115. حاضنة أعمال الشركات الناشئة - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهارده معانا تاني ضيف من الضيوف اللي بيساعدونا نتعرف أكتر على قطاع الشركات الناشئة والاستثمار في الشركات عالية المخاطرة
ومعانا ماري تيريز اللي بتساعدنا في تقديم مجموعة الحلقات دي
Marie Therese @LinkedIn تقدروا تتوصلوا مع ماري
AUC Venture Lab ضيفنا النهارده هو محمد حمزة، حمزة من الناس اللي كان ليهم دور كبير جدا في حاضنة أعمال الجامعة الأمريكية
وحالياً هو موجود في بنك مصر، أنشأوا برنامج لمساعدة الشركات الناشئة والاستثمار فيها
هنعرف منه أكتر الفرق ما بين القطاع الخاص والقطاع العام.. ازاي بيفكروا، ازاي بيختاروا الشركات، إيه الطريقة اللي تقدر تقدم بها عشان تخش في البرامج دي، وازاي ده بيساعد المجال بشكل عام
Mohamed Hamza @LinkedIn : تقدروا تتواصلوا مع حمزة
:في الجزء الأول
(02:22) احكيلنا عن تجربتك والدروس المستفادة من حاضنة أعمال الجامعة الأمريكية وصولاً لدورك فى بنك مصر؟ -
(08:16) عدى عليك كام شركه في حاضنة أعمال الجامعة الأمريكية؟-
(10:13) هل الناس اللي كانت بتجيلك في أوائل البرنامج كانوا أقل جاهزية من آخر برنامج؟ -
(12:35) كنت في قطاع خاص دلوقتي في مؤسسة عامة ممكن تكلمنا على المرحله دي وايه الفرق ما بينهم؟ -
(16:34) إيه دوافع المؤسسات لدعم الشركات الناشئة هل العوائد والتنمية المجتمعية ولا توجه سياسي من الدولة؟ -
استنونا الاسبوع اللي جاي في الجزء الثاني من لقائنا مع محمد حمزة
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهارده معانا تاني ضيف من الضيوف اللي هيساعدونا في رحلتنا وتعرفنا على قطاع الشركات الناشئة والاستثمار في الشركات عالية المخاطرة معايا النهارده محمد حمزة محمد كان من الناس اللي ليهم دور كبير جدا في حاضنة أعمال الجامعة الأمريكية، النهارده هو موجود في بنك مصر أنشأوا برنامج لمساعدة الشركات الناشئة والاستثمار فيها
هنعرف الفرق ما بين القطاع الخاص وقطاع العام.. ازاي بيفكروا، ازاي بيختاروا الشركات، ازاي الطريقة اللي انت تقدر تقدم بها عشان تخش في البرامج دي، وازاي ده بيساعد المجال بشكل عام برضه معايا ماري شاكرة في الحلقه دي ويارب الحلقه دي تعجبكم
(01:45)
عمر: اول حاجه عايز اشكرك على انك اديتنا من وقتك، وقتك دايماً مشغول فشكرا جدا على وجودك معانا النهارده، دي حلقه من الحلقات اللي بتغطي قطاع الشركات الناشئة بنحاول نجيب نماذج مستثمرين ومؤسسات بتساعد الناس إن هي لو عايزه تخش في حته الاستثمار المخاطر ومعايا النهارده برضه ماري كمضيف مشارك أولاً عايز أرحب بماري.. أزيك يا ماري
ماري: ازيك يا عمر
عمر: ميرسي جدا يا حمزة زي ما قلتلك، وشكرا جدا على وقتك اهلا بيك معانا في كلام ينور
حمزة: شكرا يا عمر مبسوط جدا انا معاكوا النهارده وشكرا على وجودي معاكم النهارده
(02:22)
