40. ما يسأله المستمعون - الجزء الثالث
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة هي الجزء التالت من حلقات (ما يسأله المستمعون) زي ما اتعودنا كل 10 حلقات بنعمل حلقة رد على الاسئلة اللي بتبعتوهالنا
سألناكم من خلال صفحتنا على إنستجرام (إيه أكبر التساؤلات في حياتكم المالية) وفي حلقة النهاردة حاولنا نرد على أكبر عدد من التساؤلات اللي وصلتنا منكم
· 00:44 المقدمة
· 01:07 لو حد معاه فلوس ويقدر يستثمر بس مش عايز يستثمر في البنوك أو البورصة أو السندات ازاي يوصل لمعلومات عن إحتياجات بلد لسلعة معينة ويبقى متميز في المنتج بتاعه؟
· 05:48 ليه عائد شهادات الاستثمار في البنك بالمصري 11% وبالدولار 2.25%؟
· 09:05 ازاي الواحد ممكن يعمل فلوس وهو نايم؟
· 10:22 هل مصاريف كورسات تطوير الذات بتتحط في بند الرغبات ولا الاستثمار كأنها استثمار في النفس؟
· 12:39 في النهوض بالشركات الصغيرة ازاي بتعامل مع العقبات اللي هتقابلني وازاي أأمن نفسي قانونياً؟
· 15:13 لو دخلي كذا أوفر كام للاستثمار؟
· 16:00 الفرق ما بين الضمان الإجتماعي والأختياري؟
· 17:45 إيه هي الحرية المالية؟ وازاي أعرف إني وصلتلها؟
· 19:09 ازاي أسمع الحلقات؟
· 20:51 الخاتمة
تابعونا على إنستجرام وفيسبوك وتويتر وأبعتولنا أي اسئلة مهتمين تعرفوا وإجاباتها احنا هنحاول ديماً نغطي كل تساؤلاتكم في الحلقات اللي جايه إن شاء الله ، وتابعونا على تويتر عشان متفوتوش البث التفاعلي اللي هنعمله هناك قريب بإذن الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلا بيكوا في حلقة جديدة من بودكاست كلام ينور حلقة النهاردة زي ما اتعودنا هي حلقة ليها علاقة بالاسئلة اللي جايه من خلال صفحتنا على السوشيال ميديا احنا سألنا الناس إيه أكبر تساؤلات في حياتهم المالية هنحاول نرد على أكبر عدد من الاسئلة احنا بنجمعهم وكل 10 حلقات بنحاول نرد عليكم فيها
01:07
هبتدي أول سؤال من الأستاذ أحمد طلعت بيقول لو حد عنده فلوس ويقدر يستثمر بس هو مش عايز يستثمر في البنوك أو البورصة أو السندات ازاي يوصل لمعلومات إحتياجات بلد لسلعة معينة ، يبقى متميز في المنتج بتاعه ازاي؟ ميروحش بالمنطق بتاع إن واحد فتح محل موبايلات فالناس كلها تروح تفتح محل موبايلات اللي هو الناس بتتبع بعض هو شايف إن دي فكرة وحشه وازاي يشوف مصدر معين يتعلم منه أو ويعرف إيه الحاجات الموجودة تساعده انه يفتح المشروع ده؟
أنا أول حاجه هقولها في الحته دي إن كل واحد فينا عنده مميزات معينه يعني كل واحد عنده حد معين في الحياة ، أنت ديماً عندك بتعمل حاجه أحسن من اللي جنبك فيها ، يعني كل واحد ربنا ميزه بحاجه معينه ، لو قولنا مثلاً عمر بيعرف يعمل كذا واحد تاني شاطر في الرسم وهكذا فأول حاجه نابعه بتبقى نابعة من الشخص نفسه. فأول حاجه أنا بقولها أنك تبقى عارف أمكانياتك ، وعارف حدودك ، تعرف أنت ممكن تعمل إيه يميزك عن الناس ولو رجعنا لحلقة د.