133.Trading Errors 404 - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
(Trading Errors 404) لقاء جديد مع ضيفة جديدة في كلام ينور لارا أحمد سُليمان مدربة التداول ومؤسسة برنامج التدريب على أخطاء التداول
خبرة أكثر من 16 سنة في الشركات مرنت الآلاف من السماسرة و مديرين الحساب على التداول في الأسواق المالية
Lara A. Soliman @LinkedIn :تقدروا تتواصلوا مع لارا هنا
Trading Errors 404 @LinkedIn :اعرفوا اكتر عن البرنامج هنا
:في الجزء الأول
(04:34) انتي بتعملي ايه بمنتهى البساطة؟ -
(06:33) كاستشاري بتعملي إيه أول خطوة؟ -
(11:54) إيه اللي استفزك في النظام خلاكي تبدأي؟ -
(18:44) هل بتشوفي إن المستثمر الغير متفرغ ممكن يقضي وقت محدود من يومه ويكون مستثمر ناجح؟ -
(22:37) هل كل اللى بياخدوا معاكي الكورس بيطلعوا يعملوا نفس الحاجه بالضبط؟ -
(26:50) هل اختبار التحيزات في ناس مش بتنجح فيه؟ -
(31:58) بعد ما بتصنفي شخصياتهم بتعملي ايه؟ -
استنوا الجزء الثاني من لقائنا مع لارا الأسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
حلقة النهاردة من احلى الحلقات اللي انا عملتها من وجهة نظري لأن الضيف اللي معايا النهاردة أ/لارا أحمد صديقه من زمن طويل والبودكاست ده خلاني اتواصل معاها تاني ونرجع نتكلم، هي بتقدم حاجة جديدة من موجودة في المنطقة العربية، مقبلتهاش بصراحة قبل كده وهي التدريب على التداول، هي بتحاول تمرن المستثمرين أو المتداولين في الأسواق المالية
منتج جديد ومنتج لذيذ والطريقة اللي هي بتقدم بيها البرنامج بتاعها من وجهة نظري جميلة وجديدة وبتحاول تعالج مشاكل كتيرة بتشوفها في المستثمرين من خلال خبرتها الطويلة في المجال
Trading Errors 404 البرنامج اللي لارا بتقدمه اسمه
(برنامج التدريب على أخطاء التداول 404)
Error والاسم ده مستوحى من الـ
اللي كنا بنشوفه في الويندوز لما مبتلاقيش إجابة لحاجة معينة أو الموقع مش موجود هي استوحت تسمية البرنامج من هذا الاسم عشان تحاول تصلح الأخطاء اللي المستثمرين بيعملوها هسيبكوا مع الحلقة مش عايز اطول عليكم اكتر من كده ويارب تستمتعوا بالحلقة دي لأن أنا استمتعت جداً جداً باللقاء معاها، النهاردة الجزء الأول من اللقاء وفي الأسابيع اللي جايه هنكمل الكلام معاها
(02:45)
عمر: أول حاجه عايز ارحب بيكي يا لارا وميرسي جداً جداً على وقتك
لارا: ميرسي يا عمر، ازيك
عمر: أنا الحمدلله، سنين كتير متكلمناش، أنا أعرفك من زمان جداً ودايماً متابعك واتبسطت جداً جداً من الحاجه اللي انتي عملتيها مؤخراً شوفتها على لينكدإن بتاعتي على صفحتك انك عملتي شركتك او بدايات لمشروع مهم جداً اعتقد بيحل مشاكل كبيرة جداً للناس حلقة اعتقد هتبقى إن شاء الله حلقة مميزة جداً لأن انا عارفك من زمان وعارف انتي قد إيه بتحبي اللي بتعمليه بتعملي اللي انتي بتعمليه بشغف فشكراً جداً على وقتك معايا
لارا: ميرسي يا عمر، أنا كمان متحمسة اوي للحلقة واعتقد هو اتجاه عالمي كمان ان الناس كلها تبتدي تعرف ازاي افيد نفسي لوحدي، ازاي أكون انا المخطط المالي بتاع نفسي وازاي انطلق
عمر: وده هدف البودكاست، بحاول على قد ما أقدر الحلقات بتاعتنا اننا نركز على الشخص مش على الجمع يعني دايماً بحس ان كل واحد عنده بصمة مختلفة، كل واحد مختلف المعلومة مينفعش تبقى موجودة في قوالب لأنها هتشتغل معايا بطريقة غير ما هتشتغل معاك
لارا: أنت هتحب اللي هتسمعوا مني دلوقتي اوي
عمر: أنا متأكد، وعشان كده أنا متحمس اوي للحلقة دي لأننا يمكن بنتشارك نفس وجهة النظر دي، الناس ممكن يبقى عندها نفس السؤال بس إجابتها مختلفة يعني هناخد نفس الدوا بس الجرعة بتاعتي مختلفة عن الراجل اللي جنبي لأسباب معينة.. نفس الكلام في الاستثمار فدايماً بحاول أخلي الموضوع في شخص اللي بيسألني يعني
(04:34)
عمر: أول حاجه انتي بتعملي ايه بمنتهى البساطة كده؟
لارا: أنا بمرن الناس على اساس انهم ياخدوا قرارات مالية في حياتهم طبعاً على البورصة، بس ازاي يوزع فلوسه، ازاي ياخد اقصى استفادة، ازاي يستثمر، ازاي يكون مستثمر قادر يقول على نفسه مستثمر مش مجرد انه فتح حساب في البورصة يبقى اسمه مستثمر
