58. كل ما تريد معرفته عن ثاندر Thndr - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة هي الجزء الثاني من حوارنا مع أحمد حمودة الشريك المؤسس لمنصة ثاندر للتداول (أول منصة مصرية للاستثمار الإلكتروني)
Ahmad Hammouda @LinkedIn : تقدروا تتواصلوا مع أحمد هنا
https://thndr.page.link وأي حد هيحمل التطبيق من الرابط ده ويعدي بكل خطوات فتح الحساب هيحصل على مكافأة تصل إلى 1000 جنيه
: في الجزء الثاني
02:22 أنت بتختلف إيه عن البنك العادي؟
03:40 إيه طرق التمويل اللي بتتعامل بيها؟
04:50 ازاي فلوسي بتكون مضمونه عندك؟
10:55 أنت على المنصة بتطرح صناديق استثمار؟
15:02 هل بتقدم أي خدمات تكميليله على المنصة؟
18:20 مين المسؤول عن الاستثمارات وفق الشريعة الإسلامية؟
20:23 هل تجربة المنصة كمستخدم شايفها سهله؟
21:25 ازاي بتحمي بيانات المستخدمين بتوعك؟
25:32 أنت كثاندر بتعمل فلوسك ازاي؟
27:03 ازاي أحمد بيعرف إن العميل مضايق؟
29:20 قولنا حاجه عن أحمد بعيده عن ثاندر
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
زي ما أنتو عارفين الاسبوع اللي فات أتكلمنا مع أحمد حمودة المؤسس الرئيسي لمنصة ثاندر للتداول ، أحمد هياخدنا برده النهاردة في رحلة تاني جوه ثاندر ، هنغطي مواضيع زي عمليات التداول نفسها بتتم ازاي ، تحويلات الفلوس ، إيه الجهة الرقابية اللي بتراقب على ثاندر .. مواضيع مختلفة كتير أنا ديماً ببص عليها لو هبص على أي شركة سمسرة أو منصة تداول ، ازاي أطمن كمستثمر النهاردة هنكمل حديثنا معاه
عمر: أول حاجه عاوز اسألك عليها في حاجه احنا ممكن نعملها للمستخدمين لو تقدر تكلمنا عليها كده سريعاً
أحمد: احنا عندنا رابط إحالة ، عمتاً احنا مهتمين أوي ببناء مجتمع وأعتقد أسهل طريقة ان عمر يقول لأصحابه ، يقول للناس اللي بيثقوا فيه إنهم يجربوا المنتج ده فعمر أعتقد انت عندك رابط الإحالة في التطبيق
عمر: آه احنا هنحطه في الشو نوتس والصفحة بتاعتنا
أحمد: وأي حد هيحمل التطبيق ده من الرابط بتاع عمر هيفتح معانا حساب هيبقى عنده كمان مكافأة حتى 1000 جنية
عمر: يعني أنت ممكن تمول الحساب بتاعه وتديله حاجه زي مكافأة تساعده إنه يبتدي بعد ما يمول الحساب بتاعه
اسئلة أعرف عميلك (KYC) أحمد: هو محتاج ينزل التطبيق ، محتاج يمشي خلال
من التطبيق أول ما يمول الحساب بتاعه بياخد جايزة لحد 1000 جنية
عمر: هايل.. طيب أنا هسألك اسئلة تقنية شوية .. للناس اللي هي لسه بتبتدي حياتها وده سؤال أنا لو لسه جاي أول يوم وأنا عندي 20 / 30 سنة أياً كان السن اللي بتبتدي فيه ده ديماً السؤال الأول فدماغي
02:22
عمر: أنت بتختلف إيه عن البنك العادي يعني أنا النهاردة لما بروح البنوك المشهورة زي البنك الأهلي بنك مصر أنا فاهم البنك بحوله فلوس بيفتحلي حساب بحط فيه فلوس بحوش والكلام ده كله من ناحية فتح الحساب يفرق إيه حسابك عن حساب البنك؟
أحمد: أنا بس عايز أرجع وأقولك ديماً إن احنا منتج مكمل للبنوك ، غالباً عشان تستخدمنا هتلاقي ليه علاقه بالبنك هتعمل التحويل من عندنا أو هتودع في أحد حساباتنا في البنك احنا جزء من منظومة الخدمات المالية اللي في مصر وعمتاً بنشتغل مع البنوك
احنا بنينا منتج مناسب أكتر للجيل الجديد من حيث التجربة اللي بنوفرها للناس بشكل إننا نمرة واحد عندنا هي تجربة العملاء وإن احنا نشيل كل العوائق فبدل ما تروح لحد الفرع وتاخد أجازة من شغلك وتفضل مستني في طوابير عشان يتفتحلك حساب
من على موبايلك ، من على تطبيق بنفس اللي انت متعود تشوفه بنفس تجربة المستخدم ، كله على تطبيق أنا هسهلك كل حاجه لو عايز تكلم حد هتلاقي حد على طول بيرد عليك خلقنا تجربة ماشية أكتر مع الأفراد
عمر: فأنت بتفتحلي محفظة مثلاً جوه التطبيق مظبوط؟
أحمد: %100
03:40
عمر: أنا بفتح المحفظة دي ، أنا ببعتلك فلوس ازاي؟ ببعتلك فلوس من حساب البنك ولا عندك طرق أخرى أقدر أبعتلك منها فلوس؟
أحمد: طيب هرجع وأقولك إن الـ 3 حاجات اللي احنا ديماً بنحلها هي فتح الحساب ، تمويل الحساب ، والوعي .. هما دول الـ 3 حاجات اللي ثاندر بتشتغل على إننا نحلهم
