118. الإستثمار طويل الأجل vs المضاربة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهارده بنتكلم على موضوع لطيف أتسألنا عليه من أحد المستمعين هو المضاربة والاستثمار طويل الأجل والفرق ما بينهم، ناس كتير بتفتكر ان المضاربة كاسم هي حاجه غلط او حاجه وحشه ولكن المضاربة أو التداول اليومي هو نوع من أنواع الاستثمار.. في حلقة النهاردة بنقارن سريعاً بين المضاربة والاستثمار طويل الأجل، ايه مزايا وايه عيوب كل نظام ومين اللي هيستفيد من كل نظام
(03:22) أي نظام في الدنيا له مزايا وله عيوب -
(04:21) مميزات المضاربة -
(07:02) عيوب المضاربة -
(11:42) مميزات الاستثمار طويل الأجل -
(13:00)عيوب الاستثمار طويل الأجل -
(15:34) تلخيص سريع -
بنفكركم ان على موقعنا الإلكتروني عملنا "منطقة اعضاء" مكان خاص للناس اللى بيسمعونا هتلاقوا عليه مجلة كلام ينور الإلكترونية وهنحط كمان مقالات للناس اللي بتحب تقرأ عشان المحتوى ميبقاش بس مسموع وان شاء الله في مشاريع تانية عايزين نعملها للمستمعين هنبتدي نصدرها على الموقع مع الوقت فادخلوا سجلوا لو لسه مسجلتوش عشان يوصلكم إيميلات بالجديد على موقعنا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
دايما عايز افكر الناس اللى بيسمعونا ان احنا على الموقع بتاعنا عملنا حاجه اسمها "منطقة اعضاء" مكان خاص للناس اللى بيسمعونا ابتدينا ننزل عليها حاجات اول حاجه عملناها نزلنا مجلة معانا فيها اثنين ممولين الاهلي ممكن وأكت فايننشال المجله دي هنصدر فيها تحديثات تحصل كل ربع في كلام ينور هنحط شويه مقالات للناس اللي بتحب تقرا برده عشان ما يبقاش المحتوى بس مسموع وان شاء الله في مشاريع تانية عايزين نعملها للمستمعين هنبتدي نصدرها على الموقع فلو انت مش مسجل انت بتحتاج تحط الايميل و الباسورد بتاعك الباسورد مش بتاع الايميل طبعاً وباسورد الخاص بكلام ينور زي اي نظام وبرده مع الوقت ان شاء الله هنبتدي ننزل حاجات تانيه للناس فاللي متابعين هناك هنبعتلهم ايميلات وهيبقى في تواصل من خلال التسجيل ده
(01:52)
النهارده انا عايزه اتكلم كده على موضوع اتسالت فيه برده قريب من أحد المستمعين وهو موضوع لطيف موضوع المضاربة والاستثمار طويل الأجل الفرق ما بين الحاجتين الفرق ما بين مين ده ومين ده انت مين فيهم اللي بتسمعني او حضرتك اللي بتسمعيني في ناس عايز تبقى الكارير بتاعها بشكل معين النظام اللي هينفع معاها المضاربة مش حاجه وحشه كاسم يعني ممكن الناس تفتكر ان هي حاجه غلط او وحشه بدل بالعكس المضاربة أو التداول اليومي نوع من انواع الشغل عادي زي اي شغلنا
زي التجار لو قلنا ان في تجار بتشتري وتبيع على طول يعني واحد مثلا بيشتري بضاعه معينه بيحطها في محل عنده اسبوع او اتنين ويبيعها وبيعمل عليها هامش ربح معين، في البورصة أو في الاستثمار اللي فيه سيوله عاليه زي الأسواق المالية المضاربة هي عبارة عن انك انت بتاخد مراكز معينة وتتوقع سعر سهم مثلا معين هيطلع الاسبوع الجاي او الاسبوع اللي وراه او ممكن بكره الصبح او كمان كم ساعة وتبتدي تخش وتخرج فيه
