121. أول صندوق مصري للاستثمار في الذهب (مع ثاندر) - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنكمل مع أ/أحمد حمودة الشريك المؤسس لمنصة ثاندر (أول منصة مصرية للاستثمار الإلكتروني) الجزء الثاني من حديثنا عن صندوق أزيموت ذهب أول صندوق مصري، متوافق مع الشريعة الإسلامية بيستثمر في الذهب
Ahmed Hammouda @LinkedIn :تقدروا تتواصلوا مع أحمد من هنا
Ep57 Ep58 :تقدروا تسمعوا لقائنا السابق مع ثاندر من هنا
: في الجزء الثاني
(01:04) الناس في مصر كانوا بيشتروا الذهب ازاي قبل كده؟ -
(03:57) ازاي بتقيس نجاح الصندوق على المدى الطويل؟ -
(05:53) هل بتقبلوا طلبات الشراء أو البيع على مدار 24 ساعة في اليوم ولا هل في نهاية الأسبوع، كلمني على السيولة في الصندوق؟ -
(06:50) من وجهة نظرك هل في منافسة ما بين الذهب الحقيقي والعملات الرقمية كملاذ آمن؟ -
(12:36) كثاندر بيجيلك ناس كتير أول مرة وعاوز تتعلم هل بتعملوا حاجات خاصه بالتعليم؟ -
(13:55) هل في حد أدنى للاستثمار في صندوق أزيموت جولد؟ -
(15:24) إيه اللي بيحرك أسعار الذهب؟ -
https://thndr.app/eg/ : عشان تعرف أكتر عن ثاندر وصندوق أزيموت ذهب حمل تطبيق ثاندر من هنا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
زي ما انتم عارفين الاسبوع اللي فات احنا اتكلمنا مع أحمد حمودة المؤسس الرئيسي لمنصة ثاندر للتداول، النهارده هنكمل حديثنا معاه.. احمد هياخدنا النهارده في رحلة تاني جوه ثاندر ويا رب تنبسطوا بحلقة النهارده
(01:04)
عمر: طيب انت قلت موضوع إن الناس في مصر بتحب الـ 3 حاجات، الناس في مصر من معرفتك بقى كانوا بيشتروا الدهب ازاي اصلا قبل كده؟
أحمد: اهالينا كانوا بيشتروا دهب دهب، سلاسل وغوايش والحاجات دي وبيورثوها هدايا لأولادهم.. اللي ابتدى يحصل خلال آخر 5 سنين ان الناس بقت بتشيل سبايك واللي بيحصل دلوقتي او التطور الطبيعي للاستثمار في الدهب انه يكون عن طريق الوثائق، اكبر حاجه هنقيس بيها نجحنا ان الناس تبقى عارفة ان انا بدل ما انزل اشتري سبيكه وادور على حته اخزنها وبعدين اروح ابيعها انا ممكن استغنى عن كل ده بإني اشتري وثيقة في الصندوق اللي بيستثمر في الدهب
عمر: ودي برده قررتها في حالات كتيرة جدا مع الناس ان قد ايه تكنولوجيا سهلت انت ما بتبقاش مصدق ان انا هو انا فعلا بشتري صندوق يعني انا بتكلم بمنتهي البساطه هو انا بجد بمتلك دهب دلوقتي اه انت بتمتلك دهب لان انت حقيقه في حد راح اشترى حاجه وخزنها بالنيابه عنك هو ده الوسيط اللي بيعمل لك الحاجات دي بس انت فعليا اشتريتها
أحمد: انت عارف يا عمر واعتقد ده هيعجبك او يعني عشان يثبت اللي انت بتقوله لو الاستثمار بتاعك عدى ال 50 جرام من حقك تطلب ان الدهب يجيلك على البيت طبعا هتدفع عليه رسوم ولكن انت للدرجه دي لو بقى عندك اكتر من 50 الجرام عندك الاختيار انك تقول يا جماعه هاتولي الدهب بتاعي ده على البيت
عمر: اه ان انا اعمل استرداد للوثائق النت تاخد الوثائق بتاعتك وتديني أكتر من 50 جرام عندي في البيت