أمين الخولي لما أتكلمنا على الشركات الناشئة أنت بتروح بتحاول تختبر المجتمع بتشوف المجتمع اللي أنت عايش فيه اللي حواليك إيه مشاكلة الأكبر ، إيه أكبر مشكلة في المجتمع لو حصلت النهاردة وحد حلها يقدر يعمل عائد إقتصادي ووصولك للفكرة دي بيبقى من معرفتك بالبيئة المحيطة بتاعتك يعني مثلاً الراجل اللي أخترع (أوبر) كان شايف في مشكلة معينة في التواصل مع البني آدم اللي بياخده يوصله من النقطة أ لـ النقطة ب وحاول يحلها بشكل معين وبعد كده أنتشرت وكبرت ده موضوع تاني ولكن هو عمل إيه في الأول هو أخد مشكلة كبيرة الناس بتواجهها وحاول يحلها يبقى ده أول نوع من أنواع التحليل اللي أنت مفروض تعمله بعد كده أنت بتحاول تجرب فكرتك بطريقة بسيطة يعني على حسب أستاذ أحمد يعني بيقول انه معاه الفلوس فأنت بتاخد جزء من فلوسك بسيط وتحاول تجرب الفكرة بتاعتك ممكن الفكرة بتاعتك دي تكون كلها أونلاين مثلاً سلعة معينة أو خدمة معينة هتعمله كله على صفحة على الإنترنت فأنت محتاج تطور الصفحة دي وتبتدي تنزل المنتج بتاعك واحده واحده وتجربه وتشوف رد فعل الناس
أنا كمثال مثلاً البودكاست ده أنا لما فكرت أعمل بودكاست منزلتش بيه مره واحده أنا عملت إيه سجلت كذا حلقة ، بعته للناس القريبة مني يا جماعة أسمعوا البودكاست ده الشكل بالطريقة الفلانية إيه رأيكوا في الموضوع فبتدى يجيلي ردو الأفعال بطريقة معينة ابتديت أغير حاجات معينه في إسلوبي في طريقة تفكيري عشان أوصل للحاجه اللي المجتمع عايزها أو المشكلة اللي أنا بحاول أحلها هنا تتحل ازاي ، طب عملت إيه تاني؟ عملت دراسة إستقصائية يعني روحت سألت مثلاً 50 واحد يا جماعة أنا عايز أعمل بودكاست ، هل عمرك سمعت بودكاست؟ بتسمع بودكاست إيه؟ عدد الدقايق اللي أنت بتفضلها؟ إيه أفضل المواضيع؟ وابتديت اسأل كل الاسئلة الموجودة في دماغي ، فأنا عملت دراسة للسوق عرفت السوق عايز إيه وبعدين ابتديت أعمل السلعة بتاعتي وابتديت أنزلها وبشوف مع الوقت التقبل بتاع السلعة دي هل هو بيزيد أو بيقل بناءاً على الحاجات اللي أنا بعملها في البودكاست ، أنا باخد البودكاست هنا كمثال إن أنا مشيت في نفس الخطوات اللي الأستاذ أحمد بيسأل فيها
يبقى أعرف أنا إمكانياتي إيه ، أعرف أنا ممكن أقدم إيه ، أدور على مشكلة أحاول أحلها أنزل السوق وأحاول أجرب المنتج بتاعي ، أخد ردود الأفعال ومع الوقت هبتدي أتطور ولو عاوز تعرف مصادر أكتر أنت ممكن تشوف في المجتمعات الأخرى بره مثلاً لما جم عملوا الفكرة بتاعتك دي عملوها ازاي يعني بتدور أونلاين بتشوف إيه المشاكل اللي واجهة الشركات الأخرى لأن أنت غالباً فكرتك دي ممكن تبقى مكرره والمشكلة دي ممكن تكون مشكلة عالمية موجوده في دول تانية فبتبتدي تذاكر إيه الحاجات اللي هما مروا بيها عشان تحاول متمشيش في نفس الطريق وبعد كده بتشوف الإتجاهات العالمية عامله إزاي ، بتشوف الناس متقبله الحاجات دي مع الوقت ولا لأ وبتكمل فكرتك دي
05:48
سؤال تاني من أستاذ أحمد برده سؤال كويس جداً ، هو واضح إن السؤال ده جاي من مصر هو بيقولي عائد الشهادات على الاستثمار في البنك مثلاً على الدولار 2.25% بينما على الجنية المصري 11% ده بناءاً على اللي هو بيقوله أنا مارجعتش الفوايد بس ده اللي بيقوله لو أنا حاطط 100$ شهادة والعائد 2.25 دولار يعني تقريباً 35 جنية ، لكن لو حولت الـ 100$ لمصري الشهادة هتبقى بقيمة 1570 والعائد بتاعها هيبقى 175 جنية ليه الفرق ده! يعني ليه لما بتحط بالمصري بتاخد عائد 11% ولما بتحطه بالدولار بتحط 2.25%؟