صدق او لا تصدق الشخص ممكن يقعد في البنك 10 سنين وميعملش حاجه وجاره يقعد نفس الـ 10 سنين بس فلوسه بتكبر وفعلاً قادر يواجه التضخم ويعادل سعر الفايدة وقادر انه القيمة بتاعته تبقى أكبر.. فده ينفع وده ينفع هي كلها في العقلية ازاي لو انا مش عايز استثمر خالص ازاى من البنك أخد أقصى استفادة، واحد في البنك ممكن يقعد 10 سنين ميعملش اي حاجه، وواحد ممكن يقعد نفس الـ 10 سنين بس يبقى بيزود فلوس وقادر يستخدم منتجات البنك بطريقة مثلى انها تقدر ترجعله عائد على الاستثمار بحيث انه يستفيد أقصى استفادة في الـ 10 سنين فده ممكن وده ممكن
نفس الكلام في البورصة انت بتسمع كتير جداً "يا عم انا قاعد في البورصة بقالي 10 سنين ومعملتش حاجه" معملش حاجه بطريقة معينة نتيجة لأفكار هو تبناها.. في نفس الـ 10 سنين أنت ممكن تحط فلوسك في البورصة وتكبر بشكل كبير، ساعات الرقم ممكن متصدقهوش بس برضه بأفكار تانية فده موجود وده موجود فأيه الأفكار اللي احنا نتبناها وايه الافكار اللي منتبنهاش وبنحط خط كبير جداً بين إيه اللي ينفع يتعمل وهيوصلنا لإيه وإيه اللي ميتعملش لأنه مش هيوصلني لحاجة مهما سبتلهم فلوسي
عمر: اه يعني احنا الاتنين بنروح الجيم، احنا الاتنين بنتمرن بس في واحد بيتمرن بطريقة خاطئة تماماً وواحد بيتمرن بطريقة تفيده وتفيد جسمه ده بس بعكس الموضوع على الجيم اللي مبروحهوش يعني بس كمثال
(06:33)
طيب الحل ده انتي عملاه في شكل إيه؟ يعني ايه المنتج اللى انتى عملاه، انتي استشاري صح؟
لارا: آه
عمر: أول خطوة مع الاستشاري ده بتعملي ايه؟
لارا: هو مبدئيا انا عامله برنامج هو تغيير، بس هو مبيبقاش عارف ده في الأول، هو بيبقى داخل فاهم انه برنامج عادي أو كورس عادي بس لأ هو كورس فيه تنفيذ، فيه تغيير للعقلية، في حاجات كتير جداً هو مبيبقاش مدرك انه داخل على ده هو بيبقى فاهم انه كورس بس هو تغيير
الفرق بقى ما بين الكورس والبرنامج، البرنامج فيه حاجات هو كان بيعملها غلط ففي قرارات متطرفة بتتاخد بيغير مساره، بيغير الطريق اللي هو ماشي فيه وبيبتدي يتبنى أفكار جديدة وينفذ بطريقة مختلفة دي حاجه
بعملها ازاي هو الأول بيحجز معايا مكالمة نص ساعة مجانية، النص ساعة دي انا بشوف مدى استيعابه وهل هو مرن كفاية انه يتبنى أفكار جديدة ولا لأ لأن لعلمك ناس كتيرة مش مستعده انها تتبنى فكرة واحدة جديدة أو ممكن فكرة جديدة تعمله قلق أو تضايقه فبركز في المكالمة على مدى مرونة فكرة ولو هو فعلا مستثمر عايز يعمل حاجه ولا لأ
لأن في ناس كتير بتبقى داخله فاكرة البورصة نادي، هو داخل علشان يبقى اسمه مستثمر علشان هو بقى معاه الفلوس الكافية انه يقدر يقول يعني هو داخل نادي استثماري كده مش عايز يكبر الفلوس ولا حاجه هو مالياً بقى معاه فلوس فبقى عايز ينضم للمجموعة وهي طبعاً البورصة بطبيعة الحال مكان للاذكياء فقط يعني انا خلال السنين دي كلها مقابلتش حد غبي في البورصة لا مستثمرين ولا ناس شغاله في المجال، فهو مكان بطبيعة حالة بيستقطب الناس الأذكياء فهو بيبقى داخل للمجموعة انه هنا بيسمع حاجات زكية، حاجات عن الاستثمار وبيسأل نفسه اسأله برضه لما بيروح يسألها لباقية الناس بيبقى في زي رضا التفاعل هو قاعد بيتكلم مع ناس في مجتمع ذكي اوي كده وهيتعلم وهيسمع منهم حاجات يا اذكى من اللي هو بيقولها فهيتبسط أو هو مبسوط انه مع الناس الأذكياء اوي دي
عمر: بس مش معناه انه هيعمل فلوس؟
لارا: لأ خالص هو داخل للمجتمع
عمر: انتي بالبرنامج ده بتقضي على الحاجات دي، يعني بتحاولي تقوليله أو توضحي الرسالة في مخ المستثمر او المستثمرة اللي داخله يا جماعة احنا هنا جايين نعمل فلوس صح كده؟
لارا: هو بشكل أساسي مستثمر مفيش مستثمرة، مبيبقاش في ستات اوى
عمر: لأ انا عايز أقولك على حاجه بالعكس، انا البودكاست هنا غالباً اللي بيسمعوني 50% يعني 50-50 ودي حاجه مثلاً انا اتخضيت منها لأن طبعاً احنا بنشتغل في المجال من سنين كتيره الناس عايزة تخش بس المشكلة دايماً هبتدي منين، المقاومة بتاعة اني عايز حد بس يحطني على اول الطريق دي صعبة جداً