عشان تمول محفظتك دلوقتي في ثاندر ياما عن طريق تحويل بنكي ، ياما من الخدمات المصرفية عبر الإنترنت ، ياما من إنستاباي ، ياما تعمل تحويل بنكي من جوه البنك ، ياما لو معندكش حساب بنكي بتروح تودع في حسابي أنا في البنك أو دلوقتي عن طريق فوري بتروح فوري ومن على التطبيق بتقوله أنا عاوز أمول عن طريق فوري بيديلك كود بتديه للراجل وبتحطه على فوري ده اللي موجود دلوقتي وشغالين على بطاقات الخصم على فودافون كاش على كل الأدوات الاخرى اللي ممكن تستخدمها عشان تمول حسابك
عمر: وده ديماً هيبقى في تطور يعني بعد سنة هنلاقي إن طرق التمويل الحساب بتاعي بتتغير صح يعني أنت ديماً بتزود
أحمد: أنت لازم كل ربع سنة تلاقي حاجه جديدة وإلا يبقى عندنا مشكلة ، فأنا بقولك التمويل من الحاجات المهمه أوي بالنسبالنا
عمر: هايل.. الإتجاه العام احنا للأسهل بإذن الله في الإتجاه بتاع تمويل الحساب
04:50
عمر: طيب أنا النهاردة لما بحط فلوس في البنك فالبنك المركز بيضمن فلوسي.. أنا بتكلم هنا من ناحية الضمانات
الأول أنا عايز اعرف أنا فلوسي مضمونة ولا لأ أنت النهاردة في رقابة عليك كشركة؟ يعني في حد منظم؟ فلوسي ازاي بتبقى مضمونة عندك جوه ثاندر؟
أحمد: أول حاجه احنا معانا رخصة من الهيئة العامة للرقابة المالية دي حاجه مهمه أوي
ولو تسمحلي يا عمر أخد خطوة لورا أنت عندك 2 منظمين كبار في مصر عندك البنك المركزي هو المنظم لجميع البنوك وعندك الهيئة العامة للرقابة المالية هو منظم لكل مقدمي الخدمات المالية غير البنوك بيسموها الخدمات المالية غير المصرفية
تحت الهيئة العامة للرقابة المالية في أسواق المال ، في التأمين ، في الترخيص في تمويل المستهلك كل الحاجات دي
فأول حاجه احنا معانا رخصة من الهيئة العامة للرقابة المالية فبالتالي الهيئة العامة للرقابة المالية زيها زي البنك المركزي بتشرف على إن كل حاجه بنعملها وفق للقوانين وبتحمي المستثمرين دي أول حاجه
تاني حاجه انت لما بتشتري أسهم أو لما بتستثمر في البورصة أنت بتشتري أسهم في شركات مدرجة فأنت بالتالي بقيت شريك في الشركة دي فأنت الأسهم دي بتتحفظ عند أمين حفظ برده تحت رقابة الهيئة العامة للرقابة المالية بتضمن إن عمر أسهمه موجوده باسمه ، مربوطه برقم بطاقته لأن عمر في أي يوم لو زعل من ثاندر وعاوز يروح عن طريق سمسار تاني يبيع دي أسهم عمر مش أسهم ثاندر دي أسهم باسم عمر وعنده كامل الحرية إنه يتعامل فيهم والفلوس بتاعتك بتبقى موجودة في حساباتنا البنكية
حاجتين عاوز أقولهملك لازم فلوس عمر تبقى موجودة في حسابات منفصلة ، لازم كل يوم نبعت للهيئة العامة للرقابة المالية تقرير بيوري ازاي فلوس ثاندر لوحدها منفصلة تماماً عن فلوس عمر لأننا معنديش الحق استخدم فلوس عمر في أي حاجه إلا في الاستثمارات اللي عمر بيختارها من على المنصة
تاني حاجه ثاندر عضو في حاجه اسمها صندوق حماية المستثمر وده إجباري في اي شركة سمسرة عشان ده بيحمي المستثمرين من أي حاجه مش مظبوطه من اي سمسار فأحنا عضو فيها بالإضافة إننا عضو في البورصة معانا رخصة تلقي وإكتتاب في الصناديق
احنا من الحاجات اللي بتفرقنا في ثاندر إن من أول يوم أحنا مع المنظم انت مع ثاندر محمي بـ 3 حاجات احنا مرخصيين وفي دعم لو عندك أي مشكلة والشق التعليمي هما دول الـ 3 حاجات اللي احنا بنقولك تطمن وأنت مع ثاندر
عمر: يعني أنا ببعت فلوسي عندك فلوسي دي مبتتخلطش بفلوس الشركة هي بتتحط في حساب كاش بتاع عمر وعمر لو أشترى الأسهم أنت بتروح على البورصة ، وللناس اللي مش عارفه البورصة المصرية شغاله بنظام الاكواد الموحده اللي هو كل عميل بيبقى عنده كود فأنت الأسهم بتديهالي هناك صح كده بتقول ده الكود بتاع عمر ، عمر هيشتري والتكنولوجيا بتاعتك بتربطني بالكود بتاع عمر مظبوط؟ ما بتشتريش تحت ثاندر
أحمد: لأ أنا هقولك احنا ثاندر النظام بتاعنا مربوط بحاجتين بالبورصة المصرية ومربوط بمصر المقاصة ، عمر لما بيحط طلب بيسمع على شاشة البورصة عمر بيقول أنا عايز أشتري 100 سهم من الشركة الفلانية ، الطلب بيروح في الكود الموحد بتاع عمر لأمين الحفظ بتاع عمر
