152. ما يسأله المستمعون - الجزء 14
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنكمل معاكم جزء جديد من حلقات ما يسأله المستمعون، بنجاوب على مجموعة جديدة من الأسئلة ملحقناش نرد عليها الحلقة اللي فاتت، ودايماً بنفكركم تبعتولنا اسئلتكم مهما كانت بسيطة.. لو سؤالك بسيط ومباشر ممكن نرد عليك في رسالة، انما لو سؤالك كبير ومحتاج رد طويل وفيه استفادة عامة هتلاقي الرد في حلقات ما يسأله المستمعون
:أسئلة الحلقة
(01:30) رأيك إيه في الاستثمار الزراعي؟ -
(03:02) معايا قرض حسن هل احطه في تطبيق بيوفر حد يدير الحساب ولا في صندوق استثمار؟ -
(06:10) انهي احسن صندوق إيجي اكس 30 أو صندوق نشط؟ وازاي ممكن اخد صندوق نشط؟ -
(08:40) هل الاستثمار في القطاع العقاري من خلال تطبيق بيعمل تجزئة للعقار استثمار كويس ولا لأ؟ -
(12:07) خطة الخروج من الاستثمار -
(14:27) كتب ليها علاقة بإدارة الأموال؟ -
بنشجعكم دايماً تشاركونا تجاربكم المالية سواء تجارب ناجحة أو حتى لو عندكم تجارب استثمارية وحشة، ابعتولنا واحنا دايماً بنحاول نرد عليكم في اقرب فرصة
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور، انا عملت حلقة تانية النهاردة هنكمل فيها الأسئلة بتاعة المستمعين، هسيبكوا مع الجزء التانى وهستنى دايماً اسئلتكم على سواء الايميل او صفحاتنا على السوشيال ميديا واتمنى يارب تكون حلقة مفيدة
(01:30)
استاذ محمد بيقولي مساء الخير رأيك إيه في الاستثمار الزراعي؟
أنا بالنسبالي كعمر معنديش خبرة في القطاع ده ولكن اي بيزنس الواحد بيخشه بيحاول يسأل نفسه أسئلة معينة، القطاع بيكبر بشكل عامل ازاي؟ لو انا هفتح مشروع هفتحة بالظبط فين؟ المنافسين شكلهم عامل ازاي؟ ايه اللي هيميزني عن المنافسين؟ العوائد المتوقعة في القطاع ده؟ هحط فلوس قد إيه والعوائد اللي هتحصل قدام شكلها عامل ازاي؟ اللي هو معدل العائد الداخلي على الاستثمار عملنا حلقة كاملة عليه تقدر تاخد الشيت ده وتحط العوائد أو التدفقات النقدية اللي جيالك في السنين اللي جايه تقدر تحطه في الشيت ده وتعرف العائد على الاستثمار بتاعك عامل ازاي، اللوائح بتاعة القطاع، الضرايب يعني هو سؤال كبير جداً اننا اقدر اجاوب على قطاع معين او رأيي.. ممكن انت تكون بتعمل حاجه بجد ومميزة وبجد مش موجودة وعندك ميزة تنافسية في القطاع ده فمش هقدر اقولك والله الناس النهاردة كلها عارفة الحاجات اللي ليها علاقة بالبرمجة أو ليها علاقة بالذكاء الاصطناعي هو ده أحسن قطاع مش دايماً الناس كلها تعرف تستثمر فيه فكل واحد بيبقى عنده القطاع اللي هو مستريح فيه وفاهمة او له علاقة بدراسته فكل القطاعات ممكن تنجح بس لازم تمشي في النقط اللي احنا اتكلمنا عليها وانت اللي هتجاوب على السؤال
(03:02)
سؤال تاني أستاذ أحمد بيسأله بيقول انا شغال في شركة بتوفر للموظف قرض تقدر تسميه قرض حسن معلهوش فوايد بيبقى قد شهرين من مرتب السنة حجم القرض، هو بيقول بفكر احطهم في ابلكيشن معين بيكون فيه حد بيدير حساب أو في صندوق استثمار.. نصيحة إيه