الموضوع طبعاً مربوط بالتضخم ، التضخم بمعنى إيه العملة المصرية أو أياً كان اللي عملة اللي أنت بتتكلم عليها عندها نوع من أنواع التضخم على المدى الطويل واحنا أتكلمنا عليهم في حلقة التضخم مع مروان قبل كده إن البنوك المركزية أو النظام المالي في الدولة اللي أنت فيها بيحاول يبقى في جزء صغير من التضخم عشان يخلي الناس تصرف فلوسها لأن أنت لو مفيش تضخم مش هتصرف فلوسك هتفضل حاتطهم جنبك لأن قيمتهم مش بتقل فهو بيشجعك تصرف فلوسك وبعدين بيديك حاجه عليها زيادة فوق نسبة التضخم فمثال مثلاً لو التضخم أو الشهادة بتديك 11% التضخم في مصر على المدى الطويل هو 8% فأنت بتاخد 3% عائد زيادة فوق التضخم بحاول يحميلك فلوسك ، لو بصينا على الدولار هنلاقي الموضوع مختلف هنلاقي إن الدولار التضخم بتاعه بقاله 10 سنين يمكن حوالين الـ 1.5% البنوك بتاخد منك الدولار وتديك 2.25 عشان تحفذك تسيب فلوسها معاك وهي بتاخد الفلوس تروح تستثمرها فعشان كده العملتين في الأخر القوة الشرائية بتاعتهم مختلفة على المدى الطويل فعشان كده الفوايد بتاعتهم مختلفة
طيب لما تقولي 11 و 2.25 أنا أخد قرار ازاي إن أنا احط 11 أو 2.25 ده يرجع إلى الحالة الإقتصادية بتاعة الدولة نفسها ، يعني مثلاً في مصر من 2017 لحد النهاردة الـ 5 سنين اللي فاتو محصلش أي ضعف في العملة فاللي كان حاطط 11% استفاد جداً الفترة دي ولكن الفترات اللي قبليها هنلاقي العملة كانت أوطى شوية يمكن لما كان سعر الصرف عند 6 جنية وبعدين راح لحد يمكن 18 جنية في الفترة دي اللي كان حاطط بالجنية المصري خسر فلوسه لأن حصل التعويم فالقوة الشرائية بتاعة الجنية ضعفت فهي فترات طويلة يعني على المدى الطويل النسبتين زي بعض لو حطيت دي زي دي بس مثلاً على مدار 20 سنة ولكن في المدى القصير 3 سنين 5 سنين ممكن واحده منهم تبقى أحسن من التانية بكتير
09:05
في سؤال تاني بيقول إيه اللي يخلي الواحد يعمل فلوس وهو نايم؟
ده سؤال كويس جداً وهنا المفهوم بتاع أعمل فلوس من غير ما أكون بدورها أو الدخل السلبي وده مفهوم مهم جداً بيحصل ازاي؟ إن أنت ولو رجعنا برده لحلقة فئات الأصول أنت حضرتك بتستثمر فلوسك المفروض تعمل فلوس ، بتعملها وأنت نايم وأنت صاحي مش فارقه هي فلوس بتعمل فلوس.. إيه الحاجات الواضحة اللي بتعمل كده أي نوع من أنواع الاستثمار يبقى الإجابة لإزاي أعمل فلوس وأنا نايم أنك تستثمر ، طيب استثمر في إيه؟ تستثمر في فئات الأصول من أول الودايع ، عقارات ، أسهم ، سندات ، حصة في شركة.. كل الحاجات دي تقسيمة الحاجات دي بترجع تاني لكل واحد هو عاوز يكون محفظته شكلها عامل ازاي.. يعني حضرتك لو أشتريت بيت وأجرته فهو بيعمل فلوس لوحده أنت مش محتاج تعمل مجهود ، آه بتعمل صياناتك والحاجات دي كلها بس بتطلع ديماً من العائد اللي جايلك فالإجابة على السؤال ده بسيطة جداً ان لو أنت عايز تعمل فلوس وأنت نايم لازم تستثمر
10:22
في سؤال بيقول مصاريف الكورسات عشان تطوير الذات بتحط في بند الرغبات ولا الاستثمار كأنها استثمار في النفس؟
