154. مقتطفات مالية مع ضيوف كلام ينور (الجزء الأول)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بمناسبة مرور 3 سنين على كلام ينور حبينا نحتفل معاكم بمقتطفات مالية مع ضيوف كلام ينور، عشان اولاً نشكر ضيوفنا اللي احنا مبسوطين انهم ادونا من وقتهم، وفي نفس الوقت نسهل على الناس الجديدة إنها تعرف المواضيع والضيوف اللي اتكلمنا معاهم على مدار 3 سنين.. ولو في حلقة معينة أو موضوع معين مهتم بيه ارجع اسمع الحلقة تاني و هنبدأ النهاردة بالجزء الأول
:مقتطفات الجزء الأول
(02:16) حلقة 8: هل للوقت تأثير على الفلوس -
(03:31) حلقة 9: يوفوريا -
(05:56) حلقة 17: رحلة داخل شركات السمسرة -
(06:50) حلقة 18: أمناء الحفظ -
(07:50) حلقة 28: أعجوبة العالم الثامنة - الفوائد المركبة -
(09:15) حلقة 29: الاكتتابات العامة -
(10:46) حلقة 36: ازاي تبدأ شركتك الناشئة -
(14:54) حلقة 57: كل ما تريد معرفته عن ثاندر - الجزء الأول -
(14:40) حلقة 58: كل ما تريد معرفته عن ثاندر - الجزء الثاني -
(15:47) حلقة 66: المجال المالي كوظيفة -
(16:52) حلقة 67: الفرق بين الموظف ومؤسس الشركة - الجزء الأول -
(18:36) حلقة 68: الفرق بين الموظف ومؤسس الشركة - الجزء الثاني -
(19:26) حلقة 73: توزيعات الأرباح في البورصة -
(21:03) حلقة 74: تقسيم، شطب، إدراج الأسهم في البورصة -
(22:09) حلقة 85: حوار مع مستثمر - أكت فاينانشال - الجزء الأول -
(24:04) حلقة 86: حوار مع مستثمر - أكت فاينانشال - الجزء الثاني -
(25:21) حلقة 87: حوار مع صديق (بين الماضي والحاضر) -
(26:25) حلقة 89: رحلة داخل قطاع الـ FMCG - الجزء الأول -
(27:48) حلقة 90: رحلة داخل قطاع الـ FMCG - الجزء الثاني -
يارب الحلقة تكون مفيدة، واستنوا الجزء التاني الإسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في بودكاست كلام ينور بمناسبة مرور 3 سنين كنت عايز اعمل حلقتين نرجع فيهم بالذات مع الضيوف اللي جولينا وادونا من وقتهم في مختلف المجالات كنت عايز اعمل حلقتين ورا بعض نعمل فيهم شوية مقتطفات، الفكرة في الحلقات دي انا بحبها شخصياً لانها بترجعنا للكتالوج بتاعنا في حاجات انا نفسي مبكنش فاكرها موضوع معين، ناس بيسمعونا جديد، فأنا بحب هذه النوعية من الحلقات فعايز احتفل مع الناس بمرور 3 سنين من كلام ينور وتاني نشكر فيها كل ضيوفنا اللي احنا بنشكرهم مره واتنين وتلاته اللي كل ما بسمع صوتهم ببقى مبسوط انهم ادونا من وقتهم فهسيبكوا مع الجزء الأول النهاردة وتاني لو في حلقة معينة عجباك موضوع معين انت مكنتش عارف عنه حاجه مهتم بيه ارجع للحلقة احنا هنسيب في الشو نوتس ارقام الحلقات عشان تساعدكم ترجعوا للحلقات
(02:16)
حلقة 8: هل للوقت تأثير على الفلوس
Introspect Capital الضيف: مروان هو شريك مؤسس لشركة
وعنده خبرة طويلة في المجال المالي
عمر: أنت النهاردة لو بتقيس بكلمة الوقت ، أول حاجه إيه هو الوقت اصلاً؟
مروان: لو فكرنا ليه بيقولوا الوقت قيّم؟ لأن أنت كإنسان وقتك بالحياة محدود ، يعني في إمداد معين للوقت ولذلك هو قيَم ، وده سبب إنه كل ما يعلى الطلب كل ما يعلى القيمة بتاعته لأن الإمدادات مش بتعلى معاه.. الوقت نفس الشي ، كل ما يمر وقت أكتر خلاص وقتك المتبقى بيخف وده السبب إنه قيّم ده مفهوم الوقت في العموم بس لو جينا ليه الوقت ليه قيمة بتقيم الفلوس لأن في حاجه اسمها تضخم.. ليه الـ 100$ اليوم قيمتها أكبر من الـ 100$ بعد سنتين ، يعني اذا أنا بعطيك خيار من اتنين بعطيك 100$ اليوم أو بعطيك 100$ بعد سنتين! المنطق إنه تنقي الـ 100$ اليوم لأن الـ 100$ بعد سنتين هتكون قيمتها أقل ، وكيف بتحدد قيمة الـ 100$؟ بالقدرة الشرائية للـ 100$ بمعنى ان لو أديتك اليوم 100$ ممكن تشتري بيها طاولة بعد سنتين يمكن متقدرش تشتري نفس الطاولة لان سعرها هيكون 105 دولار بسبب التضخم كل شي سعره بيغلى لذلك الـ 100$ قيمتها هتكون أقل بعد سنتين وهو ده معنى مفهوم القيمة الوقتية للمال.. كل ما يمضى الوقت كل ما العملة هينزل قيمتها .. هي دي القاعدة
(03:31)
حلقة 9: يوفوريا
ACT Financial الضيف: مصطفى هو شريك إداري ومؤسس لشركة
