134.Trading Errors 404 - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
(Trading Errors 404) بنكمل النهاردة الجزء الثاني من لقائنا مع لارا أحمد سُليمان مدربة التداول ومؤسسة برنامج التدريب على أخطاء التداول
خبرة أكثر من 16 سنة في الشركات مرنت الآلاف من السماسرة و مديرين الحساب على التداول في الأسواق المالية
Lara A. Soliman @LinkedIn :تقدروا تتواصلوا مع لارا هنا
Trading Errors 404 @LinkedIn :اعرفوا اكتر عن البرنامج هنا
:في الجزء الثاني
(01:40) هل اللي انا وصلتله لحد النهاردة هيعمل لي تطور كإنسان في اتخاذ القرار في شغلي في مجالات أخرى؟ -
(11:20) هل بتشوفي ناس بيبتدوا وفي نص الوقت بيغيروا فكرهم؟ -
(13:48) هل بتشوفي تغير في الشخصية بعد لما بيعدي رقم معين؟ -
(22:30) لو واحد غلط هل بتلومي على الشخص ولا ساعات بتبقى الظروف خارجه عن الشخص اللي بينفذ؟ -
(26:35) هل البرنامج بتاعك هيتغير في المستقبل؟ -
(37:23) لو عندي كذا فرصة، ازاي اقيس الفرصة؟ -
استنوا الجزء الثالث من لقائنا مع لارا الأسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة هنكمل حديثنا مع لارا أعتقد الحلقة اللي فاتت كانت بداية جميلة اننا نبتدي نتكلم على السيكولوجية بتاعة المستثمر ازاي الناس تفهم العملية بتمشي ازاي، لارا بتقدم إيه والكلام ده كله اعتقد الموضوع مهم جداً دايماً هفكركوا لو عاوزين تتواصلوا مباشرة مع لارا هتلاقوا اللينك بتاعها في الشو نوتس
(01:40)
عمر: هل اللي انا وصلتله لحد النهاردة هيعمل لي تطور كإنسان في اتخاذ القرار في شغلي في مجالات أخرى؟
لارا: آه طبعاً، الوعي، يعني مثلاً لو هنتكلم عن تحيّز الارتساء، بيتحط رقم وانا ارتبطت بالرقم لما تتعلمه وبتبقى واعي بيه بتعرف تستخدمها لمصلحتك، والله في البيع والشراء بتعرف لما بيتعمل عليك ارتساء تعمل ايه، أصدق الرقم ده ولا مصدقوش بتبقى عارف
عمر: أنا أشتريت سهم بـ 100 وخلاص مقتنع إننا لازم أبيعه فوق الـ 100
لارا: في ناس بترتبط بالأعلى مستويات وأقل مستويات على الإطلاق، أقل سعر حصل تقولك مش هشتري، طب ماهو ممكن ميحصلش تانى ده أقل سعر حصل في حياة السهم فممكن ميجيش تاني فلازم يبقى عندك مرونة في التفكير في اتخاذ القرار
وفي ناس برضه بترتبط بالأعلى سعر جه في حياة السهم، عندنا احنا طبعاً بورصة مصر قديمة جداً عندنا المطاحن شغالة من أيام إسماعيل ياسين ففي ناس بترتبط بأعلى سعر للمطاحن طب ماهو ممكن ميجيش في حياته انت الرقم ده كان على دولار نص جنيه مثلاً ولا كان الجنيه ساعتها أكتر من الدولار فأنت الرقم ده ممكن ميجيش تاني محتاج طفرة قد إيه جوه الشركة عشان الرقم ده يجي فأنت في حاجات كتير جداً وتخيل بقى لما هو يكون مرتبط بالأعلى سعر مش هيبيع عمره ما هيكسب أرباح، عمره ما هيحقق ربح منها هو قاعد طب ما انت الاعلى سعر ده لو هنفترض انه ان شاء الله ربنا يكرمه في يوم من الأيام ويجي هياخد منك كام سنة لحد ما يجي هل هو ده بقى اللي انت عايز تعمله؟ هل هي دي الطريقة يعني؟ هتضيع كام سنة من عمرك قبل ده فانا مش شيفاها طريقة عملية بصراحة بس الفكرة هل بينفع تستخدمه في حاجات تانية طبعاً طبعاً
في تحيز من التحيزات مثلاً انه انت الواقع مؤلم اوي فأنت تقول انه مبيحصلش أكيد لأ مش دي الحقيقة فهل الوعي بيه بيحل حاجات آه طبعاً، يعني هديلك مثال الواقع بتاع دلوقتي على سعر العملة بتاعتها الواقع ده محدش يقدر يتمناه لكن النظام لو انت فاهم كويس اوي ازاي الفلوس بتتخلق في البنك يبقى انت خلاص انت عارف ان الفلوس على مدار الوقت قيمتها هتقل ليه لأننا عمرنا ما هنبطل طباعة لأن مبقاش في غطاء ذهب فأنت خلاص طالما المعلومة دي انت عارفها انت هتعيط أن كل شوية بيحصل طباعة وده برضه إدراك رهيب ان انت تبقى عارف انا اعمل ايه عشان اوازي
عمر: عشان أحمي قيمة الأصل بتاعي في التضخم
لارا: عشان أحمي بالظبط
عمر: تصديق الواقع، تصديق المشكلة واعرف انها جزء من منظومة هتخليك تتصرف بطريقة أحسن من ان انت تبقى قاعد مضايق