ممكن الناس تفكر في الإجابة دي.. يعني لو أنا سألتكوا السؤال ده للناس اللي سمعت حلقة الميزانية تفتكر الكورس ده استثمار في النفس وهيعملي عائد فأنا أخده من الجزء بتاع الاستثمار ولا تفتكروا من الكماليات أو من الرفاهيات
أنا وجهة نظري إن جزء من الميزانية بتاعتك في الاستثمار هو استثمار صريح يعني أنت بتحاول تعمل فلوس على الفلوس اللي أنت حوشتها من الميزانية بتاعتك التعليم أو أنك بتستثمر في ذاتك أنا بعتبره من الكماليات من الحاجات اللي أنت بتاخدها عشان تساعد نفسك إن انت تذوق نفسك انك تقبض مرتب أعلى أو تطور نفسك أو اي حاجه أنا هعتبرها من الناحية دي ولكن أنا الجزء بتاع الاستثمار من وجهة نظري حتى لو الاستثمار ده بتعمله – ما هي الإجابة صح تسمعها تقول مانا آه بستثمر في نفسي وأنا هعمل عائد قدام وكده – بس انا بالنسبالي هلخبط نفسي أوي إني أعرف العائد اللي جاي عليا قد إيه ، يعني أنا هستثمر في كورس النهاردة ممكن أشتغل بيه وممكن لأ ، ممكن يزود مرتبي وممكن لأ هحسبها ازاي! لكن لما أنا اخدها إن أنا بعمل فلوس على الفلوس اللي هي هتقعدني لحساب التقاعد أو هتحميني من مشاكل في المستقبل أنا مش ضامن الحاجه اللي هتعلمها النهاردة دي أنها اصلاً في المستقبل هتبقى مفيدة بالنسبالي فأنا بالنسبالي لا أعتبرها في الاستثمار أعتبرها في الكماليات ، وديماً على فكرة أنت الاستثما بتاعك مش بس في الفلوس لما بتستثمر في نفسك أنت بتستثمر في وقتك أنت بتحط وقتك في الموضوع فهل أنت هتحاسب وقتك ده إن أنت حطيته استثمار هيجيبلك عائد قدام؟ لأ مفيش ماده النهاردة بتحطها في الميزانية احنا كل الحاجات اللي بنحطها في الميزانية دي حاجات ماديه فأنا دي من وجهة نظري وممكن طبعاً أي حد يختلف مع رأيي بس ده رأيي في التصنيف بتاع الاستثمار في النفس
12:39
في سؤال بيقولي النهوض بالشركات الصغيرة وازاي بتعامل مع العقبات اللي هتقابلني وازاي أمن نفسي قانونياً؟
طيب أنا شركة صغيرة معناها أن الموارد بتاعتي محدوده هو ده تعريفي للشركة الصغيرة ، يعني إيه موارد يعني فلوس مثلاً اللي أنا ممكن أصرفها على الشغل أو عدد الموظفين أو الحاجات دي ، زي أي حاجه صغيرة أنت في أول طريقك الموضوع أصعب بكتير فأنت بتلجأ لأساليب مختلفة أنك تحاول تعوض العجز اللي عندك ده سواء في الفلوس أو في البني آدمين
على سبيل المثال أنا النهاردة شركة صغيرة مينفعش يبقى عندي محامي وهو عايز يتجنب العقبات القانونية فبتعمل حاجه من اتنين يا إما لو مرتب المحامي ده لو جبته طول الشهر بياخد كذا لأ أنا ممكن أكلمه ساعة أو ساعتين في الشهر أجمع كل حاجاتي وأدفعله ساعة أو ساعتين في الشهر دي الطريقة الأولى ، الحاجه التانية اني بعمل تبادل منفعه مع حد عنده المعلومة دي يعني بروح لنفس المحامي ده بقوله حضرتك بتعمل استشارات في المحاماه وأنا مثلاً بعمل استشارات محاسبية ما تيجي تديني جزء من وقتك وانا هعملك حاجات ليها علاقة بالحسابات بتاعتك أو هساعدك فبتعملوا زي شراكه في فكرة معينة أنت بتساعده فيها وهو بيساعدك فيها