ماري: حمزة احنا تعرفنا على بعض من زمان وقتها كنت انت فيه حاضنة أعمال الجامعة الأمريكية ودي طبعا يعني مدرسه عظيمه جزء ريادة الأعمال الحقيقه برنامج من احسن البرامج الموجودة بشهادة الحقيقه كل رواد الأعمال اللي تخرجوا من عندكم ادالك فرصه تشوف كمية مشاريع وكمية رواد اعمال كبيره جدا وادالك خبرة كبيرة.. فأنا حابه قوي تحكيلنا في البداية عن دورك في حاضنة أعمال الجامعة الأمريكية يعني جمل بسيطه عن تجربتك وقتها واللي انت شفته واتعلمته، والدروس المستفادة ومن ده ننتقل على دورك دلوقتى فى بنك مصر برضه تحكي لنا عنه شويه
حمزة: اوكي حلو جدا شكرا يا ماري، شكرا على ثقتك هو برنامج محترم وانا برضه بحب افكر فيه ان هو كده دايماً بس لو حد مايعرفش إيه هو حاضنة أعمال الجامعة الأمريكية هو أول برنامج بيركز على تسريع النمو الشركات الناشئة يطلع من جوه الجامعه البرنامج ده ابتدى 2013 وجتلنا فرصة كبيرة ان احنا نشتغل مع مؤسسات كبيرة زي فلات 6 لابز وغيرها من البرامج اللي بتدعم رواد الأعمال واللي بتستثمر فيهم فبشكل رئيسي هو البرنامج مش بيستثمر فيه الشركات الناشئة عشان هو جوه جامعه فهو النموذج بتاعه مختلف شويه هو بيركز اكتر على بناء البنية التحتية من المعرفه اللي أي رائد أعمال بيبقى محتاجها
فاللي حصل في تجربتي مع حاضنة أعمال الجامعة الأمريكية أنا ابتدت في 2014 وهو اصلا البرنامج طلع للنور 2013 فطلع سنه قبل ما اخش، اول ما ابتدينا خالص كان برضه ريادة الأعمال لسه حاجه جديده نسبيا في السوق أو ريادة الأعمال عامه كمفهوم ومفهوم واسع جدا فالناس لما بتيجي تفكر بتفكر يا ليله الاعمال دي هي ايه بتبقى غريبة شوية فاللي حصل ساعتها ان اول لما رحت معاهم كان عندنا مستشار كنا جايبينه من (مدرسة هارفارد للأعمال) عشان يبني معانا البرنامج ده المفروض يقدم ايه فانا لما رحت اخد منهم كتاب التشغيل طبعا كتبت شركه محترم جدا على قوة الجامعة والطلاب الجامعة، وقوة دكاترة الجامعة وازاي ممكن يخدم شباب في الجامعة بشكل رئيسي فانهم يطلعوا شركات، ولكن اللي كان حاصل فيها ان احنا مكناش بس بنركز على طلاب الجامعه كنا حابين نركز أكتر على كل الناس الموجوده في المجتمع وكل رواد الاعمال اللي ممكن يكونوا موجودين في المجتمع
لما جه الكتالوج او كتابه التشغيل ده يتبنى كان مبني اكتر على مسرعات الأعمال اللي شغالة أكتر بره السوق المصري لان لسه ما كانش عندنا كتير جوه مصر يمكن ساعتها كان في فلات 6 لابز هو البرنامج الوحيد اللي ابتدى قبلنا وكان برضه في الأوائل بتاعته عمل كذا حاجه ولكن كان لسه بيُعرِّف البرنامج شكله محتاج يبقى عامل ازاي وناس كتير من اللي بتساعد الشركات في فلات 6 لابز كانوا بيشتغلوا في حاضنة الجامعة الأمريكية وكتير من اساتذة الجامعة اللي كانوا بيشتغلوا في حاضنة الجامعة الأمريكية كانوا بيشتغلوا مع فلات 6 لابز
فاول حاجه عملناها خالص ان احنا ابتدينا نلاحظ إن نوع رواد الأعمال اللي بيقدمها البرنامج مش هم بالظبط اللي احنا كنا بندور عليهم بسبب ان احنا كنا بنحاول نركز على ريادة الأعمال المبنية على الابتكار فده بشكل رئيسي كان واحد من التحديات انه احنا واجهناها في السوق ده كنا بنقول الاول عايز تكبر شركتك، عايز تاخد شركتك للمرحلة اللي جايه فكان معظم الشباب اللي بتقدم كانت بتقدم أنواع مختلفة شوية معظمها بيكون الشركات الصغيرة والمتوسطة التقليدية والناس كانت بتضايق لما ميتقبلوش في البرنامج