لارا: قاعد مضايق وحاسس أنك يائس ومش عارف اصلاً تسأل نفسك السؤال الصح اللي يوصلك للفعل المظبوط، طب أوكية واقع الحياة ان احنا هنفضل على طول بنطبع هل مصر ينفع تبقى زي لبنان؟ لأ لأن احنا عندنا أصول لسه ممكن نبيعها، عندنا أصول كتير ماشاء الله يعني، بس ده مجاوبش انت اه عندك اصول لكن هل سعر العملة ممكن تبقى بصفر؟ هي معمولة عشان تبقى بصرف أصلاً كده كده
كان في حاجه يا عمر لذيذة جداً شوفتها بس مشوفتهاش تاني، كان في متحف معمول في أوروبا، المتحف جايبين لك العملات بتاعة العالم اللي مبقتش موجودة دلوقتي بقت صفر، فجايبينها ومعلقينها ومعلقين الكوينز بتاعتها والأرقام الكبيرة طب الحاجات دي حصلت ازاي؟ ما هو انت اي دولة بتفلس بياخدوا العملات بتاعتها طبعينها وحطينها في المتحف هي اصلاً معمولة على كده هما بقى الاقتصاديين هما معملوش الدول العملة بتاعتها بقت صفر ماخدوش القرارات اللي يقدروا بيها يعادلوا ويوازنوا
انا اتبسطت جداً لما لقيت ان مصر زودت الاحتياطي بتاعها من الذهب مؤخراً عملوا طفرة يعني، مصر بتحاول يبقى عندها من الذهب مخزون لأنه في الآخر هو العملة فهل انت عندك حاجات تبيعها عندك، هل ممكن توصل زي لبنان؟ لأ لأن انت عندك أصول لكن
عمر: انا في الاخر مش فارق معايا العملة هو بالنسبالي أداة تبادل مكان عشان نعمل تعاملات عليه النهاردة اياً كان سعرها ولكن الأصل سواء في عقار أو أسهم هو ليه قيمة قدام بيترجم مع الوقت عشان كده الناس تقولك اه احنا كنا بنسمع جدك كان بياخد 2 جنيه وبعدين أبنه بقى بياخد 2000 ملهاش علاقة هي قوة شرائية احنا في الاستثمار بنحاول نحافظ على القوة الشرائية كمان بتحاول تعوض التضخم اللي هو المحافظة على القوة الشرائية ويبقى عندك عائد إيجابي فوق النسب دي عشان نعرف نتقاعد ونعمل الكلام ده كله
لارا: في غلطة برضه ان الناس تقولك خلاص انا هتجه للذهب، الدهب بيحافظ على الفلوس مش بيعمل فلوس، الدهب هو القيمة الحقيقية ودي طبعاً فيها كلام كتير
عمر: ومدارس كتير ووجهات نظر كتير
لارا: بس الفكرة ان الغلطة هنا انك تشتري بفلوسك كلها دهب، انت كده مش هتعمل اكتر من التضخم لو في سنة من السنين السوق وقع فيها
عمر: احنا شوفنا من 2011 لـ 2022 أو 2023 تقريباً مفيش عوائد عليها خالص لو اشتريت بمحفظتك كلها دهب فأنت في 22 او 23 عندك 11 أو 12 سنة واقف على نفس الأسعار
لارا: عايزة اقولك برضه اللي معاه دولار، اسهم دولارية غير معاك دولار انا جالي واحد معاه اسهم دولارية خسران 70%، هو فاكرهم نفس الحاجه لأ هما مش نفس الحاجه فأنت برضه في معلومات غلط كتير
هو جاي بيقولي عندي محفظتين محفظة بالجنيه ومحفظة بالدولار محفظة الدولار خسرانة 70%، والجنيه هو اللي كسبان 30% ازاي الدولار خسران والدولار هو اللي بيطلع لقيت انه معاه اسهم دولارية في سوق مصر
ففي حاجات كتير وحاجات بسيطة بس انت متتخيلش ان الناس متعرفهاش
عمر: عشان انت بتشتغل في المجال فشايف ان دي حاجه عاديه
لارا: فتفتكر انها معرفة عامة
(08:34)
عمر: طيب ابتديت وعديت هعمل إيه بعد كده؟ هنتكلم تاني؟ هنخش في محاضرة اللي بعديها؟
لارا: آه، هنوزع الفلوس في الطريقة اللي انا تمردت عليها من زمان اللي بتدرس لحد دلوقتي في كل الجامعات العالم اللي انا اعترضت عليها من بداية شغلي خالص، لأن طبعاً دي فيها مشاكل التعريفات مش مظبوطة فيها فموصلاهم لحاجات كتير جداً
انت عارف برضه لما بتسأل نفسك السؤال الصح بتروح للإجابة الصح، لما بتسأل نفسك السؤال الغلط بتتوه، فالفكرة لما تيجي تتفرج من بره كده تلاقي انهم عاملين نماذج وفيها معادلات وحاجات صعبة جداً تحس انهم بيدوك الإنطباع انك هنا هتتعلم احسن حاجه تلاقيهم لأ هما عاملين تعريف غلط للمشكلة وبيحاولوا يحلوها بطريقة ذكية جداً فطبعاً انا تمردت على القصة دي درستها اول ما اتخرجت حسيت أنها مش مناسبة ليا
عمر: التوزيع لغرض التوزيع
لارا: آه في توزيع يدخلك في 40% خسارة في أي سنة من السنين وفي توزيع صح، يعني في واحد في أمريكا وزع بطريقة بحيث انه مخسرش غير 11% في أي سنة من السنين في كل السنين اللي فاتت لدرجة ان 2022 كانت سنة فيها حرب وأمريكا مشتركة في الحرب ومخسرش برضه السنة اللي فاتت خسر حوالي15%
