117. العائد على المجهود (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في حلقة النهاردة بنتكلم على مفهوم الناس عمرها ما فكرت فيه ولكن ضروري جداً اننا نحطه في الحسبان كواحد من المعايير المهمه واحنا بنقييم أي فكرة إستثمارية وهو العائد على المجهود
أسئلة ممكن أسئلها لنفسي عشان أعرف هل الفكرة الإستثمارية دي كويسة من حيث العائد على المجهود ولا فكرة أخرى من منظور مختلف ممكن تبقى فرصة إستثمارية أفضل وبأقل مجهود؟
01:45 هل سهل إني أفتح حساب أو أستخراج الورق المطلوب للإستثمار ده؟ -
02:32 هل في السنين القادمة هحتاج أعيد تقديم ورق لتأكيد الحساب ده؟ -
02:59 هل هقدر بسهولة أزود حجم إستثماراتي في الفكرة دي؟ -
03:41 هل سهل أجمع العائد بتاعي من الأرباح؟ -
04:25 هل سهل إني أخرج من الإستثمار ده؟ -
05:03 هل أنا محتاج أحمي الإستثمار ده؟ -
06:02 هل البلد اللي أنا فيها القانون بيحمي مدخراتي؟ -
06:55 لما أشتري الإستثمار ده.. هل هعرف أنام بليل مستريح؟ -
10:14 فئات الأصول قليلة المجهود -
11:44 فئات الأصول عالية المجهود -
21:09 تقييم المجهود على مستوى الأفراد -
23:00 المجهود مطلوب إمتى؟ -
الإستثمار بياخد وقت طويل فمتبقاش مهووس بفكرة الحاجه اللي هتفرقع! خد قرارات مظبوطه وأتحكم في وقتك وأعرف نفسك ومتحطش مجهود في حاجه أنت مش عايزها ولا حاببها
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلاً بيكوا في حلقة جديدة من بودكاست كلام ينور في حلقة النهاردة هتكلم على مفهوم مختلف يمكن الناس عمرها ما فكرت فيه بس دي حاجه أنا ديماً بحطها في الحسبان بتاعي وأنا ببص على أي فكرة إستثمار وهي العائد على المجهود اللي أنا هعمله بمعني إن ممكن يبقى عندي فكرة كويسة في مختلف فئات الأصول اللي احنا أتكلمنا عليها كذا مرة ولكن أنا ديماً بقعد أقارن ما بين العائد على الإستثمار بس والله الفكرة دي هتعملي 20% في السنة والله الفكرة دي هتعملي 10% في السنة ، فالفكرة اللي هتعملي 20 تعتبر فكرة أحسن من 10 ولكن مبناخدش بالنا من إن في حاجه اسمها المجهود اللي أنا بعمله.. أنا كمستثمر لازم أعمل نوع معين من المجهود.. وهنتكلم وهنحاول نجزأ إيه الأسئلة اللي ممكن أسئلها لنفسي عشان أعرف هل فعلاً الـ 20% دي أحسن ولا الـ 10% من منظور مختلف بتمثلي فرصة إستثمارية بشكل أحسن
01:45
فنعتبر كده كل فكرة من الأفكار بتاعة الإستثمار دي في نوع معين من الطاقة كإنسان انا لازم أديها جسمي أو مخي أو أي نوع من أنواع الطاقة اللي أنت كإنسان ممكن تطلعها لتنفيذ الفكرة دي وهسأل نفسي كده كام سؤال
أولاً إيه سهولة فتح الحساب؟ أو إيه سهولة الورقيات عشان أعمل الإستثمار ده؟
يعني عشان مثلاً أشتري بيت في نوع معين من الورق لازم أقدمه ، في نوع معين من الورق مطلوب لحسابات البنوك ، في ورق مطلوب لحسابات صندوق الإستثمار أو حسابات التقاعد.. فلازم أعرف إيه سهولة فتح الحساب ده أول سؤال هسأله لنفسي
02:32
طيب بعد ما فتحت الحساب هل أنا محتاج مثلاً في السنين القادمة أعيد تقديم ورق تاني لتأكيد الحساب ده نشيط ولا لأ؟