أحمد: اديك الجرامات اديك الدهب نفسه بس هي المشكله بتبقى انت خرجت بره هذه المنظومة انت بقى اللي عليك بعد كده تبيع السبيكة اللي عايز
(02:50)
عمر: الناس مبتفكرش في قد ايه الاسواق الماليه دي جميله ان انت بتديك مكان ان انت بدل ما ترفع التليفون على حد او بدل ما تعرض على مواقع الإعلانات ان انت عندك حاجة عايز تبيعها الفكرة بتاعة تسييل الحاجة لحظيا دي بالنسبه للناس طبعا اللي هي مش شغالة في المجال هي حاجه جميله جدا لان انا مش عايز ارفع سماعة التليفون، انا مش عايز اعمل اي حاجه زي ما بطلب اكل كده في التليفون وبيجي لي على البيت انا دلوقتي برده هبيع استثماراتي في الدهب او هشتري استثماراتي
أحمد: انت عارف ان دي كانت الفكرة ان احنا نبدأ ثاندر يعني انت مينفعش تقول للناس ان كل واحد لازم يستثمر بس في نفس الوقت الناس دلوقتي بقت متعوده على جودة معينة للخدمات اللي هي بتاخدها، بتقولك انا في دقيقه بطلب الأكل، في دقيقه بطلب العربيه اللي انا عايزها، بس لو عايز استثمر في فلوس هاخد يوم اجازه وهاخد عربيتي وهروح اركن واستنى واعمل لو مش بنفس جودة الخدمة لأن احنا كجيل ادلعنا قوي فلو انا مش شايف الدلع ده في الحته دي مش عايزه اعملها
(03:57)
عمر: طيب انت كواحد مستثمر بقى ودي دايما حاجه انا بفكر فيها على طول ازاي بتقيس نجاح الصندوق ده على المدى الطويل يعني المفروض الصندوق ده يعمل ايه عشان انا كمستثمر ابقى سعيد؟
أحمد: سؤال حلو جدا جدا جدا ودايما بنتكلم عليه في المكتب ان هو ممكن يكون بيلخبط الناس غالبا انت لما بتستثمر في صندوق بتبقى مستني للصندوق ده يحقق على عائد او اعلى ايرادات صح الصندوق ده هنقيس نجاحه بقد ايه هو ماشي بالظبط مع اسعار الدهب فلما الدهب بيطلع 10% هو كمان بيطلع 10% لما الدهب بينزل 10% هو كمان بينزل %10
فبتبقى انت قاعد زي ما انت قلت في البيت عارف اكني اشتريت السبيكة دي لان الدهب بيطلع انا بطلع معاه الدهب بينزل انا بنزل معاه
عمر: اه لان دايما توقعات الناس عاليه جدا قبل ما تشتري الحاجة لان مش ده اللي هيغنيك من يوم وليله ومينفعش ده يبقى طالع 10% بس والصندوق ده 200% مينفعش
أحمد: ده صندوق بيسموه صندوق سلبي، انت عندك نوعين من الصناديق يا عمر في صندوق نشط اللي هو انت بتدي له فلوس وبتتوقع منه انه يبتدي يطلع بالاستراتيجيات معينة يستثمر بها فلوسك، في صندوق سلبي انت بتقوله انا مش عاوز منك اكتر من ان انا اديك الفلوس دي تروح تشتري بيها دهب والموضوع ده كله بيدار وفقا للقوانين، فده صندوق سلبي انا كل اللي عاوزه منك تاخد الفلوس تشتري د هب 24 قيراط تخزنه في ايجي كاش ولما احب ابيع تشتري مني الوثائق وفقاً لسعر الدهب في اليوم ده
عمر: بس كده فالموضوع سهل جداً تعرف صندوق الاستثمار ده بيعمل اللي عليه ولا لأ
أحمد: عشان كده احنا حطينا على التطبيق سعر الدهب الـ 24 قيراط فيبقى عندك بمنتهى السهولة تشوف هو صندوق الوثائق بيمشي مع سعر الدهب ولا لأ محتاج حتى تروح في حته تانيه عشان تدي تحكم عليه
