94. وهم المعرفة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنكمل كلامنا عن أنواع الأوهام والتحيزات اللي بتأثر علينا وقت اتخاذ القرار ، اتكلمنا الحلقة اللي فاتت عن "وهم السيطرة" ، في حلقة النهارده بنتكلم على نوع جديد من الأوهام اللي الناس بتوهم نفسها بيها وهو "وهم المعرفة" ازاي وهم زي ده بيأثر عليك وعلى قراراتك الاستثمارية
01:40 إيه هو وهم المعرفة؟ -
06:05 إيه العوامل اللي بتخلي عندي وهم المعرفة؟ -
06:13 تحيز التأكيد -
07:10 تأثير الخبراء -
08:50 التحيز الناتج عن التاريخ -
09:48 تأثير المجموعة -
11:32 تحيز توافر المعلومة -
12:40 إيه المصادر اللي باخد منها معلوماتي؟ -
13:30 اتجاه السوشيال ميديا للفيديوهات القصيرة (معلومة في رغيف) -
14:00 لو عايز تبقى خبير أو فاهم في حاجة معينة ، تعمل إيه؟ -
14:20 نوّع مصادر معرفتك -
15:17 اسمع لرأيك وللرأي الأخر -
15:49 التعميم مشكله كبيره -
16:59 المعرفة بالذات والقدرات -
17:53 المعلومات بتتجدد كل يوم ، فمتوقفش تعليم -
19:54 وهم المعرفة والحرية المالية -
وهم السيطرة ووهم المعرفة حلقتين هيساعدوك على المدى الطويل انك تعمل خطط استثمارية احسن ، متصدقش كل حاجه بتسمعها ، اسمع ودور واعمل البحث بتاعك واقتنع وحاول على قد ما تقدر تشيل أي تحيزات جواك وقت اتخاذ القرار
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكوا في حلقة جديدة من بودكاست كلام ينور النهارده حلقة تانية من أنواع الأوهام اللي الناس بتوهم نفسها بيها وبتاثر على اتخاذ القرار
اللي وجه نظري للموضوع ده مستمع او شخص قابلته مؤخرا أ/ حازم هو طالب في الجامعه وما شاء الله يعني تفكيره اعتقد سابق لسنة وسابق للوضع اللي انا كنت متخيل ان ممكن حد في هذا السن يكون بيفكر بالطريقه دي وهو وهم المعرفة ، خلاني اخد بالي من النقطه دي وخلاني اكتب الحلقه دي وخلاني افكر في الحته دي قد ايه هي مهمه جدا للناس اللي بتسمع تاني في اتخاذ قراراتهم ، في اتخاذ افكار للتحويش والاستثمار والكلام ده كله
01:40
إيه هو وهم المعرفة؟
وهم المعرفة هو إحساس الناس انها فاهمه عن موضوع بطريقة عميقة ولكن الوهم ده بيتكون ان انت مبتبقاش حطيت وقتك ولا مجهودك ولا معرفتك في الحته دي ولا فكرت بطريقه فيها تفكير نقدي هل الكلام اللي الراجل بيقوله ده اصلا صح ولا غلط
انا باخد قشور معرفة من حاجات سطحية ، سمعت واحد في التلفزيون بيتكلم عن حاجه سمعت عمر بيقول حاجه فحسيت بنفسي ان انا عندي المعرفة ، والمعرفة دي مع الاسف بتظهر حاجه اللي هي دايما بنقول عليها الفهلوة ان انا اخدت معلومات بسيطه جدا جدا على موضوع معين وبقيت فهلوي وبقيت بعرف اتصرف وابقى عارف اخد قرارات وبقيت خبير وبقيت كل الكلام ده
مع الأسف في حاجات كتيره جدا في الدنيا ، في حاجات طبعا ممكن تتعلمها بسرعه ومش محتاج تبذل فيها مجهود ولكن في حاجات وحاجات مهمه جدا وقرارات بتاثر على حياتك بشكل جامد جدا مينفعش تاخذها بالفهلوه
وهضرب مثال في حاجات غير المعرفة بتاعتها انت لازم يبقى عندك خبره وتقضي وقت فيها وده اللي انا بقوله للناس ان انت لما تستثمر سنه سنتين ثلاثه مش ده اللي هيخليك تكون قرار اصلا عن الاستثمار لازم الوقت يمر عليك ولازم يبقى عندك تجارب مختلفة تشوف أسواق مختلفة تشوف دورات اقتصادية مختلفة تشوف نفسك هتتصرف ازاي في اوضاع مختلفه عشان تبتدي تكون معرفه حقيقيه عن اللي انت بتعمله
