116. حاضنة أعمال الشركات الناشئة - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بنكمل النهاردة الجزء الثاني من حديثنا مع محمد حمزة عن حاضنة أعمال الشركات الناشئة.. محمد حمزة من الناس اللي كان ليهم دور كبير جدا في حاضنة أعمال AUC Venture Lab الجامعة الأمريكية
وحالياً هو موجود في بنك مصر، أنشأوا برنامج لمساعدة الشركات الناشئة والاستثمار فيها.. بيساعد الناس اللي عندها أفكار ازاي يفكروا، وازاي يقدموا.. في الحلقات القديمة اتكلمنا عن الاستثمار من منظور فردي النهاردة بنكمل مع حمزة أكتر في الاستثمار المؤسسي
Mohamed Hamza @LinkedIn :تقدروا تتواصلوا مع حمزة
Marie Therese @LinkedIn :تقدروا تتوصلوا مع ماري
:في الجزء الثاني
(02:10) إيه الحد الأدني اللي هي مفروض الناس تعمله عشان تقدم، وازاي توصلك، وإيه القنوات اللي انتو بتفتحوها للناس عشان تقدم أفكارهم في ريادة الأعمال بشكل عام؟
(06:27) عايز اعرف إيه الآلية اللي بتدوروا بيها على الشركات؟ -
(08:52) البرنامج بتاعكم جوه مصر دلوقتي و بتاخدوا من جميع انحاء الجمهوريه صح؟ -
(10:26) هل انت حاسس ان الكوادر بتتحسن مع الوقت؟ -
(15:30) أكبر التحديات قدام ريادة الأعمال؟ -
(18:27) ايه الحاجه المش معروفة أوي عنك حتى للناس اللي عارفاك كويس؟ -
(19:20) شخصية تاريخية ترجع بالزمن تتعشى معاها؟ -
(21:15) عملت أي حاجة مجنونة، غريبة، عملت اي حاجه خطر قبل كده؟-
(22:00) في أي كتاب، فيلم، اغنية كان ليهم تأثير كبير عليك؟ -
(25:13) إيه القوة الخارقة اللي انت عايزها؟ -
(26:15) نصيحة لو رجعت لنفسك زمان تديها لحمزة أول ما ابتدى؟ -
(28:19) إيه الهدف أو الحلم بتاعك في المستقبل؟ -
نتمنى أن الحلقات دي تكون عملية ومفيدة بالنسبالكم، ابعتولنا أسئلتكم و آرائكم و استنونا الاسبوع الجاي
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
عايز بس كده قبل ما أبتدي حلقة النهاردة أفكر الناس بحساباتنا الموجودة على السوشيال ميديا لو حابب تتابعنا على فيسبوك هتلاقونا، وموجودين كمان على إنستجرام، وفي صفحة على تويتر بنزل فيها كده مقتطفات من حلقات قديمة، برضه احنا عملنا تطور سريع كده على الموقع الإلكتروني بتاعنا تقدر تشوف كل الحلقات بتواريخها من خلال قسم جديد عملناه اسمه الأرشيف تقدر تشوف كل الحلقات ورا بعض، برضه عايز أفكر الناس إن على الموقع بتاعنا موجود "ترانسكريبت" تقدر تقرأ الحلقات من هناك مكتوبة بالكامل وطبعاً كالعادة احنا موجودين على كل منصات البودكاست
حلقة النهاردة هنكمل حديثنا مع محمد حمزة، بيساعد الناس اللي عندها أفكار ازاي يفكروا، ازاي يقدموا والفروقات ما بين الاستثمار المؤسسي والاستثمار الفردي يعني في الحلقات القديمة اتكلمنا مع متولي، متولي كان بيساعد الناس من منظور الفرد ازاي بيستثمر برضه مع محمد هنكمل أكتر في الاستثمار المؤسسي ازاي هما بيستثمروا في الناس
يارب الحلقات دي تكون مفيدة انا عن نفسي أتعلم منها كتير جداً يارب برضه ده اللي يكون أتنقل للناس يعني واسيبكم مع محمد
(02:10)
عمر: طيب هرجع معاك كده خطوة لورا وأقولك انا النهاردة سمعت أنكم موجودين وعندكم برنامج، وكان في برنامج قديم كمان.. الناس اللي عايزة تقدم إيه الحد الأدني اللي هي مفروض تعمله وازاى اصلاً تقدم، ازاي توصلك، إيه القنوات اللي انتو بتفتحوها للناس عشان تقدم أفكارهم في ريادة الأعمال بشكل عام؟