لارا: خليني برضه ألوم مجتمع المحللين، في لوم كده احنا طبعاً درسنا حاجات هو لو درس تحليل فني وتحليل مالي هيكون دفع في حدود من 8 لـ 10 آلاف دولار عشان يتعلم الحاجات اللي هو متعلمها فلما بيجي حد جديد بيصعب عليه القصة بيقوله يعني انت هتروح تتعلم انت اسهل تاخد مني المعلومة مع ان على فكرة مش لازم يبقى محلل مالي بشهادات ولا محلل فني بشهادات دولية عشان خاطر يعرف ياخد قرارات عادية في البيع والشراء وانا قابلت كتير جداً ناس أصحاب شركات وأصحاب مصانع بيدخل في البورصة وبتلاقيه بيعمل احسن مننا كمحترفين جوه السوق فهو بيعمل كده ازاي وهو اصلاً مبيفتحش التقرير اللي انت بتبعتهوله، هو اساسا مش محتاج البحث بتاع الشركة هو داخل ينفذ وفقاً لشوية قوانين هو حاطتها وداخل كتاجر فازاي ده يعمل فلوس وانت متعلم كل ده ومبتعملش زيه فدي حاجه كانت مثيرة للاهتمام بالنسبالي ولما شوفتها خلاص بقى حتة انك لازم تتعلم كل اللي انا اتعلمته عشان تعمل زي او احسن مني لأ مش لازم، حطني على جانب
عمر: انا مقتنع، يعني من اتجاه الاستثمار هنلاقي على المدى الطويل لو بتشتغل سلبي غالباً عندك فرصة كبيرة جداً انك تعلى الأداء بتاعك لناس مشهورة ومعروفه
لارا: والمؤشر نفسه، انت ممكن تغلب المؤشر نفسه في الـ 10 سنين
عمر: وممكن كمان يبقى عندك فرصة حتى لو فرصة قليلة بس مازال عندك فرصة لو انت عارف انت بتعمل إيه
(11:54)
عمر: طيب هقف بقى هنا نقطة، إيه اللي استفزك في النظام خلينا نقول انتي بتعملي منتج مختلف من موجود، مشوفتوش في المنطقة العربية، بس أكيد في اسباب معينة استفزتك، يمكن في ناس عملته عالمياً او بتحاول.. إيه اللي استفزك.. أديني كده 10 5 3 حاجات استفزوكي خلوكي تبتدي دي حاجة واضحة مشكلة في النظام بتاع الاستثمار وانتي عايزة تعمل قطع للموضوع؟
لارا: أداء الصناديق في السنين الوحشة مقابل السنين اللي السوق بيعمل فيها دي كانت اول استفزاز هما مثلاً في 2011 شوفنا خسارات بأكتر من 60% لصناديق بيديروها ناس لا غبار عليهم
عمر: محترفين
لارا: آه طبعاً محترفين ساعتها كان ضعف و3 أضعاف الخبرة بتاعتي فكانت انت ازاي بالخبرة دي كلها وتخسر 70% او تخسر 65% دي كانت أول حاجة فلما هما عملوا حلو بقى في السنين كده اوكية هما بيعرفوا يعملوا حلو لما السوق بيعمل حلو لكن مش بيعرفوا يحافظوا على الفلوس لما السوق بينزل فدي كانت اول حاجه شوفت في هنا فرصة انت ممكن تعمل حلو زيهم على الأقل وبعد ما السوق ينزل انت تبقى محافظ على الفلوس نفس أفكار التحليل الفني
عمر: على المدى الطويل تقدر تبقى بتعمل احسن منهم
لارا: على المدى الطويل، فدي كانت اول حاجه خلتني افكر في الموضوع ده بجدية تاني حاجه كان انت مين اللي بيجيب للشركات اكتر فلوس طبعاً مدير الحساب، طبعاً انا وقت ما دخلت البورصة كانت اغنى بكتير على جنيه والقيمة السوقية حجم السوق نفسه كان غني مكنش كبير فكانوا بيعينوا ناس فاهمة هي بتتكلم في ايه.. بعد كده حصلك بقى كارثة عالمية وعندك حاجة خاصة كانت الثورة انت أخدت كوراث لوحدك
عمر: مشاكل ليها علاقة بالمنطقة العربية
لارا: آه، بالظبط فالمشاكل دي ضرتك سنة سنة لحد ما الشركات اضطرت تعين اي حد مش مهم عنده خبره مش مهم بيعرف المجال ومش بيمرنوه على اي حاجه
عمر: ودي حاجه استفزتك
لارا: طبعاً لانه بيجي من بعد شهرين بس خبرة يقارن أدائه بأداء المحلل فدي كانت حاجه برضه مش مقبولة بالمرة انت عندك شهرين بس خبرة انت لو كسبت في الشهرين دول انت مش هتعرف تكسب باستمرار على المدى الطويل انت مش مختبر الاستراتيجية اللي انت بتمشي بيها وعارف انت بتعمل ايه هي جت معاك حظ شهرين احنا محتاجين نختبر ده شهور كتير قدام عشان نعرف اذا كنت فعلا بتقدم كده كل الأوقات ولا لأ فدي كانت تاني حاجه