انا عايز بس اقول ان الوهم ده بنشوفه عند ناس كثير وبنشوفه في أوضاع كثير وهنتكلم بالتفصيل ازاي نتجنبه وازاي نعرفه وهكذا
وهدي مثال تاني على الطيار لأنه مثال واضح بالنسبالي هنعتبر هنا الاستثمار زي الطيران فالراجل الطيار ده مش بس بياخد كورسات في تعليم ازاي تسوق الطيارة ، ازاي تتحكم في الموتور ، اذا ترتفع اذا تهبط كل الحاجات دي اكيد نظريا بيقعدوا يتعلموها لفترات طويلة
وبيعدوها كمان بعدد الساعات ده طار مثلا 500 ساعه فهو في الحته الفلانيه ، ده طار 2000 ساعة فممكن النهارده - انا بقول اي ارقام - نحوله من مساعد طيار لطيار رئيسي ، والله ده طار 10000 ساعة فهنودية في الحتة الفلانية ، طيران رئاسي مثلا او طيران دبلوماسي او ايا كان ، والله ده طيار حربي في الجيش اتحسن عشان هو عدى عدد ساعات طيران معينة
طب ليه الناس بتاخد عدد ساعات الطيران هنا كعامل مهم في تقييم الطيار مع ان الطيار ممكن من اول يوم يبقى طيار شاطر لان هنا احنا بنعدي في كل المشاكل اللي ممكن يشوفها ، يعني لما نقول عندي 10000 ساعة طيران غالبا الراجل ده طار بالليل والصبح والجو حر والجو ساقعة والجو تلج والجو هوا والجو مش هوا كل الاوضاع ، حصلتله مشكلة في المحرك مره ، حصلتله مشكلة في جهاز التبريد ، هنا هو شاف كل حاجه ، بيحطوا ال 10000 ساعه مثلا كمثال رقمي ملهوش معنى بس قصدي اي رقم بضربه عادي عشان الراجل في كل الحاجات واللي ممكن تحصل وهنا مخك بيتعود بيبقى بجد عنده معرفة عميقة في القصه دي
طبعا هنا لازم نقول أن في جميع الحالات الطيارين دول على مستوى عالي يعني انا مش قصدي ان هو حد خايب وبنحطه في وقت طويل لا انا بتكلم على الطيارين في مستوى عالي ليه لأن هو في يوم من الأيام لا قدر الله ممكن تحصله مشكله كبيره والمشكله الكبيره دي هتبقى الناتج المعرفي بتاع الفتره الطويله عبر السنين هتخليه ياخد قرار واحد هياثر على حياته وحياة الناس اللي معاها
فهنا انا بتكلم على الجودة بتاعه اتخاذ القرار الكبير ده هل هيعرف ياخده ولا لا ، لو واحد عنده القدره انه ياخذ القرار فهو غالبا واحد عنده المعرفه عميقة ، طيب الناس اللي في الاول ممكن تكون مطارتش كتير فبيبقى عندها نواعاً ما وهم المعرفة لأنها مشفتش كل حاجه
06:05
نرجع بقى لأرض الواقع ونشوف ايه العوامل اللي بتخلينا نعمل الوهم ده او ايه الحاجات اللي بتخليني عندي الوهم بتاع المعرفة ده
06:13
اول حاجه (تحيز التأكيد) اتكلمنا عليه في حلقة الإنحياز قبل كده ، وده تحيز معين بيحصل للناس اللي بتروح تدور على المعلومات اللي بتأكد وجهة نظرهم يعني انا ببحث في مجال معين فبروح ادور على كل المعلومات اللي بتأكد وجهة نظري انا فقط وببعد تماماً عن أي حاجة ضد وجهة النظر دي
يعني هنلاقي مثلا أبحاث في الطب ، دواء معين مثلاً بيعمل حاجه معينه هنلاقي أبحاث معا وهنلاقي أبحاث ضد ، الرجل اللي بيقرا لازم يقرا البحث اللي معا واللي ضد عشان يقدر يكون وجهة نظره عن الموضوع وقراره ولكن لو انا عندي تحيز التأكيد هروح اقرا حاجتي انا بس وهتجاهل كل حاجه ضد وجهه نظري دي ولما بعمل كده تحيز التأكيد ده من الحاجات اللي بتزود وهم المعرفة عند الناس
