76. ما وراء شرا العربية (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
هل امتلاكك لعربية أو أي وسيلة مواصلات خاصة مناسب ليك و لميزانيتك ولدخلك؟ ولا استخدامك لوسيلة مواصلات زي (أوبر) قد يفي بالغرض! هل لو عندك مدخرات الأفضل تشتري عربية ولا أصل ثابت؟؟
في حلقة النهاردة بنتكلم عن أبعاد قرار شرا العربية ، وازاي الناس بتفكر في القرار ده؟ و ٧ بنود أساسية لمعرفة التكلفة الحقيقية للعربية
01:25 أبعاد القرار على الصحة النفسية
02:44 العربية سلعة بعد شوية هتعود عليها
03:35 الضغط المجتمعي
04:41 العربية سلعة إستهلاكية مش استثمار
08:13 ازاي بنفكر في قرار شرا العربية؟
10:40 ازاي أعرف تكلفة الحقيقية للعربية؟
12:20 قسط البنك
13:22 التأمين
13:47 الطاقة أو البنزين
14:59 الصيانة الدورية
15:38 الضمان وقطع الغيار
16:26 التراخيص
16:38 تكلفة الركنة (باركينج)
16:50 التلكفة الحقيقية للعربية أول 5 سنين
17:43 ليه أول 5 سنين؟
19:19 التلكفة الحقيقية للإمتلاك
20:00 إيه الهدف من معرفتي بالتلكفة الحقيقية للإمتلاك؟
23:21 الكماليات أو الرفاهيات
24:24 تكلفة الفرصة البديلة
لازم تكون فاهم بشكل واضح أن شرا عربية هو تاني أكبر قرار ممكن تاخده فى حياتك بعد شرا بيت ، وليه توابع هتأثر على صحتك النفسية لسنين قدام سواء هتسبب لك سعادة أو تعاسة
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلاً بيكوا في حلقة جديدة من بودكاست كلام ينور ، النهاردة هنتكلم عن قرار زي شرا العربية أو أي نوع من أنواع وسيلة المواصلات ، ممكن يكون موتوسيكل أو أي مركبة
هنتكلم النهاردة عن أبعاد القرار بتاع الشرا ده وبعدين هنتكلم عن ازاي الناس بتفكر في القرار ده ، ازاي تعرف التكلفة الحقيقية ، الهدف اصلاً من معرفة كل الحاجات دي وتلخيص للحلقة في الأخر
01:25
أول حاجه عايز ابتدي بيها أبعاد القرار بتاع شرا العربية ، الأبعاد بتاعته بيبقى ليها تأثيرات مختلفة أول حاجه الصحة النفسية يعني ده قرار كبير هينعكس عليا هل هبقى مبسوط ، زعلان ، هيبقى في جزء استمتاع يعني لازم ابقى واخد بالي إن القرار ده هينعكس بشكل كبير على صحتي النفسية أو على إنبساطي لأن العربية أنت ممكن تكون بتقضي فيها وقت يومياً بتحس بالراحة جواها فلازم أخد بالي إن القرار ده هينعكس هنا
بس في مشكلة كبيرة إن أنا ساعات الجزء ده بيأُثر عليا بشكل كبير جداً لدرجة إن أنا مبقدرش أخد القرار الصح عشان أنا ديماً بفكر ازاي أبسط نفسي ، أو ازاي اتبسطت فأنا بس عايز يبقى في توازن وأنت بتفكر في قرار العربية من الصحة النفسية لأن مش هي دي الحاجه اللي هتخليك تصرف الفلوس إنك تبسط نفسك ، القرار له أبعاد أخرى هنتكلم عليها دلوقتي
02:44
تاني حاجه العربية نفسها هي سلعة السلعة دي هيحصلك تعود بعديها زي ما أتكلمنا في حلقة الإمتلاك المادي إن أنت بعد شوية هتتعود على العربية دي هتتعود على شكلها ، هتتعود على المساحة اللي جوه ، هتتعود على الكماليات اللي موجودة بعد شوية هتحس إن هي ممكن متحققلكش اللي أنت عايزة أنت ديماً عايز الإصدار الجديد منها لأن وانت ماشي في الشارع شوفت نوع جديد نزل من العربيات أو موديل جديد ، وخيارات مختلفة فده ممكن يسببلك نوع من أنواع التعاسة ، فلازم أبقى فاهم إنها سلعة والسلعة بيحصلها تعود فأنا لازم أكون واخد بالي من النقطة دي