، عنده خبره أكثر من 18 سنة في أسواق رأس المال في مصر والشرق الأوسط وشمال إفريقيا
عمر: مين يقدر يساعدني انا كمستثمر ، انا النهاردة لسه ببتدي ، مين يقدر يساعدني ان انا اختار الشركات؟ ومين يقدر يساعدني خلال الرحلة نفسها ما بين اني دخلت وخرجت؟
مصطفى: انت عندك نوعين من الاستثمار يا إما استثمار انت ليك دور فيه ، خلينا نقول اننا بنتكلم على مستثمر غير متخصص ، يعني المتخصص خلاص هو بيدير استثماراته ، احنا بنتكلم عن المستثمر غير المتخصص هو عنده حاجه من اتنين يا اما استثمار هو هيبقى جزء من عملية اتخاذ القرار ، او في استثمار هو مش جزء من عملية اتخاذ القرار ، لو هو مش جزء من عملية اتخاذ القرار فهيروح لحاجه من اتنين يا اما هيروح لمدير اصول (شركة إدارة أصول) هي بدير له الفلوس بتاعتة دي سواء بيشتري في صندوق استثمار او لو محفظة كبيرة شوية ممكن يعين مدير استثماري يديرله محفظته ، بس فالاخر انا مليش دعوة انا معرفش فلوسي دي انا بشتري بيها ايه وببيع ايه ، انا بس عينت مدير استثمار شاطر وهو بقى بيدرس وبيذاكر وبيدير الاستثمار ده نوع من انواع الاستثمار ، في نوع تاني الشائع شوية الفترة دي هي التحليل الكمي للاستثمار هو ان مدير استثمارك ده هو الكمبيوتر ، انت فالاخر في إدخال محطوط بـمعايير معينه هي اللي بتاخد قرارات الاستثمار ، وده يمكن لو عاوزين نربطة بما اننا بنتكلم على نفسية المستثمر في الحلقة دي فيمكن ده أكتر حاجه بعيده او عكس تماما الاستثمار العاطفي ، لانك لو بتدي فلوسك لمدير استثمار او سمسار في الاخر احنا كلنا اشخاص ممكن تتأثر ممكن يبقى في أخبار وحشه مأثرة على نفسيته ، زي ما حصل مثلا وقت الكورونا كل الناس كانت متشائمة بزيادة فتلاقي قرارات غير متزنه ومتضاربه عشان فالاخر اللي بياخد القرارات اشخاص ، فاالتحليل الكمي للاستثمار بيخلي القرارات هي فالاخر بتطلع بدون اي تأثير نفسي
(05:56)
حلقة 17: رحلة داخل شركات السمسرة
الضيف: مصطفى غنيم هيساعدنا خبرة أكتر من 10 سنين في قطاع شركات السمسرة، النهاردة هو بيشتغل في شركة ADCB Securities التابعة لبنك أبوظبي التجاري
عمر:انا كعميل مش لازم أفهم في كل الحاجات دي انا كل اللي هقولهولك كسمسار انا عايز اشتري سهم في الحاجة الفلانية فأنت هتروح مكان اللي هو السوق وتحاول تجبلي الأسهم دي ، مظبوط كده؟
مصطفى: مظبوط ، هو السمسار بيكون مترخص عشان يقدر يعرض لك الأسهم بتاعتك أو يشتريلك اللي أنت عاوز تشتريها هو شغلته انه يشوف السوق ويطلب لك الحاجات دي هو مرخص علشان يعمل كده.. ولكن مع العرف كل واحد بيبقى مع السمسار بتاعه بيتكلم معاه ويقوله انا عاوز اشتري كذا فيقوله دي عليها عروض دي عليها طلبات يقدر يشتري فين يبيع فين مجرد يديله صورة عامة السوق شكله عامل ازاي
(06:50)
حلقة 18: أمناء الحفظ
الضيف: أحمد قاسم، أحمد عنده خبرة طويلة جداً جداً في شركات أمناء الحفظ
عمر: طيب أنت كأمين حفظ بقدر احولك فلوس ازاي وازاي اقدر استلم منك فلوس؟
أحمد: بص يا سيدي أمين الحفظ العالمي بيديلك حساب واحد عالمي وبيديك قائمة حسابات موجودة في كل بلد دي علشان تديها لكل الوسطى وبيديك حسابات اللي هي فلوس هتشتري في بلاد ايه ، يعني مثلاً هتشتري في مصر هيديلك حساب مصري مش لازم يبقى فيه رصيد لو انت في الإمارات هيديك إماراتي والسعودية وهكذا بعد ما يديك القائمة دي انت بتقرر بقى انت عايز تتعامل في عملة واحدة اللي هي مثلاً دولار هو بقى بيغطيلك الباقي عن طريق الحساب بتاع الدولار أو انت بتحط على حسب انت عايز إيه ، بالنسبة لحساب الأسهم ده بيبقى حساب واحد عالمي فيه كل الأسهم والحسابات اللي هي لكل بلد الموجودة في الحساب دي انت بتديها بس للوسيط عشان هو يبعت تعليماته قصادك مش أكتر
(07:50)
حلقة 28: أعجوبة العالم الثامنة - الفوائد المركبة
Introspect Capital الضيف: مروان هو شريك مؤسس لشركة
وعنده خبرة طويلة في المجال المالي
عمر: الفايدة المركبة دي مفهوم سهل قوي من وجهة نظرك يعني