حمزة: في بنك مصر أنا بقالي من 2021 بقالنا تقريباً سنتين، السنتين دول بنينا برنامج ابتكار مفتوح، برنامج الابتكار المفتوح ده بيتلخص في 3 حاجات رئيسية أول حاجة الشراكات مع البنك دى حاجة دايماً متاحة ودايماً مفتوحة وأي حد حابب انه يجرب يشتغل مع البنك أو يفكر ازاي يشتغل مع البنك يقدر يعمل كده من خلال انه يتصل بينا من خلال لينكد إن مثلاً دي واحد من أكبر المنصات اللي الناس بتوصلني من خلالها بالفعل أو من الايميل بتاعي أو من الفعاليات بتاعة ريادة الأعمال كلنا بنكون موجودين هناك، كمان بنك مصر أبتدي يكون له دور في أنه يرعى بعض الفعاليات الفنتك يعني السنة اللي فاتت احنا كنا رعاة بتوع "رايز أب سوميت"، كنا موجودين في "فنتك ريتريت" موجودين في أكتر من حاجه علشان نقرب المسافة ما بينا وبين رواد الأعمال
برنامج التشارك مع البنك او اننا نشتغل مع بعض مع الشركات الناشئة دي حاجه دايماً متاحه ودايماً مفتوحة ويمكن بنك مصر بيتميز انه مختلف شوية عن باقية المؤسسات المالية لأنه ممكن ميبقاش عندنا حساسيات الشركة ابتدت من فين، فأنت ممكن تكون رحت لحد مش مسئول عن الشراكات وابتديت معاه كلام وبعد كده جيت أتكلمت معايا ممكن حد تاني يكون بيضايق لأ احنا معندناش أي تحديات داخلية في انك بتشتغل ازاي فدي دايماً مفتوحة أي وقت اتصل بينا وهنقدر اننا نرد على أسئلتك وهنقدر نوصلك بمين علشان تقدر توصل لأحسن إتجاه
(04:00)
عمر: طيب إيه الحد الأدنى المطلوب؟ يعني أنا عرفت اوصلك ابقى جاي معايا إيه أقل حاجه المفروض يبقي معايا؟
حمزة: بص بشكل رئيسي وده مش بس في البنك، كل ما كانت الشركة في مراحلها البدائية كل ما كان القيمة اللي انا هقدر أديهالك أقل وأقل، يعني لو انت جيتلي بفكرة الفكرة دي جديدة ومتطورة فاللي انا هقدر أديهولك في الوقت ده هيبقى النصيحة بتاعة في الغالب فكرة زي دي عشان تشتغل بيها مع بنك لازم تراعي واحد اتنين تلاتة أربعة، فهيبقى نصيحة ازاي تكمل الفكرة علشان توصل انك تعرف تعمل شراكة فعالة مع البنك او تقدر تشتغل جوه الضوابط الموجودة في السوق أو القوانين الموجودة في السوق
لو انت جيت معاك نموذج مبدئي والفكرة دي جديدة محدش عملها قبل كده فرص إني أبقى مهتم بيها أعلى شوية من أنك بنيت منتج بس المنتج ده مماثل لغيره في السوق، لو هو مماثل لغيره في السوق أنا مش شرط أكون متحمس نفس الحماسة اننا نخش مع بعض فليها فرص بس بتبقى أضعف شوية
طبعاً لو حضرتك شغال في السوق وحصلت على شوية عملاء، أبتديت تجرب المنتج بتاعك وبقيت عارف حركة المنتج مع العميل هيبقى شكله عامل ازاي فأولاً انت هتبقى جاي عارف انت محتاج مني ايه بشكل أكبر، وتاني حاجه أنا هقدر أتخيل أنا ممكن أشتغل معاك ازاي علشان نوسع من الأثر اللي ممكن نعمله في السوق فكل ما هتجيلي متطور أكتر كل ما هقدر أساعد بشكل أكبر وأفيد أكتر بس في أي مرحلة احنا دايماً بنساعد ودايماً بابنا مفتوح لرواد الأعمال في أي مرحلة اننا نشتغل معاهم
(05:40)
عمر: انت وجهتني لنقطه مهمه جدا حتة الفعاليات الاجتماعية مهمة جداً في المجتمع بتاعكم صح؟يعني انت لو رائد أعمال لازم يبقى تروح تقابل الناس يبقى عندك قاعدة معارف لازم بقى تشوف وتحضر زي ندوات او حاجات كده صح، يعني انت بتنصح الناس دايماً انها تبتدي تعمل شبكة معارف الاول صح؟
حمزة: صح 100%، الشبكه دي هتساعده انه يرد على اسئلة يتعرف على رواد أعمال يشاركوه في المنتج، يتعرف على ناس كانت بتعمل نفس المنتج بتاعه بس وقعوا في تحديات معينة ففشلوا طيب شوف هما فشلوا ليه قبل ما تبتدي حاجه عشان ما تمشيش في نفس الخطوات، ازاي نبني على خبرات بعض وما نبقاش بنشتغل بنفسنا 100% انا متفق معاك
(06:27)
عمر: طيب الناس بتدور عليك، هل انت بتعمل العكس هل انت بتدور عليهم؟ هل عندك فريق مثلاً بيبص بتقولهم انا عايز حاجه في القطاع ده يا جماعه دورولي.. وعايز اعرف كمان الآلية اللي انتم بتدوروا بيها على الشركات؟
