155. مقتطفات مالية مع ضيوف كلام ينور (الجزء الثاني)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنكمل الحلقة الجزء التاني من مقتطفات مالية مع ضيوف كلام ينور، حلقتين بنحتفل فيهم معاكم بمرور 3 سنين على كلام ينور وبنشكر كل ضيوفنا اللي نورونا و بنفكركم لو في حلقة معينة أو موضوع معين مهتم بيه ارجع اسمع الحلقة تاني الحلقات
:مقتطفات الجزء الثاني
(01:22) الحلقة 101: رحلة لعالم الدفع الإلكتروني - الجزء الأول
(02:58) الحلقة 102: رحلة لعالم الدفع الإلكتروني - الجزء الثاني
(05:52) الحلقة 105: العربيات المستعملة مع سيلندر - الجزء الأول
(07:50) الحلقة 106: العربيات المستعملة مع سيلندر - الجزء الثاني
(08:23) الحلقة 113: حوار مع مستثمر ملائكي - الجزء الأول
(10:44) الحلقة 114: حوار مع مستثمر ملائكي - الجزء الثاني
(12:30) الحلقة 115: حاضنة أعمال الشركات الناشئة - الجزء الأول
(14:10) الحلقة 116: حاضنة أعمال الشركات الناشئة - الجزء الثاني
(16:41) الحلقة 120: أول صندوق مصري للاستثمار في الذهب (مع ثاندر) - الجزء الأول
(17:38) الحلقة 121: أول صندوق مصري للاستثمار في الذهب (مع ثاندر) - الجزء الثاني
(18:29) الحلقة 122: خلاصة بدايات الادخار
(20:22) الحلقة 128: حوار مع ساكسو بنك منصة تداول عالمية - الجزء الأول
(22:42) الحلقة 129 حوار مع ساكسو بنك منصة تداول عالمية - الجزء الثاني
(23:23) الحلقة 133: Trading Errors 404 - الجزء الأول
(25:16) الحلقة 134: Trading Errors 404 - الجزء الثاني
(26:48) الحلقة 135: Trading Errors 404 - الجزء الثالث
(26:50) الحلقة 137: حوار مع محلل فني - الجزء الأول
(27:59) الحلقة 138: حوار مع محلل فني - الجزء الثاني
(28:46) الحلقة 148: اللقاء الثاني مع ساكسو بنك - الجزء الأول
(30:26) الحلقة 149: اللقاء الثاني مع ساكسو بنك - الجزء الثاني
(31:26) الحلقة 153: Trading Errors 404 - اللقاء الثاني
يارب تكون الحلقة عجبتكم هستنى استفساراتكم واسئلتكم على صفحتنا على السوشيال ميديا واشوفكم الاسبوع الجاي
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور النهاردة الجزء التاني بنحتفل مع الناس بمرور 3 سنين من كلام ينور ونشكر فيها كل ضيوفنا وتاني لو في حلقة معينة عجباك احنا هنسيب في الشو نوتس ارقام الحلقات ويارب تستمتعوا بالجزء التاني
(01:22)
الحلقة 101: رحلة لعالم الدفع الإلكتروني - الجزء الأولالضيف: أحمد عنايت الرئيس التنفيذي لشركة الأهلي ممكن للمدفوعات الإلكترونية، شركة مصرية مرخصة وعنده خبرة كبيرة في مجال التكنولوجيا المالية
عمر: إيه هو الدفع الإلكتروني؟
أحمد: الدفع الإلكتروني لو هرجع معاك خطوة لورا كده ديماً علاقة الناس بالمدفوعات هي الكاش وإن أنا بروح ادفع الكاش ده عند مقدم خدمة، يعني مثلاً طول عمرنا كنا متعودين زمان إن الراجل محصل الكهربا بيجيلي البيت، محصل الكهربا ده بيقولي الفاتورة بتاعتك أهي يقوم مديني ورقة الفاتورة كام 67 جنيه أتفضل يا باشا الـ 67 جنيه فكرة الدفع الإلكتروني إن أنت بدل ما بتروح للراجل بتاع الكهربا أو بتاع الكهربا بيجيلك أو بتاع الغاز يجيلك، تروح لبتاع المحمول، أو بتاع أي حاجة تانية.. الأقساط انت بتلم كل ده للعميل في الأخر في حته واحده بيقدر يخلص منها كل مدفوعاته ده كان بداية فكرة الدفع الإلكتروني في مصر أن أنت بتلم المدفوعات الإلكترونية للعميل كلها في مكان واحد يقدر يدفع بقى موبايله، فاتورته لو عليه أقساط، يشحن حتى كارت الكهربا والغاز وبعد كده الموضوع بدأ يتطور أن انت دلوقتي بقيت بتحاول على قد ما تقدر ان مثلاً الراجل عايز يشتري حاجه فالحاجه دي ممكن يشتريها ويدفع والشحن يتم وكل ده من غير ما تتحرك من بيتك فهو الموضوع بيبقى عبارة عن تطور بيواكب التطور التكنولوجي اللي بيحصل في اي حته في الدنيا، التكنولوجيا جي في الأخر بتخدم كل القطاعات العملية في مصر اللي منها قطاع بتاع الأموال زي ما بيقولوا وطلع من هنا مصطلح التكنولوجيا المالية اللي هي الدفع الإلكتروني اللي طلع جزء منها يعني
