106. العربيات المستعملة مع سيلندر - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة الجزء التاني من لقائنا مع عمر الدفراوي، الرئيس التنفيذي والمؤسس المشارك لشركة سيلندر "منصة رقمية لبيع وشراء وتمويل العربيات المستعملة في مصر" بنكمل حديثنا معاه عن سوق العربيات المستعملة والحلول اللي بتقدمها سيلندر عشان تسهل عملية بيع وشراء وتمويل العربيات المستعملة
Defrawy @LinkedIn :تقدروا تتواصلوا مع عمر من هنا
sylndr.com :منصة سيلندر
00:55 هل في يوم من الأيام ممكن تزود الـ 90 يوم ضمان؟ وهل في خدمات ما بعد البيع زي الصيانات؟
03:05 هل بيبقى في أي ميزة لو واحد هيبقى مشتري وبائع في نفس الوقت؟
04:23 التمويل بياخد وقت قد إيه عشان يجيلي؟
04:56 هل ممكن تساعدني وتديني نصيحة لأفضل نظام تمويل متاح عندك؟
07:43 كلمني على خدمة التوصيل في سيلندر؟
10:03 رحلة ما بعد البيع، هل بتساعدني في التراخيص أو في التأمين على العربية؟
12:00 مين عمر بقى.. عايز أعرف أنت مين، كنت بتعمل إيه، ودرست إيه؟
18:02 أنتم كام شريك مؤسس في سيلندر النهاردة؟
18:56 كلمني على المنافسة وحجم السوق؟
ابعتولنا أسئلتكم وإستفساراتكم وقولولنا حابين نتكلم في إيه الحلقات الجاية، و استنونا الإسبوع الجاي في حلقة جديدة من كلام ينور
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور، النهاردة هنكمل حديثنا ويارب تتبسطوا بحلقة النهاردة
00:55
شمس: طب هسألك سؤال كده ويمكن ده يكون في مخططكم الله أعلم، ممكن يكون سؤال له معنى أو ملهوش معنى هل في يوم من الأيام ممكن تقدر كمان تزود الـ 90 يوم ان أنا اجي أشتري منك والنبي يا عمر ممكن تأمن لي على العربية سنة كمان وأدفعلك حاجه؟ يعني أدفعلك مثلاً 20 ألف، 30 ألف أياً كان الرقم وتأمن لي على العربية أو تديني ضمان عليها؟
والحاجه التانية هل في يوم من الأيام تقدر برضه تديني عليها عقد خدمات، تقدر تعملي صيانات؟ انتو داخلين في الحتة دي ولا لأ؟ لأن دول بقى أسئلة اللي هو أنا أشتريت ما بعد البيع بقى، أنا واحد مستهلك عايز الحاجات دي
عمر: بص بالتأكيد الأتنين في خطتنا، أول حاجه إني أدي ضمان لحد سنة، إني أدي للعميل خيار إنه يعرف يشتري مني باكيدج أعرف اديله ضمان لمدة سنة، اكيد دي حاجه موجودة عندنا، والخدمات زي إني أعملك الصيانة بتاعة العربية، لأن دي مشكلة تانية بتواجهه العميل أنه أشتري عربية مستعملة أي ميكانيكي هيعملها عنده، طب لو العربية مش عاوزه تديك توكيل والتوكيل غالي وخلي بالك أغلب الشركات بيبقى عندها حاجه كده اسمها "القيم الجوهرية " للشركة، احنا واحدة من people over Cars القيم بتاعتنا في الشركة
هدفنا نبني علاقة طويلة مع عملائنا، أنا النهاردة كشركة مش جاي أخدم العميل مرة واحدة كل أربع سنين تشتري العربية وتمشي مش ده هدفي خالص