03:35
النقطة التالتة في الأبعاد بتاع القرار ده إن في حاجه اسمها الضغط المجتمعي ، الضغط المجتمعي ده برده أتكلمنا عليه قبل كده إن هو ممكن يخليني أقارن نفسي باللي جنبي ، أقارن نفسي بجاري ، أقارن نفسي بأقاربي ، أقارن نفسي بصحابي ، بالمجتمع أياً كان الطريقة اللي بتشوف بيها نفسك قدام المجتمع
شكلي قدامهم عامل ازاي هل ده بيعكس مستوى المعيشة اللي أنا عايز أعمله ولا لأ ، ولكن في طبيعة الأمر هي في الأخر وسيلة مواصلات وهدف العربية هي نقلك من المكان أ لـ ب فأحنا بننسى كل الحاجات دي وبنرجع نشوف ضغط المجتمع بيقول إيه ، أنا مفروض في الحته الفلانية فنفسياً المفروض أشتري العربية الفلانية ولكن احنا بنسى اصلاً الهدف من شرا العربية هو ايه فخلي بالك برده إن ده بعد من الأبعاد اللي بتضغط عليك وأنت بتاخد القرار بتاع شرا العربية
04:41
لازم أبقى فاهم حاجه إن شرا العربية ودي النقطة الرابعة إن هي سلعة إستهلاكية هو مش استثمار ناخد مثال مثلاً في دول الخليج العربية بتنزل سنوياً 20% من قيمتها بمعنى إني اشتريت العربية أول ما بخرج من معرض العربيات لو العربية جديدة أنا تقريباً نزلت من 10 لـ 15% من أول بس ما أخرج كده ، بعد السنة الأولى غالباً خسرت 20% والسنة التانية 20% تانية ، و 20% تالته ، و20% رابعة ، و20% خامسة بعد 5 سنين فهي تعتبر سلعة إستهلاكية هو مش استثمار الاستثمار مع الوقت قيمته بتطلع ، ليه الاستثمار قيمته بتطلع لأنه بيبقى حاجه ممكن تدير دخل معين في حد في المستقبل عايز يشتريها بسعر أعلى من اللي أنا اشتريتها عشان ياخد الدخل ده كمثل ، ولكن في العربيات أو في المركبات عموماً هي سلع إستهلاكية ليه إستهلاكية لأن أنا بستهلك جزء من السلعة كل شهر بيحصلها حاجه اسمها بديل عن الاستهلاك ، أنا بستهلكها فبيحصلها تآكل في الموتور ، تآكل في عمر العربية وهكذا فهي تعتبر سلعة إستهلاكية عشان برده الواحد ميفكرش أنه هيشتري العربية النهاردة فسعرها هيزيد بكره ده مبيحصلش
06:23
طيب في دول تانية زي مصر ممكن عبر الوقت نلاقي أسعار العربيات بتزيد؟ آه هو أسعار العربيات بتزيد فعلاً ولكن القيمة الشرائية للجنية بتكون برده قلت فأنت ممكن تكون ورقياً اشتريت عربية بـ 100 ألف ، ركبتها 5 سنين مازالت بـ 100 ألف وانت بتبيعها ولكن قيمة الجنية في 5 سنين دول قيمته نزلت ، وبرده احنا هنتكلم على التضخم في حلقات في المستقبل بإذن الله عشان نناقش مصطلح التضخم بس من الاخر الـ 100 ألف جنية اللي أنت دفعتهم أول يوم في العربية بعد 5 سنين هما مش هيجيبولك نفس العربية حتى لو معاك الـ 100 ألف جنية
07:04
