50. ما يسأله المستمعون - الجزء الخامس
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة هي الجزء الخامس من حلقات ما يسألة المستمعون واللي بنحاول فيها نرد على أكبر عدد من أسئلتكم اللي وصلتنا من خلال صفحتنا على السوشيال ميديا احنا بنجمع كل الأسئلة اللي بتوصلنا وكل 10 حلقات بنعمل حلقة نرد عليكم فيها
أسئلة الحلقة :
01:08 ليه علماء الإقتصاد مش أثرياء مع أنهم أكتر ناس فاهمة فلوس وهما اللي أسسوا النظام الإقتصادي؟
03:55 ليه في ناس بالفطرة شاطرين في الفلوس من غير ما يقروا ولا يتعلموا؟
06:19 ازاي أبطل شراهة الشراء خصوصاً اونلاين؟
09:08 ازاي أقيّم عرض عمل في دولة/مدينة أخرى وازاي أعمل حساب مصاريف حياتي الجديدة؟
10:27 أفضل حل أحافظ بيه على قيمة 100 ألف جنية في ظل موجة التضخم وأرتفاع الفايدة المتوقع؟
13:00 ليه أغلب الأغنياء بيتعلموا ازاي يتهربوا من الضرايب بدل ما يتعلموا عن الإستثمار؟
15:20 ازاي أختار تأمين طبي ليا وللأسرة وأقدر ازاي أدفع تكاليفة اللي بتزيد؟
احنا ديماً مستنيينكم تبعتولنا أسئلتكم واستفساراتكم ، وممكن كمان ترجعوا تسمعوا الحلقات السابقة من ما يسأله المستمعون لأن ديماً التساؤلات أوالمشاكل اللي بتواجه الأخريين ممكن تخلق أفكار جديدة ومختلفة وتسهل المشوار أكتر
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:50
اهلاً بيكوا في حلقة جديدة من بودكاست كلام ينور
حلقة النهاردة زي ما اتعودنا هي حلقة ليها علاقة بالأسئلة اللي جايه من خلال صفحتنا على السوشيال ميديا هنحاول نرد على أكبر عدد من الأسئلة احنا بنجمعهم وكل تقريباً 10 حلقات بنحاول نرد عليكم فيها
01:08
هبتدي في أول سؤال بيقولي: ليه الأثرياء مش منهم علماء الإقتصاد مع أنهم أكتر ناس فاهمة فلوس وهما اللي أسسوا النظام الإقتصادي؟
طيب هو سؤال كويس جداً أنا من وجهة نظري مفيش أي حد بيأسس أي نظام إقتصادي النظام الإقتصادي ده عبارة عن أتفاق ما بين المجتمع إن احنا هنعمل طريقة معينة في التعامل يعني مثلاً النظام الإشتراكي كان مثلاً دولة أتفقت إن احنا شايفين إن دي أحسن حاجه فأحنا كدولة كلنا بالناس كلها اللي عايشه بتاعتنا هنعيش بالطريقة دي ، وبعدين لما حصل إن النظام العالمي محسش إن النظام ده هيقدم البشرية ابتدى يطلع أنظمة أخرى منها النظام الرأسمالي
النظام الرأسمالي ده أتفاق ما بين المجتمعات وما بين الدول وما بين الإقتصاديين ما بينهم وبين بعض ولكن مفيش حد واحد إقتصادي بيطلع يقول يا جماعة أنا همشي الدولة دي بالطريقة الفلانية وأنا شايف إن ده صح ده أول جزء في السؤال كنت حابب أرد عليه إن الإقتصاديين نفسهم مش هما اللي بيأسسوا النظام يعني مش بحط قانون إقتصادي كعالم إقتصاد والدولة تمشي عليه فده إتفاق ما بينا وبين بعض معتقدش إن في حد عنده تحكم بشكل كبير حتى وزراء المالية في دول معينة أو رئيس الخزانة في بنك معين أو أياً كان المنصب العالي بتاعك أنت عايش في مجتمع أكبر منك الإقتصاد الكلي بتاع الدولة هو حاجه كبيرة إنك تعرف تتحكم فيه بسهولة