اول حاجه ابتدينا نشتغل عليها ان احنا ابتدينا نلاحظ ان الناس ممكن ما تبقاش عارفه بالظبط احنا بنحاول نقدم ايه او هما بالظبط محتاجين ايه ونوع الدعم اللي هما بيوفروه، وليه البرنامج ممكن ما يبقاش مناسب ليهم أو مناسب ليهم، فاول حاجه ابتدينا نركز عليها أن حتى الشباب اللي اشتغل على ريادة الأعمال اللي ليها طابع الابتكاري بيبقى في جزء من المعرفة هو محتاج يبني عليه من الأول معظم الشباب كانت بتيجي من خلفيات تكنولوجية او مبرمجين وبيعرفوا يبنوا برامج كويسه وهو بنى برنامج هو شايف انه بيقدم قيمه عاليه للسوق ولكن ده لسه مش اكيد فاللي حصل بشكل رئيسي إن هو أخد البرنامج ده وطوره كله وحب الحاجه اللي هو بيعملها ومقتنع ان هي 100% صح وابتدى يخش بيها السوق فده عمل له شويه تحديات مختلفة
اللي حصل بعد كده ان احنا ابتدينا نركز اكتر على أننا نبني حاجه بنسميها ريادة الأعمال المبنية على دلائل وبنحاول ان احنا نركز في البرنامج كله بشكل رئيسي على ازاي ممكن اوفر للشباب طريقه التفكير ان هو مش شرط الحاجه اللي انت تعملها صح احنا بنجرب مع بعض ريادة أعمال المبنية على الابتكار فيها مخاطرة عالية جدا محتاجة ان انت تبقى مرن كفاية وعندك المثابرة الكافية إن أنت تطور حاجه بسيطه وتجربها في السوق وتقيس المردود بتاعها وبعدين ترجع تعيدها تاني فده كان أول تغيير عملناه في البرنامج ونشر الثقافة بتاعة ريادة الأعمال المبنية على الابتكار دي كانت اول الحاجات الاساسيه كبيره قوي ان احنا حتى كبرنامج نبدأ نفهم نفسنا اكتر ونقول احنا ليه بنختار الشركات دي مقابل الشركات دي، ازاي نختار الشركات في المراحل الأولية جدا من إطلاق المنتج بتاعها في السوق بحيث ان احنا نقدر نديهم أكتر استفادة من البرنامج بشكل رئيسي فدي كانت الرحلة مع حاضنة أعمال الجامعة الأمريكية وابتدينا من الاول خالص نكتشف البرنامج
(08:16)
ماري: عدى عليك كام شركه يا حمزة في حاضنة أعمال الجامعة الأمريكية؟
حمزة: انا قعدت فيها حوالي 6 سنين ابتدانا من ان احنا كنا بناخد 6 شركات في 6 شهور يعني 12 شركة في السنة وصلنا في الاخر قبل ما امشي كنا بناخد 50 شركة في السنة فتقريباً اشتغلت مع حوالي أكتر من 250 شركة بحاجة بسيطة
ماري: واو، وطبعاً قطاعات مختلفة تماماً
حمزة: اه بالظبط مكناش مركزين على قطاع معين وده كان بيبقى ليه زي ما بيقولوا السوق كله فرص وكل شويه بنشوف موجة جديدة طالعة من قطاعات فبنقدر ان احنا نقول طب احنا عايزين نركز على الحته دي شويه، برضه جزء من الرحله ان احنا في الاول كنا بناخد كميات صغيرة، عدد من الشركات صغير متركزة على مجالات معينة بعد شويه ابتدينا نلاقي ان لأ نموذج التشغيل بتاعنا ان احنا مش بنستثمر كان لازم يبقى مبني على شركات مع شركات كبيرة مهتميه بالمجالات دي وابتدينا ان احنا نشوف الاتجاهات اللي طالعه في ريادة الأعمال شكلها عامل ازاي.. الموجه الجديده وبنروح نشوف ممول بيكون مهتم ان هو يتعلم أكتر عن الموجة دي او ان هو يجرب حلول مبنية على ابتكارات في الموجة دي وندي له إمكانيات
