74. تقسيم، شطب، إدراج الأسهم في البورصة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في الحلقة اللي فاتت كان منورنا الأستاذ أحمد يوسف وأتكلمنا على توزيعات الأرباح في البورصة ، النهاردة بنكمل حديثنا معاه في مواضيع مهمه زي تقسيم الأسهم ، شطب وإدراج الشركات في البورصة وحاجات تانية كتير
Efg Hermes أحمد يوسف هو عضو منتدب في المجموعة المالية المصرية
Ahmed Youssef @LinkedIn : تقدروا تتواصلوا مع أحمد من خلال اللينك
01:30 يعني إيه تقسيم الأسهم؟
04:20 أنا كمستثمر عندي 100 سهم صحيت تاني يوم لقيت عندي 1000 سهم.. مين حطلي الـ 900 سهم الزيادة؟
05:34 هل الشركة بتعلن عن تاريخ معين للتقسيم؟
06:28 هل جدول المساهمين اللي بيقول إن الشركة دي بيمتلكها عدد المستثمرين دول بيحصله تحديث كل يوم؟
08:16 هل حقوق المستثمرين من حيث توزيع الأرباح أو تقسيم الأسهم فيها عدل سواء مستثمر صغير أو كبير؟
08:54 الجمعية العمويمة بتاعة الأسهم شبه الجمعية العمومية بتاعة إنتخابات النوادي صح؟
09:20 يعني إيه شطب الشركة؟ وهل ممكن أصحى الصبح ملاقيش أسهمي؟
13:35 ازاي بيتم دخول الشركة في البورصة أو طرح الأسهم في السوق؟
15:22 يعني إيه زيادة رأس المال؟
19:49 هل صناديق الاستثمار بتتعامل في الحاجات دي كلها؟
21:55 في أي نصيحة حابب نقفل بيها الحلقة؟
على مدار حلقتين أتكلمنا مع ضيفنا في مواضيع كتيره ومعلومات مهمه لأي مستثمر.. يارب لقائنا مع الأستاذ أحمد يوسف ينال إعجابكم واستنونا الاسبوع الجاي وحلقة جديدة من كلام ينور
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في الجزء التاني من لقائنا مع أحمد يوسف برده لو عايز تعرف عن أحمد هنحط اللينك بتاعه في الشو نوتس ، النهاردة هنكمل على الموضوع اللي احنا ابتديناه الحلقة اللي فاتت وهو تصرفات المؤسسات بمعنى إيه الحاجات اللي ممكن تحصلك لو بتستثمر في البورصة وخاصة الأسهم ، إيه الحاجات اللي الشركات بتعملها أنت مش محتاج طبعاً تعمل فيها أي حاجه لأن دي بتبقى جايه من مجلس الإدارة وكده ولكن دي بتأثر على الحساب بتاعك
المره اللي فاتت أتكلمنا على الأرباح النهاردة هنتكلم على أنواع تانية زي مثلاً تقسيم الأسهم وحاجات تانية كتير هنتكلم عليها النهاردة في الحلقة .. هسيبكوا مع أحمد ويارب الحلقة تعجبكوا زي ما الحلقة اللي فاتت سمعنا عنها ردود فعل كويس الحمدلله
01:30
عمر: طيب هروح معلش لموضوع تاني تقسيم الأسهم وده احنا بنشوفه في مصر والدول العربية وفي أمريكا حتى قريب مثلاً آبل قسمت ، جوجل قسمت ، تسلا أظن قسموا الحاجات الكبيرة دي كلها قسمت أسهمها ، بنسمع على تقسيم الأسهم ده كتير .. إيه هو تقسيم الأسهم؟
