153. Trading Errors 404 - اللقاء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
(Trading Errors 404) النهاردة معانا لارا أحمد سُليمان مدربة التداول ومؤسسة برنامج التدريب على أخطاء التداول
للمرة التانية بعد وقت قصير وده بسبب كم كبير من ردود الفعل على الحلقه اللي فاتت سواء عندنا او عندها فحبينا نجدد اللقاء معاها ونعرف تفاصيل اكتر عن البرنامج اللي بتقدمه.. لارا بتحاول تمرن المستثمرين او المتداولين في الأسواق المالية وبتحاول تعالج مشاكل كتير بتشوفها في المستثمرين من خلال برنامج التدريب على أخطاء التداول
Ep133 Ep134 Ep135 :تقدروا تسمعوا الحوارنا السابق مع لارا هنا
Lara A. Soliman @LinkedIn : تقدروا تتواصلوا مع لارا هنا
Trading Errors 404 @LinkedIn:اعرفوا اكتر عن البرنامج هنا
(03:06) ليه بتعلمي الناس التداول؟ -
(20:14) هل كون البرنامج مسجل بيساعد الناس ترجع لك بأسئلة مختلفة كل مرة؟ -
(24:43) هل بعد الشهرين هحتاج ارجع اعيد الكلام تاني؟ -
(31:42) تجربتك ايه مع الناس اللي خلصوا الشهرين؟ -
ابعتولنا اسئلتكم واستفساراتكم و استنونا الاسبوع الجاي في حلقة جديدة إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكم في حلقة جديدة من بودكاست كلام ينور
Trading Errors 404 النهاردة انا مستضيف معايا الاستاذة لارا أحمد البرنامج اللي لارا بتقدمه اسمه
هي بتحاول تمرن المستثمرين او المتداولين في الأسواق المالية وبتحاول تعالج مشاكل كتير بتشوفها في المستثمرين من خلال خبرتها الطويلة في المجال هسيبكوا مع الحلقة مش عايز اطول عليكوا اكتر من كده يارب تستمتعوا بيها
(01:40)
عمر: اهلا بيكي معانا يا لارا للمرة التانية انا مبسوط ان احنا كررنا الزيارة الكلام ينور للمرة الثانية في وقت قصير واعتقد ان ده كان جاي من من ردود الفعل على الحلقه اللي فاتت وردود الفعل عندك انتي كمان الناس اللي تواصلوا معاكي
لارا: اه ده حقيقي
عمر: فشكراً جداً على وقتك واهلاً بيكي في كلام ينور
لارا: لأ بجد شكراً ليك انت يا عمر والله فعلاً عارف لما جيت فكرت كده في الحلقة اللي فاتت بجد احنا ماشيين في نفس الطريق فبجد حاجه خطيرة، انت بتفيد الناس بطريقة معينة وده واضح من الناس اللي جت الناس اللي جت بتقولي آه انا عرفت دي من عمر وهو كان بيقول كذا كذا ونقعد نتناقش بقى ازاي الكلام ده هيناسب الشخص نفسه فبصراحة انت عامل شغل حلو جداً جداً
عمر: ربنا يخليكي
لارا: شغلك مميز مش اي حاجه
شكراً ليك انك ادتني امنصة مسموعة برضه انا مقدرة بطريقة مش طبيعية يعني
عمر: لا ميرسي جداً يا لارا وانا بحس ان اللي انتي بتقدميه مهم جداً للناس والنهاردة برضه انا عايز نحط ايدينا كده على حاجات معينة برضه أسئلة بتيجي في دماغي ممكن تكون الناس اللي بتسمعها بتفكر فيها انا دايماً بحاول اسأل اكني حد بيسمع الحلقة
(03:06)
فهبتدي اول حاجه دايماً الحاجات اللي فيها كورسات او بتدي حاجات معينة بتعلمك تعمل حرفة معينة، الناس دايماً بتسأل طب انت ليه بتعلمها للناس مادام انت تقدر تعملها لوحدك وتبقى مثلاً أغني واحد في العالم ليه بتعلمني التداول وخاصة ان الحاجه بتاعتك دي واضحة وصريحة في أسواق المال فهي في إدارة الفلوس فالنتيجة بتاعتها أرباح
احنا متكلمناش في الموضوع ده وانا معرفش انتي بتعمل كده ليه او وجهة نظرك في الموضوع فهسيبك تردي على السؤال الكبير ده
لارا: بص هو سؤال كبير اوي وانا عندي بجد حاجات كتير جداً بزيادة ليه بعمل كده، بص انا لسه بيبي في السوشيال ميديا بس أهم حاجه لازم حد يعرفها انك مش هتتغني بسرعة، ماشي في ناس حققت نجاحات بتثبت أن النظام ده حلو لكن محدش بيقولك تعالى انت هتبقى غني بكرا ده مبيحصلش
