80. نتحاسب بعدين
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
"اشتري دلوقتي وأدفع بعدين" "اشتري وقسط براحتك" "بدون مقدم وبدون فوايد"
..جمل دعائية انتشرت بشكل كبير جداً في الفترة الأخيرة وبقينا نشوفها ونسمعها في كل مكان وخاصة في المولات التجارية والأسواق وحتى المتاجر الإلكترونية
بنتكلم النهاردة على أنظمة التمويل الصغير والمتناهي الصغر ، مميزاتها وعيوبها ، وازاي ممكن استخدم أنظمة التمويل دي بحيث يكون قرار استثماري سليم؟
01:18 أسباب أنتشار أنظمة التمويل متناهي الصغر في الفترة الأخيرة؟
02:40 إيه الاستفادة اللي بتحققها أنظمة التمويل متناهي الصغر؟
03:17 هل أنظمة التمويل دي بتختلف عن إني أروح أشتري المنتج من التاجر على طول؟
04:20 ازاي شركات التمويل دي بتعمل فلوسها؟
06:40 مميزات النظام
08:10 عيوب النظام
11:00 مقارنة الفوايد ما بين نظام التمويل متناهي الصغر وطرق الدفع التانية
11:50 المكافأت والخصومات
12:35 التأخير على المدفوعات الشهرية هيأثر على تصنيفك الائتماني!
14:06 ازاي استخدم أنظمة التمويل دي بحيث قراري الاستثماري يكون سليم؟
17:57 ازاي الكلام ده بيدخل في الميزانية؟
يارب حلقة النهاردة تكون إضافة مفيدة ليكم.. ابعتولنا اسئلتكم واقتراحاتكم لمواضيع حابينا نتكلم فيها في الحلقات الجاية إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور النهاردة هتكلم على موضوع شوفناه في الفترة الأخيرة وأنتشر واعتقد الناس كلها بتشوفه في الأماكن اللي فيها شوبينج اللي هو تشتري دلوقتي وتقسط مش مع التاجر نفسه أو الراجل اللي بيبيعلك لأ مع شركات مختصة لتمويل الأفراد تمويل ممكن نسميه متناهي الصغر أو صغير
01:18
بنلاقي إن في شركات كتير جداً فتحت ، والشركات دي فتحت لأسباب مختلفة منها إن في تمويل داخل لقطاع الفنتيك أو قطاع المعاملات المالية وخاصة اللي ليها علاقة بالتكنولوجيا
الشركات دي أخدت تمويلات في الفترة الأخيرة بنسب كبيرة ، نموذج العمل بتاعهم يعتبر جاذب للمستثمر فـ لقينا أسامي كتيرة ظهرت في السوق ، الشركات دي بتبقى موجودة غالباً في المتاجر نفسها ممكن تلاقي ليها مكان تقدر تفتح التمويل بتاعك من هناك
وده أول سبب من وجهة نظري هو ليه أنتشر في الفترة الأخير لأن القطاع جاله تمويل كويس
02:00
الحاجه التانية اللي مخليه القطاع ده يزدهر في الفترة الأخيرة إن الناس وخاصة في دولة زي مصر مثلاً الأختراق بتاع البنوك قليل يعني مش كل الناس عندها حسابات في البنوك ، مش كل الناس بتعرف تاخد تمويل
تمويل الأفراد وخاصة المبالغ الصغيرة بتبقى عملية مهلكة جداً للبنوك.. ورق كتير وإجراءات والموضوع فيه صعوبة فالشركات دي استخدمت الثغرة اللي موجودة في السوق وابتدت تمول الأفراد اللي معندهمش مدخل لحسابات البنوك ، ناس كتير جداً خاصة في مصر زي ما قولنا معندهاش إمكانية الوصول للحسابات البنكية
02:40