المضاربة مش حاجه وحشه في ناس كتير ناجحة وبنت ثروات كبيرة من خلال المضاربه، والاستثمار طويل الأجل هو نوع تاني من الاستثمار واللي احنا دايما بننصح بيه الناس عشان أغلب المستمعين بتوعنا مش متفرغين.. عايزه اتكلم على النظامين دول ايه المزايا وايه العيوب اوضحهم من وجهة نظري البسيطة اللي ممكن تكون صح او غلط بس هي دي وجهة نظري ويا رب تكون حلقة مفيدة للناس
(03:22)
زي أي نظام في الدنيا له مزايا وله عيوب مفيش حاجه فيها مزايا فقط ومفيش حاجه فيها عيوب فقط، فكل نظام من الاتنين نقدر نقول ان في مزايا ولكن لازم تبقى فاهم وباني النظام الصح يعني في الحالتين لازم يبقى عندك النظام الصح لتحقيق النتائج
اختيارك لنظام من الاتنين او الخلط حتى ما بين الاتنين، يعني ممكن واحد يقول طب انا عايز 80% من محفظتي تبقى استثمار طويل الأجل و 20% مضاربة أو 50 و 50
الخلط ما بين الاتنين برده مش حاجه وحشه يعني مفيش حاجه ابيض او اسود.. لا انت في الاستثمار انت ممكن تختار النظام زي ما بنقول كل مره مش كل الناس زي بعض في ناس ممكن تختار الحاجه اللي هي مستريحلها، ممكن واحد يقول لأ ادي شخصيتي فأنا هعمل كده بالظبط مش عيب المهم ان انت تبقى حاطط نظام قوي في الناحيتين سواء انت مضارب أو سواء انت مستثمر طويل الاجل يعني النظام بالنسبة لي هو اهم حاجه
(04:21)
تعالوا ناخد المضاربة، المضاربة بتديك على المدى القصير مزايا اعلى من الاستثمار طويل الاجل ليه لان انت ممكن تبقى عندك مراكز معينة بنيها بنظام معين أو بطريق إدارة معينة بتحقق لك ارباح سريعة على المدى القصير فدي اول ميزه في المضاربة
طبعا احنا هنا بنتكلم على الأنظمة الناجحة مش بتكلم على ان واحد بيجرب بالحظ أو بيقامر أو بياخد مراكز من غير ما يكون عامل مجهود وراها والكلام ده كله لا انا هشيل الجزء ده من الناس انا بتكلم على اللي دارس وفاهم وباني نظام، وازاي نبني نظام ده قصه تانيه بس لو في حد عنده نظام مبني كويس ان هو يعمل مضاربة على المدى القصير سواء بقى بتحليل فني او تحليل مالي او متابعه اخبار او حتى بالفطرة أيا كانت الطريقة اللي انت بتشتغل بيها فهي بتحقق لك ارباح على المدى القصير
(05:23)
الحاجة التانية في النظام ده ان انت عندك شوية مرونة عندك دخول وخروج سريع فأنت مبيبقاش عندك التزام لقصه طويله الاجل بمعنى ان انا ممكن الشركة اللي انا بعمل فيها فلوس وممكن اكون عملت فيها فلوس كتير جدا ممكن بعد 5 أو 6 سنين متبقاش موجوده اصلا أو تفشل أو ميحصلش تطور انا مليش دعوة بالخطة طويلة الأجل بتاعتها انا مليش دعوة هما حققوا إيه بعد 5 أو 10 سنين انا كل اللي انا عاوزه الهدف بتاعي اتحقق في الفتره الزمنيه القصيره دي