عمر: انتي مش بتبيعي الثراء السريع
لارا: خالص، مش لعبتي تماماً مش هقولك تعالى هتبقى مليونير، في ناس بتعلم ده بس مش انا، انا مدربة أداء وهنا في فرق كبير جداً ما بين انك تعلّم السوق وانك تبقى مدرب أداء
عارف أنا من الأول خالص ليا كسنة سنتين خبرة كنت بقول انزل الملعب ووريني مين هيعمل احسن من التاني، مين اللي هيكسب فده انا فليه انا بعمل كده خليني اقولك ايه ان انت بتشوف الرؤية بتاعتك متجسدة يعني انا قعدت قد ايه موظفة جوه شركات السمسرة بدي قيمة معينة هي هي نفس القيمة على فكرة بس شكلها كان بيختلف تقرير انا اللي بقول بيع امتى اشتري امتى كل حاجه بدي توصيات الدخول ووقف الخسارة بأوقات تنفيذ بكميات كل ده كان بيبقى موجود الاعتماد عليا كتير جداً لأ ما هو انت ممكن نغير الشكل ده خالص وطالما كده كده هيحصل تنمر، لأنك عارف طبعاً ان الأجواء داخل شركات السمسرة تنمر شوفت انا عملت ايه شوفت مش انا قولتلك هيحصل
عمر: نوع من التنمر يعني
لارا: وانا احب التنمر اوي الصراحة يعني اساساً بعرف أرد، فالفكرة عارف انا مكنتش شايفة نفسي اني اعرف او مش عايزة ادرس مادة علمية يعني انا مش هقعد امسكلك كتاب مش هو ده واتعرض عليا اني اروح ادرس تحليل فني انا مبدرسش تحليل فني و مش مهتمه ادرس تحليل فني لاني عارفه انه محدود وعارفه انه مبينفعش في إيه
فأنا عندي نظام ممكن اي حد يعمله، فبدل ما تيجي تقولي اوكي انتي ليه مبتعمليش ده انا عملت ده لسنين بسجل حافل وكنت بفيد بيه الشركات والناس المحترفين اللي مش محتاجني على فكرة يعني لو مشيت تاني يوم المحترف ده مش محتاجني في حاجه
فأنا لما جيت سبت قولت انا فعلاً السؤال اللي انا كنت بحاول اجاوب عليه بالبرنامج بتاعي ازاي واحد من اصدقائي اللي انا معاهم من ابتدائي لأن عندي اصحاب مكملين مع بعض ازاي اخلي الشخص ده اللي هو اصلاً عنده مسار مهني مختلف تماماً مشغول في حتة تانية خالص ازاي اكرر ادائي فإنه يقدر يعملها ليه لأنه مش فاضي وعنده كارير فسخيف اني اجي اقوله تعالى ادرس تحليل فني 4 سنين وتعالى اتعلم تحليل مالي 4 سنين وتصميم مالي سنتين ونص فاهم ده سخيف فانا كنت عايزة اقصر طريق يقدر يحقق بيه نفس الارباح لأن دي كانت مشكلة عايزة احلها فانا حسيت اني لو حليت المشكلة دي للناس اللي زي صحابي فأنا كده عملت حاجه جامدة جداً فده كان اول سبب ازاي اخلي واحد بمسار مهني مختلف تماماً مش عنده وقت انه يفضلنا نفسه ازاي تعمله اقصر طريق في حتة زي دي وكان عندي فالأول اول مرتين تلاتة شكوك انك ممكن تقدر تكرر نفسي يعني وبعدين لما لقيتها بتحصل وبيعدوا يعني اللي انا بوعد بيه في سنة حصل في شهرين، حصل أكتر منه في شهرين فده اعتمد على حاجات كتير جداً انا ليه بعمل كده لأن البرنامج ده اول حاجه كنت اعملها لأن انا بنيت اسم قوي لنفسي في الحتة اللي انا كنت فيها جوه الشركات انا كل الشركات تعرفني، مديري الصناديق يعرفوني عارفين لارا بتعمل ايه فمكنش ينفع اني بعد ما خلصت اطلع اعمل حاجه متلقش بالاسم اللي انا عملته جوه الشركات فالبرنامج غني جداً في كمادة وغني جداً في الافكار فهو تقدر تقول انه تحقيق ذات برضه انك عرفت حاجات كتير فلما تيجي تعمل حاجه بقى تعملها بالطريقة اللي تليق بيك فالعلم اللي جوه هو طبعاً سلوك داخلي وعلوم يعني هو مش علم نفس خالص الناس بتفتكر انه علم نفسي لكن جزء منه تحقيق ذات بتشوف انا في السوق ده بقالي قد ايه فانا عاوزة بقى اسيب اثر مع حد ميعرفنيش يعني جوه الشركات دي ناس انا لو غبت تاني يوم هما بيعملوا بشكل كامل هما 100% قادرين يكملوا من غيري
عمر: اه عاوزة تاخدي حد معندهوش الخبرة خالص بادي من الصفر معندهوش اصلا معلومات جايه من دماغه او من خبرته في الكلام ده وعاوزة تطبقي معاه نفس التجربة وعاوزة تشوفي هل هتنجح ولا لأ