طيب ليه هما مش أثرياء بقى.. الأثرياء أياً كان تعريفهم هو مستثمر يعني اللي بيعرف يوصل إنه يكون ثروة هو مستثمر شاطر ، والمستثمر الشاطر ده ممكن يكون دارس وممكن ميكونش دارس ممكن يكون عارف هو بيعمل إيه وممكن ميكونش عارف بس هو شاطر في إدارة أمواله ، ممكن ميبقاش عارف النظرية الإقتصادية الكاملة اللي بتحرك سوق العقار في دولة ما بس هو عنده بُعد إستثماري في شخصيته خلته يحط الأرقام ويفكر فيها فالمنطق بتاعه طلع إن ده إستثمار كويس
فلو حضرتك إقتصادي دكتور مثلاً في الجامعة أو فاهم علم الإقتصاد بس أنت مستثمر مش كويس ده مش معناه أن أنت هتبقى ثري أو هتوصل للثراء بالمعنى اللي حضرتك بتسأل بيه.. طيب لو واحد مش دارس بس هو مستثمر كويس جهز نفسه وحسب أرقامه وعمل إستثماراته بطريقة صحيحة فهو هيبقى على المدى الطويل أثرى أو معاه فلوس أكتر من الراجل الإقتصادي الجامعي اللي بيدي محاضرات في الإقتصاد مثلاً فده الفرق ما بين الأتنين واحد مستثمر وواحد مش مستثمر من وجهة نظري
03:55
السؤال العكسي بقى بتاع ليه الإقتصاديين مش أغنياء.. هنا هو بيسأل: ليه في ناس مش متعلمه ورغم كده بالفطرة شاطرين في الفلوس من غير ما يقروا كتب ولا يتعلموا؟
التفكير المنطقي هنا هو اللي بيفرق يعني في ناس عندها علم كتير جداً بس هو معندهوش تفكير منطقي في حياته ، بمعنى إنه مش بيعرف ياخد العلم بتاعه ده ويفصصه بمنطق وميعرفش ينفذه ، الموضوع مش بس علمي ، الموضوع مش بس أنا عندي المعلومة.. يعني في كام واحد مثلاً لو قولنا عندهم فكرة إنهم يعملوا فكرة الشبكات الإجتماعية ، وفي كام فيسبوك مثلاً ، أو في كام واحد قال أنا عايز أعمل محطة راديو في العالم مثلاً آلآف من الناس وفي كام محطة راديو ناجحة فهنا التنفيذ بتاع الفكرة في الزمن اللي احنا عايشين فيه من وجهة نظري هو أهم بكتير من الفكرة
طيب الراجل اللي مش متعلم هو ممكن يكون شاطر جداً في التنفيذ ممكن يكون عملي جداً ممكن يكون عنده بدايات التفكير الرياضي اللي هو أنا شاطر جداً في الحساب أو شاطر جداً في أننا عارف إني هحط فلوس النهاردة وهيرجعولي كام السنة الجاية والسنة اللي وراها ويبتدي يحسبها ويقارنها بالبنك يعني حاجات بسيطة جداً جداً ممكن التاجر العادي أو الراجل اللي معندوش خلفية يقدر يعملها فالفرق بين الأتنين بصراحة بالنسبالي هو التفكير المنطقي والجودة في تنفيذ القرارات دي فأعتقد هما دول الحاجتين طبعاً في حاجات تانية ممكن تكون بتنجح الناس دي بس أنا بتكلم على العموم دول أكتر حاجتين بحسهم بيخلوا الناس دي تنجح
والنجاح والفشل مش مرهون على حد يعني مع الأسف أنت متقدرش تتوقع فلان الفلاني ده هينجح أو مش هينجح وكلنا شايفين الكلام ده في حياتنا مش ديماً اللي أنت شايفه وأنت صغير معاك في المدرسة أو واحد واعد أو صاعد أو أي حاجه هو ده ديماً اللي بينتهي بالنجاح والنجاح هنا برده تعريفاته كتيره جداً فممكن من وجهة نظرك هو يبقى ناجح أو غني بس من وجهة نظر تانية هو مش ناجح فالموضوع واسع جداً بس أعتقد هما دول السببين الكبار بشكل عام
06:19
سؤال تاني بيقول: ازاي أقدر أبطل شراهة الشراء خصوصاً اونلاين؟
السؤال ده عاجبني جداً بصراحة أول حاجه احنا قولناها قبل كده إن انت تعرف المشكلة جزء كبير جداً من حل المشكلة ، يعني كون إن حضرتك سألتي السؤال ده يعني عرفتي إن عندك مشكلة ، طيب ليه هي مشكلة؟ لأن لو بنستخدم لفظ شراهة بمعنى إني بشتري زيادة عن اللزوم أو حاجات أنا مش عايزها أو باجي بعد فترة بلاقي إن دي اصلاً حاجه مرتبطة بالعاطفة بس عشان تحسسني إني حاسس كويس أياُ كان الدوافع اللي بتخليكي تروحي تشتري الحاجه دي فتعريف المشكلة ده جزء كبير جداً من الحل