(05:54)
الحاجة التالتة في المزايا بتاعه المضاربة إن أنت مبيبقاش عندك مخاطرات بالليل تاني يوم بقى عقبال ما نصحى او ناخد اجازه طويله، معندكش المخاطرة دي لان انت بتبقى فاتح وقافل المراكز بتاعتك في وقت قصير جدا فمخاطرة ان الحاجه تتغير في الإجازات أو يحصل حاجه في الشركة دي من بالليل لحد تاني يوم الصبح مش موجود، انت بتفتح وتقفل المراكز بتاعتك بسرعه وبتحاول تستفيد من الحركة السعرية الصغيره ممكن تبقى عدد من الساعات عدد من الدقايق وبتعمل ارباح من خلال الحركه دي
(06:30)
الحاجه كمان انها فيها شويه تشويق او ادرينالين أو فيها شوية تسلية لان الراجل اللي بيفتح التداولات وبيقفل اكتر بيبقى مستمتع شويه عن الراجل اللي بيقعد 10 20 سنة يستثمر يعني دي حاجه بنشوفها في المضاربين الشاطرين يعني اللي هم بيبقى عندهم دايما حماس مستنى يسمع اخبار الشركه الفلانيه عاوز يقرا اقتصاد، ففيها نوع من انواع التعلم المستمر وفيها نوع من انواع المتعه.. دي كده تقريبا المزايا بتاعه النظام ده
(07:02)
طيب لو اخدنا ايه العيوب هنلاقي ان هي طبعا فيها مخاطرة عالية جدا لو انت مش فاهم انت بتعمل ايه لان المدى قصير انت بتبقى مهتم جدا بالتوقيتات يعني انت لازم تخش تفتح حته معانا وتقفل المركز بتاعتك بسرعه لازم تبقى فاهم لو خسرت مثلا في المدى القصير لازم اعمل ايه ففيها مخاطرة عالية جدا
(07:26)
ثاني مشكلة في الموضوع ان هي تستهلك وقت طويل جدا يعني انا محتاج افتح الاسماء واتفرج عليها وهي بتشتغل كل يوم واتابع الاخبار لو حصل حاجه متغيره لازم اغير بسرعه اللي انا عملته وهكذا فهي تعتبر شغلانه
يعني انا النهارده الراجل اللي بيعمل مضاربة لازم اخليه يحسب كذا حاجه وهو بيبص على أرباح اخر السنه من وجهه نظري يعني لازم اولا طبعا احسب التكلفة، الفلوس طيب انا حطيت 100000 حطيت 50,000 ايه الفايدة السنوية لو انا مخدتش اي مخاطره مثلاً 5% فال 100 ألف دول فيهم 5%
اولا كده اللي لازم اعمله عشان دي تكلفة الفرصة البديلة بتاعتي لو انا ماخدتش مخاطرة، تاني حاجه لازم احسب دخلي السنوي اللي انا ضحيت بيه عشان اعمل مضاربة
يعني انا كنت هروح وظيفة تانية مثلا وهعمل 100000 في السنة فانا النهاردة بقيت التكلفة بتاعتي راس مالي اللي انا حطيته الـ 100 في 5 المفروض اخدهم من الفايدة اللي انا كنت هعملها وفي 100000 ضحيت بيهم في وظيفة اخرى
فأنا المفروض محفظتي في المضاربة تعمل 100% في السنه ده رقم كبير جدا ليه عشان تقدر تطلع فوق الـ 205 الـ 100 اللي انا ضحيت بيهم في الشغل والـ 5 فوايد يبقى 105 وراس مالي اصلا 100 يبقى 205
يبقى انا مهم جدا وانا مضارب ابقى فاهم انا ضحيت بدخل قد ايه بره عشان احقق المضاربة دي لازم احسب التكلفه دي وانا بفكر في المضاربة
(08:58)