(02:58)
الحلقة 102: رحلة لعالم الدفع الإلكتروني - الجزء الثانيالضيف: أحمد عنايت الرئيس التنفيذي لشركة الأهلي ممكن للمدفوعات الإلكترونية، شركة مصرية مرخصة وعنده خبرة كبيرة في مجال التكنولوجيا المالية
عمر: كلمنا بقى على البيانات الضخمة والتحليلات في العالم ده؟ كلمنا بقى انت بتبص على البيانات ازاي؟
أحمد: هقول لحضرتك بص احنا خلينا بس متفقين على خط عريض إن العالم كله بشكل عام احنا بقالنا يمكن 3 أو 4 سنين موضوع البيانات ده ابتدى الشركات حتى متوسطة الحجم يبصوا عليه بس في اللي جاي مفيش حد هيشتغل من غير تحليل بيانات خلاص، يعني أنت لو مش بتحلل وبتبص على البيانات فانت مش هتعرف تكمل هديك مثال بسيط انا راجل بشتغل في شركة من شركات الدفع الإلكتروني فانا عايز اعرف انا بعمل كويس ولا وحش انا مش عارف، أنا شايف اني بعمل ارقام بس انا معرفش الأرقام دي حلوة ولا وحشه فبعمل ايه انا مثلاً ببص اننا عندي ماكينة نقاط البيع في القاهرة مثلاً بتعمل 10000 جنيه في اليوم معاملات وعندي ماكينة زيها موجودة في مرسى مطروح بتعمل 15 ألف جنيه الأرقام كأرقام ممكن تكون كويسة بس ازاي مرسى مطروح بتعمل أكتر من القاهرة وهل ده منطقى ولا لأ فلازم أربطه بإيه اشوف انا اصلاً شكل تعداد السكان عندي في القاهرة زي شكل السكان عندي في مرسى مطروح، طيب هي مرسى مطروح دي بتعمل الـ 15 ألف دول في أيام الصيف ولا في الصيف وفي الشتا لأن في الصيف الدنيا مختلفة فأنت في الأخر البيانات دي حكاية فلازم متبقاش بتبص على حاجه من غير ما يكون عندك الصورة الكبيرة لكل الحكاية لازم أكون متأكد أني رابط كل أجزاء المعلومات ببعض، القاهرة حلوة وجميلة وأكتر وفيها 20 مليون مواطن بس في مواطنين ساكنين في حتت بيبقى فيها كثافة سكانية عالية ممكن تكون بتعمل معاملات كتير بس متوسط المعاملة الواحدة مش عالي وممكن يبقى عندي مناطق تانية أقل بكتير اوي بس المفروض متوسط المعاملة الواحدة يبقى أعلى مع إن عدد المعاملات قليل فهي لازم تكون بتبص على البيانات من منظور شامل، كامل متبصش بس الماكينة دي بتعمل أرقام حلوة ولا وحشه كحقيقة مجردة كده من غير ما تربطها بباقية العناصر بتاعة الحكاية كلها عشان تعرف تاخد قرار واحنا يمكن برضه الشركة بيحصل فيها معاملات كبيرة أوي خلال السنة ونص اللى فاتوا دول واحنا لسه هنبتدي الاستخدام بتاعنا للبيانات يبقى فيه تحسينات كبيرة اوي يبقى في زي ما بتقول كده مفيش قرار بيتاخد في البيزنس مبيتراجعش الأول بناءاً على بيانات من العمليات اللي احنا بنشوفها على الأرض غير كده هيبقى احنا اه ممكن القرار اللي احنا بناخده يكون صح بس ممكن يطلع غلط برضه لأنه مش مبني على معطيات
(05:52)
الحلقة 105: العربيات المستعملة مع سيلندر - الجزء الأولالضيف: عمر الدفراوي
شمس: السبب النهارده في الحلقه ان انا شفت فيديو ليك على لينكدإن شدتني جدا الفكره اللي انت بتعملها حاسسها مهمة جدا عشان شركتك في مصر في ظل الظروف اللي مصر بتمر بيها من ناحية قدرة الناس على الصرف والكلام ده كله، المنتج بتاعك منتج مميز وفي نفس الوقت بما اني مش مقيم في مصر الفترة دي شفت نفس الخدمه بتاعتك هنا وعجبتني جدا انا شخصيا جربتها وحاجه حبيتها جدا وحبيت التجربة وحبيت انقل للمستمعين بتوعنا فكلمني كده انت بتعمل ايه
عمر: خليني احكيلك الموضوع ابتدى ازاي، ازاي قررنا نعمل اللي احنا عايزين نعمله احنا ابتدينا الاول نبص على الأسواق زي مصر ايه المشاكل الكبيره قوي واللي ناس قبلنا حاولت تحلها، والمشكله اللي احنا قررنا نحلها هي مشكله العربيه المستعملة دي كم مبدئيا المشكله اللي احنا عايزين نحلها احنا بنحاول نعمل ايه؟ احنا بنحاول ببساطة نعيد الثقة في سوق العربيات المستعمله هي دي رؤية المشروع بتاعنا ليه شايفين ان دي رؤية المشروع لان اكبر مشكله موجوده هي انعدام الثقة في السوق فاحنا بنحاول نعيد بناء هذه الثقة بين اللي بيشتري وبيبيع عربيه، مش ما بينهم بس للي بيشتري عربية واللى بيبيع عربية لأن احنا مش بنوصل الناس ببعض احنا المشتري واحنا البائع فاحنا عاوزين نبني ثقة بين المشتري والبائع ونأكد للناس أنه شريك موثوق به تقدر تعمل معاه المعاملات في العربية المستعملة وتبقى ضامن إن كل حاجة ماشية تمام فده ملخص سريع