أنا هدفي إنك لما تيجي تشتري مني العربية أنا عملت علاقة مع عمر ممتدة، العلاقة دي مستمره عمر هيجي يجيبلي العربية، عمر عاوز يمول العربية، عايز يعملها الصيانة بتاعتها، عنده ضمان كبير، عمر العربية وقفت بيه على الدائري عايز ونش سيلندر.. فاهم قصدي، بالعكس إحنا عايزين نوسع نطاق مساعدتنا للعميل ، طيب عمر كمان سنتين عايز يغير العربية هات يا عمر العربية أشتريها منك وأديك العربية الجديدة بتاعتك وندخل القسط ده في ده فاهم قصدي احنا عاوزين نبني علاقة طويلة مع العميل بتاعنا والضمان جزء من الخدمة أكيد
03:05
شمس: هسألك برضه سؤال تاني جه في دماغي، لو انت بتشتري مني على طول من غير أسئلة من غير اي حاجه وانا بشتري منك برضه على طول هل ده معناه بديهيا ان انا لو جيتلك بعربيتي قلت لك أنا عايز أبدل العربية دي بدي هل انا ممكن اعمل عمليه دي على طول؟ وهل مثلا هتحاول تديني سعر احسن شوية؟ يعني هل بيبقى في فايده لو واحد هيبقى مشتري وبياع في نفس الوقت؟
عمر: بص حاليا احنا لسه مطورناش الموضوع ده بس دي حاجه جايه اننا نعرف ندي فايده للناس اللي هي بتبيع وتشتري عربيه بالتأكيد، احنا بس علشان السوق اليومين دول اخر سنه السوق صعب والأسعار بتطلع وبتنزل على طول، والأسعار مختلفة، والاسعار والعربيات مش موجودة، فلسه مش عارفين شكل السوق المستعمل وهو في مستقر في شكله عامل ازاى؟ بس حتى لو مش بندي خصم جامد على العربية، انت بتجيلي تقدر تفحص عربيتك فوراً وهديلك السعر هتدخل دي في دي على طول وتقسط الباقي
شمس: وأمول الفرق
عمر: وتمول الفرق، فأنت مثلاً جيت بعتلي العربية بـ 300 ألف وقولتلي عاوزها بنص مليون مش هديلك الـ 300 وأقولك تعالى للـ 200 هقولك عايز تدفعهم كاش ولا تقسطهم.. يلا نقسطهم خلال ربع ساعة هكون جايبلك موافقة على التمويل يلا مبروك عليك خد الـ 200 ألف جنيه
04:23
شمس: حلو اوي، السؤال بقى بتاع التمويل هاخد وقت قد إيه عشان يجيلي التمويل بتاعي؟
عمر: نص ساعة، احنا عندنا كذا شريك اللي بنشتغل معاهم، عندنا فاليو، عندنا بنك الإستثمار، عندنا شركة اسمها أولين، عندنا بنك تجاري كبير خلاص بنمضي معاه اخر الشهر ده بس طبعاً انت عارف كل واحد له طبيعته كوقت عشان يعرف يديلك الموافقة على التمويل بس حد زي فاليو بيعرف يدي موافقة في 30 دقيقة
04:56
شمس: حلو، وهل انت بتديني مثلاً أسعار مختلفة؟ يعني الـ 3 ممولين اللي عندك ممكن تقولي والله فلان الفلاني ده بيدي سعر أحسن نستنى شوية وناخد منه، أو ده بيدي بسرعة بس هو أحسن واحد فيلا بينا يعني هل انت بتساعدني تديني نصيحة للتمويل؟
عمر: آه، يعني أنا النهاردة بعمل إيه أنت لما بتيجي تقدم طلب للتمويل أنا ببعت للممولين بقولهم والله يا جماعة عمر بعت الحاجات دي كلها فاليو رد عليا في نص ساعة، بعديها بشوية البنك الإستثماري رد لأ انا مش هقسط للراجل ده، أولين قالي تمام فبرجع للعميل وخلي بالك كل واحد له فوايد يعني الفوايد اللي الناس بتبص عليها مش بس سعر الفايدة، في الفايدة وفي حد هيديك العربية بحظر وبدون حظر، في اللي هيديك موافقة بسرعة وفي مش هيديك موافقة بسرعة، في اللي عشان يديك الموافقة هيجي يعمل عليك استعلام في البيت وفي الشركة فكل واحدة ليها إيجابيات وسلبيات