وبعدين بقى تلاقي كلام من المحللين اللي هو نعظم في نفسنا ونعظم في أدائنا ونعظم في التنبؤات يعني انا واحدة مبتوقش تماماً انا مش شغالة على توقعات وتنبؤات، حتة برضه التفائل والتشائم مبتفائلش مفيش دي لهجة أنا لا اعتمدها، فلا تفاؤل ولا تشاؤم ولا وتحفيز حتى احنا بقالنا سنين كتير في البورصة هل كل السنين اللي حققنا فيها كان عندنا نفس الحافز بس انت بتحقق بغض النظر لو عندك نظام هتشتغل بغض النظر انت محفز دلوقتي ولا لأ، عدينا بوقت كتير صعب لما تبقى بتعمل حلو واحسن من السوق بكتير في الوقت الصعب هنا بقى انت بتعمل ايه منظم الدنيا عندك ازاي بحيث انك تنفذ بغض النظر فطبعاً اللهجة من المحللين يعني اللي هو انت لازم تتعلم كل الشهادات الدولية قبل ما تبتدي وطبعاً ده طريق طويل جداً وبياخد من الشخص عشان يغطيه مش أقل من 10 سنين بمنتهى الأمانة اقل حاجه 4 سنين واكتر حاجه 10 سنين عشان تلم بالتحليل الفني والتحليل المالي والنماذج المالية وإدارة المحافظ انت الأربع حاجات دول محتاجين منك 10 سنين
طيب أوكي تعالى نقارن 10 سنين وانا مستثمر في البورصة ولا 10 سنين وانا بتعلم عشان بس افهم واحط قرار في السوق فلأ في حاجه غلط
عمر: والبرنامج بتاعك ده بيقصر الوقت بيخلي الناس تبتدي
لارا: شهر ونص
عمر: شهر ونص شهرين بتخلي الناس تبتدي من حتة تكون ناس كتير عدت بيها وخبرات انتقلت في الشهرين دول
لارا: بالظبط انا بفلتر له بس ايه المعلومات الصح من الغلط، بدل ما هو يضطر يدخل من الأول يدرس كل اللي انا درسته وأنا كمان كنت متفرغة متخيلش ابداً انه هيكون بنفس تفرغي انا واحده كنت بشتغل في البورصة وعندي من القدرات العقلية اننا اقعد اختبر في افكار ممكن يا تعمل يا متعملش بس هو معندوش ده فهو حتى لو اخد الـ 10 سنين هو مش لازم يختبر اي حاجه في الـ 10 سنين ماهو هو ممكن يكون مشغول في شغله فلا ملهاش لازمة وبعدين هو لازم يحدد هو عايز يبقى ايه عايز يخش يشتغل زيي ساعاتها ذاكر ادخل الطريق وخد الشهادات
عمر: وانت متفرغ للشغل ده
لارا: بالظبط، في ناس انا بقولهم في الأول لازم يحدد هو مين الأول انت عايز تدخل تشتغل في شركات فساعتها اتعلم خد الشهادات الدولية اللي بتسمح لك ان شركة من الـ 10 الأوائل تقلك تعالي احنا عايزين حد من العيار بتاعك
لكن معظم الناس مش عايزة، معظم الناس عايزة تستثمر فاللي عايز يستثمر ده متجيش انت كمحلل تعطله بفكرة انه لازم يتعلم الشهادة اللي هتاخد منه وقت وفلوس وكل ده، طب افرض ان هو كل اللي معاه الـ 10$ بتاعة الشهادتين طيب ما يحطهم ويستثمرهم لانه كده كده مش عايز يشتغل في الشركات هو عايز يستثمر
وانا مش قادرة ألوم على المحللين اوي برضه لأنهم برضه اتعلموا حاجات كتير جداً ودرسوا يمكن كتب صعبة فطبيعي تلاقي منهم رد الفعل ده انت مش هتيجي تساوي نفسك بيا في الاخر يعني فانت لازم تتعلم اللي اتعلمته عشان تاخد نفس القرارات لأ مش لازم فدي حته برضه فاهم حته تعظيم من المحلل انه يقولك لأ انت لازم انت هتيجي من شهر وتعمل كده لأ
(18:44)
عمر: انتي مقتنعة ان في مستثمرين كويسين ممكن يقضي من يومه 10 دقايق نص ساعة وقت محدود جداً ويعمل نفس الشغلانة بتاعته دكتور مهندس من خلال خبرتك ومن خلال الناس اللي اشتركوا معاكي في البرنامج بتاعك وشوفتيهم بعد كده، البودكاست ده معظم الناس مش متفرغين، مش عايزين يشتغلوا في المجال، وهدفي اننا اعرف المعلومات دى للناس.. هل شايفه النموذج ده ينفع؟
لارا: هو نفع اصلا هحكيلك هو كان في شركه من الشركات كنت بشتغل على خمس أسواق بيفتحوا في أوقات مختلفة وكنا شغالين على مدار الساعة فطبعا كنت انا لوحدي اللي ماسكه القسم وبطلع التوصيات اليومية ووراد جداً يحصل تداخل الأسواق في بعض فدي كانت بداية ازاي
ازاي تقدر تدير خمس أسواق في نفس الوقت منهم امريكا اللي هو فيها عدد أسهم انت مش هتعرف تعمل لهم فحص في اليوم يعني، فعشان مفيش أي سوق من الخمسة يقع مني كنت عاملالهم مواعيد معينة ببص على السوق ده فيها ومن هنا ابتدت عرفت ان انا على فكره مش محتاجه ان انا ابقى قاعده قدام الشاشه من اول الجلسه ما تبتدي لحد ما تخلص مش محتاجه انا ممكن في اوقات معينه ببص على السوق انفذ اللي انا عايزاه وخلاص كل حاجة متحددة من قبل الجلسه ما تبتدي انا هشتري ايه ممكن اعمله في وقت فراغي بالليل