أنا اتعلمت ايه من القصة دي؟ ان في طريقة تقسم بيها فلوسك عشان متخسرش بس احنا مبناخدش كده احنا بنقسمها بحيث ان هو نفسه ميخسرش ما هو ممكن في حد يشتري سند واحد يقولك لأ انا اي حاجه بتدي عائد ثابت بالنسبالي حرام فده بنعمله حاجه تانيه والذهب مينفعش مثلاً يزيد عن حد معين في المحفظة بتاعتك فتقسيمة فلوسك احنا محتاجين نعرف انت عايز القيمة بتاعتك تزيد بنسبة قد إيه هتقدر تزود قد إيه على المحفظة احنا عايزين قد ايه من السوق
لما المعلومات دي بتبقى موجودة هنوزع ازاي بطريقة تفيدك انت متفيدش جارك
عمر: تفيد أهدافك وعندك كام سنة هتستثمر فيها عندك وقت قد ايه والكلام ده كله
لارا: بالظبط، في بيجيلي انا عايز اسيب الشغل كمان 5 سنين تعالى نعمل خطة لـ 5 سنين هنشوف محتاج تزود قد إيه على المحفظة
واللي معندوش بقى أي نية يزود على المحفظة خلاص انت كده تحت رهن السوق مش هتعرف تستفيد منه أقصى استفادة بس انت تحت رهن اللي هيحصل فلأ طبعاً انت بتوزع بطريقة بتوزع في أسواق مختلفة بتشغلهم حتى بطريقة مختلفة
(11:20)
عمر: طيب بتشوفي ناس بيبتدوا وفي نص الوقت او بعد شوية بيغيروا فكرهم ويخافوا او مثلاً المحفظة تكبر بنبسة كبيرة معينة عن الثروة بتاعته؟ يعني افتراضاً انا كل اللي املكه في الحياة 100$ وابتديت بــ 5$ فمش خايف اوي فجأة بقت محفظتي 50$ من 100$ لما ببص على الثروة بتاعتي هل بتلاقي الأساليب بتتغير؟ يعني اقصد هل الوضع بتاعي بيفرق في طريقة اتخاذ القرار؟
لارا: كان في بروفيسور كده في لندن بيشتغل في شركة اسمها فيكتور فست في لندن، كان بيقولك ان في واحد بعد ما يعمل عمليتين تبادل كويسين يحس انه احسن واحد في الدنيا وبياخد شعور وهمي بالثقة فأنت الصح بيأثر عليك بطريقة معينة والغلطات بتأثر عليك بطريقة معينة
الحتة اللي انت بتتكلم فيها القيمة ماهو في حد أدني الشخص نفسه هيعامله باستهتار وهو نفس الشخص لو حط رقم محترم هيعامله باحترام فدي بتفرق من واحد للتاني
يعني انا جالي واحد المحفظه بتاعته 2 مليون ونصف بيقولي انا معييش فلوس، وواحد تاني معاه 200 ألف جنيه وبيقولي لأ دي فلوس فطبعاً القيمة بتفرق ومع اي حد اكتر من 50 مليون فاهم قيمتهم بيعاملهم صح بس واخد مخاطرة اعلى بكتير من اللي هو محتاجه فهي بتفرق من كل واحد وتوظيفه للفلوس عامل ازاي يعني اللي داخل بـ 200 ألف جنيه هو عايز يكبر وعايز يعمل هو بقى تقديره للفلوس اذا كانت دي فلوس كتيرة او صغيرة بالنسباله هعاملها معاملة ازاي يعامل التانية
واعرف كده قاعدة هو لو شايف الفلوس صغيرة هياخد بيها أعلى مخاطرة يعمل بيها أعلى غلطات فالقيمة مش مهمه هو شايفها ازاي ويقارن نفسه بمين يعني اللي معاه 2 مليون ونص هو شايف انه معهوش فلوس فكان بيعمل غلطات مينفعش تغلطها ويقولي ده انا النهاردة بس خسرات 70 ألف جنيه دي نص محفظة حد تاني! فاهم قصدي بس هو مدام لسه ضمن النطاق بالنسباله فهو شايف انه دي مش غلطه لكن لأ هي غلطه انت مش المفروض تخسر 70 ألف في يوم واحد ومش كرقم هي برضه نسبة من المحفظة
(13:48)
عمر: طيب بتشوفي بقى التغير في الشخصية، يعني مثلاً اللي كان بيعمل فلوس انها كبيرة و مهتم اوي لما يعدي رقم معين وينجح يبقى الفلوس دي بقى بالنسباله وقتها خلاص اخد أرباحه وانبسطت وفرح والكلام ده كله يبتدي يستهتر تاني؟
لارا: شوفتها ومكنتش لاقيه لها إجابة، وهقولك برضه حليتها ازاي، دي شوفتها من الزملاء في المجال الشباب اللي بيستثمروا اللي هما مديرين الحساب، انت ممكن تقابل مثلاً جوه شركة كذا مدير حساب بس يبقى عندك مثلاً 4 أو 5 نجوم في حتتهم فتلاقيه انه كبر المحفظه بتاعته وابتدي يشتري لدرجة أنه بدأ يشتري أصول بره البورصة، كبر المحفظة من البورصة بطريقة معينة وابتدي يشتري أصول الفكرة في رقم معين كل واحد بيوصله تقريباً كبداية وبعدين يرجع منه تاني بس بيرجع ازاي؟ اللي كسبه بيخسره ودي حاجه شوفتها عالمياً بس مكنتش لقيالها تفسير عشان كده هنا بنقول ان الهدف مهم، الهدف اننا اعمل أعلى أداء وبعد كده ارجع أخسر الأداء ده ولا الهدف اني اكبر المحفظة والمحفظة دي في يوم من الأيام تشيلني مادياً لانها لو في يوم من الأيام هتشيلني مادياً يبقى ليها قيمة أكبر منها يبقى أنا عاملها قيمة، فأه القيمة بتفرق انت بتعمل حاجه ليها قيمة ولا لأ بتفرق بس زي ما قولتلك نظراً لأني لسه بادية من سنة مشوفتهاش مع المستثمرين بس شوفتها مع زمايلي اللي جوه المجال انه بعد ما بيعمل كتير اوي بيرجع يخسر