مروان: مش بس على الفايدة المركبة أنا بشوف إن في العموم لو بنرجع 20 / 30 سنة لورا كان كل شخص بيهتم باختصاصه يعني الاستثمار خليه لخبراء الاستثمار بس دلوقتي مع التطور التكنولوجي و دمقرطة الأخبار والمعلومات انت لو عاوز أي حاجه بتدخل على الأنترنت بتلاقيه ومش بس بالأمور المالية بكل حاجه يعني دلوقتي لو بتسأل 10 أشخاص على الطريق عن لقاح فيروس كورونا كل واحد عنده رأيه لأنه دلوقتي المعلومات موجودة كله متاح كل واحد بقى عنده إمكانية الوصول لنفس المعلومات وكل واحد بيحللها بالطريقة اللي بيشوفها ودلوقتي كمان الإتجاه بقى للاستثمار لأنه بقى سهل الوصول إليه انت بتدخل تفتح حساب وبتبدأ تستثمر وتشتري وتبيع أسهم
عمر: وتشتري محفظة تقاعد في 5 دقايق
مروان: صحيح والموضوع ده بيخلق إيجابيات وسلبيات سيف ذو حدين لأن سلبياته انه في ناس مش فاهمه بتعمل ايه بتاخد مخاطرة وممكن تخسر فلوسها ، بس الإيجابيات انه كمان بيساعد في تثقيف الناس لانه انا بقى عندي حرية الوصول لده فلازم اقرا عنه واتثقف فبيحصلي محو أمية مالية واللي انت كمان بتساهم فيه بالبودكاست ده
(09:15)
حلقة 29: الاكتتابات العامة
ACT Financial الضيف: النهاردة معايا الأستاذ حازم عبد المحسن مدير إدارة الاستثمار في شركة
حازم من مسؤولياته في الشركة إن هو بيشرف على عمليات الاستثمار في الأسهم الخاصة والعامة
وهو بيدير شبكة المستثمرين العالميين التابعة لشركة أكت حازم عنده خبرة طويلة في المجال المالي تقدروا
عمر: أنا كواحد معنديش أي نوع من أنواع الخبرة في البورصة هل أنا لازم أول لما أسمع إن في إكتتاب عام أروح أجري واشتريه؟ يعني هل هما مضمونين انهم يطلعوا على طول؟
حازم: لأ هو مش مضمون إنه يطلع على طول لأنه زي ما في أمثلة أو أغلبية الأمثلة في بلد زي مصر مثلاً الإحساس تجاه الطروحات الأولية إيجابي الناس كلها بيبقى عندها احساس ان الطرح الأولاني ده هينزل هيكسب بس ده مش بالضرورة يكون في 100% من الحالات لان في حالات تانية طروحات أولية نزلت ومكسبتش فلأ مش المفروض انك تطلع تجري تشترك في الإكتتاب المفروض تبص على نشرة الطرح شكلها عامل ازاي ، تسأل حد لو كان ليك علاقة قريبة شركة سمسرة فتبدأ تتكلم معاه وتفهم الشركة دي بتقيمها ازاي، الشركه دي بتشتغل في أي مجال، معدلات النمو بتاعتها شكلها إيه طب تاريخياً هي كانت بتكبر أو بتنمو بمعدلات شكلها عامل ازاي الإدارة بتاعة الشركة دي هل هي فعلاً إدارة جادة ومركزه ولا هما ناس مش مركزين يعني في شوية اسئلة لازم تدور الأول على إجاباتها بالظبط قبل ما تجري تشترك بس يعني الإحساس العام تجاه الطروحات الأولية إنها فرصة استثمار بنسبة كبيرة بتكسب الناس
(10:46)
حلقة 36: ازاي تبدأ شركتك الناشئة
Modus Capital الضيف: أمين الخولي هو الرئيس التنفيذي للعمليات بشركة
فهمت برده إن الدخول في الشركات الناشئة صعب، لكن سؤالي الأساسي النهاردة على أنا صاحب العمل
أمين: أنا معاك علشان كده بقولك أنت كصاحب العمل بتستثمر في الشركة برده بس أنت بتستثمر في شركتك أنت فاحنا لسه كنا بنقول انك تستثمر في شركة واحدة فيه نوع من المخاطرة فأنت دلوقتي مستثمر في شركة واحدة اللي هي شركتك فنسبة المكسب لو الشركة دي كملت عاليا جداً ولكن المخاطرة عاليا برده
عمر: أنت تنصحني كمستثمر أو صاحب عمل هل أوزع استثماراتي بالشكل الطبيعي يعني هل أروح أخد جزء من مدخراتي احطه في حاجات زي البورصة، أحط في حسابات توفير يعني أنا كصاحب عمل برده مفروض أوزع صح؟ يعني هل ده صحي للعمل بتاعي إني مبقاش حاسس إن المخاطرة كلها في حياتي على حاجه واحده؟
أمين: لو أنت بتتكلم بصفة شخصية أنت شخص هتبتدي عمل أو صاحب عمل ويمكن قبل كده كنت بتشتغل موظف نرجع لنفس الحسبه اللي أنت كنت بتعملها وبتتكلم مع الناس فيها في الحلقات من الاول انا ببص لقدام عندي نسبة دخل معين ثابت والكلام ده كله حتى لما بعمل شركتي أنا هبقى واحد من عدد قليل جداً من البشر بيبتدي العمل بتاعه ، نسبة الناس اللي بتبدأ العمل بتاعها حتى لو كانت في ازدياد تعتبر نسبة قليلة بالنسبة للموظفين أنا كنت موظف وهبتدي شركتي عندي شوية مدخرات لأن انا مش ضامن أمتى شركتي هتجيب فلوس فمحتاج تمويل فالأول فأقدر أحط قد إيه على جنب اللي أنا بخاطر بيه في الشركة دي بحيث الباقي يفضل موجود عندي يجبلي دخل وفالنهاية الشركة دي لو موصلتش لمرحلة النمو انها بتعمل ما يكفي من الدخل أنها تدفعلي مهية حتى كشخص أنشأ الشركة فلازم تعمل تخطيط مالي يمكن منظم أكتر من الشخص الموظف الشخص اللي عنده دخل ثابت بيجيله ده مهما كان لو التانك بيفضى بيتملي كل أخر شهر سهل أوي أن الواحد ميعرفش فكرة الفلوس اللي داخله كل اخر شهر بتسنده قد إيه وخلي الشخص اللي بيفكر يعمل حاجه زي كده يجمع الدخل اللي جاله من وظيفته حتى لو حاسس انه مبياخدش في الشهر رقم كبير في الـ 10 سنين اللي فاتوا دخلك قد إيه؟ حتى اللي بيتصرف انت يمكن مبنحسش بيها لأنها بتتصرف طيب إيه العمل اللي ممكن أفتحه اللي يضمن لك تدخل الكلام ده فبالعكس أعتقد الشخص اللي بيفكر يعمل حاجه زي كده لازم يكون تخطيط واضح وطبعاً نوعية الشخصيات اللي بتفتح العمل بتاعها عندها إلى حد ما حس مغامرة ولكن كل الناس اللي نجحوا في حاجه زي كده بيقولك أنت متفكرش أنا لما أنجح هعمل إيه فكر في السيناريو الأسوأ وظبط نفسك بعدين ركز في الشغل بقى انك تخلي الشركة تقوم والكلام ده كله عشان تامن جزء أنك مش قاعد ديماً قلقان على الجزء التاني
(14:54)
حلقة 57: كل ما تريد معرفته عن ثاندر - الجزء الأول
الضيف: أحمد حمودة شريك مؤسس في منصة ثاندر المنصة دي منصة مصرية منشأة في 2019
عمر: أنت لما أبتديت ثاندر كنت عايز تعمل إيه؟ يعني أنت كمؤسس لثاندر أنت عايز إيه؟
أحمد: حاجتين.. أول حاجه أعتقد إن كل حد من حقه يبقى عنده فرصة أن فلوسه تشتغل ، يبقى هو قاعد في البيت وعنده خيار إن فلوسه بتشتغل ومتكونش الفرصة دي متاحه لناس معينه .. ثاندر موجود عشان كده عشان يبقى كل حد عنده هذه القدرة، انا بصراحة كمان من الحاجات اللي وأنا بفكر ابدأ ثاندر كانت بدل ما بنخرج جمعة وسبت بنخرج يوم الجمعة ويوم السبت بنشيل الجزء اللي كنا هنخرج بيه نستثمره أو ندخره عشان مستقبلنا
(14:40)
حلقة 58: كل ما تريد معرفته عن ثاندر - الجزء الثاني
الضيف: أحمد حمودة شريك مؤسس في منصة ثاندر المنصة دي منصة مصرية منشأة في 2019
عمر: أنت بتختلف إيه عن البنك العادي يعني أنا النهاردة لما بروح البنوك المشهورة زي البنك الأهلي بنك مصر أنا فاهم البنك بحوله فلوس يفتح لي حساب بحط فيه فلوس بحوش والكلام ده كله من ناحية فتح الحساب يفرق إيه حسابك عن حساب البنك؟
أحمد: أنا بس عايز أرجع وأقول لك دايماً إن احنا منتج مكمل للبنوك ، غالباً عشان تستخدمنا هتلاقي ليه علاقة بالبنك هتعمل التحويل من عندنا أو هتودع في أحد حساباتنا في البنك احنا جزء من منظومة الخدمات المالية اللي في مصر وعمتاً بنشتغل البنوك .. احنا بنينا منتج مناسب أكتر للجيل الجديد من حيث التجربة اللي بنوفرها للناس بشكل إننا نمرة واحد عندنا هي تجربة العملاء وإن احنا نشيل كل العوائق فبدل ما تروح لحد الفرع وتاخد اجازة من شغلك وتفضل مستنى في طوابير عشان يتفتحلك حساب من على موبايلك ، من على تطبيق بنفس اللي انت متعود تشوفه بنفس تجربة المستخدم ، كله على تطبيق أنا هسهلك كل حاجه لو عايز تكلم حد هتلاقي حد على طول بيرد عليك خلقنا تجربة ماشية أكتر مع الأفراد
(15:47)
حلقة 66: المجال المالي كوظيفة
الضيف: وائل غنيم مدير إدارة تداول المؤسسات في شركة ضمان للاستثمار اللي موقعها في الإمارات
عمر: يعني النهاردة أنت بتقولي لو أنا قدامي كذا شغلانة بفكر فيها وفي مثلاً واحدة بتدفع فلوس أكتر ولكن التانية الفريق بتاعها أقوى على المدار الطويل أنت مقتنع بقوة الفريق أكتر صح؟
وائل: أنا أختار مديري قبل ما أختار الشركة ، مديري أهم من الشركة لأن ده اللي هتعلم منه المفروض يعني مديرك أو الفريق اللي أنت شغال فيه ده أهم من هتاخد كام في المراحل الأولية طبعاً وهتشتغل في شركة كبيرة ولا لأ ، لكن الفريق والتناغم ما بين الناس وبعضها ومدير الفريق ده بيساعدهم ازاي وبيفيدهم ازاي ومدير الفريق مش شرط يكون فنياً جامد اوي بس المهم يبقى عنده إدارة الأفراد كويسة لأنها مش سهلة
عمر: مظبوط طبعاً يعني إدارة الناس إنك تعرف توظف وتطلع من كل واحد القوة بتاعته اللي في شخصيته دي حاجه طبعاً مش سهله خالص
(16:52)
حلقة 67: الفرق بين الموظف ومؤسس الشركة - الجزء الأول
Modus Capital الضيف: أمين الخولي هو الرئيس التنفيذي للعمليات بشركة