عمر: تمام حلو جدا
(05:53)
عمر: طيب احنا قلنا هرفع سماعة التليفون هشتري.. ولا بلاش بقى ارفع سماعة التليفون عشان ده قديم شويه انا هخش على التطبيق احط طلب ان انا هشتري او احط طلب ان انا هبيع، هل بتقبلوا الفلوس 24 ساعة في اليوم ولا هل في نهاية الاسبوع يعني السيولة بتاعه الصندوق ده شكلها عامل ازاي؟
أحمد: ده سؤال مهم جدا اول حاجه انت عارف انك بتمول محفظتك ومن محفظتك بتعرف تشتري او لما بتبيع بينزل في محفظتك على التطبيق، الصندوق هنا مدى يومين هم اللي بيتم فيهم عمليات الشراء والبيع انت ممكن تحط الطلبات في أي يوم ولكن الطلب بتاعك هيتنفذ يوم الاثنين أو الخميس، لو حطيت يوم الأحد هيتنفذ يوم الاثنين ولو حطيت يوم الثلاثاء او الاربعاء هيتنفذ يوم الخميس هما دول اليومين اللي بيتم فيهم تنفيذ طلبات الاثنين والخميس
عمر: حلو جداً
(06:50)
عمر: طيب احنا اتكلمنا على التنوع قد ايه هو مهم في محفظتك انا متخيل الدهب زي ما انت قلت كده في الأوقات الوحشة ممكن الأسهم نازله بتاعتي بس الدهب يبقى طالع فيساعدني او العكس فدي اعتقد احنا غطينا موضوع التنوع قد ايه هو مهم ان هو هيبقى موجود في هاخد من الكلام ده حاجه ان احنا طلع مؤخرا العملات الرقمية وخاصة الحاجات الكبيره المشهوره منها زي البيتكوين او الايثيريوم والناس كانت بتقول ان ده ده "الدهب الرقمي" هل في منافسة ما بين فئة الأصول بتاعة الدهب الحقيقي من وجهة نظرك برده ومش لازم تبقى صح، احنا كلنا وجهات نظر وممكن كلها تبقى غلط بس من وجهه نظرك هل في منافسة ما بين الدهب الحقيقي والعملات الرقمية كملاذ آمن؟
أحمد: يعني انا فاهم قصدك في ناس كثير قوي بتقول لك ان البيتكوين هو الدهب الرقمي والايثيريوم هو الفضة الرقمية، خلي بالك احنا لو نرجع لثاندر الغرض اللي احنا بنعمله في الاخر ان احنا نشجع عند الناس عادة الاستثمار عشان كده جزء كبير قوي من اللي احنا بنعمله بيبقى يبقى عندنا أدوات استثمارية مختلفة واللي انت مقتنع بيه هو اللي استثمر فيه حاجه تانيه مهمه جدا بالنسبه لنا احنا كشركة ان احنا نكون بنعملها وفقا للقوانين الموجودة عشان كده بقول لك ان احنا من 2021 نفسنا نتيح للناس انها تستثمر في الدهب بس معرفناش نتيحه لحد ما لقينا شكل قانوني ومقنن ان احنا نتيح بيه الدهب
نفسنا في يوم من الايام يبقى كل الادوات الاستثمارية موجودة على ثاندر بما فيهم البيتكوين والحاجات دي كلها اكيد طبعا نفسنا بس وفقا وهنكون مستنيين وضع قانوني ليه
الموضوع ده هي كلها قناعات يعني انا هقولك على حاجه غالباً شبه اللي انت بتقوله احنا فى ثاندر بنتكلم أو نفسنا نعمل حاجه اسمها مؤشر الخوف او بيسموه
fear and greed index مؤشر الخوف والجشع
امتى تكون عارف ان السوق اللي بيسوقه هو الطمع، وامتى يكون عارف ان السوق اللي بيسوقه وهو الخوف، لو كده بصينا على البيتكوين بما انك اتكلمت عليها لو جيت بصيت عليه السنه اللي فاتت كل الناس حوالينا كانت بيتكلموا على البيتكوين كل الناس بتكوين كام بـ 80 او 90 الف دولار نفس الناس دي دلوقتي البيتكوين محدش بيتكلم عليه، السنه اللي فاتت السوق اللي كان بيسوقه هو الطمع المرة دي اللي بيسوقه خوف
