120. أول صندوق مصري للاستثمار في الذهب (مع ثاندر) - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
معانا النهاردة ضيفنا اللي منورنا للمرة التانية في كلام ينور، أحمد حمودة الشريك المؤسس لمنصة ثاندر (أول منصة مصرية للاستثمار الإلكتروني) بنتكلم مع أحمد على مدار حلقتين عن أول صندوق مصري صندوق أزيموت ذهب، متوافق مع الشريعة الإسلامية بيستثمر في الذهب
Ahmed Hammouda @LinkedIn :تقدروا تتواصلوا مع أحمد من هنا
Ep57 Ep58 :تقدروا تسمعوا لقائنا السابق مع ثاندر من هنا
: في الجزء الأول
(01:54) إيه الجديد اللي حصل مع ثاندر من وقت ما اتكلمنا الحلقة اللي فاتت؟
(04:40) هل كنت متوقع انكم تحققوا الأرقام دي في السنة التالتة؟
(08:04) إيه المنتجات الجديدة اللي بيقدمها ثاندر؟
(09:33) هل ثاندر كان ليهم دور في إصدار صندوق الذهب؟
(13:24) هل الصندوق بيكون فيه نوع واحد من الذهب؟
(15:51) لو حصل مشكلة هل أقدر كمستثمر أروح للهيئة أعمل بلاغ أو شكوى؟
(18:38) 25% من المستثمرين اشتركوا في الإكتتاب عن طريق ثاندر، كنت متوقع أكتر ولا أقل؟
(19:44) هل شايف قطاع معين من المستثمرين لازم يستثمر في الذهب؟
(20:19) من خلال خبرتك كأحمد تنصح بنسبة كام من محفظتك تبقى ذهب؟
(21:34) هل الصندوق ده مبني على نفس المعايير العالمية؟
(23:36) هل لما بتداول الصندوق ده من خلال ثاندر بدفع عمولة ولا لأ؟
استنونا الاسبوع الجاي في الجزء الثاني من لقائنا مع أحمد حمودة هنكمل حديثنا عن ثاندر وصندوق أزيموت ذهب
https://thndr.app/eg/ : حمل تطبيق ثاندر من هنا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكم في حلقة جديدة من بودكاست كلام ينور
عمر: النهارده انا معايا للمرة التانية أحمد حمودة الرئيس التنفيذي لثاندر، بشكره جداً اولاً على وقته معانا النهارده أنه أدانا من وقته وكانت حلقة كويسة جداً من أكتر الحلقات اللي كان فيها تفاعل السنه اللي فاتت فحبيت انك تيجي معانا مره تانيه اولا برحب بيك ازيك يا احمد
أحمد: عمر شكرا جدا كميه ناس بشوفها بيقولوا لي احنا عرفنا عن ثاندر من بودكاست كلام ينور فبالعكس شكرا جدا انك اديتنا الفرصة دي السنه اللي فاتت وشكرا جدا ان انت بتدينا ايه الفرصه دي تاني
عمر: ميرسي جدا يا احمد انا هدفي من البودكاست احنا نحاول نوصل للناس ازاي يبتدوا انتوا دوركم مهم جدا بتغيروا بتعملوا انفتاح كبير في القطاع، وأنا متابعكم دايماً من خلال الأخبار اللي بتنزل على ثاندر وانا برضه موجود على تطبيق ثاندر فكل شويه بشوف التغيرات اللي بتحصل فاللي انتو بتعملوه فيه رسالة مهمة جداً للناس
(01:54)
وعايز ابتدي معاك الحلقة دي بإيه اللي حصل من ساعة ما اتكلمنا الحلقة اللي فاتت إيه التغيرات ازاي كبرتوا، قريت عنكوا في عناوين السنة اللي فاتت انت انتو تقريبا 85% من الناس اللي فتحت حسابات السنة اللي فاتت كانت مع ثاندر لو انا فاكر الرقم صح، فكلمنا كده من جوه المطبخ من جوه الشركة إيه اللي بيحصل؟