طيب بعد ما عرفت المشكلة أول حاجه هبتدي أعمل جزء في ميزانيتي مخصص للإتجاه ده يعني هقول أنا مثلاً هعمل في الأول 15% من ميزانيتي مثلاً هروح أعمل بيها شوبينج في أي وقت معنديش أي مشكلة أنا من وجهة نظري كون إني ابتديت أحدد النسبة اللي أنا هعمل فيها الشراء الإندفاعي ده أو اللي مالهوش معنى فانا ضمنت على الأقل إني مقدرش أطلع فوق الرقم ده كل شهر يبقى ده أول خطوة في الحل من وجهة نظري
تاني خطوة إني ممكن ابتدي أقول انا مش هشتري مثلاً غير كل ويك إند أو يوم الجمعة والسبت في الأجازة بس هو ده هو ده اللي أنا هعمل الشوبينج بتاعي أو هقول مثلاً لأ أنا هعملها مرة واحدة في الشهر أو هجمع كل الشرا اللي أنا عايز أعمله وأعمله في يوم واحد فكده أنت بتدرب مخك إن أنت لازم يبقى في حاجات معينة لازم أتاكد أنها جوه ميزانيتي حاجه تانية إني بحدد له الوقت بعد شوية الحاجات دي هتطلع من النظام بتاعي يعني بعد شوية هلاقي نفسي بقى خلاص مش فارقه يعني ممكن أنزل شوية الـ 15% دي لـ 10% أو أنزلها لـ 7% أو 5% هبتدي أنزل النسب اللي أنا ممكن أعمل بيها الشراء الإندفاعي ده
وديماً حس وأنت بتروح تشتري الحاجه هل أنت بتشتريها عاطفياً ولا لأ دي برده نقطة مهمه جداً في الموضوع إني لو أبتديت أعرف إني دي اللحظة اللي أنا هشتري فيها فدي لحظة عاطفية أحاول أتجنبها وأحاول أفتكر من التجارب السابقة إن الحاجه دي فالأخر بتروح مبتعلمش أي حاجه وأنا بشوف الكلام ده مكرر جداً جداً في اللبس مثلاً يعني الناس ديماً بيبقى عندها لبس كتير جداً في الدولاب بتاعها مبتستخدموش الحاجه التانية إن انت ممكن تعملها عشان تشجع بيها نفسك إن أنت تروح على دولابك أو الحاجات اللي أنت مبتستخدمهاش وحاول تطلعها لحد ممكن يستخدمها في نفس الوقت هيخليك تحس بإحساس كويس ويخليك برده متكررش المشاكل دي في المستقبل
09:08
سؤال بيقول: لو جالي عرض عمل في دولة أخرى يعني هضطر أنقل أو في مدينة أخرى.. ازاي أقيم العرض المالي اللي جالي؟ وازاي أعمل حساب للمصاريف بتاعة حياتي الجديدة؟
الميزة النهاردة ان احنا عندنا على الإنترنت معلومات لا نهائية وفي مواقع بالكامل شغلتها إنها تديك المستوى المعيشي في كل دولة يعني لو حضرتك دخلت جوجل مثلاً تكلفة المعيشة في دولة مثلاً سيبيريا ، ألمانيا أي حاجه هتلاقي مواقع كتيرة وهتلاقي المواقع دي الناس نفسها اللي عايشه جوه الدول دي بتحط الأرقام وبتحدثها فد أول حاجه تقدر تجيب المعلومات منها إن انت تخش تجيب البنود الرئيسية اللي هتملى بيها الميزانية بتاعتك الميزانية بتاعتك زي ما اتكلمنا في حلقة الميزانية ممكن ترجع تسمعها تاني فيها بنود رئيسية هتدور على البنود دي وتبتدي تملى الميزانية بتاعتك هتعرف المصاريف الأساسية بتاعتك في الدولة دي قد إيه والمصاريف الكمالية قد إيه وهتحط مرتبك فهتعرف اللي فاضلك في ميزانيتك قد إيه فالأداة هي الميزانية ومكان المعلومة هو الإنترنت
10:27
في سؤال تاني بيقول: إيه أفضل حل أحافظ بيه على قيمة 100 ألف جنية على المدى القريب سنة أو سنتين في ظل موجة التضخم وأرتفاع الفايدة المتوقع؟
