77. مؤشر شرا المستهلك - مقياس التضخم
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
التضخم واحد من المصطلحات المهمه والشائعة في المجال المالي ، ومن العوامل المؤثرة بشكل عام على اقتصاديات الدول وعلى ميزانيات الأفراد بشكل خاص
..أتكلمنا في حلقة سابقة عن التضخم وعرفناه كمصطلح وقولنا ليه التضخم موجود في حياتنا
النهاردة بنتكلم على ازاي نقيس حجم التضخم في حياتنا ، وازاي نقارن بين الفرص الاستثمارية ونعرف هل بنحقق عوائد إيجابية ولا لأ بإستخدام مقياس التضخم أو مؤشر شرا المستهلك
00:50 معدل التضخم المستهدف
01:48 ازاي التضخم ممكن يفرق في قراراتك الاستثمارية؟
02:30 مؤشر شرا المستهلك
03:37 ازاي الحكومات بتبص على ميزانيات الأفراد
03:56 معدل الفايدة الحقيقي
05:32 ازاي نستخدم مؤشر شرا المستهلك في حياتنا؟
07:20 أهميته المؤشر بالنسبة للحكومات والبنوك المركزية في العالم؟
08:11 ازاي نحسب مؤشر شرا المستهلك؟
08:47 البنود العامة في مؤشر شرا المستهلك
10:25 نسب المؤشر في "مصر"
11:55 أنا هستفيد إيه لما أعرف نسب البنود دي؟
13:02 نسب المؤشر في "الإمارات"
14:53 نسب المؤشر في "السعودية"
15:40 ازاي تحارب التضخم جوه بيتك؟
هدفنا النهاردة مش اننا نبص على التضخم من الناحية الأقتصادية للدولة ، احنا بنحاول نشوف ازاي التضخم ده بيؤثر عليك جوه بيتك وعلى ميزانيتك وفي قراراتك الاستثمارية
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
00:50
النهاردة أنا هتكلم على موضوع مهم يمكن بيمس كل واحد فينا بيسمع البودكاست النهاردة وهو موضوع التضخم ، احنا أتكلمنا قبل كده يعني إيه تعريف التضخم ، وليه التضخم اصلاً موجود في الأسعار أو في حياتنا وسريعاً كده احنا بنقول التضخم هدفه إنه يخلي الناس ديماً تبقى بتصرف ، الحكومات بيبقى عندها معدل للتضخم مستهدف اللي هو مثلاً في أمريكا 2% سنوياً ان احنا عايزين يبقى في زيادة في الأسعار ولو بسيطة عشان تشجع المستهلكين ديماً إنهم يصرفوا الفلوس اللي بتجيلهم ومن الصرف ده بنقدر نزود الأقتصاد والعجلة الأقتصادية تقدر تدور لأن لو مفيش تضخم أنت هتبطل تستهلك ، يعني لو أنت عارف إن الأسعار بتاعة الحاجه اللي هتشتريها السنادي هي أرخص السنة اللي وراها أو السنة اللي وراها ده معناها إنك ممكن متبقاش عايز تصرف
01:48
أتكلمنا مع مروان في حلقة من الحلقات القديمة على موضوع التضخم لو حابب تسمع أكتر عنه كشرح ممكن ترجع ليها ، النهاردة أنا هتكلم أكتر على التضخم وازاي ده بيأثر على كل واحد فينا ، وازاي ده ممكن يفرق في قراراتك الاستثمارية ، وازاي ده برضه ممكن يخليك تعرف ازاي العوائد بتاعتك هل هي عوائد إجابية من منظور إنك بتحافظ على قيمة فلوسك وبتعمل عائد حقيقي فوق قيمة التضخم ولا لأ
فبمنتهى البساطة الحكومات إجتمعت أو الأقتصاديين في الدول المختلفة إجتمعوا إن في مؤشر معين هنحسبه بطريقة معينة ، المؤشر ده هيقولنا احنا حصل في البلد بتاعتنا أو في الدولة بتاعتنا تضخم بنسبة قد إيه
02:30
المؤشر ده اسمه "مؤشر أسعار المستهلك" يعني أنت النهاردة كواحد عندك بيت عندك سلعة معينة بتشتريها كل شهر ، أو طريقة معينة بنصرف بيها فأجتمعوا إن في بنود أساسية لكل الناس بتصرف فيها فلوسها
البنود دي ثابتة في معظم الدول ولكن النسب اللي جوه المؤشر بتختلف من دولة لاخرى ، يعني هنلاقي إن في دول مثلاً العقارات والإيجارات فيها غالية ، وفي دول العقارات والإيجارات الجزء اللي أنت بتدفعه على بيتك واطي فهنلاقي إن كل بنك مركزي في كل دولة بيطلع إحصائيات معينة بشكل معين وبيحسب المؤشر بتاعه بطريقة مختلفة وده اللي احنا هنناقشة في حلقة النهاردة عشان تبقى فاهم برضه أرقام التضخم اللي بتطلع في العالم مختلفة بتسمع مثلاً التضخم في أمريكا كذا % ، التضخم في مصر كذا % ولكن طريقة الصرف في أمريكا غير طريقة الصرف في مصر غير طريقة الصرف في السعودية والإمارات وهكذا..
