137. حوار مع محلل فني - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
حلقة جديدة مع ضيف جديد منورنا في كلام ينور أ/ هيثم عبد السميع، عضو مجلس إدارة الجمعية المصرية للمحللين الفنيين ورئيس لجنة الخريجي
بنتكلم مع أ/ هيثم على مدار حلقتين عن التحليل الفني، إيه هو والهدف منه وازاي انضم للجمعية المصرية للمحللين الفنيين لو حابب اتعلم او اشتغل فى المجال ده
https://www.youtube.com/@zoka2020 :تابعوا قناة أ/ هيثم على اليوتيوب
https://www.estaegypt.org/ :الجمعية المصرية للمحللين الفنيين
:في الجزء الأول
(02:40) الجمعية المصرية للمحللين الفنيين، تأسست ليه؟ وتأسست امتى؟ -
(07:05) إيه هو التحليل الفني؟ -
(11:24) المستثمر النشط هو اللي بيستخدم التحليل الفني؟ -
(12:10) هل الجمعية لسه بتقدم كورسات لتعليم التحليل الفني؟ -
(14:24) هل دراسة التحليل الفني بيفتح المجال في السوق كمستثمر أو كموظف؟ -
(19:58) هل المحلل الفني بيشتغل في اي سوق فيه عرض وطلب؟ -
استنوا الجزء الثاني من لقائنا مع هيثم الخميس القادم بإذن الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة انا معايا هيثم عبد السميع انا مبسوط جداً جداً انه اداني من وقته النهاردة هيثم من أوائل الناس اللي قابلتها في حياتي في المجال ده وهنحكى كده قصة سريعة لما ندخل في الحلقة
عايز بس الأول أرحب بيك يا هيثم، وشكراً على وقتك معانا
هيثم: اهلاً بيك يا عمر، حبيبي يا عمر متشكر ليك انك استضافتني معاك وده شيء يشرفني متشكر ليك جداً
عمر: هي برضه قصة مش عارف انت فاكرها ولا لأ بس أنا اول يوم كنت بدور فيه على حاجه اسمها الجمعية المصرية للمحللين الفنيين لما دخلت الجمعية اليوم ده أول واحد قابلته اليوم ده كان انت مش عارف انت فاكر ولا لأ واخدتني من أيدي وابتدت بقى الرحلة الكبيرة في مجال التحليل الفني اللي انت كان ليك دور كبير فيها، بقالنا كتير متكلمناش يمكن
هيثم: بس انت شاطر من يومك يا عمر
عمر: لا والله، انت من الناس اللي بجد من أوائل الفترات بتاعتنا هنتكلم عن الجمعية برضه وايه اللي بيحصل في الجمعية والكلام ده كله، بس من أوائل الناس اللي أخدت بأيدي وعرفتني على المجال النهاردة انا بتكلم على التحليل الفني لأول مره في البودكاست ومبسوط جداً انك ضيف معانا النهاردة
هيثم: وانا كمان
(02:33)
عمر: هسألك برضه انت عضو مجلس إدارة في الجمعية؟
هيثم: بالظبط
عمر: تعالى نبتدي ايه هي الجمعية المصرية للمحللين الفنيين، تأسست ليه وتأسست امتى؟ لأن مش هنعرف ناخد تاريخ جمعية من حد احسن منك يعني