طيب لو الرقم اكبر من كده لو واحد مثلا بيدور محفظه ب 5 مليون وداخله 100000 اللي ضاعها بيه وقتها ال 100000 دي على 5 مليون رقم مش كبير قوي كنسبة ولما احطهم هيعرف يعوضهم لو هو مضارب شاطر
يبقى انا لازم على جميع الأعمار على جميع المستويات في المضاربة واحد عنده خبره 20 سنه في المضاربة واحد عنده خبره 10 سنين لسه بيبتدي لازم احسب الدخل البديل لو انا هسيب كل حاجه في حياتي وهبص على المضاربة ودي اهم عيب من وجهة نظري الناس بتتجاهله قوي مش بتبص عليه يعني تكلفتي ايه عشان اعمل المضاربة دي انا ليا وقت وليا سعر في السوق فأنا ما اخدتهوش ورحت اعمل مضاربة لو حسبت الارقام دي ولقيت نفسك لسه بتكسب يبقى انت مضارب كويس
(09:52)
العيب التالت اللي موجود ان في حاجه اسمها عمولات التداول هنلاقي الراجل بتاع المضاربة عشان هو بيقفل وبيفتح مراكز على طول لازم ياخد باله ان هو بيدفع عمولات في كل عملية، العملات دي ممكن تكون كبيره جدا جزء كبير من الأرباح بتاعته هتروح في العملات يبقى انا لازم ابقى فاهم ان وانا بصمم النظام بتاعي انا هدفع قد ايه عملات هدفع قد ايه من وقتي وهحسب كل التكلفه دي واعمل ميزانيه كويسه عشان ابقى عارف وانا داخل التداولات بتاعتي المفروض اكسب قد ايه
لان في الاستثمار طويل الأجل لما هنروح لها هنلاقي ان انت مبتعملش العمليات الكبيرة دي لانك بتشتري ومش بتبيع، بتقعد فترات طويلة مبتدفعش تكلفة ولكن الراجل اللي عنده محفظة ب 100 مليون او 5 مليون هو ممكن يكون بيدور المحفظه بتاعته كذا مرة خلال السنة بيبيع ويشتري اكتر من الـ 100 الف بتاعته دي بكذا مره فبيدفع عليها عملات كبيرة
الحل في الحته دي ان انت بتحاول تنقي لو انت بالذات مضارب تنقي منصات أو شركات المعاملات بتاعتها واطيه
(11:02)
الحاجه كمان الاخيره العيب ان انت بيبقى عندك ضغط نفسي من الاسواق الاسعار بتطلع وبتنزل المحفظه بتاعتك قيمتها بتتغير كتير جدا كل يوم فأنت بتشوف مكاسب كتير وخسارات، عمليات غلط وعمليات صح وهكذا فانت هنا غصب عنك عندك ضغط او عندك شغلانة متعبة للأعصاب ليه لان الحركة على المدى القصير بتبقى سريع جدا غير المدى الطويل انت ممكن تبقى اه بتخسر وتكسب على المدى الطويل ولا هي كانت حركات بتبقى بطيئه واسهل ان انت تخدمها واسهل ان انت تعيش معاها كمستثمر
(11:42)
لما هنروح بقى للاستثمار طويل الاجل هنلاقي ان مفهوم المضاعفة بيظهر اكتر في الاستثمارات طويلة الأجل لان انت بتعمل أرباح وبتاخد الأرباح ببساطة تحطها في استثمارات تانيه طويلة الأجل وهكذا فبيحصل مضاعفة وعملنا حلقة كاملة عليها قبل كده
(12:00)
الميزة اللي هي كانت عيب في المضاربة أن مصاريف التداول بتاعتك قليلة لان انت بتشتري عمليات قليلة مبتدفعش الكميات اللي انت بتدفعها في المضاربة فالعيب ده اللي كان موجود في المضاربة النهارده هنا بقى ميزة
(12:17)