فهل انت محتاج تبقى قاعد قدام الشاشة بالتفرغ عشان خاطر تعمل أداء زي اللي انا كنت بعمله وانا متفرغه يعني انا على خمس أسواق لقيت انه لا في طريقه ان انا ممكن ما ابصش على الشاشة طول الوقت
ساعتها كان عندي برده تخوف تاني اني هل المستثمرين العاديين اللي ما عندهمش خبرتي ومش درسين شهاداتي ومش متفرغين هل يقدروا يعملوا كده؟ لما ابتديت أمرن الناس لا هم عملوا كده اصلا.. ليه لأن هو مثلا واحد سوفت وير او اتش ار أو واحد اصلا عنده شركته أو واحد مستشار هندسي بينزل مواقع فهل هو محتاج ان هو من الساعه 10:00 لحد الساعه 2:30 يبقى قاعد قدام الجلسة او في امريكا من احنا بنتكلم 6 ساعات و2 قبل السوق و2 نشر.. هل هو محتاج يقعد 10 ساعات لا اكيد لا
فأنت بتحدد كل حاجه والسوق مقفول او الموضوع ما بياخدش منك يعني احنا بنعمل ايه بالسوق مقفول احنا في مهام معينة بنعملها بس هو مقفول وفي حاجات بنعملها والسوق مفتوح فأنت لما تحدد ايه اللي هيتعمل الشغلانه بتاعتك عندك النهارده في حاجات هتعملها بنفسك وفي حاجات هتفوضها، فبقوله إيه الحاجات اللي يعملها بنفسه وإيه الحاجات اللي يفوضها وازاي يفوضها فكل ده بينفع
وفي الاخر محدش فاضي انا نفسي مش فاضية انا ساعات بكون عندي حاجات لازم انفذها في السوق ممكن انفذها في 5 دقايق وتلاقيني باقي الجلسة انا في الشارع بعمل مشاوير أو دخلت في إجتماع مش فاضية فكان برضه عندي نفس التخوف ده لحد ما شوفت الناس بتعمله بنفسها
عمر: السبب ان ممكن يبقى في أفكار جميلة جداً لكن صعبة جداً في التنفيذ وصعبة على العوام، يعني ممكن اقولك انت لو تاجرت في الحاجة المعينة دي أرباحك هتبقى رهيبه بس هما في 2 تجار بس اللي بيعملوها اننا اقول للناس بشكل عام يا جماعة دي احلى فكرة موجودة في الحياة ده غلط لانها مينفعش انفذها، عشان كده انا بسألك هل الجموع ممكن تعملها انتي بتقولي اه بس كل واحد يحطها في الإطار بتاعه، كل واحد عنده نظام في حياته وهيعرف
(22:37)
عمر: طيب اللي بياخد كورس معاكي هل كلهم بيطلعوا يعملوا نفس الحاجه بالظبط؟
لارا: لا لا هنا بقى في تخصيص ده اللي هيعجبك بقى اللي انا قلتلك عليه في الأول تخصيص عنيف جدا لا بص هو انا اولا انا بختبره هو عنده اختبارين معايا، امتحان بتعرف بيه على الطريقه اللي هو بياخد بيه قراراته، انا ببقى عايزه اعرف ايه التحيزات المعرفية المتداخلة معاه في القرار فده بيبقى شخصي جدا له هو
انا بحل 12 تحيز معرفي في البرنامج ده فال 12 دول هم متداخلين معاه في القرار بغض النظر هو موافق او مش موافق هم متداخلين معاه في القرار
انا اغلب اللي معايا رجاله فاضطريت اعمل الامتحان ده انا في الطبيعي ما كنتش هعمله بس اضطريت اعمله لان سهل جداً في المجال بتاعي انت طبعا عارف الإيجو حاجه خطيره انا اكتر واحد بيفهم والكلام ده فسهل جدا على اي راجل انه يجي يقول لي انا معنديش مشاكل طيب خلاص خليك انا البرنامج عندي بيحل مشاكل فانت معندكش مشاكل فانت مش محتاج البرنامج
عندي حاجه كمان ان هو في تحيز من التحيزات بيخليه ان هو يكذب على نفسه طيب انت لو بتكذب على نفسك خلاص انت مواجهتش نفسك بالحقيقة فأنت كذبت على نفسك فأنا بدل ما ادخل في جدال ملوش لازمه انا بديله مواقف هو بقى يقعد يحل الامتحان وانا بعرف منها كل حاجه تخص القرار هو فعلا مايل في القرار ده لما يتحط في المواقف دي هياخد القرار ده ولا القرار ده عشان انا احدد التحيزات
عشان جالى ناس "لا طبعا انا ما عنديش مشاكل خالص" طب معندكش مشاكل خسران ليه ده اول حاجه بعدين معندكش مشاكل انا بحل مشاكل فأنت متضيعليش وقتي بره
وتالت حاجه ان في تحيز بيخليك بعد الحدث تقول "اه ما انا كنت عارف" يعني مثلا هديك مثال على القصه دي لو قاعدين الصبح بنشرب قهوة مع بعض وبعدين قلتلك يا عمر تخيل في طريقه نصب جديده وبيدخلوا على العميل يقولوا كذا كذا وبطريقه ذكيه جدا بيدخلوا له بالحته دي وبيدفعوه بالطريقه الفلانيه وبعدين سيبتك وقمت وبعدين دخل عليك النصاب بنفس الطريقة وبنفس اللي انا لسه حاكيهولك هل هتقول انا ما كنتش عارف ولا هترجع لورا كده لا ده بيشتغلني