عمر: ليه بسألك السؤال ده لان انا مقتنع ان الاستثمار هو لعبة طويلة جداً لدرجة مملة هو ماراثون أكتر من إنه سباق بمعنى أن النماذج الكبيرة الناجحة زي وارن بافت وغيره أياً كانت مدرسة الأستثمار اللي بتستخدمها تحليل فني أو تحليل أساسي أو حتى بتشتغل سلبي ممكن واحد يبقى ناجح جداً في الاستثمار السلبي اياً كان مدرستك انت هتكبر لمرحلة ممكن متستحملش تبقى قاعد محفظتي كبرت في النجاح والمضاعفة تخش، يعني وارن بافت النهاردة ممكن يكون بيدور 700 مليار دولار أو 500 مليار دولار
لارا: مش أي حد برضه يقدر يفهم المبالغ الكبيرة
عمر: انا فاهم بس في حاجه دايماً بتخليني أفكر طب ماهو ممكن في أي وقت يقفل ويمشي، يعني بعد أول مليار يبطل
لارا: ده حقيقي بس هي لعبة بالنسبة له
عمر: لعبة والاستمرارية وهدفه هنا متغير عن هدفي اني اعيش كويس واجيب أرض أو اجيب بيت والكلام ده كله
لارا: انت كده حليتها هدفه متغير، لما بيبقى هدفه متغير احسن حاجه انا عملتها انا عايز اعديها غير هدف ثابت انا عايز اعمل حاجه ثابته انا بعد ما بوصلها برجع اخسر اللي كسبته وافضل بأصل المبلغ
عمر: انا كنت دايماً بتسائل هو ازاي ممكن واحد يستثمر 70 سنة يعني هو عمره حاجه وتسعين اواخر التمانينات فممكن ابتدى بدري بقاله 70 سنة بيستثمر
لارا: في إجابة نموذجية بالارقام انا عندي كام سنة مفروض ابقى واقف على كام من مرتبي، ودي برضه بعملها معاه فأنا بقوله اوك انت عندك في الشريحة دي كام ضعف المفروض تبقى عليه هو ده اللي يكون موجود في البورصة ولو انت مش معاك ازاي تبنيله، فأنت عشان يبقى رقم يصرف عليا لازم يبقى رقم كبير كعائد اللي يصرف عليا مش المحفظة يعني مثلاً من الغلطات الصرف آن واحد يبقى معاه فلوس يروح يشتري عربية بكل اللي معاه، وهو ده الفرق بين انك تبقى غني أو ثري الغني بيشتري بكل اللي معاه عربية، الثري بيعمل محفظة العائد بتاعتها هو اللي يجيبله العربية
عمر: العائد فقط وجزء من العائد كمان مش كله كمان
لارا: بالظبط، فأنت وصلت انك عايز تجيب عربية أحلامك هل يعقل وهل ده احسن قرار تاخده انك بكل الفلوس تروح تشتري ما هي مش اصل بس خلينا نقول انه اصل استهلاكي قيمتها تنخفض لما تيجي تبيعه هل ينفع تروح تشتري حاجه القيمة بتاعتها هتقل لما تركبها شوية فده بيبقى قرار من القرارات فالفكرة بترجع هو عايز ايه
عمر: بصي انا هقولك على حاجه اعتقد انك مستمعتيش الحلقات كلها اكيد، لما كلمتك كنتي لسه بتعرفي عن كلام ينور احنا اتكلمنا على عدد السنين انت مفروض تبقى واقف فين بالنسبة لسنك كام من مرتبك، اتكلمنا على انت لو متأخر او سابق تعمل ايه فالميزة أن المستمعين بتوعنا اعتقد وبنعمل كل شوية استطلاعات كده لو في حد جالك من ناحية كلام ينور اعتقد انه ممكن يبقى جاهز
لارا: جاهز معنوياً لأن دي بتفرق جامد، لأن في حد بيسمع ايه ده انا هزود على المحفظة بيتخض، ودي حاجه برضه غلط من المحللين يقولك المخاطرة بتاعة البورصة يااه ده خطر جداً انا شوفت اعلان واحدة شبهت البورصة مخاطر في أعاصير جوه هي فاهمة غلط هي مش خطر اوي كده انت لما تيجي تحسب وتحط كل حاجه في مكانها خلاص الموضوع مبقاش خطر، خطر للي مش شايفة وحاسب الأرقام
عمر: اللي عايز اقوله برضه اني كررت الموضوع ده كذا مره يا جماعة الاستثمار حاجه زي البورصة الأسهم أو رأس المال الكبير أو صناديق المؤشرات هي أقل خطورة بكتير من اني افتح مشروع مع واحد صاحبي اللي هو 90% من الناس اول ما يبقى معاهم فلوس انا هفتح مشروع مع واحد صاحبي يا جماعة دي أخطر حاجه في التاريخ إحصائياً وصاحبك اللي قاعد جنبك بيبعلك فكرة المشروع دي لوحدها خطر مهما قعدت اقول الفرصة دي جتلك عشان هو قاعد جنبك فقط لا غير