البورصة دي مزاد ناس عاوزة تشتري أسهم في شركات وناس عاوزة تبيع أسهم في شركات لو حصلت المعاملات دي تلقائياً أسهم عمر بتروح لأمين الحفظ بتاع عمر باسمه ولو عمر كان بايع الفلوس بتروح للسمسار بتاعه باسمه
عشان كده بقولك مش إسبوعياً ولا شهرياً ولا هما بيعملوا تفتيش .. لأ يومياً لازم أبعت للهيئة العامة للرقابة المالية أوريها إن فلوس عمر لوحدها وفلوس ثاندر لوحدها
عمر: أنا برده من خبرتي في مصر السوق منظم جداً ، يعني أنا أشتغلت في مصر والسوق المصري فترة طويلة ومن الحاجات اللي بشوفها ديماً الحته اللي أنت بتقول عليها دي هما ديماً بيركزوا في أصل الفلوس إن الأسهم تبقى باسمك ، العمليات لازم تتنفذ بطريقة معينه وطبعاً كل ده تحت مظلة البنك المركزي صح؟
أحمد: لأ البنك المركزي منفصل عن الرقابة المالية
عمر: دي هيئة ودي هيئة
أحمد: بالظبط.. بس الهيئة ممثلة في مجلس إدارة البنك المركزي والبنك المركزي ممثل في مجلس إدارة الهيئة
عمر: وكلهم في الأخر في تفويض بالشمول المالي في مصر فهما مرحبين جداً بالتوسع في الحتت دي صح؟ يعني ده الإتجاه العام بتاع الدولة
أحمد: احنا روحنا قولنا للهيئة العامة للرقابة المالية إن تعريفنا للشمول المالي مش إن يبقى عندك كارت ، تعريفنا للشمول المالي إن الناس يبقى عندها إتاحه للخدمات المالية ، والخدمات المالية فوجهة نظري هما 4 تعرف تحوش وتستثمر وده اللي ثاندر بتحاول تعمله ، تعرف تدفع ، تعرف تستلف والحماية وده أعتقد الفكر اللي عند الحكومة المصرية إن الشمول المالي يبقى لأي مواطن مصري الحق وعلى فكرة انت أتكلم عليها ده جزء من المساواة إن كلنا يبقى عندنا نفس الإتاحه للخدمات المالية دي
10:55
عمر: طيب أنا النهاردة بعتلك الفلوس ، وواضح اننا نقدر نشتري أسهم من عن طريق البورصة ، انت ذكرت حاجه في النص إن انا ممكن أشتري صناديق إستثمار ، أنت بتطرح النهاردة صناديق استثمار كل شوية هنشوف صناديق استثمار على المنصة؟
أنا ديماً كنت بتكلم في حلقات إن ممكن يبقى عندك جزء دخل (سلبي) أنت ما بتدوروش وجزء (نشط) أنت بتدورة وكل ما تكون أنت واحد فاهم أنت بتعمل إيه كل ما تزود الجزء النشط عن السلبي لأن في الاخر انت معندكش وقت كدكتور كصيدلي أن انت تدور محفظتك فأنت النهاردة بتقولي على المنصة ابتديت تعمل إضافة لصناديق الاستثمار
أحمد: صح ، وده مهم أوي بالنسبالنا اللي انت بتقوله ده ، بره في مفهوم (صناديق المؤشرات المتدوالة في البورصة) فأنت ممكن تخش في مؤشر فيه اكبر 500 شركة في أمريكا ، مؤشر بيستثمر في شركات التكنولوجيا .. المفهوم ده بره موجود بالفعل ، مش متواجد أوي عندنا
فأحنا اللي عملاناه كالأتي وهبتدي بأخر سؤال سألناه اخدنا الأول رخصة من الهيئة العامة للرقابة المالية تسمح لنا إن المستثمرين على ثاندر مش بس يتداولوا في الاسهم يتداولوا كمان في وثائق الصناديق أكبر مثال للصناديق هتلاقي الناس عرفاه صندوق اليوم بيومه بتاع بنك مصر اللي كان بيديك العائد اليومي وده بتستثمر فيه أذون الخزانة انا عارف أنك شرحت أذون الخزانة اللي هو أكنك بتسلف الحكومة فأول صندوق عملاناه صندوق اسمه (إدخار) هو بالظبط شبه صندوق اليوم بيومه العائد بينزلك يومي على حسابك وبتعرف تسحب فلوسك بشكل إسبوعي في العادي أنت عشان تعرف تستثمر ياما اليوم بيومه ده مقفول أو تروح لمدير استثمار تقوله أنا عايزك تشتريلي أذون خزانة يقولك محتاج مبلغ قد كده وأنت غالباً زينا كلنا محفظتك قد كده واللي عملناه عن طريق الصناديق ان احنا قولنا لمدير الصندوق انا اللي هتعامل مع كل المتطلبات اني أجيبلك العملا دي فمن أول 11 جنية تعرف تحط في الصندوق ده وبرده يا عمر عشان تبقى عارف لما بتشتري في الصندوق ده الوثيقة باسمك مش باسم ثاندر
الصندوق التاني المتواجد الان على ثاندر هو زي إدخار بس ليه الطابع المتوافق مع أحكام الشريعة الإسلامية الصندوق الأولاني عملنا مع (أزيموت) والتاني مع (مصر للتأمين) احنا من الحاجات المؤمنين بيها برده الإستثمار الموضوعي وأعتقد فيه مجال كبير أوي للمنتجات المتوافقة مع الشريعة الإسلامية