حمزة: في زي منصات بتكون بتجمع بيانات عن الشركات الناشئة بشكل رئيسي وفي عندنا منصات قوية جدا في السوق الإقليمي بتاعنا زي مثلا "ماجنيت" ففي حاجات كتير بنقدر ندور عليها على "ماجنيت" ونتاكد ان احنا شفنا اكتر من الشركات اللي احنا عارفينها واللي احنا مش عارفينها، طبعاً في جزء كبير جدا بيعتمد على ان احنا بنحاول اننا نكون متواجدين مع أكتر من برنامج لدعم رواد الأعمال بالنسبة لنا البرامج دي بتبقى مؤثره جدا لأن حضرتك لو جزء من البرنامج فده معناه ان البرنامج راجع معك الاوراق الاول، وده بيثبتلي اكتر ان دي شركة شغالة وعاملة شغل كويس وحصلت على بعض الدعم، وتطوروا شويه في المنتج بتاعهم فبتديني فرصه اكبر اننا اسرع الموضوع
وطبعاً من الناحيه التانيه احنا متصلين بكل المستثمرين الموجودين في السوق سواء في المجال بتاعنا او في غير المجال بتاعنا وبنقدر ان احنا نطلب منهم ترشيحات، ونطلب منهم ان هم يدلونا على الشركات المختلفة ده بشكل رئيسي اللي حصل
طبعاً البرنامج بقاله سنة بس اطلق، احنا اشتغلنا مع 7 شركات أول مجموعة من الشركات اللي قبلناها دي كانت الدورة التجريبية بتاعتنا تم الإعلان عنها بين الدواير في بعض الفعاليات زي ما كنت بتقول وصلنا لحوالي 70 شركة قدم منهم 30 شركة واخترنا منهم 7 نشتغل معاهم
لما جينا اول سنه نشتغل مع 7 انا دلوقتى بتكلم على برنامج مسرعة الأعمال التابعة للبنك بشكل رئيسي لان زي ما احنا قلنا احنا عندنا 3 حاجات: الشراكة ودي دايماً مفتوحة، ومسرعة الأعمال احنا دلوقتي بنعملها مره واحده في السنه وهدفنا ان احنا السنه دي نعملها مرتين احنا حالياً باب التقديم كان مفتوح وقدم عندنا المره دي حوالي 90 شركة ودلوقتي ابتدينا نفلتر فيهم وشهر 12 ان شاء الله هنفتح دورة تانية وعايزين نوصل ان احنا نبقى بنفتح باب التقديم 4 مرات في السنه يعني مره بشكل ربع سنوي
(08:52)
عمر: هايل، وده طبعا ما بيبقاش متركز على القاهره بس انتوا بتروحوا محافظات او بتاخدوا افكار من جميع انحاء مصر صح؟ يعني انتم البرنامج بتاعكم جوه مصر دلوقتي و بتاخدوا من جميع انحاء الجمهوريه مظبوط؟
حمزة: مظبوط واحنا مش بس بنشتغل على مصر احنا كمان بنشتغل على الوطن العربي كله والشرق الاوسط وافريقيا فالهدف بتاعنا ان احنا ندعم الابتكار في مجال التكنولوجيا المالية في اي شركه شغاله في مصر أو الوطن العربي أو الشرق الأوسط وأفريقيا وحابه انها تتوسع لمصر لازم مصر تبقى جزء من الاستراتيجية بحيث ان احنا نبقى موجودين بشكل أكبر في مصر فاحنا عندنا اكتر من بنك عندنا بنك مصر في الإمارات وعندنا في لبنان وفي ألمانيا وفي فرنسا وحالياً في اهداف ان احنا نتوسع بشكل أكبر في الخليج وفي أفريقيا فده بيدينا فرصه ان احنا نوصل لشركات اكتر من السوق واننا ندعم الشركات اللي هتيجي معانا ان هما مش بس يكبروا في السوق بتاعنا لأ احنا عايزين نحاول نكبرهم بره السوق بتاعنا بشكل رئيسي، فالهدف بتاعنا الرئيسي اللي في المحافظات اننا بنحاول نوصلها من خبراء موجودين على الأرض وبيشتغلوا بشكل رئيسي
السنه دي كنا واحد من الرعاة لبرنامج اسمه "فنتيكرز" ده برنامج بيدعم رواد الأعمال في المحافظات بشكل رئيسي وهو جزء من مبادرة البنك المركزي اللي هي "فنتك إيجيبت" وده حالياً باب التقديم بتاعه مفتوح للشركات الموجودة في الصعيد
(10:26)
عمر: هايل، بص انا النماذج اللي بقابلها بصراحه يعني حد زيك يعني انا تاني انا قلتلك ان انا من خارج المجال بتاع الشركات الناشئة لما تعرفت عليك وشوف شايف النموذج والكوادر الموجودة يعني ده بيديني امل بجد والله انه بتكلم بمنتهي الصراحة ان مستوى المعرفة أعتقد.. انا برضه عايزك تكلمني على الكوادر انت والناس اللي زيك اللي في المراكز اللي بيتخذ القرار هل انت حاسس ان الكوادر بتتحسن مع الوقت زي ما القطاع كله بيتحسن أو رواد الأعمال نفسهم بيحاولوا يغيروا من نفسهم يعني يكلمني على الكادر نفسه اللي زيك اللي بيعمل تمويل بيعمل برامج انت شايف ان الموضوع ده ازاي؟