طيب انا قبل ما يمكن الموضوع ده ممل او انا كررته كذا مره انا قبل ما استثمر في خطوات معينة من وجهة نظري برضه ممكن تكون خاطئة.. لازم اعمل تحويش لصندوق الطوارئ بعد ما اعمل صندوق الطوارئ بأبتدي اعمل استثمار لما اقترض عشان استثمر هو اه ماشي قرض حسن معلهوش فوايد ممكن اخده واعمل عليه عائد من أول يوم لكن في مخاطرة لو لا قدر الله سبت الشغل بعد شهرين او تلاتة الشركة هتطالبك انك تدفع القرض اللي عليك وقتها هتضطر تسيل الاستثمار بتاعي ووقتها ممكن يكون الاستثمار بتاعي نازل او مش موجود لو انا هاخده واعمل استثمار في حاجه مفهاش مخاطرة اه ممكن ولكن برضه انت بتعقد الموضوع لو انت اول مره تستثمر في حياتك مش مهم عندي العائد مش مهم عندي اي حاجه غير ان انت تحوش فنصيحتي انك تحاول تاخد الفلوس دي لو هتاخدها قرض حسن مش لازم تستثمرها ممكن تشيلها على جانب على انها صندوق الطوارئ بتاعك وتدفعهم واحدة واحدة للشركة من خلال مرتبك ولو لا قدر الله انت مشيت من الشركة ده يعتبر صندوق الطوارئ بتاعك فتقدر ترجعهم للشركة فانا مش عايز استثمر واخد مخاطرة حتى لو هي حاجه زي الاسهم فيها مخاطرة عالية أن يحصل انخفاض في القيمة السوقية يعني لو هو قرض حسن مش هدفع عليه فايدة واخدته وقولت شهرين هشيلهم على جانب على اساس انهم صندوق الطوارئ وانا كده كده هقسطهم للشركة بعد سنة فبعد سنة هيبقى عندي صندوق طوارئ جاهز على جانب انا ممكن اقبل بالموضوع ده لكن اننا احطهم في استثمار الموضوع صعب اقبله تاني عشان احنا مش ضامنين اللي هيحصل هل الشركة ممكن تقفل ممكن امشي اياً كان لا قدر الله وانا شوفت نماذج حصل فيها كده فلو هشيلهم على جانب مش هلمسهم على اساس انهم صندوق طوارئ خلاص وبعد سنة ان شاء الله او السنة التانية أو التالتة انا كده خلاص عندي صندوق طوارئ على جانب انه بيقولي ان ده كل اللي هيبقى معاه مش هيبقى معاه حاجه تانية فده كل رأس ماله فلأ انا مش هنصح انه يستثمره والاستثمار هنا معناه انه ياخد أصول فيها مخاطرة لكن لو هتشيلها على جانب وتاخد عليهم مثلاً عائد صغير محفوظين تقدر تسيلهم اللي هو التعريف بتاع صندوق الطوارئ ممكن نعملها وان شاء الله السنة التانية والسنة التالتة قدامك العمر طويل ان انت تبتدي تحوش بجد وتستثمر من دخلك العادة اهم بكتير من ان النتايج بتاعة الاستثمار تبقى عالية او واطي العادة بتاعة التحويش، العادة بتاعة انك تاخد وتحط في الاستثمار اهم بكتير من انك من اول يوم تبقى احسن واحد يستثمر
(06:10)
سؤال تاني جالي مرتين مرة على الفيسبوك ومرة على انستجرام هو بيسألوا عن صندوق إيجي اكس 30 في السوق المصري وفي صندوق تاني حاطين اسمه وده صندوق نشط، يعني إيجي اكس 30 زي ما احنا عارفين واتكلمنا قبل كده ده بيتبع مؤشر 30 اللي هو اكبر 30 شركة في البورصة المصري بيشتري بنفس الأوزان بيتابع حركة السوق فبيجيلك العائد بتاع السوق بالظبط ناقص التكلفة طبعاً اللي انت بتدفعها والصندوق التاني صندوق نشط بيبقى صندوق استثمار عنده القدرة ياخد مراكز أعلى في أسهم معينة عجباه والكلام ده كله السؤال هنا انهي احسن ده يرجع للي انت حابب تعمله لو انت عايز العائد بتاع السوق بالظبط انا ارشح ايجي اكس 30 لو انت مش هتبقى عايز صندوق الاستثمار بتاعك يبقى احسن او اوحش