أحمد: خليني قبل ما اقولك على ارقامنا برده احب افكر الناس احنا بنعمل ايه هو احنا بنحاول ان احنا نساعد الناس انها تشغل فلوسها وأنها تستثمر وبنحاول نشيل اي عوائق ممكن توقفهم انهم يعملوا كده، فممكن تفتح حساب من بيتك من اي مكان مش محتاج تنزل من بيتك ويكون عندك اي سابق معرفة بمنتهى السهولة من موبايلك تفتح حساب، عايز تستثمر في شركات، عايز تستثمر بنفسك، عايز عن طريق خبير، عايز تستثمر في أذون الخزانة، عاوز تستثمر في الدهب كل ده ينفع تعمله من خلال تطبيق موبايلك ومرخص من الهيئة العامة للرقابة المالية أنها تتيح لك الخدمه دي
من ساعه ما اتكلمنا اعتقد دلوقتى عندنا اكتر من 2 مليون على التطبيق، في 500 الف واحد بيستخدموا التطبيق بشكل شهري وده لو بيدل على حاجه يدل على قد ايه الناس دلوقتي نفسها وكل حد بيحاول ان هو يحسن من مصادر دخله
احنا بقينا المنصة رقم 1 من حيث عدد التعاملات احنا كده منه نوفمبر اللي فات واحنا المنصة رقم 2 من حيث قيمة التعاملات من الشهر اللي فات
زي ما انت قلت اغلب المستثمرين على ثاندر اول مره يستثمروا كان عن طريق ثاندر، 86% من اللي إتكودوا في البورصة السنه اللي فاتت جم عن طريق ثاندر، اللي احنا بنبقى مبسوطين بيه جدا ان 60% من مستثمرين بتوعنا من بره القاهره واسكندريه فالناس اللي مكانش عندهم أي إتاحة انهم يروحوا لأي فرع دلوقتي من على موبايلهم بيعرفوا يفتحوا حساب وبيعرفوا يكونوا ملاك ومستثمرين في أكبر الشركات اللي موجوده دلوقتي احنا كشركة بقينا موجودين في 3 بلاد مصر البلد الأم بنقدم الرخصة في السعودية وبنقدم على الرخصة في الإمارات والفريق بقى أكتر من 200 واحد
عمر: الفريق بقى أكتر من 200 واحد، أنا فاكر الحلقة اللي فاتت لو انا فاكر صح كنتوا 70 أو حاجه وسبعين فده نمو رائع في الفريق يعني ان انت اصلاً بتوفر فرص عمل في مجال زي ده أعتقد بتربي جيل جديد من الناس فدي بجد حاجات من اللي أنا بحبها لأننا بشتغل في نفس المجال فبنسبالي أن يبقى في توظيف وتوفير فرص عمل كويسة دي حاجه رائعة، والأرقام هايلة
(04:40)
هسألك قبل ما نكمل هل الأرقام دي يوم ما كنت بتفتح كنت متخيل انك تبقى موجود النهاردة في السنة التالتة لثاندر اعتقد
أحمد: آه احنا بدأنا في أغسطس 2020 فدي السنة التالتة
عمر: هل انت كنت متوقع انكم تحققوا الأرقام دي في السنة التالتة؟
أحمد: أبقى بضحك عليك لو قولت إني آه كنت متوقع اننا احقق الأرقام دي، اللي عارفة واحنا بنبدأ ثاندر سواء أنا أو سيف أو الفريق المؤسس من الأول كان عندنا إيمان كبير جداً ان دي خدمة هتساعد ناس وإن دي خدمة الناس محتاجاها وان اي حد المفروض يكون من حقه انه يستثمر وأي حد المفروض يكون من حقه انه يكبر من صافي ثروته
ابقى كداب لو قولتلك اننا كان عندنا فعلاً نوصل لهذه الأرقام أو كنا متخيلينها بس كان دايماً بنراهن يعني دايماً كان بيتقال ان الشعب ده مش جاهز انه يتعلم يعني ايه استثمار، ده مختلف عن الناس اللي كنا دايماً واثقين فيه ادي للناس بس فرصة، أديهم طريقة سهلة انهم يتعلموا الناس دي هتفاجئك بقد إيه هما وانا شوفتها حتى في أوبر قبل ثاندر قد إيه الشعب ده والجيل ده عنده من القدرة انه يدور على فرص جديدة ويحسن من حياته ويتعلم حاجات جديدة ويزود من دخله وده اللي شوفناه بصراحة في ثاندر