حمزة: بص 100% اولا احنا ابتدينا نشوف عامة فكرة الشغلانة أو أن يبقى في شخص مسئول عن الشركات الناشئة أو شركات التكنولوجيا المالية موجود في بنك دي ابتدت تحسب بشكل متكرر ,موجوده دلوقتي يمكن في أكتر من 6 / 7 بنوك من الموجودين في السوق المصري من الـ 6 / 7 بنوك دول انا عارف 5 منهم جايين من خلفيات ريادة اعمال يا إما كانوا برامج دعم ريادة أعمال مختلفة أو كانوا هما نفسهم عندهم شركات وبعد ما اشتغلوا عليها سواء بقى الشركات دي تخرجوا منها أو باعوا جزء منها أو ان الشركات دي منجحتش بشكل كبير فبيبتدي ان هو يتجه انه يشتغل مع بنوك
ففكرة ان احنا نجيب حد من خارج المجال البنكي أو المجال المصرفي وندخله جوه البنك عشان يعمل تغيير ويبقى عنده القدره انه يقنع مجموعة مختلفة من الناس انهم يفرغوا من وقتهم وقت الشغل بتاعهم اللي هم بيتحاسبوا عليه كل سنه عشان يقعدوا مع مجموعة من الشركات ده بالنسبه لي تطور كبير جدا
عمر: تطور كبير فعلا، وبيدي امل للناس ان هو انت مش هتروح لمؤسسة لأ انت بالعكس انت هتتعلم منهم وهيساعدوك بجد غير التمويل انا عايز الكادر
حمزة: 100% انا عايزه اقولك يا عمر انه ان مثلا السنة اللي فاتت الدورة التدريبية بتاعتنا واحدة من الحاجات اللي فاجئتني انا شخصياً إقبال الناس اللي في البنك على الأنشطة اللي احنا بنعملها، احنا مثلا بنجيب متحدثين مختلفين يتكلموا عن الحاجات دي لقينا ان الموظفين اللي في البنك بمختلف أعمارهم، بمختلف إداراتهم المركزين فيها بيبقوا مهتمين جدا انهم يحضروا حاجات زي كده عشان شايفين الزقه ناحية المستقبل
احنا شايفين ان البنك كمان كام سنه هيبقى في تحول رقمي، عارفين ان البنك كمان كام سنه هيبقى بيشتغل فيه الحته دي فأنا لازم ابتدي افهمها ده رقم واحد، رقم اتنين عملنا حاجه اسمها "فنتك ريتريت" أخدنا الشركات اللي احنا استثمرنا فيهم طلعنا بيهم زي معسكر منغلق عشان نبتدي نشتغل على ايه هي الشركات او الابتكارات اللي ممكن نشتغل فيها مع بعض، عايز اقولك ان احنا كان معانا في المعسكر ده كل رؤساء قطاعات البنوك، رئيس مجلس الإدارة اللي كان موجود، نائب رئيس مجلس الإدارة كان موجود دي كانت بالنسبه لي حاجه مختلفه جدا وبالنسبه لي يمكن الشركات اللي كانوا معانا يمكن كانوا متفاجئين انه حجم التركيز مش ان انا بس بشتغل معاك لا ده في جدية كبيرة جدا في ان احنا نعمل تأثير على الشركات دي فده بيجي اكثر برضه من طريقة تفكير البنك وطريقة تفكير البنوك كلها لما يشوفوا بنك مصر بيعمل حاجه زي دي معظم الناس هتبقى لا طب ما هو في حاجه هنا مثيرة للاهتمام لازم نبتدي ندخلها في الحسبان
عمر: وهقولك حاجه كمان يعني انت عندك تأثير مجتمعي مهم انت بتلمس حياة الناس، بتلمس حياة أسر معينة يعني النشاط الرسمي في البنوك دايما بتبقى الاقتراض والتمويل والكلام ده كله واعتقد ده بيخلي الموضوع فيه نوع من أنواع الإثارة ان ممكن المدراء يبقوا اه هو مش هيعملي فلوس كتير قوي بس هو مش هدفك انك تعمل فلوس انت هدفك تنمية واستدامة
انا كمان اللي عاجبني ايه ان هي مش بس فكره وخلاص لا هى البنوك بتجيب كوادر بجد ما شاء الله كويسه جدا وفاهمه هي بتعمل ايه وعدوا بالتجربة دي ودي حاجه بسطاني جدا في زمن المعلومة بقت موجوده برضه يعني الناس النهارده بتقدر تتعلم اون لاين كتير وتعمل أبحاث وبقى في أدوات مساعدانا كلنا نؤدي شغلنا احسن من زمان بصراحه
حمزة: صح وده بيوري ان الموضوع دلوقتي مش بس المعرفة هو مش بس عايز يفهم السوق ده شغال ازاي لأ هو عايز يبتدي يتفاعل معاه ويبقى مؤثر فيه ويتأثر بيه حتى في طريقة تفكير الموظفين من جوه البنك وطريقة تفكير العملاء بتوعنا مع السوق ده بس انا متفق معاك 100% التحول ده 100% بيحصل ومش بس في مصر انا شايفه بيحصل بشكل كبير في الشرق الأوسط بشكل عام حالياً وبالذات في الخليج