آخر حاجه خالص اشتغلنا في مجال التكنولوجيا المالية اشتغلنا في مجال الصحة، اشتغلنا على مجال التعليم شوية، اشتغلنا أكتر على مجال الإبداع عامة، و كنا سايبين دايما مجموعة من الشركات اللي بنسميها (وايلد كارد) اللي هي حاجات جديده قوي محدش سامع عنها فهي غريبة كفايه ان هي ممكن ما تلاقيش داعم ليها في الاول بس هي في الغالب موجة طالعه فحبينا ان احنا نجرب معاها ونشوف الرحله ممكن تكون شكلها عامل ازاي والسوق ده هيكتشف نفسه أو هيفتح ازاي
(10:13)
عمر: طب هسألك سؤال انت في الست سنين قلت كان في موجات في القطاعات صح يعني ممكن في اول سنه تاني سنة الدنيا بتتغير مع الوقت بالضبط بس، هل جودة الناس بتتغير؟ يعني هل الناس بتتعلم؟ يعني هل الناس اللي كانت بتجيلك في أوائل البرنامج كانوا جايينلك أقل جاهزية من آخر برنامج؟ يعني هل حسيت ان النظام البيئي نفسه اتغير من ناحية المعرفة بتاعه الناس؟
حمزة: آه طبعاً بشكل كبير، أحب طبعاً أقول ان كل ده حصل بسبب حاضنة أعمال الجامعة الأمريكية بس هو ما كانش بالسبب ده نفسه والشركات بتتغير مع تطور الموجات دي كان برضه السوق بتاع دعم ريادة الأعمال كان بيتغير ، بقى يفتح اكتر من برنامج، بقى في فَعالِيّات اكتر بكتير الشباب بقى عندها وصول للمعرفة أكتر بكتير، أبتدوا يتحطوا على الطريق الصحيح بتاع ايه هي طريقة التفكير، وايه هي طريقة التفكير كانت هي العنصر الرئيسي في حته انا نفسي اشتغل ازاى
الاستثمار عامة أو جذب الاستثمار للسوق تطور بشكل كبير جدا على مدى السنين دي فابتدأ نوع رواد الاعمال او زي ما بيقول جوده رائد الاعمال اللي ابتدى ان هو ممكن يبقى عنده خبرة اكتر يعني كنا في الاول بنشوف شباب لسه متخرجه من الجامعه فهو لسه هيتعلم كتير من الرحلة بتاعته عنده فرص نجاح بس برضه نقص الخبرة أو أن هو لسه جديد قوي على السوق بيبقى واخد شويه من فرص النجاح بتاعته فلما ابتدى يبقى فيه استثمارات اكتر لما ابتدى يبقى في معرفة اكتر لما ابتدينا نشوف قصص نجاح أكتر للشركات لقينا إن الناس مهتمة أكتر بالمجال ده ومستعدية تاخد المجازفة الكبيرة اللي احنا كنا بنقول ان هي عامل المجازفة العالي الموجود في مجال الأعمال المبنية على الابتكار بشكل رئيسي
عمر: انا من خلال الأحاديث البسيطة اللي عملتها في مجال الشركات الناشئة مع الخبراء دايما الناس بتأكد على الفريق، الناس الناس الناس والتعليم، بيفكروا ازاي ده اهم من القيمة المقدَّرة واهم من تقدير الاحتمالات أهم من الكلام ده كله ومن خلال البودكاست ده احنا بنحاول نوصل للناس طريقه التفكير اللي هو متروحش تحاول تلم فلوس غير على مرحلة معينة من المعرفة انت عايز تعمل ايه والكلام ده كله
(12:35)
عمر: هنروح بقى لمرحلة تانية انت اتحركت رحت برنامج تاني أو قطاع تاني، كنت قطاع خاص دلوقتي تبع مؤسسة ممكن تكلمنا على المرحله دي وايه اللي حصل فيها وايه الفرق ما بين هنا وهنا والكلام ده كله؟
