3. الفلوس وسيلة ام غاية؟
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
!في حلقة الإسبوع ده بنتكلم عن تنظيم الحياة المالية وليه ديما التفكير في الحياة المالية صعب ومرهق
!ايه المشاكل اللي ممكن تحصل نتيجة لسوء تنظيم الحياة المالية؟ ونتغلب عليها ازاي
ابدأ امتى؟ ومين المستفيد؟
.بنتكلم عن "الفلوس" كمفهوم عام
!وليه الفلوس (او المادة) كمصطلح مربوطة في أذهانا بمشاعر سلبية
هل الفلوس وسيلة ام غاية؟
ليه بنحوش فلوس؟
هل الاستثمار في الفلوس فقط؟
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
عايز ابتدي حلقة النهاردة بسؤال احنا ليه ديماً مبنفكرش في الحياة المالية؟ ليه ديماً الموضوع صعب ودمه تقيل؟
ممكن نقول حاجات كتيرة في الموضوع ده ، ممكن نقول التعليم ، ثقافة عامة ، عدم وجود مصادر أقدر اقراها ممكن نقول 50 سبب ، التفكير في الفلوس عموماً هو حاجه مرهقه بس واحده واحده ممكن نكسر المشكلة دي ونوصل مع بعض لحلول من خلال البودكاست ده
أكتر سبب بسمعه إنه ياريتني عرفت الموضوع ده وأنا أصغر ، ياريتني ابتديت بدري.. ديماً هتحاول تلاقي اسباب تهرب بيها من انك اصلاً تبتدي تفكر في الفلوس عموماً ، واحد يقول لا يا عم اللي ذاكر ذاكر زي ما بنقول كمثل يعني اللي ذاكر ذاكر أنا لسه هبتدي دلوقتي ولسه هفكر ، بالعكس في أي سن انت لازم يكون عندك خطه مالية بتنفذها بتفكر فيها ملهاش دعوة بأنت ابتديت امتى أو ياريتني عرفت من زمان الكلام ده كله غلط جداً
فلو برده ده أحساسك دلوقتي وانت بتسمعني اللي هو أنا مابتدش وعمري ما فكرت وابتدي ليه والكلام ده كله ، أنت بتسمع البودكاست ده أو جيت تسمع البودكاست ده هنحاول نمشي فيه واحده واحده مع بعض علشان بعد كده متقولش أنا مكنتش عارف.. دورنا هنا في البودكاست ده وده جاي من اسم البودكاست نفسه اننا ننور الطريق والاختيار بعد كده هو ليك
اول حاجه عشان تحل أي مشكلة انك يبقى عندك دراية ان دي اصلاً مشكلة لازم تعرف نفسك إن الإدارة المالية هي مشكلة لو انت تجاهلتها
تاني خطوة بعد اني خلاص عرفت اني عندي مشكلة ، او انا بسمع البودكاست ده عشان أحل مشكلة عندي.. دوّر على مين المستفيد لو احنا حلينا المشكلة دي ، يعني لو حليت المشاكل اللي عندي في الحياة المالية أو في الفكر المالي مين اللي هيستفيد؟ الإجابة هنا واضحة وفي كلمة واحدة أنت أو أنتي مفيش حد تاني هيستفيد لما أنت تنظم حياتك المالية غيرك ، لما انت تحط خطة معينة تمشي عليها مش صحابك اللي هيستفيدوا او اخواتك.. أنت
مفيش حد هيجني ثمار الإدارة المالية غير المدير المالي نفسه زي الأكل بالظبط لما انت بتاكل أنت الوحيد اللي بتتأثر مش صحابك ، انت الوحيد اللي هتتأثر بالأكل الكويس اللي أنت بتاكله ده ، ومفيش حد هيساعد غير نفسك مع الأسف كل اللي حواليك دي أدوات البودكاست اللي انت بتسمعه ده أداة ، الأفكار وآراء الخبراء أداة ، مصادر ومراجع على الإنترنت ، مقالات كلها أدوات ومتلومش الأدوات لوم نفسك
بعد ما عرفت المشكلة وعرفت مين هيستفيد لو طبقت نظام كويس في الحياة المالية لازم ابتدي أفكر في الأهداف أنا هعمل كل ده ليه؟
الهدف هو الحرية المالية ، تقاعد ، زيادة دخل.. أهداف كتير ممكن تحطها قدامك براحتك بس في حاجة مهمة لازم تعرفها إن هدفك ده متغير مع الوقت يعني الواحد لما بيخلص جامعة مثلاً مستحيل يكون عارف هو عاوز يعمل إيه في حياته المهنية فما بالك بالحياة المالية! اللي هي فيها تغيرات عبر الوقت عبر المراحل مش كل واحد هيقدر يرسم أنا عايز أعمل إيه في أول 5 سنين في حياتي ، في أول 10 سنين.. مستحيل ، بس أنت عندك أهداف واضحه بتحاول تروحلها ، أهداف طويلة المدى واحده واحده ، مش لازم تجاوب على السؤال النهاردة بس ممكن في الأول تستخدم أهداف بسيطة صغيرة زي ما قولنا قبل كده تبتدي تحققها وخليها واضحة في دماغك هتبقى محترف في تحديد الأهداف وتغيرها مع الوقت
