك فلوس من مصروفه وعلمه ازاي يصرفها وازاي يختار الحاجه اللي هو محتاجها وبرده ده هيخليك قدام نفسك تحترم ميزانيتك بالعكس دي ممكن تبقى إيجابية ليكو انتو الأتنين انت نفسك هتلتزم عشان ابنك معاك وهو هيتفرج عليك
نصيحة أخيرة أبعد عن الضغط المجتمعي من تأثير الناس على قراراتك "الناس هتقول إيه!" وأنا شكل عربيتي صغيرة ومش جايب حاجات كتير في الغالب الناس مش هتقول حاجة لأن بنسبة كبيرة محدش مركز معاك زى ما انت متخيل كل واحد مركز في حياته فخليك عارف أنت محتاج إيه وفلوسك قد إيه وتعامل على أي أساس
شكراً جداً على وقتكوا معانا النهاردة ويارب تكون الحلقة عجبتكوا وهستنى استفساراتكوا واسئلتكوا على صفحتنا على السوشيال ميديا و اشوفكوا الاسبوع الجاي
Translation of some words and terms:
Suggestions إقتراحات
Debit card بطاقة ائتمان
Control تحكم
Directlyمباشرة
Supply إمداد
Order طلب
Impulsive Spendingشراء إندفاعي
Peer Pressureالضغط المجتمعي
Peak timeوقت الذروة
ATMماكينة صراف آلي
Section قسم
Margin هامش
pop ups تظهر ظهور مفاجئ
Receipt الفاتورة
Feedback نتائج
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #السوبرماركت #المستهلك #الحيل_التسويقية