113. حوار مع مستثمر ملائكي - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بعد لقائنا مع ماري تيريز في الحلقتين 98 و 99 اللي اتكلمنا فيهم عن الشركات الناشئة ورأس المال المخاطر، وصلنا منكم طلب بأننا نتكلم أكتر عن القطاع ده، ملقناش أفضل من ماري تساعدنا نخش أكتر في العالم ده من جميع جوانبه ”مستثمرين ومؤسسات، وأفراد”.. حلقة النهاردة هي أول حلقة من مجموعة حلقات مع ماري تيريز اللي هتشارك شمس استضافة مستثمرين ورواد أعمال ونسمع تجاربهم وقصص نجاحهم في المجال ده
Marie Therese @LinkedIn :تقدروا تتوصلوا مع ماري
أول ضيف معانا النهاردة هو أحمد متولي، مستثمر ملائكي بيساعد الشركات الناشئة وعنده خبرة طويلة في المجال
أحمد حالياً مستشار في مجال المدفوعات الرقمية
:تقدروا تتوصلوا مع أحمد
Ahmed Metwally @LinkedIn
: في الجزء الأول
(02:57) ممكن تحكيلنا ازاي بدأت وصولا الى الاستثمار الملائكي؟ -
(07:44) إيه الدافع اللي خلاك تروح لمنطقة الاستثمار المخاطر؟ -
(10:03) ازاي الموضوع بيتحول من مرحلة العائلة والأصدقاء لمرحلة المستثمرين؟ -
(13:18) لو حد عنده مدخرات بس هو مش رائد أعمال وحابب يدخل في استثمار ملائكي يبتدي ازاي؟ -
(17:33) ازاي بتختار القطاع؟ -
(20:24) هل بتستثمر في قطاعات معينة؟ وهل لما أبتديت الرحلة كنت بتفكر بطريقة والموضوع ده اتغير دلوقتي؟ -
(23:24) لو بتستثمر في قطاع أنت مش خبير فيه، هل بتهتم توضح النقطة دي لرواد الأعمال؟ -
بنتمنى الحلقات تنال إعجابكم ومستنين تبعتولنا آرائكم وأسئلتكم واستنونا الاسبوع الجاي في الجزء التاني من حوار مع مستثمر ملائكي
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهارده اول حلقة من حلقات هنتكلم فيها عن الاستثمار في الشركات الناشئة أو الاستثمار المخاطر، هيبقى معايا ماري تيريز في مجموعة حلقات عملناها، فكرنا ازاي ممكن نجيب ضيوف تساعد الناس انها تسمع التجارب بتاعتهم من خلال ان هم ازاي مستثمرين او واحد رائد اعمال او ناس بتشتغل في المجال ده، ماري عندها خبرة طويلة في المجال ده تقدر ترجعوا تسمعوا الحلقه رقم 98 و99 كانت معانا كضيفة وشاكرة وافقت ان هي تيجي معانا وتساعدنا ان احنا نعمل الحلقات دي
النهارده معايا أول حلقة وأول ضيف في المجموعة دي أحمد متولي هو مستثمر ملائكي عنده خبره طويله في المجال، هو دلوقتي مستشار بيساعد الشركات الناشئة وبيستثمر بشكل مباشر في مجموعة افكار بتجيله
هنسمع حاجات كتير جدا في المجال ازاي الناس بتبتدي رحلتها في المجال عمل ايه؟ وازاي أنشأ المجموعة الخاصة بتاعته؟ ازاي بيجيب الأفكار ويستثمر فيها؟ هل هي صعبة، سهلة؟ القطاعات اللي بيستثمر فيها؟ واسئله تانيه كتير غطناها في الحلقتين اللي جايين فأتمنى الحلقات دي تعجبكم وهستنى ردود أفعالكم على الحلقة وهنسيب في الشو نوت ازاي يتواصلوا مع أحمد لو محتاجين منه اي حاجه
(02:27)
عمر: هاي أحمد ازيك؟ اولا عايز اشكرك جدا على النهارده، والنهارده ماري مشتركة معايا في الاستضافة، ماري بتساعدنا ان احنا برضه نخش أكتر في العالم بتاع الشركات الناشئة ورأس المال المخاطر من جميع جوانبه من ناحية المستثمر من ناحية المؤسسات، الأفراد نفسهم ازاى يستثمروا.. فأول حاجه عايز أرحب بيكم انتو الأتنين
ماري: اهلا بيك يا عمر
أحمد: شكراً ليك يا عمر