حمزة: احنا في موجة كبيرة جدا ابتدت تطلع في 2016 بسبب الأحوال الاقتصادية في الوقت ده إن حصل تغيير في سعر صرف الجنيه المصري في نفس الوقت البنك المركزي المصري ابتدى يزق بشكل كبير ناحية الشمول المالي فساعتها ابتدت موجة تكنولوجيا المعلومات طلع بشكل كبير جدا كان قبلها عندنا شويه شركات ابتدت تطلع في السوق زي فوري ولكن السوق ده مربوط بشكل كبير يعني له نظم وقوانين واطارات لازم الشركات تعرف تشتغل من جوايا فكان سوق معقد شويه ان رائد الأعمال التقليدي يقدر ان هو بس شايف مشكلة في السوق فكر في حل مناسب ليه يجربه ويشتغل فيه التجربة دى بيبقى ليها لازم قوانين وضوابط مينفعش نشتغل فيها على طول
فاللي حصل إن احنا في الوقت ده في حاضنة أعمال الجامعة الأمريكية كنا طلعنا مسرّع التكنولوجيا المالية وده كان واحد من أول أوجه دعم شركات التكنولوجيا المالية وكنا بنيناه مع سي آي بي وسي آي بي حالياً لسه مكمل الرحلة مع حاضنة الأعمال الجامعة الأمريكية واحد من أهم أقدم الرعاة والداعمين لينا ده كان أول بنك يبتدى يشتغل معانا ويحاول يشتغل معانا بأكتر من طريقة ولكن دايماً بيبقى في تحديات زي ما أنت بتقول يا عمر في الربط ما بين المنتج الرئيسي والطلبات أو الأهداف بتاعة الشركات والمؤسسات الكبيرة فاللي حصل ساعتها مع تطور الوقت من 2016 لحد 2021 حصل متغيرات كتيرة جدا منها كورونا ومنها حاجات كتيرة قوي غيرت في حركة السوق
اللي حصل ساعتها ان كان في فرصه كبيره جدا ان بنك مصر ابتدا رحلة في التحول الرقمي الرحله دي كام بقى لها حوالي اربع سنين عملوا فيها كميه شغل ملحوظ بشكل كبير قوي داخليا في البنك تطور كتير أوي من جوه كانوا بيشتغلوا مع مستشارين مختلفين علشان يحققوا حاجه بنسميها (تحويل ثنائي السرعات) تحول بشكل سريع شويه وتحول تاني ممكن يبقى أكثر بطئا أو بطيء شويه اللي حصل في الوقت ده ان التحول البطيء ده بيشتغل على الموظفين الأساسيين في البنك أما التحول السريع فابتدى ان هو يجيب مواهب من بره البنك تقدر ان هي تساعده وتواكب الحاجات اللي بتحصل في السوق بالفعل وتحقق له مكاسب قريبة
مع التحول اللي كان بيحصل جوه البنك بنك مصر جه فيه كبير مسؤولي الابتكار جديد هو اسمه محمد صدام انا عندي فلوس بيشتغل معاه في السي آي بي شويه ومع الدعم اللي كان مجلس إدارة البنك والإدارة العليا بتوفره ناحية التحول الرقمي ابتدوا يستوعبوا ان مع التطور اللي احنا بنعمله جوه معظم الوقت أو التغير السريع في حالة السوق مش بيجي من جوه المؤسسة في الغالب بيجي من بره المؤسسة لأن التفكير جوه المؤسسة مهما كان ابتكاري ومهما كان متطور هو بيطور شويه في الأبحاث بتاعته بيكون مربوط بحاجات كثير زي الحوكميات وزي الطرق اللي هما بيتفاعلوا بيها جوه المؤسسة بشكل رئيسي إنما السوق اللي بره المؤسسة هو اللي شايف المشكله بشكل رئيسي وهو ما عندوش اي حاجه تربطه هو دايما بيحاول يغير فيها بشكل سريع فالبنك حب ان هو يكون جاهز أنه يتعامل مع الناس الموجوده بره بشراكات تبقى مؤثرة بشكل كبير على السوق وده جابنا بقى لحته ان هم جم قال واحنا عايزين نبني حاجه اسمها (برنامج الابتكار التشاركي) ازاي نشتغل مع ناس اللي بره بحيث اننا نحقق أقصى تأثير على الحته دي ممكن دي كانت الفرصة الأساسية ان احنا اتكلمنا مع بعض مع البنك حسينا ان احنا استراتيجياتنا متفقه مع بعض فابتديت ان انا اتنقل للناحية التانية
(16:34)