03:37
احنا في الحلقة دي انا حابب أوريك ازاي وبرضه ممكن منها نقدر نعرف الحكومات بتبص علينا ازاي أو بتبص على الميزانيات بتاعتنا ازاي أو كل واحد عنده ميزانية بتاعته قد إيه بيصرف منها في النقل والمواصلات ، قد إيه ممكن يصرف منها على البيت ، قد إيه بيصرف على التعليم وهكذا
03:56
حاجه برضه مهمه لازم أبقى عارفها أنا النهاردة لما باجي استثمر ، إفتراضاً عملت ميزانية بتاعتي وطلعت النسبة الاستثمار بتاعتي والأدخار الأول 10-15% وبعدين أبتديت استثمرها ، جيت آخر السنة حققت عوائد نقول مثلاً 10%
طيب هل العوائد دي عوائد إجابية ولا لأ؟ لازم أقارن ما بينها وبين معدل التضخم في الدولة اللي أنا عايش فيها يعني لو لقينا مثلاً معدل التضخم في الدولة اللي أنا عايش فيها 15% والعائد بتاعي 10% يبقى أنا هنا خسرت 5% من القوة الشرائية بتاعتي في هذه السنة
فديماً لما هقارن فرص استثمارية او حاجه بتجيبلي عائد لازم أبقى عارف إيه نسبة التضخم اللي أنا متوقعة خلال السنة دي أو أنا متوقع إيه اللي هيحصل فيا ، فأنا بحاول أحافظ على قيمة فلوسي ومش بس بحاول أحافظ على قيمة فلوسي أنا بحاول أعمل عائد حقيقي إيجابي فوق النسبة دي
فأنت النهاردة تقدر تجيب الأرقام دي موجودة في البنوك المركزية كلها تقدر تبحث على جوجل البلد اللي أنت عايش فيها هتعرف تاريخياً كده كل سنة التضخم كان قد إيه وتقدر تشوف العوائد اللي أنت كنت ممكن تجيبها برضه وتقدر تعرف هل الاستثمار في فئة أصول معينة مثلاً على المدى الطويل في الحاجه دي هل هو غطى العائد بتاع التضخم بتاعي اللي أنا منتظره بعد التضخم ولا لأ ودي حاجه اسمها معدل الفايدة الحقيقي ، الفايدة اللي فوق معدل التضخم ودي ديماً اي حد بيبص في الأقتصاد ديماً بتقارن النسبتين دول ببعض
05:32
تعالى برضه نشوف احنا ممكن نستخدم المؤشر ده ازاي في حاجات مختلفة في حياتنا ، أنا النهاردة مثلاً كنت رايح أدور أشتري بيت ، البيت ده هنقول مثلاً بمليون جنيه لو معدل التضخم في الدولة نفسها بقى 10% وجاي أنا السنة الجاي أحاول اشتري البيت ، لو أنا لقيت البيت مازال بمليون جنيه معنى كده أنه مقدرش يطلع بقيمة التضخم فأنا لو بشتري بعتبر إن السنة اللي أنا قضيتها من غير ما أشتري البيت ده سنة إيجابية لأني هدفع نفس المليون جنيه ، طب أنا لو لقيته بمليون و200 يبقى هو كده طلع أكتر من التضخم فده من ناحية لو أنا بشتري حاجه
06:08
نفس الكلام لو أنا ببيع حاجه لو أنا عندي شركة مثلاً وعايز أبيع منتجات معينة وشايف التضخم في البلد بتاعتي 20% فلو أنا رفعت أسعاري بـ 20% غالباً أنا كده بس بحمي نفسي من التضخم فدي طريقتين ممكن نبص عليهم برضه