طيب ازاي ممكن اخد صندوق نشط؟ الطريقة اللي انت ممكن تعملها تشوف العوائد تاريخياً عاملة ازاي قدام ايجي اكس 30 وصندوق عنده ثبات ان مثلاً كل 5 او 10 سنين قبل كده يعمل احسن من السوق تحاول تعرف هو ليه بيعمل احسن من السوق وتبص على الرسوم البيانية تشوف الطريقة اللي هو بيدير بيها شكلها عامل ازاي هل ده هيتكرر في المستقبل ولا لأ تحاول تسأل السمسار او الراجل اللي بيببع الصندوق شكل المحفظة عامل ازاي؟ هل في قطاعات معينة هو مركز عليها ولا لأ فالقطاعات دي هتكون عجباك مثلاً احسن من ايجي اكس 30 اسئلة كلها انت لازم تسألها مع نفسك ومع الراجل اللي بيبيع الصندوق او المنصة اللي بتبيع الصندوق ودايماً تحاول تقارن التاريخ اللي حصل وهل الخطوات دي مستثمرة في المستقبل ولا لأ وهنا ممكن تحول من نشط لسلبي لكن لو مش عايز توجع دماغك دايماً خد السوق بيبقى في مؤشرات اتكلمنا في كذا حلقة قبل كده ممكن ترجعلها على صندوق المؤشرات عامل ازاي وليه بنشتريه والكلام ده كله فانا مقدرش اقولك والله ده احسن او اوحش هو بيبقى تفضيل في واحد مش عايز وجع دماغ فيشتري المؤشر السوق طلع انا هكسب زي السوق، السوق نزل انا هخسر زي السوق مش عايز احط طبقة تانية من المخاطرة ان في صندوق استثمار واحد شاطر وواحد مش شاطر فيضيع عليا عوائد الاقي مثلاً في طلعات جامدة في صندوق الاستثمار بتاع السوق طالع 30/40% والصندوق النشط طالع %20 فهنا ضيع عليك عوائد كبيرة فواحد يقول لأ انا مش هجازف انا هاخد السوق فده يرجع لتحمل المخاطر بتاع حضرتك
(08:40)
في سؤال تاني بيقولي على الاستثمار في القطاع العقاري من خلال تطبيق معينة التطبيقات دي بتعمل تجزئة للعقار بتديك حصة صغيرة في بيت أو شقة أيا كان منتج العقار بتاخد فيه حته صغيرة هل ده استثمار كويس ولا لأ؟
اولاً العقار انا من وجهة نظري ميزته انه بيديك حرية انك تنقي عقار في مكان معين مش بس المطروح قدامك وانت بتاخد منه جزء انت لو بتشتري لوحدك انت عندك القدرة انك تنقي لو معروض على ابكليشن فهو معروض الحاجه دي ممكن متكونش عجباك فده اول فرق ما بين الاتنين
الحاجة التانية ان جزء كبير من العوائد اللي بتيجي من العقارات واحنا اتكلمنا عليها قبل كده بتيجي عشان انت واخد تمويل صح، يعني واخد عقار صح ومعاه تمويل صح فأه انت ممكن متكونش هتشتري عقار كاش من أول يوم وممكن تدفع 10 او 15% ومع الوقت تدفع الأقساط بتاعتك ولما بتستلمه وتأجره فيبدأ يجيبلك دخل والكلام اللي احنا اتكلمنا عليه في العقار فأنا لازم اقارن طب انا ممكن بدل ما اروح اشتري جزء 10% من البيت او 5% من البيت طيب ليه محطتهمش مقدم ويبقى انا عندي البيت بالكامل بتاعي واحط عليه الاقساط بتاعتي فانا مع المدرسة دي اكتر عن ان انا احط كاش صغير بس مفهوش اي نوع من انواع التمويل لأن تاني احنا قولنا ان التمويل له تكلفة والإيجار لما بيجي يعتبر دخل فأنت اه بتبقى متخيل انك مقترض لكن بيجيلك دخل وسعر العقار نفسه بيطلع فالاتنين مع بعض بيغطولك الفايدة بتاعتك واكتر كمان فممكن في المثال الاول انك تمتلك على طول من وجهة نظري احسن وبعدين قرار العقار قرار كبير مهم ولما انت بتشتري انت عندك القدرة تسيل في وقت - التطبيقات دي انا مش عارف طريقة التسييل ازاي هل لازم البيت يتباع فالقرار مش في أيدك انك تبيعه لازم يكون كل الناس الموجودة في الوحدة او الشركة اللي عندها الوحدة دي تعملك تسيل او حاجه تخليك تعرف تبيعه ففي تقييد في تجزئة العقار انا مش من المشجعين اوي في الاستثمار ده لو انت عايز تشتري بمبالغ صغيرة الاسهم في القطاع العقاري ممكن تغنيك عن الموضوع ده