(07:50)
الحلقة 106: العربيات المستعملة مع سيلندر - الجزء الثانيالضيف: عمر الدفراوي
شمس: السؤال بقى بتاع التمويل هاخد وقت قد إيه عشان يجيلي التمويل بتاعي؟
عمر: نص ساعة، احنا عندنا كذا شريك اللي بنشتغل معاهم، عندنا فاليو، عندنا بنك الإستثمار، عندنا شركة اسمها أولين، عندنا بنك تجاري كبير خلاص بنمضي معاه اخر الشهر ده بس طبعاً انت عارف كل واحد له طبيعته كوقت عشان يعرف يديلك الموافقة على التمويل بس حد زي فاليو بيعرف يدي موافقة في 30 دقيقة
الضيف(08:23)
الحلقة 113: حوار مع مستثمر ملائكي - الجزء الأول: أحمد متولي هو مستثمر ملائكي عنده خبره طويله في المجال، هو دلوقتي مستشار
عمر: هل أنت بتستثمر في قطاعات معينة؟ يعني أنا برضه عايز أقرب أكتر عليك هل أنت بتستثمر في قطاعات معينة؟ وهل أنت لما أبتديت الرحلة بتاعتك كنت بتفكر بطريقة والموضوع ده أتغير دلوقتي؟
أحمد: سؤال في محله، أنا لما بدأت الطريق بتاعي بدأت استثمر في الحاجات اللي أنا عارفها كويس، يعني أنا مثلاً أشتغلت كتير جداً في مجال السلع الاستهلاكية سريعة التداول فأنا فاهم التوزيع كويس، فاهم ازاي تشوف اللي بيحصل على الأرض من ناحية المناديب ومن ناحية التبطيل ومن ناحية إدارة الأسطول كإدارة المنتجات على نقاط البيع الموجودة فاخترت الحاجات اللي أنا فاهمهم كويس وبدأت أراجع معاهم ونجحت في حاجات وفشلت في حاجات يعني دي كانت البداية بتاعتي إننا بدأت أمشي كده أول ما بدأت استثمر أنت مش بتشوف عائد من الأول خالص أنت بتشوف العائد لما يحصل قدام إعادة الرسملة أو تخارج، بس لما بدأت أحس إننا مرتاح أكتر وعايز اخش في مجال جديد بدأت أبص على قطاع تاني اللي هو مبني على قطاع مبني على شعبية زي ما بيقولوا فأخترت مجال أنا معرفش عنه حاجه خالص فاخترت قطاع صناعة الألعاب لأن ده تريند موجود وحجمه كبير فاخترت إني استثمر في قطاع صناعة الألعاب فدخلت برضه في حاجه زي دي وبعدين لما اتعلمت مثلاً من غلطات حصلت معايا فقولت خلاص أنا هبتدي أبص على الحاجات اللي أنا عارفها كويس لأن ده بيساعدني إن أنا أكمل لأن مثلاً حاجه زي قطاع الألعاب أنا مكنتش عارف هل ده كويس ولا وحش ولا ماشي لأن انا كصاحب شركة كل ما بتيجي للمستثمر بتديله مراجعة بتقوله أدي الأداء بتاعنا فلما ألاقي رائد الأعمال راجع يطلب مثلاً ان الاداء مش ماشي كويس وعايز يرفع رأس المال أنا مش عارف اساعده ازاي لأننا معنديش خبرة في المجال اللي هو أختاره فده برضه خلاني أفكر بعد كده في الاستثمارات اللي أخدتها بعد كده اننا بقيت أدور بس على حاجه أنا واعي بيها
(10:44)
الحلقة 114: حوار مع مستثمر ملائكي - الجزء الثانيالضيف: أحمد متولي هو مستثمر ملائكي عنده خبره طويله في المجال، هو دلوقتي مستشار
عمر: إيه فئات الأصول الجانبية اللي انت بتحطها جنب استثماراتك في الشركات الناشئة عشان المحفظة اللي هي بشكل أكبر اللي هي صافي القيمة بتاع أحمد أو عمر أياً كان هل بتحط جنبة عقارات، هل بتحط أسهم، هل بتحط خليط من كل حاجه.. ازاي بتفكر في الحتة دي؟