هيثم: طيب، خليني اقولهالك بطريقة مختلفة شوية المرة دي انا كنت طالب في كلية تجارة جامعة القاهرة وكنت بحب اتابع اوي البورصة، وكان اتجاهي كله انا عايز اطلع بفهم في الميزانيات والموازنات والأرباح والخسائر والكلام ده كله زي ما بندرس في الكلية، التحليل الأساسي وبتابع الجرايد كويس اوي، الجرايد مشهورة وقتها وبعدين فوجئت ان في فقرة اسمها تحليل فني واحد اسمه مهاب نبيل، مهاب واحد من مؤسسي الجمعية المصرية للمحللين الفنيين بالمناسبة، اتجننت لما شفت المشهد ده في حاجه اسمها تريند لاين، وحاجه احصائية جميلة جداً انبهرت بالموضوع مكدبتش خبر، الموبايلات مكنتش منتشرة وقتها رحت متصل بالتليفون على الجرنال لقيت اسم حازم شريف صحفي، قولتلهم انا عايز حازم شريف، قالولي مين حضرتك قولتلهم انا واحد من القراء قالي انت عايز ايه، قولتله عايز اوصل للشخص ده، قالي انت قريت ومتابع قولتله ومتابع حضرتك ومقالاتك وبالامارة قلت كذا، وبالمناسبة هو لسه فاكر لحد النهاردة انا قابلته من اسبوعين في النادي هو فاكر لحد النهاردة الموقف ده من 98 من 25 سنة، هو دلوقتي مؤسس جورنال لوحده انبهر وقال معقول لسه طالب في الكلية، قولتله انا عاجبني اوي الموضوع ده وعاجبني الحلقات اللي نزلت، كان بينزل حلقة اسبوعياً بدأ يشرح مفهوم التحليل الفني مره، وبعدين مفهوم التريند والتريند لاين، إيه يابن الحلال إيه الكلام اللي انت بتقوله ده مختلف خالص، هو ده بيتطبق في البورصة.. طيب انا عايز افهم
روحت قابلت مهاب نبيل، الراجل اخد بأيدي واداني كتاب وقالي الكتاب ده ممكن تذاكره وبعد كده كله اختفى الناس كلها اختفت، عجبني الكتاب وقريت فيه وكتاب حلو بس الناس كلها اختفت راحت فين، لغاية لما عملت بحث على النت لقيت حاجه اسمها الاتحاد الدولي للمحللين الفنيين
Ifta.org
لقيت علم مصر، ولقيت جمعية تحت التأسيس يعني انا لفيت ووصلت للجمعية من بره عن طريق الاتحاد الدولي
عمر: يعني عرفت عن الجمعية المصرية من بره
هيثم: لقيت اول رئيس مجلس إدارة في تاريخها كان عمرو دبوس، ونائب الرئيس كان أيمن واكد، بعتلهم إيميلات برضه محدش رد عليا، وبعد كده قالولي انهم موصلهمش الايميلات دي.. طيب اعمل ايه اوصل ازاي.. قابلت حد بالصدفة قولتله انا نفسي ادور على تحليل فني قالي انا اعرف واحد اسمه أيمن واكد قولتله أبوس ايدك وصلني ليه.. أرجوك
وصلني بيه وطلع ساكن جانبي في المهندسين مسافة قريبة اوي و تقابلت معاه والراجل استغرب قالي انت بتتكلم بجد انت متابع، قولتله اه وفاتح مواقع بشوف فيها الدنيا ماشيه ازاى والكلام ده كله كان ساعتها الياهوو فاينانس هو المصدر الوحيد لمعلوماتي عشان ادور على الرسوم البيانية واشوف الدنيا ماشيه ازاي بس هو الراجل أخد بأيدي وراح مضاني على عضوية تأسيس الجمعية اخدت العضوية رقم 11 والـ 10 الأوائل تقريباً مفيش حد منهم فاضل دلوقتي غير أيمن واكد وصالح ناصر الباقيين اما توفاهم الله رحمة الله عليهم استاذ محمد زاد واحد من العمالقة، يا إما سابوا المجال اصلاً والكلام ده كله فكنت العضوية رقم 11 في الجمعية لحد النهاردة واتعلمت وتأسست والكلام ده كله ـ
التأسيس الرسمي للجمعية كانت سنة 2000 بس من 1998 لـ 2000 كانت رحلة البحث
عمر: هايل، رحلة البحث عن الجمعية المصرية، الجمعية تأسست في مجال التحليل الفني يعني هي مركزة في التحليل الفني صح كده؟