فالشركات الصغيرة أنا بنصح إنها تدور على الناس اللي عندها نفس المشاكل وتحاول تروح تجمع الحاجات دي وتشوف أنت عايز إيه منها وهي عايزة تعمل إيه معاك وتبتدوا تتبادلوا المعلومات فدي طريقة إنك تجهز نفسك بيها وأنت شركة صغيرة
طيب كبرت شوية والحاجه دي مش مكفياني وعايز حاجه أكبر وقتها أقدر أبتدي اروح للمستثمرين وأقولهم يا جماعة أنا خلصت الطريقة دي وعايز أكبر شوية لأن عندي أحتياج أكتر بس أنا لسه لازلت معييش فلوس فأبتدي ادخل ناس جوه رأس مال الشركة دي بس طبعاً لازم تكون الشركة ناجحة أو عندها إمكانية إنها تنجح عشان تجيب مستثمرين وتدخلهم جوه معاك فدلوقتي إنت معاك الفلوس اللي تقدر تشتري عدد ساعات أكتر أو تبتدي تعين العماله المطلوبه دي يعني أنا بفكر معاكوا بصوت عالي يعني ازاي ممكن اتجنب العقبات دي في الأول يعني
15:13
سؤال تاني بيقول لو دخلي كذا أوفر كام للاستثمار؟
رجوعاً برده لحلقة الميزانية احنا بننصح بـ 20% من دخلك يروحوا للاستثمار ولو زادت خير وبركة في ناس بنشوفها بتوصل لـ 60 و 70% ودي حركات معينة ظهرت في أمريكا الناس اللي عايزة تتقاعد عندها 30 سنة فهو من أول حياته بيبتدي يحوش جامد ويستثمرها وبيحاول يعيش على ميزانية واطية جداً ولكن في الميزانية اللي احنا اتكلمنا عليها اللي هي 50 – 30 – 20 بنقول إن 20 هنا هي الحد الأدنى اللي المفروض تحوشه عشان توصل لأهدافك على المدى الطويل
16:00
سؤال برده مهم بيقول الفرق ما بين الضمان الإجتماعي والأختياري؟
الضمان الإجتماعي هنا معناه إن المؤسسة اللي أنت بتشتغل فيها بالتنسيق مع الدولة اللي أنت عايش فيها عاملين نظام تقاعدي إجباري أنت كده كده بتخشه عشان أنت موجود في سوق العمل طيب إيه الفرق ما بينه وبين الأختياري؟ الأختياري ده اللي أنت بتروح تعمل نظام تقاعد أخر طيب أمتى انا بحتاج أعمل نظام أختياري لما ألاقي النظام الإجتماعي أشوف المرتب أو المعاش بتاع التقاعد بتاعه مش هيكفيني في أخر حياتي ، يعني أنا بشوف فلان دخل في التقاعد بتاخد كام كذا حسبته بالدولار أو بالجنية أو بالدرهم لقيت الرقم ده قليل ولقيت الرقم اللي أنا محتاجه لما حسبت حساباتي أنا الشخصية لوحدي لقيت اني محتاج رقم 3 أضعافه أو 4 أضعافه أو 5 أضعافه عشان أعرف أعيش نفس المستوى المعيشي فأخر حياتي فوقتها هعمل إيه هقول لنفسي أنا كده عندي عجز أنا محتاج أشتري نظام تقاعد إختياري عشان أسد العجز ده وممكن تكون المبالغ اللي أنت هتحطها مبالغ صغيرة جداً مع إنك محتاج في الأخر 4 أو 5 أضعاف المعاش اللي هيجيلك لكن لو أبتديت بدري جداً زي ما أتكلمنا في حلقة التقاعد وفي حلقة بداية الادخار ممكن الأرقام تكون صغيرة جداً لو أنت بادئ بدري في حياتك فأعمل الحاسابات دي أعرف أنت المفروض تاخد كام أعرف أنت عايز إيه ولو عندك عجز أشتري نظام أو استثمر في نظام تقاعدي أختياري
17:45
سؤال برده جالنا إيه هي الحرية المالية؟ وازاي أعرف إني وصلتلها؟