يعني حد زي فاليو رد في نص ساعة وبيعرف يديك موافقة على طول، البنوك عمتاً الوقت بيبقى أطول، الأسعار بتاعتهم هتبقى أرخص شوية بس لما بتيجي تبص على الدفعة الشهرية المقدرة مش هتلاقي فرق كبير، فأنا بديك الخيارات المتاحة كلها لو عاوز تخلص العربية على طول ادي خيار السعر، لو عاوز تستنى شوية تسمع باقية الحاجات بديك كل المعلومات دي في الآخر
شمس: أنا بس عشان البودكاست بتاع فلوس فلازم أسألك إيه أرخص طريقة فاهم قصدي هبقى بدور على أرخص طريقة إني أمول بيها العربية لأن انا عندي ميزانية حتى لو الرقم صغير أنا من وجهة نظري لازم أبص للإلتزام ده حتى لو هاخد يومين تلاتة بس هيفرق معايا قدام ممكن أستخدم الفلوس دي في حاجه تانية فأعذرني إننا دخلت في حتة أقل فايدة
عمر: لأ بالعكس هقولك على حاجه اللي احنا اكتشفناه في العملاء، خلي بالك التعليم المالي بتاع السوق مختلف
شمس: ما هو هدفي هنا، أنا موجود عشان كده
عمر: أنا معاك أنا مش قصدي أنا قصدي كل الناس بتبص على أنا هدفع كام في الشهر، أي عميل محتاج يعرف هيدفع كام في الشهر احنا بالنسبالنا ممكن نبص أنا هاخد فايدة متناقصة 20 مش 21 فممكن تبقى للعميل في الأخر بدل ما القسط بقى 1100 بقى 1150 هو بالنسباله مش فارقه هو آه صح الـ 50 جنيه فارقة بس هو بالنسباله 50 جنيه في الشهر مش دي القصة أخدت الموافقة على العربية على طول وخلصت والدنيا مشيت فاهم قصدي، أنا قصدي أن لازم تبص على القرض بالكامل فمنها السرعة ومنها تدفع ازاي ومنها محتاج افتح حساب في البنك ولا مش محتاج في حاجات محتاج إنك تبص عليها وانت بتاخد التمويل بس احنا أكيد بنوصل كل ده للعميل
07:43
شمس: تمام، انت قولتلي بقى في راجل بيروح البيت، يعني لو أنا ببيع العربية في حد بيجي البيت.. كلمني بقى على قصة البيت مين بيروح البيت فين لأن دي برضه مع المشاوير والوقت والكلام ده كله هل أنا لو اشتريت منك بتجبلي العربية على البيت برضه؟ يعني كلمني على الدليفري بقى في القصة دي؟
عمر: الدليفري احنا شرحنا اننا وانت بتبيعلي العربية انا كده كده بجيلك عند البيت في الحتة اللي أنت عايزها فأنت كده كده وانت بتبيع العربية مبتتحركش من المكان اللي أنت فيه، وأنت بتشتري العربية بقى احنا طريقة الشراء عندنا على الموقع حاجه اسمها (مشاهدة) و(حجز) بنخش على العربية (مشاهدة) إنك بتيجي تتفرج على العربية، فبتختار العربية اللي أنت عايزها بيطلعلك التقويم وبتختار الميعاد اللي انت عايزه فبتحجز الميعاد وبتجلنا عند المعرض بتاعنا بتتفرج على العربية
مشاهدة العربية فيها قيود لحاجات هي مجانية تماماً مش هتدفع حاجه خالص، بس مشكلتها انك عقبال ما تيجي ممكن العربية تكون أتباعت أنا مبقدرش أضمنلك ده، ده أختيار رقم 1 لأن طبيعي ممكن تيجي تتفرج عليها من غير ما تبقى محتاج تدفع حاجه فأهلاً وسهلاً تعالى أتفرج على العربية دي حاجه مفيهاش مشكلة بس لازم تختار الميعاد مينفعش تيجي فجأة كده لأن أنا مش ببيع 4 أو 5 عربيات بس انت مثلاً لو دخلت بي ام هتلاقي 3 أو 4 عربيات وهيقولك والله انا مثلاً في الرفاهية في سقف وجنوط سبور لأ أنا ببيع لك كل أنواع العربيات وكل عربية على الموقع مختلفة عن التانية فلازم بس تقولي أنا عايز اجي أتفرج على العربية دي امتى عشان وانت جاي أتأكد ان العربية دي أجهزهالك