أحمد: طبعاً زي ما انت قولت يا عمر هو انا ببص على التنوع كهدف أكبر ورا إننا دايماً ببص على كل حاجه مش حاجة واحدة بس زي ما انت قولت لو عقار بيبقى جزء من الحاجه اللي بتحصل فيها استثمار، لو أسهم بحط حاجه في أسهم بس لو بحط بحط أقل لأن الأسهم الطلوع والنزول فيها ساعات بيبقى فيها مخاطرة أعلى وأصول بقى زي الدهب لانه حاجه من الحاجات اللى بتبقى ماسكة نفسها، بره بيبصوا على الكريبتو (العملات المشفرة) دي حاجه من الحاجات اللي الناس بتفكر فيها برضه كاستثمار، وفي ناس بتبص على الاستثمار في أفكار جديدة خالص، لما بدأ العالم بتاع nfts اللي دخلت كتريند ده برضه كان من الناس اللي هما بدأوا يبصوا عليها فالنصيحة اللي أنا ممكن أقولها لكلام ينور أن احسن حاجه تعملها انك تقسم المحفظة زي ما انت قولت يا عمر بالظبط على مجالات أو قطاعات مختلفة بأنواع مختلفة وأقل حاجه ممكن تخليها معاك هي الكاش هي دي حاجه انصح بيها الناس محدش يسيب معاه سيولة أو كاش لأن دايماً قيمة الكاش بيقل يوم بيوم وسنة بسنة
(12:30)
الحلقة 115: حاضنة أعمال الشركات الناشئة - الجزء الأولالضيف: محمد حمزة محمد كان من الناس اللي ليهم دور كبير جدا في حاضنة أعمال الجامعة الأمريكية، النهارده هو موجود في بنك مصر أنشأوا برنامج لمساعدة الشركات الناشئة والاستثمار فيها
عمر: هل جودة الناس بتتغير؟ يعني هل الناس بتتعلم؟ يعني هل الناس اللي كانت بتجيلك في أوائل البرنامج كانوا جايينلك أقل جاهزية من آخر برنامج؟ يعني هل حسيت ان النظام البيئي نفسه اتغير من ناحية المعرفة بتاعه الناس؟
حمزة: آه طبعاً بشكل كبير، أحب طبعاً أقول ان كل ده حصل بسبب حاضنة أعمال الجامعة الأمريكية بس هو ما كانش بالسبب ده نفسه والشركات بتتغير مع تطور الموجات دي كان برضه السوق بتاع دعم ريادة الأعمال كان بيتغير ، بقى يفتح اكتر من برنامج، بقى في فَعالِيّات اكتر بكتير الشباب بقى عندها وصول للمعرفة أكتر بكتير، أبتدوا يتحطوا على الطريق الصحيح بتاع ايه هي طريقة التفكير، وايه هي طريقة التفكير كانت هي العنصر الرئيسي في حته انا نفسي اشتغل ازاى الاستثمار عامة أو جذب الاستثمار للسوق تطور بشكل كبير جدا على مدى السنين دي فابتدأ نوع رواد الاعمال او زي ما بيقول جوده رائد الاعمال اللي ابتدى ان هو ممكن يبقى عنده خبرة اكتر يعني كنا في الاول بنشوف شباب لسه متخرجه من الجامعه فهو لسه هيتعلم كتير من الرحلة بتاعته عنده فرص نجاح بس برضه نقص الخبرة أو أن هو لسه جديد قوي على السوق بيبقى واخد شويه من فرص النجاح بتاعته فلما ابتدى يبقى فيه استثمارات اكتر لما ابتدى يبقى في معرفة اكتر لما ابتدينا نشوف قصص نجاح أكتر للشركات لقينا إن الناس مهتمة أكتر بالمجال ده ومستعدية تاخد المجازفة الكبيرة اللي احنا كنا بنقول ان هي عامل المجازفة العالي الموجود في مجال الأعمال المبنية على الابتكار بشكل رئيسي
(14:10)
الحلقة 116: حاضنة أعمال الشركات الناشئة - الجزء الثانيالضيف: محمد حمزة محمد كان من الناس اللي ليهم دور كبير جدا في حاضنة أعمال الجامعة الأمريكية، النهارده هو موجود في بنك مصر أنشأوا برنامج لمساعدة الشركات الناشئة والاستثمار فيها
عمر: أكبر تحديات وممكن حتى سريعا النقطتين ثلاثة بتشوفهم تحديات قدام الناس قدام ريادة الأعمال نفسها؟
حمزة: التحديات عامة قدام ريادة الأعمال طبعا في كذا حاجه في التحديات اللي هي العامة اللي بنقول انها تحديات مستمرة اللي هي فكره مشوار رائد الأعمال معظم الوقت بيكون مشوار في جزء من الوحدة هو بيواجه صعوبات وتحديات مختلفة مش شرط يبقى حواليه ناس كتير لسه معندوش موارد كافية انه يعين ناس كتير انهم يبقوا بيقسموا التحديات دي عليهم ففريق العمل دايما بيبقى عليه ثقل من المسؤولية وثقل من المجهود اللي لازم يبذل عشان يحققوا حاجه زي كده الضغط بتاع عدم القدرة على التنبؤ بالمستقبل أو أن هو مفيش وضوح للدنيا ماشيه ازاي دي برضه بتبقى تحدي كبير جدا في رحلة أي رائد أعمال وفي بقى الناحيه التانيه بتاعه التغيرات اللي بتحصل في الوضع الاقتصادي العالمي دلوقتي في تغييرات ناحية ان في شركات في ظل الأزمة العالمية والتضخم العالمي اللي بيحصل ابتدت ان هي تواجه صعوبة في الحصول على استثمارات مثلا فابتدا زي ما بنقول السوق بتاع الشركات دي موجات مختلفة بتطلع زي ما الاستثمار كان في موجات مختلفة بتحصل في الفترة اللي فاتت كان معظم المستثمرين