الشركات دي بتعملك كذا حاجه مفيدة بالنسبالك بدل ما تروح البنك وتفتح حساب وتعمل ورق والكلام ده كله بالعكس أنت ممكن تروح لشركة زي دي تملى الطلب بتاعك وبيشوف التصنيف الائتماني بتاعك بس بيبقى حاجه خفيفة يعني مش معقدة زي البنوك وممكن يديك التمويل قبل ما تروح أو بيديك طريقة معينة إنك تدفع بيها بيقولك حضرتك ليك مثلاً 20 ألف / 50 ألف /100 ألف أياً كان الرقم اللي هيديهولك تقدر تستهلكه في المتاجر دي
03:17
هل هو مختلف عن إني أروح أشتري من التاجر أو المحل اللي أنا عايز أشتري منه الحاجه دي على طول؟
لأ أنت كمستهلك مش فارق معاك لأن غالباً نفس الشروط اللي أنت هتاخدها في المحل هو ممكن يديهالك ولكن زي ما قولنا هو سهل عليك العملية بالكامل وفي نفس الوقت بالنسبة للتجار هو سهل عليهم الموضوع كمان لأنهم بيدوله الفلوس بتاعته كاش
يعني إفتراضاً أنت اشتريت حاجه بـ 10 ألاف جنية مثلاً في يوميها بيحصل العملية ، الشركة الوسيطة اللي في النص بتاعة اشتري دلوقتي وقسط بعدين بتروح تدفع للتاجر الفلوس بالكامل يوميها ودي كمان بتساعد التجار إنهم يحصلوا فلوسهم بطريقة سريعة
فـ بالنسبة للتاجر هي حلتله مشكلة إنه ياخد الفلوس بالكامل النهاردة ، وبالنسبة للمستهلك هي قسمتله المبلغ الكبير وغالباً بنلاقي الحاجات دي بتكون المبالغ بتاعتها كبيرة شوية مبتقدرش تشتريها كاش فحلتلك مشكلة إنك تدفعها بالقسط
04:20
طب الشركات دي بتعمل فلوسها ازاي؟
بتعمل فلوسها من حتتين لأنها بتحل مشكلتين زي ما قولنا للتاجر وللمستهلك ، فهي من التاجر بتعمل نسبة معينة من المبيعات يعني مثلاً هنتفق مع المحل ده إننا هنساعده يبيع حاجات من خلال الطريقة بتاعتنا فهناخد منك 5% أو 10% أو 15% أياً كانت النسبة المتفق عليها مع التاجر
طيب أنت كمستهلك في حاجات مش بتدفع عليها فوايد وده عشان يغريك ويدخلك ويقولك تعالى أشتغل وفي حاجات تانية بيقولك لأ أنت هتدفع مثلاً 2% أو 5% رقم ثابت كده مش هنعتبره فوايد هنعتبره مصاريف إدارية ودي الطريقة التانية اللي هما بيعملوا منها فلوس
في حاجه تانية بيعملوها من المستهلك نفسه ، لو المستهلك ده اتأخر في المدفوعات بتاعته بيحط عليه زي مصاريف تأخير إن أنت مدفعتش الأقساط بتاعتك في ميعادها
فـ دي الطرق اللي غالباً الشركات دي بتعمل منها فلوس من الناحيتين لأنه زي ما قولنا حل المشكلة للطرفين
05:27
ده يعتبر شكل من أشكال القروض ، أنت بقى كمستهلك هنعتبره شكل من أشكال القروض اللي الشركات بتقدمهالك أو البنوك بتقدمهالك زي متفقنا بس هو شكل مختلف
في حاجه برضه في النظام ده بنلاقي القروض دي بتبقى على فترات قليلة ، يعني بنلاقي طريقة دفع على 3 شهور ، 6 شهور ، سنة ويمكن ساعات بنشوف سنتين فالطبيعة بتاعة القرض ده بيبقى قصير الأجل من الحاجات اللي أنا مقدرش مثلاً أخد حاجه على 10 سنين أو 8 سنين بالطريقة دي