لو أنا بشتري بيت خلاص أنا بشترية من أول يوم ومش بحتاج أقدم ورق خالص ولكن مثلاً في حسابات في شركات سمسرة بتقولي لأ كل سنة لازم تجدد ورقك ، لازم تبعتلي كشف حساب فده يعتبر مجهود
02:59
السؤال التالت اللي هسأله لنفسي: هل بسهولة أقدر أزود إستثماراتي في الفكرة دي ولا لأ؟
يعني أنا مثلاً دخلت في شركة ناشئة والراجل قالي هتاخد 10% ، جيت بعد سنتين تلاته الشركة بدأت تنجح هل هعرف أضخ فيها فلوس أكتر كمساهم ولا لأ؟ هنا هنلاقي إن في أفكار سهل جداً جداً إن أنت تضخ تاني فلوس زي مثلاً صناديق الإستثمار ، زي الودايع ، أي حاجه تعتبر فيها سيولة عالية ولكن العقارات ، الشركات ، المشاريع الصغيرة دي صعب إني أضخ فيها فلوس تاني.. يبقى أنا هنا محتاج مجهود أكبر في الأفكار دي عشان أقدر أزود فيها إستثماراتي فده سؤال لازم اسأله لنفسي
03:41
السؤال الرابع اللي هسأله لنفسي: لو جالي عائد من الإستثمار عبر السنين مش ببيبع الإستثمار بتاعي أنا بيجيلي عائد في شكل أرباح أو شراكة جاي منها حاجه أو إيجارات هل سهل إني ألم الإيجار ده ولا لأ؟ شركتي أو مشروعي الصغير هل سهل إنه يديني فلوس كل سنة ولا لأ؟
يبقى هنا برده لازم أحسب قد إيه السهولة بتاعة لم الفلوس بتاعتي في المستقبل.. هو بيقولك متوقع أعمل 20% بس مش سهل أوي إني ألم الفلوس ، هتاخد فلوسك دي في السنة الخامسة بس في فكرة تانية بتقولك هتلم فلوسك في السنة الأولى فهنا لازم أبقى واخد بالي من الحته دي
04:25
خامس سؤال هسأله لنفسي: هل سهل إني أخرج من الإستثمار ده ولا لأ؟
يبقى أنا في الأول سألت نفسي ازاي هخش وازاي هلم فلوسي في فترة الإستثمار دلوقتي لازم اسأل نفسي ازاي هخرج
هنلاقي مثلاً إن العقارات صعب في الخروج هنلاقي إن الشركات الصغيرة صعبه في الخروج صعب أبيع حصتي مش سهلة مفيش مستثمر واقف على الباب مستني يشتري شركتي الناشئة أول ما أرفع التليفون عليه ولكن لو أنا في سوق الأسهم أو سوق الودايع الحاجات دي سهل جداً جداً في الخروج منها
05:03
السؤال السادس اللي هسأله لنفسي: هل أنا محتاج أأمن أو أحمي الإستثمار ده؟
هديكوا مثال سهل جداً لو أنا نزلت سوق الدهب وأشتريت دهب خام وحطيته في البيت ، أنا عشان أحطه في البيت لازم مثلاً يبقى عندي خزنة عشان مايتسرقش أومثلاً أحميه لو حصل حريق في البيت أو حصل حاجه خطيرة فهل أنا عندي المقدرة إني أحمي المدخرات بتاعتي دي ولا لأ
هنلاقي إن الحاجات الإلكترونية اللي بتقدر تشتريها على البورصات مش محتاج تحميها لأن في دور أمين الحفظ ، في دور البورصة ، في كذا حد ممكن يحميلك إستثماراتك هنا ولكن لو أنا هشتري دهب وهحطه في البيت عندي ، أو لو واخد كاش حطه في البيت مخبيه في الدولاب أو تحت السرير أو تحت البلاطة أنا محتاج أحمي الحاجات دي فهنا لازم أبقى فاهم إن في تكلفة عليا وفي مجهود عليا ، مجهود ذهني أنا خايف إن الحاجه تتسرق أو يحصل حاجه لا قدر الله في البيت فلازم اسأل نفسي السؤال ده
06:02
السؤال السابع اللي اسأله لنفسي : البلد اللي أنا فيها هل القانون بيحمي مدخراتي ولا لأ؟