أحمد: هقولك على حاجه تقسيم الأسهم ده زي ما أنت بتقول الشركة أصدرت 100 سهم سعر السهم ده 10 جنيه ، أنا في مرحلة ما من كتر ما الشركة كبرت السعر السوقي للسهم وصلت لـ 1000 جنيه ، فـ 1000 جنيه ده مبلغ كبير جداً إني اشتري بيه أسهم في ناس بتستثمر في السوق بـ 200 جنيه يعني الراجل ده مش عارف يشتري ولا سهم فهو مش هيشتري السهم ده ولو معاك 500 جنيه برضه مش هتعرف تشتري السهم ده وحتى لو معاك 10000 جنيه بالنسبالك إنك تصرف 10000 جنيه إنك تشتري 10 أسهم بتحس المبلغ أو الأستثمار مش شايل همه زي ما بيقولوا يعني أنا صارف 10000 جنيه ويجيلي 10 أسهم ماشي أنت العائد ده بيبقى نسبي بس ناس كتيره بيدوروا على أسهم إنك تمتلك كمية كبيرة من الأسهم بعدد فلوس بتاعتك
فأنت دلوقتي تقسيم الأسهم ده بما إنك بتاخد السهم كـ رأس مال وبتقسمه على عدد معين عادة في ناس بتقسم على 5 أو على 10 وفي ناس بتقسم على 100 على حسب سعر السهم ده هينزل فين
ميزة التقسيم بتاعة الأسهم إنه بيزود سيوله للسهم لأن عدد المستثمرين اللي ممكن يشتروا القيمة السعرية للسهم الواحد بيزيد والسيوله في السهم بتزيد ، وحاجه زي ما بيقولوا في التداول برضه بتقل
يعني لو أنا طالب سهم بـ 1000 ، والراجل الناحية التانية أكيد مش هيكون عارضلي بـ 1000 وقرش هيبقى عارض بـ 1100 ، 1200 فالتقسيم 100 جنيه الرقم ده رقم مش قليل لناس كتيره إني مثلاً أعدي إني اصرف 100 جنيه زيادة عشان أخد سهم من الناحية التانية من العرض ده بالنسبالي رقم كبير
فتقسيم الأسهم ده إن الشركة حجمها مش بيزيد كـ رأس مال بس عدد الأسهم اللي رأس مال الشركة متوزع عليها هو اللي بيزيد ، يعني احنا ابتدينا شركة بـ 100 سهم أنا قسمت على 10 أنا بقى عندي 1000 سهم بس رأس مال الشركة متغيرش والقيمة السوقية للسهم برضه مبتتغيرش هي مجرد إنك بتقسمها على عدد التاني فأنت بدل ما كان عندك 100 سهم في المحفظة بقى عندك 1000 سهم في المحفظة بس سعر السهم كان قبل كده 100 جنيه دلوقتي بقى 10 جنيه
عمر: تمام.. يبقى هي فقط لجذب شريحة جديدة من مثلاً صغار المستثمرين زي ما أنت قولت لكن القيمة للشركة مبتتغيرش من قبل التقسيم لبعد التقسيم
أحمد: بالظبط كده
04:20
عمر: هل أنا كمستثمر بحتاج أعمل حاجه ولا أنا كان عندي الـ 100 سهم دول وهصحى الصبح بكره هيبقى عندي 1000 سهم ، مين هيحطلي الـ 900 سهم الزيادة دول؟
أحمد: المقاصة ، لأن الشركة اللي هتقسم لازم تبقى واخده موافقاتها إنها هتقسيم عدد الأسهم الموجودة عندها ، أنت كمستثمر نادر جداً ما بتضطر تدخل في حاجه زي كده في نوع من تصرفات المؤسسات اللي هنتكلم فيه بعد ده اللي هو زيادة رأس المال ده أنت ممكن تدخل فيه كمستثمر ومع ذلك الحاجات اللي بتحصل ليك كمستثمر إنك ملكش دخل في القرار اللي الشركة بتعمله يبقى نادر جداً إنك تضطر تعمل أي حاجه ، الشركة لازم تاخد موافقاتها من الهيئة ، بتعلن للبورصة ، بتعلن للمستثمرين فالناس كلها بتبقى واعية أوي إني النهاردة كان معايا 100 سهم بكره هصحى ألقي 1000 مش معناه إن الراجل أداني 10 أضعاف فلوسي لله فـ لله هو معناه إنه ممكن يكون هيقسم وأنا عارف أنه هيقسم بس مجرد إن عدد الأسهم اللي في حسابي المقاصة بتزود عدد الأسهم يعني أنا لو كان معايا 100 وهيروحوا 1000 يبقى الراجل ده هيودعلي 900 سهم بكره عشان يبقى عندي 1000 في التقسيمة السوقية أو إن القيمة السوقية للسهم بتقل