عمر: أنا ليه بسأل السؤال ده لأن دايماً اي شركة ناشئة من خلال حتى الحلقات اللي فاتت كنت بتكلم مع ناس الارقام اللي بيحطوها في التنبؤات الأولى بتاعهم عالية جدا الناس بتبقى دايما متفائلة انها هتعمل ارقام كبيرة والكلام ده كله فكون ان انت بتقول انا مكنتش متوقع ده معناه كمان ان انت ما شاء الله تجاوزت توقعاتك فاعتقد دي حاجه كويسه يعني
أحمد: عمر احنا من اول يوم واحنا عارفين ان احنا بنغير الثقافه يعني احنا محدش علمنا ازاي نستثمر واحنا صغيرين محدش علمنا ازاى ندير أموالنا بنصرف من غير ما نكون بنحسبها اوي وبالعكس الناس اللي بتحسبها وبتحوش بنقولك خلي بالك منه
لما تكون بتغير ثقافة عامة بتبقى عارف انها هتاخد وقت مننا بس هي بعد ما بتاخد مننا وقت لو فعلا غيرت اللي انت ممكن تحققه كبير جدا وده كان دايما في دماغنا من اول يوم
الرقم اللي كان قدامي في دماغي واعتقد اتكلمنا عليه المره اللي فاتت 0.5% من المصريين أو 2% من العائلات في مصر بيستثمرها 50% من العائلات في امريكا الرقم ده مش بس رقم بس لما تيجي تبص على مر التاريخ هتلاقي إن اكتر وسيلة تبني بيها ثروة على المدى الطويل هو الاستثمار في الشركات
فلما أجي أقولك إن أكتر من 98% من العائلات في مصر محرومين من هذه الفرصة وفي 50% من العائلات في أمريكا يبقى تعرف اننا بس نبدأ نشتغل كل يوم ونحسن من اللي احنا بنحاول نعمله وإن شاء الله الأرقام هتيجي بعد كده
عمر: وانت النهاردة وصلت لـ 0.5% من المصريين في المية فعلياً لما يبقى عندك نص مليون مستخدم في الشهر معناها ان في 0.5% من الشعب المصري طبعاً مش كل الناس في مصر في أطفال كتير جداً فقصدي من الشريحة اللي ممكن تستثمر انت أكتر من النص % فبرافو انا من نظرتي البسيطة من هنا انا مبسوط جداً من اللي أنت بتعمله
أحمد: ربنا يخليك
(08:04)
عمر: من ناحية المنتجات بقى ثاندر بيعمل إيه كمنتجات جديدة، هل في حاجات بتعملوها جديد؟
أحمد: اللي احنا عمتاً بنشتغل عليه دلوقتي كذا حاجه، زي ما أنت قولت علشان لو احنا فعلاً عايزين نتيح هذه الخدمة أكتر فجزء كبير من اللي بنعمله اننا بنشتغل مع البورصة المصرية على البنية التحتية للتكنولوجيا عمتاً انها تستحمل هذه الأعداد، جزء كبير اوي من اللي كان بيجيلنا من العملاء قولونا وساعدونا ازاي نستثمر فبنطلق منصة جديدة او بنشتغل على اننا نطلق منصة جديدة قريب أكنها مركز بحث للشركات الموجودة عندنا في البورصة المصرية هدفنا اننا نبقى سوبر ماركت للأدوات الاستثمارية واخر منتج اطلقناه على المنصة المنتج اللي خلاص عرفت أقول لمامتي احنا بنعمل ايه اننا ساعدنا الناس أنها تستثمر في الدهب
عمر: هايل وده يمكن موضوع الحلقة النهاردة، إيه هو صندوق الدهب، اسمه ايه؟ يعني هاخد من كلامك كده ان انتو اخر حاجه عملتولها إطلاق هو الصندوق ده.. اسمه إيه في الأول يعني؟
AZG أحمد: اسمه أزيموت دهب، احنا في ثاندر مسمينه
الصندوق تم تأسيسه من أزيموت ودول مديري الصندوق، معاهم جولد نت تريدينج ودول المسؤولين عن بيع وشراء الدهب فمدير الأصول هو أزيموت، الشريك اللي له علاقة ببيع وشراء الدهب هو جولد نت تريدينج