لأن الشركات دي بتعتمد إنها بتدي مبالغ صغيرة لأعداد كبيرة وبتحاول تلمها بسرعة من الناس فمبيحصل عندهم التعثر اللي بيحصل في القروض طويل الأجل لأن كل ما بنطول القرض كل ما بيبقى في فرص تعثر اكتر للناس لأن حالتها المالية بتتغير مع الوقت
فده شكل الأتفاق ما بينك وبين الشركة بيقولك خلاص أنت عندك مثلاً قرض بـ 12 ألف على سنة هتدفع 1000 كل شهر أو السلعة بتاعتك دي بـ 12 ألف هتدفعها 1000 لكل شهر فده شكل القرض
في بقى مميزات وفي عيوب للنظام ده وهنتكلم عليهم كده واحده واحده
06:39
أول حاجه مميزة في القرض ده أنه سهل جداً أنت بتقدر تاخده من غير أي مشكلة مبتروحش بنك مبتروحش أي حته أنت ممكن تبقى في المكان زي ما قولنا اللي هو على الباب بتاع المتجر أو المحل اللي أنت بتشتري منه الحاجه دي
وفي طريقة تانية إنك ممكن تنزل تطبيق للشركة دي وبتقدم وتحط ورقك وهو بيقولك مثلاً بعد يوم عمل يومين عمل انت متوافق ليك على الرقم الفلاني
معظم الحاجات برضه بتقدملك زي ما قولنا فوايد 0% مش بتدفع عليها أي حاجه ، في أختلافات طبعاً كل شركة بتقدم البرنامج اللي هي عوزاه بس بنشوف نسب كتير أوي بنسة 0%
الحاجه التالتة انه مش بيتعمد مثلاً يشوف التصنيف الائتماني بتاعك لو هو عالي أو واطي لأ هو ممكن يسلف ناس معندهمش تصنيف إئتماني اللي هو بيتحسب في البنوك المركزية في كل دولة
يعني كل دولة في البنك المركزي بتاعها عنده نظام بيلم معلومات عليك ، إن كان عليك شيكات ، إن كان عليك أقساط ، إن كان عليك ديون كريديت كارد وبيشوف طريقة دفعك على مدى السنين اللي فاتت وبيحطلك تنصيف ائتماني
فالأنظمة دي مش بتقولك لازم التصنيف الائتماني بتاعك عالي اوي عشان تاخد القرض في تساهل شوية في الحتة دي
وآخر حاجه وبرضه مكرره إننا بناخد الموافقات بتاعتنا يمكن في نفس الساعة أو ممكن بعديها بيوم أو حاجه زي كده فنرجع تاني للسهولة بتاعة الموضوع
08:08
من العيوب اللي أنا بفكر فيها في الحتة دي إن معظم الحاجات دي بتبقى حاجات استهلاكية واتكلمنا في حلقة قبل كده كان فيها من أساليب الدعاية أو التسويق اللي الناس بتزود بيها مبيعاتها إنه بيعملك إيه.. بيقولك الحاجه دي بـ 12 ألف أنت في دماغك 12 ألف ده رقم كبير جداً مش هقدر أدفعه مره واحده وهكذا
ولكن بيقولك شكل الأقساط بتاعها تقريباً 1000 في الشهر لمدة سنة أو 500 لمدة سنتين فأنت بترجع تفكر تقول إيه ده الرقم ده أقدر أعمله أو مناسب ليا في مصاريفي الشهرية وهكذا
فممكن يشجعك على شراء حاجه انت مكنتش محتاجها وهنرجع تاني نقولها كل مره الحتة بتاعة الشراء الإندفاعي دي من الأدوات اللي بتشجعك على الشراء الإندفاعي فناخد بالنا إن ديماً أنا مش عاوز استخدم حاجه تشجعني على الشراء الإندفاعي ، فأنا هنا لازم أقف وقفة مع نفسي هل الحاجه دي أنا فعلاً محتاجها ولا مش محتاجها