05:34
عمر: وبرضه هيبقى عندي تاريخ معين صح ، يعني الشركة هتعلن زي في الكوبونات النقدية اللي أتكلمنا عليها هتيجي تقولي احنا هنقسم الشركة يوم 1 يناير هنصحى يوم 2 يناير هنلاقي الأسهم متقسمه صح كده؟ يعني في يوم معين
أحمد: بالظبط كده وسعرها في السوق بيتعدل برضه
عمر: ولو أنا بعت يوم 31/12 أنا مش هستحق التقسيم ده فهبيع السهم القديم بتاعي لكن لو عدى عليا يوم
أجمد: لو يوم 31/12 انت داخل تبيع بـ 100 جنيه ، لو دخلت تبيع يوم 2/1 انت داخل تبيع بـ 10 جنيه فأنت مخسرتش أي مادة مش اللي هو يا خسارة يا جماعة او الحمدلله إني بعت بـ 100 جنيه أنا ممكن كنت أبيعه بـ 10 لأ هو أنا كان معايا 10 أضعاف السهم عشان كده كنت هبيع بـ 10
عمر: مفهوم يبقى أنا مش هعمل حاجه في السمسار والمقاصة والهيئة والبورصة وكل الناس دي اللي هتتصرف فإنهم يدوني أسهمي
06:28
عمر: في حاجه اسمها جدول المساهمين بتاعي اللي هو بيقول الشركة دي بيمتلكها الـ 1000 مستثمر دول أو الـ 2000 مستثمر دول الجدول ده بيحصله تحديث كل يوم صح؟ يعني من عمليات التداول اللي بتحصل أنا عارف إنه سؤال بسيط أوي بس هو جه في دماغي الشركة عارفه إن عمر عنده أسهم أو أحمد عنده أسهم صح كده كل يوم؟
أحمد: الشركة ممكن تعرف بس أكتر حد بيعرف هي المقاصة لأن المقاصة هي السجل الأساسي لحاملين الأسهم لأي حاجه في السوق فأنا كصاحب الشركة بالنسبالي ممكن يكون عندي 30 مليون مستثمر أنا مش مهم إني اعرف الـ 30 مليون مستثمر لأن ممكن فيهم يكون عندهم ساهمين أو سهم واحد انا كشركة بيهمني كبار المستثمرين اللي عندي مين اشتري كميات كبيرة مين اشتري كميات صغيرة ، مين مضطر يعمل إفصاح عن حجم الأسهم اللي هو بيمتلكها .. إلخ
إنما طبعاً أي شركة تهتم بجميع الناس أو باسم شخص شخص من جميع الناس المستثمره دي بتبقى حاجه نادرة اللي يعرف من الألف للياء بتبقى ديماً المقاصة لأن المقاصة عندها كذا حاجه هي مضطره تعملها أولاً حقوق المستثمرين دي كلها تفضل محفوظه لو أنا مقسم لو أنا بوزع كوبون أياً كان فهو أنا حقي يتوزعلي فلوسي ، تتوزعلي أسهمي ، إني يجيلي الإخطار بتاعي ، إننا لو توفاني الله وليا ورثة يبقوا عارفين أنا حقي إيه في الاستثمارات اللي أنا ماسكها دي كلها فده بيفرق مع المقاصة أوي
وتاني حاجه طبعاً لأن لو في مستثمرين ممنوعين عن التداول ، او مشبوه فيهم لسبب ما والكلام ده كله مش الشركة اللي بتروح توقف المستثمر المقاصة أو السوق هي اللي بتوقفه
08:16
عمر: حلو أوي .. يعني هنا في عدل لو أنت مستثمر صغير أو مستثمر كبير والشركة وزعتلك أرباح أو قسمت أسهم أو عملت اي حاجه هي بتوزعلك بناءاً على النسبة دي ملهاش دعوة أنت كبير أو صغير صح كده أنت قولت كلمة حقوق المستثمرين
أحمد: بالظبط كده .. ودي أهم حاجه لأنك حتى التصويت في الجمعية العمومية أنت حقك حتى لو معاك سهم واحد انت ممكن تروح تعمل تصويت بالسهم الواحد بتاعي بس قصاد مثلاً 200 مليون سهم أنا قولت آه والـ 200 مليون قالوا لأ يبقى أنا