لارا: مش هتعرف تكررها كمان ومتضمنش نتايجها
عمر: ولو نجحت مره مش هتنجح مرتين او تلاته او خمسة
لارا: في البورصة انت تقدر تكرر نفس العملية الى ما لا نهاية، رقم مش عادي بس انت تلاقي الفرصة وهى دى الفكرة هنا في حد ممكن يجي يقولي إيه ده يعني انا هقعد 10 دقايق بس في اليوم ولأ ده مش موافق اصلاً يعمل حاجه خالص، طب انت هتلاقي الفرص ازاي؟ اديني عقلك مانت محتاج تقعد 5 او 10 دقايق تفر في السوق عشان تطلع الفرص وتبقى عارف هتعمل ايه
انا بوفر عليهم كمان يعني انا لو عملت سكان ببعتهولهم برضه بس الفكرة انك مش عايز تعمل حاجه خالص يعني في ناس من الأول جايه انا عايز اعمل وواحد تاني مش عايز يعمل حاجه خالص
عمر: وده له اماكنه وده له اماكنه، يعني ده لا يعيب هذا الشخص
لارا: لأ خالص بس في مثلاً واحد جه حضر البرنامج معايا حضر مره و مكملش زي بالظبط اللي دفع الإشتراك في الجيم ومرحش الجيم، بقيت انا عماله اجري وراه انت فين انت كويس طب مش عايز فلوسك هنعمل ايه
عمر: الميم بشوفه على الإنترنت بتاع انزل الجيم
لارا: واللي يدخل مثلاً يتفرج وميطبقش لأ انت هتتمرن ازاي؟ هل في تمرين من غير تطبيق ما هو تمرين انت بتنفذ وبتسألني
عمر: في سؤال هنا هسألهولك التدريب عموما، دي برضه مراية صح؟ مراية للناس؟
لارا: طبعاً وهو برضه بيقف قدام نفسه في المراية برضه يعني انا بقوله انت مفيش اي داعي تكدب عليا لان انت حتى لو كدبت عليا ممكن انا اخد بالي او مخدتش بالي على حسب، ممكن اخد بالي بعد فترة لما اعرفه بشوية بس مش هقدر اعرف انه بيكدب دلوقتي اول ما يبتدي يتكلم يانا هعرف يا مش هعرف لكن بالنسبة للسوق مش هيعرف يكدب على نفسه أداءه اخر الشهر، الشهر اللي جاي، اللي بعده ده اللي بيعكس بالظبط هو عمل إيه في السوق، هو عارف بيتكلم في ايه ولا مش عارف
(22:30)
عمر: الفشل، واحد فشل او غلط بتشوفي الموضوع ده ازاي؟ هل دايماً بتلومي على الشخص ولا ساعات بتبقى في ظروف خارجه عن الشخص اللي بينفذ؟
لارا: بص البرنامج اصلاً اسمه تدريب على أخطاء التداول فاحنا داخلين نعمل أخطاء انت داخل تتعلم الغلطات بتاعتي لأنك مش محتاج تدخل من الأول وأنا أظن اني غلطت كل الغلطات يعني صعب جداً تقولي الغلطة دي أقولك معملتهاش
عمر: انا غلطت في كل حاجه
لارا: انا عملت كل حاجه غلط، يعني هقولك ايه انت الكلام مكتوب في الكتب فأنت هتعرف الصح من الغلط ازاي غير لما تجرب فأنا جربت بفلوسي وخسرت كتير، فالتجربة فعلاً بتكلف فلوس رهيبة وفعلاً انت مبتتعلمش غير من التجربة لأن الكلام مكتوب في الكتب ومش من مؤلف واحد من أحسن المؤلفين مبيعاً لأن اللي كاتب الكتاب مش لازم يكون حط ايده في السوق
يعني مثلاً في حاجه معينه انا جربتها اخدت مني 5 سنين، عشان مثلاً انا اعرف توماس دورسي احسن واحد يعرف يستخدمها لكن هي متتعملش هو حتى بيقولك هي بتقول احسن حاجه دلوقتي متتوقعش المستقبل فتوماس دورسي بيعرف يستخدم المعلومة دي بس الفكرة ان الكتب وكل الناس اللي بتتكلم على نفس الموضوع اللي هو القوة النسبية أنه لأ في طريقة انك تبقى في أحسن أسهم، في أحسن حاجه في كل حاجه لما تيجي تحط الكلام ده تحت التنفيذ لأ صعب جداً هتلاقي ان سهم مش معاك وسابقك طب ازاي؟ مش انت كان معاك احسن حاجه في كل حاجه دي اخدت مني 5 سنين انا كنت مصدقة توماس دورسي انه بيعرف يعملها فانت عندك تصديق من ناس عالمية وكاتبين كتب وبيقولك انه ينفع فأنت بتاخد الفكرة انه ينفع وبعدين تلاقي مفيش نتيجة طيب ده بيحصل ليه فبص اعتبر ان دي حاجات مش محتاج يتعلمها خالص
عمر: معلومات دوشة ملهاش اي قيمة