الصندوق التالت هو (نمو) هو بيستثمر في الأسهم بالنيابة عنك.. حلمنا السنادي اننا نقعد نزود صناديق .. صندوق في العقارات التجارية + صندوق في الدهب يبقى أنت عندك على ثاندرعندك القدرة تختار تستثمر في شركات مدرجة في البورصة المصري زي جهينة ، إديتيا ، إي فاينانس ، فوري وتشتري بنفسك
عندك القدرة انك تخش في موضوع أذون الخزانة اللي هو نسبة مخاطر قليلة وعائد مش أعلى عائد بس عائد تمام ، عندك القدرة كمان تخلي مدير صندوق يستثمر بالنيابة عنك عندك بقى صناديق مختلفة (نمو) (عقارات) (دهب) .. وده هنقعد نزودة السنادي
عمر: هايل يعني أنا النهاردة لو عاوز أعمل محفظة متوازنه ما بين مثلاً فئة أصول زي ادوات الدخل الثابت والأسهم أقدر أعملها على ثاندر أقدر أشتري جزء من محفظتي في الصندوق ده وجزء تاني في الصندوق التاني ، او لو عايز أعمل محفظة مثلاً 80% منها (سلبي) اللي هو كلها صناديق و 20% اشتغل فيها أسهم انا كواحد بتعلم أقدر أعمل كده أنا بقولك ليه كده عشان دي أمثلة أنا حتى ذكرتها في حلقات قديمة
أحمد: خلي بالك أنا شخصياً بحب اللي أنت قولت عليه يعني ده أنا شخصياً بحاول أعمله ، النسبة الأكبر من استثماراتي بتبقى في شكل صناديق استثمار والنسبة الأصغر بتبقى في شركات أنا مقتنع بالإدارة ، مقتنع بالمنتج ، حابب الصناعة
مش بقولك إن ده لازم يتعمل بس بقولك ده بناء على تجربة شخصية جزء أكبر من مدخراتي واستثماراتي بتروح في الصناديق
عمر: أنا برده من نفس المدرسة دي يعني أنا بحب أكتر ولدافع الوقت يعني احنا ممكن كلنا نبقى من منتقي الأسهم وبتدور على الأسهم اللي هتطلع والكلام ده كله لو عندنا وقت ولكن الجزء السلبي بتاع صندوق الاستثمار ده بيساعدني أوفر وقتي
أحمد: وعمر لو تسمحلي بس اللي بعمله إن كل شهر مع مرتبي في رقم معين بيروح بنفس النسبة نسبة بتروح للصناديق ونسبة بتروح للأسهم اللي أنا مقتنع بيهم
15:02
عمر: احنا كده عرفنا إيه اللي ممكن تشتريه.. هل أنت بتقدم أي خدمات تانية؟ واضح إنك في المجال التعليمي عايز تعمل وعي فأعتقد في محتوي تعليمي أنت بتعمله ، هل في حاجات تانية زي أخبار ، تحليلات؟ أنا شوفت عندكوا (محفظه العوامل) اللي انتو بتعملوها يعني إيه الخدمات التكميلية جنب الحاجات دي؟
أحمد: بص أنت ذكرت بعضهم أول حاجه عندنا الشق التعليمي واعتقد أهم حاجه البيئة الإفتراضية فأنت أول ما بتنزل ثاندر بيبقى عندك 100 ألف جنية جرب أشتري بيهم شوية صناديق ، شوية أسهم شوف الدنيا عامله ازاي سهل على نفسك ده اللي احنا بنحاول ننادي بيه وبعد كده حط 100 جنية وأبتدي جرب نفسك فاحنا ديماً بنقول للناس خدوا خطوة خطوة ، فالشق التعليمي سواء بقى المقالات أو المحاكاة والمحاكاة من الحاجات اللي احنا مبسوطين أوي بيها عمتاً
الشق التاني هو شق الأخبار أنت قولت كلمة عجبتني أوي يا عمر قولت المساواة في الوصول إلى الأخبار خلي بالك من 2007 للنهاردة ليه أنا ممكن دلوقتي استثمر مباشراً من ثاندر ومش محتاج أكلم السمسار في التليفون لأني أنا بقى عندي سهولة اوي اعرف الأخبار عاملة إيه ، 2007 لأ أنا لازم أكلم السمسار أقوله قولي كده الأخبار إيه ، ايه اللي بيحصل لكن دلوقتي كلنا عارفين الأخبار إيه اللي بيحصل بشكل يومي اللي احنا بنحاول نعمله في ثاندر عن طريق (ثاندر كلابس) اننا ببعتلك الخبر بدل ما أبعتلك المقال بحاول أقولك هو ليه المقال ده مهم ، ليه الخبر ده مهم ، الخبر ده إيجابي ولا سلبي ، محتاج تبقى عارف عنه إيه فتبقى فاهم إيه اللي بيحصل في السوق وبرده ثاندر كلابس من الحاجات اللي احنا مبسوطين أوي بيها عمتاً وحابين برده يا عمر تجربها وتقولنا لو في أي حاجه ممكن نطور فيها
الشق التالت اللي احنا بنبنيه هو السوشيال وبرده يا عمر من الحاجات اللي هتلاقينا بنطورها وقت عن وقت انت دلوقتي يا عمر ممكن تعمل متابعة لأحمد حمودة وانا ممكن أعملك أنت كمان متابعة وابتدي أشوف حاجه بنسميها (رامبلز) كل ما عمر يشتري يجيلي إشعار من عمر إن عمر أشترى السهم الفلاني ده بيمثل كذا في المية من محفظته مش بنشارك أرقام عمر وعمر من حقه طبعاً يقفل الخاصية دي أو يفتحها فأنت على ثاندر في نموذج بتبتدي تسأل الناس فالسوشيال ده من الحاجات اللي بنطورها فيها