08:54
عمر: الجمعية العمومية دي ديماً بفكرها زي النوادي كده عارف إنتخابات النوادي في مصر بالذات الناس ديماً بتعمل إنتخابات في كل النوادي في مصر .. هي الجمعية العمويمة بتاعة الإنتخابات بتاعة النادي هي هي نفس الجمعية العمومية بتاعة الأسهم صح كده؟
أحمد: بالظبط كده كل واحد يخش يبدي رأيه
عمر: بس أنا معايا أسهم كتير ممكن أبدي رآيي أكتر شوية عشان عدد بناءاً على عدد الأسهم
09:20
عمر: طيب ده ياخدنا بقى لشطب الشركات يعني في شركات ساعات قبل ما أتكلم على الإكتتاب اننا النهاردة اشتريت اسهم وفجأة صحيت الصبح قالك الشركة دي هتتشطب أو الشركة دي في مجموعة من المستثمرين هيقدموا عرض شرا إجباري بقى أو في كذا حاجه في الحته دي بس خلينا نتكلم كده ببساطه يعني إيه شطب الشركة؟ يعني إيه خروج الشركة يعني ممكن أصحى الصبح ملاقيش أسهمي مثلاً؟
أحمد: لأ هو مستحيل أنك تصحى في يوم من الأيام متلاقيش أسهمك لأن اساساً عشان توصل لمرحلة إنك تصحى متلاقيش أسهمك في خطوات كتيرة بتحصل قبلها
لشطب أي شركة لازم يحصل إفصاح عام لجميع المستثمرين والسوق والهيئة والكلام ده كله بيقول إن دلوقتي أنا مثلاً معايا 60% من الشركة أو معايا 80% من الشركة دي وأنا قررت إني مش عايز إن يبقى عندي أسهم على سوق مصر أنا عايز اخد الشركة دي من شركة عمومية أعملها شركة خاصة فأنا دلوقتي عندي مستثمرين لهم حقوق عندي وعندهم ملكية في الشركة بتاعتي أنا مجبر إني اعملهم عرض بسعر وفي الأخر السعر ده لازم يتوافق عليه بنسبة معينه في مصر مثلاً يقولك لازم 10% من رأس مال الشركة يفضل موجود في السوق عشان تفضل الشركة مدرجة في السوق المصري غير كده لازم تشتري كل سهم موجود في السوق
فإفتراضاً دلوقتي أنا قررت يا جماعة أنا شركة كذا 100 جنيه للسهم هشتري أي واحد عنده أسهم انا عايز اشطب الشركة دي أنا بدفع 100 جنيه للسهم طالما الهيئة موافقة وكل الحاجات المحتاجه تحصل من ناحية الموافقات والتسعير والكلام ده كله انا دلوقتي وصلت إني اشتريت من المستثمرين كلهم فاضل بس 5% من المستثمرين دلوقتي احنا عدينا النسبة اللي احنا محتاجينها عشان يفضل السهم ده مدرج في السوق المصري في 5% من المساهمين اللي في أجازة مأخدش باله ، أسهم ورثه ، اللي مش عايز يبيع عند في الشركة أياً كان سببه لسه في 5% من الأسهم لسه موجوده بره وقتها ممكن السوق يجبر المستثمرين دول إننا أخد اسهمهم على سعر الـ 100 جنيه اللي كان متوافق عليه اللي أنا عديت بيه نسبة الـ 90% وأودعلهم الفلوس دي في حسابهم
فأنت فعلاً ممكن تصحى متلاقيش أسهمك بس مستحيل تصحى متلاقيش أسهمك ومتلاقيش فلوس برده يعني أنت لو معاك سهمين والواحد أنا قولتلك هشتريه بـ 100 جنيه هتصحى مش هتلافي السهمين بس هتلاقي 200 جنيه في حسابك
عمر: بس طبعاً ده بياخد وقت طويل يعني الإجراءات دي ممكن تاخد 3 شهور ، 6 شهور