لأن ممكن يحصلك مفاجأت في النص ، ممكن قانون معين يتغير يقولك مثلاً أنا عندي بيت ومأجرة لواحد والواحد ده متفق معاه على زيادة سنوية معينة ولكن يطلع قرار بيقول مثلاً لأ الإيجارات مينفعش تزيد أكتر من كذا % أو يطلع قرار تاني مثلاً إن التملك لمجموعة مثلاً من الأجانب في بلد معينة ممنوع في الحته دي أو يتفتح في الحته الفلانية.. فالقانون وخاصة في العقار لازم أبقى واخد بالي جداً القانون اللي بينظم العلاقة ما بيني وبين الإستثمار بتاعي لأن ده برده نوع من أنواع المجهود وتاني المجهود مش بس مجهود جسدي هو مجهود ذهني أنا خايف على الحاجات دي
06:55
أخر سؤال هسأله لنفسي: لما أشتري الإستثمار ده وده لازم نسأله في أي وقت هل أنا هعرف أنام بليل مستريح ولا لأ؟
بمعنى إني خايف من الإستثمار ده ولا لأ؟ هل هو بيحققلي اللي أنا عايزة؟ العوايد بتاعته واضحة؟ لو حسيت إنك مش عارف تنام وبتفكر كتير في الإستثمار بتاعك يبقى أنت حجم المحفظة بتاعتك في فئة الأصل ده متعتبرش من الحجم المريح اللي يخليك تعرف تنام ، بيخليك تفكر ، بيخليك تشك في القرار بتاعك معنى كده إن حجم بتاعك غلط ممكن فئة الأصل نفسه ميكونش غلط ولكن الحجم غلط
وهديكوا مثال أنا مثلاً عندي محفظة أسهم ، لو محفظة الأسهم زادت عن حد معين هحس إني كده بخاطر زيادة عن اللزوم ، أنا مش مستريح أو أنا مش حاسس إن ده صح يبقى أنت الحجم بتاعك كبير ممكن تنزل محفظة الأسهم بتاعتك وتروح لفئة أصول تانية
أو شاري دهب كتير زيادة عن اللزوم وحاسس لأ انا مش محتاج كل الجزء ده في محفظتي فديماً راجع مع نفسك حجمك في فئة الأصل ده مهم جداً لأن ده هيقولك المجهود اللي أنت بتصرفه الذهني على الحاجه دي صح ولا غلط
08:06
لو أنا سألت نفسي الـ 8 أسئلة دول لما أقعد كده وواحد جاي يقترح عليا الفكرة بتاعته ، يقولي مثلاً تعالى أشتري دهب أو تعالى أشتري مشروع أو أشتري أرض أو بيت ، عملت العوائد بتاعتي وبعدين جبت الـ 8 أسئلة دي وسألت نفسي الـ 8 أسئلة دول لو الـ 8 دول بالنسبالي مريحين أنا هنا المجهود بالنسبالي مش هيبقى عالي وأختلاف واحد للتاني ديماً في كل حاجه احنا بنقولها يعني ممكن أنا أبقى مبسوط إني بروح ألم الإيجار بتاعي من البيت أو من الأرض اللي أنا مأجرها لحد ولكن واحد تاني بالنسباله لأ أنا مش عايز أوجع دماغ ومش عايز أعمل المجهود ده خالص مش بستمتع بالموضوع ده فالإجابات بتاعة الأسئلة دي هتختلف من كل واحد للتاني مفيش إجابة صحيحة ، واحد يقولك لأ أنا عايز كل محفظتي محفظة عقارية مع إنها مجهودها عالي إني أفتحه وقوانين وإيجارات بس ده الأختيار الأمثل بالنسباله
فعايز أقول لما تسأل نفسك الأسئلة دي مش لازم كلنا إجاباتنا تطلع زي بعض ولكن أنا عاوزك تحسب لو جتلك فكرتين إستثمار وجتلك واحده منهم أسهل من التانية بالنسبالك وبالنسبه لشخصيتك بعد ما سألت نفسك الـ 8 أسئلة دوا ولقيت العوائد المادية نفسها قريبين جداً من بعض وقتها هختار العائد على المجهود الأعلى اللي أنا هعمل مجهود أقل وهيجيلي عائد أعلى
09:29
فلو مشينا مثلاً سريعاً كده في فئات الأًصول اللي احنا ديماً بنتكلم عليهم اللي هما الكاش اللي بحطه في البيت ، عندي الواديع وشهادات الإستثمار ده النوع التاني ، عندي السندات الحكومية ، سندات الشركات ، العقارات ، وبعدين الأسهم إني بعمل محفظة أسهم وبعدين صناديق الإستثمار وبعدين السلع اللي هو بشتري دهب وأحطه في البيت وبعدين في صناديق السلع لو عايز اشتري نفس السلعة دي بس على البورصات ، الأفكار الناشئة ، العمرات الرقمية ، وآخر حاجه لو بتعمل لنفسك شركة دي فئات الأصول كلها أو بنسبة كبيرة معظمها 80 أو 90% من فئات الأصول المعروفة أو اللي أنت تقدر تعملها كواحد عادي مش محترف