النوع التاني هو (الحجز) ده بتدفع 2000 جنيه بتحطهم بكارت الائتمان بتاعك ده بديلك خيارين أول خيار ان العربية محجوزة لمدة 48 ساعة أنا كـ سيلندر مقدرش أبيع العربية خلال 48 ساعة لحد ما تيجي وتشوف العربية، في خيار تاني أنك تدفع 500 جنيه زيادة رسوم بدل ما تجيلي هجبلك العربية عند البيت فالعربية بتجيلك على الونش بتاعنا تحت البيت، العربية بتنزل بتتفرج عليها والعربية بتكون محظورة لمدة 48 ساعة مقدرش أبيعها لحد ما أنت تقولي خلاص أنا مش عايزها
10:03
شمس: تمام، طيب أفتراضاً انا جيتلك أو العربية جتلي ودفعت وجبتلي التمويل والكلام ده كله ما بعد التمويل، الترخيص والكلام ده كله إيه اللي بيحصل هل أنت برضه بتساعدني برضه في الترخيص؟ وفي فيما بعد البيع برضه في حاجات زي التأمين في ناس بتأمن على العربيات هل انت بتساعدني في القصة دي؟
عمر: أيوة، إحنا بالفعل عندنا باقات تأمين جاهزة فأنت اصلاً لما بتشتري عربية بتمويل، أي عربية ممولة بيبقى معاها تأمين على طول وعندي خيار لو انت مش واخد تمويل للعربية ممكن تأمن على العربية احنا عندنا 2 شركاء بنشتغل معاهم للتأمين كل واحد فيهم بيدفع الباقة العادية والقسط على حسب نوع الخدمة اللي هتأمن على العربية فدي اصلاً موجودة من الاول خالص بنسألك من الأول خالص عايز تأمن على العربية لو كده وأنت جاي بتبقى بوليصة التأمين جاهزة فده أول حاجه
بالنسبة للترخيص احنا عندنا حاجه بقى ظريفة جداً ان احنا في البيع احنا مش بنروح الشهر العقاري احنا مسجلين كتاجر معتمد في المرور فأنا بقدر أطلعلك جواب مبايعة، جواب المبايعة ده زي ما بتشتري عربية جديدة، لما بتشتري عربية جديدة انت مش بتروح الشهر العقاري الراجل بيديلك التوكيل ويقولك يا أستاذ عمر ده جواب المرور، جواب المرور ده بتطلع بيه تروح مرخص العربية فأنا بديلك نفس جواب المرور ده وانت بتشتري العربية من سيلندر فأنت اصلاً لما بتشتري من سيلندر ممكن رخصتها يبقى لسه فيها 4 أو 5 أشهر عايز تطلع على المرور على طول تعمل الرخصة بأسمك بالنسبة للمرور تمام هنقلك العربية باسمك عايز تسبها الـ 4 أشهر برضه تمام بس الشهر العقاري انت مبتجيش معايا الشهر العقاري
شمس: هايل، ودي حاجه أنت برضه بتوفرها على الراجل اللي بيشتري من عندك في الناحيتين البيع والشرا يعني أكيد الاتنين بيفرقوا
عمر: يعني للأسف لسه عشان انا النهاردة عشان اقدر اشتري بعقد مسجل لازم يبقى عقد مسجل في الشهر العقاري، فلازم خطوة الشهر العقاري لكن أنا في البيع الخطوة دي مش موجودة
12:00
شمس: هايل، طيب هرجع لورا بقى عن اللي بيحصل أنا عايز أتعرف على عمر بعد فترة من الحلقة أتعرف عليك وأعرف أنت مين، وكنت بتعمل إيه، درست ايه والكلام ده كله لأن أنت نموذج من رواد الأعمال اللي فتحوا شركة فانا بحب الناس تعرف من وراء كل شركة عشان بيبقى نموذج لحد عايز يعمل حاجه يشوف الخطوات اللي انت عملتها والكلام ده كله.. فمين هو عمر؟