لارا: بالظبط، وكاوقت يا عمر بص احنا برضه عايشين في وقت كل حاجه بتاخد وقت جامد جداً فايه الاحسن انك يبقى عندك فلوس وهتستثمر نفسك بس مش هيكون أفضل لو استثمرت نفسك في الكارير اللي انت شغال فيه اصلاً؟ صح
عمر: مظبوط
لارا: كوقت وكفلوس، يعني انا في الموارد البشرية فهاخد أعلى شهادة في الموارد البشرية ولو هي بتاخد سنتين انا هقعد سنتين باخد الشهادة دي عشان في الاخر هبقى مش عارف ايه فهو كل واحد عنده مسار مهني مختلف فاوكية عايز من وقت انك تعمل حاجه تانية الوقت ده مفروض يكون قليل، شغل جانبي حاجه تديك حرية مالية في المستقبل فأنا كان بالنسبالي مهم جدا ان بتاع الموارد البشرية عايز بقى يبقى عنده استثمارات متقلهوش بقى تعالى ادرسلي 6 سنين تحليل فني أصله هو الوعد أنه تعالى هتدرسها في 4 فتلاقي نفسك لابس في 6 في 7 مانت مكنتش تعرف بس انت اتواعدت من الاول انهم 4 سنين بس وهتلاقي نفسك اتسحلت براحة والتحليل الأساسي بعد ما تاخد المستوى الاول تلاقي المستوى التاني اصعب وانا لازم اخد كورسات وبص انا شايفه ان وقتك قليل استثمر وقتك الكبير اوي بعد الشغل في الحاجه فعلاً اللي هتطورك في مسارك المهني واي حاجه تانية عايز تعملها المفروض تاخد الطريق الاقصر فأنا حرفياً قدرت ألخص خبرة 20 سنة تقريباً في شهرين! وكل حاجه انا بحاول اجاوب جوه البرنامج على إيه اسهل طريقة، ايه اسرع طريقة فاهم
انا كل اللي جولي من كلام ينور كان بيقولولي هو فعلاً في 5 دقايق؟ اه في بس انت لازم تدرس الشهرين عشان تتعلم ازاي تعملها في 5 دقايق مانا لخصتلك 20 سنة خلاص انت بس محتاج الشهرين بقى وركز في الشهرين لان انت بعد الشهرين دول يلا بينا، يلا بينا انت مش هتسأل نفسك مش هتقف مش هتعطل قدام كل قرار ده كده ولا كده ففي مثلاً انتي ليه بتعملي دي حاجات كتير جداً غير اني اوفر على الناس دي أعمال خدمية واللي انا اكتشفته ان المصريين مش فاهمين اوي يعني ايه الأعمال الخدمية يعني انا دايماً ببقى عاملة اعلانات على الفيسبوك والناس بتجيلي من اعلانات فهما مش فاهمين
بس خليني اقولك في حاجه إيجابية جداً في السؤال بتاع انتي ليه بتعملي كده.. السؤال ده يا عمر استحاله تسأله لو القيمة بتاعة الحاجة اللي انت شايفها مش كبيرة خالص استحالة يعني مثلا كورس بيعلمك ازاي تعمل اعلانات على الفيسبوك انت عمرك ما هتشكك في اللي عامل الكورس انت ليه بتعمله طب ما انت ممكن تعمل منه فلوس طيب ما هو كده كده عامل منه فلوس فاهم استحالة لأن القيمة بتاعة الكلام ده مش كتيرة وكبيرة انت لو دخلت على اليوتيوب فالقيمة انا عاملة حاجه اسمه اوفر انت بتاخد اوفر انت لخصت 20 سنة في شهرين لخصت الوقت اللي هتجرب وتغلط بخسارة فلوس اصل انت مبتبقاش بتجرب لأ انت بتخسر فلوس ووقت ومجهود وسحلة بقى ايه اللي حصل طب دي ليه كده ودي ليه مش كده واهم حاجه يبقى معاك مرشد فالعرض شامل بقى ان القيمة بتاعة البرنامج انك لخصت 20 سنة في شهرين انا عاملة برنامج مجمعالك فيه كل الغلطات اللي بتتغلط اللي انا عملتها وانا التحدي معايا مش تعالى انا هعمل احسن منك انت ممكن تعمل احسن مني في شهور عادي جداً وحصلت يعني في ناس كتير من اللي دخلوا البرنامج عملوا اكتر من اللي انا بوعد بيه في سنة فده زي ما بقولك إثبات مفهوم مش انه تعالى اعمل اكتر من وعد البرنامج في شهرين وده بيعتمد على حاجات كتير جداً بيعتمد على انهم فعلاً قدروا ازاي يطوروا معتقداتهم يعني انا بالنسبالي بعمل كده ليه ماهو انت كده بتدي حد قوة غير عادية انا بديك القوة انك تستغني عني حتى لو حابب انت هتعرف المعلومات خلاص انت بقى مش معتمد على محلل ولا رأي مين ولا رأي مين فزي ما بقولك بص لما بيكون القيمة بتاعة البرنامج او الكورس كبيرة الناس بتسأل السؤال ده هو عمره ما هيسأل السؤال ده لو مش شايف ان القيمة كبيرة