آخر بُعد في القرار ده إن القرار ده بيقعد معاك سنين بمعنى إيه؟ شرا العربية هو غالباً من أكبر قرارين تلاته ممكن تاخدهم في حياتك لأن سعر الوحده بتاعة العربية سعر كبير ، ممكن يكون أكبر قرار هتاخده في حياتك أنك تشتري بيت ، وتاني أكبر قرار أنك تشتري عربية فالتوابع بتاعته كتير ، لو انا اخدت القرار ده غلط هقعد سنين كتير تحت تأثير القرار الغلط ده فخلي بالك إنه مش قرار هتاخده بيأثر عليك 5 دقايق والموضوع بيخلص لأ الموضوع توابعه بتقعد كتير
07:47
يبقى دي 5 حاجات رئيسية بنتكلم عليهم إنه إيه أبعاد القرار ده ، صحتك النفسية ، هل هي سلعة فيها تعود ولا لأ ، الضغط المجتمعى ، هل هي سلعة استهلاكية ولا استثمار ، وآخر حاجه التوابع بتاعة القرار ده بتقعد معايا سنين
08:13
طيب لو أنا سألت أنت ازاي بتفكر تشتري عربية؟ يعني إيه طريقة التفكير اللي بتيجي في دماغك لو أنا سألتك هتشتري عربية ازاي؟ أنت عايز تشتري عربية هتعمل إيه؟ في إجابتين ديماً بلاحظ إن دول بيجوا كتير أوي لما بسأل الموضوع ده.. يقولي والله أنا محوش قرشين كده على جنب هنزل اشتري بيهم عربية.. طيب هنا في مشكلة بالنسبالي في الإجابة دي أنك حولت الجزء اللي أنت المفروض تستثمره في حياتك في المستقبل أو للتقاعد أو لأولادك أياً كان أنت حولته إنك تشتري بيه سلعه إستهلاكية قيمتها بتنزل مع الوقت أنت مبتاخدش بالك أنا بس بحاول أقولك طريقة التفكير اللي بتحصل عند معظم الناس وأنت تفكر معايا هل بتحصلك ولا لأ ، طيب هل الأحسن اني اروح اشتري عربية ولا أروح أشتري أصل ثابت أكيد بالنسبة للمستقبل أكيد السلعة الاستثماريه احسن بكتير ، بس أنا بفكر معاك ازاي الناس بتحدد الميزانية بتاعتها في دماغها إنها ازاي تشتري عربية يبقى أول حاجه المفروض إن التحويش بتاعك ملهوش علاقة بقرار الشرا العربية ده خالص
09:44
الحاجه التانية في إننا هنشتري عربية ازاي الإجابة التانية اللي انا بسمعها أكتر حاجه اني ممكن ادفع 1000 أو 2000 أو 3000 أيا كان قسط للبنك ده تمن العربية اللي أنا ممكن اشتريها
الإجابة دي شبه صحيحة ولكن هي برده مش صح 100% لأن هنا أنت أختزلت قرار شرا العربية فقد إيه أنا ممكن أدفع قسط للبنك
10:19
يعني حضرتك روحت المعرض فالراجل سألك حضرتك إيه الميزانية بتاعتك هتقوله والله أنا ممكن أدفع 2000 في الشهر الإجابة دي تاني شبه صح مش كاملة ليه؟ لأن انا أختزلت قرار شرا العربية فقد إيه أنا ممكن أدفع قسط للبنك معلش أنا بكرر تاني لأن دي انا بشوفها كتير جداً برده
10:40
ده هياخدنا للحاجه اللي بعديها اللي هو ازاي أعرف تكلفة الحقيقية للعربية ، يعني هنا أنا مينفعش أختزل قيمة العربية أو الميزانية بتاعتي إن أنا ممكن أدفع قد إيه للبنك.. أنا حطيت هنا 7 حاجات وأنت براحتك ممكن تحط 8 9 10 زي ما تحب زي النقط اللي أنت ممكن تلاقيها ولكن دول الـ 7 نقط اللي أنا لقيتهم واضحين ومكررين في معظم الدول أنت ممكن تشوف الدولة بتاعتك وتشوف فيها إيه
11:18