في طرق آخرى مثلاً زي لو أنا عندي مثلاً عقار وعندي إيجارات معينة وبحاسب الراجل بطريقة معينة في دول بيبقى عندها قانون في زيادة الإيجارات يعني مثلاً في مصر في 10% زيادات في الإيجارات سنوياً لو أنا لقيت إن نسبة التضخم بتاعة الدولة اللي أنا فيها مثلاً 15% يبقى أنا زودت بس 10 يبقى أنا خسرت 5% ولكن ممكن لما عقدي يخلص مع هذا المستأجر أبص على التضخم بتاع عقده اللي حصل في الـ 3 سنين اللي فاتوا وأشوف القيمة الإيجارية النهاردة عشان بس على الأقل تحمي التضخم
دي طرق مختلفة أنا بس بحاول أوصلك الفكرة ازاي ممكن نستخدم التضخم في حياتنا إن أنا اسعر بيه حتى حاجات سواء أنا بشتريها أو بستهلكها أو ببيعها
07:20
برضه المؤشر ده أهميته كبيرة جداً بالنسبة للحكومات أو البنوك المركزية في العالم لأن السياسات النقدية بتاعة الدولة نفسها بيحاولوا يتحركوا حوالين المؤشر ده يعني لو المؤشر ده طلع بشكل عنيف وبقى عالي جداً في سياسات نقدية بيحاولوا بيها يظبطوا الأسعار ونفس الكلام لو الأقتصادات بقى فيها مشاكل والمؤشر ده بقى بالسالب بيبتدوا برضه يعملوا سياسات نقدية مختلفة عشان يرجعوا المؤشر في الحتة اللي هما مستريحين فيها
يعني كل دولة بتبقى عندها معدل تضخم مستهدف بيبقى بالنسبالهم أفضل أو الرقم المناسب في الجزء ده من الأقتصاد ، أنا برضه مش عايز أعقد الموضوع ولكن عايز أقول إن المؤشر ده مهم جداً جداً بالنسبة للحكومات والسياسات بتاعة كل دولة
08:11
لو جينا بقى بصينا على المؤشر بيتحسب ازاي.. ده الجزء المهم جداً إننا نبقى عارفين المؤشر ده نسبة في كل دولة شكلها عامل ازاي والنهاردة أنا هتكلم على 3 دول عربية لأن معظم الناس اللي بيسمعونا في هذه الـ 3 دول
التقسيمة بتاعة القطاعات نفسها بتاعة الصرف بتاع الناس غالباً موحده في معظم العالم وزي ما قولنا الأقتصاديين أو الناس اللي بيقيسوا المؤشر اللي هو الرقم القياسي لأسعار المستهلك عندنا مثلاً من 14 لـ 15 بند هما شايفين ان الناس ممكن يصرفوا فيهم
08:47
البنود دي بتبتدي بالأكل والشرب ده أول بند ، التبغ منتجات التبغ بشكل عام البند التاني ، الملابس البند التالت ، السكن وجواه الماية والكهربا والغاز والوقود ده يعتبر بند واحد ، الأثاث وأي تجهيزات منزلية ده برضه بند ، الصحة ، النقل ، المعلومات والأتصالات ، الترفيه ، الثقافة والرياضة ده برضه بند ، التعليم ، المطاعم والفنادق ده بند ، التأمين الصحي والخدمات المالية ، وبعدين العناية الشخصية وسلع متنوعة
09:26
دي البنود بشكل عام وفي كل دولة زي ما قولنا بتلاقي مثلاً على سبيل المثال النهاردة أنا هغطي مصر والإمارات والسعودية وهنلاقي إن مثلاً في بنود معينة في بلد زي مصر هنلاقي إن القطاع السكني النسب بتاعتة أقل من البلدين التانيين ولكن قطاع التعليم مثلاً في حته أعلى من التانية وده بيرجع لكل دولة والسياسات بتاعتها يعني مثلاً في دول بيبقى فيها التعليم فيها مجاني أو شبة مجاني فبيعتبر أرخص وفي ناس زي مصر الإيجارات بتاعتها أقل من الدول الأخرى وهكذا فأحنا برضه لازم نبقى واخدين بالنا إن المؤشر العام ده مش واحد في العالم