ماري: عندي سؤال يا عمر في الجزء ده لان بداية شغل المؤسسات المالية في مجال الشركات الناشئة ده ليه شقين شق زي ما انت اتكلمت اللي هو الشمول المالي والتحول الرقمي وإننا محتاجين نخلي العمليات كلها رقمية والكلام ده كله وأننا منستخدمش الكاش والمدفوعات الرقمية وكل الكلام ده بس ده كده كده مع تطور العالم والاقتصاد ده كان لازم ولابد منه وطبعاً الكورونا سرعته، لكن الجزء التاني اللي هو دخول المؤسسات دي بشكل مباشر بالاستثمار في الشركات الناشئة دي يعني احنا كنا في منتهى السعادة الحقيقة لما شوفناها لأنه طبيعي المؤسسات دي بتبقى درجة المخاطرة عندها قليلة مش عايزين ياخدوا مخاطرة كبيرة بطبيعة شغلها دي طريقة المؤسسات بشتغلوا كده ففكرة انهما ياخدوا الخطوة دي احنا كنا سعداء جداً اننا بنشوف اولا لاننا كنا شايفين ان البنوك الفتره اللي فاتت عندها سيوله رهيبه جدا من الصعب توظيفها كلها وفي نفس الوقت أن في فرصه كويسه انا بقى عايزه افهم هما باصين الموضوع ازاي هل بصين له ان هو فعلا في فرصة لعوائد كويسة وفي فرصة لتنمية معينة في المجتمع وبالتالي ده شجعهم ولا احنا بنتكلم هنا براحتنا ولا ده فيه توجه سياسي من الدولة أن المؤسسات دي لازم تدعم الموضوع ده يعني انا عايزه افهم التفكير من جوه الدوافع ايه؟
حمزة: بصي أنا يمكن جاتلي فرصه ان انا اشتغلت زي ما شرحنا شويه في حاضنة أعمال الجامعة الأمريكية، كان عند اتنين ممولين كان بنك السي أي بي وده أكبر بنك خاص في السوق وكان البنك العربي الافريقي وهو برضه من أكبر البنوك الخاصة في السوق بعد كده من ناحية بنك مصر الموضوع كان شكله عامل ازاي انا متفق معاكي 100% البداية بتاعة التحول ده أو بداية الموجة كانت جاية بشكل رئيسي من التشريعات، كانت جاية بشكل رئيسي من استراتيجيات الدولة ناحية التحول الرقمي يمكن قبل 2016 3 سنين اللي هي من 2014 لـ 2016 مشوفتش غير شركة تكنولوجيا مالية واحدة في السوق وبرضه نجاحاتها مكنتش عظيمة وده بياخد شوية من الموجه اللي بتطلع، علشان الموجه تطلع لازم الشباب تشوف إن في فرصه هناك بشكل رئيسي فقفلت السوق على البنوك دي كانت صعبة جدا
فأول لما البنك المركزي ابتدى يزق في زي ما بنقول عليها ربحية كل منتج على حدى وهكذا بتبقى صعبة جداً لما يبتدي إن المؤسسة كبيرة بتقدم خدمات المفروض لناس كتير بشكل معين فعشان أبتدي إن انا احاول استقطب عمل مستهدف جديد مكنتش بشتغل معاه لازم هطورله حاجات جديدة وده تكلفته عليا هتبقى عالية جداً
فيمكن المؤسسات المالية الكبيرة مبيبقاش عندها الفكر ده أو معندهاش قابلية انه يطور ويجرب ويروح وده هيكلفة كتير جداً في مقابل أن لأ في مشاكل كتير شركات ناشئة تقدر تحلها فأبتدت التوعية تحصل في السوق من الحتة دي، التوعية بالمناسبة كانت بتحصل على الاتنين كانت بتحصل على الناس اللي جوه البنوك وكانت بتحصل لشركات ناشئة في نفس الوقت تقريباً في بنوك بشكل رئيسي أو مش بس بنوك في مؤسسات مالية تانية دلوقتي لقينا ليها دور كبير جداً في التكنولوجيا المالية زي (إي أف جي هيرمس) واحد من أكبر الداعمين للسوق التكنولوجيا المالية في مصر