فأنا افضل انك تشتري اسهم في القطاع العقاري بمبالغ صغيرة عن انك تشتري حته في بيت التحكم مش في أيدك فيها هي دي مشكلتي مع الموضوع انك معندكش تحكم في اختيار البيت معندكش تحكم على الخروج امتى، معندكيش تمويل مرتبط بالوحدة دي لأنك لازم تدفع الجزء بتاعك ده من جيبك بنسبة %100 فالهيكلة نفسها بتاعة التجزئة مش حاسه هو ده الاساس او الفكرة بتاعة الاستثمار في العقار انا دايماً بقول انا بحب العقار يبقى فيه تمويل لأن ده بيجبلك جزء كبير جداً من العائد بتاعك لو انت عندك تمويل الصح في الوقت الصح مع العقار الصح وفي حلقة احنا اتكلمنا على الموضوع ده فأنا لو معايا 10 أو 15% من تمن البيت انا مع انك تشتريه ومع الوقت ان شاء الله تدفعه ويجيبلك دخلك
(12:07)
حاجه برضه بشكل عام عايز اتكلم عليها وده برضه له علاقة بالسؤال اللي فات ده لما تعمل استثمار مهم جداً جداً تبقى عارف خطة الخروج بتاعك يعني مثلاً لو اشترينا اسهم انا عارف ان خطة الخروج بتاعي اني هبيعهم في السوق انا عندي شكل واضح للخروج، اشتريت صندوق استثمار في الدهب او في الاسهم العالمية نفس الكلام انا مش شاري سهم انا شاري صندوق اه ممكن اخرج بسرعة
اشتريت عقار عرفت قبل ما اشتري ان المنطقة دي ودي حاجه مهمه جداً المنطقة دي لو حطيت فيها البيت غالباً ممكن يتباع في شهر في اسبوع في سنة في سنتين فانت هنا عرفت هيكل السيولة بتاعك يعني في مثلاً بلاد او مناطق صعب في بيعها وانا بشتري لازم ابقى واخد بالي ان سياسة الخروج هنا صعبة ولكن في مناطق تانية سياسة الخروج بتاعتها سهله فمثلاً لو بشتري حاجه بمليون دولار او جنيه ايا كانت العملة حاجه مثلاً 50 متر وحاجه 500 متر الاتنين بمليون مثال يعني بس الـ 500 متر صعب جداً في الخروج والـ 50 متر سهل جداً في الخروج انا بالنسبالي هفضل ال50 متر مع انه شكلهم وحش في الحجم ودي حاجه صغيره ودي كبيرة والكلام ده كله ولكن هنا السيولة مهمه جداً ليه عشان لو الاستثمار بتاعك كان وحش تعرف تخرج ولو الاستثمار كان حلو وعايز تاخد ارباح او عايز تخرج تروح حاجة تانية عشان مثلاً عندك فرصة استثمارية في حاجه احلى فتقدر تبيعه بسرعة، عدم بيعك للحاجه هيضيع عليك الفرصة التانية
طب لو روحنا للشركات هنلاقي ان اصعب في التسييل، أصعب في الخروج انت ممكن تكون عملت استثمار كويس جداً في شركة خاصة بس مش عارف تخرج منها لأن مثلاً مفيش مشتريين او مفيش تسييل تاني مهم جداً تبقى عارف خطة الخروج بتاعتك في أي حاجه انت بتعملها ليها علاقة بالاستثمار وكل ما يكون الخروج ده سهل وسلس وسريع ده هيساعدك قدام انك تعرف تقتنص مثلاً فرصة استثمارية تانية يعني انت كنت شاري اصل بيجيب 5 او 6 % وفجأة بقى في اصل بيجيب 12 او 13% في السنة وواضح وصريح انا عايز اسيل بس مش عارف وبعد كده الفرصة راحت عليا فتاني هرجع اكرر التسييل مهم جداً اياً كانت الفكرة اللي انت هتعملها ركز في موضوع التسيل او موضوع خطة الخروج بتاعك