عايزين بيكبروا الشركات بأسرع طريقة ممكنة بحيث ان انا نحاول نوصل لاحسن طريقه إن تمن الشركة يبقى عالي ويبقى في حد مهتم ان هو يشتري الشركة بشكل رئيسي دلوقتي يمكن الاستثمار بقى محدود اكتر شوية فابتدينا نشوف المستثمرين مهتمين اكتر بالشركات اللي هتعرف تبني من الاول منتج له استدامة كويسه يقدر ان هو لو ما حصلش على استثمار يفضل شغال ويفضل يفيد الشركة بتاعته فبقالنا شويه بندرب فكر رواد الأعمال على انهم يمشوا بسرعة مرة واحدة كل حاجه اتغيرت أن هو لا لازم يبتدي في مستوى من المعرفة ان احنا نبني شركات مستدامة هتحتاج مننا دعم أكتر وهيحتاج مننا صبر اكتر وهيحتاج من رواد الأعمال جهد اكبر انهم يوصلوا لحاجه زي كده طبعا المثابرة بقى بتاعه ان انا يبقى عندي القدره اني انا اقول الشركه دي ما اشتغلتش طيب اجرب مره تانيه، يبقى عندي مثابرة ان انا حتى لو مش هجرب مره تانيه على طول انا ممكن استريح شويه وافكر في حاجه احسن وأجرب مره تانيه دي بالنسبه لي بحسها من أصعب التحديات اللي ممكن تبقى بتواجه رواد الأعمال في الوقت الحالي
(16:41)
الحلقة 120: أول صندوق مصري للاستثمار في الذهب (مع ثاندر) - الجزء الأول
الضيف: أحمد حمودة الرئيس التنفيذي لثاندر
عمر: هل في حاجات بتعملوها جديد؟
أحمد: اللي احنا عمتاً بنشتغل عليه دلوقتي كذا حاجه، زي ما أنت قولت علشان لو احنا فعلاً عايزين نتيح هذه الخدمة أكتر فجزء كبير من اللي بنعمله اننا بنشتغل مع البورصة المصرية على البنية التحتية للتكنولوجيا عمتاً انها تستحمل هذه الأعداد، جزء كبير اوي من اللي كان بيجيلنا من العملاء قولونا وساعدونا ازاي نستثمر فبنطلق منصة جديدة او بنشتغل على اننا نطلق منصة جديدة قريب أكنها مركز بحث للشركات الموجودة عندنا في البورصة المصرية هدفنا اننا نبقى سوبر ماركت للأدوات الاستثمارية واخر منتج اطلقناه على المنصة المنتج اللي خلاص عرفت أقول لمامتي احنا بنعمل ايه اننا ساعدنا الناس أنها تستثمر في الدهب
(17:38)
الحلقة 121: أول صندوق مصري للاستثمار في الذهب (مع ثاندر) - الجزء الثانيالضيف: أحمد حمودة الرئيس التنفيذي لثاندر
عمر: انت كواحد مستثمر بقى ودي دايما حاجه انا بفكر فيها على طول ازاي بتقيس نجاح الصندوق ده على المدى الطويل يعني المفروض الصندوق ده يعمل ايه عشان انا كمستثمر ابقى سعيد؟
أحمد: سؤال حلو جدا جدا جدا ودايما بنتكلم عليه في المكتب ان هو ممكن يكون بيلخبط الناس غالبا انت لما بتستثمر في صندوق بتبقى مستني للصندوق ده يحقق على عائد او اعلى ايرادات صح الصندوق ده هنقيس نجاحه بقد ايه هو ماشي بالظبط مع اسعار الدهب فلما الدهب بيطلع 10% هو كمان بيطلع 10% لما الدهب بينزل 10% هو كمان بينزل 10% فبتبقى انت قاعد زي ما انت قلت في البيت عارف اكني اشتريت السبيكة دي لان الدهب بيطلع انا بطلع معاه الدهب بينزل انا بنزل معاه
(18:29)
الحلقة 122: خلاصة بدايات الادخارالضيف: ناصر خلفيته صيدلة ولكن اللي بيميز ديما حديثي انا وناصر اننا ديما بنعرف نتكلم في مواضيع فكرية في مختلف المجالات
علشان تتقاعد بأمان ، وده وفقاً لـfidelity واللي كل الناس اختلفت عليه وقالت ان الكلام ده غلط او زيادة عن اللزوم ، المفروض وانت في سن 30 سنة يبقى عندك مره واحده من دخلك السنوي ، يعني افتراضاً وانت عندك 30 سنة مرتبك 10000 جنية او دولار او ايا كان ، خلينا نقول 10000 جنية في الشهر ففي السنة في 120 ألف جنية انت عند سن 30 لازم يبقى معاك مره من مرتبك في المدخرات.. ده رقم يخض لأي حد صح؟ معناه ان انت بتبتدي شغلك 22 او23 او24 سنة عندك 6 سنين تحوش سنة كاملة من مرتبك وهنشوف هنوصل للكلام ده ازاي ، طيب عند سن 40 لازم يبقى معاك 3 مرات من مرتبك السنوي يعني عند سن 40 بقبض برده 10000 جنية في الشهر يعني 120 ألف في السنة يبقى عندي 360 ألف في البنك ايا كانت العملة يعني ، طب عند سن 50 ؟ 6 مرات من مرتبك ، عند سن 60 ؟ 8 مرات ، عند سن 67 ؟ 10 مرات.