عمر: المفروض لو عاقل لو انا انسان عاقل هقول اه ما انا لسه حد قال لي القصه دي
لارا: اه مش هقع بقى، فالفكره ان في حاجات كده بعد ما بتعرفها هي بتفتكر ان انت كنت اصلا عندك الوعي بيها فاللي انا بعمله حساس جداً عشان عشان محدش يقولي ما انا كنت عارف عشان انت ما كنتش عارف انت لو كنت عارف كنت اخدت القرار الفلاني ما انت ما كنتش عارف فسهل قوي ان هو يقولي ما أنا كنت عارف ودي حصلت مع واحد بعد ما قالي يا نهار ابيض والمشكله كبيرة طب احلها ازاى وبعد ما اتكلمنا مع بعض الحل يقول لي اه طب ما انا كنت عارف طب يا ابني ما انت لسه سائلني لو ما كنتش عارف فهي واحدة من التحيزات
عمر: التحيزات كلها عندنا في السيكولوجيا بتاعتنا كلنا عندنا تحيزات بتاعتنا
لارا: بس انت عارف الشرق الاوسط الراجل مش سهل قوي ان هو يعترف ان في خلل اصل ده هو انا احسن واحد بياخد قرار
عمر: وهي الشغلانة كلها اتخاذ قرار هو مفيش اي حاجه تانيه احنا بنعملها اكتر من اتخاذ القرار
لارا: بالظبط فهو ده اللي انا بحله بقى فبيبقى في مسافة ما بينه وبين ان هو اصلا ينفذ القرار مش ان هو ياخده هو ممكن ياخده ويفضل قاعد مينفذش يقولك اه ما انا هودع الفلوس وما يودعش طب فين برده هتلاقيه قاعد مستني قاعد يفكر في حاجه تانيه ممكن يعملها
عمر: انا عايز ابتدى بس ان شاء الله هبتدي السبت الجاي ويجي السبت الجاي اصل انا انشغلت في حاجه تانيه، انت بقى بتشيلي المسافة دي كلها بين اتخاذ القرار وتنفيذه
لارا: بالضبط انا بشيل المسافة دي كلها لان هم في الـ 12 تحيز غالباً
(26:50)
عمر: هل التحيزات دي في ناس بتسقط فيها؟ يعني الامتحان ده في ناس مبتعديهوش؟ او بالنسبالك ده روح اعمل اي حاجه تاني؟
لارا: لا لا مش كده خليني برده اقولك ان الوعي نص الحل وساعات بيكون الحل كله فأنت لو بقيت واعي بالمشكلة خلاص، طيب تعالى نقول ان الحل هو خلاص بقى واعي بالحل بقى عارف هو المفروض يعمل ايه لكن الحل مش مناسب لشخصيته ودي مرحلة تانيه من التخصيص جوه البرنامج انا بديله امتحان تاني علماء النفس اللي عاملينه انا كنت درسته في الجامعة واضطريت ارجعله بقى لان هو ده اللي لقيت انه اساس كل حاجه
احنا عندنا 16 شخصيه وانا اتعاملت مع الـ 16 في مجال عملي، اتعاملت مع مديرين حساب فانا كتبت العيوب والمميزات والحاجات اللي بتحمسك والحاجات اللي بتقلل عزيمة كل شخصية لأنها مختلفة اللي بيحمسك ممكن يحبط حد تانى
فبديلة الامتحان وبيطلع 1 من الـ16 ببعتله بقى تقرير انا كتباه عن الشخصية دي ودي بتبقى حاجه خاصه بيه هو لوحده عايزة أقولك كل ما ببعت بيقولولي انتي بتوصفيني بالظبط
طيب ده بيبقى هدفه ايه؟ هدفه اني عايزاك تقوي نقاط القوة بتاعتك أنا مش عايزة اضيع وقتي فإننا نقوي نقط الضعف مش هننجح فأنا عايزة استغل نقط القوة واقويها وأعلي عليها كمان اعمل مضاعفة على نقط القوة بتاعته وهي دي اللي هقدر استغلها وببقى عايزة اعرف ايه اللي بيحمسه لأنه ممكن مثلاً يتحمس من مكاسب سريعة فهو شايف ان في حاجه بتجري فيتحمس لها فدي حاجه بترجع برضه للتحيزات تاني فهي دايرة كده بنمشي إيه اللي بيحمسه وإيه اللي بيحبطه لأن في ناس ممكن تحبط بسهولة في ناس بتحبط من حاجات في السوق
الدراسة دي انا مكنتش واخدة بالي اوي بس دكتور "فان كاي ثارب" ماشي بنفس النظام طبعاً هو نظام قديم جداً من أيام "كارل يونغ" بس انا هتكلم على دكتور "فان كاي ثارب" انا هتكلم عليه هو يعني ان في شخصيتين هو شايف انهم مينفعش يديروا لنفسهم ده كان رأي دكتور "فان كاي ثارب" مش رأيي أنا
عمر: من الـ16 واحد في شخصيتين من الأحسن ان حد تاني يديرلهم
لارا: الأحسن أن حد يدير لهم مش هما اللي يديروا بنفسهم، طيب هل البرنامج بيقدر ينفعهم أه طبعاً لانه هيعرف يدير اللي بيدير له، خلاص متتعاملش انت في الفلوس بشكل مباشر هيبقى عندك مدير حساب تديره انت بقى انت قوله يعمل ايه وازاي