فأبتدينا نشوف إن التوجه ده بيحصل فى ناس بيبقى عندها الوعي الكافي ان القيادات بتاعة المؤسسة بيكون عندها الوعي الكافي أنها تسرع من التحول ده وفي ناس تانية بتبتدي التحول ده علشان الاستراتيجية العامة وساعات الوعي الكافي اللي جوه المؤسسة ده على حسب هو مؤثر قد إيه، يعني الوعي ده ممكن يبقى نابع من إن انا شايف حاجه مثيرة للإهتمام بتحصل في الحتة دي بس أنا لسه مش عارف اخش فيها بأد إيه فأنا هعمل تجربة صغيرة هحط مبلغ مالي صغير وهخش أجرب إني أمول برنامج معين وأبتدي احتك برواد الأعمال وأفهم عنهم أكتر وأشوف السوق ده ممكن أطلع منه بإيه
فبيعملوا زي تحقيق كده زي لما المستثمر يبقى عايز يخش في حاجة فبيبدأ يعني تقديرات بسيطة عشان يشوف الموضوع ممكن يشتغل ازاى فالـ 3 طرق دول هما في الغالب هتلاقيهم في معظم المؤسسات النهاردة الحلول اللى احنا بنشوفها ناجحة يعني أنا لسه بصراحة ابتديت أشوف دلوقتي بنوك اكتر بكتير ابتدت تعمل برامج ِشوفنا البنك العربي عنده حاضنة أعمال وإي جي بنك عامل حاجه اسمها حاضنة مينت والمصري الخليجي كل الناس دي ابتدت تدخل حاجات مختلفة بتخش السوق ولكن لسه مشفناش الشهية اللي هي بتقتنص السوق طبعاً ده بيجي من كذا حاجه إن مثلاً لسه التشريعات البنك المركزي عشان هي هدفها الرئيسي إنها تحمي العميل فلسه في ضوابط ان لازم الشركات الناشئة تشتغل من خلال بنك ممكن في أسواق تانية دي مكنتش موجودة في الشركات الناشئة تقدر تشتغل على طول من غير بنك فده كان بيدي فرصة ان الشباب تجري أسرع شوية والشركات تطلع اسرع شوية بس برضه في نفس الوقت كان بيجي بعنصر مخاطرة عالي شوية بفلوس العميل
فيمكن النموذج بتاعنا او النموذج الموجود في مصر اللذيذ فيه انه متوازن بشكل كبير ما بين أن يحصل تفاعل متبادل بين مؤسسات كبيرة وشركات صغيرة أو شركات ناشئة بتكبر بسرعة ومن الناحية التانية بيحصل فيه تعليم بيتهيألي هيزيد بشكل أكبر في الفترة اللي جاية
ماري: تمام، عجبني أوي يا حمزة جزئية كنت بتقولها اللي هي تسريع التطوير جوه المؤسسات دي ان احنا نلجأ لرواد الأعمال ومجموعات العمل دي كأنهم هما فريق التطوير بتاع المؤسسة فبدل ما نقعد احنا نطور واحنا جوه المؤسسة ونجيب ناس طب ليه منستثمرش في المجموعات دي ونتبنى المنتج أو الخدمة اللي هما بيقدموه ويبقى البنك بيدعمه ويبقى ده في الأخر بيكمل منتجات البنك أو الطريقة اللي البنك بيقدم بيها خدماته للشعب وده بيتطبق برضه على جميع أنواع المؤسسات
حمزة: هو بالفعل دلوقتي البنك المركزي واحد من قراراته إن كل بنك في مصر لازم يبقى عنده قطاع بيسميه قطاع الشمول المالي والقطاع ده بشكل رئيسي أبتدى يركز على الفئات اللي ممكن تكون مهمشة من ناحية المعاملات المالية، ولازم كل قطاع يبقى ليه أهداف معينة والأهداف دي بيعمل تقرير للبنك المركزي بيها بشكل مستدام فالخطوة دي بيتهيألي هتدي فرصة كبيرة جداً إن يمكن أول سنة متلاقيش حاجه أوي، تاني سنة لسه بتستكشف الموضوع بس دايماً هيبقى مطلوب منك مخرجات ولو انت معرفتش تخرج أول سنة فهيبقى تانية سنة في خطر في الاستدامة بتاعتك فلازم ان انت تطلع نموذج بشكل رئيسي وواحد من الأهداف المستدامة بتاعة أي قطاع شمول مالي هو بشكل رئيسي هو الشغل مع رواد الأعمال والشركات الصغيرة والمتوسطة بشكل كبير فدي خطوة أنا شايف انها هتفرق كتير جداً في تسريع التطوير زي ما كنا بنتكلم دي من ناحية