ماري: ازيك يا أحمد
أحمد: ازيك يا ماري، أنا كويس الحمدلله
(02:57)
ماري: أحمد أنا وعمر كنا بنتكلم ان احنا النهارده عايزين نتسلط الضوء على موضوع الاستثمار الملائكي فـ فكرنا ان مفيش احسن من مستثمر ملائكي يحكي لنا عن تجربته فاحمد أنت رائد أعمال ومستثمر ملائكي يعني دول حاجتين مهمين عنك، بصرف النظر عن كل الحاجات التانية احنا عايزين نتكلم معاك فيها فبداية ممكن تحكي لنا شويه عن الكارير بتاعك بدأت ازاي هل بدأت مثلا في شغلانه تقليدية في شركة وبعدين قررت تستقل وتبدأ مشروعك لوحدك وصولا الى إيه اللي خلاك تبتدي الاستثمار الملائكي؟
أحمد: طيب اولاً شكرا ليك يا عمر تاني ولماري على الدعوة دي واكيد انا عاوز اشارك كل الدروس المستفادة والنجاح اللي الواحد قدر يوصلله ويتعلم منه فـ زي ما انتي قلتي بالظبط انا بدأت شغل زي اي حد عادي في شركات مختلفة وبلاد مختلفة فده خلاني أفهم البيزنس زي ما بيقولوا من البداية إلى النهاية وبعدين في وقت من الأوقات كان عندي طموح ان انا اعمل حاجه بنفسي فقلت أخد المخاطرة اني اجرب وافتح شركتي وأشوف واللي خلاني اعمل كده في شركة ما، طب ما اعمل كده في شركتي أنا نفسي وبالفعل بدأت أولاً أتعلم ريادة الأعمال كعلم، وافهم ازاي الربح والخسارة بتاعة الشركة وازاي الواحد يدير التدفق النقدي، ازاي يقدر يفهم ازاي يدير الشركة مش بس كوظيفة لو أنا بقدم خدمة ما بس من ناحية إدارة الفريق، إدارة الحسابات، إدارة متطلبات التراخيص مثلاً وهكذا فده خلاني فعلاً اتعلم ده وابدا شركتي
ماري: في الواقع دي نقطه مهمه قوي اللي أنت بتقول عليها الفرق ما بين انك تبقى شغال في الشركة بتؤدي وظيفة معينة وبين ان انت تبقى صاحب الشركة وده تحدي كبير قوي كتير من رواد الأعمال مبيبقوش يمكن مدركينه وقوي أول ما بيبتدوا فدي حاجه مهمه جدا ان انت بتتكلم عن الموضوع ده في الجزئية دي
أحمد: هو فعلا ده الفرق الرئيسي لما الواحد بيعمل حاجة لشركته هو نفسه التعب والسهر والشغف زي ما بيقولوا وكمان الغاية أو الهدف اللي الواحد بيمشي وراه بيكون في اختلاف تام في الهدف بتاع البني ادم فدي من الحاجات اللي بتخلي الواحد فعلا يتعب اتعلم ويغلط يفهم قبل ما يبدا ويجرب ويخبط على بيبان الناس ويشوف ازاي ممكن ياخد تمويل من حد عشان يعرف يبتدي بيلاحظ ازاي إن التدفق النقدي في الشركة هيقضي او مش هيقضي المرتبات هو نفسه ما ياخدش مرتب طبعا اهم حاجه ان الموظفين تاخد المرتبات دي حاجه انا متاكد ان كل الناس اللي عملوا الشركات مروا بيها بس احلى حاجه في الموضوع لما يبتدي يبقى في قصة نجاح ده اللي خلاني
The Datum Company في 2015 ابدأ شركتي
بدأت إن هي بتوفر استشارات للشركات بناءاً على الخبرة بتاعتي أنا في مجال اسمه "التسويق الجغرافي" بتستخدم خرائط رقمية عشان تساعد الشركات فين يستثمروا، فين يوصلوا للعميل المستهدف بتاعهم، فين يقدروا يديروا فريق العمل بتاعهم وبدانا نشتغل فعلا والحمد لله نجحنا وقدرنا نعمل كام مشروع مع شركات مختلفة في مجالات مختلفة