10:14
لو قسمناهم بقى لأتنين.. إيه الحاجات المجهود بتاعها واطي وإيه المجهود بتاعها عالي
لو بصينا على الحاجات اللي المجهود بتاعها واطي هنلاقي الودايع وشهادات الإستثمار ، السندات بتاعة الحكومات اللي أنت بتروح تحط فلوسك تشتري سند حكومي والسند الحكومي ده بيبقى مضمون من الحكومات فالضمان بتاعة عالي ومفهوش قلق أوي ، هنلاقي السندات اللي بتصدرها شركات المجهود بتاعها واطي وممكن الشركات تكون شركات كبيرة ومعروفة زي آبل وجوجل ، سندات من أي حد يعني دي برده بنلاقي المخاطرة بتاعتها واطيه ومجهودها قليل ، بعد كده بنطلع صناديق الإستثمار المجهود بتاعها واطي لأن كل اللي أنت بتعمله بتروح تفتح حساب في البنك تبعت فلوسك فيه وفي نفس الوقت الراجل بيدير الحاجه أنت ملكش دعوة بيبعتلك كشف حساب فأنت مبتعملش أصلاً مجهود في الإدارة وبعدين صندوق مؤشرات السلع زي الدهب اللي هو بشتري الدهب بس على بورصة الراجل بيعملك كل حاجه في الخلفية هو اللي بيشتري الدهب وهو اللي بيخزنة وهو اللي بيأمن عليه أنت حضرتك بتشتري بس وثيقة في صندوق إستثمار بيستثمر في الدهب فدول الحاجات اللي المجهود بتاعها واطي هنبص كل واحده ليها عوائد معينة ومتوقع معين فأنت فأنت بتقارن إيه العائد اللي أنت عايزه من الحاجات دي بالمجهود الواطي
11:44
طيب لو روحنا بقى للنوع التاني اللي هو الحاجات اللي المجهود بتاعها عالي هنلاقي إن الكاش المحطوط في البيت ده المجهود بتاعه عالي لأن بالنسبالي أنا عمر عن نفسي بقلق لو عندي فلوس في البيت لأن ممكن يحصل حاجه لا قدر الله زي ما قولنا ممكن البيت يحصل فيه مشكلة والفلوس يحصلها حاجه طبعاً مش هتعرف تعوضها ولكن الفلوس لو محفوظة في حته أمان بيبقى المجهود النفسي بتاعها أقل وده أول نوع في الحاجات المجهود بتاعها عالي
تاني نوع العقار العقار دخول وخروج ولم إيجارات وقصة طويلة مجهودها عالي
تالت نوع محفظة الأسهم لو حضرتك عندك محفظة بتحاول تختار إيه الأسهم اللي السنادي هتطلع كتير وإيه الأسهم اللي مش هتطلع كتير فبتكون أنت محفظتك بنفسك وده يعتبر نوع من الحاجات اللي فيها المجهود العالي
رابع نوع السلع نزلت جبت دهب أو فضة وخزنتهم في البيت ده بيعامل بالنسبالي نفس معاملة الفلوس إني لازم أأمن عليها وأخد بالي وميبوظش وميحصلوش حاجه وهكذا
الشركات الناشئة نوع من الإستثمار اللي محتاج مجهود كبير ، محتاج أقابل المديرين محتاج أتكلم معاهم ، محتاج أعرف إيه اللي بيحصل ، محتاج أتابع لأن فرص نجاح الشركات الناشئة مش عالية ولكن لما بتنجح بتنجح جامد ولكن المجهود بتاعي عشان ألاقي الفرصة دي هو مجهود عالي لأني محتاج أدور
العملة الرقمية محتاج تفهم ازاي تقدر تشتريها ، ازاي ميحصلكش قرصنة ، ازاي تأمن محفظتك ، ازاي تبقى فاهم في الأمن الإلكتروني ، مش بكلمك أنه هيطلع وينزل هنا أنا بكلمك بس على التأمين بتاع المحفظة الرقمية بتاعتك فأنت لازم تبقى مذاكر القصة دي جداً ده المجهود اللي أنت بتعمله في شراك للعملات المشفرة