احنا دايما بنشجع انك يكون عندك هدف من الاستثمار هدف انت مؤمن بيه من هذا الاستثمار لو بتستثمر في الدهب الحقيقي فهو ده وفقا لقناعاتك ان على مر التاريخ اكتر حاجه اثبتت للناس انها بتحافظ على قيمتها هو الدهب الحقيقي فبالتالي اي حاجه بتحصل يبقى في خوف في قلق في ناس كتير تبتدي تسأل هو النظام الاقتصادي قوي ولا لا
اول لما الموضوع ده بيبتدي الناس تخاف منه بيروح للدهب فأنت بالتالي يبقى عندك حته صغيره من مدخرتك في الدهب لان لو الدنيا باظت هتلاقي الدهب بيطلع وده لو بصينا عليه وانت قلته في 2008 الأزمة المالية العالمية هتلاقي الاسهم نزلت والدهب طلع لفوق، لو بصيت على وقت الكورونا هتلاقي كده امتى هتلاقي الدهب نزل بعد 2012 لما رجع تاني الناس تبتدي تثق ثاني في الاقتصاد العالمي
البيتكوين لو انت فعلا مقتنع ان العالم رايح للحته الديجيتال وجزء كبير جدا من النظام المالي هيكون البيتكوين بيلعب جزء كبير منه هتبقى انت عاوز جزء من محفظتك منه بما يتوافق مع قانون البلد اللي انت عايش فيها
الكلام ده ممكن يكون بيعطلنا كتير جدا بس ده حق العملاء بتوع ثاندر انهم يبقوا عارفين اي حاجه هنتيحها على المنصة هتكون وفقا لقوانين الدولة لان ده في الاخر حماية للمستثمرين والعملاء بتوع ثاندر
عمر: انا مش عايز واحد يوعدني بحاجات كتير جدا وهي اصلا ما عليهاش مؤسسات مراقبه والكلام ده كله انا بالنسبه لي الدور الرقاوي برده مهم جدا في اي منتج وعلى فكره انا مش بقول ان انا ممكن اكون ضد البيتكوين جدا وممكن اكون معاه جدا هي الفكره هو قد ايه من محفظتك انت دايما السؤال ممكن يبقى صفر ما هو صفر ده رقم بس هو انت شايفه وعارفه ان هو فئات اصول متوزعه وانا برده معاك 100% على المدى الطويل هو التقويم بتاع محفظتك لازم يبقى تعمل المدى الطويل ده افضل حاجه يعني
احمد: وأنه ميكونش اللي بيسوقه الطمع، يعني طول ما انت فاكر انك هتستثمر هنا عشان عايز تعمل 70% خلال يوم او اصلك سمعت فلان الفلاني عمل البتاع ده ده غلط الصح في الاستثمار تكون فاهم انت بيستثمر في ايه
في كتاب اسمه "أغنى رجل في بابل" المفروض ان بابل دي من أغنى الحضارات في العالم اعتقد من 3000 او 4000 سنة بيتكلم على نصائح للاستثمار وبيبدا عامة يقولك ان اول حاجه تجبر نفسك تشيل حته من دخلك ومن كل 10 كوينز بيشيل كوين بيستثمره وفي جزء بيقولك لازم تحمي كنزك وكنزك ده لازم تبقى فاهم هو داخل في إيه، كان بيحكي عن انه كان بيجيله ناس يقولوله يلا ندخل في مشاريع دي فكان يحط فلوسه في المشاريع دي فكلها تروح فتعلم انه مش هيحط فلوس في الاستثمار غير لما يبقى فاهم هو داخل في ايه وعارف ايه المخاطر وايه اللي ممكن نطلع بيه وده المهم، عايز تستثمر بقى في الدهب الحقيقي في اللي انت عاوزه اهم حاجه تبقى عارف ايه الغرض من هذا الاستثمار لان ده في الاخر كنزك ودي ثروتك