10:10
برضه احنا هنحط في الشو نوتس بتاعة الحلقة دي وعلى الموقع إكسيل شيت صغير فيه المعلومات دي بحيث لو أنت حابب تخش تبص عليها بنفسك تشوف التقسيمة دي في كل دولة شكلها عامل ازاي تقدر تنزل الفايل ده
10:25
هنبتدي بأول دولة اللي هي مصر احنا عندنا نسبة مؤشر التضخم هو 100% فالبنود كلها اللي هنتكلم فيها لازم تجمع للـ 100%
فأول حاجه الأكل والشرب الناس الأقتصاديين في مصر لما بيحسبوا التضخم شايفين إن في 32.7% ده موجه من ميزانية الرجل المصري أو السيدة المصرية للبند ده
البند التاني وهو التبغ 4.4% ، اللبس 4.4% ، البيت 20% من دخلك المفروض يروحوا على الكهربا والماية والغاز ، الأثاث والتجهيز بتاع البيت 3.4% ، الحاجات الطبية 8.5% ، النقل والمواصلات 6.6% ، التليفونات 2.7% ، حاجات ثقافية 2.25% ، التعليم 5.5% ، الفنادق والسفر 5% تقريباً ، وحاجات متنوعة 4.4%
فدي النسب بشكل عام في مصر ، الأقتصاديين زي ما قولنا بيسعروا الحاجات دي ويشوفوا الشهر اللي جاي زادت ولا لأ فبيحسبوا النسبة بتاعة الزيادة مضروبه في الوزن بتاعها في المؤشر عشان يجمع المؤشر في الأخر ويعرف النسبة الإجمالية للتضخم بتاع العالم
11:55
طب أنا هستفيد إيه لما نعرف الأرقام دي؟ أنا هستفيد إننا هبقى عارف نسبة التضخم اللي أنا بسمعها في التلفزيون او بقراها في الجرايد ، هل أنا بصرف زيها ولا أنا مثلاً في مرحلة عمرية معينة أنا عندي التعليم بتاع أولادي يمثل مثلاً 20 أو 30% من الميزانية بتاعتي فأنا التضخم ممكن يكون عندي أعلى من النسب الحقيقية وهكذا
لما أجي أنا بقى أعمل الميزانية بتاعتي أنا ممكن أخد الأرقام دي وأحطها وأشوف البنود بتاعتي أنا بصرف عليها أقل أو أكتر وأبتدي حتى أوجه الصرف بتاعي ناحية حاجه معينة أو أقلله من حتة معينة وأزوده في حتة تانية
فالنسب دي بشكل عام اللي الأقتصاديين متوقعين إن المواطن المصري بيصرف فلوسة في بالطريقة دي ، هل معنى كده إني لازم أصرف زيهم؟ لأ لأن أنا ممكن أكون في مراحل في الحياة مختلفة واحد مثلاً في أول حياته معندهوش صرف كبير على الأكل والشرب عشان برضه معندهوش حد في البيت بيصرف على نفسه بس فمش هيصرف ثلث مرتبة في الأكل والشرب ولكن ده بشكل عام المجموع المصري
13:02
طيب لو روحنا لبلد تانية زي الإمارات ، أخدت هنا من مركز دبي للإحصاء يمكن الأرقام دي ليها علاقة بدبي أكتر ولكن هنمشي مع بعض كده في الأرقام وهنشوف الفروق اللي بينها وبين مصر