عمر: طيب هل أنا ممكن أختار قطاعات معينة ، يعني أنت تنصح الناس مثلاً واحد عنده موهبة معينة يحاول يوظف موهبته دي في قطاع معين يعني نفس الخدمة دي أو السلعة دي ممكن تتباع في كذا قطاع في قطاعات معينة مثلاً أنت بتفكر فيها
أمين: أول ما الواحد يبتدي يبص على جزئية من حياته كتجارة ممكن يبتدي يبص على الحاجات دي برده دي بتساعدك إنك تستعد إنك تفتح شركتك خلاص أنت بتحل مشاكل لمين ، تسوى إيه وسوق العمل المفتوح قدامك إيه إنما بالنسبة للقطاعات اللي أصل الناس على فكرة بتاخد القرارات دي أنت لو بتقرر هتدرس إيه في الجامعة وفي بالك هتشتغل في أنهي مجال بعدين فانت بتحسب الحسبه دي واللي بيحول المسار المهني بتاعه إنه مثلاً يعمل ماجستير إدارة الأعمال عشان يغير من إنه كان في الهندسة وعايز يشتغل في الإدارة أو في المجال المالي ده بيتخذ نفس القرار اللي انت بتتكلم عليه ده واللي مبيغيرش مجال عمله بيغير الشركة مثلاً من شركة محلية يعملها عالمية أو بالعكس فدي القرارات اللي الواحد ديماً بيفكر فيها أنا بالنسبالي إني أنصح في مجالات معينة مش تخصصي أوي أقول إيه المجال الأصلح ولكن الفكرة المفيدة لكل الناس إنه يبص لنفسه كتجارة أنه بيستثمر وقته مش بس فلوسه عايز يجيب العائد عليها اللي هو يرجع له مردود مالي ومردود صحي ونفسي هل أنا هشتغل عدد ساعات أقل أو هشتغل في حاجه بحبها أو مع ناس أحسن دي كلها اعتبارات الواحد بيفكر فيها لما بيبص على نفسه كتجارة أنا أقدر أطور التجارة دي ازاي
(18:36)
حلقة 68: الفرق بين الموظف ومؤسس الشركة - الجزء الثاني
Modus Capital الضيف: أمين الخولي هو الرئيس التنفيذي للعمليات بشركة
عمر: التنفيذ عليه عامل كبير جداً جداً في نجاح أي مشروع أو أي فكرة
أمين: طبعاً فاحنا بنتكلم في المخاطر عشان كده لان انت ممكن يبقى عندك فكرة هايلة فالجزء اللي قولتلك عليه عايز تعرف إيه اللي هينجح وإيه اللي مش هينتجح في بعض الحاجات ممكن تعملها بالتجارب زي ما اديتك مثل الشخص اللي كان عايز يعمل حلاق فممكن تجرب وتلاقي الموضوع مش ماشي لو أنت كنت روحت بقى وعملت عقود مع مثلاً 40 محل حلاقة وعملت موقع وكلفت فلوس وفي الأخر مجلكش تمويل هتقع في الغلطة دي فدي واحده تم تداركها بدري جربت لقيتها مش ماشية احياناً بيحصل العكس ده من ناحية القبول بتاع الفكرة ممكن التنفيذ ميمشيش صح وممكن التنفيذ يمشي صح وتبقى ناجح جداً ومتعملش فلوس
(19:26)
حلقة 73: توزيعات الأرباح في البورصة
الضيف: أحمد يوسف هو عضو منتدب في المجموعة المالية المصرية
عمر: ازاي الشركة بتوزع أرباحها في السوق؟ يعني لو أنا عندي حصة في شركة وعندي أسهم.. ازاي الشركة بتوزع الأرباح بتاعتها؟
أحمد: هو طبعاً توزيع الأرباح بيبقى ديماً أحد أهم أسباب الأستثمار لناس كتيرة مش مجرد إنه عائد على رأس المال بس ده هو كوبون الكاش أو كوبون الأسهم هو اللي بيبقى فارق كعائد لناس لما بيبقوا مستثمرة إن يجيلها دخل تاني غير المرتب من الشغل أو عمل خاص أو أي حاجة .. فالعائد أو توزيع الكوبون أهم حاجات الناس بتستثمر ليه
الكوبون واضح وصريح بيطلع من أرباح الشركة مش من رأس مال الشركة ، الشركة بتحقق أرباح وعلى أساسها ممكن توزع كوبون ، والكوبون نوعين حسب سيولة الشركة في وقت معين أو على حسب هدف الاستثمار ، هدف الشركة بتكبر ازاي وبتسخدم الفلوس اللي هي بتطلعها من الأرباح دي هل عشان تكبر الشركة او على أساس أن هي تدفع للمستثمرين بتوعها بس
فالنوع الأولاني طبعاً هو الكوبون كاش بيبقى واضح وصريح بيطلع من أرباح الشركة بيتحدد بنسبة معينة في العادة الشركات بتدي إرشاد تحديد معين إن أنا عادة مثلاً في الـ 3 سنين الجايين هوزع نسبة كذا من أرباحي أو مش هوزع لأن أنا عندي صرف على النفقات الرأسمالية معينة إننا نزود الصرف فيها فمش هيبقى عندي سيولة أوزع كوبون كاش .. وإلخ
(21:03)
حلقة 74: تقسيم، شطب، إدراج الأسهم في البورصة
الضيف: أحمد يوسف هو عضو منتدب في المجموعة المالية المصرية
عمر: هل أنا كمستثمر بحتاج اعمل حاجه ولا أنا كان عندي الـ 100 سهم دول وهصحى الصبح بكره هيبقى عندي 1000 سهم ، مين هيحطلي الـ 900 سهم الزيادة دول؟