الفكرة الأخير اللي فيها برده مجهود عالي شركتك الخاصة اللي هو ممكن تكون بتقضي 7 أو 8 ساعات في اليوم المجهود بتاعها عالي
فأنا هنا قسمت لحاجات مجهودها واطي وحاجات مجهودها عالي ، هل أنا بقولك متعملش الحاجات اللي المجهود بتاعها عالي؟ لأ طبعاً.. بس بقولك وأنت بتقارن في العوائد خلي بالك لو جالك عائد مثلاً على محفظة الأسهم بتاعتك إن أنت عايز تعمل 20% في السنة وفي صندوق إستثمار هيعملك مثلاً 15% في السنة هل الـ 5% فرق في العائد ده هو تمن وقتك؟ لو أنت هتاخد وقتك تعمل بيه حاجه أفضل من الـ 5% دي أنا أفضل إنك تعمل العائد الـ 15% والـ 5% الزيادة دي أنت هتوفر بيهم صحة ومجهود ذهني ووقت طويل بيضيع في النص
هل أنا مثلاً لما أشتري صندوق مؤشرات الدهب أو أشتري دهب خام أحطه في البيت هل العوائد بتفرق لأ في الحالة دي مش بتفرق أوي ولكن المجهود بتاع الموضوع التاني أصعب إني اخده وأحطه في البيت
فأنا عايزك بس تقارن بين الناحيتين ازاي ممكن بطريقة أزكى تقدر تعمل نفس الإستثمار أو تقدر تعمل نفس العائد أو حتى عائد قريب من العائد التاني بمجهود أقل فناخد بالنا جداً إن المجهود جزء كبير جداً من المعادلة اللي أنت بتعملها
15:01
في ناس تانية ممكن توصل لدرجة تقولك والله آه أنا المحفظة بتاعة العقار دي هتكلفني من وقتي 50 ساعة في السنة والساعة بتاعتي بكذا فهحسب أقللها من العائد عشان أشوف الفرصة البديلة بتاعتي أحسن ولا لأ يعني إفتراضاً في عقار هيديك 17% في السنة مع الإيجار مع كل حاجه ولكن هتحط فيه 50 ساعة ، فكرة تانية هتديك مثلاً 12% في السنة فأنا لما حسبت المجهود اللي انا حطيته في العقار لقيت إن فعلاً الـ 17% دي حقيقتاً هي 13% أو 14% في المقارن في فكرة من غير أي مجهود بـ 12% يبقى وقتها أنا ممكن أخد الفكرة اللي من غير أي مجهود هي دي الطريقة اللي أنا عايزك تفكر بيها لأن الناس مابتبصش ده ممكن يحصل عشان ده عائد رهيب وكده ولكن هل المجهود كبير؟ وبنشوف أوقات كتير شركات بتبوظ وناس مش بتبقى واخده بالها إنها المفروض تحط مجهود كبير في الفكرة عشان تنجح في أفكار الشركات الخاصة لأنه من أول يوم محسبش هو هيعمل مجهود قد إيه فمن فضلكوا خلوا بالكوا من الجزئية وقارن بطريقة زكية الفكرتين اللي قدامك أو التلاتة أو الأربعة وحط المجهود كواحد من افتراضاتك في الحسبة
فأنا مش ضد الحته دي بكررها للمرة التالته يمكن أنا مش ضد إنك تختار حاجه فيها مجهود عالي بس أعرف نفسك ، اعرف أنت عايز إيه احنا زي ما قولنا أنت ممكن تعمل علاقة مع الراجل المؤجر اللي معاك وبتتعامل معاه كويس بتصلحله لو في حاجه باظت في العقار بتاعه ، بتساعده ديماً يعمل صيانة للعقار لأن العقار سعرة بيعلى لما تبقى ديماً عامله الصيانات بتاعته وأنت حابب الفكرة دي فأنت معندكش مشكلة. في ناس تانية عندها مستوى البارانويا (جنون العظمة( عالي جداً فتقدر تأمن محفظة العملات الرقمية بتاعها فهو مولود كده ، هو دماغة كده أنا معنديش مشكلة أنا فاهم جداً في ازاي أأمن الأصول الرقمية بتاعتي معنديش مشكلة وممكن أعمل إستثمار كبير في عالم التشفير.. وواحد تاني العكس تماماً فناخد بالنا أنت مين وعايز من إستثمارك إيه