عمر: أنا اتخرجت من الجامعة الألمانية في مصر 2013، أنا كنت بلا فخر طالب فاشل في الجامعة أنا قعدت سنة ونص هندسة وبعد ما قعدت سنة ونص في هندسة قررت أن انا مش بتاع هندسة خالص ودخلت بعد كده دخلت تخصص مزدوج، الاقتصاد والمالية، وبعدين روحت البنك المركزي سنة ونص وأنا في الجامعة كان لما تسألني حلمك إيه أقولك عايز أبقى محافظ البنك المركزي
شمس: ده حلم صعب
عمر: حلم صعب جداً
شمس: أنا مش قصدي إنك صعب توصله، انا قصدي انه حلم فيه أكشن كتير
عمر: ايوة مش لاعيب كورة فاهم قصدي، فدخلت البنك المركزي قعدت فيه سنة ونص، وبعد كده روحت إي إف جي هيرميس
شمس: ده البنك الاستثماري بتاع هيرميس
عمر: بالظبط، وعمتاً الخدمات المصرفية الاستثمارية دي بالنسبالي من أقوي الشغلانات في العالم لأنها بتديلك كده مجموعة مهارات جامدة أوي في كذا حاجه خلفية مالية، مهارات عرض هايلة، انفتاح تمام وبتتعلم كتير وبتبقى طحنه يعني أنا اتفرمت في 5 / 6 سنين بس خلينا نقول انها لحظة محورية بالنسبالي في الكارير بتاعي كعلم يعني، وبعد ما خلصت إي إف جي روحت منصة توصيل الأكل في مصر "المنيوز" قعدت هناك سنة ونص كنت مدير المالية بتاعهم وبعد السنة ونص أبتدت فكرة سيلندر تيجي على الخريطة كده في نهاية صيف 2021 بدأت أفكر كده أنه يلا اتحرك اعمل حاجة جديدة يعني فدي كانت القصة من ساعة ما أتخرجت لحد ما نيجي نبتدي سيلندر يعني
شمس: طيب عمر الناس في العادي ممكن تبقى شغالة في وظيفة ومستريحة والكلام ده كله وبعدين واحد في حالتك جتله فكرة انه عايز يروح لوحده
عمر: واحد مجنون، لأ أنا اصلاً كان عندي الخطوة الأولانية إني أطلع بره إي أف جي، يعني أنا فاكر أمي مثلاً لما جيت أقولها إني ماشي من إي أف جي ده كان بنسبالها واحد مجنون، لأن بقى البرستيج، والانفتاح، و إي أف جي وبنك استثماري وانت سايب كل ده ورايح تشتغل في شركة توصيل طلبات أكل للبيت انت مجنون رسمي
شمس: ليه بقى؟ هل دي بتبقى حاجه في شخصيتك مثلاً أنت مع الوقت حسيتها انا عايز أبقى بعمل حاجه، بفتح حاجه
عمر: بص بصراحة مقدرش أقولك إني كان عندي دايماً الرؤية بتاعة اني عايز أعمل حاجه بتاعتي انا واحد من الناس اللي بتؤمن ان انت لازم تجري ورا العلم مش ورا الفلوس، ولما بتجري ورا العلم الفلوس بتيجي أو كل مره عملت كده في حياتي الحمدلله كنت دايماً صح يعني لما اشتغلت في البنك المركزي سنة ونص مكنتش باخد فلوس لمدة سنة ونص عشان ساعتها البنك المركزي مكنوش لسه بيعينوا، كانوا لازم يعينوا أولاد العاملين كان قرار عبد الناصر عامله ففي النهاية متعينتش قعد سنة ونص ومبخدش فلوس والحمد لله أمي كانت بتديني مصروفي ومكنش عندها مشكلة بس كنت بتعلم صح، كمية معرفة كبيرة