07:10
تاني تحيز عايز اتكلم عليه هو (تأثير الخبراء) اللي هو أنا بصدق كل الخبراء ، اي حاجه الخبير يقولها هصدقها ، بمعنى ايه عمر وهضرب نفسي كمثال عمر بيتكلم في الحرية المالية او الاستثمار والادخار انا هاخد اي حاجه عمر بيقولها وهصدق فيها وهقول زي ما بيقولوا امين ، يبقى عمر عشان هو خبير وقضى وقته فعمر ده اكيد عارف اللي بيعمله ولكن انا بقول لك لأ أنا من موقعي هذا بقولك انا مجتهد ان انا اوصلك المعلومه بشكل معين متصدقهاش لازم تروح تعمل بحث بتاعك لازم تدور على المعلومه دي وتشوف عمر بيقول الكلام ده اصلا صح ولا غلط وتناقش عمر حتى لو انت معندكش المعرفه الكافيه ولكن تفكيرك فقط ان مش اي حد بيقول حاجه عشان هو خبير ده بيخلي عندك نوع معين من مناقشة الأفكار اللي بتتقال
طب الرجل اللي بيطلع في التلفزيون بلاش عمر ، قالك ده الخبير الاقتصادي الدولي العالمي اللي فاهم في قضايا شؤون الشرق الابيض او اي حاجة فهاخد وجهة نظره من غير ما أفكر فيها ، هي دي المشكلة ان انت بتاخد بس رأي الخبير لأ لازم تاخد وتدور ، لما تاخد وتدور وتفكر أنت هنا بتمرن نفسك وبتمرن مخك ان انت لما تقع في إجابة عايز تعرف عنها معرفة أنت هنا مشيت في خطوات معينة منظمة خلتك تاخد معرفة بطريقة أحسن
08:50
نوع تاني من التحيز ودي الحاجه التالته اللي بنفكر فيها عن وهم المعرفة هو (التحيز الناتج عن التاريخ) بمعنى ايه انا بتفرج على الماتش وبعد ما بخلص الماتش آآه ده انا كنت متاكد ان الفرقه دي هتكسب 3:0 ده انا كنت متوقع بالظبط الـ 3:0 ولكن انا لو كنت سالتك قبل الماتش وقولتلك أكتب التوقع بتاعك قبل الماتش مكنتش هتعرف تكتب الـ 3:0 كنت هتكتب 2:1 أو أي حاجة
احنا هنا بيجلنا احساس بالثقة أو الطمأنينة لتوقعات بالفعل حصلت ولكن انا لو رجعت لورا اكيد انا مكنتش اقول كده ، نفس الكلام عن المعرفة انت بتشوف النتيجه بتاعه المشكلة بتقول آه انا بناء على المعرفة اللي عندي انا كنت متخيل ده هيحصل ولكن ده غلط فلازم تبقى فاهم يعني ايه التحيز ده عشان ميأثرش على مستوى المعرفة بتاعك
09:48
رابع نقطة التأثير الاجتماعي انا في مجموعة معينة من الصحاب عندهم معرفة معينة فأنا قافل نفسي على المعرفه دي او الاراء او المعتقدات بتاعة المجموعة اللي انا عايش جواها دي أنا مقتنع ان دي احسن حاجه ومع الاسف دي ممكن تخليني افهم المعلومة او المعرفة بشكل خاطئ تماما ممكن تخليني نعتبر نفسنا كمجموعة كمان اننا خبراء ماليين مثلا ، يعني انا واصحابي خبراء ماليين وقاعدين بنتكلم وكله قاعد عمال يعلى على التاني وكل واحد شايف نفسه احسن واحد في المجال فنقعد مع بعض كده ونقول على فكره احنا عندنا احسن معرفة في العالم فبتعملي ثقة زيادة فلازم أسلم اننا مش عشان في مجموعة معينة من نوع معين من المعلومات يبقى انا احسن الناس
10:47
تاني المعرفة بتختلف أنواعها كتير ، عايزه اقول ان في معرفه اللي هو 1 + 1 = 2 سهل جدا انك تبقى عارف بيها ومش محتاج وقت تتعلم ولكن في مجالات معينة فيها 1 + 1 = 3 و4 و5 و16 المجالات دي اللي احنا بنقول انها فيها شك أو النتائج بتاعتها واسعة جدا