لارا: خلاص بقى مدام انا ضيعت فيها 5 سنين من عمري بختبر فكرة فأنت لما تيجي تاخد الأفكار من الكتب وانت مش عارف إيه الأفكار اللي بتنفع والأفكار اللي مبتنفعش هتضيف كام سنة؟ كتير اوي خلاص وفر من عليك كل ده انا عندي خبرة كافية اقولك ايه اللى بينفع وايه اللي مبينفعش ايه اللي تضيع وقتك فيه وإيه اللي متضيعش من الأول بناخد كل الغلطات طيب نرجع تاني للغلطات هل في تعليم من غير غلطات؟ لازم يدي نفسه فرصة انه يغلط
عمر: حتى في المدرسة لما كنا بناخد رياضة انتي بتقعدي تغلطي قبل ما تطلعي الصح يعني كذا مره
لارا: بس عارف المعلمة فين بقى انك تغلط وانت واقف على رجلك، تغلط وانت مش مخسر الحساب نصه، أن غلطاتك تبقى عارف لما تغلطها عارف هتقف فين فدي حاجه لما بيعرفوها بيبقى زي الرؤية الليلية هو كان مش شايف لبس نظارة بقى شايف بليل، شايف الخطوات اللي هو هيدوس عليها هو قبل كده كان بيخطي الخطوة وهو مش شايفها دي القصة كلها انك تبقى حاسب ارقامك بطريقة معينة بحيث انك تدي نفسك البراح انك تكسب انه اوكي انا عارف اني هغلط بس مش هخسر الحساب
بس طبعاً في رجالة لأ مبتغلطش وده طبعاً تحيز رهيب ان انا كل قراراتي صح بغض النظر انا ممكن اعمل حاجه غلط في سبيل اننا أثبت أن رأيي كان صح وفي برضه حاجه بشوفها كتير ان رأيي صح بغض النظر عن تنفيذي ورأيي صح لدرجة اني عمل حاجه غلط عشان اغطي عليه
(26:35)
عمر: هسألك سؤال انتي بتكتشفي في اللي انتي بتدرسيه مع الوقت انا فاهم ان البرنامج لسه جديد بس وانتي بتطورية بتكتشفي ان ساعات ممكن تقولي معلومة غلط وبعدين تكتشفي انها غلط وترجعي فيها وتقولي على فكرة المعلومة دي مكنتش متأكده منها 100% يعني هل البرنامج بتاعك هيتغير في المستقبل؟
لارا: بيتغير حالياً واحنا بنتكلم يعني كنت حاسبه حاجات على اخر اسعار جت سنة 2020 - 2021 فالسنة دي لأ عندي معلومات جديدة عن 2022 - 2023 فدي هتتزود
البرنامج دخل عليه تحيزات جديدة، يعني كان في تحيزات مكنتش عرفالها حل لقيت حلول ودايماً الحلول بتبقى كرييتف يا حلول واضحة جداً بس انت مش شايفها او في حل جديد ممكن يدخل على الموضوع يخليك تنفذ بطريقة أحسن
عمر: حل مثلاً تصحي وبالك مش رايق متشتغلش
لارا: لأ لأ ده في حل من الحلول مثلاً سؤال هسألهولك دلوقتي، لو انت اتنرفزت ومتغاظ جداً والكلام ده وهتجيب اللي قدامك من شعره تضربه بوكس، ايه اللي بيهديك حالاً كده
عمر: مش عارف هتبقى صح ولا غلط، بس اللي هيهديني حالاً لو هو حصله حاجه خضتني
لارا: يعني انت ممكن تخضه بس لو حصله حاجه انت هتخض ساعتها
عمر: اه يعني انا مثلاً رايح اضربه فهو اتخض ولقيت نظرة على وشه ايه ده انا هضرب دلوقتي انا ممكن يفوقني انا بعمل ايه
لارا: يعني انت لما تلاقي رد فعل اللي قدامك انه خايف اوي ممكن ترجع
عمر: اه لأني انا ممكن اخاف اني أذيته بالفعل خلاص الرسالة وصلت ففوق معرفش الاجابة دي ليها علاقة
لارا: صح بس الفكرة انك مش هتعرفها بأرقام، ملهاش علاقة بالارقام، اللي ليها علاقة بالارقم انك ممكن تبص على الرقم فتتخض ومتنفذش، تتخض منه فتبقى عايز تنفذ أوي فتدخل تعمل حاجه غلط.. سألت رجالة كتير وكانت الإجابة ماية ساقعة
عمر: يحط على راسه مايه ساقعة
لارا: يشرب مايه ساقعة، يتوضى بمايه ساقعة، حد يضربه بمايه ساقعه اي حاجه بالمايه الساقعه انا طبعاً دي حاجه متخيلتهاش فأوكية لو السوق يحمسك اوي اشرب مايه ساقعة
عمر: صح
حل من الحلول اشرب مايه ساقعة، خد دقيقتين فكر في اللي انت بتعمله اشرب مايه ساقعه قبل ما تنفذ من غير ما تحسب
عمر: حاجات بسيطة
لارا: حاجات بسيطة وحاجات محتاجه تمرين، أصل افرض حد زيي مش هتكلم على حد غريب بتكلم عليا انا، انا قراري سريع جداً ومبرجعش فيه بسرعة تلاقيني نفذت فهتفرملني ازاي قبل التنفيذ؟ انا مثلاً بالنسبالي التسبيح بيهدي كتير فمعايا على طول اي حاجه بسبح بيها عشان ننزل شوية فهي بتبقى مختلفة من حد للتاني بس الفكرة ان السوق ممكن يحمسك اوي
عمر: انا مرنت نفسي اني أأخر اتخاذ القرار اللي هو انا عايز عايز عايز طيب انا هجرب انام واصحي واغير الوضع اللي في مخي واشوف هاخد نفس القرار ده الصبح ولا لأ