17:20
برده حاجه إحنا شوفناها لما الناس تبتدي شركاتها وخاصة الشركات الخاصة وأمثلة كتير حول العالم لناس مثلاً نجحت في الشركة بتاعتها أنت من أول يوم عندك مجهود لازم تعمله عشان الشركة بتاعتك تنجح فبنلاقي إن أنت من أول يوم القرار بتاع أنا هفتح شركة والهيكل بتاعها شكلة عامل ازاي من أول يوم.. هو ممكن يكون مجهود كتير ولكن هيفرق معاك سنين قدام وممكن كمان يفرق معاك ملايين قدام ، يعني أختيار البلد أو المكان اللي أنت هتفتح فيه ، القوانين اللي هتحميك في المجال ده ، التشريعات.. دي حاجات مهمة جداً جداً أنا عندي فكرة كويسة مش هروح أفتحها وخلاص لأ أنا لازم أشوف هي بتتفتح فين حول العالم ، أو حتى في البلد الواحده إيه المحافظات المشجعه للفكرة دي ، في نوع من أنواع مناطق الحرة اللي ممكن أروح فيها فالقانون يحميني أكتر لو فتحت هناك ، برده الضرايب ممكن يبقى عندي حافز ضريبي مثلاً 5 سنين / 10 سنين ضريبياً هاخد معاملة أحسن في الحته الفلانية لو فتحت هناك ، ممكن أخد برامج حكومية معينة أنا عندي فكرة الحكومة بتاعتي بتقول يا جماعة اللي هيعمل الشركة في الحته الفلانية أو في القطاع المعين أنا هساعده وهديله عقود أو هساعده على التصدير أو الإستيراد أياً كان الحافز الحكومي اللي بيديهولك فالبحث اللي فالأول قبل ما ابدأ فكرتي هيوفر عليا مجهود قدام كتير جداً فأنا بنصح الناس إنها وهي بتبتدي شركاتها لازم تبقى مغطية النقط دي حتى لو هو مجهود كبير وبطئ ومبيعملش فلوس النهاردة ولكن العائد على الإستثمار بتاعه ممكن يبقى أعلى حاجه في الفكرة بتاعتك ، ولازم برده تختار المستشارين أو الفريق اللي حواليك فالأول المهم اللي هو زي محامي أو رأي قانوني معاك ، مستشار للضرايب مثلاً يساعدني لو معنديش النقط اللي أتكلمنا عليها قبل كده أشوف ناس عندها المعلومات دي وأحاول أخدها منهم ولو أنا حتى معييش فلوس إني أجيب أحسن محامي أو أحسن مستشار ضرايب برده هقول إن الإنترنت النهاردة بقى فيه مصادر ومراجع كتيرة جداً جداً أنت تقدر لوحدك تحاول توصل للناس دي وممكن برده تعمل إتفاقات اللي هو تبادل منفعه أنا اعملك حاجه معينة وأنت تعملي حاجه معينة ، مثلاً أنا شركة دعاية وأنت محامي فأنا هحاول أساعدك في الدعاية لمكتب المحاماة فتديله خدمة مقابل المعلومة اللي أنت هتاخدها منه
فأنا بحاول أحل مشكلة المجهود على المدى البعيد اللي هي هتبدأ تجيلي سنة 3 سنة 4 سنة 5 عشان أنا أخدت قرار أول يوم مش صح وخلوا بالكوا إنكو من أول يوم هتعيشوا في حاجات كتيرة جداً في حياتكوا قدام فالمجهود اللي أنت هتبذله في الأول هيبقى عليه عائد طويل
نفس الكلام في الحسابات بتاعي لازم الحسابات بتاعتي من أول يوم تبقى واضحة وبسيطة أقدر أعرفها عشان تديني الوضع المالي لشركتي مش عشان أعمل تقرير للضرايب أو للمنظم بتاعي لأ ولكن عشان أنا واحد صاحب شركة أنا محتاج أبص على الموارد المالية بتاعتي بسهولة عشان أفهم الشغل بتاعي رايح فين