الحاجه التانية دعم العملاء لو عندك اسئلة تانية غير الاسئلة المكررة هتكلم حد هيرد عليك يساعدك
عندنا شوية مجهودات في حتة البحث بنحاول نطور موضوع البحث ، عملنا بيه عوامل الاستثمار بالشراكة مع الجامعة الأمريكية إن كل شهر أتفقنا على 10 نسب بتغطي الربحية ، الدين ، الكبر في الإرادات والكلام ده كله بشكل موضوعي جدا بالأرقام بنعملها كل شهر وبنطلع اكتر 10 وبعدين بنطور الموضوع ده كل فترة فمثلاُ احنا ابتدينا ناخد حسابنا لو في أي أخبار سلبيه عن الشركة مش باينه في أرقامهم نبتدي نشيلهم من (مفضلات ثاندر) وأخر حاجه هي اللي بنسميها (قائمة منسقة) لو دخل على (إكسبلور) عاوز تشوف الشركات في مجال الخدمات المصرفية ، العقارات ، وفق احكام الشريعة عندنا في الإكسبلور عملنا مجموعات للأسهم عشان نسهلك الإستكشاف بتاعك
18:20
عمر: أنا مبسوط جداً من موضوع الاستثمارات المتوافقة مع أحكام الشريعة الإسلامية لأن بيجيلي اسئلة كتيرة جداً عنها وبيجيلي كمان اسئلة هل هي حرام هل هي حلال وانا مبقدرش أفتي فيها بس اللي انا عارفه عنها حتى أنا مثلاً عندي في شركتي في صندوق متوافق مع الشريعة بيبقى فيه مجلس من الناس بينظموا وبيتأكدوا إن الأسهم النشاط بتاعها مظبوط وآخر السنة لو في أرباح جايه من مصادر مشتبه فيها بيطلعه فانت كمستثمر قاعد في البيت مش بتعمل ولا حاجه من الحاجات دي الصندوق كله أو المنصة كلها هيعمل الموضوع ده فأنا مبسوط جداً إنك ابتديت تدخل حاجه زي دي على المنصة عندك
أحمد: أنت يا عمر على التطبيق هتلاقي في قائمة أسمها (الشريعة) لو دخلت على السهم ده أو على الصندوق ده في تاج بيقولك ده متوافق مع الشريعة ولا لأ ، الشريعة زي ما انت قولت لو هو في مصر زي صندوق مصر التكافل عندنا اللي بيقول انه متوافق مع الشريعة مش ثاندر اللي بيقول إنه متوافق مع الشريعة هو مجلس من الازهر متوافق عليه من الهيئة العامة للرقابة المالية هو اللي بيشرف على أداء الصندوق وبيتأكد إن الصندوق استثماراته متوافقه مع الشريعة الإسلامية
بالنسبة للشركات في أختبارات معينه بتتعمل على كل شركة الشركة في أنهي قطاع ، نسبة الدين للأصول عشان تقرر وفي علوم احنا بنعملها شراكه مع شركة في إندونسيا هي اللي بتقول هذه الشركة متوافقة مع الشريعة ولا لأ
عمر: وطبعاً أي حد حابب يقرا في الموضوع يقدر يروح ياخد ودهة نظرها وبيبقى موجود عام يشوف مين المجلس لو حد عاوز يعني يبص أكتر عن الكلام ده
أحمد: لأ بس دي مهمه لأن ده من دورنا على فكرة احنا مثلاً لما نزلنا مصر التكافل هتلاقينا عاملين بلوك بوست ادي يا جماعة لما بنقول شريعة يعني إيه متوافق مع احكام الشريعة ، طب مين المجلس ده ، إيه وجهة النظر ده دورنا اننا بنحاول على قد ما نقدر نوفر المعلومات دي بسهولة
عمر: الشفافية
أحمد: 100%
20:23
عمر: هل أنت مبسوط بتجربة المستخدم؟ يعني لما بتخش على المنصة بتحبها ، شايف إن الشكل لطيف ، سهل التعامل عشان ممكن المستخدم يدخل ميعرفش يعمل حاجه ويمشي
NVB أحمد: أول إصدار للتطبيق كان مبني على مجهودنا وفهمنا السوق عايز إيه وده اللي كنا بنسميه الـ
ده اللي احنا استخدمناه عشان نعرف من الناس هما عايزين إيه والكلام ده كله ، أعتقد خلال الـ 6 شهور اللي فاتوا كل شوية بنطور من التطبيق فلو أنا مبسوط أنا مبسوط بحجم التطوير اللي بيحصل في التطبيق أنا نفسي ثاندر يبقى بنفس سهولة إستخدامك لأنغامي وسبوتيفاي وامازون وفيسبوك وإنستجرام هل احنا وصلنا للحته دي لسه بس احنا في الطريق وردود أفعال الناس وهي عايزة إيه واحنا بنعمل إيه ، احنا كشركة أتحولنا من سيف وحمودة وسلمى عايزين إيه للناس بتوعنا عايزين إيه وهو ده اللي بيفيد فاحنا بنعمل إيه ده كمان بسطني
21:25