أحمد: المقاصة ، لأن الشركة اللي هتقسم لازم تبقى واخده موافقاتها إنها هتقسيم عدد الأسهم الموجودة عندها ، أنت كمستثمر نادر جداً ما بتضطر تدخل في حاجه زي كده في نوع من تصرفات المؤسسات اللي هنتكلم فيه بعد ده اللي هو زيادة رأس المال ده انت ممكن تدخل فيه كمستثمر ومع ذلك الحاجات اللي بتحصل ليك كمستثمر انك ملكش دخل في القرار اللي الشركة بتعمله يبقى نادر جداً إنك تضطر تعمل أي حاجة، الشركة لازم تاخد موافقاتها من الهيئة، بتعلن للبورصة، بتعلن للمستثمرين فالناس كلها بتبقى واعية أوي إني النهاردة كان معايا 100 سهم بكره هصحى ألقي 1000 مش معناه إن الراجل أداني 10 أضعاف فلوسي لله فـ لله هو معناه إنه ممكن يكون هيقسم وأنا عارف أنه هيقسم بس مجرد ان عدد الاسهم اللي في حسابي المقاصة بتزود عدد الأسهم يعني أنا لو كان معايا 100 وهيروحوا 1000 يبقى الراجل ده هيودعلي 900 سهم بكره عشان يبقى عندي 1000 في التقسيمة السوقية أو إن القيمة السوقية للسهم بتقل
(22:09)
حلقة 85: حوار مع مستثمر - أكت فاينانشال - الجزء الأول
ACT Financial الضيف: مصطفى هو شريك إداري ومؤسس لشركة
عنده خبره أكثر من 18 سنة في أسواق رأس المال في مصر والشرق الأوسط وشمال إفريقيا
عمر: طيب سؤال قبل ما نخش هنا هل الشركات اللي انت بتشتريها دي هل هي مثلاً أفكار مشاريع خاصة ولا حاجات موجودة على البورصات يعني إيه نوع الشركات اللي انت بتستهدفها في الشراء بتاعك؟
مصطفى: بص احنا التفويض بتاعنا واسع فيه كذا فئة أصول بس احنا قررنا الفترة اللي فاتت دي من ساعة ما أسسنا الشركة دي اننا نركز في المرحلة دي في مصر ويمكن هتكلم برضه ليه اخترنا المرحلة دي في مصر وبنركز على فئة الأصل دي على حاجه اسمها
Private Investment in Public Equity (PIPE)
إن احنا بناخد حصص كـ استثمار خاص بس في أسهم مقيدة فبناخد الأسهم المقيدة ونعمل فيها نفس موقف الأسهم العامة إني باخد أسهم عادة بتبقى حصة أقلية عشان الأسهم مقيدة فمبيتسيطرش عليها فبناخد حصة أقلية مؤثرة في الشركات المقيدة سواء باخد الحصة دي برأس مال الشركة أو بأخد حصة برأس مال الشركة واخش في تحالفات مع مستثمرين آخرين يكون عندهم حصص في شركات المستهدفة اللي احنا بنستثمر فيها بحيث التحالف ده على بعضه يبقى عنده حصة مؤثرة ليست حاكمه ولكن مؤثرة بحيث يبقى في نوع من أنواع الاستثمار النشط اننا يبقى لينا دور في الشركة حتى لو احنا معندناش حصة حاكمة في الشركة بس بالسيطرة على حصة أقلية كبيرة في الشركات المقيدة بتقدر تأثر بطرق مختلفة وبرضه هحكيلك أمثلة يعني يعني في باقية الحلقة على بعض الاستثمارات اللي عملناها ازاى يبقى ليك دور في الاستثمار ده في التغير أو في التأثير على شكل أداء السهم في البورصة
(24:04)
حلقة 86: حوار مع مستثمر - أكت فاينانشال - الجزء الثاني
ACT Financial الضيف: مصطفى هو شريك إداري ومؤسس لشركة
عنده خبره أكثر من 18 سنة في أسواق رأس المال في مصر والشرق الأوسط وشمال إفريقيا
عمر: الأسهم تعتبر من الأصول اللي بتحمي الانخفاض في قيم العملة على المدى الطويل
مصطفى: طبعاً انت النهاردة عادة لما بيبقى في إنخفاض في سعر العملة إيه اللي بيحصل؟ هو الانخفاض محصلش بسعر الحياة هو الانخفاض حصل في سعر العملة يعني الورقة اللي في أيدك دي هي اللي سعرها قل ده مش معناه إن في انخفاض حصل في القيمة بتاعة الحاجة نفسها فكل اللي معاه ورقه جنيه في أيده هو خسر لكن كل اللي معاه أصل مكانها هو نظرياً مخسرش لأنه في الآخر بيحصل زي ما قولتلك إعادة تعديل للقيمة فاللي عنده عربية وده مثال بضربه عشان كلنا عايشينه في مصر فأي حد في مصر عنده عربية كان شاريها من سنتين ومشي بيها 1000 كيلو النهاردة يبيعها ويكسب فيها أكتر بكتير من التمن اللى دفعوا فيها فاللي حصل ان الانخفاض في سعر العملة نفسها طول مانت معاك العملة فأنت بتخسر أو بتكسب على سعر العملة لكن لو معاك الأًصل مفروض الأصل يحصله إعادة تقييم فاللي يحصل دلوقتي أن الأسهم دي تعتبر أصول تعتبر دي حصص في شركات فبيحصلها إعادة تقييم عشان كده أداء البورصة المصرية ارتفع جامد مع الانخفاض اللي حصل في سعر العملة الفترة اللي فاتت فبيعوض الفرق اللي حصل في سعر العملة