لارا: بالظبط، شوفت انت مرنت نفسك في ناس مبتبقاش عارفه انها محتاجه تمرين اصلاً ماهو الوعي ان القصة دي محتاجه تمرين طب اعمل ايه عندك اهو حلول اختار اللي هينفع معاك واللي هينفع معاك مش هينفع معايا بس اختار اللي هينفع معاك هيخليك ما تدخلش السوق من غير ما تحسب لازم تحسب فده للمتسرعين أمثالي لأن انا برضه مش متهورة بس متسرعة
عمر: وعلى فكرة انا شوفت العكس تماماً، ناس عكس متسرعين متأخرين بقى اللي هو ممكن يشلك هو عارف ان الحاجة دي كويسة وهو ده القرار الصح ومتأكد منه مليون% ويتأخر كتير جداً مش لازم الفرصة تروح هو ممكن يشتريها بنفس السعر
لارا: هو بيبقى عايز حد يفرشله الأرض ورد ورمل قبل ما يبتدي يخطي خطوة عايز كل حاجه تتعمله قبل ما يبتدي ياخد خطوة، طب ما احنا كده عمرنا ما هنحقق بص أساليب المماطلة كتير بزيادة بس انت لازم تعرف اسلوب كل واحد يعني في واحد جالي معلوماته كويسة جداً جداً عن البورصة انت محفظتك فين بكام اديني نبذة أكتر عن وضعك.. أنا بدرس البورصة بقالي 10 سنين بس عمري ما حطيت فلوس.. طب إيه!! انا كنت تقريباً هقوله لأ وقولتله لأ فاهم رفضت الموضوع في النص بس هو فهمني ان الدايرة في دماغه مش مقفوله بس انا فعلاً كنت مصممه اني مشتغلش معاه لأن طب ايه اللي هيتغير دلوقتي انت بقالك 10 سنين بتدرس ومحطتش فلوس، امتى هتحط فلوس وامتى هتختبر الكلام أصل انت لو داخل تضيع وقتي بمنتهى الأمانة مينفعش فإيه اللي هيفرق دلوقتي فساعتها قالي ان الدايرة مش مقفوله في دماغه مش هيقدر فهو محتاج يقف على ارض ثابته بالارقام والتنفيذ يعني هو ناقصة نظام وانه يبقى شايف حاجات كتير البرنامج بيقدمهاله بالفعل هقدر اساعده ولا لأ هقدر لما دخل ابتدى خليته يفتح حساب ويودع فلوس مع ان في الاول خالص الناس بتنفذ الأول فهو جه على رابع محاضر ها فين التنفيذ مهو بيماطل بقاله 10 سنين إيه اللي هيخليه يعمل دلوقتي فبرضه لاحظت انه مبطء الدنيا عشان عايز يعرف اقصى حاجه يقدر يعملها عشان يبتدي فقولتله بص انت بتخسر الوقت اللي كنت ممكن تسألني فيه الأسئلة المهمه هتيجي تسألهاني بعدين او مش هتسألها خالص فابتدى يشتغل بقى فهو اه في ناس بتبقى عايزة تأكيد من التقارير المحلية والدولية انه صح
عمر: وهو عاوز الكمال فشخصيته بتمنعه انه يوصل للحاجات دي لأن الصورة عمرها ما بتبقى كامله
لارا: وفي البورصة هتضطر تاخد قرارات في ظل غياب معلومات، فلازم تقدر بقوة الرؤية عندك انت نظرة للمستقبل تاخد قرار وانت معندكش المعلومة كاملة لأن حالاً، في أوقات كتير ممكن يبقى معاك ربع معلومة، ممكن يبقى معاك إشاعة اصلاً مش معلومة بس ازاي تستغل الاشاعة
يعني مثلاً الناس اللي بتضايق من الإشاعات، ده في واحدة طلعت هي مركز في البورصة وحاجات تانية كتير طلعت تتكلم في التلفزيون انها عايزة تسجن المستثمرين اللي بيطلعوا اشاعات طب انتي تعرفي منين انه مصدق انها معلومة مش إشاعة؟ يعني هتسجنيه على اساس ايه! فدي واحده مبتعرفش تستغل الإشاعة فاهم قصدي فهي خلاص حطت نفسها في دور الضحية و الاشاعة دي حاجه وحشه
لأ انا بالنسبالي احلى حاجه الإشاعات هو في بورصة من غير إشاعات؟ عالمياً فازاي استغل الاشاعه انا بقيت اتعامل من كتر حبي في الإشاعات لأنها بتحرك السوق انا بقيت بعامل كل المعلومات على انها اشاعات وعايزة اعرف القصص اللي في السوق
هاخدك حته بعيدة شوية سيبك من البورصة، الكريبتو سوق العملات الرقمية، بيقولك ان التحليل المالي طبعاً زي ما بيقولك هما مرتباتهم كويسة عشان هما بيعرفوا يعملوا قصص للحاجات اللي هما بيغطوها، بتلاقي قصة جميلة جداً، في الكريبتو بقى عندك نفس النمط بس مختلف شوية ان انت هتلاقي ان الشركة صاحبة المشروع دافعة للمؤثرين في مجال التشفير انها يخلق قصة من ما فيش ويبيعها للناس فلما البلوجر ده يدخل على اليوتيوب ويبتدي يتكلم على المشروع الجديد بتلاقي الناس داخله تشتري المشروع الجديد.. هل انت تقدر بنفس القوانين تقول ان المشروع ده هينجح؟ متقدرش تقول كده بس هل القصة مقنعة كفاية ان الناس تخش تشتري اه طبعاً