أحمد: وأكتر كمان في حاجات ممكن تاخد وقت طويل جداً
12:05
عمر: برضه هنا انا ديماً برجع وأفكر إن الهيئة دورها أو الرقابة المالية لأي دولة هي دورها إنها تحمي صغار المستثمرين أو تحمي الأقلية أنهم لو مش واخدين بالهم يعملوا أحسن حاجه في مصلحة المستثمر الصغير
أحمد: بالظبط عشان كده بيبقى لازم اعلان في الجرايد ، اعلان في السوق .. كذا اعلان لفترات طويلة تدي الناس فرصة لو في حساب مش شغال ، ناقصة ورق أياً كان بيديني فرصة وقت طويلة كفاية إننا مهما حصل أعرف أتصرف واخش أبيع الأسهم دي لأن لو المالك معداش الـ 90% ممكن السهم ده يفضل مدرج في السوق غصباً عن صاحب الشركة وميقدرش وقتها ياخد مني الأسهم ولو حصل وعدي مرحلة الـ 90% وحقه إنه يشطب الشركة وقتها ممكن ياخد اسهمي مني ويودع الفلوس مكانها
عمر: مفهوم.. الحدث ده بيحصل غالباً اللي بياخد الشركة خاص ده بيبقى عايز يستحوذ على نسبة كبيرة جداً من الشركة هو مش شايف إن وجود سوق ثانوي مهم بالنسباله مش من أولوياته يحصل عليه تداول عشان كده الشركات ساعات بتبقى خاصة ، حتى في أمريكا لو بصيت على سجل كمية الشركات المشهورة اللي كانت موجودة على البورصات وخرجت كتير جداً
13:35
عمر: طيب ده ياخدنا لدخول الشركة في البورصة احنا غطناها يمكن في حلقة قبل كده بس سريعاً هي عكس الشطب صح كده؟
أحمد: مظبوط ده اللي هو الطرح بتاع الأسهم ، لو أنا عندي شركة خاصة وأنا كمستثمر أو كصاحب الشركة محتاج سيولة زيادة ، جالي فكرة إني ممكن أستلف من البنوك ، ممكن أستلف من مستثمرين خاصين أو ممكن أطرح أسهمي في السوق أبيع نسبة من شركتي لمستثمرين في السوق بعملها عن طريق الطرح بتعين البنك الأستثماري ومستشارين وبتاخد موافقاتك من السوق على أساس إني يا جماعة دلوقتي عندي شركة خاصة بتاعتي أنا أحمد يوسف قسمتها لشركة عمومية ممكن أقسم راس مال الشركة على عدد 1000 سهم أنا هطرح في السوق من الـ 1000 دول 500 سهم يعني أنا هطرح 50% من الشركة بتاعتي على السوق بيتحددلها سعر وبتتعرض على المستثمرين والمستثمرين ممكن يشتروا الأسهم دي أول ما بتشتري في الطرح وقتها لما السهم ده بيبقى مدرج انت ممكن تشتري وتبيع زي ما أنت عايز
عمر: وده الهدف الأساسي من وجود البورصات ، أعتقد البورصات جت بسبب طرح الأوراق المالية في السوق أو ان الناس عايزة تنوع مصادر السيولة بتاعتها من بنك لمستثمرين خاصين إنهم يبتدوا بقى يطلعوا وبنشوف برده الشركات الناشئة كلها بتبقى دي نوع من أنواع سيناريو الخروج بتاعها انه بيبقى شركة كبيرة كفاية انه ينزل السوق والإفصاحات والحاجات دي كلها تبتدي تحصل
15:22
عمر: ده لو الشركة لسه أول مره تخش السوق بنلاقي نوع تالت أو رابع أو خامس أياً كان الرقم اللي احنا فيه دلوقتي اللي هو زيادة رأس المال ، بنلاقي شركة زي ما بتعمل إكتتاب هي محتاجه تبيع حصص بس الشركة دي بقالها متداولة كتير ففي حاجه اسمها زيادة رأس المال برده الموضوع ده ممكن يخبطني أنا كمستثمر مش فاهم إيه اللي بيحصل عندي أسهم وفجأه الشركة بتاعتي بتقولي أنا عندي زيادة رأس المال .. يعني إيه زيادة رأس المال؟