(14:27)
أسئلة متكررة بيقولي ايه الكتب اللى ممكن نقراها ليها علاقة بإدارة الأموال؟
في كتابين انا يمكن كررتهم قبل كده الناس اللي بتسمعنا لأول مرة هما
The Psychology of Money
Atomic Habits
كتابين ليهم علاقة شوية باتخاذ القرار فأنت بتحاول تفهم اللي ورا الفلوس وازاي تتعامل مع الفلوس والكتاب التاني ممكن نقول عليه تنمية ذاتية وممكن تقدر تستخدمه في شغلك او في الفلوس فبرضه احنا هنسيب الكتابين في الشو نوتس ده سؤال متكرر بنشوفه كتير عندنا
(15:08)
اخر حاجه احب اختم بيها ان في ناس بتبعتلنا شكل الاستثمار بتاعهم عامل ازاي انا بشجع الناس تشاركني التجربة دي معاهم يعني زي ما شوفنا حد كان باعتلي الـ 3 صناديق اللي هو مستثمر فيهم والنسب بتاعتهم وفي حد تاني باعتلي كذا رسالة بنفس الشكل هو حوش قد إيه في صندوق الطوارئ وحوش قد ايه في صندوق التقاعد بتاعة مش لازم تذكر المبالغ ممكن تذكر النسب انا مش فارق معايا المبالغ فارق معايا النسب بمعنى اني حوشت مثلاً قد كده عدد شهور من دخلي قد كده في الصندوق الفلاني، نسبة الاستثمار هنا كذا، مش فارقة معايا اعرف الارقام دي حاجه خاصة بكل واحد المهم عندي انك تبقى ماشي على الطريق المظبوط بتاع انا المفروض يبقى معايا كام النهاردة في سن كان وفي حلقة رقم 13 كنا عملناها على الموضوع ده لو حابب برضه ترجع تسمعها فمشاركتكم لتجارب النجاح بتاعتكم او حتى تجارب الوحشة لو عندك تجربة استثمار وحشة برضه لطيف انك تتكلم مع حد او تبعتلنا هنحاول نرد عليك على طول في اقرب فرصة بس من وجهة نظري ظريف اني ابقى شايف التطور بتاع المستمعين بتوع كلام ينور لأن الواحد مش عايز يعمل البودكاست ده بصراحة عشان فقط انه يتكلم او يحاول يقول معلومات عاوز اشوف نتايج الناسس احنا بنعمل استبيان كل شوية على انستجرام بنحاول نشوف الناس بتطور ولا لأ وبنزيع النتائج دي عليكم كل فترة وبرضه الرسايل المباشرة بتقولنا انتو عملتوا ايه بتبقى بالنسبالي حاجه مفيدة جداً فشكراً جداً جداً على وقتكم واتمنى اسئلة المستمعين دي تكون بتفيد الناس لان زي ما بقول وبكرر لما بتشوف مشاكل غير او بتشوف طريقة تفكير غيرك ده ممكن يفتح في دماغك حاجه تخليك تتصرف بطريقة معينة في إدارة حياتك المالية او الاستثمار ومهم برضه من خلال المنصة دي او البودكاست ده تشوف الناس التانية بتعمل ايه فبيديك ثقة وبيساعدك ان شاء الله توصل لأهدافك شكراً جداً على وقتكوا
Translation of some words and terms:
Cash Flow تدفقات نقدية
Regulations اللوائح
Competitive Advantage ميزة تنافسية
Artificial Intelligence الذكاء الاصطناعي
Risk Asset أصول المخاطرة
Active Fund صندوق نشط
Consistency ثبات
Preference تفضيل
Layer طبقة
Risk Tolerance تحمل المخاطر
Fraction تجزئة
Real Estate العقارات
Lock-Ups حبس
Unit وحدة
Limitation تقييد
Liquidity Profile هيكل سيولة
Money Management إدارة الأموال
Survey استطلاع/ استبيان
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #ما_يسأله_المستمعون #الجزء_14