(20:22)
الحلقة 128: حوار مع ساكسو بنك منصة تداول عالمية - الجزء الأولالضيف: أ/عمّار معلا هو بيقود المبيعات في ساكسو بنك في مكتب الإمارات
عمر: الأول عايز ابتدى تدينا كده إيه هو بنك ساكسو تاريخة، المهمة بتاعه بتعملوا إيه سريعاً يعني
عمار: بالنسبة لنا مهمة ساكسو في الدرجة الأولى من أول يوم تأسيسه تسهيل الوصول للأسواق المالية لكل المستثمرين بأقل تكلفة وبأعلى جودة ضمن التراخيص وحماية الإيداع الأعلى بالسوق فبشكل عام ساكسو بنك احنا بدأنا بتقديم خدماتنا من 1992، زي ما أنت حكيت من شوية من أيام أتصال الإنترنت بالتليفون وحتى من قبل كان الناس اللي مهتمة تتداول معانا كانت بتحط طلباتها عبر التليفون، يعني يتصلوا على ساكسو بنك عشان يحطوا الطلبات بتاعتهم أنا بدي أشتري السهم كذا الكمية كذا فتاريخ تأسيس ساكسو بيعز عليا كتير لأنه بنفس سنة ميلادي فأنا بشوف اننا بنكبر مع بعض من هذه الناحية من ناحية الكبر بساكسو بنك نحنا بنك دينماركي مرخصين من هيئة الرقابة المالية الدنماركية، مقر البنك بالضرورة الدنمارك، عندنا 14 مكتب حول العالم بما فيهم دولة الإمارات مكان ما احنا موجودين وبنسجل، احنا عندنا أكتر من 2500 موظف بساكسو بنك، طبعاً الرقم ده يعتبر كبير بالنسبة لنمط الخدمات المصرفية اللي احنا بنقدمه احنا عندنا خدمات بنكية استثمارية فعادة هذا العدد بيشوفوه في السوق عدد كبير من الموظفين بس السبب بسيط زي ما حكينا من شوي ان بالنسبة لنا في ساكسو بنك عاوزين نقدم افضل خدمة وأعلى جودة وبالتالي كل شيئ احنا بنعمله داخل البنك، فضمن ساكسو بنك موجود خدمة عملاء، المبيعات، إدارة العلاقات، موجود القسم التقني المسؤول عن تطوير المنصة كل شيئ ساكسو بيعمله هو ضمن ساكسو فبالتالي احنا مش بنعتمد على اي طرف تالت لتقديم أي شيء من خدماتنا إلا الوصول للسوق في بعض الاحيان بس بشكل عام بنقدم كل شيء في ساكسو بنك وبنطور كل شيء داخل المؤسسة
(22:42)
الحلقة 129 حوار مع ساكسو بنك منصة تداول عالمية - الجزء الثانيالضيف: أ/عمّار معلا هو بيقود المبيعات في ساكسو بنك في مكتب الإمارات
عمر: طيب ساكسو بيعمل فلوس ازاي؟ يعني أنت دلوقتي بتقدملي خدمة اني اوصل للاسواق واتداول، بتقدملي خدمة فتح الحساب، تحويل الفلوس ليك، واخدت الفلوس منك تاني انت بتعمل فلوس ازاي كساكسو؟
عمار: أنا بعمل فلوس منك في حالة واحدة اللي هي لما تداول معايا عبر المنصة فقط لا غير، انا مبخدش منك عمله على الإيداع او السحب ومعنديش حاجه اسمها صيانة احنا عندنا بس العمولات على التداول كل العمولات دي مذكورة على الموقع بالتفصيل بس باختصار شديد احنا بناخد عمولات لما تفتح صفقة ولما تقفل صفقة باختصار شديد
(23:23)
الحلقة 133: Trading Errors 404 - الجزء الأولالضيف: أ/ لارا أحمد هي بتقدم حاجة جديدة من موجودة في المنطقة العربية، مقبلتهاش بصراحة قبل كده وهي التدريب على التداول، هي بتحاول تمرن المستثمرين أو المتداولين في الأسواق المالية
عمر: أول حاجه انتي بتعملي ايه بمنتهى البساطة كده؟
لارا: أنا بمرن الناس على اساس انهم ياخدوا قرارات مالية في حياتهم طبعاً على البورصة، بس ازاي يوزع فلوسه، ازاي ياخد اقصى استفادة، ازاي يستثمر، ازاي يكون مستثمر قادر يقول على نفسه مستثمر مش مجرد انه فتح حساب في البورصة يبقى اسمه مستثمر صدق او لا تصدق الشخص ممكن يقعد في البنك 10 سنين وميعملش حاجه وجاره يقعد نفس الـ 10 سنين بس فلوسه بتكبر وفعلاً قادر يواجه التضخم ويعادل سعر الفايدة وقادر انه القيمة بتاعته تبقى أكبر.. فده ينفع وده ينفع هي كلها في العقلية ازاي لو انا مش عايز استثمر خالص ازاى من البنك أخد أقصى استفادة، واحد في البنك ممكن يقعد 10 سنين ميعملش اي حاجه، وواحد ممكن يقعد نفس الـ 10 سنين بس يبقى بيزود فلوس وقادر يستخدم منتجات البنك بطريقة مثلى انها تقدر ترجعله عائد على الاستثمار بحيث انه يستفيد أقصى استفادة في الـ 10 سنين فده ممكن وده ممكن نفس الكلام في البورصة انت بتسمع كتير جداً "يا عم انا قاعد في البورصة بقالي 10 سنين ومعملتش حاجه" معملش حاجه بطريقة معينة نتيجة لأفكار هو تبناها.. في نفس الـ 10 سنين أنت ممكن تحط فلوسك في البورصة وتكبر بشكل كبير، ساعات الرقم ممكن متصدقهوش بس برضه بأفكار تانية فده موجود وده موجود فأيه الأفكار اللي احنا نتبناها وايه الافكار اللي منتبنهاش وبنحط خط كبير جداً بين إيه اللي ينفع يتعمل وهيوصلنا لإيه وإيه اللي ميتعملش لأنه مش هيوصلني لحاجة مهما سبتلهم فلوسي