عمر: مفهوم
لارا: بس هنا في حاجه تانية يعني انا حولت دراستي واللي انا عرفاه حولته لشغل في واحد هنا في مصر ولد شاطر جداً يمكن من اشطر الناس هو بيدي كورس والكورس ده هو طبعاً عنده اعمال كتير هو بيدي كورس ازاي ان انت تحول شغلك لحاجه بتجيبلك فلوس والناس عادي بتروح البرنامج بتاعة وبيبقى من مختلف اتجهاتهم محدش بيسأله السؤال ده محدش بيسأله انت ليه بتعمل كده وانت مش عارف ايه لأنه ادرك انه محتاج يسيب اثر عارف لما يبقى في رؤية عندك ازاي هقدر افيد المستثمر اللي اساسا داخل مش واثق فينا هو داخل شايف ان كل اللي بيشتغلوا في البورصة دول نصابين وبياعين هوا طيب بص المعلومات اهي ادخل نفذ بنفسك انا مش عايزة فلوسك اديرها لك المعلومة اهي ادخل نفذها مش بتحدي ومش وريني نفسك المعلومة اهي بغلطاتها ومتعملش الغلطات دي والحاجات دي صح هتوصلك لأداء وحش والحاجات دي هتوصلك لأداء كويس بحاول لأني عارفه الرفض ده كتير جداً بيبقوا عايزين يدخلوا البورصة لكن مش واثقين لا في الشركة ولا في المحللين ولا في مديري الحساب طيب اوكي انا عملتلك منتج ان انت تدخل تتعلم كل حاجة ده انا بهاجم اللي بيحصل من التحليل الفني والمالي وبهاجم اللي بيحصل من إدارة المحافظ بهاجم التلاتة عشان اوصلك لنتيجة انت تقدر تكررها لوحدك
فالقيمة كبيرة اوي ان ايه ده انا مش هقعد 10 سنين بدرس
طب تعالى نحلل الـ 10 سنين دي كتحليل فني سواء
(ٍسي اف تي) أو (سي ام تي) هتدفعلك 2500 دولار (سي اف أيه) مستريح 6000 دولار من غير كورسات انت بس هتذاكر مع نفسك طيب هتتعلم تصميم مالي على كل حته وهيديك سعر هتتعلم (سي بي ام) انا اقل رقم سمعتهولها كان 38 ألف جنيه اخر مره من سنين كتير فأكيد غليت عن كده
طيب التكلفة دي كلها احنا ممكن نجمعهم في 10 ألاف دولار ده لو انت مأخدتش كمان كورسات تقويك في الحاجات اللي انت داخل تدرسها وده هتخلصه في قد إيه! انا بقى تفرغت للقصة
عمر: وحاولتي تنزلي الوقت مش بس الفلوس الوقت والفلوس وتاني انا معتقدش انك بتقولي للناس ما تدرسش او ما تعملش بس انتي بتشيلي من عليه رهبة الدخول يعني في دايماً تحيز بيمنعك انك تاخد مخاطرة أو خايفة يحصل مشكلة كبيرة من اني ابتدي استثمر اه انا بسمع كلام ينور او بسمع عمر وعمر بيقول معلومات لطيفة والكلام ده كله بس انا برضه لسه خايف ابتدي ففي ناس بتبقى محتاجه انها يتمسك ايديها صح كده، زي مثلاً لو حد راح الجيم هو لو راح لوحده هو مش هيعرف يتمرن محتاج حد في الاول يديله زقه
لارا: ويشوف اذا بيعمل الحاجه صح او غلط
عمر: بالظبط ، فهنا انتي مش بس بتقصي الفلوس انتي بتقصي الوقت والمجهود والتوتر بتاع الموضوع لأن الموضوع اصلا موتر
لارا: ممكن استخدم المثل اللي انت قولته ده واضيف عليه حاجه انا اخدت التربية البدنية من النادي بتاعي قوية جداً وكنت على طول بتمرن وقعدت سنين بتمرن حاجه جامدة جداً وجيت لما اتحجبت حتة اني انزل اروح جيم تقيله على قلبي انا بحب اكون في الملاعب فعاوزة امرن نفسي في البيت انا عندي من المخزون من التربية البدنية ما يسمح اني امرن نفسي في البيت فسنين بمر نفسي عادي جيت اخر 4 سنين عملت حاجه غلط هنا انا محتاجه كوتش هل انا معنديش تربية بدنية كافية اني اصلح او اعلم نفسي مانا كنت بمرن نفسي بس إدارك انك امتى محتاج مدرب دي حاجه تانية خالص انا نزلت للكوتش حرفياً بقوله خليك كده باصص عليا وقولي ايه الحركة اللي بتطلع مني غلط بتعملي إلتهاب في الأوتار فهنا هل انا مش بعمل الحركة؟ بعمل الحركة وممكن اكون بعملها صح لكن اكيد في حاجه في التكرار في الطريقة