أول حاجه في تكلفة العربية أولاً في حاجه اسمها دفعة أولى دي هنتفق أن أنت بتحط 20% من قيمة العربية ومثلاً هنثبت هنا في المثال انك هتركب العربية دي بعد 10 سنين ، بعد 10 سنين غالباً هتاخد نفس الدفعة دي قدام ، خلينا نوحده عربية بـ 100 ألف أنا هحط 20% دفعة أولى بعد 10 سنين بقيمة الاستهلاك اللي بتحصل جوه العربية غالباً هتاخد الـ 20 ألف في وقت تاني وهنا بتكلم أكتر على دول الخليج لأن التضخم اللي بيحصل في الفلوس مش زي مثلاً دولة زي مصر ، مصر مثلاً غالباً هتحط 20% من قيمة العربية وهتاخده بعد 10 سنين غالباً مع التضخم ولكن هي هي قيمة الـ 20 ألف فهي دي الدفعة الأولى ومش هتكلم عليه دلوقتي
12:20
طيب إيه بقى اللي بيحصلي كل شهر عندي 7 بنود واضحين غالباً بتدفهم في أي حته أول حاجه القسط بتاع البنك اللي أنت روحت للراجل قلتله دي القدرة الشرائية بتاعتي يبقى كده دي أول حاجه من الـ 7 حاجات اللي أنا هفكر فيهم
طيب إيه قسط البنك ده؟ هو عبارة عن أنت بتاخد العربية غالباً في معظم الدول على 5 سنين يعني الـ 80% الباقيين من قيمة العربية البنك بيقسطهالك على 5 سنين ومعظم الدول عندها قسط لحد 5 سنين عايز تدفعه أسرع أوكيه بس معظم الناس بتاخد الـ 5 سنين
القسط ده بيبقى فيه جزء منه بيدفع في قيمة العربية الأساسية وفي جزء بيدفع فايدة للبنك وهنتكلم برده على أنواع القروض والحاجات دي في وقت آخر يعني بس خلينا نقول أن ده أول بند في قيمة العربية أو في الميزانية بتاعتك اللي هتوجهها للعربية
13:22
تاني حاجه التأمين ، وفي معظم الدول التأمين ده بيبقى إجباري اللي هو لو حصلك حاجه لا قدر الله وأنت سايق ، عملت حادثة أو عملت حاجه للغير للطرف التالت بتبقى التأمين ده بيغطيه بيصلح عربيتك وبيصلح عربيته فده البند التاني
13:47
البند التالت هو الطاقة أو البنزين أو في حالة العربيات الإلكترونية اللي بنشوفها الايام دي هو تمن شحن العربية نفسه فده تالت بند.. هحسب البند ده ازاي؟ غالباً هعرف أنا استهلاكي يعني مثلاً مشوار شغلي اليومي بياخد عدد معين من الكيلومترات ، بخرج في نهاية الأسبوع بعمل عدد معين من الكيلومترات وهكذا فقدر أعرف أنا في الشهر الكيلومترات بتاعتي قد إيه ممكن نقول مثلاً من 1500 لـ 2000 كيلو ده معظم الناس بتبقى في النطاق ده فأنا هاخد الـ 1500 كيلو هضربهم في سعر لتر البنزين هشوف استهلاك العربية بتاعتي بتستهلك قد إيه وبعدين هحسب عدد الكيلومترات لأن برده كل عربية بتستهلك نوع معين من أنواع الطاقة بكمية معينة ، طب أنا هعرف المعلومة دي منين؟ وانت بتشتري العربية أنت ممكن تعمل بحث اونلاين أو تسأل الراجل في المعرض دي الحالتين اللي بنعرف منهم استهلاك البنزين قد إيه
14:59
رابع حاجه هي الصيانة الدورية بتاعة العربية ، في عربيات وانت بتشتريها بتبقى فيها عقود صيانة فدي مش هتضطر تحسب أي تكلفة في السنين الأولانية ولو العربية مفهاش أي نوع من عقود الصيانة أنت هتسأل برده ، والله أنا محتاج أعمل صيانة للعربية مرتين في السنة ، 3 مرات في السنة أياً كان العدد سعرهم قد كده وهعرف التكلفة السنوية بتاعتي وأقسمهم على 12 عشان أعرف الرقم الشهري اللي أنا بستهلكه
15:38