فأبني الحاجات دي صح لو أنت بتبني شركتك حتى لو بتبني حاجه خاصة فيها موظف واحد فقط لما المعلومات دي تبقى قدامك أنت بتقدر كصاحب شركة تاخد قرار أسهل وأحسن وهيوفر عليك مجهود قدام لأنك لو بنيت حاجات على أساسات غلط صعب جداً قدام تغيرها لأن التغير حاجه ديماً صعبه
21:09
لو نزلنا بقى على مستوى الفرد واللي احنا ديماً بنتكلم عليه الميزانية أو الصرف بتاعك اللي كان على تمويل الأفراد نفسه هنلاقي نفس الفكرة إن أنت لو معملتش مجهود النهاردة إن يبقى عندك ميزانية ، إنك تبقى عارف ازاي تصرف فلوسك ، ازاي تحوش ، ازاي تتقاعد والكلام ده كله هنلاقي إن ده هيخليك وأنت عندك 45 / 50 / 60 سنة بتعمل مجهود أكبر إنك بتحاول تلحق اللي فاتك يعني لو واحد ابتدا في الـ 25 غير واحد ابتدا في الـ 35 غير واحد ابتدا في الـ 45 اللي في الـ 45 هيعمل مجهود أعلى وهيحاول يحوش كمية من الفلوس أكبر ونسب أكبر من دخله عشان يلحق الراجل اللي ابتدا في الـ 25 فأنت لو ابتديت بدري وعرفت الميزانية بتاعتك أنت نفسك على المدى الطويل هتحط مجهود أقل في الإستثمار وفي محفظة التقاعد بتاعك
22:03
برده الأسئلة الكتير اللي بتيجي في دماغك اللي هو أنا عندي مثلاً في بلد معينة عندي 100 صندوق إستثمار أنا مش عارف أشتري في أنهي واحد فيهم ومش عارف إيه أحسن حاجه فيها فبهنج كده أو مش عارف أخد قرار فماخدش قرار خالص أو أبطل أعمل الإستثمار بتاعي هنلاقي إن هنا أنت بتعمل مجهود ملهوش لازمة في أول حياتك إن أنت قاعد عمال تقارن تقارن وعايز تجيب أحسن فكرة ولكن هي مش مهم أحسن فكرة في أول يوم في إستثمارك المهم عندي إن أنت اصلاً تبتدي لما تبتدي أنت مع الوقت هتعرف إيه أحسن فكرة وأنت هتتعلمها لوحدك فمتبذلش مجهود هنا زيادة عن اللزوم بالعكس أنا هنا بنصح إنك متبذلش اصلاً مجهود في أول حياتك في الإستثمار أنا عايزك بس تبتدي تفتح حساباتك ، تشتري أي صندوق إستثمار حتى لو مش أحسن حاجه في الدنيا لأنك هتتعلم منه حاجات كتير جداً العائد بتاعها هيرجعلك
23:00
المجهود بقى مطلوب إمتى؟
قدام شوية لما محفظتك تبقى كبيرة ولما يبقى عندك قرارات إستثمارية بجد ممكن تأُثر بشكل كبير على حياتك ولكن في أول سنة ، سنتين وحتى لحد 5 سنين أنا معتقدش إن القرارات الإستثمارية دي هتبقى كارثة كبيرة لو أنت عملتها غلط ولكن قدام هو ده المهم
23:18
ونفس الكلام لو أنت بتفكر تبتدي محفظة الأسهم بتاعتك إنك تختار لنفسك الأسهم أنا عايز أشتري تسلا وعايز أشتري آبل وعايز أشتري الكريبتو ، أنا مش عايزك تعمل مجهود في الأول يعني الكلام ده ممكن تعمله في السنة الـ 5 الـ 7 الـ 10 أو الـ 15 حتى في طريقك للإستثمار فأنا مش عايزك تعمل مجهود في الأول مش لازم ممكن تبتدي في صندوق إستثمار متنوع وتبتدي مع الوقت تعلي الوقت اللي أنت بتصرفه في إختيار الأسهم ولكن مشكلتي مع الناس اللي بتبتدي لو أنت مش متفرغ الموضوع صعب جداً الأسواق بتتغير على طول والحاجات اللي بتحرك الأسهم لو بتفكر في محفظة أسهم الحاجات متغيرة يومي المجهود اللي أنت هتبذله عالي جداً فأنا مع إنك تبتدي بالسهل وتبتدي بالحاجات المجهود الواطي ومع الوقت هتعلى وهتتحسن وهتفهم أنت عايز إيه
24:13