عمر: ده غير ان احنا عجزنا برضه
لارا: ايوة اكيد، فانت محتاج مدرب ياخدك من الأول سيبك من ان انت كنت بتمرن نفسك لأ انت فعلاً انا تحت امرك ووصلني انا حرفياً روح قلت للمدرب وصلني لشهرين من غير إصابة مبقتش عارفه اعمل شهرين من غير اصابة كل شوية يحصل اصابة فهنا دور الكوتش جه فإنه يقولي انا بعمل ايه غلط انت ممكن تبقى عارف وعندك من المخزون ما يسمح انك تمشي بيه نفسك لكن مثلاً بتتحرك في مكانك مش بتجيب النتيجة اللي انت عايزها فساعتها نروح لمدرب يعرف الغلطة فين بالظبط ويقدر يعالجهالي وانا واقفة فهو ده اللي انا عملته من غلطات
بس تعالى نشوف مسؤولية المدرب هل مسؤولية المدرب انه ينزلني من البيت ويوصلني للجيم؟
عمر: لأ اكيد
لارا: استحالة فهنا المدرب ملهوش انه يشيل هم انضباطكي صح
عمر: مظبوط
لارا: ففي حاجات انا هعملك اسرع طريق على الأقل اعمل الجزء الخاص بيك والجزء بتاعك هو انك تركز معايا شهرين يعني انا لما كنت بدي الكورس لايف حسيت ان في حاجه ناقصة وحاجه كبيرة ناقصة، اه هو بيسمع مني مباشرة انا اللي بشرح الموضوع من الأول مباشرة بس يا سلام لو الكلام ده مسجل والتطبيق هو اللي معايا انه يسمع الموضوع اتسجل فهو هيسمع المادة العلمية او الفكرة بتاعتي ويجي بقى وهو بيطبق اه لارا طب بصي الفكرة دي كذا كذا هنا بقى التدريب اللي في الموضوع مش ان انا اقعد اعيدلك انا مش مدرسة ومش بستمتع بالتدريس كمان يعني انا فعلاً مع خامس مرة اضطريت اعيد الكورس لايف كنت هتجنن مش طايقة نفسي ومتعصبة ومضايقة وخلاص مش عايزة اكمل بس الفكرة ان في قيمة كبيرة اوي حرام انها تروح هدر يعني بعرف اعمل ده وبعرف اعمله كويس جداً وساعتها كان في ضرورة ملحة اني ابتديت اسجل وانا بطلع البرنامج لايف خامس مرة وقولت خلاص انا كده هما دول يخلصوا وهيكون اتسجل المهم اضطريت اديه مرتين لايف كمان لان المونتاج اخد وقت كبير جداً لانه برنامج تقيل دسم يعني مش هتخش تلاقي معلومتين وخلاص فانا ليه بعمل كده انا بديلك قيمة
(20:14)
عمر: هسألك سؤال مهم هنا بما ان البرنامج متسجل هل ده بيساعد الناس ان هي ترجعلك بأسئلة مختلفة كل واحد وقف في حتة مختلفة وفكر فيها فصحت حته جواه محتاج يقف ويرجع يسمعها تاني ميعرفش فيرجعلك تاني مثلا في الحتة دي بالذات يعني هل ده بيخليه يفلتر؟ الحاجه التانية برضه هل عشان الكورس متسجل فده بيمنع الناس انهم يقاطعوا في الشرح يعني انا بحس لو واحد بيتفرج على حاجه مسجلة بيبقى مركز معاها لو واحد قدامه حد لايف هو ممكن يوقف ويقطع تفكير والكلام ده كله يعني عايزك تجاوبيني على السؤالين دول برضه رأيك فيهم إيه
لارا: سؤال حلو اوي اوي ويمكن ده اللي خلي التسجيل يتأجل معايا كذا مره يعني انا اخدت قرار اني خلاص من خامس مرة لايف اني هسجل لأن كل مرة طلع بنسخة مختلفة والافكار فيها مختلفة عن المرة الاولانية انت عمال تزود في افكار، بتزود نقاط توضيح انه مثلاً كذا كذا، فانا لما جيت اسجل سمعت المحاضرات اخدت كل الملاحظات اللي عاوزة اقوله وبعدين رحت مسجله لما عملت كده الأسئلة من كل وحدة من كل واحد بيسمع مببتقاش واحد في واحد مثلاً في وحدة مثلاً يقف قدامها كتير مش عارف فآه الاسئلة بتبقى مختلفة كل واحد عنده اسئلة مختلفة والتجربة بتبقى شخصية اكتر لان واحد بيخاف اوي من الخسارة مش عايز يعرض جنيه للخسارة وواحد تاني بص انت بتحاول تفرمله مش عارف فده ممكن يطلع منه اسئلة في وحدة معينة وده ممكن يطلع منه اسئلة في وحدة تانية
عمر: بس كلهم واخدين نفس المعلومة المسجلة