طب لو أنا محتاجها أو الحاجه دي كده كده كنت هشتريها بنلاقي مثلاً في أقساط مدارس أو هعمل حاجه معينة مثلاً كانت كده كده جيالي في بنود الميزانية بتاعتي بدل ما أدفعها كاش مرة واحدة أنا ممكن أدفعها على 6 شهور وهتنزل جوه مرتبي وهتنزل جوه الميزانية بتاعتي وليها مكان هنا وقتها أنا مع انك تستخدم نظام زي ده يبقى هنا العيب ده أنا شلته من دماغي لأن هنا أنا مصنفتوش إندفاعي أنا صنفته حاجه كنت اصلاً هعملها بس هتساعدني أعمل تدفق نقدي أحسن أسهل هيسهل عليا حياتي
09:49
العيب التاني اللي احنا ممكن نتكلم عليه هنا برضه وبيجي في دماغي على طول إني ممكن ألاقي السلعة دي بـ 12 ألف عند تاجر معين ومحطوط عليها نظام التسهيل ولكن أنا ممكن أنزل السوق ألاقي نفس السلعة بنفس الأسم بنفس المورد كل حاجه هي هي ولكن ألقيها بـ 10000 أو 10500
الفرق في الفلوس ده بيعتبر التسهيل بشكل أو بأخر مدخلة جوه السعر بتاعك يعني النسبة اللي التاجر هيدفعها للشركة بتاعة التمويل هو كده كده حاطتهالك جوه وبيوريك أنها 0 فوايد
فالنقطة التانية اللي أنا لازم أهتم بيها جداً إني ممكن أخد بالي من السوق وأخد بالي من الأسعار الموجودة في السوق واتأكد إني بشتري الحاجه دي بسعرها الحقيقي عشان مروحش اشتريها بسعر أغلى بس عشان أقسطها
ولكن نرجع هنا تاني لو عندي أقساط مدرسة وأقساط المدرسة كده كده مش هتتغير ودي الطريقة الوحيدة أو التاجر الوحيد اللي بيبيعلي هي المدرسة مش هقدر أروح اشتريها من بره فهنا هنشيل العيب ده وهقدر استخدم النظام ده من غير فوايد
11:00
تالت حاجه اللي أنا لازم أبقى حاسبها هي المقارنة بتاعة الفوايد ما بينها وبين حاجه تانية زي مثلاً الكريديت كارد أو طرق دفع تانية لو أنا معايا كاش والكاش ده أنا هستثمره يبقى ساعات أنا ممكن اخد بالي إن الحاجه اللي هي 0 فوايد دي ممكن يكون في باطنها أرخص زي ما قولنا ولكن لو قارنتها بالفايدة ممكن تكون الكريديت كارد في فترات معينة لمدة شهر أو شهرين أو تلاته أحسن من لما تشتري دلوقتي وتقسط بعدين
فتاني نتأكد من الفايدة لو الحاجه اللي بتشتريها دي عليها فايدة وده عيب من العيوب إن ممكن النظام ده يكون فيه فايدة ، خلي بالك إنك تقارن بالأساليب التانية لو هي حاجه في المدى القريب
11:50
رابع نقطة أننا بنلاقي في بطاقات الائتمان مثلاً بيجيلك مكافأت أو استرداد للنقود في نظام اشتري دلوقتي وادفع بعدين معظمة مفهوش أنظمة مكافأت فاللي أنت بتدفعه مش بيجيلك عليه نقط أو خصومات ولكن برضه مع الوقت هنلاقي الشركات بتطرح نفس الأنظمة دي عشان تجيب ناس أكتر
12:10
العيب اللي بعده كمان لو أنا مثلاً أشتريت حاجه ورجعتها ودفعت منها أول قسط أو قسطين مثلاً وبعدين رجعوها لسبب معين ، ممكن يكون الصعوبة في رد الفلوس الموضوع بياخد وقت وفي تعقيد شوية ودي من العيوب اللي الناس بتذكرها على الأنظمه دي إن الحاجه لو رجعت فيها مشكلة
12:35