أخر حاجه انا هقولها برده عشان أقفل بيها الحلقة دي مفهوم عام عن الفلوس عموماً ودي من الحاجات الموروثة في المجتمع ، أفكار موجودة وده مفهوم خاطئ تماماً من وجهة نظري إن الفلوس ديماً أو المادة مربوطة ديماً بالجشع ، بحب الحياة ، المادية ، بالمضاربة ، بالمقامرة ، باليانصيب ، دي حاجات كلها مربوطة يعني لما تسمع كلمة فلوس تحس ديماً انها مربوطة بحاجات كلها وحشه أو حاجات كلها غلط ، عصابات ، أغنية بيعملوا ايه في الفقرا كل الحاجات دي
طيب أعتقد النهاردة أي حاجه في الدنيا انت ممكن تستخدمها بكل الطرق ، ممكن تستخدم سلاح معين في الدفاع عن نفسك أو في الهجوم على الاخرين وطريقتك هنا هي اللي بتحدد أنت بتستخدم الحاجه دي ازاي.. نفس الكلام أعتقد الفلوس الدوافع وراها انك تعمل محفظة استثمارية كويسة أو انك تحوش ثروة معينة أنت ممكن تكون بتحوشها عشان تقلل الفجوة ما بين الغني والفقير ، يعني أنك تاخد فلوسك دي في وقت ما تعمل بيهم مؤسسة خيرية تعمل بيهم مستشفى تعمل بيهم أي حاجه انك تستخدم الحاجه دي بطريقة كويسة
الحاجة التانية انك ممكن في جزء معين في المجتمع انت شايف ان فرصه قليلة ممكن تستخدم فلوسك انك تساعد الجزء ده اللي هما ناس معينه مثلاً مبيجلهمش شغل بطريقة معينة
انا قصدي انك تفكر انك تكون محفظة كويسة لنفسك لعيلتك لولادك دي مش حاجه وحشه ، الناس ديماً لما تفكر عن الفلوس الفلوس هي وسيلة من الوسائل اللي احنا بنسهل بيها حياتنا زي الإنترنت ، زي العربية ، زي أي حاجه فإنك تبتدي تعمل خطة استثمارية تقدر تستخدمها على مدار الـ 10 ، 20 سنة الجايين دي حاجه مهمة جداً جداً جداً لازم تبقى من أولوياتك في حياتك ، لازم تبقى حاجه انت مقتنع انك لازم تعملها ، لازم تاخد خطوات بسيطة منها ، خطوات بسيطة تجاه الهدف ده ومتبعدش نفسك بسبب ان أنا ملهاش لازم أعملها ، أو انت مش هتاخد معاك فلوس بعد عمر طويل معاك.. لأ انت جزء من حياتك انك تأمن عائلتك ، تأمن مجتمعك والحاجه الوحيدة اللي انت تقدر تعملها انك تبتدي تفكر في الفلوس بطريقة مختلفة تبتدي تفكر ان دي حاجه هتتبني على مدار 20 / 30 سنة انت لما بتخلف ابنك بتحاول تعلمه ، بتحاول تعلمه قيم معينه ، بتحاول تعلمه تعليم معين ، بتحاول تديله مهارات معينة في الحياة نفس الكلام المفروض يحصل على الفلوس ده برده من المفاهيم الكبيرة جداً اللي هو أنا ليه عاوز أحوش فلوس مش لازم تحوش فلوس علشان تاخدها وتشتري عربيات وتتفسح مش بقول كده أنا بقول ممكن تكون أهدافك مختلفة وكل واحد هو حر في أهدافه وكل واحد هو عنده فكر معين عاوز يطبقه في الحياة.. الفلوس دي هي وسيلة ولكن هي مش غاية
شكراً جداً جداً ان انتوا كنتوا معايا في حلقة النهاردة من كلام ينور ، ابعتولنا من فضلكوا على إيميل البرنامج وعلى صفحتنا في السوشيال ميديا اسئلتكوا ، اقتراحاتكوا أنا ديماً بحب جداً اسمع من الناس اللي بيسمعونا وشكراً جداً
Translation of some words and terms:
Awareness وعي / دراية
Materialism المادية
Speculation المضاربة
Gambling المقامرة
Lottery يالنصيب
Wealth ثروة
Skills مهارات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
كلام_ينوّر #بودكاست #بودكاست_عربي #الحياة_المالية #أقتصاد #الفلوس#