الحرية المالية بمنتهى البساطة أسرع تعريف ليها إنك تبقى حر إنك تصرف وقتك ، يعني إيه تصرف وقتك؟ خلينا نقول إن الوقت ده عمله عدد معين من الدقايق يومياً أنت ممكن تصرفها على الحاجات اللي أنت عايزها الحاجات دي ممكن تكون شغل ممكن تكون إن انت تساعد الغير أياً كان ، الحرية المالية هي إنك تصرف الوقت بتاعك ده على الحاجات اللي أنت عايزها مش في مقابل المال ديماً ده المعنى أو التعريف بتاع الحرية المالية ، طيب بنوصله ازاي إن احنا يكون عندنا بدايل عن الدخل الثابت اللي بيجلنا كل شهر من مرتب أو مشروع أو أي حاجه ، البدايل دي في الإقتصاد الرأسمالي الأيام دي أو النظام اللي كلنا عايشين بيه هي عبارة عن مجموعة من الأصول بدخلك دخل الدخل ده بيصرف عليك والفلوس دي أنت بتستخدمها إنك تعيش حياتك وبتقدر وقتها تصرف الوقت بالطريقة اللي أنت عايزها وفي نفس الوقت الأصول دي بتبقى بالنسبالك لو لا قدر الله حصلك حاجه بتبقى عامل أمان إنك ممكن تسيلها وبرده بتساعدك في التقاعد فده تعريف سريعاً يعني إيه الحرية المالية
19:09
سؤال برده مكرر بيجلنا كتير ازاي اسمع الحلقات؟
أنا عارف أن أنت ممكن تكون بتسمعني دلوقتي عشان تسمع السؤال ده ولكن أنت ممكن تحسن التجربة بتاعتك لو أنت مش عارف يعني ، البودكاست موجود على منصات كتير ممكن مثلاً نقول آبل ، جوجل ، سبوتيفاي ، أنغامي ، بوديو حتت كتيرة جداً وطبعاً على الموقع الإلكتروني
الفروق ما بين أنك تسمع في المنصات دي على حسب أنت راحتك النفسيه إيه حاسس البودكاست ده بيريحك في أنهي برنامج أكتر ، الموقع بتاعنا فيه ميزه شوية إن أنت ممكن ما تسمعش عليه ولكن بيبقى فيه شو نوتس والحلقة كلها بتبقى مكتوبة لوعندك مشكلة في المصطلحات الإنجليزي اللي بتتقال علشان غصب عننا ساعات بنستخدم مصطلحات إنجليزي فبنحط ترجمة للمصطلحات كلها موجودة هناك فدي أفضل الطرق
برده في حاجه مؤخراً احنا نزلناها صفحة تويتر أنا عاجبني صفحة تويتر شخصياً الصرحة لأننا بنعمل حاجه كده زي تذكير يومي أو بنزل بوست يومياً ممكن أكتر من مره في اليوم بتديك حتت كانت مهمه في الحلقات من وجهة نظري أو من وجهة نظر الفريق بتاعنا يعني ، تذكير يعني انت كنت في حته سمعتها ونسيتها ممكن بترجعك تسمع الحتة دي تاني أو تشوف كان مكتوب فيها إيه
وعاوزين نستخدم تويتر كمان نعمل جلسات اسئلة واجوبة على (تويتر سبيسيس) فلو مش متابعنا على تويتر أنصحك تبص على الحساب بتاعنا في تويتر
20:51
ونكتفي بالقدر ده من الاسئلة النهاردة عشان الوقت ولكن أنا ديماً أشجعكم تبعتولنا على صفحتنا بتاعة إنستجرام أو فيسبوك أو تويتر أياً كان تقدر تتواصل معانا ازاي على الإيميل بشكركوا جداً جداً انكو بتدونا الوقت وبتبعتولنا اسئلة لأن ده مجهود إن الناس تبعتلنا الحاجات بتاعتها احنا بنحاول نغطي على قد ما نقدر طبعاً الاسئلة اللي بتجلنا وبعتذر طبعاً على الحاجات اللي مجوبتش عليها المرادي هحاول أغطيها في حلقات جايه إن شاء الله أشكركوا وأشوفكوا بإذن الله الاسبوع اللي جاي
Translation of some words and terms:
Edge حد
Service خدمة
Developتطوير
Format شكل
Feedback ردود أفعال
Survey دراسة إستقصائية
Market السوق
Concept مفهوم
Passive Income الدخل السلبي
It's nice to have من الجميل أن تكون لديك
Investors المستثمرين
Potential إمكانية
Retirement تقاعد
daily reminders تذكير يومي
Sessions جلسات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #ما_يسأله_المستمعون #اسئلة