نفس الحاجه في بنك الاستثماري الحمدلله كنت بعمل فلوس كويسة بس برضه كنت بتعلم أكتر بكتير جداً والسبب اللي رحتله كان العلم فأنا بالنسبالي اللي دايماً كان بيحركني اني عايز أتعلم لأن العلم هو اللي بيخليك تعرف تتحرك لقدام فده كان ساعتها بالنسبالي في إي إف جي كنت قعد 6 سنين وخلاص حسيت إن انا خلاص أخدت اللي عايزة من الشغلانة خلاص حسيت اني اتعلمت كتير وبدأت أخش فيما يسمى بمنطقة الراحة، وأنا كنت قلقان جداً من فكرة إني أخش في حتة إني مستريح خلاص مش هعرف اطلع براها وفي نفس الوقت ده أبتدينا نسمع عن الشركات الناشئة والقطاع التكنولوجي في مصر وكان دايماً بالنسبالي حاجه جديدة ولما جيت بصيت على النظام البيئي للشركات الناشئة دي عمتاً ملقتش ان فيهم ناس كتير من خلفية مصرفية فحسيت اني عندي معرفة كويسة جداً ازاي المستثمرين بيفكروا، الشركات بتتبني ازاي، إيه اللي بيخلي شركة أحسن من شركة والحاجات دى كلها طب ما أخش النظام ده، لما دخلت المنيوز أتعلمت كتير جداً كان أول مرة اخش الأعمال التشغيلية ويعني إيه تكنولوجي ويعني إيه منتج ويعني إيه هندسة ويعني إيه نمو وعلم البيانات والتطبيق والحاجات دي كلها فكان برضه اللي حركني المعرفة، اتعلمت في السنة ونص دول علم مرعب
بعد السنة ونص بقى قولت طب ما أنا ممكن بقى أعمل حاجه بتاعتي، النهاردة بقى عندي المقومات الشخصية اللي تخليني أعرف أعمل الحاجات دي، خلي بالك التغير من المنيوز إني بمرتب إلى بلا مرتب كان قرار أسهل بكتير من البنك الاستثماري للمنيوز، يعني الخطوة التانية دي كانت سهلة وبصراحة برضه انا كان معايا شركاء جامد من الأول يعني انا كذا مؤسس أنا مش المؤسس الوحيد للشركة فكانوا معايا من الأول فانت لما بتلاقي ناس بتشجعك وبتحمسك ويلا بنحرك بعض
18:02
شمس: انت معاك كام شريك مؤسس؟ يعني انتم كام شريك مؤسس في سيلندر النهاردة؟
عمر: بص خليني أقولك ان الفرق المؤسس أكتر من 10 أشخاص
شمس: وكل واحد بيعمل حاجه وكل واحد عنده أختصاص
عمر: أه
شمس: لأن انا فاهم إن الشركات الناشئة أنت لازم تبقى بتجيب ناس المهارات بتاعتهم مختلفة صح كده
عمر: صح، أول حد قالي هاجي معاك هو أندرو هو الرئيس التنفيذي للعمليات هو كان أول حد، بعديها جه معتز الإتربي هو رئيس مجلس الإدارة، أنا أعرف معتز من البنك الإستثماري لأنه كان ماسك إدارة الأصول في الإي أف جي وهو كان تاني حد، وبعد كده بقى الفريق أبتدي يجي علينا أكتر فبقينا حوالي 10 أفراد أو أكتر وكل حد عنده مجموعة مهارات مختلفة زي ما بتقول
18:56
شمس: في حاجه أخيره عايز أقولها قبل ما نقفل كلمة أنت قولتها في الفيديو اللي أنا شوفته ان انت مبسوط إن يبقى في منافسة وعايز الناس تفتح زيك كتير دي من أكتر الحاجات اللي عجبتني ان اشوف مؤسس بيقولها عايز السوق يكبر، أنت عايز المشكلة بتاعتك تتحل يعني سريعاً في 20 ثانية عايزك تكلمني على المنافسة في السوق عشان انت ذكرت أرقام كبيرة للسوق ده وقد إيه هو سوق كبير عشان دي من الحاجات اللي كانت عجباني جداً وكنت عايز أتكلم معاك فيها