(09:33)
عمر: طيب هل ثاندر كان ليهم دور في انهم ينزلوا الصندوق ده، في الإطلاق بتاعه ساعدتوا أزيموت أو ساعدتوا في الورق في الهيئة، يعني هل كان ليكوا دور؟
أحمد: هل كان لينا دور في عملية إنشاء الصندوق لأ مكنش لينا أي دور في الموضوع ده، هل كنا متواجدين مع الناس اللي عملوا الصندوق من أول يوم آه فسوا جولد نت تريدينج سواء أزيموت بنتكلم معاهم لأن في 3 منتجات المصريين بيحبوهم وبيستثمروا فيهم من زمان العقار، والدهب والحاجات عالية العائد فطبيعي جداً بالعكس انت بتجذب الناس انك تديهم الاستثمار اللي هما عايزينه وبيحبوه وبعد كده تزود عليه حاجات تانية
إيه اللي عملناه أكتر كانت بعد ما الصندوق اتعمل احنا أكبر شركة ساهمت في انها تجيب عملاء للصندوق فاحنا غطينا اكتر من 25% من الفلوس اللي اتلمت في الصندوق عن طريق الإكتتاب واللي احنا دايماً بنحاول نعمله وعشان كده بقولك اننا بجد ممتنين انك بتدينا هذه الفرصة اننا نتكلم اننا ساعدنا في أننا نفهم ونعلم الناس ايه هو الاستثمار في الدهب، إيه هي البنية اللي ورا أزيموت جولد، إيه العناصر المختلفة فيها فلعبنا دور برضه في أننا نسوق ونعلم الناس وأهم من اننا نسوق اننا نعلم الناس ايه هي الحاجات اللي يبصوا عليها لما يجوا يستثمروا في الدهب
(10:57)
عمر: طيب تعالى نشوف كده الأطراف الموجودة في الصندوق، أولاً الصندوق ده موجود على المنصة بتاعتك ممكن تشتريه زيه زي اي سهم، مظبوط؟
أحمد: صح
عمر: الصندوق ده بقى وراه كذا حد، قولي بقى الأدوار المختلفة للناس الموجودة جوا الصندوق؟
أحمد: احنا من اول يوم الغرض من هذا الصندوق انك تستثمر في الدهب انك تملك هذا الاستثمار اللي يديك الانفتاح على الدهب، وراه لازم يكون في عنصر العنصر الاولاني هو عنصر رقابي فهو تحت رقابة الهيئه العامه للرقابه الماليه هي اللي بتضمن ان كل العناصر التانيه شغاله وانها بتحمي المستثمرين، العنصر الرقابي الاخر هي لجنة الشريعة اللي بتتأكد أن طريقة إدارة الصندوق المتوافقة مع الشريعة الإسلامية فده أول عنصر العنصر الرقابي
العنصر التاني هو له علاقة بالصندوق وده في عنصرين مدير الأصول اللي هو أزيموت، وفي عنصر تاني اللي بيسموه أدمن أو إدارة هو المسؤول عن انه يطلع الوثائق ويسعر الوثائق وفقاً للدهب في اليوم ده
العنصر التالت هو عنصر التعامل مع الدهب وده فيه عاملين، العامل الأول هو شركة جولد نت تريدينج اللي هي لما انت تكون عايز تستثمر هيبيع لصندوق الدهب، ولما انت تبقى عايز تشتري هيبيع لصندوق الدهب فهو بيضمن دايماً ان هيبقى في دهب لما الصندوق يبقى عايز و هيشتري الدهب لما الصندوق يبقى عايز يبيع، العنصر التاني في إدارة الدهب وده مهم جداً هي شركة إيجي كاش وهي تحت رقابة البنك المركزي وهي المسؤولة عن حفظ وتخزين الدهب فهي شركة حفظ اموال والدهب بيبقى متخزن عند إيجي كاش ومتأمن عليه