عمر: معلش عشان اللى بيسمعونا، مش لازم كل اللى بيسمعونا يحسوا انهم الـ 2 من 16، عشان ممكن الناس تبقى خايفة انها تبقى الـ 2 من الـ 16 لأ دول 2 من 16 يعني دول نسبة قليلة مش كبيرة
لارا: وعمتاً هقولك حاجه هل انا بوجهة نظر دكتور "فان كاي ثارب" هل انا من الناس اللي عندها إمكانية عالية اني ادير واكسب؟.. لأ
عمر: انتي شخصيتك لأ
لارا: انا شخصيتي شخصياً بالنسبة له معتدل، انا دخل معايا في البرنامج ناس عندهم إمكانية انهم ينجحوا اكتر منى بكتير، يعني انا مش ملتزمة اوى وانت عارف البورصة يعني التزام اوي فأنا قعدت أمرن نفسي على الألتزام 4 سنين تخيل بقى لو واحد اصلاً ملزم نفسه باعلى حاجه لأ ده انت من الأول خالص عرفت الصح ودخلت
عمر: فانتي بتشتغلي هنا على نقطة القوة، يعني الـ 2 اللي مينفعوش فى قدامهم قد ايه ينفعوا من الـ 16؟
لارا: 14 واحد ينفع
عمر: الـ14 دول توزيعهم ازاي؟ في شوية في النص وشوية ينفع اوي
لارا: اللي عقلهم استراتيجي دول بينفعوا أوي عمتاً أكتر مني بكتير لأنهم بيبقوا باصين على الحاجة بنظرة دقيقة وهما بطبيعتهم محللين مش لازم يكون دارس اي حاجة سوق بس هو بطبيعته محلل بس برضه فيها عيوب تنفيذ
عمر: المحللين دول عندهم عيوب من نوع أخر
لارا: عيوبهم كلها تنفيذ
عمر: هل في شخصية كاملة منهم؟
لارا: لأ ولا واحد والكامل ده هو شخص نادر جداً 2% مثلاً من الإجمالي فهو اصلاً مش موجود، قليل جداً متقابلة يعني
عمر: طيب احنا كده لسه مبدأناش في أي حاجه، احنا بنحلل البني آدمين قبل ما نخش
لارا: اه انا بشوف هو مين اصلاً
عمر: بتاخدي التحاليل بتاعته، زي تحاليل الدم كده أو إشاعة
لارا: ايوة بالظبط، عشان نرسم الـ DNA
عمر: نرسم الأول ونعرف انت فين مكانك من الآلاف او الملايين من المستثمرين لأننا كلنا بنلعب قدام بعض، لما نروح السوق كلنا قدام بعض دلوقتي فأنتي بتصنيفهم الأول
لارا: آه
(31:58)
عمر: بعد ما بتصنفيهم بتعملي ايه؟
لارا: انا بسيب له حته صغيره قوي بقى يلعب فيها حته صغيره جدا ان هو يختار هو نفسه يكون ايه نفسك تكون مستثمر معتدل ماشي في النص ولا عايز تكون عنيف ولا عاوز تكون متحفظ دي بسيبها له كاختيار لكن مش هو اللي احنا بنشتغل من عليه خالص انا ببقى عايزه اعرف ميوله
انا مثلا واحده احب اكون معتدلة خير الامور الوسط والكلام ده، احب ان انا يا سلام دي حاجة كويسة جدا بس انا لما تعرفني تقعد جنبي كده وانا بتداول لو في بعد العنف انا هناك
عمر: ده اختيارك
لارا: في فرق كبير مابين اللي انا فاهمه عن نفسي والحقيقة ان انا عنيفة جدا بس انا احب اكون معتدلة فأنا بسيبهم يختاروا عشان انا ببقى عايزه اعرف ميوله بس
بعد كده بقى بخلي اللي هو عاوز يطلع بيه من السوق هو اللي يحدد احنا هنمشى ازاى وهرجع واقولك في واحد داخل البورصة أو داخل مجال الاستثمار وهو مش عايز حاجه انا بلعب على الحته دي بقى لا انت لازم تعوز حاجه عشان تجري عليها ما انت لو مش عايز خلاص يبقى احنا مش موجودين
عمر: لازم يحط هدف قدامه
لارا: حط هدفه وقالي هنعمل ايه، اصل انت لو حاطط هدف هتقدر توصل له هتبقى عايز تاخد أفعال توصلك لهدفك على عكس اللي مش عايز حاجه ينجح شويه ويسقط شويه وفي الاخر مش عايز حاجه ومعندوش اللي يحمسه للتنفيذ ولو منفذش هو مش متضايق بيبقى داخل تضيع وقت عامه
بس لو هو عايز حاجه انا واقف دلوقتى على فلوس معينة عايز اوصل ان انا مثلا أضعف المبلغ او انا اقدر احوش وازود على المحفظه دي كذا هعمل ايه عشان اضعف في اي وقت قدامي سؤال ده اهم سؤال انا بجبره يجاوب عليه انا بجبره يحط هدف، بجبرك تقولي ناوي تزود قد ايه على المحفظة دي عشان نعرف احنا محتاجين قد ايه عائد بالنسبة المحفظه ازاي هنعرف نشتغلها ازاي لكن هو لو مش عايز حاجه خالص هنمشي ناحيه ايه مفيش حاجه احنا عايزينها فبنحط الهدف وبنحط الرقم وبرده حتة ان هو يبقى مستوعب ان البورصة أنا داخل هزود على الفلوس دي حتى المبلغ بسيط عشان انا عايزه اكسب عشان انا عايز اكبر المحفظه