ان انت بقى تقدر تقييم الحلو والوحش انا اه شيفاها من أكبر التحديات اللي بتواجه المستثمرين هو شايفنا في السوق معانا سنين خبرة وشهادات دولية كل واحد كدر في المجا بتاعة لو هو شايفنا بنتكلم وهو مش قادر يتحقق من مين بيفهم ومين مبيفهمش ماهو محتاج يقيم المحلل صح فلما تحطله قواعد بيعرف بعد كده المحلل ده بيعرف وبيفهم وده مبيفهمش بيتكلم فيها فطبعاً دي حاجه انا بعملها واتفضح بيها محللين كتير جداً ولقيت ان الناس هما اللي جايين يقولولي بصي ده بيفهم وده مبيفهمش
عمر: بقى عنده آلية لتقييم الرأي
لارا: تقييم رأي المحلل اللي ب 20 سنة خبرة واكتر لانه بيقولك المحلل ده مش حاسب هو بيتكلم في ايه وده مش حاسب
عمر: فلما يروح للمحلل نفسه هيسأله اسئلة تعرف قصته دي مبينه على احاسيس ولا مبينه على حقائق
لارا: وعلى التقارير اللي بيطلعوها ببلاش حتى على السوشيال ميديا او عن طريق الشركة اللي هو شغال فيها فطبعاً انك تقدر تقيم المحلل وتقيم المعلومة اللي جيالك اذا كانت ليها وزن ولا لأ أخد بيها او ماخدش دي حاجه مهمه جداً طيب انا اخدت بيها أوظف لها قد إيه اشتغلها ازاي؟
(37:23)
عمر: ده مهم جداً بقى لأنك ممكن يبقى معاك فكرة كويسة جداً احنا لو معانا آلة زمن ورجعنا لورا وعرفت ان السهم ده هيطلع 10 مرات انا المفروض لو الآلة دي موجودة اخد كل فلوسي واحطها في الـ 10 مرات، عشان الباقي هيطلع 9 و 8 و 7 وكده المستقبل بقى انا معييش آلة زمن فلو عندي كذا فرصة، ازاي اقيس الفرصة دي من أهم الحاجات اللي الناس كلها بتنساها الناس كلها بتركز في انه هيطلع كام مره او هعمل كام % بس مش بتركز على حجمه في محفظتها
لارا: الحجم بيرجع لهو يقدر قد إيه يستحمل من المخاطرة مش اي حد يقدر يدير اي حجم يعني في واحد ممكن يتوتر جداً من 5% وواحد لأ فأقل من 30 لأ بس برضه في أرقام تنجحك وأرقام مبتجحكش في ناس اوكي يندمج جداً مع الفكرة اللي جياله فيحط فيها كل فلوسه طب ما انت ممكن تخسر بعد كده برضه لازم تشوف حاجه نفسياً ما بينه وبين الارقام هل هو يقدر يدير الارقام بجد ولا لأ يعني واحد داخل بكل فلوسه في سهم معين والسهم ده فعلاً هيطلع 10 مرات هل لما يكبر 1% او 5% هو ممكن يبيع مش هيستنى الـ 10 ازاي يقعد لحد الاخر، ودي بشوفها مع الناس الخبرة بقالهم كتير يقولك حجم عمره ما هيخسرني بس برضه عمره ما هيوصلك لهدفك على المدى الطويل فهتلاقي الناس اللي هي خلاص عارفه انها لو اشتغلت 2% بس هل هتعرف توصل لهدفك بالـ 2%
عمر: غالباً لأ
لارا: يبقى كده هو واخد حجم صغير جداً على الهدف اللي هو محتاجه فكل واحد عنده حجم مناسب عشان كده بنوضب كل الارقام على حسب هو يقدر يتعامل مع قد إيه
عمر: وبكده نكون وصلنا لأخر الحلقة التانية مع لارا ان شاء الله هنلعب الجزء التالت والاخير من الحلقة الاسبوع الجاي هستناكوا وشكراً جداً على وقتكوا
Translation of some words and terms:
Develop يطور
Anchor Bias تحيّز الارتساء
All Time High أعلى مستوى على الإطلاق
All Time Low أدنى مستوى على الإطلاق
Practical عملية
How Money Is Created كيف يتم خلق المال
Time Value Of Money القيمة الوقتية للمال
Gold Standard معيار الذهب
Inflation التضخم
Hopeless يائس
Museum متحف
Active Measures التدابير النشطة
Medium Of Exchange أداة تبادل
Transact معاملة
Rate سعر
Public Knowledge معرفة عامة
Diversification تنويع / توظيف
Definitions تعريفات
Equations معادلات
Impression الإنطباع
False Sense Of Confidence شعور زائف بالثقة
Bracket شريحة
Within Range ضمن النطاق
Colleagues الزملاء
account officers مديري الحساب
Assets اصول
Threshold بداية
Performance أداء
model answer الإجابة النموذجية
Multiple مضاعف
Rich غني
Wealthy ثري
Depreciating asset أصل قابل للاستهلاك
large cap رأس المال الكبير
index funds صناديق المؤشرات
Assume أظن
relative strength القوة النسبية
Victim الضحية
Crypto influencers المؤثرون في مجال التشفير
Handle يتعامل معاها
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #TE404 #الجزء_الثاني