فنخلي بالنا ان ما يبقاش عندي التحيز بتاع المجموعة ده ومع الاسف السوشيال ميديا كمان زودت التحيز ده انا اتفرجت مثلا على 15 فيديو ليهم علاقة بالبرمجة فافتكرت نفسي خبير برمجي لكن مع الاسف انت محتاج تقعد وتشوف وتنفذ وتجرب وتغير وتفهم نفسك عشان تبقى بجد خبير برمجي
11:32
خامس نوع من التحيزات اللي بتأثر عليا في المعرفة (تحيز التوافر) بتاع المعلومة ، انا النهارده لما بعمل بحث ممكن جوجل يطلعلي اول حاجه فد المتوفر قدامي ، لكن انا مبحثتش ودورت ونزلت قريت وجبت كتب فالسهوله في وصول المعلومة للأسف بتخليك تستسهل انك تعمل مجهود ودي نقطه مهمه جدا اللي هو انا اقرأ كتاب ولا اقرأ مقالة ، اقرأ بحث في الجامعه ولا اقرأ مقالة ، اقرأ تويته ولا اقرأ مقاله مثلا
هنلاقي الترتيب بتاع الحاجات ده بيدخلك في العمق اكتر يعني التويته دي أقصر شكل في الموضوع ، دخلنا بعد كده المقالة يمكن الراجل حط مجهود شويه وهو بيكتبها ، حلقة من الحلقة اللي بنتكلم عليها دي ممكن يكون فيها شويه مجهود اعلى شويه ، ورقة بحثية في الموضوع هنلاقي لأ الراجل اخذ وقت عشان يطلعلك المعلومة بشكل أعلى ، راجل كتب كتاب ممكن برضه يبقى اخد وقت بشكل أعلى
12:40
فهنا انا باخد المعلومة منين مهم جدا جدا مصدر المعلومة لو انا واحد بيقرأ 200 مقاله في السنة أو واحد بيقرأ 10 كتب! ممكن الراجل اللي قرأ 10 كتب ده يبقى عنده درايه بالموضوع بشكل أكبر من الرجل اللي قرأ 200 مقالة لسبب ان الراجل اللي بيكتب الكتاب أو البحث عمل الحاجات التقيلة شوية اللي بياخدوا وقت هو غالبا اخد سنين والطريقه اللي هو بيكتب بيها الكتاب خلته ياخد عمق في الموضوع ، يبقى العمق بتاع المعلومه مهم جدا فلو أنا المعلومات اللي قدامي هي معلومات سطحية مع الاسف اعتقد انت بيبقى عندك الوهم بتاع المعلومه اكتر او بتبقى فاكر انك فاهم في الموضوع ولكن مع الاسف انت مش فاهم فيه قوي
13:30
وهنلاقي في السوشيال ميديا عموما و خاصة مع اتجاه السوشيال ميديا للفيديوهات القصيرة او الحاجات اللي بشكل قصير اللي هو خد معلومة بقى في الرغيف او مش عارف بقى المصطلحات اللي الناس بتقولها أو على السخان او اي حاجه من الحاجات دي خلت الناس عايزه تستهلك الحاجة بشكل سريع ، آه بيعرفه قشور الموضوع ، بيعرف الناس المجتمع ان في حاجه اسمها كده ولكن مع الأسف بيزود وهم المعرفة
14:00
طيب الحلول بقى للوهم بتاع المعرفة دي لو حضرتك عايز تبقى خبير فى حاجه معينه أو فاهم في حاجة معينة تفتكروا ممكن نعمل إيه؟ ببساطه هنحاول نعكس الحاجات اللي احنا قولناها في الـ 5 نقاط اللي احنا اتكلمنا عليهم النهاردة وهاخدها بقى من الاخر كمان
14:20
حته السطحية بتاعة المعلومة انا النهارده مبقولكش ما تقراش مقالات أو ما متستهلكش سوشيال ميديا او ما تعملش تفكير في المعرفة بالطريقة دي بس بقولك نوع مصادر معرفتك ، يبقى اول نقطه هنا تنويع مصادر المعرفة بمعنى ان انا لو اتسألت سؤال في القصه دي انا ممكن مجاوبش على طول انا ممكن اروح اعمل البحث بتاعي وادور واشوف أبحاث وكتب واشوف حاجات معينه وابتدي اكون رأيي مش لازم ارد على اللي بيسألني هل أنت عارف في الموضوع ده ولا لا ، لازم اقضي وقت ، ولازم أنوع مصادر