العنصر الرابع له علاقة بالتداول وده فيه عنصرين، ثاندر شركة السمسرة اللي بتعرف تشتري وتبيع هذه الوثائق، وفي البورصة المصرية اللي بتلعب دور مهم جداً وهي عنصر الشفافية على الأسعار أنت دلوقتي على شاشة البورصة تعرف تشوف سعر الدهب الـ 24 قيراط كام يوم على يوم فتبقى انت عارف تقريبا انا عندي النهارده 50 ألف جنيه وثائق ده سعر الدهب النهاردة لو قسمت ده على ده يبقى انا اكني امتلك هذا الكم من الجرامات لما يطلع يبقى انا عارف اني هلاقي الوثيقة بتطلع لما استثماري يطلع لما ينزل هيبقى هبقى عارف ان استثماري بينزل
(13:24)
عمر: طيب انت هنا قلت 24 قيراط، هل انا لما بشتري الصندوق ده بيبقى عندي نوع واحد من الدهب انا طبعا مش خبير في الدهب وما اعرفش كلام كثير جدا اختلاف فيه كم في المئه حاجات كثيره هل في نوع معين من الدهب يعني ترخيص معين او في حد بيختم عليها أو يعني ايه اللي بيحصل في الدهب نفسه؟
أحمد: زي ما احنا قلنا الغرض استثماري فكان لازم النوع يكون الدهب اللي بيسموه درجة استثمار المتعارف عليه عالميا ان الدهب أن الدهب درجة استثمار هو 24 قيراط وده بيبقى فيه أختام من من مصر من جهات رقابية لها علاقة بالدهب وبرده فى كمان حاجه اسمها "مستشار المجوهرات الملكية" اللي بتدي أن دهب نقي بنسبة 99.99% ده مهم اوي
وعامةً الجنيه دهب عيار 21 قيراط فأنت مهم اوي لما تيجي تستثمر في دهب لازم تتعامل كأنه أداء استثمارية فلما تعامله كأنه أداة استثمارية لازم تكون بتتبع العالم بيروح فين و 24 قيراط هي الدرجة المفضلة في العالم كله من ناحية الاستثمار
عمر: حلو جداً، الناس دي كلها اللي هي الاسم المعروف دايما اللي هو البنك المركزي هو ده اللي بيراقب على البنوك انتم هنا عندكم جهه تانيه هي اللي بتراقب انت قلتها في الاول اللي هي
أحمد: الهيئة العامة للرقابة المالية
عمر: مظبوط هي دي بقى اللي بتنظم العلاقة بين كل الناس دي صح كده
أحمد: ما هو بص يا عمر احنا بقالنا كتير اوي كان نفسنا نتيح الاستثمار في دهب بس لازم يتعمل بطريقة تضمن حقك ايه اكتر طريقة ممكن تضمن حقك هو عن طريق صندوق استثمار فاحنا هنجمع فلوس من الناس والفلوس دي هتكون في صندوق استثمار وهذا الصندوق يشتري الدهب والدهب ده يتخزن في مخازن تحت رقابة البنك المركزي
زي ما انت عارف في جهتين في مصر ليهم علاقة بالقطاع المالي في البنك المركزي اللي هو مسؤول عن البنوك او القطاع المصرفي وفي الهيئة العامة للرقابة المالية وده القطاع المالي الغير مصرفي، صناديق الاستثمار تحت رقابة الهيئة العامة للرقابة المالية اللي بتضمن ان انا دلوقتي حطيت فلوسي في هذا الصندوق عشان عايز اشتري بيه ذهب 24 قيراط من الجهه اللي بتتأكد ان مدير الأصول بيعمل كده وبيتبع هذه التفويض هي الهيئة العامة للرقابة المالية
(15:51)
عمر: حلو اوي، لو حصل مشكله لو انا عندي مشكله اقدر اروح كمستثمر للهيئة اعمل مثلا بلاغ أو شكوى زي حقوق المستهلك انا بس بحاول ان بيسمعنا يبقى فاهم وهو بيشتري ايه يعني هل من حقوقه إن هو يروح يشتكي في الهيئه او لو شاف حاجه غلط ايه الاجراءات اللي بتحصل في الاستثمار في صناديق الاستثمار بشكل عام؟