وبعدين بدأ الاحساس بتاع الفكر ان انا عندي شغف آخر محتاج اطلع حاجه ليها دعوه بالتعليم ففكرت انا عايز اعمل تطبيق وسميتها "نولوجي" فلما بدات اعمل حاجه زي دي بدات افهم ازاي ممكن أعين فريق عمل مطورين، وبتاع تطوير لتطبيقات الجوال فلقيت إن الشركة بدأت تخش في مجال تاني وده كان من أول الدروس اللي أنا دخلت فيها لأن أنا بحس إن جزء من نجاح أي رائد أعمال إنه لازم يبقى شايف ازاي الناس اللي حواليه أو الناس اللي هو بيشتغل معاهم هما اللي بينجحوا ولهذا السبب بدأت أعمل شراكة مع حد ودخلت حد معايا في الشركة عشان خاطر نعرف نعمل الحته دي ويكون حد متخصص عشان مفيش حد يعرف فى كل حاجه
(07:44)
عمر: انا هاخد من كلامك حاجه يا احمد انت قلت الدافع انا عايز ارجع كمان ورا لـ 2015 أو قبليها، إيه الدافع بتاعك، يعني إيه اللي خلاك تروح لمنطقة الاستثمار المخاطر هل هو حب؟ يعني انت قولت كلمة شغف.. فعايزك كده تكسرلي حاجتين تلاته هما دول بجد اللي خلوك تروح هنا
أحمد: حلو سؤال في محله بالظبط، وهضيف عليهم كلمة تالتة اللي هي الإلهام لأن قبل ما يكون في دافع وشغف في حاجه تخلي البني ادم عنده طموح انه يعمل حاجه مختلفه فطبعا من أمثلة للناس الناجحة - بعاد قوي بس يعني حد زي إيلون ماسك مثلاً ده كان من المحفزات يعني كنت قريت كتاب عن سيرته الشخصية وازاي هو راح وفتح وعمل شركة وشركتين وتالته وربع وباع باي بال فلما بتلاحظ إن في حد قادر انه يعمل حاجه ده بيخليك عندك الهام طب انا كمان عاوز اعمل حاجه
قبل ما اخش في مجال الشركات الناشئة واتعلم اصلا يعني ايه استثمار مخاطر ازاي اجيب تمويل ولا اي حاجه ليه بسكت مجرد فكره عايز اعملها وعاده في عالم الشركات ورواد الأعمال اول مرحله اللي بيسموها العائلة والاصدقاء اللي هو بتبتدي تاخد من الأصدقاء والعائلات اللي هما قريبين ليك اللي بيثقوا فيك بيدولك مبلغ ويقول لك ده مخاطره هتاخدها وهتجرب ازاي ممكن تنجح ولا لا والطريقه دي هي اللي خلتني ابدا بيها ان انا يبقى معايا تمويل من العائلة والأصدقاء وبدأنا نشتغل وبدأنا نجرب نتعلم ونغلط
وده اللي بيخلي حته الغاية لأن برضه الناس بتختلف في ناس بتبقى بتجري ورا فلوس على سبيل المثال بس هو في الاخر لو الهدف بتاعك مربوط بحاجة ليها دعوة بالطموح وبالشغف في معظم الحالات دايماً هتنجح، لأن أنت عندك دافع بيخليك تجري ورا حاجه انت مصدقها وعشان كده أنا بدأت في حاجه انا فعلاً مؤمن بيها وعارف اني بعرف أعملها وهو التسويق الجغرافي وكنت قريب بعملها كتير في شركات أخرى يعني
(10:03)
عمر: هايل حلو جداً، انت لما ابتديت زي ما قلت كده مع اصحابك مع الناس ازاي بقى الموضوع بيتحول من المرحلة دي للمرحلة اللي بعديها يعني إيه العلامات اللي بتشوفها بتقول خلاص أنا خلصت العائلة والأصدقاء ودلوقتي هتجه للمستثمرين.. يعني ازاي؟
أحمد: كويس طبعا رجوع للسؤال الاولاني خالص احنا قلنا ان انا بدأت كرائد أعمال في الحته دي بالرغم من انى لسه مكنتش عارف يعني ايه مستثمر ملائكي، لسه مش عارف يعني ايه رأس مال مخاطر او مستثمر ملائكي كنت بدأت بالعائلة والأصدقاء ولما بتبتدي تشتغل كرائد أعمال بتبتدي تشوف ناس تانيه زيك بيفتحوا شركاتهم عشان تتعلم منهم وتاخد الهام منهم، وبدأت أشوف أن مجموعة معينة من الناس اللي هما المستثمرين الملائكة اللي بيستثمروا في شركات بناءاً على نوع من العناية الواجبة، يعني مراجعة وتشوف وتتأكد إن الشركة دي شغالة كويس ولا لأ وبناء على ده ممكن يستثمروا في حاجه بمقابل نسبة، أو رأس مال أو أسهم في الشركة