هيثم: بالظبط، بدايتها كانت كده
(06:52)
عمر: تعالى نعرف تعريف بسيط وسريع إيه هو التحليل الفني؟
هيثم: التحليل الفني في تعريفات كتيرة جداً جداً بس انا التعريف ده اكتر تعريف بحب اقوله هو دراسة لسيكولوجية الناس ببساطة، دراسة لنفسية الناس المتعاملين، بص يا عمر انا واصلني استنتاج من الكتب اللي قريتها من فطاحل المجال زي جون ميرفي أو مارتن برينج الناس دي، وصلت لمفهوم انا شايفه شيء منطقي طول ما انت حاطط في مجال البورصة طلب شراء أو بيع انا مش شايفك، لكن بمجرد ما تنفذ انا شوفتك انا عرفتك صح كده ده المنطق، طالما انت حاطت طلب شراء او طلب بيع مفيش طالما نفذت يبقى انت في أكشن اخدته، والأكشن ده مهما كنت دارس ايه ومجهز ايه وحاطط كل احتياطاتك إلا أن في جزء نفسي مأثر عليك انك تقوله، طمع خوف اي حاجه اليوم مودك مكنش كويس، النهاردة مودك حلو جداً فأنت بتشتري بزيادة اياً كان في حاجه نفسيه متأثر بأحداث اجتماعية، احداث اقتصادية، واحد اتصل بيك وقالك خلي بالك في حاجه هتحصل، في سهم هينزل، أرباح هتقل هتزيد، في الاخر بعد ما تكون مجتهد وبتذاكر كل حاجه تخص السهم ده قرارك وقت الشراء أو البيع عبارة عن دراستك + انفعالك يبقى في انفعال في الموضوع في سيكولوجي في الموضوع
طب اشوفها ازاي في حاجه اسمها عقلية الناس بتعبر عنها عن طريق قرارات الشراء والبيع وده اللي بيحصل بشكل إحصائي ببص ألاقي الناس دي انا مش لازم اعرفها شخصياً، مش لازم اعرف شخص شخص بينفذ في البورصة بس، بس عقلية الجمهور أو المجموعة هي دي اللي بتبان لي في شكل إحصاء، شكل بالتفصيل بقى ممكن يكون بالتخطيط الشريطي أو الشموع اليابانية اياً كان بس اعرف اقرأ بناءا على البيانات السليمة بعيدا عن اي حاجة تانية اشوف بيانات سعر وقيمة ودول اهم بندين موجودين في عالم التحليل الفني فده التعريف البسيط
(09:40)
عمر: فأنت بتدرس المعطيات اللي جيالك من السعر وكمية التداول وبترجم منها نوع معين من الأحاسيس سواء خوف، جشع، فرحة اياً كان بترجمها بطريقتك كمحلل فني.. مظبوط كده؟ بتدرس او بتعمل زي تحليل زي تحليل الدم بدور على حاجه في الدم فبعمل نوع معين من التحليل
هيثم: أو تحليل نفسي، التحليل النفسي في اجهزة انا شوفتها بعيني بترسم خريطة للدماغ ويقراها ان استغربت ساعتها لما ناقشت الدكتور ايه الإشارات دي كلها فهو بيحاول يترجم السيكولوجي وبعديها بقى دي نقطة مهمه، التحليل الفني بيعمل استراتيجي اذا كان في شراء بيعمل هدف وإيقاف الخسارة مينفعش يسيبك يقولك اشتري ويسكت ولو في بيع يبقى في بيع وعشان هنزل للرقم كذا فهيبقى إعادة الدخول بتاعتي فين اذا في التحليل الفني بعد مابذاكر السهم، السند، السلعة، الكلام ده كله باجي احط استراتيجي شغل مينفعش اسيبها عايمة، مينفعش الموضوع يتساب كده لازم استراتيجي شغل انت قايم عليه
عمر: احط استراتيجية للتداول
هيثم: بالظبط كده
(11:12)