مش بقولك متشوفش تويتس أو ما تشوفش مقالات او حاجات كده نوع ، متبقاش قافل على نفسك في حتة ان انا لا والله مبحبش اقرأ كتب او انا بحب اقرا كتب او ايا كان بتعمل ايه ، لا نوع شوف الحاجات السريعة أصل الحاجات السريعة دي ممكن توجهك لفكرة تروح تبحث فيها فالحاجات السريعة دي مهمه جدا ولكن معتمدش عليها كمصدر رئيسي
15:17
تاني حاجه اللي قلنا عليها (تحيز التأكيد) متروحش تدور على المعلومات اللي بتأكد وجهة نظرك ما تفتحش النت وتدور على انا شايف كده فانا عايزه اشوف معلومة بتأكد وجهة نظري لان كمان مع الاسف السوشيال ميديا الخوارزمية والحاجات دي لما بيلاقوك بتدور في الحتة دي هيطلعولك مصادر أعلى بتاكد وجهة نظرك فهما بيساعدوك كمان تأكد وجهة نظرك فدور على معلومتك ومعلومه الغير أو زي ما بيقولوا الرأي والرأي الأخر يعني تشوف الناحيتين شكلهم عامل ازاي
15:49
حاجه كمان ممكن نعملها عشان تحاول تقلل وهم المعرفة ده متعملش تعميم او ان ده حاجه عامه ان انا مثلا بدور على المصدر الرئيسي لفقر دولة معينة فأنا عممت ان الحاجه الوحيده دي هي السبب الرئيسي ، بلاش التعميم بلاش تاخد مشكله او معرفه او نوع معين من الفكر ان انت هتعمم بيه دايما ، دايما حاول تدور على الاحتمالات او مش الاحتمالات كمان ، التقسيمة بتاعة الدوافع يعني ايه التقسيمة بتاعه الدوافع؟ يعني مشكلة الفقر بتاعة الدولة دي ممكن يكون في 10 اسباب مش سبب واحد مش لازم نعمم كل حاجه
الاحتمالات هنا اللي هو لو هما عملوا ايه ، افكر بهذه الطريقه لو هما عملوا ايه عشان يخرجوا من الفقر غالبا لو عملوا حاجه معينه هي ممكن تطلعهم أسرع من حاجه تانيه فنسب تحقق الحاجه دي في المستقبل ده موضوع تاني ولكن لازم ما عممش التعميم مشكله كبيره جدا في المعرفة مدام هما كده يبقى عملوا كده مدام ده كده يبقى ده كده فالتعميم مشكله كبيره
16:59
حاجه كمان اني افهم نفسي ، افهم ان انا عندي وقت ولازم اوزعه بطريقة ذكية ، يبقى الطريقه دي انا عايزه اعرف معرفة ازاى أسرع وأعمق طريقه ممكن اوصل لها ، يعني هنا المعرفة بالذات بقى ان انا بعرف نفسي انا مين قدراتي ايه الحاجات اللي انا بفهم فيها ايه لو انا اتعلمت المعرفه دي بتناسب شخصيتي بطريقه معينه فانا هعرف اتعلمها اسرع من حد قاعد جنبي ، فالوعي بنفسك مهم جدا انه هياثر على مستوى المعرفة بتاعك
حبك للحاجة كمان مهم جدا انك انت بتحب الطب فأنت مركز قوي في الطب فدخلت في عمق الطب ولكن واحد تاني شخصيته متسمحش ان هو يبقى طبيب فمعرفتك بنفسك هتاثر على معرفتك بعلم معين او حاجه معينه او صنعه معينة دي نقطه مهمه جدا لازم الناس تاخد بالها منها
17:53
اخر حاجه هقولها موضوع التعليم انك دايما تتعلم ومتقفش في حته معينه المعرفة انت ممكن يبقى عندك تحديث لحد مثلا 2020 متعرفش حصل ايه في المجال بعد 2020 مع الوقت والزمن اللي احنا فيه ده الوقت ضدك ، يعني هتلاقي حاجات طلعت في 21 و 22 في المجال اللي انت كنت فاكر نفسك فاهمه بعدتك جدا عن الوضع الحالي بتاع النهارده السرعة بتاعة المعلومات يعني هنلاقي ان السرعة بتاعه خروج المعلومات النهارده بقت بصوره رهيبه الواحد مش ملاحق ، فخلي بالك انك متقعش في مطب او في حفره ان انا اكيد كنت خبير من ثلاث سنين وخلاص وانا بقيت فوق العالم ده هيسببلك وهم في المعرفة