عمر: بص هو حجم السوق في مصر احنا مفيش أرقام رسمية للمستعمل بس التقديرات أن السوق ده فيه على الأقل مليون عربية في السنة لما السوق بيبقى شغال، يعني في عربيات جديدة وبيبقى في مليون عربية مستعملة بتتباع في السنة، حجم السوق ده بنتكلم في قد إيه أكتر من 10 مليار دولار تداول بيحصل في سوق العربيات المستعملة، مشكلة سوق العربيات المستعملة انه فيه عدد تجار كبير بيشتغلوا في المستعمل ومحدش عنه 1% من السوق
شمس: مفيش حد كبير
عمر: لأ مفيش حد كبير، المنافسة كويسة عشان حاجتين، المنافسة كويسه عشان 1. بنكبر السوق، السوق المستعمل مش هتعرف تسيطر عليه لوحدك، مش هينفع تبيع مليون عربية في سنة، عشان تبيع مليون عربية في السنة انت محتاج يبقى عندك بيزنس مرعب ولا نص مليون عربية في السنة فمفيش حد عمره هيبقى عنده حصة سوقية كبيرة فكل مانبقى ناس أكتر بتخش في السوق ده كل ما احنا بنحسن جودة العربيات المستعملة، كل ما بنخلي السوق مخصص أكتر، كل ما الناس بتبص على المستعمل أكتر، فالمنافسة صحية عشان السوق يكبر ويتحسن والتورتة بتكبر بدل ما انا النهاردة بلعب في تورتة صغيرة التورتة تكبر على كل الناس الموجودة وساعات المنافسة بتبقى كويسة لينا أحنا، خلي بالك لو انا والمنافس بنتخانق على خدمة العميل، كل واحد فينا هيبقى عايز يخدم العميل أحسن لو عامل ضمان 30 يوم، ويجي يعمل 90 يوم هيعلي عليا فاحنا فى الاخر بنصب في مصلحة العميل فكل ما العقلية دي تكون موجودة كل ما بنفيد السوق بشكل أكبر
شمس: أنا بالنسبالي لما يبقى في شريك مؤسس ويجي يقول انا عايز المنافسة تكبر، أنا عايز الناس تيجي معايا السوق ده بجد بيطمني على قوة الفكرة يعني في العادي ألحق أنا أول واحد عملت الفكرة دي فأنا عايز أسرق السوق والكلام ده كله لما انت قولت الكلمة دي هي رنت جرس كده في دماغي ان السوق كبير وفيه فرص وممكن الناس تخش بالعكس فكرتك قوية وصلبة وأنا كواحد مستهلك للحاجه دي أنا جربت الخدمة دي والخدمة دي تعتبر كويسة جداً
عمر: وانا عايز أقولك على حاجه حلوة بقى انت هنا قولتها فكرة اني اجي أعمل الفكرة الأول عشان ده هوس دايماُ عند أي ناس بتفكر في فكرة جديدة، الفكرة مش مهمه
شمس: الفكرة في هذا الزمن ملهاش تمن
عمر: زيرو، وانا بالذات اتعلمت ده في البيزنس بتاعنا احنا انا كم الناس بره اللي بتكلم معاهم بتكلم مع ناس في الهند في أي مكان بره عمر ما حد بيبخل عليا بمعلومة يعني بص أسئلة أي حاجه هيقولي
شمس: المعلومات مفيهاش مشكلة
عمر: انه كل واحد عارف إن التنفيذ أصعب بكتير جداً من المعلومة، أنا قصدي انا هقولك على فكرة بس متسرقهاش مني هي الفكرة مش هتتسرق.. نفذ، كلنا واحنا في الجامعة قعدنا على القهوة بليل نفكر في فكرة شركة جديدة صح؟ شوف كده فكرت في كام فكرة واتنفذت ولا واحدة
شمس: وهو اللي بيعمل فلوس في الزمن ده هو اللي بينفذ، البودكاست نفسه اللي انا بعمله النهاردة مفهوش ولا فكرة جديدة
عمر: هو سيلندر فكرة اتهرست في ستين سوق قبل كده قبل ما احنا نعملها 100%