أخر عيب ممكن نتكلم عليه إن انت لو مثلاً اتأخرت على مدفوعات ، أو جه القسط عليك ومكنش معاك فلوس والكلام ده كله هينزل عليك مصاريف تأخير والتصنيف الائتماني بتاعك هيقل لأن الحاجات دي بتبقى مربوطة في الدول اللي هي موجودة فيها بالنظام اللي أتكلمنا عليه بتاع البنك المركزي بيسمع على طول لو أنت اتأخرت على أي مدفوعات
فخلي بالك لو أشتريت حاجه حتى لو كانت صغيرة ، حتى لو كانت بـ 1000 جنيه واتأخرت على الـ 100 جنيه الشهرية اللي أنت بتدفعها ده هيسمع في التصنيف الائتماني بتاعك ، فانت ممكن تروح تقدم للبنك في العادي بقى تشتري بيت أو عربية والمعاملات حتى الصغيرة دي تأثر على التصنيف الائتماني
لأن التصنيف الائتماني بالنسباله هو سلوك أو طريقة في التصرف بتاع الانسان اللي بيتأخر في الـ 100 جنيه بالنسباله زي اللي بيتأخر على 1000 زي اللي بيتأخر على مليون ، هو مش فارقه معاه الرقم قد إيه هو فارق معاه التصرف بتاعك كراجل جبت تمويل وأنت بتدفع في الميعاد ولا لأ
نخلي بالنا جداً إن ساعات أنا شوفت ناس كتير جداً بتنسى أقساط صغيرة عليها ، والأقساط الصغيرة دي بعد شوية تراكمت وقعدت تعمله مشكلة في التصنيف الائتماني وكان عايز ياخد تمويل بجد في حاجه مهمه ومحصلش بسبب الموضوع ده
ودي نقطة مهمه جداً نخلي بالنا منها مش معنى إن المبلغ صغير أو حاجه أنت مش واخد بالك منها فهي ميبقاش لها قيمة لأ بالعكس دي ممكن تأثر على حياتك بشكل عام
14:06
في كام حاجه كده فكرت فيها لما بيجي الموضوع ده في دماغي أو أنا ممكن استخدم النظام ده ازاي؟
زي ما قولنا النظام ده مبني للاستهلاك يعني أنت بتشوفه ديماً في الحتت الاستهلاكية اللي هو انا هجيب أكل مثلاً فقسطه ، أو مثلاً هشتري حاجات زي لبس ، بشوف في معظم المتاجر الإلكترونية النهاردة نظام اشتري دلوقتي وقسط بعدين عشان يشجعوك
طيب أنا كمستثمر كواحد بفكر في بنى الأصول بتاعتي لو أنا النهاردة عندي مشروع صغير ، أنا مثلاً أخدت بيت صغير وبشطبه وخلصته وعندي حاجات معينة هتكمل البيت ده ومش عارف اشتريها لأن البيوت وانت بتعملها بيبقى في اجزاء معينة ممكن تشتريها بالأنظمة دي
أو أنا عندي شقة قديمة محتاج أغيرها وأأجرها ومحتاج أطور في الفرش بتاعها أياً كان بس أنا هنا ببني في أصل ، أنا ممكن استخدم الأنظمة دي أنها تسرعلي تحويل المنتج اللي عندي النهاردة لمنتج نهائي يبتدي يدخلي دخل
يعني تعالى نقول كده أنا عندي شقة صغيرة مقفوله عمري ما فكرت أجددها والشقة دي عايزة 100 ألف أو 50 ألف أنا ممكن أروح للناس دي أخد تمويل صغير بفايدة واطية جداً ، الشقة النهاردة قاعدة مش بتدخلي اي دخل لما روحت حطيت فيها الـ 50 أو 100 ألف غيرت شوية حاجات بسيطة وقسطتهم على سنة أو سنتين ، أخدت الشقة دي وأبتديت أحطها في السوق ابتدت تجبلي إيجار ، ممكن من الإيجار ده أروح رايح دافع الأقساط بتاعتي في نظام "اشتري دلوقتي وقسط بعدين" ولو اتبقى حاجه زيادة باخدها لنفسي
هنا أنا وظفت رأس المال بتاعي بطريقة زكية أستخدمت تمويل قصير المدى عشان أحسن بيه أصل والأصل ده ابتدى يجبلي فلوس