فبدأت أتعرف على مستثمرين ملائكة تانين والناس اللي فعلاً عاوزين يستثمروا رأس مال زيادة لان ردا على سؤالك المرحله اللي بعدها هي ليها علاقه الحجم أو التوسع بمجرد ان انت بدأت في مرحلة النمو والتوسع مينفعش ان المبيعات اللي انت بتدخلها من البيزنس؛ لأن أي بيزنس في الدنيا لازم تكون مربحة في الأخر فبمجرد إن أنت بدأت توصل لنقطة التعادل، وناس كتير مبتوصلش حتى لنقطة التعادل في الأول حتى عشان تقدر توصل للتعادل وتغطي التكاليف بتاعتك لازم يبقى عندك قابلية للتوسع عشان الربح اللي داخل يغطي الحد الأدنى بتاع الشركة بتاعتك
ده اللي خلاني أتوجه إن حد تاني يدخل معايا كمستثمر رئيسي ويحط رأس مال معين في الشركة وبالمقابل ياخد أسهم معايا وبناءاً على ده بدأت أنا أشوف إن في ناس كتير زيي بالظبط بيبداوا رحلة ريادة الأعمال بتاعتهم وعايزين كلمه اكتر بيفهموا اكتر من قصص نجاح فبدأت انا اعمل زي نوع من التوجيه لرواد الأعمال وده اللي بدأ يدخلني في الاستثمار الملائكي من مجرد ما بتبدأ توجه حد بناءاً على خبرتك ابتدي تفهم البيزنس بتاع الشخص ده او التيم ده اللي بيشتغل في ممكن تلاقي فرصه قدامك طيب ليه لأ زي ما انت حد عمل معاك كمستثمر ملائكي ودخل معاك كبرك وكبر شركتك توسيع ليه انت كمان متحطش جزء من أسهمك في حاجه متنوعة لأن جزء من الاستثمار هو التنوع في ناس بتحب تستثمر في أصول وفي ناس بتحب تستثمر في مشاريع في النهاية أهم حاجه في الموضوع إن أنت تعمل تنوع عشان توزع لرأس المال وطبعاً اسوأ استثمار زي ما بيقولوا هو الكاش، انت ممكن تسيب جزء صغير من الكاش معاك للسيولة بس الباقي كله لازم تحطه في استثمارات متنوعة وده اللي خلاني أبتدي المجال ده وأخش في حتة الاستثمار الملائكي
(13:18)
ماري: بس يعني انت قلت احمد ان انت بدأت الأول بتوجه رواد أعمال تانيين ومن هنا الناس اللي ارتحت للي هما بيعملوه بدأت تفكر ان انت ممكن تستثمر معاهم وده فعلا طريق ناس كتيره بتاخده، هو عايز الأول يبقى مرتاح مع الفريق ومقتنع باللي هما بيعملوه وبعدين ممكن يفكر يدخل وانت اصلاً رائد أعمال ومريت بالعملية دي قبلها بس لو احنا بنتكلم على حد عمره ما عمل استثمار ملائكي وهو اصلا مش رائد أعمال، حد عنده مدخرات وحابب ان هو يدخل في القصه دي فالسؤال هنا يبتدي ازاي؟ يعني انت حتى نفسك وصلت لمجموعة الرواد الأعمال المختلفين دول ازاي اللي انت بدأت توجههم وبعد كده قررت تستثمر معاهم.. ازاي نوصل للمجموعات دي هل مثلاً دورت على ناس بتعمل حاجه في نفس المجال بتاعك عشان انت فاهمه فتقدر تساعدهم ولا مش بالضرورة ده كده أي مجموعة عمل محتاجه دعم في حته معينه انت ممكن متكونش خبير في الصناعة اللي هما بيعملوها ولكن مثلا محتاجين دعم في التسويق، في النمو، في المالية يعني مش بالضرورة أن هم في نفس المجال بتاعك انت الحته دي بقى عملت فيها ايه؟
أحمد: حلو، طبعاً بالنسبالي وبالنسبة لأي حد تاني في كذا طريق عشان تبدأ حاجه زي دي.. حاجه منهم زي ما انتي قولتي بالظبط يا ماري حاجه أنا عارفها وعندي خبرة فيها فحد جايلي بفكرة جديدة، بشركة ناشئة جديدة، منتج جديد، خدمة جديدة عايز يطلقها في السوق ودي حاجة أنا بالفعل عندي خبرة فيها فيها وفاهمها كويس جداً فلما اشوف الفكرة بتاعته وأشوف النموذج بتاعته اللي طالعين بيها ساعتها هيبقى عندي إلى حد ما ثقة أكتر إننا أقول فعلاً الفكرة دي ممكن تنجح لأننا شوفت في خبرتي أنا في حاجات تانية ممكن يكونوا عملوا حاجة مختلفة والناس دي بيعملوا نفس الحاجه بس بطريقة أحسن أو بطريقة جديدة فهبدأ معاه الرحلة واخد معاه السكة دي.. ده جزء من الطريق اللي ممكن الواحد ياخده