خامس حاجه هي الضمان أو قطع الغيار ، برده في عربيات من أول يوم بيبقى عندك عقود ضمان لو حصل للعربية عيب تصنيع ، حصل حاجه في الموتور بتروح تودي العربية بيصلحهالك وبيرجعهالك تاني ، طيب لو مفيش؟ لازم أعمل بند جانبي متوقع بقد إيه الضمان ده هيكلفني سنوياً لأن دي أحداث بتحصل عشوائياً أنا مش متوقعها فلازم أعمل حسابي أنها تبقى محسوبة في التكلفة بتاعتي
16:26
سادس حاجه التراخيص ، كل دولة بيبقى ليها تراخيص واضحة وصريحة وممكن برده تسأل الراجل بتاع المعرض أو تسأل في المرور أو أياً كان أنا بتكلف قد إيه عشان أجدد رخصتي
16:38
حاجه أخيرة رقم 7 التكلفة الركنة برده تاني كل دولة عندها تكاليف معينة لازم تكون حاسبها داخل حسبتك
16:50
طيب الـ 7 حاجات دول بطلع القيمة الشهرية بتاعتي أنا مثلاً أخدت مثال عربية في مصر بـ 200 ألف عربية زيرو بتشتريها من التوكيل للتسهيل يعني العربية دي مثلاً قسطها الشهري 4200 جنية ، التأمين بتاعها 650 جنية ، البنزين استهلاكة 1100 جنية ، الخدمات بتاعتها عامل حسابي على 375 جنية في الشهر ، قطع غيار 400 ، الركنة 350 ، التراخيص 200 كل الحاجات دي شهرياً ، أنا ليه بعمل الحاجات دي عشان أعمل ميزانية في دماغي دي التلكفة الحقيقية بتاعة العربية في أول 5 سنين
17:43
طيب ليه بتقولي في أول 5 سنين ، لأن تاني 5 سنين في تكاليف بتنزل وفي تكاليف بتطلع بمعنى إن القسط بتاع البنك بيختفي في تاني 5 سنين أحنا قولنا إن البنك بيديني قسط 5 سنين ففي الـ 5 سنين التانين أنا معنديش قسط ، طيب التأمين البند التاني؟ التأمين بينزل لأن العربية قيمتها السوقية بتنزل فالتأمين بيرخص عليك ، البنزين على حسب حالة السوق ، الخدمات غالباً بتفضل ثابتة أو بتطلع حاجه بسيطة لأنك مثلاً بتحتاج صيانات معينة دورية بعد 5 سنين ولكن غالباً أول 5 سنين بتبقى زي تاني 5 سنين كلهم شبه بعض ، البند اللي بيغلى عليك بجد قساط بند البنك اللي انت وفرته حتة قطع الغيار أنك ممكن تحتاج قطع غيار أكبر لآن العربية بتبقى مشيت فترة أطول ومحتاجه حاجه معينة بتتغير مع الزمن مثلاً ، الركنة والتراخيص ممكن يبقوا ثابتين ، فالـ 5 سنين الأولانين بيبقوا غالباً في التلكفة أعلى كتير من الـ 5 سنين التانيين دي برده حاجه لازم تبقى عارفها أنا ممكن أبص على العربية في الـ 10 سنين كلها هتكلفني ايه
19:00
الميزة هنا بقى اننا أخدت التكلفة الشهرية بتاعتي في العربية دي وقسمتها على عدد الكيلومترات بتاعتي فعرفت التكلفة بالكيلو تقريباً هتكلفني قد إيه وأنا بسوق
19:19
أحنا عملنا الحسبة دي ودي أسمها التلكفة الحقيقية للإمتلاك ، عملت الحاجات دي أنا تاني مش عايز أصعب عليك الموضوع أنت ممكن تعمل الحاجات دي في 5 دقايق اللي هو ورقة وقلم على كراسة تمسك الـ 7 بنود بتوعي وشوف لو في اي بنود تانية عايز تحطها في دماغك انا مثلاً مذكرتهاش أولاً انا اسف أنا مش خبير عربيات برضه انا ببصلها من الناحية المالية فقط لكن أنا مش هتكلم بقى في الأنواع وإيه أحلى وإيه أوحش والقديم والجديد مش ده موضوع أنا موضوعي إني ببصلها من الناحية المالية
20:00