أنا مع الأسف مبعرفش أشوف حاجه قصيرة المدى يعني المدى القصير بالنسبالي هو حاجه صعبه في توقعها حاجه النتيجة بتاعتها ممكن تبقى غلط بحس انها من ناحية أكتر ملك أو كتابة 50 / 50 يعني أنا مش بحس إني بعرف أتوقع المدى القريب أوي ومش بنصح أي حد إنه يعمل التوقع بتاع المدى القريب على قد ما أقدر
ولو حضرتك شايف موجة التضخم في السنة الجاية طبعاً هتحاول تربط فلوسك في حاجه بتجيبلك دخل ، لو موجة التضخم هتعلى معناه إن الفوايد هتعلى في الوقت ده فالنصيحة الأولى إنك لو هتشتري أذون خزانة أو وديعة تبقى حاجه في المدى القصير لأن كل شوية الفوايد هتعلى فهتعيد تسعير الشهادة بتاعتك أو الوديعة بتاعتك فده من ناحية الحاجات اللي فيها سيولة مالية عالية
برده العقار هو حاجه مهمه في التضخم بيحميك من التضخم ولكن العقار مقدرش أديك عليه قرار سنة أو سنتين يعني مثلاً أقولك أشتري عقار النهاردة وبيعه بعد سنة أو سنتين ممكن تكون اشتريت في الحته الغلط ، اشتريت في الحاجه اللي مش هيحصل فيها تضخم ، ممكن بالعكس الناس اللي جوه العقارات دي في المكان ده في الدولة دي حالتهم المادية هتبقى أوحش بعد سنة ومش هتلاقي حد يشتري منك فأنا مقدرش أديك حاجه على الأصول نفسها اللي هي تقيله في بيعها إنها مثلاً تحميك من التضخم
يمكن تكون الأسهم بتستفيد من التضخم فممكن تحط جزء من الأسهم ولكن بشكل عام أنا مبحبش أنصح حد على المدى القصير المفروض تعمل كده أو السنة الجاية تعمل كده ، أو العملة المشفرة لما يحصل تضخم هتطلع أو هتنزل أنا معنديش أي فكرة بصراحة ومش دي شغلتي ومش ده هدفي ومش بحس إن ده اللي بيحقق الفرق في حياة البشر الإستثمار على المدى الطويل هو بالنسبالي أهم وآكثر صلابه واحتمالية حدوثه عالية جداً إن أنت تعمل فيها فلوس مقارنة بالمدى القريب
13:00
في سؤال بيقول: ليه الناس عموماً مع بعض الأغنياء بدل ما يبدأوا يتعلموا عن الإستثمار بيتعلموا ازاي يتهربوا من الضرايب في كتب بتتباع عن ازاي تعمل كده؟
أي حاجه في الدنيا أنت ممكن لو عاوز تحل مشكلة ممكن تحلها بطريقة سريعة وممكن تحلها بطريقة بطيئة وفيها مجهود أعلى الناس ديماً بطبيعتها غصب عننا بنحاول نلاقي الطريقة السريعة للثراء أو الطريقة السريعة للوصول للهدف ولكن مش ديماً هي أحسن طريقة أخلاقية فمثلاً ممكن طريقة التهرب من الضرايب أو إن أنت تبقى بتحاول تتذاكى على النظام أو بتحاول تاخد حاجه مش حقك فأنا مقدرش أعلق ليه الناس بتعمل كده بس هي في طبيعة البشر إنهم بيحاولوا يستسهلوا أو يكسلوا وميعملوش مجهود لأن الإستثمار على المدى الطويل فيه مجهود كبير جداً إن أنت توصل للنتايج اللي أنت عايزها والموضوع بياخد وقت وصبر وتعليم وحاجات كتير جداً
ولكن ده ميخلنيش أقول إني عندي محفز ضريبي أنا مش ضده بالعكس يعني مثلاً ممكن في دولة ما تفتح منطقة تسميها مثلاً سوق حره أو مكان معين مفهوش ضرايب يعني بلد مثلاً فيها 50% ضرايب 30% ضرايب ولكن في الدولة دي أو في الإمارة دي بيديك محفز ضريبي فده انا مبحسوش تهرب ضريبي ده الدولة أو المكان اللي أنت عايش فيه عايزك تروح تفتح شركتك هناك وهي هتعفيك من الضرايب مثلاً 5 أو 10 سنين هي هنا بتعمل الحاجه دي لسبب ما إنها عايزة تشجع قطاع معين أو عايزاك تعين ناس معينه والكلام ده كله فأنا مبعتبروش تهرب ضريبي بعتبره محفز ضريبي أنا شايف إنك ممكن تستخدمه لو أنت مستثمر شاطر وعندك المحفزات الضريبية الحاجتين دول مع بعض طبعاً أحسن أنا أنصح إنك تعملها بس رداً سريعاً على سؤالك أنا أعتقد إن الناس بس بتستسهل وتدور على الإختصارات