(25:16)
الحلقة 134: Trading Errors 404 - الجزء الثانيالضيف: أ/ لارا أحمد هي بتقدم حاجة جديدة من موجودة في المنطقة العربية، مقبلتهاش بصراحة قبل كده وهي التدريب على التداول، هي بتحاول تمرن المستثمرين أو المتداولين في الأسواق المالية
عمر: الفشل، واحد فشل او غلط بتشوفي الموضوع ده ازاي؟ هل دايماً بتلومي على الشخص ولا ساعات بتبقى في ظروف خارجه عن الشخص اللي بينفذ؟
لارا: بص البرنامج اصلاً اسمه تدريب على أخطاء التداول فاحنا داخلين نعمل أخطاء انت داخل تتعلم الغلطات بتاعتي لأنك مش محتاج تدخل من الأول وأنا أظن اني غلطت كل الغلطات يعني صعب جداً تقولي الغلطة دي أقولك معملتهاش
عمر: انا غلطت في كل حاجه
لارا: انا عملت كل حاجه غلط، يعني هقولك ايه انت الكلام مكتوب في الكتب فأنت هتعرف الصح من الغلط ازاي غير لما تجرب فأنا جربت بفلوسي وخسرت كتير، فالتجربة فعلاً بتكلف فلوس رهيبة وفعلاً انت مبتتعلمش غير من التجربة لأن الكلام مكتوب في الكتب ومش من مؤلف واحد من أحسن المؤلفين مبيعاً لأن اللي كاتب الكتاب مش لازم يكون حط ايده في السوق
(26:48)
الحلقة 135: Trading Errors 404 - الجزء الثالثالضيف: أ/ لارا أحمد هي بتقدم حاجة جديدة من موجودة في المنطقة العربية، مقبلتهاش بصراحة قبل كده وهي التدريب على التداول، هي بتحاول تمرن المستثمرين أو المتداولين في الأسواق المالية
عمر: في بحث طلع من شركة فيها ملايين من العملاء فيديليتي او شواب او حد كده كان بيعمل تحليل برضه ما بين رجال والستات بأكد على كلامك أنا مقتنع انكم عندكم صَرَامَة عني مثلاً يعني
لارا: بس مفيش أفضلية صدقني هو برضه الستات بتخاف من الأرقام، الرجالة مبتخافش من الأرقام فهي لو فهمت ان دي حاجه متخوفش، ودي حاجه نفسيه على فكرة يعني انا ليا صحاب كتير بنات تقولك انا لما يجي الرقم، يعني النتائج بتاعتهم ممكن تبقى أحسن بكتير بس في حاجز نفسي لازم يتكسر الأول
(26:50)
الحلقة 137: حوار مع محلل فني - الجزء الأول
الضيف: هيثم عبد السميع هيثم من أوائل الناس اللي قابلتها في حياتي في المجال ده
عمر: إيه هو التحليل الفني؟
هيثم: التحليل الفني في تعريفات كتيرة جداً جداً بس انا التعريف ده اكتر تعريف بحب اقوله هو دراسة لسيكولوجية الناس ببساطة، دراسة لنفسية الناس المتعاملين، بص يا عمر انا واصلني استنتاج من الكتب اللي قريتها من فطاحل المجال زي جون ميرفي أو مارتن برينج الناس دي، وصلت لمفهوم انا شايفه شيء منطقي طول ما انت حاطط في مجال البورصة طلب شراء أو بيع انا مش شايفك، لكن بمجرد ما تنفذ انا شوفتك انا عرفتك صح كده ده المنطق، طالما انت حاطت طلب شراء او طلب بيع مفيش طالما نفذت يبقى انت في أكشن اخدته، والأكشن ده مهما كنت دارس ايه ومجهز ايه وحاطط كل احتياطاتك إلا أن في جزء نفسي مأثر عليك انك تقوله، طمع خوف اي حاجه اليوم مودك مكنش كويس، النهاردة مودك حلو جداً فأنت بتشتري بزيادة اياً كان في حاجه نفسيه متأثر بأحداث اجتماعية، احداث اقتصادية، واحد اتصل بيك وقالك خلي بالك في حاجه هتحصل، في سهم هينزل، أرباح هتقل هتزيد، في الاخر بعد ما تكون مجتهد وبتذاكر كل حاجه تخص السهم ده قرارك وقت الشراء أو البيع عبارة عن دراستك + انفعالك يبقى في انفعال في الموضوع في سيكولوجي في الموضوع
(27:59)
الحلقة 138: حوار مع محلل فني - الجزء الثاني
الضيف: هيثم عبد السميع هيثم من أوائل الناس اللي قابلتها في حياتي في المجال ده
قولنا الناس بتستخدم إيه النهاردة عشان يبتدوا يشتغلوا بالتحليل الفني؟
هيثم: بص الدنيا تطورت اوى وفكرة الذكاء الاصطناعي وفكرة أن شركات بتعمل مواقع بتوفر فيها البيانات، بتبقى متأخرة طبعاً مش لايف، لايف دي بيبقى ليها سعر تانى دي الوحيده اللي بيبقى ليها سعر غير كده الاسعار بتبقى متاخره شويه فهم بيستفيدوا بقى من الاعلانات والكلام ده كله قصاد ان انت تخش عندهم تعمل حركة في الموقع عندهم وببلاش تقدر تروح العالم كله
المشهورين حالياً
https://www.investing.com/
https://tradingview.com/
https://www.home.saxo/en-mena
https://www.tickerchart.com/ar/
كل الحاجات دي عالمية بمعنى الكلمة
(28:46)
الحلقة 148: اللقاء الثاني مع ساكسو بنك - الجزء الأولالضيف: أ/عمّار معلا هو بيقود المبيعات في ساكسو بنك في مكتب الإمارات