عمر: وفي كلمة انت قولتها تكلفة الاستبدال لو حد النهاردة جاي عايز يفتح مصنع من الأول هو ده الاستبدال؟
مصطفى: بالظبط ، الاستبدال هو نفس الفكرة اللي كنت بضربها لك على فكرة العربية انت النهاردة عندك عربية كيا سيراتو أنت كنت جايبها بـ 100 ألف جنيه النهاردة انت تقدر تبيعها بـ 300 ألف جنيه مع انك جايبها بـ 100 ألف جنيه مش عشان هي تمنها زاد العربية بتاعتك انت شخصيا استهلكتها ولكن عشان تكلفة الاستبدال بتاعتها.. عشان تجيب واحده جديدة النهاردة بقى تمنها نص مليون جنيه فعشان كده أنت بتبيع بتاعتك بـ 300 نفس الفكرة المصنع النهاردة النهاردة انت عشان تعمل مصنع جديد وتأسسه النهاردة بالأسعار الجديدة وتشتري الطوب بالأسعار الجديدة والأسمنت بالأسعار الجديدة بتاعة النهاردة والحديد بالاسعار بتاعة النهاردة والمكن تستورده بالدولار بتاع النهارده فده هيكلفك 100 جنيه مقابل انك كنت بانيه مثلاً بـ 20 جنيه بس زمان عشان الأسعار كانت رخيصة فالنهاردة عشان تعمل واحد جدي تكلفة استبدال القيمة بتاعته 100 جنيه فلازم يحصل انك تقرب شوية من القيمة الحقيقية للأصل بتاعك مش للقيمة التاريخية أو الدفترية اللي انت مأيدها عندك وشاري بيها
(25:21)
حلقة 87: حوار مع صديق (بين الماضي والحاضر)
الضيف: محمود ندا صديق ليا فكرنا نعمل مع بعض حلقة مختلفة شوية نتكلم فيها على زمان ايه اللي كان بيحصل واتعلمنا ايه من تجاربنا واسئلة اكتر شخصياً على الحاجات اللي مر بيها حاجات مالية وحاجات غير مالية
عمر: طيب اول حاجه بقى سؤال الحلقة إيه الحاجه المهمه الكبيرة اوي اللي ياريتك كنت عرفتها من وانت صغير واتعلمتها ولو رجعنا بالزمن ومحمود بتاع النهاردة قالها لمحمود الصغير كان هيقوله إيه؟
محمود: والله يا عمر حاجات كتيرة مش قادر أحدد حاجه بس بما ان البودكاست بتاعك عن الاستثمار عموماً محدش أدانا تعليم ان الاستثمار ده مهم جداً واننا المفروض نبتدي من واحنا صغيرين أو ما نبتدي الكارير بتاعنا فالواحد بيكتشف مع الوقت آه ده أنا المفروض كنت ابتدي من بدري ، وطبعاً انت اتكلمت في كذا حلقة عن الموضوع ده ازاي الفوائد المركبة وكل ما تبتدي بدري كل ما يبقى أحسن دي طبعاً نصيحة كنت أتمنى أرجع أديها لمحمود اللي عنده حاجه وعشرين سنة إن الموضوع ده مهم
(26:25)
FMCG حلقة 89: رحلة داخل قطاع الـ
الجزء الأول
FMCG الضيف: أدهم السيد مدير عام مبيعات في شركة من الشركات متعددة الجنسيات اللي بتشتغل في
عمر: طيب بشكل عام لو انت بتنصح واحد النهاردة لسه جاي المجال وعايز يخش تنصحه بإيه؟ يعني شايف ازاي الناس ممكن تجهز لو حد بيسمعنا من الجامعة أو عايز يغير كارير أو عايز يخش المجال إيه النصيحة الكبيرة اللي بتقولها لحد صغير أو بتقولها لنفسك زمان؟
أدهم: النصيحة الأولانية لأن ناس كتيرة بتبقى عايزة تخش الـ (إف إم سي جي) سواء عايز يبقى مهندس في مصنع أو عايز يشتغل في التسويق أو عايز يشتغل في المبيعات ، بس الناس ساعات بيبقى عندها توقعات إن الـ (إف إم سي جي) هنقعد نبدع فيه ونطلع أفكار لمنتجات ونصنعها وننزلها السوق ونعملها إعلان ، الموضوع شغل زي أي شغل عشان تنجح في الـ (إف إم سي جي) لازم يكون عندك الاستعداد انك تشتغل زي ما بنقول من البداية للنهاية في كل حاجه ، لازم تفهم تصنيع ، لازم تفهم مخازن ، لازم تفهم حسابات ومالية ، لازم تفهم مبيعات ، لازم تفهم تسويق بغض النظر انت هتشتغل في إيه فيهم مبقناش في الوقت بتاع اننا بشتغل في المصنع ومليش دعوة بالتسويق أو بشتغل في التسويق ومليش دعوة بالمبيعات ، عشان تكبر في الـ (إف إم سي جي) لازم يبقى عقلك مفتوح انك تتحرك ما بين الوظائف المختلفة
(27:48)
FMCG حلقة 90: رحلة داخل قطاع الـ
الجزء الثاني
FMCG الضيف: أدهم السيد مدير عام مبيعات في شركة من الشركات متعددة الجنسيات اللي بتشتغل في
عمر: هل انت شوفت منتجات فشلت بسبب العبوة؟
أدهم: طبعاً كتير وسواء عشان العبوة مكنتش عملية في استخدامها أو عشان العبوة كانت شكلها غريب يعني هديك مثال ناجح ومثال مش ناجح