عمر: وعاجبني موضوع ان انتم برضه فاتحين الفكر ان هو مش بس فكر محلي فقط انتم ابتديتوا تفتحوا الاقليم يعني انا مثلا بشتغل في الأسهم والأسهم بالنسبة لي هي مش مصر بس او السعودية بس هي المنطقة العربية بشكل عام لأن ده فئة أصل كامل لوحده المستثمر ممكن يبقى عايز يوسع المخاطر عشان ميبقاش حتى في مخاطرة على الدولة اللي انت بتشتغل فيها فمبسوط ان مؤسسة مصرية بتطلع انها تساعد الناس انها تخرج وتجيب الناس من بره انها تيجى برضه في مصر اعتقد ان دي حاجه جميله برضه
(15:30)
عمر: هسالك اخر سؤال له علاقة بالشركات الناشئة وبعدين ممكن نخش على حتة تانية سريعة.. التحديات.. دايماً في تحديات، أكبر تحديات وممكن حتى سريعا النقطتين ثلاثة بتشوفهم تحديات قدام الناس قدام ريادة الأعمال نفسها؟
حمزة: التحديات عامة قدام ريادة الأعمال طبعا في كذا حاجه في التحديات اللي هي العامة اللي بنقول انها تحديات مستمرة اللي هي فكره مشوار رائد الأعمال معظم الوقت بيكون مشوار في جزء من الوحدة هو بيواجه صعوبات وتحديات مختلفة مش شرط يبقى حواليه ناس كتير لسه معندوش موارد كافية انه يعين ناس كتير انهم يبقوا بيقسموا التحديات دي عليهم ففريق العمل دايما بيبقى عليه ثقل من المسؤولية وثقل من المجهود اللي لازم يبذل عشان يحققوا حاجه زي كده
الضغط بتاع عدم القدرة على التنبؤ بالمستقبل أو أن هو مفيش وضوح للدنيا ماشيه ازاي دي برضه بتبقى تحدي كبير جدا في رحلة أي رائد أعمال
وفي بقى الناحيه التانيه بتاعه التغيرات اللي بتحصل في الوضع الاقتصادي العالمي دلوقتي في تغييرات ناحية ان في شركات في ظل الأزمة العالمية والتضخم العالمي اللي بيحصل ابتدت ان هي تواجه صعوبة في الحصول على استثمارات مثلا فابتدا زي ما بنقول السوق بتاع الشركات دي موجات مختلفة بتطلع زي ما الاستثمار كان في موجات مختلفة بتحصل في الفترة اللي فاتت كان معظم المستثمرين عايزين بيكبروا الشركات بأسرع طريقة ممكنة بحيث ان انا نحاول نوصل لاحسن طريقه إن تمن الشركة يبقى عالي ويبقى في حد مهتم ان هو يشتري الشركة بشكل رئيسي
دلوقتي يمكن الاستثمار بقى محدود اكتر شوية فابتدينا نشوف المستثمرين مهتمين اكتر بالشركات اللي هتعرف تبني من الاول منتج له استدامة كويسه يقدر ان هو لو ما حصلش على استثمار يفضل شغال ويفضل يفيد الشركة بتاعته
فبقالنا شويه بندرب فكر رواد الأعمال على انهم يمشوا بسرعة مرة واحدة كل حاجه اتغيرت أن هو لا لازم يبتدي في مستوى من المعرفة ان احنا نبني شركات مستدامة هتحتاج مننا دعم أكتر وهيحتاج مننا صبر اكتر وهيحتاج من رواد الأعمال جهد اكبر انهم يوصلوا لحاجه زي كده طبعا المثابرة بقى بتاعه ان انا يبقى عندي القدره اني انا اقول الشركه دي ما اشتغلتش طيب اجرب مره تانيه، يبقى عندي مثابرة ان انا حتى لو مش هجرب مره تانيه على طول انا ممكن استريح شويه وافكر في حاجه احسن وأجرب مره تانيه دي بالنسبه لي بحسها من أصعب التحديات اللي ممكن تبقى بتواجه رواد الأعمال في الوقت الحالي
(18:06)
عمر: طيب هنقل كده على اسئله شخصيه مش عايز تجاوب على اي حاجه متجاوبش مش عايز تقول الناس على الحاجات دي بس انا دايما بحاول لما استضيف حد بحاول ابين جزء مش باين في شخصيته وثاني ليك الحق ان انت متردش على اي حاجه
حمزة: لأ ان شاء الله هنرد على كل حاجه
(18:27)
عمر: ايه الحاجه اللي الناس هتبقى متفاجئة اللي هم حتى يعرفوا حمزه بس هي مش معروفة أوي عنك هل في حاجه معينه مش معروفه قوي عنك عملتها ما اعرفهاش عنك في أي حاجه من النوع ده؟
حمزة: عادة الناس اللي عارفاني يعني او قربت مني شويه مبحسش ان انا في حاجه مستخبيه قوي كل الناس تعرف حاجات كتيرة عني بس بحاول افكر المفاجأة بتاعه أن معظم الناس لما بتشوفني بتكتشف اللي هو انت بتجيب وقت منين عشان تبعد عن بيتك، تبعد عن عندك، عن ولادك الحاجات دي اللي هو كل ما اروح حته بلاقيك هناك ففكرة أن لأ يا جماعة ده في بيت وعيال وقصه تانية حوالين الموضوع ده دي حاجه بحسها بتفاجئ الناس شوية ودي حاجه من الحاجات اللي بتديني طاقة برضه ان انا اكمل ودائما فخورين اني أتكلم عنها أكيد