أحمد: زي ما أنت بتقول دلوقتي الشركة محتاجه سيولة وعنده أختيار من اتنين يا إما يصدر سندات أو انه يزود رأس مال الشركة إنه يصدر أسهم زيادة ويخلي المستثمرين بتوعه يشتروا الأسهم دي .. دي من أهم الحاجات اللي لو أي حد مستثمر في الأسهم لازم يبقى واعي بيها
اللي الشركة بتعمله انها بتقولك أن رأس مال الشركة 1000 سهم أنا محتاج 250 جنيه زيادة فأنا هصدر 250 سهم زيادة كل واحد فيهم بجنيه وأنا هحصل الفلوس دي من المستثمرين اللي بالفعل موجودين في الشركة لأنك يحقلك قبل المستثمر الخارجي إنك تستثمر في الأسهم دي
هقولك على حاجه أنا دلوقتي بقولك إن راس مال الشركة جنيه بس سعرها في السوق 2 جنيه بس انا دلوقتي لما يعرض عليا اني اشتري راس المال الزيادة أنا هدفع تمن سهم واحد جنيه ده معناه اني دلوقتي هيبقى معايا بدل السهم اتنين واحد فيهم قيمته السوقية بـ 2 والتاني هشتريه بجنيه والقيمة السوقية بتاعته هتكون وفق عدد الأسهم الزيادة اللي أنا مشتريها
فأنا دلوقتي في حالة إن أنا معايا السهم بتاعي والشركة قررت تعمل زيادة رأس المال وعرضت عليا اشتري وحاجه من اتنين يا إما قررت إني مشتريش مش عاجبني أو معييش فلوس زيادة ، أنا مش عايز استثمر زيادة أو أنا مش واعي بالموضوع ، مش واخد بالي ودي ناس كتيرة فعلاً بتقع في الفخ ده وبتروح عليها فلوس كتير لأنك بعد ما بتصدر الأسهم الزيادة القيمة السوقية بتاعة السهم بتتعدل فأنت اول ما تعدل القيمة السوقية بتاعة السهم دي أنت كمستثمر لو مدفعتش الرأس مال الزيادة هتخسر على طول
عمر: يبقى هي دي الحاجه الوحيدة في اللي احنا اتكلمنا فيه اللي أنا لو متصرفتش كمستثمر هتعملي خسارة صح كده؟
أحمد: بالظبط كده ، لأن المستثمر لازم يكون واعي بيها وهي من أهم الحاجات لأن هو مش هيبقى له حق ، انت دلوقتي في حالة شطب الشركة انت ليك حق مقدرش أخد السهم اللي معاك ، أنما هو دلوقتي محتاج فلوس زيادة فاشتري السهم ده مني بجنيه لو أنت قولتله لأ يبقى لما القيمة السوقية تتعدل هتبقى انت الخسران فلو هتقوله لأ لازم فعلاً يا إما تبقى مستعد تاخد الخسارة دي إنك متزودش عدد الأسهم بتاعتك ومتصرفش فلوس زيادة وتاخد السهم زي ما هو وتاخد القيمة السوقية الجديدة زي ما هي أو الحل التاني أنك تبيع السهم لاننا لما بقولك إني هعمل إصدار زيادة رأس المال بيبقى برضه ليها تاريخ في المستقبل إننا أي من المستثمرين اللي يملكوا السهم حتى تاريخه يحق له الإكتتاب في زيادة رأس المال فأنت معاك من النهاردة لوقتها تبيع أسهمك على سعر السوق الموجود عادي بعد تاريخ الأستحقاق سعر السوق هيتعدل بنسبة الأسهم اللي هتزيد
عمر: تمام.. في المثال بتاعك أنت قولت السهم بتاعي الأصلي بـ 2 جنيه والشركة بتقولي أنا عايز منك جنيه فكده هيبقى معايا سهمين النهاردة السعر هيتعدل تلقائي تاني يوم هيبقى بـ 1.5 جنيه بعد زيادة راس المال