في طريق تاني برضه إن يكون في مجموعات بتوفر زي استشارات وبتكون زي شبكة معينة ودول بيبقوا فعلاً شركات هما بيجمعوا كذا مستثمر وهما بدورهم بيعملوا Cairo angels الدور بتاع المراجعة الكاملة على الشركات والأفكار والكلام ده كله ودي كانت الحاجة اللي أنا بدأت فيها شخصياً كنت ساعتها بدأت مع شبكة أسمها
مجموعة هنا في مصر كانوا بيبصوا على الشركات الناشئة وأفكار بيجولهم هما اللي بيعملوا عليهم الفلترة بناءاً على الجوانب المالية، بناءاً على لو في حد من مجموعة المستثمرين هما نفسهم خبراء في المجال ده سواء مجال تعليم، سواء مجال طاقة، سواء مجال خدمات فبالتالي برضه بياخدوا آراء الناس اللي موجودة وبيجوا الشركة دي يعملوا زي بريزنتيشن يعرضوا الفكرة على الناس وبعد ما يعرضوا الفكرة على الناس بيجمعوا المستثمرين كلهم مع الإدارة بتاعة الشركة دي وبياخدوا قرار هل احنا نخش في المرحلة التانية ونبتدي نعمل مراجعة على الشركة دي ونبتدي نشوف هل هي فعلاً ممكن تنجح ولا لأ وبالتالي ده اللي احنا عملناه مع شركات كتيرة ودخلنا في استثمارات كتيرة ودايماً في الاستثمار بيكون في أفكار مختلفة، حد عايز يتخارج، فبتشوف إن في فرص أنه هيرجعلك كعائد إن حد مثلاً هيكبر الشركة لدرجة إنه ممكن مثلاً تتباع لشركة أكبر في المجال بتاعه أو انها تكبر وتتوسع فتبدأ الأرباح بتاعتها تغطي وترجع العائد وطبعاً العقد اللي بيطلع للمستثمر بيكون باسم الشركة وجوه المستثمرين اللي عملوا الاستثمار كل واحد بالمبلغ اللي عمل عليه الاستثمار بيكون داخل فيها فده كان اللي دخلني أكتر في مجال الاستثمار الملائكي بدأت أشوف شبكة MENA angels و Alex angels و flat6labs وكذا شبكة في
(17:33)
عمر: هاخد منك حاجه هنا، النهاردة انت كمستثمر بقى وبسأل السؤال ده من الناحيتين أنت كمستثمر لما هتفكر فيها، ولو واحد بيسمعنا بيعمل مشروع هيبقى برضه في دماغه نفس السؤال لما أنت بتيجي تختار أنا عارف ان القطاع من أهم المحددات اللي انت بتبص عليها كمستثمر، عايزك تكلمني ازاي بتختار القطاع؟ لو حد عنده فكره هل يحاول يطورها ويحاول فكرته دي تبقى جوه القطاع ده عشان المستثمرين يقدروا يجولوه أسهل! يعني كلمني على عامل بتاع القطاع لأن انا مثلاً في المجال العام أكتر في الأسهم، القطاعات هي جزء كبير جداً من فكرة الاستثمار بتاعتنا بس أنا حاسس إن في الاستثمار المخاطر ممكن الموضوع يبقى أكبر شوية
أحمد: حلو، طبعاً القطاعات بتختلف من مستثمر لمستثمر في ناس بتختار القطاع مبني على كل التقارير اللي بتقول على الاستثمارات اللي بتحصل بتوري إن الناس بدأت تستثمر في قطاع معين زي مثلاً الفنتك دي كانت حاجه من الحاجات اللي هي مثلاً الناس كلها بتتكلم عليه كتير جداً لأن هو فيه عائد كبير وفيه تفكير كتير في حتة دي فممكن حد ميكونش عنده خبرة في القطاع ده بس شايف إن ده تريند والناس كلها بتتكلم عليه فدي واحده من الإستراتيجي اللي ممكن أختار القطاع