(19:20)
عمر: لو عايز تتعشى مع شخصية تاريخية في حد ممكن تختاره اول حد يجي على دماغك عايز ترجع بالزمن تتعشى معاه؟
حمزة: بص انا جوزاء برضه دي حاجه ممكن الناس ما تعرفهاش، عادة الناس بتخاف
عمر: انا بحب الجوزاء انا كل اصحابي الجوزاء بحبهم جدا الاولاد بالذات فبالعكس يعني
حمزة: هو اجمد برج طبعا بس انا برضه مش بصدق قوي في حته الابراج بس انا بتفق مع حتة ان انا الناس بتقول ان انا بغير رأيي بسرعة، بشوف زوايا جديدة فبحب حاجات جديده.. يمكن كل فترة كان في حد مختلف احب ان انا اشوفه من الناس القديمة طبعاً في الوقت الحالي هقولك (إيلون ماسك) ناس عامله نجاحات كبيرة من حاجات غريبه جدا لو انت بصيت عليها هتقول ازاى ممكن تركب شريحه في دماغ بني ادم وازاى الناس مشجعة على فكرة زي دي وايه الخطورة دي وانت من الناحية التانية مش عاجبك قوي فكرة الذكاء الاصطناعي اللي هو في كده خليط من انت بتحب وفي المستقبل هنبقي كويسين ولا هنبقى روبوت دي حاجة غريبة جداً بالنسبالي
بالنسبة للماضي كنت احب جدا ان انا اعيش في زمن مختلف شويه ممكن يبقى ابسط شويه افكر دايما ان احنا ازاي دلوقتي عندنا رفاهيات أكتر بكتير من اللي كانت موجوده زمان فأحب ان انا اوصل لاي حد من الملوك اللي كانت عايشه من 1000 سنه مثلا واشوف حياته كانت عامله ازاي و اشوف قد ايه كان حاسس بسلطان رهيب وهو ممكن ميقدرش يقطع 200 كيلو في ساعة الحاجات اللي احنا بنقدر نعملها دلوقتي ازاي هو كان حاسس بالفرق وان احنا لازم نقدر الحاجات اللي احنا فيها اكتر شوية وان احنا يمكن محتاجين نبطئ شوية من سرعة الحياة بتاعتنا عشان نبتدي نركز في الأثر اللي احنا ممكن نوصله للناس اللي حوالينا
(21:15)
عمر: في اي حاجه عملتها مجنونة، غريبة نطيت من طيارة عملت اي حاجه غريبه قبل كده حاجه خطر عملت اي حاجه من الحاجات دي قبل كده؟
حمزة: بص انا مش بحب اي حاجه فيها طيران انا مش شخص بيطير بس انا شخص بيعوم انا قبل كده كنت بتمرن "كرة الماء" وانا اصغر شويه وانا بصحتي دلوقتي بحب أغطس جدا بحب اغطس مع قروش دي من الحاجات المسلية جدا اللي اكتشفتها من كام سنه وبحاول احافظ عليها وبحاول ان انا اسافر وبسعلها يعني بشكل كبير جدا وبشجع الناس كلها برده انها تجرب موضوع الغطس ده واحنا عندنا في مصر الموضوع خطير يعني
(22:00)
عمر: في أي كتاب، فيلم، اغنية كان عندهم تأثير جامد عليك حاجه صغيرة عملت تأثير كبير؟
The business model canvas, invented by Alex Osterwalder حمزة: بص على قد ماهي بسيطه بس في كتاب اللي هو
انا مش بتكلم في كتاب بحاول اربطه بالموضوع بتاعنا عامة بس انا بحب الكتاب ده جداً ويمكن كل رواد الأعمال بيسمعوا عنها بس هي مش بتستعمل الأستعمال اللي الكتاب بيحاول يشرحه هي فكرة إزاي ان انا استعمل أداة مرئية عشان ابتدي افكر واصمم حاجه جديده ده بالنسبه لي دايما طريقة تفكير مختلفة دي يمكن حاجه من الحاجات اللي انا دايما بحب اشجع اكتر عليها انه اقرا الكتاب مشوفش بس الفيديو او متحضرش محاضرة وتحس ان انت فاهم الموضوع ده بيبقى مهم جدا
The Sociology of money ممكن حاجه على الصعيد الشخصي في كتاب اسمه
ده كتاب برضه رائع، انا بحس إن احنا واحنا صغيرين الثقافة المالية مكانتش عالية جدا مكناش بندرس الحاجات دي ولا كنا بنفكر فيها بشكل كبير معظم التعليم كان رايح ناحية يلا اتعلم كام حاجه عشان هتتخرج وتشتغل في مكان معين بس فكرة إن انت لازم يبقى في إدارة مالية للموارد بتاعتك لازم تحاول تنوع من دخلك لازم تبتدي تحط شوية في التحويش، طيب ايه هو التحويش انا عايز أول حاجه استثمار بالنسبالي هجيب عربية طيب العربية اصلاً مش استثمار طيب يعني ايه العربية مش استثمار كل دي بالنسبالي كانت حاجات مفتحة للعقلية بشكل كبير