أحمد: بالظبط كده ، فأنت لو مشتركتش هتبقى خسران نص جنيه في السهم
عمر: لو مشتركتش وسبت السهم الأولاني اللي معايا بـ 2 جنيه ده هصحى تاني يوم بعد زيادة رأس المال ما تحصل هلاقي السهم متعدل قيمته لـ 1.5 جنيه ، فدي فعلاً حاجه خطر الناس لازم تبقى واخده بالها منها
أحمد: بظبط لأن الأرقام اللي احنا بنتكلم فيها دي انت بتتكلم في خسارة 25% فده مش رقم قليل لو حاطت 100 جنيه تخسر 25 جنيه ده مش رقم قليل
19:49
عمر: طيب لو أنا حاطت فلوسي في صندوق استثمار وانت بتتعامل مع صناديق الاستثمار .. هل صندوق الاستثمار بيتعامل في الحاجات دي كلها ولو انا حاطت فلوسي مش هوجع دماغي اصلاً إني اعرف تواريخ ولا أسهم ولا الكلام ده كله يعني برضه من ناحية صناديق الاستثمار بقى
أحمد: هي ميزة صناديق الاستثمار لو هي صناديق ناجحه أو مديرين الصناديق دي ناس شاطرة أو بتعمل فلوس كويس أو مركزة في اللي هي بتعمله انا بالنسبالي مبتخذش أي قرارات أنا القرار الوحيد إني قررت استثمر في الصندوق ده ومن يوم ما دخلت فلوسي فالصندوق ده أنا مبتخذش أي قرارات في الموضوع ده ، مدير الصندوق هو اللي بيقرر هستثمر في واحد اتنين تلاته ، هبيع الاسهم دي فالوقت ده ، هل أنا داخل الطرح ، هل هدخل في زيادة رأس المال أياً كان الفعل بيتصرف فيه الصندوق نفسه أنت كمستثمر بتشتري شهادة في الصندوق ده النهاردة اشتريت الشهادة دي بقيمة 100 جنيه بالتكلفة عليا بتبقى بتحدد مبلغ التكلفة ووقت ما بيسمح لك تبيع الشهادة لأن مش كل الشهادات ممكن تبيعها كل يوم في صناديق ممكن تبيع كل ربع ، ممكن تبيع كل سنة ، في بيشترط عليك أول 3 سنين متخدش فلوسك.. وقت ما يحق لك تبيع الشهادة دي بتشوف القيمة السوقية للشهادة دي في تاريخه وبيبعها على الأساس ده
فأنا دخلت الصندوق ده بـ 100 جنيه كمان سنتين جيت أبيع الراجل كان شاطر جداً لما بعت بعت بـ 300 جنيه أنا كأحمد يوسف معرفش غير إني اشتريت بـ 100 وبعت بـ 300 ، طبعاً الراجل مدير الصندوق ده باع واشترى اسهم ودخل زيادة راس مال ودخل في الطرح وخسر في دي وكسب في دي والكلام ده كله واخد المصاريف بتاعته وانا مدخلتش في أي حاجه تانية هو مسؤول مسؤولية تامة انه يتصرف في كل المواضيع دي
عمر: انا ليه بقولك كده عشان برضه في ناس من اللي بتسمعنا بتفضل أنها تستثمر في صناديق الاستثمار وفي ناس هتبقى عايزة تشتغل هي بنفسها في البورصة فأنا بس بحاول ان يبقى في شمول للناحيتين
21:55
عمر: طيب أعتقد اننا غطينا حاجات كتير جداً ، وأعتقد الحلقة دي ممكن تبقى من الحلقات التقيلة الدسمه اللي فيها معلومات كتيرة جداً ومفيش أحسن منك بجد يتكلم في الموضوع ده بجد يا يوسف .. في أي حاجه تانية طيب تحب نقفل بيها؟
أحمد: الحاجه الوحيدة اللي هقولها لأي حد ، في ناس كتيرة بتسمع قصص إن الراجل ده اشتري السهم ونام وصحي بعدها بـ 10 سنين لقى نفسه ملياردير .. طبعاً القصص دي كلنا بنحلم بيها وكلنا نتمناها كل التمني اللي فالدنيا بس النصيحة لأياً كان