عمر: طيب الأمن الإلكتروني ده موضوع مهم جداً جداً في أي شركة ازاي تخلي بالك على بيانات المستخدمين بتوعك؟ هل في مخاطرة إن حد يخش ياخد فلوس الناس بس أعتقد بالتكوين اللي كلمتني عليها أن الحاجات مفصوله والهيئة نفسها عندها علم إن عمر عنده الأسهم دي فأعتثقد صعب أوي إن حد يخش ويبيع أسهمي وياخد فلوسي لأن الموضوع اصلاً بياخد وقت أنا بكلمك بقى على البيانات أكتر ازاي بتأمن نفسك كثاندر؟
أحمد: بص أنا هقولك يعني احنا حظنا حلو اننا مش أول ناس تعمل الموضوع ده فكان عندنا فرصة نتعلم من أخطاء غيرنا وأعتقد من الأخطاء اللي سبقتنا ان أنت تبتدي تركز مع الامن بعد ما تكبر فاحنا على قد ما نقدر حاولنا من أول يوم نبقى بنركز في موضوع الأمن
فزي مانت قولت في شق رقابي أنت كده كده الهيئة لازم يبقى عندها قسم بيجي يفحص ويقولك هل فعلاً التطبيق ده متوافق مع متطلبات الأمن ولا لأ دي من ناحية الحاجة التانية انا قولتك إن من أول يوم عملية فتح الحساب ده أكبر عائق عندنا وحله الوحيد الإعداد الرقمي انك تفتح حساب بشكل رقمي من غير الإمضاء هل احنا هناك؟ لأ لسه لغاية دلوقتي عشان تستثمر في البورصة المصرية محتاج تمضي بس اللي احنا خلقناه من أول خلقنا أكنك بتعمل كل الإعدادات رقمية عشان دي الطريق اللي احنا بنستخدمها عشان نوري المنظم ونحاول نوصل لهناك
PIN عشان أعمل الإعداد الرقمي كان لازم الترميز لموبايلك فأنت دلوقتي لو فاتح حساب مع ثاندر عندك اسم مستخدم وعندك رمز
PIN لو جيت فتحت من موبايل حد تاني وحطيت اسم المستخدم ورمز
دخلت إيميلك وجالك الرمز وحطيته يقولك إيه ده يا عمر أنت دخلت من موبايل جديد أنا محتاج أتحقق من هويتك فلما تيجي للأمن PIN بنتأكد من حاجتين ، حاجه انت عارفها إيميلك و
وعمتاً ده مفهوم الأمن (ما تعرفه وما لديك) فاحنا بنحول موبايلك ده أكن هو بقى الرمز الصغير اللي معاك ومن الأولويه اللي احنا شغالين بيها أنا مش عاوز اتكلم كتير عشان خرق بيانات واحده بيبقى عندك مشكلة كبيرة والواحد لما بيتكلم كتير كده بياخد على دماغه
عمر: أنا بس بحاول أسلط الضوء على كل المخاطر.. تاني أنا النهاردة لو بفتح حساب مع حد أنا عايز أطمن إن فلوسي مضمونه ، عايز أأكد إن أسهمي هعرف ألاقيها ، عايز أتاكد ان حسابي مؤمن أنا بكلمك من وجهة نظري كعمر أنا ببص على إيه في المنتج قبل ما أجي عليها
في نقطة مهمه احنا يمكن متكملناش فيها أوي موضوع العمولات ، انت النهاردة وأنا بتداول اللي أنا فاهمه إني مش بدفع عموله زي السمسار العادي المتعارف عليه في مصر صح؟ انا عجبني الموضوع ده برده لأنه بيعمل توافق بين الشركة مع العميل ، يعني أنا كسمسار مش عايزك تقعد تتداول كل يوم أنا عايزك تكبر المحفظة صح كده؟
أحمد: بص يا عمر احنا قولنا من أول يوم احنا بنحاول بنشجع الإستثمار على المدى الطويل إنه يكون عادة
من المشاكل الجزرية في قطاع سوق المال هو إني بعمل فلوس العمولات من تداولات عمر فبالتالي أنا على طول عندي الحافز إنه عمر يلا اشتري دلوقتي وبيع دلوقتي واشتري دلوقتي وخد السوق وهو تحت مع إن ده مش أحسن وقت إن أنا اشتري فيه
فالخطوة الأولى كانت إن أنا وعمر مصلحتنا تبقى واحدة انا وعمر معندناش أي اختلاف في المصالح وده كان معناه إني لازم اشيل العمولات
وخلي بالك السبب التاني عشان تبقى عارف زمان كانت السمسرة بتمشي أنك لازم تكلم حد في التليفون تقوله اشتريلي كذا وبيعلي كذا وقولي أخر الأخبار فكانت عملية تقيلة لازم حد في النص يخدم عليك فكان عندك سبب يكون في عمولات ، دلوقتي النظام بتاع ثاندر مربوط بالبورصة أنت بتقول أشتري بيرمي على طول على شاشة البورصة مفيش حد في النص فبالتالي انت عندك فرصة توفر فلوس كتيرة ومش محتاج العمولة عشان تعرف تعمل فلوس من عمر على المدى الطويل
25:32
عمر: ده يخلينا برده نقول أنت بقى بتعمل فلوس ازاي كثاندر؟ لازم زي ما بنقول احنا وفرنا إيه على الناس أنت بقى كشركة أزاي بتعمل فلوس؟
أحمد: عندنا نوعين من الناس عندنا واحد بيشتري ويبيع أسهم بنفسه في البورصة ده بيعمل فلوس من حاجتين أي حد بيشتري ويبيع ده بيبقى عنده نسبه من فلوسه لسه بايع مستني فرصة جديدة والكلام ده كله الفلوس دي في حسابي اللي هو الحساب المستقل بس أنا The Overnight Rate بعمل عليه