The Sociology of money :عمر
من أقوى الكتب اللي بتستهدف حتى العامة يعني البودكاست بشكل اصغر شويه بس سيكولوجي يمكن من الكتب المهمة كبيرة اعتقد ان كتاب
The Sociology of money و Atomic Habits
مع بعض كده ده كومبو لطيف للناس انها تحط نظام لنفسها في حياتها
حمزة: صح
(24:05)
عمر: أنت النهاردة لما مبتبقاش بقى في كل مكان ومبتبقاش مع العيلة ازاي بقى بتسترخي ازاى حتى لو بتعمل حاجه ملهاش اي عنها ايه الحاجه اللي انت بتعملها؟
حمزة: بص انا بحس من الناس اللي حواليا وشغلي مع ناس مختلفة السوق لقيت ان كل واحد عنده أسلوب مختلف في واحد بيحب يشتغل مثلا جامد جدا لمده اسبوعين وبعدين ياخد كام يوم اجازه وممكن واحد يبقى عنده قدرة التحمل عالية شوية انا بشوف نفسي من النوع التاني انا بحب اقعد وقت كبير لأن معظم الحاجات اللي انا بشتغل عليها بتاخد وقت كبير عشان تبين أي مردود فمبحبش أفصل في النص لاني بحس ان انا فصلت وبرجع في كام حاجه فاتتني عايز ارجع امسك أيدي تاني فلأ انا بحب اخد اجازة طويلة كل فترة كبيرة والإجازة دي بتبقى معظمها ليها علاقة بالسفر داخلي او خارجي او اي حاجه بس فكره ان انا غيرت السيناريو وغيرت العادة اللي أنا فيها فأبتديت ميبقاش عليا نفس المسؤولية والتفكير وهكذا فدي بتغير بشكل كبير جداً
عمر: بتبعد عن المكان يعني
(25:13)
عمر: قوة خارقة، أكيد عرفنا انك مش هتطير خلاص، إيه القوة الخارقة اللي انت عايزها أياً كان مش لازم تحب البطل الخارق نفسه بس انت عايز القوة نفسها عايز تعمل إيه؟
حمزة: بحب قراءة الأفكار جداً فكرة انك تقدر تفهم الشخص اللي قدامك بشكل كبير بس يعني لما أنا أحب لأني مبحبش أتفاجئ بأفكار ممكن تكون مش كويسة حوالينا، اقرأ افكار بس لما انا ابقى عايز اقرأ الأفكار دي بحس ده انه حاجه مهم جداً وبيدي زوايا مهم الشخص كان بيفكر عمره ما هيقدر يوصل بالظبط لزاوية التفكير بتاعة الشخص اللي قدامه هتديله بعد كبير جداً للشخصية
عمر: لأ قوة خارقة جامدة جداً، وبعدين ده هتعرف تستخدمه في حاجات تانية كتير بعديها
حمزة: اها معلومات داخلية
(26:15)
عمر: طيب نصيحة أنت لو رجعت لنفسك زمان تديها لحمزة أول ما ابتدى حتى لو على الصعيد الشخصي مش لازم تكون في الصعيد العملي يعني ترجع تقوله حاجه واحده صغيرة؟
حمزة: million dollar question فعلاً دي من الحاجات اللي دايماً بفكر فيها واحنا صغيرين بيبقى عندنا استعجال بشكل أكبر بحس لأ لو رجعت هنصح نفسي ان في حاجات انا كنت بحاول أسرعها واحطها بشكل كبير ومحاولتش استوعب المعلومة منها أو محاولتش أمشي في الطريق التقليدي بتاعها وأخد المعرفة بتاعتها بشكل كبير، الحاجات دي كانت كويسة بس على قد ما أقدر هقول انها كانت تجربة ناجحة بس عارف لما بتجرب حاجه بتبقى عايز تكون جربت الحاجه التانية عشان تقدر تحكم عليها مفيش حاجات كتير أحب أغيرها بس أحب اكون في حاجات فاتتني عشان كنت بفكر بفكر اني معنديش وقت للموضوع ده بس لأ كان يستاهل اني أديله وقت أكتر الحاجات دي بيكون ليها علاقة أكتر بفرص مكمنتش شايفها بحجمها الرئيسي، فرص مكنتش حابب استثمر فيها مثلاً احنا بحكم شغلنا عمتاً في الأبتكار في دايماً بنشوف حاجات جديدة طالعة فمثلاً موجة البيتكوين كانت بالنسبالي حاجه من اهم الحاجات اللي قعدنا نقرأ فيها بس مدخلتش فيها بالشكل اللي كان ممكن يبقى عامل فرق كبير فلازم تبقى بتهتم بكل حاجه جديدة وتبقى مطلع على الأقل على الحاجات الجديدة ولازم تبقى بتفكر هل الحاجه دي هيبقى ليها استمرارية ولا لأ وبجدية مش بس انت بتطلع عشان تبقى عارف عن الموضوع لأ أطلع وأبتدي فكر ازاي ده ممكن ده يأثر على المستقبل وازاي تبقى جزء منه لو ده فضل موجود ده بيديلك زاوية جديدة في انك تحتك بالحاجه بشكل أنسب فمش بس نحتك بالحاجه بشكل سوري اننا عرفت عنه طيب عرفت عنه فعملت إيه؟ إزاي بصيت بالمعرفة دي على نفسك؟ ازاي المعرفة دي تعود على نفسك