عمر: تمام ودي طبعاً للمستثمر النشط اللي بيتداول وبيشتري ويبيع على فترات زمنية قصيرة او فترات زمنية طويلة؟ يعني ده ميعتبرش مستثمر سلبي ده يعتبر مستثمر نشط اللي بيستخدم التحليل الفني مظبوط كده؟
هيثم: بالظبط، هو للأمانه التحليل الفني بيشمل كله، بس يعني النشط اللي بيستثمر على المدى القصير عنيه اكتر بتبقى على التحليل الفني، بس اللي مستثمر على المدى الطويل أو المتوسط بيستخدموا التحليل الفني في بداية الموضوع ونهايته اللي هو ممكن ياخد شهور وسنين بالنسبالهم، لكن النشط ده بيبقى كل يوم قاعد معانا
(11:59)
عمر: تمام، طيب قبل ما اخرج من موضوع الجمعية، عايز اسأل الجمعية بتدي كورسات وانا كنت من اوائل الناس اللي اخدت كورسات في الجمعية فبرضه الناس اللي عايزة تدرس تحليل فني لسه الكورسات موجودة الناس اللي عايزة تدرس تحليل فني تقدر تتواصل مع الجمعية وتقدر تاخد كورسات لحد النهاردة؟
ceta هيثم: بالظبط، الموضوع توسع بطريقة كبيرة جداً الشهادة اللي بتصدرها الجمعية المصرية للمحللين الفنيين اسمها
الشهادة دي بقت قوية جداً على مستوى العالم لدرجة أن الاتحاد الدولي بيعادلها بشهادته وده مش موجود في العالم كله غير في جمعيتين تانيين يعني هما 3 جمعيات على مستوى العالم منهم الجمعية المصرية للمحللين الفنيين اللي الشهادة بتاعتهم
ceta تقدر تكتب جنب اسمك
اللي هي خاصة بشهادة الاتحاد الدولي يعني اللي بياخد الشهادة من مصر يبقى اكنه أخد شهادتين في وقت واحد، والشهادة بتاعة مصر مرهقة جداً
عمر: يقدر يعادلها بالشهادة بتاعة بره
هيثم: هي بتتعادل، احنا بنقول بالموضوع ده وبنعادلها، واخدين موافقة من الاتحاد الدولي، بس خلي بالك الشهادة المصرية قوية لدرجة انها مرهقة فعلاً لازم تركز جامد جداً جداً في المرحلة الأولى والتانية والتالتة احنا بناخد 3 سنين عشان نتخرج انت بنفسك عشت اللحظة دي
الانضمام للجمعية والكورسات سهل بأمر الله يعني الدنيا أسهل من زمان بكتير في
ده الموقع الرسمي في ابكليشن بتملاه وبتقدر عن طريقة تتواصل مع الجمعية، طبعاً موضوع الحضور مهم جداً بالنسبالنا، الدنيا تطورت وبقى في زوم اونلاين موجود بس يعني في محاضرات بتطلب وجود المحاضر قدام الناس مخصوص عشان الناس تفهم اكتر واكتر التواصل برضه مزال مهم دلوقتي رغم التطور اللي احنا فيه يعني
عمر: تمام، احنا كده كده هنسيب اللينك بتاع الجمعية في الشو نوتس عشان الناس اللي عايزة تشوفه تقدر تلاقيه في الشو نوتس
(14:15)
عمر: طيب انا عجبني موضوع التحليل الفني وحسيت اني عايز ادرس فهكلم الجمعية ده بيفتح لك مجالات تقدر تشتغل في السوق كمستثمر أو كموظف مظبوط؟ يعني في شركات بيطلبوا إدارات تحليل فني صح كده
هيثم: بص هقولك على حاجه الجمعية ساعة ما بدأت كان هدفها تعليمي فقط، مكنش في خيال الناس اللي أسست الجمعية اكتر من كده هما كانوا عايزين يوصلوا بلدهم ويوصلوا المجتمع بتاع البورصة لحاجة تعليمية قوية جداً وربط المجتمع البورصة هنا بالمجتمع العالمي كله بوسيلة للاستثمار او أداة من أدوات الاستثمار القوية جداً اللي اسمها التحليل الفني مكنش في خيالهم أكتر من كده