واحد عنده مشروع صغير ومحتاج خامات معينة مش عارف يشتريها فممكن يستخدم التمويل ده انه يجيب الخامات دي ويطلع بالحاجات دي حتى لو أفكار صغيرة جداً مش لازم نتكلم على مشاريع كبيرة
فدي برضه طريقة لو أنا بفكر بعد ما أبص على المزايا والعيوب ازاي ممكن أغير السلعة دي من أنها سلعة استهلاكية لإنها أصل والأصول دي ممكن تكون في شكل شركة ، بيت أياً كان بقى ، عايز أعمل حاجه في عربيتي أنا بشتغل على العربية دي وعايز أعملها تطوير معين من حاجه والحاجه دي هتجيبلي فلوس
فدي الطريقة اللي أنا ديماً بفكر فيها في استهلاك التمويلات دي وخاصة انه مش طويل المدة زي ما قولنا ده تمويل قصير المدة 6 شهور ، سنة أو سنتين مثلاً
فياريت كل واحد برضه يفكر في حياته هو ممكن يستخدم التمويل ده ازاي إنه يشجع نفسه إنه يعمل القرارات دي
17:02
الحاجه التانية اللي بشوفها اني مثلاً بستثمر في نفسي ، لو مثلاً عندي كورس معين الكورس ده ممكن أدفعه بالكامل كاش أو ممكن أدفعه على 6 شهور..
بديهياً لو الأسعار هي هي وأنا دخلي ثابت وشايف ميزانيتي وعارف الكلام ده كله ممكن أخده على 6 شهور أفضل من أني اخده كاش لأن قيمة الفلوس مع الوقت بتقل لأن في تضخم وهكذا وأعتقد إن الناس وصلت معانا في المرحلة دي إنها فاهمة المفاهيم دي من الحلقات القديمة فأنا ممكن استخدم النظام ده
أنا هنا مش بشتري أصل لأ أنا بزود حاجه في نفسي ، بزود حاجه ممكن قدام تجيبلي دخل وقتها أنا ممكن أخد الأنظمه دي هنا بالنسبالي هتعتبر استثمار مش استهلاك وفي فرق كبير جداً بين الاستهلاك والاستثمار زي ما أنتو عارفين
17:57
آخر حاجه ممكن أفكر فيها ازاي الكلام ده كله هينزل على الميزانية بتاعتي؟
يعني أنا النهاردة زي ما أتفقنا عندي 100$ بتاعتي في الميزانية اللي أنا أتفقت معاكو اننا هنصرفهم كل شهر أو هنزوع أدوارهم كل شهر ، طلعت نسبة التحويش بتاعتي اللي هي 20% أو 25% أياً كان أنت بتحوش قد إيه ، وأتبقى عندي ميزانيتي كلها
في بنود أنا ممكن أبدلها زي ما قولنا "اشتري دلوقتي وقسط بعدين" وفي بنود ممكن أدفعها كده كده.. هتقولي أنا مبحبش يبقى عليا دين آه بس ده هنا لا يعتبر دين لو انت كده كده هتدفعهم النهاردة كاش ولما تقسط حاجه من 3 لـ 6 شهور ده مش وقت طويل أوي انك تبقى خايف ممكن تسيب الفلوس اللي معاك النهاردة على جانب لو حصلك أي حاجه تانية فمهم بالنسبالي هنا إن القسط بتاعي يخش في بند أنا عارفه وواضح في الميزانية ، يعني مشتريش الحاجه دي وأنا مش عارف أصلاً هدفعها منين
لازم يكون عندي مثلاً 100 جنيه أو 1000 جنيه اللي هما طالعين لحاجه استهلاكية كل شهر أو حاجه لشراء أصل وده جزء من المدخر بتاعي وأنا وجهته للاستثمار في نفسي أو أياً كان المهم في الاخر تحدد القسط بتاعك هيخرج من فين في الميزانية لو عملت كده بالنسبالي القرار هيبقى بسيط جداً
19:19