لارا: كلهم واخدين نفس المعلومة بس مش هيستقبلوها بنفس الطريقة ومش هتبقى أثرها عليهم واحد هو فعلاً بيعاني من المشكلة دي ولا لأ هيطلعله اسئلة كتير جداً مش بيعاني منها هتلاقيه معاها عادي بس بيقولك انا ممكن استخدمها ازاي يعني انت تطورت بما يكفي من النضج في الحتة دي والأفكار عندك ومش عارف ايه فانت هتعرف تستغلها فهتبقى حلوة اوي على عكس اللي لسه عنده مشكلة في الحتة هو محتاج يتخطى المشكلة الأول وبعدين يعرف يستغل الحلول فبتبقى كده
في حاجه في اللي انا بعمله هو انا خلاص عملتلك البرنامج والبرنامج ده بيعلمك ازاي تدير محفظتك في البورصة من غير الاستعانة بخبير من غير ما تكون معتمد على لا محلل مالي ولا محلل فني انا اديتك السلطة دي والكلمة دي انا بقولها على طول كان روبرت كيوساكي قال في 3 مصادر دخل دخل مكتسب ده انا مش هعرف اساعدك انك تروح تشتغل شغلانه بدوام كامل من 9 لـ 5 الوظيفة الطبيعية او دخل الاستثمار أو الدخل السلبي فانا الاتنين التانين ممكن اقدر اساعد فيهم طب معملش كده ليه بقى وهو ده فهي الفكرة في حتة الدخل السلبي تعالى نتكلم عليها لانها مشكلة عند ناس كتير بس انا اقدر اساعدك في دخل المحفظة والدخل السلبي ممكن اقولك إيه اللي ينفع وإيه اللي مينفعش، دخل المحفظة دي لعبتي فهنا انت ليه مش عاوزني احول صميم دراستي لبرنامج يفيد الناس بجد انت هتروح تتعلم تحليل فني هتلاقي نفسك بتلبس في الحيط وبتخسر من 40 لـ 60 % هتروح تتعلم تحليل مالي هتلاقي نفسك مشلول في افكار قاعد مستني ان شاء الله لما التارجيت يجي خلال الـ 5 سنين الجايين انا معنديش الكلام ده انا معنديش ان سهم يعطلني 5 سنين عشان وهم او وعد ممكن ميجيش اصلاً عشان في محلل عمل التخمين بتاعه وقالك انه ان شاء الله كمان 5 سنين هيبقى بالقيمة دي طب افرض محصلتش صح في اسهم كتير جداً انا ممكن اقولك امثله يعني من سوق مصر سهم اطرح بـى15 جنيه انا مديه عليه إشارة بيع في 2015 بـ 67 قرش انا لسه عندي التقرير سهم تاني اطرح بمش عارفه كام دولار حرفيا هو بكام سنت فاهم فانا عندي ده هو قعد كتير جداً مشلول السهم قعد كتير جداً بينزل بس فمعنديش انا حتة اني اقعد اسمع محلل يقولي اصله ان شاء الله كمان 5 سنين
(24:43)
عمر: انتي بتحاول تخليهم كل واحد يبقى عنده رأيه الخاص يعني الرؤية بتاعته اللي بتناسب النظام بتاعه وشخصيته وبيناسب تحمله للمخاطرة مخصوص ليه فهو بيتصرف، طيب هسألك سؤال تاني مهم انا النهاردة اتشجعت وروجت الجيم ومخلتش المدرب يجي ياخدني انا روحتله وعملت الشهرين عملت الجزء اللي عليا واتعلمت واشتغلت.. هل الشهرين دول خلاص إلى ما لا نهاية هينفعوني ولا انا هحتاج تاني مع الوقت ارجع اعيد اني اتكلم مع حد تاني يعني كلميني ما بعد الشهرين
لارا: خطير السؤال ده دلوقتي وخليني ارجع سنه وانا قولتها في واحد من الندوات اللي عملتها على اني خسرت فلوسي مرتين
عمر: واعتقد قولتي في الحلقة اللي فاتت معانا
لارا: انا تاني مره دي كانت لحظة من الإدراك عارف لما الدنيا تنور فجأة انا ساعتها لما بصيت حواليا ساعتها ملقتش حد فانا عاوزة اعمل مجتمع انا عاملة مجتمع دلوقتي من ناس قليلة جداً هما ناس عايزين يعملوا حاجه يعني مثلاً في حد جه معايا من كلام ينور هو دلوقتي بيخلص فهو حرفياً كان خطير في المجال بتاعه مجال بعيد تماماً عن البورصة ميعرفش اي حاجه عن البورصة ودخل من اول السنة ماشاء الله ربنا يبارك يعني عمل 25% لا كلمته كلام اقتصاد مجعلص انا نفسي بسمي كلام الاقتصاد ده كلام غليظ اوي عارف كلام مبيتبلعش انا عمري ما حبيت الاقتصاد فانا لا علمته ده ولا علمته تحليل فني لأ انا فعلاً اقصر حاجه وانا في اخر اجتماع معاه قالي اصل انا لحد دلوقتي برضه فى حاجات كتير على البورصة انا معرفهاش قولتله ومع ذلك انت عامل 25% هل بقى انك تعمل أرباح كان معتمد على المعلومات اللي كانت هتجيلك من تحليل فني وتحليل مالي قالي لأ هو خلاص كده حرفياً اني انا مش محتاج ومع ذلك عمل فيعني ما بعد انت هتعيد انا نفسي يا عمر مهما حكيتلك مش انا اللي كاتبه البرنامج، الافكار بتاعتي والحلول بتاعتي، حلول مستوحاة من محترفين اخرين في المجال، وحلولي انا كلياً وانا بسمع البرنامج تاني انا بيجيل إلهام وبسجل نوتس يعني البرنامج نفع معايا انا في أدائي انا فهو استحالة مينفعش معاك استحالة انا براهن على انه استحالة مينفعش مع حد جديد بيبتدي