لكن بعد كده الموضوع زاد قوة والجمعية زادت قوة سواء داخلياً او خارجياً لدرجة ان بقينا بنطلب بالاسم، لو سمحت مش هينفع اعمل قسم للتحليل الفني عندي غير من الجمعية المصرية للمحللين الفنيين صدقني احنا وصلنا آخر كام سنة الشركات بتتصل بالناس القديمة زيي وزي ناس تانية، بتتصل مش بس ترشحولنا، او تبعتولنا السي في بس لأ انتو اللى هتعملوا الاجتماع بتاع الناس دي بجد ده حصل لدرجة أن المجتمع بتاعنا بقى قوي وعايز أقولك كل ما ينزل تصنيف لشركات السمسرة بينزل كل شهر باجي أبص ابقى فرحان لاني بلاقي تقريباً اول 30 شركة بيستحوذوا تقريباً على 90% من حجم التداولات في السوق المصري، أول 30 شركة كلهم انا عارفهم بالاسم بحكم ان الواحد قديم في السوق شوية عارف المحللين الفنيين اللي في الشركات دي واعرفهم شخصياً يعني كلهم خريجي الجمعية المصرية للمحللين الفنيين ده اداك قوة وخلى الشركات الكبيرة والصغيرة لما تيجي تتكلم في التحليل الفني آه قولنا بس الجمعية المصرية للمحللين الفنيين دي أدت قوة جامدة للجمعية دي حاجه
الحاجة التانية فعلاً زي ما انت قولت بقى في طلاب بيحبوا يعملوا دراسات عليا وفي دراسات خرجت عن طريق انهم بيجوا يقوللنا احنا عايزين ندخل في الرسايل بتاعتنا التحليل الفني ندخل ازاي، عايزين نتعلم منكم علمونا
الحاجة التالتة بقى موضوع المستثمر، مهم جداً انه يبقى واعي ومتعلم وعلى دراية كافية باللي بيعمله، لانه اكتر واحد بيخص الحشد ده جزء من السيكولوجي بتاعة الجمهور والأفراد اللي بيكونوا مجموعات، بنعلمه وانت اكيد درست الحته دي وعارفها انك تحاول تفصل عن الناس دي كلها ويبقى ليك قرارك لوحدك وتذاكر لوحدك البيانات وتقدر تبني الاستراتيجية اللي تخصك
عمر: تخص حالتك، تخص حالة محفظتك واهدافك اللي انت عايز تحققها
هيثم: بالظبط، أهدافك الاستثمارية والمادية انت اللي تقرر بنفسك ازاي انا بعلمك ازاي، اما التفاصيل اللي تخصك مادياً وزمانياً دي بتاعتك انت وبالمناسبة في تطور جديد يعني الفترة الجاية هيبقى في مفاجأة كويسة اوي الفترة الجاية هيبقى في نوع من الشهادات جديد بيتمنوه جداً جداً شركات السمسرة وشركات إدارة المحافظ هنتوجه ليه الفترة الجاية وهيبقى ليه شهادة مستقلة بنفسها شوية وهيبقى عن طريق ترشيح الشركات، في الأول هنبدأ نعلم لأن خلي بالك مديري الحساب الموجودين اللي هو اللفظ الدارج تريدر الموجودة في السوق المصري لكن هو مدير الحساب كل واحد بيبقى تحتيه عدد كبير في مصر كل واحد تحتيه ممكن يوصل لـ 100 و200 و300 عميل انا ممكن مقدرش استوعب ده كله في الكورس النوع الجديد اللي هنتكلم فيه اللي هو ازاي تدير المحفظة دي بشكل على المدى القصير وباستراتيجي جديدة انا مش عايز احرق الموضوع الصراحة سامحني اني مش عايز اقول اسم الشهادة دلوقتي
عمر: جميل انك بتطور