لو حددت أن بعمل الحاجه دي ليه ، عرفت هدفعها منين ودخلت في ميزانيتي معتقدش أنك هتحس بمشكلة وأنت بتاخد التمويل ده ، المشكلة إن الناس بتحس بالأزمة وهي بتاخد تمويل لما مش بتبقى عارفه هتدفعه منين ، لما يكون عليها أقساط ومش حاسبه التدفق النقدي السنوي بتاعها شكله عامل ازاي فيجي عليها القسط وميبقاش معاه فلوس
ده بشكل عام النقطة الأخيرة اللي بتيجي في دماغي لما بتكلم على الأنظمة دي هي هتيجي فين في ميزانيتي ، هل هتضغط عليا ولا لأ وخلي بالكم إن القروض دي البنك مش بيشوف دخلك يعني أنت مش بتقدم ورقة بمرتبك والكلام ده كله فخلي بالك أنت اللي لازم تنظم نفسك بنفسك
البنوك في العادي بتمنعك لو أخدت أكتر من 50% من دخلك في القروض ، لكن هنا الراجل ممكن يديك تمويل كبير عليك وهو مش واخد باله انك بتقبض مبالغ صغيرة
20:16
طيب لو حصل لا قدر الله خسرت شغلي برضه هنا في مشكلة تانية أنا مش هعرف أدفع الأقساط دي
فلما أنا بحطهم جوه الميزانية بتاعتي وأنا عارف ميزانيتي شكلها عامل ازاي وعارف اني عندي صندوق طوارئ وعارف أني عندي الحاجات دي كلها بالنسبالي ده هيبقى قرار استثماري سليم
20:32
الحاجه التانية أو الأخيرة يمكن أنا قولت الأخيرة قبل كده بس برضه حاجه جت في دماغي دلوقتي إن في سلع مع الوقت بتغلى بسبب التضخم فعارف إني لو اخرت القرار ده هيبقى خسارة عليا في المستقبل فلو أنا محتاج الحاجه دي بعد شهر أو شهرين فأنا ممكن أخد القرار ده بدري شوية لأني شايف مثلاً في السوق إن الحاجه دي هتغلى ، هي حاجه اساسية وأنا كده كده هستخدمها ومحتاجها وأكدنا على الكلام ده كله وقتها ممكن استخدم الأنظمة دي أروح اخد الحاجه النهاردة ولكن هستخدمها بعد شهر أو شهرين مفيش مشكلة إنك تاخد القرار ده
21:08
ده بشكل عام نظام "اشتري دلوقتي وادفع بعدين" ممكن أكون فوت حاجات كتير مش متأكد يعني بس ده من وجهة نظري ومن الأبحاث اللي أنا عملتها في الموضوع ده وبرضه من خبرات شخصية أنا استخدمت الأنظمة دي قبل كده بالشكل ده فيارب أكون وضحتلكم حاجات جديدة أو زوايا جديدة مكنتوش شايفنها وبرضه هستنى منكوا ردود الأفعال لو حد عايز حاجه معينه
بشكركوا شكراً جزيلاً وإن شاء الله أشوفكوا الاسبوع الجاي
Translation of some words and terms:
Buy Now Pay Later اشتري الآن، وادفع لاحقاً
Fin-Tech (Financial technology) التكنولوجيا المالية
Business Model نموذج العمل
Booth كشك
Sign Up اشتراك
Access وصول
Applicationطلب
Credit Score التصنيف الائتماني
Directly مباشرة
Terms شروط
Fees مصاريف
Late Payments مدفوعات متأخرة
Default تخلف بالدفع
Approved موافق عليه
Budget الميزانية
Cash flow تدفق نقدي
Vendor بائع
Short Term مدى قريب
Rewardمكافأة
Cash Back استرداد النقود
Behavior سلوك
On Time في الميعاد
Capitalرأس المال
Assetأصل
Angle زاوية
Feedback رد الفعل
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #التمويل_متناهي_الصغر