(12:36)
عمر: كثاندر بقى هل بتعملوا حاجات خاصه بالتعليم لأن انت بيجيلك ناس كتير أول مرة هو بيبقى عاوز يتعلم اصلا فبتعملوا ايه؟
أحمد: احنا بنبدأ ان احنا اي وسائل من وسائل الاتصال بنحاول نستخدمها ان احنا زي ما بقولك نفهم الناس ايه الغرض من هذا الاستثمار فهتلاقي عندنا مدونات بتاعتنا بتشرح يعني ايه اصلا استثمار في الدهب، عملنا فيديو بيشرح أزيموت جولد وايه العناصر اللي ورا أزيموت جولد
عملنا فيديو تاني بيشرح الاستثمار في الدهب وايه اللي بيحرك اسعار الدهب وخلي بالك في حاجه احنا متكلمناش عليها ايه هو اللي بيحرك سعر الدهب في مصر، يعني ممكن لو عندنا وقت نبقى نتكلم على الموضوع ده لانه مهم جدا
وانت جزء من اللي احنا بنحاول نعمله ليه تستثمر في الدهب، ايه اللي بيحرك اسعار الدهب اللي انت قلت عليه كام % المفروض يبقى في محفظتي الحاجات دي كلها ودايما عندنا على الدعم الأسئلة اللي الناس بتسألها لو حد عنده مشكله زي ما قلتلك احنا مبنشوفش نفسنا شركة سمسرة او وسيط احنا بنشوف نفسنا مكان للمعلومات انت ليه تستثمر في أزيموت جولد عن طريق ثاندر لان ثاندر على قد ما بنقدر بنحاول نوفرلك المعلومات اللي تعرف تاخد بيها قرار يناسبك
عمر: هايل
(13:55)
عمر: يمكن سؤال كان المفروض اساله اول حاجه نسيت اساله انا المفروض اقل حاجه ممكن استثمرها في صندوق زي ده قد ايه يعني هل في حد أدنى؟
أحمد: 10 جنيه
عمر: يعني انا ممكن احط ب 10 جنيه دهب دي ميزه رهيبه ما تكلمناش عليها ويمكن دي غلطتي اني ما سالتش السؤال ده بدري بس ان انت تعرف تستثمر 10 جنيه انت مينفعش تعملها محل الدهب اصلا
أحمد: بصراحه انت سالته، انت قلتلي ايه ميزه الصناديق اصل ده ميزه مهمه جدا اللي بتوفروا الصندوق ان هو الـ 10 جنيه بتاعتك جنب الـ 100 ألف جنيه جنب المليون جنيه جنب الميت مليون جنيه كلهم بيتحطوا في صندوق واحد و بيروحوا يشتروا الدهب
عمر: وده مبيعملش اي مشكلة بالنسبة ليك انك تصدر وثائق الكلام ده كله
أحمد: هي الوثيقة بـ 10 جنيه فأنت تمام، لو معاك 10 جنيه معاك وثيقة لو معاك 100 جنيه كده انت معاك 10 وثائق
عمر: لو في يوم من الايام الوثيقة دي بقت ب 50 جنيه، هيبقى الحد الادنى بتاعي عشان اشتري لي بسيط 50 جنيه صح كده
أحمد:بالظبط وممكن ساعتها هما ينزلوا سعر الوثيقة
عمر: تمام، يعني انا ممكن اكون خارج ومروح معايا شويه فكه في جيبي اخش استثمر على التطبيق
أحمد: ايوه هو ده الحلم من الاحلام انك تروح تشتري قهوة وتحط الباقي في استثمارات بتاعتك
عمر: كله هيجي إن شاء الله
أحمد: إن شاء الله
(15:24)
عمر: طيب احنا عرفنا ازاي هنلاقيك على ثاندر هنحط برضه في الشو نوتس كنت المره اللي فاتت مديني لينك نحطة للناس عشان تنزل التطبيق في إيه تاني مغطنهوش يا أحمد النهاردة على موضوع الصندوق؟
أحمد: أعتقد السؤال عن إيه اللي بيحرك أسعار الدهب، عشان الناس برضه تبقى عارفه
عمر: طيب ده له علاقة بالسوق المصري صح، يعني اللي انا عارفه ان اسعار الدهب بتتحدد عالمياً يعني في بورصة عالمية للدهب ازاي ده بقى بيترجم لمصر؟