هيثم: بس هي حاجه جديدة هخاطب فيها الشخصيات الاعتبارية، هخاطب الشركات اللي عايز ييجي انتو دايماً بتناشدوا انتو عايزين شكل معين للتعليم إلى جانب التحليل الفني بطريقة مفيدة أكتر، عملية أكتر في مفأجاة جاية شركات السمسرة وإدارة المحافظ تعالى رشح لي ناس من عندك وانا هقدر أعلمهم بطريقة جديدة دي هتبقى مفاجأة حلوة اوي للسوق المصري والعربي كمان احنا بنحضر لحاجة هتسمع حلو ان شاء الله لان الحمدلله الثقل بتاعنا اصبح له وزن سواء في مصر أو على مستوى الوطن العربي
(19:48)
عمر: طيب هسألك سؤال اللي انت بتقوله ده معناه ان التحليل الفني ده ممكن يشتغل على السوق المصري، السوق الأمريكي، يشتغل على سوق الذهب.. أي حاجة فيها عرض وطلب؟
هيثم: اي سوق منظم، يعني ايه منظم يعني فيه قواعد وقوانين، الكفاءة بتاعته ماشيه بشكل طبيعي اللي هو بيشمل العرض والطلب زي ما بتقول، القواعد اننا مقدرش اتخطى ومقدرش اتلاعب وكل ما زادت كفاءة السوق كل ما تزيد فكرة ان التحليل الفني اللي هشتغل بيها، كل ما هتزيد قوة التحليل الفني كل ما هيكون في سوق منظم، السوق المنظم ده شكله ايه مش لازم اشكال برستيج يعني انت عارف القصة البسيطة اللي هقولها دي يعني اليابانيين عاملين حاجه اسمها الشموع اليابانية كتير من اللي سامعنا عارفين يعني ايه ده نوع من أنواع الرسم البيانية تخيل هوما الياباني اللي عملها عملها من 6 قرون تقريباً اكتر من 600 سنة الراجل ده كان بيعملها عن طريق سوق الأرز
عمر: آه التداول بتاع سوق الأرز
هيثم: بالتالي كان بيشوف المزادات اللي كانت بتتعمل في اغلب السلع عندنا بشكل عام زي السمك، أو الخضار وبيتعمل لحد دلوقتي على فكرة في الأسواق العامة، هو قدر يعمل الحكاية دي في السوق بشكل منظم وفي ناس منظماه من غير تدخل حكومي وقتها بس طبعاً مينفعش الكلام ده دلوقتي انا بحكيلك وقتها كان يمشي ازاي لقى السوق منظم قدر يطلع بنتايج كويسة جداً قدر يعمل تحليل فنى كويس جداً قدر يذاكر السعر امتى يطلع وامتى ينزل وسجل الكلام ده كله اللي احنا دلوقتي بنستفيد منه بعد 500 سنة فحكاية السوق دي مهم زي مانت قولت كده تناسب كل سوق منظم يقدر يمشي جوه قواعد مفيهاش اي نوع من انواع التلاعبات
عمر: تمام
وبكده نكون وصلنا لنهاية الجزء الأول وان شاء الله هنكمل الحلقة اللي جاية
Translation of some words and terms:
Balance Sheet الموازنة
Fundamental Analysis التحليل الأساسي
Search بحث
Charts الرسوم البيانية
Concept مفهوم
Mind Of The Crowd عقلية الحشود
Bar Chart تخطيط بياني
Candle Chart الشموع اليابانية
Target هدف
Stop Loss إيقاف الخسارة
Reentry إعادة الدخول
Active Investor مستثمر نشط
Passive Investor مستثمر سلبي
Department قسم
Community المجتمع
Rank تصنيف
Aware واعي
Rules قواعد
Efficiency كفاءة
Technical Analysis التحليل الفني
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #التحليل_الفني #الجزء_الأول