فلوسنا مبتجيش بالسهل فلو تعبت عشان أطلع فلوس لما استثمرها خاف عليها زي ما بتخاف على أي حاجه تانية فخليك واعي خليك حاضر مش مجرد إنك عملت قرار السنادي وخلاص أنا كمان 3 سنين هبقى أبص على السهم ده .. ممكن حاجات كتيره تحصل فأي حد مستثمر فلوس زي ما شقي يستثمر بيها لازم ديماً تبقى متابع السهم أو متابع السوق والأحداث العالمية والمالية لأن الكوكب كله خلاص بقى بلد واحده إلى حد كبير فأي حاجه بتحصل زي ما شوفنا احنا في مصر اتبهدلنا في حرب بين روسيا وأوكرانيا وملناش أي دخل فيها ودفعنا تمنها غالي جداً فدي النصيحة الوحيدة وأهم نصيحة ممكن أديها لأي حد لأن الاستثمار مهم جداً
في مصر طبعاً طول عمرنا فينا الطبع بتاع القرش يتحط في البنك وتشوفه كل يوم تفتح حسابك في البنك تشوف الفلوس بتاعتك موجودة بس دي فلوس مبتعملش اي حاجه انت مجرد هتستخدمها يوم ما تستخدمها غير كده هي مبتعملكش أي حاجه النهاردة او بكره
ممكن تستفيد بيها فالاستثمار ده في رأيي أحد اهم الحاجات اللي أي حد ممكن يعملها أنا قعدت فترة طويلة عمال بشغل رقم حساب البنك ده زي العداد بالظبط بتروح تتفرج عليه كل يوم زاد زاد زاد ، صرفت يا خسارة قل بس قعدت فترة طويلة قبل ما أخليني واقعي الاستثمار ده حاجه مهمه حاجه تدخلي عائد ، دخل جانبي
عمر: واحنا حتى ديماً مبنقولش إن في استثمار واحد هو اللي حلو هي محفظة متنوعة ، عندك أصول مختلفة سواء عقار ، أسهم ، سندات طبعاً الناس في الأول ممكن يبقى بالنسبالها الحاجات دي صعبه بس أنت كل ما بتقضي وقت في المجال كل ما بتلاقي لأ أنا ممكن فعلاً اعمل كده ، ممكن أبتدي في الحته الفلانية ، ووجود صناديق استثمار بتقسملك شوية بتخلي الناس الصغيرة النهاردة تقدر تبتدي عن زمان لو تفتكر يعني انت أول ما ابتديت معتقدش إنه كان في كل الفرص يعني مينفعش تستثمر أونلاين وتدفع فلوس في 5 دقايق يعني أعتقد الموضوع اتحسن كتير
أحمد: بالظبط كده
عمر: ميرسي جداً جداً يا يوسف مش عارف اشكرك قد إيه أنك كنت معايا النهاردة
أحمد: الشرف ليا والله .. أخيراً وصلت لكلام ينور
عمر: إن شاء الله تيجي معانا تاني بإذن الله .. ميرسي جداً
Translation of some words and terms:
Corporate actions تصرفات المؤسسات
Feedback ردود فعل
Stocks Split تقسيم الأسهم
Per Share للسهم الواحد
Market Cap الحد الأقصى للسوق
However ومع ذلك
Par Value القيمة
Broker السمسار
Shareholder register سجل المساهمين
Update تحديث
General Assembly الجمعية العمومية
Voting التصويت
Ipos الإكتتاب (إطلاق سوق الأوراق المالية)
Ownership ملكية
Dormant ساكن
Secondary Market سوق ثانوي
Advisers المستشارين
Private investors المستثمرين الخاصين
Startups الشركات الناشئة
Exit scenario سيناريو الخروج
Accordingly وفقا لذلك
Fees مصاريف
Inclusion شمول
Asset Class فئة الأصول
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #تقسيم_الأسهم #شطب_الأسهم #إدراج_الأسهم