وانا دايما بقولكم المعلومات اللي انا بتكلم عليها في جميع حلقاتي أنا المعلومات دي افضل ما توصلت إليه النهارده ولكن في معلومات كتير النهارده ممكن تتغير مع الوقت ، احنا طبعا بنحاول على قد ما نقدر نوصل للمعلومات اللي العالم وصلها وده راجع من التعليم المستمر او انك دايما بتطور نفسك او دايما بتبحث في الموضوع وبتشوف التحديثات اللي عندك فمتقفش في حته معينه
انا عارف إن الحاجات بديهية جداً ولكن الناس بتنسى تعملها ، انت بتنسى انك دايما تخلي نفسك متطور في المجال بتاعك او في مجال معرفتك ، مش لازم تبقى متطور في مجال انت مش مهتم بيه يعني انا مثلا مش فارق معايا أعرف التطورات اللي بتحصل في البيولوجي ده مش مجال اختصاصي خلاص في واحد تاني هو مختص بيه وشغال فيه وربنا معاه كمعلومات ، فمبضيعش وقتي ومبحاولش احدث نفسي او اطور نفسي في الحتة دي ، لكن في المجال بتاعي بحاول على قد ما اقدر اكون متابع وفاهم ايه اللي بيحصل حواليا وإيه الجديد
فالناس تخلي بالها من النقطة دي عشان بشوفها نقطة مهمه جدا ، الناس بتبقى عايشة على ذكريات الماضي قصص نجاح حصلت لها في ايام معينه فاكره انها بالمعرفة دي هي بقت احسن حاجه في الدنيا
19:54
وهم المعرفة ده مهم جداً في حاجه ان انت وانت بتقرر خطتك الاستثمارية ، في طريقك للحريه الماليه تبقى عارف خطواتك بتاخدها ازاي طبعا مش تبقى عارفه من اول يوم بس انت مع الوقت بتتعلم وتخش بعمق اكتر في الموضوع وبتتعلم زي ما قلنا من عدد الساعات اللي انت بتحطها في المجال ده ، سواء من انك بتدير ميزانيتك فأنت بتتعلم وبتحط وقت ، سواء انك بتعرف نفسك أو بتستثمر فبتبتدي تاخد قرارات فبتبتدي تفهم المعرفة بتاعتك دى بتساعدك ولا بتضرك وهكذا
20:29
الحلقه دي جزء لا يتجزأ من اتخاذ القرار والحلقه التانيه بتاعة وهم من السيطرة ، الاتنين مع بعضها اعتقد معلومتين أو حلقتين هيساعدوك على المدى الطويل انك تعمل خطط استثمارية احسن متصدقش اي حد اسمع وروح اعمل البحث بتاعك ولازم تقتنع وفي نفس الوقت تحاول تشيل التحيزات اللي جواك على قد ما تقدر .. شكرا جدا جدا على وقتكم النهاردة وان شاء الله الاسبوع الجاي
Translation of some words and terms:
Critical Thinking التفكير النقدي
Knowledge المعرفة
Fighter حربي
Engine محرك
Factors عوامل
The Illusion Of Knowledge وهم المعرفة
Confirmation Bias تحيز التأكيد
Ignore تجاهل
Expert Halo Effect تأثير هالة الخبراء
Saving إدخار
Investing الاستثمار
Research بحث
Hindsight Bias تحيز الإدراك المتأخر
A Sense Of Confidence شعور بالثقة
Social Influence التأثير الاجتماعي
Uncertainty شك
Outcomes النتائج
Availability Bias تحيز التوافر
Form شكل
Consume تستهلك
Articles مقالات
White Papers المستندات التقنية
Algorithm خوارزمية
Generalization التعميم
Possibilities الاحتمالات
Recognize الاعتراف
Update تحديث
Continuous Learning التعلم المستمر
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #وهم_المعرفة