نفس الكلام في استهلاك الوقت، الاستثمار طويل الأجل زي ما قولنا قبل كده مش بتحتاج لا وقت ولا مجهود أنا ممكن أعمل أتمتة لما مرتبي ينزل باخد جزء منه 10% بوديه في البنك يروح لشركة سمسرة وشركة السمسرة بتشتري على طول اوتوماتيك فأنت هنا مفيش اي مجهود مفيش اي حاجة انت بتعملها زياده عن ان انت بتعمل أتمتة للاستثمار طويل الاجل بتاعك
(12:41)
الميزة الرابعة ان انت هنا معندكش اي نوع من انواع الذبذبة الكبيرة اللي بتخليك خايف او قلقان على محفظتك لان الاداء بتاع المحفظه بتاعة الاستثمار على المدى الطويل بتبقى اسهل بكتير ان انت تستحمله عن تداول اليوم
(13:00)
من عيوب الاستثمار طويل الأجل هو مش عيب قوي على قد ما انت لازم تظبط نفسك ان ده يكون جزء من تفكيرك ان انت ممكن تاخد سنين وممكن اكتر من كده ممكن تاخذ 10 او 15 سنه عبال ما تتخيل حجم محفظتك ده ممكن يوصل لحاجه معينه انها تبتدي تدخلك دخل كبير الموضوع بياخد وقت
يبقى هنا مشكلة الاستثمار على المدى الطويل إن هو نتايجه او جني الثمار بتاعته بتاخد وقت طويل جدا انت مبتشوفهاش وانت مخك مش مجهز ان هو يشوفها النهارده يعني انا النهاردة بقولك استثمر 15 سنة، 20 سنة انت مستحيل تفكر انا هقعد 15 سنه وبعدين هاخد فلوس فالموضوع صعب في تخيله فتنفيذه كمان بيبقى صعب
(13:52)
نفس الكلام على السيولة بتاعة الاستثمار طويل الأجل، انا النهارده حبست نفسي في استثمارات 10/ 15/ 20 سنه الناس دايما بتبقى عايزة تمسك كاش في ايديها او تحس ان هي عملت حاجة فالسيولة بتاعه الاستثمار طويل الأجل لو انت عاوز تبقى الناجح صعب جدا ان انت تحافظ عليها فأنت نفسياً عايز اصرف وفي نفس الوقت عايز استثمر.. فازاي تمرن مخك أنه لا الفلوس دي متشاله لحاجة قدام فده طبعا ده إلزام، نظام لازم تعمله ما بينك وبين نفسك فالسيولة هنا تعتبر واطية جدا في الاستثمارات طويلة الأجل
(14:29)
الحاجه التالته ان انت تخلي نفسك ملتزمة بنظام لمدد طويلة ودي انا بشوفها من اصعب الحاجات اللي الناس بتعملها ودي من اكتر الحاجات اللي بتخلي الناس تفشل في الاستثمارات طويلة الأجل انا عايز اعمل حاجه سريعه انا عايز اجني أرباح بسرعه عشان كده في جزء كبير جدا من الناس بيروح ناحية المضاربة ولكن بيكتشف مع الوقت برده ان هو ممكن ميبقاش مجهز انه يضارب
زي ما بيقولك انت لازم تتمرن 10 سنين عشان تحقق ميدالية اولمبية او زي ما انت المفروض تاكل بطريقه كويسه عشان توصل لهدف معين إن في سن معين جسمك يبقى بشكل معين او ايا كان الحاجات الطويلة اللي بتزهق اللي مش بنشوف نتايجها النهارده فدي من عيوب الاستثمار طويله أجل ولكن لو انت عملتها وفهمت نفسك ان دي حاجه مؤقته هتقعد اه سنين ولكن الثمار بتاعها هتجنيه في يوم من الايام العقلية بتاعتك بتتغير تماما في حته الاستثمار طويلة الأجل
(15:34)
خلينا كده نلخص سريعا احنا اتكلمنا على المضاربة والاستثمار طويل الأجل خلينا نلخصهم كده اكنهم في جدول كده قدامك لو قولنا الوقت المتداول فيه المضاربة بتبقى في وقت قصير، كذا ساعة الاستثمار طويل الأجل بيبقى في شهور وسنين وسنين طويلة كمان فده الفرق الزمني ما بين الأتنين ايه الاكل جاهز