حاجة تانية ممكن يكون في قطاع ممكن ميكونش عندي خبرة فيها وبرضه ممكن متكونش جزء من التريند الموجودة أو من الحاجات المعترف بيها حالياً بس تكون ليها علاقة رجوعاً للسؤال الأولاني الهدف بتاع البني آدم يعني على سبيل المثال أنا زي ما قولتلك في الأول أنا كنت حابب اعمل حاجه في التعليم إن أنا كنت عايز أطور الناس وده اللي خلاني أبدأ المشروع بتاع (نولوجي) كمنصة تعليمية فبرضه ممكن القطاع تختاره بناءاً على حاجه أنت حاببها ممكن ميكونش عندك خبرة خالص أنت متعرفش أي حاجة عن التعليم، متعرفش ازاي تدير إدارة زي دي فبتبقى عايز تدور على أحسن فكرة تساعد القطاع ده فممكن تخش عليه
وطبعاً أخر حاجه ممكن تكون القطاعات الآمنة اللي أنا عارف إني فاهمها كويس وعايز أخش فيها أو قطاع مدعوم من الحكومة أو الدولة أو الحاجات زي ما بنتكلم على الطاقة، وإعادة التدوير والكلام ده، والحاجات اللي ليها علاقة بالطاقة فدي برضه من الحاجات اللي ممكن تبص عليها
فهما 4 محاور مختلفة مبني على الاختيار القطاع ومبني على الشخص والمسار اللي هو بيدور عليه، أو عايز يتنوع في كل حاجه يبص على التريند، يبص على حاجه مدعومة من الحكومة، يبص على حاجه ليها دعوة بالشغف بتاعه او يبص على حاجة ليها دعوة بالخبرة بتاعتة والمجال اللي هو عارفه كويس
(20:24)
عمر: طيب هل أنت بتستثمر في قطاعات معينة؟ يعني أنا برضه عايز أقرب أكتر عليك هل أنت بتستثمر في قطاعات معينة؟ وهل أنت لما أبتديت الرحلة بتاعتك كنت بتفكر بطريقة والموضوع ده أتغير دلوقتي؟
أحمد: سؤال في محله، أنا لما بدأت الطريق بتاعي بدأت استثمر في الحاجات اللي أنا عارفها كويس، يعني أنا مثلاً أشتغلت كتير جداً في مجال السلع الاستهلاكية سريعة التداول فأنا فاهم التوزيع كويس، فاهم ازاي تشوف اللي بيحصل على الأرض من ناحية المناديب ومن ناحية التبطيل ومن ناحية إدارة الأسطول كإدارة المنتجات على نقاط البيع الموجودة فاخترت الحاجات اللي أنا فاهمهم كويس وبدأت أراجع معاهم ونجحت في حاجات وفشلت في حاجات يعني دي كانت البداية بتاعتي إننا بدأت أمشي كده
أول ما بدأت استثمر أنت مش بتشوف عائد من الأول خالص أنت بتشوف العائد لما يحصل قدام إعادة الرسملة أو تخارج، بس لما بدأت أحس إننا مرتاح أكتر وعايز اخش في مجال جديد بدأت أبص على قطاع تاني اللي هو مبني على قطاع مبني على شعبية زي ما بيقولوا فأخترت مجال أنا معرفش عنه حاجه خالص فاخترت قطاع صناعة الألعاب لأن ده تريند موجود وحجمه كبير فاخترت إني استثمر في قطاع صناعة الألعاب فدخلت برضه في حاجه زي دي
وبعدين لما اتعلمت مثلاً من غلطات حصلت معايا فقولت خلاص أنا هبتدي أبص على الحاجات اللي أنا عارفها كويس لأن ده بيساعدني إن أنا أكمل لأن مثلاً حاجه زي قطاع الألعاب أنا مكنتش عارف هل ده كويس ولا وحش ولا ماشي لأن انا كصاحب شركة كل ما بتيجي للمستثمر بتديله مراجعة بتقوله أدي الأداء بتاعنا فلما ألاقي رائد الأعمال راجع يطلب مثلاً ان الاداء مش ماشي كويس وعايز يرفع رأس المال أنا مش عارف اساعده ازاي لأننا معنديش خبرة في المجال اللي هو أختاره فده برضه خلاني أفكر بعد كده في الاستثمارات اللي أخدتها بعد كده اننا بقيت أدور بس على حاجه أنا واعي بيها
عمر: هايل، معلش أنا روحت في الحتة دي لسبب إن في نهاية الأمر المستثمر ده إنسان وبيتلخبط وبيبقى عارف ساعات حاجات بتبقى واضحة وساعات الحاجات بتتغير وساعات بيغلط وأعتقد مجال الاستثمار المخاطر كمان بيثبت للناس قد إيه ممكن يبقى في غلطات وعادي الحياة بتكمل بعد كده