أو بعمل عليه 7.5 لـ 8% عائد
الحاجه التانية اشتري وببيع ببلاش بس أنت كمان في ساعات ببقى عايز بس اشوف الاسعار اللي على الشاشة لأ عاوز اشوف كل الطلبات عامله ازاي فبتدفع اشتراك فدي الشخصية الأولى
الشخصية التاني اللي بيستثمر في الصناديق بالنيابة عندنا أنا باخد عموله من مدير الأصول مش من العميل
عمر: وعلى فكرة البنوك العادية اصلاً بتعمل نفس النسبة دي على الحساب الجاري اللي انت مش بتاخد عليه أي فايدة
overnight أعتقد برده البنوك العامة عندها برده الرخصة انها تعمل منها فلوس
أحمد: والحته التانية كمان انت لما بتروح اليوم بيومه في مدراء أصول هما اللي بيديروها للبنوك والبنك بياخد منه نفس العمولة أنا بس الفرق بينا يا عمربدل ما انا عايز أعمل فلوس من عمر خلال شهر انا عايز اعمل فلوس حلوة من عمر خلال الـ 3 / 4 سنين الجايين
27:03
عمر: لو أنا مضايق كعميل ، أنت وعدتني بكل اللي احنا اتكلمنا فيه وانا مضايق ازاي أحمد بيعرف إن العميل مضايق؟ يعني هل الشكاوي أو المشاكل عندك نظام تطلعها المؤسس بتاع الشركة؟ هل أنت بتشوف الكلام ده بنفسك؟
أحمد: أنا اقولك يعني أول حاجه زي ما انت قولت في عندنا الدعم إنك تتواصل مع الدعم واحنا عندنا الفلسفة بتاعتنا في الدعم إن فريق الدعم مش موجود عشان خاطر يدافع عن الشركة فريق الدعم موجود عشان يبقى صوت العملا بتاعنا وعلى فكرة دي حاجه هما بيحبوها جداً انا مش موجود عشان اي مشكلة الشركة تعملها ابررلها أنا موجود هنا عشان لو انت عندك مشكلة أنا صوتك لو ليك حق أجبهولك ولو في حاجه محتاجه توضيح أقولهالك
واحنا إسبوعياً بنبص على إيه المشاكل الناس بتطلب إيه وأي حد بيبعت للدعم بيقولهم أنه عايز يكلمني على طول بيظبطوا زوم معايا
الحاجه التانية أنا بقولك احنا بنينا حاجه اسمها (مجتمع ثاندر) فالناس بتخش تقول لو عندها مشكلة وجزء من الفريق عندي اسمه التفاعل جزء كبير من مهمته انه يتابع الناس عندها إيه
وتالت حاجه ودي من الحاجات اللي احنا بنحبها اوي في دلوقتي صفحات لمستخدمي ثاندر من الصفحات اللي بنحبها صفحة اسمها (مستخدمي ثاندر) ملناش أي علاقة بيها دي من المستخدمين بتوعنا من أول يوم أخدنا قرار إن مفيش حد من شركة ثاندر هيخش يعلق يكتب عشان الناس يبقى عندها المساحة أنها تشتم أو تنتقض أو تقول اللي هي عايزاه بنسمع وبعد كده يا إما بنقعد مع الادمن يا إما بنرد عليهم يإما بنكلمهم على طول لو في أي مشكلة
احنا شركة لسه فأول سنين حياتنا عارفين اننا هيبقى عندنا مشكلة ، احنا بنطور من المنتج وديماً بقول الفرق بينا وبين الشركات التانية اننا هنكون قريبين أوي وبنسمع وديماً على طول ردود الأفعال اللي بناخدها بنطورها بنعكسه
عمر: أنا بسألك ليه عشان ارجع تاني للشفافية بتاعة الموضوع هل أنت كمؤسس مهتم تسمع الناس؟ واضح أنك موجود أونلاين ، أعتقد نظام المراجعة من أحسن الحاجات اللي أنت ممكن تشوف بيها ومش أنت بس اللي بتشوف بيها دي حاجه عامة فده أعتقد مستوى أعلى
29:20
عمر: أخر حاجه قبل ما أقفل معاك قولنا حاجه عن أحمد ملهاش علاقة باللي احنا أتكلمنا فيه النهاردة يعني أنا شوفت مثلاً انك لعيب كورة أو كنت بتلعب كورة في مرحلة ما
أحمد: آه كنت بلعب كورة أنا ممكن أقولك حاجه مضحكة عني أنا مولود في القاهرة بس بشجع النادي الإسماعيلي أنا وعيلتي
عمر: وإيه السبب ، كان في جيل عين في الإسماعيلي مثلاً
أحمد: لأ لأ أنا أبويا وعمي أخدوا قرار إنهم يشجعوا الإسماعيلي وهيطلعوا الجيل اللي تحتيهم بيشجعوا الإسماعيلي وبقت هي الحاجه اللي بتجمعنا كعيلة يعني انا فاكر قبل الثورة كان عندنا كراسي في المقصورة بنسافر نحضر الماتشات ونرجع فالعيلة عندنا عندها هوس بالإسماعيلي
عمر: ودي معلومة أعتقد مش موجودة قولتلها قبل كده؟
أحمد: لأ يعني أتمنى الإسماعيلي ميهبطش السنادي عشان هتبقى في مشكلة كبيرة عندنا في العيلة