الفكرة في ايه لو حد بيقولي انا المحاضرة التانية دي انا سمعتها 3 مرات انت بتتكلم جد ولا بتبالغ بيقولي لأ هي عجبتني لدرجة اني سمعتها 4 مرات انا نفسي في محاضرات معينة بعيدها في وحدات معينة خطيرة احنا لو عملنا خلاص
بص يا عمر الناس بتسأل ان ليه بتعمل كده لأن القيمة بجد عظيمة انت خلاص هتتعلم حاجة اه ممكن تعيدها اكيد بس هنا في حاجه كام من لاعب كره حاول انه يبقى مدرب ومعرفش هل عندنا مثال مشهور؟
عمر: انا في الرياضة مش خبير اوي بس في لعيبة كتير الكوتشات اصلاً الشاطرة مكنوش لاعيبة كويسين يعني معظم المدربين التوب في العالم مكنوش لعيبة كرة كويسين، ومثلاً في الدوري الانجليزي لو افتكر على الجيل بتاعنا لامبارد وجيرارد كانوا لاعيبة كويسين اوي بس منجحوش كمدربين يمكن هينجحوا قدام بس لحد دلوقتى محصلش
لارا: فهو مش شرط انك تبقى شاطر في حاجه فتبقى مدرب شاطر، انا براهن على نفسي في الحتة دي يعني عارف في براعة في حتة معينة كده انا عارفه ان محدش هيعرف يوصلها دلوقتي حتى على الاقل اصل هو كمان الكلام مش مكتوب من علم مش من كتب يعني بس يعني هو جزء كبير منه سلوك فانا خلاص طالما انا شايفة اني احسن حد في الحتة دي وحتة محددة جداً
عمر: حتة صغيرة جداً
لارا: حتة صغيرة جداً بس انا شاطرة فيها وعندي خبرة سوق وخبرة ايه اللي بينفع وايه اللي ما بينفعش وعملت كل الغلطات زي ما بقولك انا التحدي معايا اغلط غلطة انا مغطلتهاش قبل كده دي التحدي الحقيقي مش انك تعمل اكتر مني
عمر: ومش بتوعدي بعوائد احنا عايزين نغير الخطوات
لارا: لأ في وعود بعوائد
عمر: اه بس اعتقد التركيز على الخطوات أهم من النتيجة اللي ممكن الواحد يكون دخل السوق في أعلى نقطة ليه النهارده فهياخد شوية وقت لحد ما يعمل فلوس او ايا كانت الظروف اللي دخل فيها وواحد تاني دخل بالعكس دخل والسوق واطي والسوق طار بالصدفة ففي جزء توفيق الوقت
لارا: ايوة حلوة دي بالصدفة، شايف الصدفة دي ما نحط نفسنا في إتجاه الصدفة
عمر: صح
لارا: ليه موقفني مش عايزني اقولك الصدفة بتيجي ازاي
عمر: والصدفة ممكن تبقى جميلة
لارا: لما تبقى مستعد والفرصة تيجي خلاص انت دخلت نفذت بس لما متبقاش جاهز خالص وقاعد مستني تعرف حاجه من الهوا انت مش عارف هي ايه
عمر: احنا بندرس كمان العلوم اللي اتحطت في قوالب يعني هندسة طب الكلام ده في هيكل للعلم نفسه العلوم السلوكية عموماً اصعب لان الانسان متغير وكل واحد له شخصيته وله طباعة وثقافته وخلفيته فاعتقد ده كمان مصعب الموضوع انه يبقى في قالب واحد
لارا: وبص اللي هينفع معايا مش هينفع معاك، واللي هينفع معايا انا مثلاً بحب اركز على حاجات معينة انت لأ انت واحد مسؤول فاهم مقدرش اخد ريسك وكل واحد واقف في حتة في حياته هو أدرى بالمخاطرة اللي ممكن ياخدها واللي مش هيقدر ياخده فلازم تحيط نفسك فيما بعد البرنامج في حاجه يا عمر برضه حرية الاستسلام، خليني اسألك سؤال إلى أي درجة هتكون ملتزم إذا كانت حياتك معتمده عليه؟
عمر: لو انا حياتي متوقفة على اننا اعمل فلوس من الموضوع ده