طيب الأرباح، المضاربة بتبقى قصيرة الأجل، الاستثمارات طويلة الأجل بتبقى بطيئة وتدريجية وفترة طويلة
طيب المخاطرة هنلاقي إن المضاربة المخاطرة بتاعتها أعلى لأن فرص انك تغلط أكتر بكتير وهنلاقي أن الاستثمار طويل الأجل المخاطرة بتاعته أقل لأن انت بيبقى عندك نظام منظم ماشي فيه فالمخاطرة بتاعته على المدى الطويل بالنسبالي هو أقل
الوقت اللي انت بتبذله في الإتنين هنلاقي ان المضاربة وقت طويل جدا كل يوم ولكن الاستثمار طويل الأجل انت ممكن تقعد شهور ومتبصش على المحفظة اصلا انت بتحط استثمارات وبتنسى
طيب التكلفة هنلاقيها عالية جدا في المضاربة وواطيه جدا تقريبا مش موجوده في الاستثمار طويل الأجل
المراقبة أو بتبص على المحفظه كل قد ايه هنلاقي في المضاربة بتبص على المحفظة كل يوم، كل ما بتحط مراكز، الاستثمار طويل الأجل أنت ممكن تبص على محفظتك كل أول سنة، كل 6 شهور، كل 3 شهور ولكن مش مطلوب منك تبص كتير
نفسياً المضاربة عايزة تتحمل الضغط أو تتحمل عاطفيا اللي بيحصل أكنك بتسوق عربية بسرعة في شارع زحمة، ولكن الاستثمار طويل الأجل انت ممكن تاني متبصش خالص
المضاعفة، الاستثمار طويل الأجل مبني جوه المضاعفة انت بتاخد الأرباح من هنا وتحطها هنا المضاربة انت بيبقى عندك مصاريف كتير وممكن تبقى بتطلع كل شوية دخلك لأنك بتشتغل فقط الموضوع ده فالمضاعفة ممكن متحصلش على المضاربة لأنك محتاج تصرف على بيتك وعلى مصاريفك والكلام ده كله فلازم تخرج الفلوس على طول
التذبذب أو المخاطرة هنلاقي إن التذبذب في المضاربة أعلى بكتير ولكن في الاستثمار طويل الأجل بتبقى أقل
السيولة، تقدر تاخد فلوسك يوميا من الحساب المضارب لان انت عندك كاش دايما او بتخش بتخرج بسرعه، لكن في الاستثمار طويل الأجل انت بتحبس فلوسك لفترات طويلة
المضاربة معموله لمين؟ معموله لواحد عنده خبره في الاسواق، تاجر، عنده احتمال، عارف هو بيعمل إيه، عنده نظام النظام ده ممكن يبقى حاطت قوانين معينة بيخش ويخرج عليها زي الاخبار او التحليل المالي أياً كان اللي انت بتسخدمه ولكن الاستثمار طويل الأجل لأي حد ممكن تبقى غير مجهز ومعندكش أي معرفة باللي انت بتعمله ولكن بتحط باستمرارية جوه نظام معين من غير متابعة ومن غير مجهود كبير ومن غير معرفة انت ممكن تعمل نتايج كويسة جداً على المدى الطويل