عمر: طيب مش قادر أقولك قد إيه شكراً انك كنت معايا النهاردة أنا ديماُ عايز أتكلم معاك لأني بتسأل كتير عن ثاندر اسئلة بتجيلي طب أنت إيه رأيك فيهم وأنا مش حابب أدي رأيي فيهم كعمر يعني أنا مش مستخدم للمنصة لأن طبيعة شغلي أنا مش بستثمر على طول في الأسواق الطريقة اللي بستثمر فيها خلال صناديق بتاعتنا شخصياً
كان نفسي أجرب التطبيق أنا حملته طبعاً بس مجربتش أستثمر بيه ومتابعكوا على طول فأنا كنت حابب ارد على الناس دي بحلقة يكون ثاندر حد بيتكلم منها مش أنا اللي بقول رأيي في التطبيق لآن البودكاست ده بحاول أخليه ديماً محايد بحاول أدي أراء الناس اللي عاملة المشاريع بتاعتها أو الأفكار بتاعتها فأنا تعمدت احاول اسأل الأسئلة المهمه ولو جالي اسئلة من الحلقة دي من الناس اللي بيسمعونا ممكن أبعتهالكوا وتردوا عليها برده لو في صوت أنا حابب مثلاً حد عنده حاجه البودكاست برده يوصلهولك على طول يعني أتمنى أكون بساعد ثاندر مستقبلاً
فميرسي جداً جداً يا احمد والله على وقتك معايا النهاردة انا أسف طولت عليك
أحمد: احنا اللي ميرسي جداً يعني ومبسوطين إن في حد مهتم يعني اللي انت بتحاول تعمله ده مهم جداً جداً جداً فشكرأً انك أخدتنا معاك
عمر: انا نفسي حتى الحلقة دي تكون عندك لو حد عايز يعرف أكتر عن ثاندر .. في أي حاجه أنا مسألتهلكش النهاردة حاسس اني مفروض كنت أغطيها مغطتهاش؟
أحمد: لأ سألتني كل حاجه بصراحة
عمر: ميرسي جداً يا أحمد على وقتك
أحمد: شكراً جداً يا عمرعلى إستضافتك لينا
Translation of some words and terms:
Users مستخدمين
Referral link رابط الإحالة
Community مجتمع
Downloadتحميل
Bounty مكافأة
Fund Account يمول الحساب
Through خلال
(KYC) Know Your Customer اعرف عميلك
Technical تقني
In terms of من حيث
Customer Experience تجربة العملاء
Wallet محفظة
online banking الخدمات المصرفية عبر الإنترنت
Debit card بطاقات الخصم
Quarter ربع سنة
non-banking financial services الخدمات المالية غير المصرفية
Capital Markets أسواق المال
Licensing الترخيص
Consumer Finance تمويل المستهلك
Investor Protection Fund صندوق حماية المستثمر
Regulator منظم
Supportدعم
Order طلب
Transaction معاملات
Automatically تلقائياً
Inspections تفتيش
Mandate تفويض
Financial Inclusion الشمول المالي
Payment دفع
Borrowing الاقتراض
Insurance تأمين
Equality المساواة
on boardيطرح
Platformمنصة
Passive income الدخل السلبي
Active income دخل نشط
Misr Insuranceمصر للتأمين
Shariah Compliant متوافق مع أحكام الشريعة الإسلامية
Thematic investing الاستثمار الموضوعي
Growth النمو
Commercial Real estate العقارات التجارية
Stock picker منتقي الأسهم
Services خدمات
News أخبار
Analysis التحليلات
Factor portfolio محفظة العوامل
Complementary Services الخدمات التكميلية
Articles مقالات
Simulator محاكاة
Clubs النوادي
Follow متابعة
Notification إشعار
Form نموذج
Customer Support دعم العملاء
Research بحث
Factor investing عوامل الاستثمار
Ratios نسب
Debt الدين
very Objective موضوعي جدا
Curated list قائمة منسقة
Explore أستكشف
Banking الخدمات المصرفية
Real estate العقارات
Board مجلس
Science علوم
Assets الأصول
Perspective المنظور
User Experience تجربة المستخدم
Friction احتكاك
Feedback ردود الأفعال
Loop حلقة
Cyber Security الأمن الإلكتروني
Topic موضوع
Data بيانات
Risk مخاطرة
Structure بنية
Segregated مفصول
Security أمن
Department قسم
Inspect يفحص
Digital onboarding الإعداد الرقمي
Tokenization الترميز
User name اسم المستخدم
Token رمز
Priority أولوية
Jinx it نحس
one data breachخرق بيانات واحدة
Highlight تسليط الضوء
Commissions العمولات
Trade تداول
Broker سمسار
Aligned التوافق بين
Incentive حافز
Heavy Operation عملية ثقيلة
Persona شخصية
Ideal المثالي
Distribution توزيع
Level مستوى
at some point في مرحلة ما
Fun Fact حقيقة مرحة
Neutral محايد
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي # ثاندر #الجزء_الثاني