أحمد: ده اول جزء بالظبط، طيب بالنسبة لأسعار الدهب انت بتشتري دهب بالجنيه المصري فبالتالي في ثلاث حاجات بتاثر على سعر الوثيقه او سعر الدهب في مصر اول حاجه هو سعر الدهب العالمي وده زي ما قلنا كل ما الاقتصاد العالمي بيتحسن كل ما سعر الدهب بيقل وكل ما بيبقى في حروب، مخاوف، غلاء كل ما سعر الدهب بيزيد فده اول حاجه بتاثر على اسعار الدهب هو السعر العالمي للدهب
تاني حاجه بتاثر على سعر الدهب هو سعر الصرف انت بتشترى وبتبيع الدهب بالمصري فكل ما الدولار سعر الصرف يتحرك كل ما انت تبقى متوقعة قيمة سعر الدهب يتحرك عشان كده برده في ناس مؤخرا كانوا بيتفرجوا على أو بيروحوا للدهب لانه الجزء من ممكن يكون تحوط من أن يحصل تغير في سعر الصرف
الجزء الثالث هو حاجات ليها علاقة بالسوق المحلي زي ما قلنا اللي بياثر على سعر الدهب هو قد ايه نسبه الخوف لو انت داخليا نسبة الخوف عندك اكثر من العالم يبقى هيبقى في فرق بيعكس هذا ولو العكس صحيح ان العالم مقلوب بس انت اقتصاديا مستقر أكتر هتلاقي ان في اقل ان سعر الدهب يكون اقل شويه من بره
هما دول الـ 3 حاجات سعر الدهب العالمي سعر الصرف ومؤشر الخوف النسبي اول الحاجات اللي ليها علاقة بالعرض والطلب جوه الدولة نفسها
عمر: والسعر ده انت قولتلي انه بيترجم على البورصة المصرية يعني البورصة المصرية بتطلع سعر نهائي يومي للدهب صح كده؟
أحمد: آه وعلى التطبيق كمان ممكن تلاقيه
عمر: فالسعر ده هو اللي بيجمع الـ 3 عوامل اللي انت اتكلمت عليهم وجواهم السعر ده مطلع كل الحاجات دي لو هو غالي أو مخفض عن السعر العالمي أو أياً كان وانا النهاردة لما بستثمر يوم الاثنين معاك انا بخش على أسعار الاسبوع ده؟
أحمد: يوم الاثنين، بتخش تشتري وتبيع على أسعار يوم الاثنين أو على أسعار يوم الخميس
عمر: هايل، حلو جداً في أي حاجه تانية تحب تضيفها؟
أحمد: لأ أنا والله يا عمر بشكرك جداً وفعلاً كمية الناس اللي بشوفهم بيقولولي احنا عرفنا عن ثاندر من الانترفيو اللي كان على كلام ينور والله كتير جداً فشكراً جزيلاً
عمر: الحمدلله، يمكن مش ناس كتير بس ممكن الناس اللي بتسمع ناس اعتقد الحمدلله مكررين وموجودين معانا وبيسمعونا فترات طويلة ويارب الناس تكون أتعلمت مننا حاجه سواء من ثاندر او كلام ينور
أحمد: يارب وشكراً ليك يا عمر على الفرصة دي
عمر: ميرسي جداً جداً يا أحمد، شكراً على وقتكوا واشوفكم ان شاء الله الاسبوع الجاي
Translation of some words and terms:
Benchmark المعيار
Manage Expectations إدارة التوقعات
Overnight بين ليلة وضحاها
Liquidity السيولة
Order طلب
Cryptocurrencies العملات الرقمية
Asset Class فئة الأصول
Digital Gold الذهب الرقمي
Fear And Greed Index مؤشر الخوف والجشع
Physical Gold الذهب الحقيقي
Fractions كسور
Fear Factor عامل الخوف
Premium غالي
Discount مخفض
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #صندوق_ذهب #ثاندر #الجزء_الثاني