15:10
سألت سؤال قبل كده على الفيسبوك وأنت مجاوبتش.. أنا بعتذر جداً أنا على قد ما أقدر بجاوب يمكن بس السؤال ده عدى مني
15:20
السؤال هو ازاي تختار تأمين طبي ليك وللأسرة وازاي تقدر تدفع تكاليفة اللي بتزيد؟
مع الأسف القطاع الطبي هو من أكتر الحاجات اللي فيها نسبة تضخم عالمياً حتى مش في الدول العربية بس فمع الأسف هو هيفضل ديماً يطلع لحد ما يحصل الخدمة دي تبقى موجودة بشكل كبير مع الأسف الخدمة دي لحد النهاردة هي مش متوفرة بالشكل الكافي لكل الناس ، مش كل الناس عندها خدمات طبية فمع الأسف التضخم ده موجود فالإتجاه العام ده هيفضل ديماً موجود
طيب لما أنا بختار تأمين صحي معين أنا أول حاجه بشوف السوق مسعرلي ازاي بروح أقارن شركات التأمين ببعض مين هيديني تأمين طبي بجودة معينة في شبكات معينة في دول معينة وهكذا
برده بحاول أشوف الشغل بتاعي هل الشغل بتاعي ممكن يوفرلي التأمين الطبي ده ولا لأ لو التأمين الطبي الشغل مبيوفرهوليش ممكن أروح أتكلم مع الشغل وأقوله مثلاً أنا محتاج تغطية أعلى شوية أو مستشفيات أحسن شوية لو الشغل رفض ممكن أحاول أتفق معاهم إني ممكن أدفع جزء من التمن ده ولا لأ وهكذا
يبقى في الأول هنبتدي نحدد احنا عايزين إيه أنا عندي كام فرد في الأسرة عايز أغطيهم وبعدين عايز الجودة بتاعة التأمين شكلها عامل ازاي إيه نوع المستشفيات ، إيه الحد الأقصى في العلاجات المعينة لا قدر الله التأمين بتاعك يكون بيغطي الأمراض المستعصية أو الخطرة دي برده حاجه مهمه وهكذا أنت بتحدد رقم أو بيطلعلك رقم من السوق وبتروح تعمل البحث بتاعك لو الشغل غطهالك خير وبركة لو أنت هتدفعها من جيبك تبتدي تعرف هي هتبقى قد إيه من ميزانيتك واحنا اتكلمنا على النسب الموجودة في الميزانية بتاعتك بتاعة التأمين الصحي فأنت لو النسب دي أقل من كده فأنت متخافش خد التغطية دي لأنها هتساعدك تعيش أفضل وهتبقى مركز على باقية ميزانيتك طول ما الحاجات بالنسبالي هي في الحدود المعقول بالنسبة لميزانيتك وأنت بتستثمر الفائض أنا معنديش مشكلة أعمل اللي أنت عايزة أعمل الحاجه اللي مريحاك إن بشكل عام جودة حياتك عليت بإضافة التغطية دي
17:52
في النهاية أحب أشكر كل الناس اللي سمعت الحلقة بتاعة النهاردة احنا بنحاول نغطي على قد ما نقدر طبعاً من الأسئلة اللي بتجلنا ياريت تبعتولنا أسئلتكوا وأستفساراتكوا وأشوفكوا في حلقة جديدة من كلام ينور
Translation of some words and terms:
Control مراقبة
Social Networks الشبكات الاجتماعية
Factors عوامل
System نظام
Cost of living تكلفة المعيشة
Update تحديث
Budget الدخل
Short Term المدى القصير
Outcome نتيجة
Coin Flip الوجه العملة
Liquidity السيولة
More solid أكثر صلابة
Approach مقاربة
Ethical أخلاقي
Tax Advantage الميزة الضريبية
Shortcuts الاختصارات
Saturation التشبع
Inflation تضخم اقتصادي
Policy وثيقة التأمين
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #ما_يسأله_المستمعون