من الناحية التانية المؤسسات المالية بشكل عام هي مؤسسات مركزة أكتر على الربحية بتاعتها بشكل كبير ومشكلة التركيز على الربحية اللي هو زي ما بنسميه تركيز حاد على إتجاه معين فده بيخليهم يركزوا على الربحية السنوية بتاعته فالموضوع هنا بيرجع في تسريع التطوير إنه هو ممكن شغله مع رواد الأعمال ميبقاش بنفس الربحية اللي هما ممكن يكون مستهدفنها على المدى القريب كسنة مثلاً أو عوائد تاني سنة بس على التالت أو خامس سنة المفروض المفروض يبقى في مردود ابتدى يظهر بشكل كبير على إتساع قاعدة عملاء البنك فده كده بشكل رئيسي اللي بيحصل
فهنا بنقول إن دايماً الموضوع هتلاقيه بيقع اكتر على عاتق الإستراتيجية بتاعة البنك اللي هي بتكون مدعومة من قيادات البنك ده او مؤسسة مالية عامة حتى لو مش بنك والمساهمين بتوعه فالمساهمين ومجلس الإدارة بتاعة هل هما بيزقوا ناحية تسريع النمو ده وهما شايفين الموجة اللي جاية ولا لأ هما مركزين أكتر هما في مكان معين وعاجبهم الإستراتيجية اللي هما فيها وعاجبهم السوق اللي هما مركزين معاه ومش حابين أنهم يتوسعوا في الوقت الحالي هي دي المعطيات اللي انا بشوفها بتأثر شوية يعني
عمر: وبكده نكون وصلنا لنهاية الجزء الأول في الحلقة مع محمد، أنا عايز أشكره تاني وأشكر ماري على وقتهم معانا وأشكر كل الناس اللي سمعتنا ووصلت للجزء ده من الحلقة وإن شاء الله أشوفكم على خير الاسبوع الجاي
Translation of some words and terms:
Vc = Venture Capital رأس المال المخاطر
Auc Venture Lab حاضنة أعمال الجامعة الأمريكية
Entrepreneurship ريادة الأعمال
Growth Acceleration تسريع النمو
Consultant مستشار
Harvard Business School مدرسة هارفارد للأعمال
Playbook كتاب التشغيل
Accelerator مسرعة الأعمال
Define يُعرِّف
Entrepreneurial Innovation الابتكار الريادي
Evidence-Based Entrepreneurship ريادة الأعمال المبنية على دلائل
Exposure التعرض
Intakes كميات
Operating Model نموذج التشغيل
Corporate شركة كبرى
Sponsor راعي
Ecosystem النظام البيئي
Events فَعالِيّات
Access وصول
Risk Factor عامل المجازفة
Valuation القيمة المقدَّرة
Projection تقدير الاحتمالات
Mindset طريقة تفكير
Phase مرحلة
Fintech Accelerated مسرّع التكنولوجيا المالية
Dynamics حركة
Two-Speed Transformation تحويل ثنائي السرعات
Chief Innovation Officer كبير مسؤولي الابتكار
Top Management الإدارة العليا
Open Innovation Platform منصة ابتكار مفتوحة
Maximize تحقيق اقصى قدر
Impact تأثير
Digital Transformation التحول الرقمي
Digital Payments المدفوعات الرقمية
Unit Economics الوحده الاقتصاديه
Appetite قابلية
Probing التحقيق
Assessment تقدير
Synergies التفاعل المتبادل
Financial Inclusion الشمول المالي
Hyper Focused التركيز المفرط
By Design عمداً
Niche Market سوق متخصص
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #حاضنة_أعمال_الشركات_الناشئة #الجزء_الأول