طيب أحنا عرفنا ازاي نحسب التكلفة الحقيقية للإمتلاك دي الهدف من كل ده إيه؟ الهدف إني أقدر أقارن ما بين أي نوعين من العربيات بمعنى إني انا هنا وحدت نوع القياس أنا وصلتك بقولك العربية دي هتكلفني كام شهرياً وقسمتها على عدد الكيلومترات بتاعتي فطلعلي سعر الكيلومتر في العربية دي هيكلفني كذا فأقدر أجيب نوع قديم ونوع جديد وأقارنهم ببعض ، أقدر أجيب عربية مثلاً موتورها عالي أوي وعربية موتورها واطي أوي ليه؟ لآن الـ 7 حاجات دول هيبقى جواهم إجابات مختلفة بس الموحد هو سعر الكيلومتر ، بمعنى إن في عربية مثلاً بتستهلك بنزين عالي وفي عربية بتستهلك بنزين واطي ، في عربيات صيانتها غالية وعربيات صيانتها واطية أنا كل اللي بحاول أعمله في الطريقة دي إني بحاول أخليك تفكر ازاي ممكن تقارن كل العربيات ببعض لأن أنا بالنسبالي سعر العربية اللي هو 100 ألف أو 120 ألف بمقابل مع 400 ألف ملهمش علاقة بالمقارنة يعني لما حد بيجي يقولي العربية دي أحلى ولا العربية دي أحلى أنا معرفش! لأن الحاجات دي بتختلف من حاجه لحاجه يعني ممكن عربية بـ 100 ألف قديمة تكلفني أكتر بكتير من عربية بـ 100 ألف جديدة لأن القديمة دي هيبقى عندها بنود أعلى في حتت معينة من العربية الجديدة فهي دي الطريقة اللي انا عايزك تقارن بيها التوحيد في القياس
الحاجه التانية هنا اني خليتك بعد ما عرفت القيمة الحقيقية للإمتلاك إنك تقدر تقارن ما بين أنواع وسائل المواصلات المختلفة بمعنى إني عرفت اقارن ما بين إني أركب عربيتي ولا أركب (أوبر) ممكن تقولي لأ على فكرة أنا بعد الحلقة دي الإمتلاك بالنسبالي ملهوش معنى أنا أوبر بالنسبالي أرخص أو لأ انا هجيب سكوتر (موتوسيكل صغير) أحسن ما أجيب عربية لأني لما حسبت الموتوسيكل والتنقل وكل الحاجات دي لأ ده أرخص بكتير.. فأنا هنا خليتك تقارن ما بين وسائل المواصلات
22:22
برضه أنا بحاول أوصلك أنك تعرف قد إيه هيكلفك من ميزانيتك يعني احنا عرفنا ان العربية هتتكلف 6000 في الشهر ده بند كبير من بنود الميزانية فلازم تبقى حاسبه بطريقة صح مش حاسبه بس انه قسط بنك أنا لازم اخد كل الحاجات دي
22:41
طب ليه الناس مبتحسبش بالطريقة دي عشان القسط ده مش واضح انت الحاجه الوحيدة اللي وضحالك هو قسط العربية ولكن انت مش بتعد البنزين بتاعك مبتاخدش بالك من الصيانة ، مبتاخدش بالك العربية كلفتك قد إيه قطع غيار أنا مش بقولك أحسب الحاجات دي لما تحصل لأ انا بقولك أعملها ميزانية جنب من دخلك الرقم ده شهرياً في دماغك عشان انت عارف انك كده كده هتصرفه ممكن يجيلك السنادي او السنة الجاية الله أعلم ودي الحاجه التالتة من الهدف اللي بكون الميزانية بتاعتي
23:21
الحاجه الرابعة اني عايزك تعرف الكماليات بتاعتك لو انت بتشتري عربية الكماليات بتاعتها هتكلفك قد إيه بالظبط بمعنى إيه إن في عربية بـ 200 ألف ونفس العربية أختها بـ 300 ألف ، الـ 100 ألف الفرق ما بين الأتنين دول هي عبارة عن الكماليات بتاعتها ، إيه الكماليات دي؟ العربية فيها فرش جلد ، العربية فيها فتحة سقف ، العربية فيها جنوط مش عارف إيه برده تاني أنا مش خبير عربيات ولكن العربيتين فيهم نفس الموتور فيهم نفس الأمان فيهم نفس الراحة في القعدة فيهم كل حاجه زي بعض هي اسمها كماليات حاجات مكملة للأساس الأساس واحد الأتنين واخدين موافقة ، الأتنين فيهم أمان كل ده تمام الأتنين هينقلوك من أ لـ ب ، الأتنين فيهم تكيف الأتنين فيهم سرعة كل حاجه زي بعض ، ولكن الكماليات أو الرفاهيات أعلى