مثال محدش يعرفه أوي لأنه فشل وأنا اللي فشلت فيه أنا كنت بشتغل في المراعي مدير تسويق وكان عندنا ماركة تجارية جديدة عايزين ننزلها تكون شعبي شوية اسمه (كل يوم) وعملنا إعلان كان بيستهدف طبقة معينة وعايزين الإعلان ده يبقى اللبن الشعبي بتاع الناس روحنا عملنا عبوة لونها أبيض ، في علبة مربعة الناس لما كانت بتشوفه كانت بتفتكره علبة جبنة ولما تمسكه تلاقية سايب تقولك الجبنة سايبة لأن الناس متعودة إن علبة الجبنة مربعة زي علبة عبور لاند ودمتي وعلبة اللبن يا إما كيس يا إما تترا باك كبيرة انما تبقى علبة مربعة يعني حطينا اللبن في علبة عبور لاند أو دمتي اللي هي علب مستطيلة ، وكان عشان تفتحها لازم تجيب مقص وتقص فاللبن بيطرطش تفاصيل يعني مش عايز أدخلك في الطرطشة بس فشلنا فشل ذريع جداً بسبب إن العبوة لونه واسم المنتج (كل يوم) معلقش مع الناس غير المراعي غير جهينة غير دانون نازلة تيجيبي ايه نازلة أجيب كل يوم ، هنشرب إيه كل يوم ، فالاسم كان غلط ، لون العبوة غلط وشكل العلبة كان غلط
(29:11)
VC حلقة 98: رحلة داخل شركات الـ
الجزء الأول
Flat6labs الضيف: ماري تيريز، ماري كانت مديرة صندوق لـ
دي من آخر الحاجات اللي كانت بتعملها ، ماري كانت بتعمل استثمارات في الشركات الناشئة
عمر: أول حاجه عايز اسألك عليها في حاجات أنا بسمع أساميها كتير يعني إيه حاضنة الأعمال؟ ويعني إيه مسرعة الأعمال في عالم رأس المال المخاطر ولو في أنواع تانية من الشغل ده نبتدي بالحتة دي
ماري: أكيد ، طيب مبدأياً الفرق ما بين حاضنة الأعمال ومسرعة الأعمال هما للأسف الاسمين بيستخدموا بشكل متبادل ، ناس كتير مش بتبقى واخدة بالها إيه الفرق فـ الحاضنة من اسمها بترمز إلى حاجة لسه في بدايتها ، فالحضانات دي موجودة عشان تساعد الأفكار فعادة رائد الأعمال بيقدم لما بيكون لسه عنده مجرد فكرة وعايز حد يمسك أيده ويقوله تعالى كده نشوف الفكرة دي ازاي ممكن نحولها لمشروع ، وهل هي اصلاً تتحول ولا لأ ، هل الفكرة دي ليها سوق ولو ليها سوق هل الفكرة دى بتحل مشكلة ، أو المنتج ده بيحل مشكلة؟ طب بيحل مشكلة لعدد قد إيه من الناس وبالتالي هي الموضوع ممكن ينتشر ويكبر ، هل السوق اللي انت متواجد فيه هو سوق مناسب للفكرة دي ولا لأ ، طب تعالى نبص بقى انت لو عملت شركة من النواحي القانونية ممكن تأسسها ازاي؟ وإيه أحسن هيكل؟ فبيمسكوا ايدك كده في الأول ويشوفوا انت ازاي ممكن تحول الفكرة دي لشركة
مسرعة الأعمال من أسمها ، فأنا عشان اسرع الأعمال يبقى معناه إن أنا عندي حاجة ، فبيبتدوا معاك أكتر من مرحلة "الحد الأدنى من المنتج القابل للتطبيق" يعني بدأ يبقى في منتج أتشكل بشكل بسيط وبنكتشف برضه مع بعض عايزين ناخده بقى للسوق فده طبعاً بيحتاج استثمار صغير في الأول اللي هو بنسميه والتسميات بتختلف هنا ما بين ما قبل البذور والبذور بس هو هنا الاستثمار الأولاني خالص اللي انت بتاخده عشان تقدر تحول المنتج ده من الحد الادني من المنتج قابل للتطبيق لمنتج فعلي تنزل بيه السوق
(31:13)
VC حلقة 99: رحلة داخل شركات الـ
الجزء الثاني
Flat6labs الضيف: ماري تيريز، ماري كانت مديرة صندوق لـ
دي من آخر الحاجات اللي كانت بتعملها ، ماري كانت بتعمل استثمارات في الشركات الناشئة
عمر: النجاح، هو إيه؟ إن الشركة تعمل فلوس؟ إن الشركة تعمل تخارج؟ يعني هل الموضوع مادي بس؟
ماري: من وجهة نظري الشخصية ان المشروع الناجح هو اللي بيحل مشكلة حقيقية وبالتالي ليه تأثير اجتماعي إيجابي ، في رد فعل مجتمعي أو في فايدة مجتمعية ده من وجهة نظري معظم الشركات اللي اشتغلت عليها وناجحة جداً حتى هذا اليوم هي شركات بتحل مشكلة حقيقية وبالتالي ليها فوائد وجوانب مميزة إيجابية إجتماعية في ناس بتعمل فلوس طبعاً من شركات مش بتضيف أي فايدة اتكلمنا عن واحدة قبل الحلقة هي شركة ناجحة وبتعمل فلوس ، عماله بتلم جولات وتقييمات عالية وبتنجح تمام بس اللي عايزة اقولهولك إن الجانب الإيجابي في الكلام ده ان كمية الصناديق العالمية اللي عايزة تستثمر في شركات ومشاريع ليها جوانب مجتمعية مش أي استثمار وخلاص فأنا مبسوطة إن ده نوع الفلوس اللي بتستثمر دلوقتي في الصناديق وبالتالي الصناديق بتستثمرها في المشاريع
شكراً جدا على وقتكم معانا النهاردة واشوفكم ان شاء الله الاسبوع الجاي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #مقتطفات_مالية #ضيوفنا