أحمد: اه بس هو يعني قبل كده هي الهيئة عليها دور انها تتاكد ان مفيش حاجه غلط بتحصل فأنت كمستثمر مش دورك حتى ان انت تفضل تتابع هي الدنيا ماشيه كويس ولا لا هو دور الهيئة انها تتاكد ان مفيش حاجه ماشيه غلط وان مدير الاصول بيتبع الاجراءات وبيتبع الحاجات اللي هو متفق عليها معاك، يعني كل حاجه متفق عليها مدير الأصول لازم يتبعها
حصل لك مشكلة لها علاقة بثاندر، لها علاقه باي حاجه، عندك استفسار انت كمستثمر من حقك تروح الهيئه العامه للرقابه الماليه تقولهم يا جماعه انا عايزه افهم هو حصل كذا ولا كذا، الكلام ده حصل ولا محصلش فمش بس لو حصلك مشكله هما عندهم دور رقابي وبيتاكدوا ان مفيش مشكله تحصل
عمر: طيب انا اديتك 1000 جنيه معناها ان انت رحت اشتريت 1000 جنيه دهب حطيته في الخزنة بتاعتك صح كده لما انا بديك ال 1000 جنيه في الوثيقة في صندوق الاستثمار بيروح يشتري ما يعادله في السوق
أحمد: بيروح يشتري ب 1000 جنيه دهب عيار 24 قيراط وبيتم تخزين هذا دهب مش في خزنة مدير الأصول في خزنة ايجي كاش
عمر: خزنه ايدي كاش اللي هم عندهم ترخيص بس تخزين صح كده
أحمد: بالظبط كده
عمر: طيب حصل بقى حاجه لا قدر الله المكان في مشكله اتسرق هل الحاجات دي متأمن عليها؟
أحمد: 100% عشان كده اللي انا كنت بقول لك عليه ان احنا بقالنا كتير قوي نفسنا ندخل دهب اللي حمسنا للموضوع ده انها عناصر متكاملة طبعا متامن عليه ذهب زيه زي لما البنوك بتحفظ فلوسها ما هي بتحفظها عند ايجي كاش، دهب ده متامن عليه ضد السرقه كل الحاجات دي بتامن عليها
عمر: انت عارف انا ليه بسال الحاجات دي عشان ممكن مثلا ناس تكون هتاخد وقت عشان توصل المعلومه دي عشان ادور او مش عارف الاقيها فين او هسال مين فانا بس بحاول اسال على الحاجات اللي هتخطر في ذهن اي واحد اول مره يستثمر فاهم قصدي
أحمد: انت بتتكلم صح هي من نقاط قوة هذا الصندوق انه بدل ما انت بتشيل هم اول حاجه هخزن الثبات دي فين تبقى انت عارف ان في جهة متوليه هذا الموضوع بدل ما انت تشيل هم هو مفروض سعر الدهب يبقى كام النهارده عشان عايز ابيعه في جهة بتعلن عن الأسعار بشكل يومي بدل ما تبقى شايل الهم انا دلوقتي عاوز ابيع دهب فهنزل للصايغ اقوله اشتري انت على طول اول ما تقول انا عايز ابيع في جهة مسؤولة انها تشتري الوثائق منك وفقا لسعر الدهب في اليوم ده
(18:38)
عمر: طيب هسالك برده سؤال يمكن مش لذيذ قوى 25% من مستثمرين انت قلت بيشتركه في الكتاب عن طريق ثاندر كنت متوقع اكتر ولا اقل؟ يعني حاسس ان ده رقم كويس بالنسبه لكم انا شايف ان رقم كويس بس قصدي انت شايفه ايه
أحمد: مدير الأصول ما كانش مصدق ولا جولد نت تريدنج كانوا مصدقين لان من الجهات الأخرى اللي برده كانت بتلم اكتتابات البريد المصري وأكبر البنوك في مصر فكان بالنسبالهم مفاجأة أن ثاندر هي اكتر شركة تزود، أنا برده هرجع واقولك تاني واعتقد هنتكلم على دي اكتر احنا اللي كان فارق معانا اكتر من كام % ان الناس تبقى فاهمه هي داخله ليه تستثمر في دهب لأن في حاجات كتير اوي كنا بنحاول على قد ما نقدر اننا نتجنبها زي إن الدهب سعره طلع كل ده وان دهب استثمار عشان يحقق لك أكبر عائد احنا كان بالنسبة لنا مهم جدا ان الناس تبقى عارفة ان الاستثمار في دهب هو نوع من أنواع التأمين، لو الدنيا ساءت دهب سعره بيزيد لو الدنيا اتحسنت ده سعره بيقل