هنلاقي الأكل والشرب في الإمارات 11.6% ، التبغ هنا نسبته قليلة جداً 0.35% ، اللبس 4.9% تقريباً زي مصر ، هنا هنلاقي فرق كبير جداً في السكن هنلاقي في الإمارات 40.6% فده معناه إنك بتصرف 40% من دخلك على الإيجارات أو أقساط البيت بتاعتك بما فيهم الكهربا والماية وده لسبب إن مثلاً في الإمارات معظم الناس هنا مغتربين أو الناس هنا مش متملكه بيوتها فعندهم جزء كبير جداً بيروح في الإيجارات وده أول فرق بنشوفه من دول لدولة ، بعد كده تجهيز البيت زي بعض تقريباً 3.5% ومصر كانت 4% ، النقل والمواصلات الإمارات أعلى شوية 9.3% مقارنة بمصر 6.6% اللي أتكلمنا عليها لأن هنا ممكن يكون مفيش مواصلات عامة في الإمارات زي مصر أو أسعار المواصلات العامة في مصر أقل فهما حاسبين أن هنا أقل ، التليفونات والانترنت 5.6% في الإمارات ، التعليم هنلاقي إنه أغلى في الإمارات 8.1% ، الفنادق والخروج تقريباً قرب بعض 6% ، ومصروفات متنوعة تقريباً زي بعض 4.4%
فهنا أنت عرفت برضه إن في الإمارات هنلاقي إن الأكل والشرب الناس بتصرف عليهم أقل ولكن اللي بيزيد عندهم في الميزانية بتاعتهم التعليم والسكن
14:53
لو روحنا للسعودية ودي البلد الأخيرة معانا النهاردة ، الأكل والشرب هنلاقيها ما بين مصر والإمارات 18.9% ، التبغ 0.6% ، اللبس كله واحد حوالين الـ 4% ، السكن ما بين الأتنين 25.5% ، تجهيزات البيوت 6.7% ، النقل هنا أعلى واحدة فيهم تقريباً 13% ، التليفونات والإنترنت شبه الإمارات 5.6% ، التعليم أقل شوية 3% وهكذا
فالنسب دي موجودة تقدر تاخدها وتشوف ميزانيتك شكلها عامل ازاي
15:40
هدف الحلقة النهاردة إني أعرفك أن في حاجه اسمها مؤشر أسعار المستهلك والمؤشر ده تقدر تتابعه وتقدر تعرف الحاجه اللي أنت بتستثمر فيها هل هي بتجيبلك العائد المطلوب عشان حتى تحمي فلوسك بس وتعرف تاخد الأرقام دي وتحطها في الميزانية بتاعتك وتشوف انت بتصرف ازاي وتاني أحنا بنحاول هنا نبص عليها مش من الناحية الأقتصادية بتاعة الدولة أنا مش عايزك تعرف إيه اللي بيحصل في الدولة أنا عايزك تعرف إيه اللي بيحصل في بيتك وإيه اللي بيحصل في ميزانيتك وازاي تقدر تحارب التضخم بـ إنك بس تغير شوية من العادات بتاعتك أو تشوف انت بتصرف أعلى فين أو أقل فين وتحاول جوه البيت عندك يبقى معدل التضخم أقل من الدولة اللي أنت عايش فيها
دي برضه حلقة خفيفة ، سريعة بناقش فيها مفهوم معين وهو التضخم هستنى اسئلتكوا لو في حد عنده استفسار في الحتة دي ياريت ترجعولنا وأشوفكوا إن شاء الله الأسبوع الجاي
Translation of some words and terms:
Target Inflation معدل التضخم المستهدف
Consumer Price Index (CPI) مؤشر أسعار المستهلك
Positive إيجابي
Historical تاريخي
Real Interest Rate معدل الفائدة الحقيقي
Optimal أفضل
Communication التواصل
Concept مفهوم
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #مؤشر_التضخم