آخر حاجة أنت ممكن تبتدي إيه صغير، وممكن تبتدي إيه كبير؟ اعتقد الاستثمار طويل الأجل ممكن تبتدي بمبالغ صغيرة جدا ومع الوقت هي هتكبر ممكن تحط حاجه مبلغ كل شهر او كل ربع او كل سنه بالراحه المحفظه بتكبر ولكن المضاربه لو حجمها صغير زياده عن اللزوم ومرتبك عالي او اللي انت بتفقده في الوظيفه عادي فالمعادله بالنسبه لي هتبقى خسرانه فمع الاسف المضاربه لما بتبتدي صغير بتبقى صعبه انها زي ما بيقول او تبقى جايبه ثمن الوقت اللي انت حاطه فيها فدي بشكل عام كده سريعا ايه الفرق ما بين المضاربه وايه الفرق ما بين استثمار الطويل الاجل ثاني انا هنا مش عايز او بقرر الموضوع ما فيش سيستم ما فيش نظام احسن من الثاني ما فيش ده ده كويس والله ده وحش في ناس ناجحه هنا وفي ناس ناجحه هنا الاغلبيه العظمى يمكن اسهل لها الاستثمار طويل الاجل وده عبر التاريخ وعبر الاحصائيات شفناها مئات المرات ان المستثمر حتى لو معندوش معرفه بالاسواق ولكن بيستثمر في محفظة من الاسهم متنوعة في اسهم عالية الجودة ملهاش دعوه باقتصاد واحد او بلد واحده المستثمرين دول على المدى الطويل بيعملوا اداء كويس جدا بيحفظوا فلوسهم ضد التضخم المضاربين في منهم كويسين جدا وفي منهم عملوا فلوس كتير جدا وفي منهم قصص وفي منهم ناس مكتوبه عنهم كتب وكل الكلام ده، في ناس بيشتغلوا في صناديق استثمار وفي صناديق استثمار اصلا مخصصه فقط للمضاربه او تداول عالي التردد
فالقصتين ناجحين القصتين فيهم ناس مبيعرفوش ينجحوا لاسباب أن النظام بتاعهم خاطئ فمن خلال الحلقه دي بس انا عايز اقول ان انت مهم جدا تعرف انت عايز ايه وعايز تستثمر ازاي وايه المناسب ليك ممكن في واحد يبتدي 100% استثمار طويل اجل ومع الوقت يحط حته من محفظته صغيرة في المضاربة اول حاجه قصيرة الأجل ومع الوقت يشوف ايه الاحسن بالنسبة له ولكن لازم تبقى حاسب التكلفة زي ما اتفقنا او زي ما اتكلمنا ازاي المضاربة بتاخد من وقتك وايه التكلفة الحقيقية للمضاربة عشان تاخد القرار الصحيح
(21:17)
يعني انا سريعا كده غطيت الموضوع ده ممكن ياخد وقت طويل اكتر بكتير اكيد اتكلم فيه عشان في تفاصيل جوه كل حاجه ولكن حبيت بس ادي النقط المهمة ويا رب تكون بس موجهه للناس في حتت معينه لو هي مسمعتش عن المضاربة قبل كده لو مسمعتش عن الاستثمار طويل الأجل تبقى حاجه مفيده ان انت تبتدي تفهم الاثنين، ممكن تقرأ كتب عنهم وممكن تشوف انت عايز ايه وتوجه مجهودك الناحيه دي.. شكرا جدا جدا على وقتكم وان شاء الله اشوفكم الاسبوع الجاي
Translation of some words and terms:
Updates التحديثات
Day Trading التداول اليومي
Liquidity سيوله
System النظام
Mixing خلط
Flexibility مرونة
Commitment التزام
Excitement الإثارة
Trades التداولات
Risk مخاطرة
Short Term قصيرة المدى
Time Consuming تستغرق وقتا طويلا
Transactions Cost عمولات التداول
Automation أتمتة
Table جدول
Time Horizon الأفق الزمني
Gradual تدريجي
Long Term طويل المدى
Monitoring مراقبة
Stress الضغط النفسي
Emotionally عاطفيا
Compounding يضاعف
Trader تاجر
Tolerance احتمال
Inflation التضخم
High Frequency Trading تداول عالي التردد
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #المضاربة #الاستثمار_طويل_الأجل