(19:44)
عمر: طيب انت شايف ان في ديموجرافي معين أو قطاع معين من المستثمرين هو اللي لازم يستثمر في دهب؟
أحمد: احنا عندنا نظرية في الموضوع ده احنا اللي شايفينه ان اي حد المفروض جزء من محفظته من 5 ل 15% من محفظته مستثمره في دهب اللي هم بيسموها عنصر الامان اللي عندك فبغض النظر انت سنك انت فين جزء من محفظتك من المفروض يكون مستثمر في دهب
(20:19)
عمر: طيب الجزء ده من خلال خبرتك يعني انت شفت ناس بتعمل محافظ متنوعه مثلا انت بتنصح كأحمد شخصيا يعني انت ممكن تكون بتعمل ايه او في رنج معين للنسبة دي؟
أحمد: انا شخصيا اول حاجتين بنصح بيهم ان احنا دايما بننصح الاستثمار بشكل دوري فكل شهر او كل على الاقل ربع تستثمر في حته وفي الحته ديت 5 لـ 15% يكون في دهب فلو مثلا انا بستثمر بشكل شهري 5000 جنيه من 500 لـ 750 جنيه يكون بيستثمر في دهب
عمر: اوكي وانت ممكن يبقى بالنسبة لك انا كعمر مثلا الطريقه اللي انا بشتغل بيها انا بحب اشتري الحاجات على صناديق على بورصات يعني ممكن صندوق الاستثمار هنا يوفر علي الوقت والمجهود وان انا انزل واجيب وانا مش فاهم والكلام ده كله في المحفظة دي لما انا اشتريها واحطها جوه ساندر انا هبقى شايف صندوق الاستثمار كده جنب الأسهم بتاعه صح كده يعني لما انا بشتري الصندوق بيظهر لفين؟
أحمد: بيظهرلك تحت الأسهم بتاعتك اي سي جي سعر الوثيقة بيزيد وبيقل وعلى الابلكيشن كمان هيبقى عندك سعر دهب ال 24 قيراط عشان تبقى عارف برده هو بيطلع ولا بينزل
عمر: حلو اوي
(21:34)
عمر: طب خلينا نقول وانتم بتبصوا على صناديق الاستثمار، يمكن السؤال ده جه في دماغي، نوعية صناديق الاستثمار دي موجودة حول العالم صح؟ يعني ده مش أول صندوق استثمار للدهب في العالم في صناديق استثمار العالم
أحمد: صح
عمر: انتوا لما بصيتوا على الصناديق الأخرى لقيته ان الصندوق ده مبني على نفس المعايير العالمية بالظبط؟
أحمد: خلي بالك هو في كذا طريقة بيبنى بيها او بتعرف تستثمر فيها بدهب في الطريقة اللي احنا بنستخدمها في مصر اللي هو أن الصندوق بيبقى 100% من استثماراته وراها ذهب حقيقي دي الطريقه الموجوده في مصر ودي الطريقة اللي احنا حاسين ان هي مناسبة أكتر للوضع او السوق المصري
في طريقه تانيه اللي هو انت بتشتري ورقة، الدهب سعره طلع بتزيد سعرها بيقل بتقل بس ما بيبقاش وراه دهب حقيقي، احنا في مصر واللي شايفينه مناسب اكتر للي احنا عاوزينه اللي هو 100% من الصندوق مستخدم فيه دهب حقيقي متخزن وموجود هنا في مصر
عمر: اعتقد كمان عشان يبقى متوافق مع الشريعة الإسلامية يعني انت ذكرت انه متوافق مع أحكام الشريعة وعشان هو متراقب من اللجنة فحتة الامتلاك الحقيقي ده من الأساسيات بتاعه الاستثمار الإسلامي اعتقد