(28:19)
عمر: ده كده أنت بتتكلم على الماضي، المستقبل إيه الهدف أو الحلم بتاعك؟
حمزة: بحس ان المستقبل متغير جداً، في المستقبل اللي هو في الغالب هيحصل يعني دايماً بقول بص في المستقبل في حاجه اسمها تخطيط السيناريو دي واحدة برضه من أحلى طرق التفكير فده بيقول بشكل عام إن مفيش مستقبل واحد بس في مستقبلات محتملة مختلفة وفي مستقبل مفضل بالنسبالك فإزاي تقول إيه اللي في الغالب هيحصل، والمستقبل شكلة عامل ايه وتبتدي تتخيل
عمر: أنا عاجبني في إجاباتك حاجه أنها علمية جداً فهو أنا مش بجاوب وخلاص لأ المستقبل ده هو حاجتين او تلاتة وكل حاجة ليها معنى فأنا حقيقي أتعلمت ده منك النهاردة دي حاجه أضافتلي طريقة التفكير وزي ما انت قولت هي طريقة تفكير الناس بتقعد تفكر بس في حاجات كتير غير واقعية في التفكير، فشكراً انك وجهتنا في الحتة دي من خلال الإجابة دي أنا عن نفسي اتعلمت منها
حمزة: بص الفكرة في أنك تقول حاجه مش هتحصل أو في الأغلب مش هتحصل انها بتبقى صعب جداً تحكم عليها، وكمان اصلاً المستقبل إيجابي فنفسك أنه يحصل وبعدين تقول لنفسك انه مش هيحصل فده بحسه بيبرمج مخك زي ما تقول انا هبقى اغنى واحد في العالم بس لو انا شايفة جامد جداً عن انه مش هيحصل فهو في الغالب مش هيحصل فبحس ان المستقبل لما بقول عليه كده، مش عارف بس كل حاجه واقعية إن شاء الله
عمر: إن شاء الله، انا مش عارف اشكرك قد إيه على وقتك معايا النهاردة بجد والله أنا مبسوط إني اتعرفت عليك ومبسوط إن البودكاست ده بيوصلني وبيكبر شبكة بتاعتي اني اعرف شخصيات بتأثر في الحياة مش بس نظرياً وده واضح جداً في كلامك ان النظرية مهمة وكويس ان الناس تقرأ وتعمل بس لو انت مستخدمتوش في مصلحتك أو لو مترجمتش الكلام ده لتنفيذ بالنسبالك ده وقت ومجهود وبنزين بيتحرق في مخك وفي طاقتك على الفاضي
حلقة عملية جداً من وجهة نظري يعني التنفيذ التنفيذ هو أهم حاجه في القطاع بتاعكم أعتقد الافكار كلها موجودة ومع وجود الذكاء الاصطناعي انت ممكن تعمل نموذج عمل كامل كأفكار مكتوبالك اصلاً فالشطارة أعتقد في التنفيذ
شكراً جداً جداً يا حمزة على وقتك معانا وبشكر ماري جداً انها ساعدتنا برضه في الحلقة دي وياريت نكرر الحلقة دي في يوم من الأيام تاني لو عندك وقت ودي منصة تقدر تيجي في أي وقت لو حابب ترجع تاني على البودكاست ولو أنا أقدر أساعد النظام بأي شكل هكون شاكر جداً ليكم، ميرسي جداً جداً يا حمزة
حمزة: شكراً جداً يا عمر، انبسط جداً معاكم
ماري: ميرسي جداً يا حمزة
حمزة : شكراً يا ماري
Translation of some words and terms:
Minimum الحد الأدنى
Channels القنوات
Minimum Required الحد الأدنى المطلوب
Maximize Impact تعظيم التأثير
Social Events الفعاليات الاجتماعية
Platforms المنصات
Regional Market السوق الإقليمي
Pilot Cycle دورة تجريبية
Partnerships الشراكه
Accelerator مسرعة الأعمال
Component عنصر
Level Of Knowledge مستوى المعرفة
Funding التمويل
Entrepreneurs رواد الأعمال
Position منصب
Fintechs شركات التكنولوجيا المالية
Talks محادثات
Excitement إثارة
Sustainability الاستدامة
Operate العمل
Angles الزوايا
Adventure مغامرة
Water Polo كرة الماء
Visual Tool أداة مرئية
Promote شجع
Approach أسلوب
Super Power قوة خارقة
Mind Reading قراءة الافكار
On Demand على الطلب
Inside Information معلومات داخلية
Scenario Planning تخطيط السيناريو
Theoretical نظري
Execution تنفيذ
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #حاضنة_أعمال_الشركات_الناشئة #الجزء_الثاني