أحمد: صح
عمر: يعني أنتو الأتنين طبعاً أدرى بكتير يا ماري أكيد شوفتي نفس الامثلة دي كتير، أنا بس عايز أوضح للناس ان احنا بني ادمين كلنا؛ لأن الناس بتبقى متخيله ان المؤسسات دول مش بني ادمين واكيد هو فاهم واكيد هو مستثمر لا هي الحقيقة أبسط من كده اعتقد يعني
أحمد: طبعاً طبعاً، لا أنا عجبني اللي أنت قولته يا عمر
(23:24)
ماري: طيب عايزين ندخل على حتة تانية أعتقد إنها تضاف لحتة الشفافية احنا دايماً بنقول لرواد الأعمال لما تروح تتكلم مع مستثمر وتعمل بحث عن المستثمرين اللي انت عايز تروح تتكلم معاهم شوف مين هيضيف لك حاجات في البيزنس بتاعك غير الفلوس صح؟ يعني دي حاجه دايماً مهمه إنهم يدوروا عليها في مين عنده علاقات، مين ممكن يفتحلك أبواب، مين استثمر في حاجه مشابهه في سوق تاني فممكن يفيدك ويفتحلك سوق تاني وهكذا.. فأنت قولت انك استثمرت في حاجات كمستثمر ملائكي مش بالضرورة أنت خبير فيها فهل حسيت مثلاً انه ساعتها هتقولهم يا جماعة أنا هبقى مستثمر صامت، أنا مش بالضرورة هساعدكم اوى فأنا هبقى مستثمر صامت، أو لو بتستثمر في حاجه هتقدر تضيف بيها قيمة والله يا جماعة أنا هقدر أعمل معاكوا.. يعني هل اهتميت إنك توضح النقطة دي بالذات في الحاجات اللي أنت مش بالضرورة في مجال أنت عارفه؟
أحمد: الحقيقة لأ خالص أظن إن الناس كلها بتبقى فاهمة المخاطرة وفاهمة ممكن يكون حد فعلاً عايز ينوع زي ما بنقول انه عايز يقسم استثماراته على حاجات مختلفة فشايف إن عالم الاستثمار المخاطر وعالم التمويل وعالم الاستثمار إنه بدأ بنسمع أرقام طبعاً التقييمات طالعة وناس عملت عوائد كبيرة جداً في الاستثمارات بتاعتهم فعايز يجرب، هو مش فاهم وعايز يجرب بس ساعات بيتعلموا درس بينجحوا يعني هي مفيهاش صح وغلط، اعتقد إن الحاجات الرئيسية اللي الواحد لازم يبص عليها والكلام ده بقوله من ناحية المستثمر ورائد الأعمال في نفس الوقت هو الموضوع مش بس الفكرة والقطاع ممكن يبقى عندك أحسن فكرة وأحسن قطاع والقطاع ده مدعوم والقطاع ده متمول من الحكومة أو كل شركات الاستثمار المخاطر بتحط فيه تمويل، والفكرة دي هتحل مشكلة ما ونموذج العمل معمول بطريقة ما والخطة معمولة بطريقة صح
في وجهة نظري البسيطة أنا شايف إن اللي بيفرق في كل المعادلة دي هو فريق العمل نفسه ودي حاجه انا شوفتها بنفسي ناس نجحت عشان فريق العمل جماعي وفي ناس فشلت عشان كانوا بيشتغلوا فردي، وأنا أتعلمت بالطريقة الصعبة زي ما بيقولوا بالرغم من المثال بتاع "العرض الفردي" ده أنا كنت خبير جداً في الحتة دي ومش بس كنت خبير ده أنا زودت حجم الاستثمار ولكن بسبب إن رائد الأعمال مكنش متناسق مع الفريق اللي معاه ومكنش باصص من ناحية النمو لأن أيد واحدة مبتصقفش زي ما بيقولوا محد يقدر يعمل كل حاجه لوحده، وده اللي قولته في الأول خالص لما أنا أخترت أخش مجال التعليم، أو في مجال التطوير التكنولوجي روحت دورت على حد ثقة وأقدر أشتغل معاه عشان يجي يشاركني في النجاح ده لأن احنا في الاخر رجوعاً لرائد الأعمال عايز يوصل لإيه؟ عايز يوصل لنجاح ولا عايز يوصل إنه يبيع فيتخارج فيعمل فلوس؟ فدي حاجه من الحاجات اللي دايماً بنصح بيها رواد الأعمال اللي عندهم أفكار وبيدوروا على مستثمرين دايماً حطوا في دماغكوا أو حطوا في أفكاركوا إن انتو كفريق قبل ما تقابلوا حد أنتو كفريق لازم تبقوا كلكم صف واحد، باصين على نفس الاتجاه، عندكم نفس الأسباب، شايفين نفس قصة النجاح، بتدوروا على نفس الحاجه مفيش أي تعارض مصالح بينكم، ومفيش أي عدم تناسق في طريقة العمل قبل ما تتكلموا مع أي مستثمر؛ لأن المستثمرين معظم الوقت بيبصوا على الفريق قبل أي حاجه يعني ممكن ناس تاخد تمويل كبير جداً بالرغم من إن البيزنس ده معرض للخطر وممكن فعلاً ميجلهاش العائد بتاعها بس شايفين الشغف وناس متلاصقة مع بعض في الفكر وفي الإتجاة فتقدر تختار ناس فعلاً هيقدروا ينجحوا دي بس النصيحة اللي أنا دايماً هقولها دايماً للناس اللي عايزة تشتغل مع بعض وتعمل بيزنس لازم تختار الناس اللي انت عايز تحاوط نفسك بيهم يعني زي ما بيقولوا
عمر: وبكده نكون وصلنا لنهاية الجزء الأول من حلقة أحمد، أنا عن نفسي اتبسطت جدا واتعلمت كتير وان شاء الله نكمل باقي رحلته في الحلقة اللي جاية
Translation of some words and terms:
Venture Capital رأس المال المخاطر
Angel Investor مستثمر ملائكي
Consultant مستشار
Directly بشكل مباشر
Source مصدر
Co-Host مضيف مشارك
Experience تجربة/ خبرة
Traditional تقليدية
End To End من البداية إلى النهاية
Entrepreneurship Science علم ريادة الأعمال
P&L = Profit And Loss الربح والخسارة
Cashflow Manage إدارة التدفق النقدي
Function وظيفة
And So On وهكذا
Passion شغف
Purpose غاية/هدف
Consultancy إستشارات
Geomarketing التسويق الجغرافي
Target Customer العميل المستهدف
Education التعليم
Application تطبيق
Developers مطورين
Mobile App Development تطوير تطبيقات الجوال
Specialized متخصص
Inspiration الإلهام
Triggers محفزات
Biography سيرة شخصية
Fund تمويل
No Matter What مهما حدث
Believe صدق
Phase مرحلة
Despite بالرغم من
Due Diligence الحرص الواجب
Share نسبة
Equity سهم
Capital رأس مال
Scaling التوسع
Revenue ربح
Break Even نقطة التعادل
Scalability قابلية التوسع
Bottom Line الحد الأدنى
Major Investor مستثمر رئيسي
Mentoring التوجيه
Diversification تنويع
Liquidity سيولة
Pockets جيوب
Saving مدخرات
Support دعم
Marketing تسويق
Growth نمو
Finance مالية
Familier مألوفة
Startup شركة ناشئة
Model نموذج
Filtration الفلترة
Financial Aspects الجوانب المالية
Network شبكة
Sector القطاع
Factor عامل
Educational Platform منصة تعليمية
Energy الطاقة
Recycling إعادة التدوير
Path مسار
Diversified منوع
Zoom In نغوص في
Fmcgs = Fast Moving Consumer Goods السلع الاستهلاكية سريعة التداول
Distribution التوزيع
Fleet أسطول
Recapitalring إعادة الرسملة
Exiting تخارج/خروج
Popularity شعبية
Gaming Sector قطاع الألعاب
Challenge اتحدى
Performance الأداء
Raise يرفع
Aware واعي
Deal Breakers كسر الصفقات
Silent Investor مستثمر صامت
Valuations التقييمات
Returns عوائد
Business Model نموذج العمل
Equation معادلة
One Man Show عرض فردي
The Hard Way بالطريقة الصعبة
Despite بالرغم من
Align صف واحد
Conflict Of Interests تعارض مصالح
Very Risky معرض للخطر
Direction الإتجاة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #المستثمر_الملائكي #الجزء_الأول