24:24
لما تحسب بالطريقة دي وتحط السعر ده وتحط العربيتين قصاد بعض اللي هي بـ 200 ألف و 300 ألف هتلاقي فرق كبير جداً ما بين المدفوع هنا والمدفوع هنا ، مش كده وبس ده في تكلفة الفرصة البديلة عالية جداً بمعنى إيه؟ إننا لو أشتريت العربية اللي بـ 200 ألف وأخد الـ 100 ألف دول حطتهم في البنك ونسيتهم اصلاً ، الـ 100 ألف دول قيمتهم بعد 10 سنين 260 ألف وبعد 20 سنة 670 ألف دي قيمة الكماليات بس اللي أنا حطيتها يعني كل 100 ألف هيفرقوا معايا الرقم ده فأنا عايزك تعرف إن دي حاجه كبيرة بتأًثر على قرارك وصدقني الراجل اللي ماشي فالشارع مش هيعرف العربية دي فيها كماليات ولا مفهاش ولا فارق معاه انت قاعد بتدوس على الزرار ده وقاعد على فرش جلد ولا مش جلد تاني أنا مش بقول إنك لازم تختار الأختيار البسيط ولكن لو ده مش في مقدورك وأنت بتعمله عشان شكلك بس الحاجه الوحيدة اللي هتضغط عليك هي الفلوس
25:44
طيب الملخص بتاع الحلقة بتاعتنا دي إيه؟ أول حاجه العربية دي سلعة إستهلاكية مش إستثمار ، تاني حاجه حسابك في البنك هو الخسران في المدى الطويل ، محدش مهتم أنت راكب إيه وبكام كل دي حاجات في دماغك وكده كده اللي انت راكبة بعد شوية هيبقى قديم ، تكلفة الفرصة البديلة كبيرة جداً لأنك ممكن تعمل حاجات تانية بالفلوس دي لو أنت مش واخد بالك أنا بحاول أخليك تاخد بالك إن الفلوس دي ليها قيمة في المستقبل أعلى بكتير جداً لو أنت وظفتها بطريقة صح عن إنك تستخدمها في طريقة إستهلاكية
26:28
تاني قبل ما أخلص عايز أقول أنا مش خبير في العربيات أنا بحاول ابصلها بنظرة ليها علاقة بالفلوس انا عايزكم تبعتولي آرائكم لو حد عنده رأي تاني في الموضوع ده عشان الموضوع ده بيأثر على ناس كتير عايز أشوف أبعاد مختلفة عن اللي أنا قولتها وعايز اشكركوا جداً على التفاعل بتاعكم معايا على السوشيال ميديا وحابب أشكر كل الناس اللي بيبعتولنا وياريت ديماً ديماً أشوف آرائكم شكراً جداً وأشوفكوا الأسبوع الجاي
Translation of some words and terms:
Conclusion استنتاج
Driven by مدفوعا بـ
Options خيارات
Peer pressure ضغط المجتمع
wear and tear التمزق بالإستعمال
Ticket price السعر
Saving مدخرات
Retirement تقاعد
Budget ميزانية
Cost تكلفة
Down Payment دفعة أولى
Inflation التضخم
Insurance التأمين
Warranty ضمان
Events أحداث
Parking الركنة
Service الخدمات
The True Cost of Ownership التكلفة الحقيقية للملكية
Safety أمان
Approval الموافقة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوَر #بودكاست #بودكاست_عربي #بودكاست_بالعربي #ماوراء_شرا_العربية