خلينا برده نتفق يا عمر اننا كلنا جايين متأخر حتى الموجودين في السوق احنا المفروض كنا نكون بنستثمر من زمان جدا طبعا العيب عندنا أن البورصة والاستثمار لا تدرس لا في المدرسه ولا في الجامعه فأنت عرفت عن البورصة بعد ما اشتغلت بكام سنة انت جاي بقى بعد ما بقى عندك 30 سنة أو 40 سنة انت محتاج تعوض اللي فات ومحتاج تبني الصندوق تقاعد يشيلك في المستقبل فمينفعش تبقى داخل مش عايز تحط فلوسك لكن داخل بورصة يبقى انت عايز تعمل حاجه عايز اعمل صندوق لنفسي يشيلني لو حصل حاجه هو ده اللي اعتمد عليه بعد ما خلاص مش عايز اشتغل اكتر من كده فلازم يعوز انا معنديش اختيار اللي هو مبيبقاش عايز حاجه يعني في المطلق لازم يكون عايز ولازم يكون عايز يزود على المحفظة
في ناس بتخاف يعني برده من أكبر الغلطات اللي الناس بتعملها ان هو مثلا يبقى حاطط في دماغه انا حطيت كذا في البورصة ويسبهم بالسنين اللي بيزود ولا بيعمل اي تداول ولا بيغيروا اي حاجه هو شايف ان ده احسن حاجه فطبعا بيتفاجئ بعد 10 سنين هو مبيعملش حاجه هو معملش حاجه بطريقه معينه هي دي الطريقه اللي هو معملش فيها حاجه لكن لو هو كان نشيط انا مش بتكلم ان هو لازم يتداول ثقيل خالص بس هو لو كان نشيط وبيعمل توازن صح كل 3 شهور مثلا والموضوع مش هياخد منه 10 دقائق ربع ساعه تفكير بس تكون بتعمل حاجه باستمرار مظبوطه توصلك ان انت اخر السنه يعمل زي السوق ياحسن منه ده اللي المفروض يكون تغيير، من غير خريطة من غير خطه من غير ما تبقى عارف ان انا مفروض اعمل ايه امتى ازاي باي طريقه انا اعتقد ان دي من أكتر الحاجات اللي بتوقع الناس كلها
(36:35)
عمر: حلو اوى يبقى انا عشان ألخص الموضوع.. اتكلمنا اتعرفنا على بعض، عملتيلي الاختبارين بتوعك عرفت التحيزات بتاعتي، عرفت شخصيتي عاملة ازاي، حددت هدفي احنا كده برضه لسه مبتديناش
لارا: احنا 8 محاضرات ولسه مبتديناش
عمر: بس ده اهم بكتير من وجهة نظري من ازاي اعلمك تستخدم المؤشر ده ازاي تعمل تحليل مالي او الكلام ده كله لان احنا اكبر عدو للي بيشتغل فى المجال هو نفسه انت ممكن تاخد كل المعلومات وتشتغل مع كل المحترفين ولكن آلية اتخاذ القرار بتاعتك خاطئة تماما هتدمر كل حاجه انت مركزه وهنا جزء كبير نتكلم في ربع كورس او ثلث الكورس مثلا
لارا: اه يعني اعتقد التحيزات لوحدها نصه لان انت عندك تحيز واحد ممكن يدخلك في كذا قرار غلط هم 12 تحيز فتخيل لما تحيز واحد يدخلك في 3 4 غلط
عمر: وبكده نكون وصلنا لنهاية حلقتنا الاولى مع لارا هستناكوا ان شاء الله الاسبوع الجاي
Translation of some words and terms:
Trading Coaching التدريب على التداول
Approach أسلوب
Passion شغف
Excited متحمسة
Global Trend اتجاه عالمي
Believe It Or Not صدق او لا تصدق
Mindset عقلية
Product منتج
Consultant استشاري
Program برنامج
Reflect يعكس
Transformation تغيير
Radical متطرف
Disruption خلل
Interaction Satisfaction رضا التفاعل
Basically بشكل اساسي
Resistance المقاومة
Analysts المحللين
International دولية
Professionals محترفي
Report تقرير
Research بحث
Intriguing مثيرة للاهتمام
Anchor مرسا
Performance الأداء
Index مؤشر
Funds صناديق
Experience الخبرة
Frontline خط المواجهة
Marketcap القيمة السوقية
Constantly باستمرار
Predictions التنبؤات
Motivation تحفيز
Financial Modeling النماذج المالية
Portfolio Management إدارة المحافظ
Mental Capacity القدرات العقلية
Caliber عيار
Department القسم
daily recommendations التوصيات اليومية
Overlap تداخل
Screening فحص
Predetermined محددة مسبقا
Tasks مهام
Allocations المخصصات
Delegate مندوب
Personalisation تخصيص
Biases التحيزات
Situations مواقف
Awareness الوعي
Critical حساس
Psychologists علماء النفس
Discourage ثبط العزيمة
Leverage رفع
Double Down مضاعفة
quick gain مكاسب سريعة
Realization ادراك
Potential إمكانية
Moderate معتدل
Discipline انضباط
Aggressive عنيف
Conservative متحفظ
Tentative مُتَردِّد
Dictate تملي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #TE404 #الجزء_الأول