شمس: وانا حتى لما اقول لواحد حوش واستثمر، والأسهم بتعمل إيه.. كل دي أفكار قديمة هي الفكرة في التنفيذ، الجودة بتاعة المنتج النهاردة ازاي تنفذه وازاي تجبر نفسك تنفذه نفس الكلام عن ازاي تاخد فكرتك الجميلة دي اللي أنا مقتنع انها بتساعد جميع الأطراف ومفيش فيها حد خسران زي ما بيقولوا وتعمل منها أكيد قيمة اقتصادية للشركة أكيد انت بتعمل فلوس من اللي أنت بتعمله النهاردة وتعمل شركة كبيرة وتكبر فأنا معاك 100% والناس كلها اللي سمعانا هي عمرها ما كانت الفكرة هو التنفيذ … عمر أنا طولت عليك جداً أنا أسف
عمر: خالص
شمس: حلقة جميلة جداً أنا انبسطت انك موجود معايا
عمر: وأنا انبسطت معاك جداً
شمس: إن شاء الله السنة الجاية تبقوا في حته أحسن ونتكلم تاني وتقولي انتو بتعملوا ايه ونتكلم بقى أكتر في الأقتصاد بتاع شركتك تبيعوا قد إيه بتشتروا قد إيه الحاجات دي كلها نخش في الأرقام أكتر يكون بس عدى عليكوا وقت ووصلتوا لحاجه معينة
عمر: للي نعرف نتباهى بيه
شمس: إن شاء الله بإذن الله، بالتوفيق ليك ولكل الشركاء ونتمنى إن الحلقة دي تكون حلقة لطيفة للناس اللي بتسمعها وأتمنى أنك تكون قضيت وقت لطيف معانا النهاردة .. ميرسي جداً يا عمر والناس اللي وصلوا معانا هنا بشكركو جداً و اشوفكوا إن شاء الله الاسبوع الجاي
Translation of some words and terms:
Warranty الضمان
Service Contract عقد الخدمات
Definitely بالتأكيد
Maintenance صيانة
Customer العميل
Core Values القيم الجوهرية
Long Lasting Relationship With Our People علاقة طويلة الأمد مع عملائنا
Develop تطور
Normalization العادي
Incentive Discount خصم الحوافز
Approval موافقة
Financing التمويل
Partner شريك
Rates أسعار
Advice نصيحة
Apply تقدم طلب
Financiers الممولين
Benefits فوائد
Pros And Cons إيجابيات وسلبيات
Estimated Monthly Payment الدفعة الشهرية المقدرة
Comportment الإلتزام
Fair عادل
Financial Education التعليم المالي
Communicate نوصل
Delivery توصيل
Process طريقة
See رؤية
Reserve حجز
Showroom معرض
Limitations قيود
Luxury الرفاهية
Fees رسوم
Blocked محظورة
Packages باقات
Premium قسط التامين
Investment Banking الخدمات المصرفية الاستثمارية
Skill Set مجموعة المهارات
Financial Background الخلفية المالية
Presentation Skills مهارات العرض
Exposure تعرض / انفتاح
Pivotal Moment لحظة محورية
Cfo - Chief Financial Officer مدير المالية
Transactions المعاملات
Comfort Zone منطقة الراحة
Ecosystem نظام بيئي
Knowledge معرفه
Business Operational الأعمال التشغيلية
Engineering هندسة
Growth نمو
Data Science علم البيانات
Solid صلب
Co Founders المؤسسون المشاركون
Join ينضم
Chief Operating Officer الرئيس التنفيذي للعمليات
Chairman رئيس مجلس الإدارة
Asset Management إدارة الأصول
Competition منافسة
Estimates تقديرات
Dominate سيطر
Market Share الحصة السوقية
Dedicated مخصص
Execution تنفيذ
Economic Value القيمة الاقتصادية
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #سيلندر #الجزء_الثاني