لارا: بالظبط انا قلتلك انا لخصت سنتين في شهرين وانت عايز حاجه اوي انت عايز تدير محفظتك بنفسك دي حاجه كبيرة على فكرة دي حاجه ممكن مديري صناديق يخلصوا ويبقوا لسه متعلمهاش كويس يقولك انا لسه هتعلم بتسمعها وبتلاقي مدير صندوق بقالة 20 سنة بيشتغل ويقولك انا رايح اتعلم إدارة صناديق التحوط لانه شايف انه لسه، يبقى انا لخصتلك 20 سنة في شهرين لو انت فعلاً عايز تنجح نفسك هل مستعد تعمل الشهرين ولا مش مستعد
عمر: المفروض على الأقل تبقى ملتزم للفترة دي
(31:42)
عمر: طيب انتي المجتمع ده بعد شوية هل هو ممكن يرجع يكلمك تاني يقولك انا عايز تنشيط، انا مثلاً واقف في حتة معينة التجربة بتاعتك ايه بقى مع الناس بعديها؟
لارا: بص هقولك برضه التجربة بتاعة ان يبقى معاك المعلومة وتدخل تنفذها على طول، في اللي بيعرف المعلومة وادرك انها معلومة وغير على اساسها وفي اللي بياخد المعلومة يحس انها ناقصة اصلها مش كاملة ما هي عمرها ما هتبقى كامله احنا بناخد قرارات في ظل غياب معلومات لكن حد غيرك اخد نفس المعلومة ودخل نفذ بيها انت مستني حاجه ايه هي الحاجه غير معروفة طب هنفضل قاعدين مستنين قد ايه لأن المعلومة اهي خلصت دلوقتي اللي عليك أكشن، في واحد بعد ما خلص هو كان خلص من الناس اللي اخدوه لايف اتسحل في شغله وكان عنده كام مشروع كده خلصهم ورجع قالي لارا انا محتاج تنشيط من الأول وهاخد من الأول فابتدي يسمعه مسجل بقى لاني بطلت اديه لايف بس.. ميرسي جداً يا عمر بجد
عمر: ميرسي جداً يا لارا
لارا: انا استمتعت جداً بالكلام معاك
عمر: ربنا يوفقك في اللي انتي بتعمليه وشكراً جداً على وقتك
لارا: ان شاء الله
عمر: شكرا جداً على وقتكم معانا واشوفكم ان شاء الله الاسبوع الجاي
Translation of some words and terms:
Feedback ردود الفعل
We're Sort Of Walking In The Same Path نوعا ما نسير في نفس المسار
Fine Tuning الضبط الدقيق
Recognizable مميز
Performance Coach مدرب أداء
Vision Materializing رؤية متجسدة
Value قيمة
Recommendation توصية
Entry Target هدف الدخول
Stop Loss إيقاف الخسارة
Bullying تنمر
Track Record سجل حافل
Duplicate نسخة مكررة
Performance أداء
Career Path المسار المهني
Ridiculous سخيف
Financial Modeling تصميم مالي
Fund Managers مديري الصناديق
Material مادة
Ideas افكار
Self Actualization تحقيق ذات
Behavior Inside سلوك داخلي
Psychology علم نفس
Fully Function تعمل بشكل كامل
Hr موارد بشرية
Side Hustle عمل جانبي
Financial Freedom حرية مالية
Fundamental Approach التحليل الأساسي
Service Business الأعمال الخدمية
Try And Error المحاولة والخطأ
Mentor مرشد
Proof Of Concept إثبات مفهوم
Power قوة
Rejection الرفض
Dissect يحلل
Physical Education التربية البدنية
Repetition تكرار
Urgency ضرورة ملحة
Recording تسجيل
Explanation Points نقاط توضيح
Sessions محاضرات
Notice ملاحظة
Module وحدة
Experience تجربة
Developed Enough Maturity تطورت بما يكفي من النضج
Technical Analysis التحليل الفني
Fundamental Analysis التحليل الأساسي
Earned Income دخل مكتسب
Portfolio Income دخل الاستثمار
Passive Income الدخل السلبي
Illusion وهم
Evaluation التخمين
Frequencies الترددات
Webinars ندوات عبر الإنترنت
Epiphany
Realization إدراك
Nevertheless ومع ذلك
Profits ارباح
Inspired مستوحاه
Exaggeration مبالغة
Extremely Specific محددة للغاية
Behavioral Science العلوم السلوكية
Luxury To Surrender ترف الاستسلام
How Committed Would You Be If Your Life Dependent On It إلى أي درجة ستكون ملتزمًا إذا كانت حياتك تعتمد عليه؟
Hedge Fund Managing إدارة صناديق التحوط
Refresher تنشيط/ تجديد
Undefined غير معرف
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #TradingErrors404 #الجزء_الرابع