على المدى الطويل لو قولنا مثلاً 20 – 30 سنة لما بيسألوا المستثمرين الكبار إيه أكتر القرارت اللي في حياتك اللي خلتك تعمل فلوس مش هنلاقي إن الناس بتقول أصل أنا مثلاً أشتريت السهم الفلاني لأ هنلاقي الناس بتقول إني اصلاً ابتديت استثمر أو إني فهمت إن في حاجه اسمها إستثمار أو إن أنا ابتديت أعمل عادت الإدخار أو إني ركزت في مجال معين وحبيته جداً وابتديت شركتي
القرارات الكبيرة في حياتك هي قرارات أنت مش متخيل هي قد إيه بسيطة مش الحاجه الصعبه إني مثلاً توقعت إن هيحصل مثلاً حرب وهيحصل تضخم في الدولة الفلانية فأنا روحت شاري الحاجه الفلانية مش دي الحاجه اللي هتعملني غني أو مش دي الحاجه اللي هتخليني عندي محفظة كبيرة ومع الوقت بتكبر ولكن الثبات على الإستثمار أو إن أنا فاهم أنا بعمل إيه أو عندي إستراتيجية طويلة المدى هو ده المهم ده بالعكس ده دي حاجه تطمن أي حد ممكن يوصل للمرحلة دي لأن الحاجات المطلوبة منك كمستثمر فردي مش حاجات معقدة وصعبة أنت زي ما مشينا في فئات الأصول دي كلها في حاجات كتير جداً أنت ممكن تعملها من غير اصلاً متضيع فيها وقت أو مجهود فالقرارات اللي بتغير حياتك كمستثمر هي قرارات بسيطة وأنت كمستثمر ممكن تاخد 200 قرار في حياتك هتلاقي 90% منهم اصلاً مبيأثروش على شكل الثروة بتاعتك في أخر حياتك ولكن القرارات الأساسية هي أهم بكتير جداً جداً جداً
فلو قولنا الـ 3 حاجات الملخص هنقول إبتدي حوش ، خلي عندك ميزانية ، واستثمر الإستثمار للتسهيل الـ 3 حاجات دول من وجهة نظري هما أهم 3 حاجات والباقي كله تفاصيل
26:17
يعني ختاماً كده عايز أقول متبقاس مهووس بإنك تدور على الحاجه الجديدة أو إيه الحاجه اللي هتفرقع أو إيه هو الفيسبوك القادم أو تسلا اللي جايه في الحقيقة وفي الواقع الموضوع بياخد وقت طويل خد قرارات مظبوطه ، أتحكم في وقتك متحطش طاقة في حاجه أنت مش عايز تحطها تاني الإدخار ، الميزانية ، الإستثمار دول الـ 3 حاجات اللي هسيبكم معاها وأشوفكوا الاسبوع الجاي وشكراً جداً على وقتكوا النهارده
Translation of some words and terms:
Concept مفهوم
Active نشيط
Dividends أرباح
Rent إيجار
Risky خطير
Cost تكلفة
Legislation تشريع
Asset class فئة الأصول
Doubt شك
VC (venture capitalist) المشروع الرأسمالي
Cryptocurrencies عملات مشفرة
Startups الشركات الناشئة
Deposits الودائع
Guarantee ضمان
corporate bonds السندات على الشركات
Statement بيان
ETFs صناديق المؤشرات المتداولة في البورصة
Commodity سلع
Managers المديرين
Hacking قرصنة
cyber security الأمن الإلكتروني
Formula معادلة
Assumptions إفتراضات
Property عقار
Paranoia جنون العظمة
Business شركة
Trade off التنازل عن ميزة ممن أجل الحصول على أخرى
Structure هيكل
Free zone منطقة حرة
Tax incentive حافز ضريبي
Advisors المستشارون
Advertising دعاية
Service خدمة
Tax Reporting إقرار ضريبي
Regulator منظم
Finance المالية
Business Owner صاحب الشركة
Budget ميزانية
Spending الصرف
Full Time متفرغ
Saving ادخار
Inflation تضخم
Consistency الثبات
Wealth ثروة
Obsessed مهووس
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #العائد_على_ المجهود # إعادة