أحمد: هو الاختلاف أن النظام مش متوافق مع الشريعة الإسلامية واحنا دايما بنحاول نقول دايما وشكرا جدا انك قلت كده لما بنقول ان المتوافق مع السريع الاسلاميه معناها انه وفقا للجنة اللي بتبقى ممثلة من الأزهر وبتبقى مسجله عند الهيئه العامه للرقابه الماليه هي اللي بتقول هو متوافق مع الشريعة ولا لأ ودايما بنقول المثال يا عمر زي الفرق بين السي آي بي وبنك بركة في الآخر ولا انا ولا انت اللي نقول اللي هو متفق ولا لا هو في لجنة بتقول انها متوافقه على الشريعة الإسلامية
عمر: اوكي حلو جدا
(23:36)
عمر: طيب تعالى نتكلم بقى عن المصاريف كده احنا غطينا الهيكل بتاعه، متأسس ازاي مين الناس اللي بتشتغل عليه عرفنا لو دهب طلع 10% هو هيطلع معاه 10% لو نزل 10% هينزل معاه 10% طيب في بند بقى بيبقى دايما موجود اللي هو المصاريف في صناديق الاستثمار ده طبيعي عشان لازم الناس اللي بتشتغل على الموضوع دي تعمل فلوس لان في جهات كثير كلمني انتم كثاندر اولا كتطبيق ما فيش عملاء تداول مظبوط يعني خلينا برضو نفكر الناس بالنقطة دي انتم معندكوش عمولات تداول، اول سؤال هل لما بتداول الصندوق ده من خلال ثاندر بدفع عمولة ولا لا؟
أحمد: صندل ما بتاخدش عمولة على هذه الشهادات خليني اشرح لك برده الرسوم لانها مهمه جدا لما بتيجي تشتري ما فيش اي رسوم فلو انت اشتريت ب 1000 جنيه بتشتري وثائق ب 1000 جنيه بس في رسوم بيعه والرسوم دي حاولوا هم انه يعملوا الصندوق بالشكل اللي هو يكون بيشجع الناس أنهم يستثمروا في دهب طب الاستثمار طويل الأجل فعملوا إن هو كل من مدها بيقعد معاك كل ما الرسوم دي هتقل بشكل يومي فلو انت بعت دهب ثاني يوم بتدفع 4.9% من اللي انت اشتريت بيه بيقعد يقل بشكل يومي على اخر السنه الاولى بيبقى 3.3% على السنه الثانيه بيبقى 1.6% لو بعت وبعد ثالث سنه مبتدفعش أي رسوم لما تيجي تفكر فيها ده المفروض تيجي تقارنه وانت بتيجي تشتري سبايك من الموجودين بتدفع حوالي من 2-4 % عند الشراء ولو خرجت ودخلت تاني وعايز تبيعه بتدفع 2- 4% تاني عمولة على البيع للسبايك وتشتريها من محلات وطبعا لو بتشتري دهب دهب فبتدفع مصنعيه والكلام ده
عمر: يعني انا بعد السنه الثالثه مش هدفع اي حاجه انا هشترى الدهب ده لابني او لبنتي هيقعد معايا 10-15 سنة معنديش مشكله لاني مش هدفع أي رسوم خروج مظبوط
أحمد: بالظبط كده
عمر: ده كيان الجزء الاول من لقائي مع احمد الاسبوع الجاي هنغطي حاجات تانيه مهمه برده عن المنصة هنستناكم الاسبوع الجاي وشكرا جدا جدا على وقتكم النهارده
Translation of some words and terms:
Engagements التفاعلات
Disruption انفتاح
Headline عنوان رئيسي
Growth نمو
Hiring توظيف
Net Worth صافي الثروة
Startup شركة ناشئة
Projection تنبؤ
You Exceeded Your Expectations تجاوزت توقعاتك
Culture ثقافة
Potential محتمل
Launching إطلاق
High Yield Real Estate عقارات ذات عائد مرتفع
Investment Grade درجة استثمارية
Royal Jewelry Counsel مستشار المجوهرات الملكية
Purity نقاء
Asset Manager مدير الأصول
Mandate تفويض
Equivalent ما يعادل
Hedging الخطة الوقائية
Personally شخصيا
Structure هيكل
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #صندوق_ذهب #ثاندر #الجزء_الأول