عمر: التخفيض ده هيفيد مين؟ يعني انتو عاملينه لمين؟
عمار: للمستثمر باختصار شديد، حاليا التريند في السوق متجه للاستثمار يعني لما بتشوف كل الاخبار والتحاليل وتدخل بأحاديث مع الناس الكل مهتم يدخل بسوق الأسهم بشكل عام ويستثمر للمدى الطويل لعدة اسباب بس منطقة الشرق الأوسط بالدرجة الأولى باعتبار ان احنا مقيمين فيها احنا بنشوف ان المستثمرين بيواجهوا كتير من الإشكاليات في التكلفة وأنه ما بيعرف ليه التكلفه غاليه وما بيشوف الأنسب بالنسبة له حتى يجرب، التجربة ممكن تكون مكلفة في كثير أحيان والسبب لما بنبص على المتداول العادي اولا هو عارف شو هي التكاليف المرتبطة بالتداول بس المستثمر مش عارف وبناء عليه احنا بنحاكي المستثمر حتى يستثمر اكثر واسرع بتكلفه اقل يعني فيك تعتبر اننا هدفنا نسهل الوصول للأسواق للمستثمرين بالدرجة الاولى سواء المستثمر ده راح يحط 5000 دولار او راح يحط 10 مليون دولار راح يشوف المكان الأنسب ببنك عمره أكثر من 30 سنه عم يقدم خدمات على مستوى العالم فالمصداقية أعلى الموثوقية أعلى، حماية رأس المال موجوده منصة من الافضل عالميا بالإضافة الى تكاليف منخفضة يعني وضع مربح للجانبين باختصار
(30:26)
الحلقة 149: اللقاء الثاني مع ساكسو بنك - الجزء الثانيالضيف: أ/عمّار معلا هو بيقود المبيعات في ساكسو بنك في مكتب الإمارات
عمر: هل في حاجات تانية بتفيد المتداول اليومي؟
عمار: هلأ احنا بساكسو في المجمل بنقدم التحاليل تبعنا بساكسو اللي بتيجي يومياً بس ما بنكتفي بهاد الشي احنا بنعطي مصادر اخبار التانية من خارج ساسكو من مصادر مختلفة ما راح سميها هلأ بتشوفها بالمنصة كمان لحظية واي خبر بيكون مرتبط بالأداة المالية اللي عم تداول فيها رايح يظهر تحت الأداة المالية يعني لما نروح على المنتج على المنصة هلأ انا وياك بنتشارك شاشة معك ممكن اشرحلك شو قصدي لنفترض عم نتطلع على مايكروسوفت فالاخبار الموجودة على مايكروسوفت هون مباشرة، كل الأخبار المرتبطة بالأداة المالية ممكن يأثر على سعرها للناس المهتمة بأخبار التداول موجودة تحت الأداة المالية
(31:26)
الحلقة 153: Trading Errors 404 - اللقاء الثانيالضيف: أ/ لارا أحمد هي بتقدم حاجة جديدة من موجودة في المنطقة العربية، مقبلتهاش بصراحة قبل كده وهي التدريب على التداول، هي بتحاول تمرن المستثمرين أو المتداولين في الأسواق المالية
عمر: هسألك سؤال مهم هنا بما ان البرنامج متسجل هل ده بيساعد الناس ان هي ترجعلك بأسئلة مختلفة كل واحد وقف في حتة مختلفة وفكر فيها فصحت حته جواه محتاج يقف ويرجع يسمعها تاني ميعرفش فيرجعلك تاني مثلا في الحتة دي بالذات يعني هل ده بيخليه يفلتر؟ الحاجه التانية برضه هل عشان الكورس متسجل فده بيمنع الناس انهم يقاطعوا في الشرح يعني انا بحس لو واحد بيتفرج على حاجه مسجلة بيبقى مركز معاها لو واحد قدامه حد لايف هو ممكن يوقف ويقطع تفكير والكلام ده كله يعني عايزك تجاوبيني على السؤالين دول برضه رأيك فيهم إيه
لارا: سؤال حلو اوي اوي ويمكن ده اللي خلي التسجيل يتأجل معايا كذا مره يعني انا اخدت قرار اني خلاص من خامس مرة لايف اني هسجل لأن كل مرة طلع بنسخة مختلفة والافكار فيها مختلفة عن المرة الاولانية انت عمال تزود في افكار، بتزود نقاط توضيح انه مثلاً كذا كذا، فانا لما جيت اسجل سمعت المحاضرات اخدت كل الملاحظات اللي عاوزة اقوله وبعدين رحت مسجله لما عملت كده الأسئلة من كل وحدة من كل واحد بيسمع مببتقاش واحد في واحد مثلاً في وحدة مثلاً يقف قدامها كتير مش عارف فآه الاسئلة بتبقى مختلفة كل واحد عنده اسئلة مختلفة والتجربة بتبقى شخصية اكتر لان واحد بيخاف اوي من الخسارة مش عايز يعرض جنيه للخسارة وواحد تاني بص انت بتحاول تفرمله مش عارف فده ممكن يطلع منه اسئلة في وحدة معينة وده ممكن يطلع منه اسئلة في وحدة تانية
عمر: بس كلهم واخدين نفس المعلومة المسجلة
لارا: كلهم واخدين نفس المعلومة بس مش هيستقبلوها بنفس الطريقة ومش هتبقى أثرها عليهم واحد هو فعلاً بيعاني من المشكلة دي ولا لأ هيطلعله اسئلة كتير جداً
شكراً جداً على وقتكم معانا النهاردة ويارب تكون الحلقة عجبتكم هستنى استفساراتكم واسئلتكم على صفحتنا على السوشيال ميديا واشوفكم الاسبوع الجاي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #مقتطفات_مالية #ضيوفنا