136. الضغط المجتمعي وتأثيره على مستقبلك المالي
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
بنتكلم في حلقة النهاردة عن ازاي الضغط المجتمعي بيأثر على قراراتك المالية وصحتك النفسية، اللي متابعنا هيعرف ان الضغط المجتمعي من المواضيع المهمه اللي دايماً بنتكلم عليها في الحلقات، بنتكلم النهاردة من خلال 8 نقط ازاي المجتمع بيضغط عليك وازاي تتجنب الضغط ده
(03:28) الضغط المجتمعي و عادات الإنفاق -
(05:36) الضغط المجتمعي واختيار الكارير -
(07:30) الضغط المجتمعي والديون -
(09:13) الضغط المجتمعي والاستثمار -
(12:02) الضغط المجتمعي والتخطيط للاستثمار -
(14:13) الضغط المجتمعي والضغوطات المالية -
(15:50) الضغط المجتمعي وريادة الأعمال -
(18:11) الضغط المجتمعي وطلب نصيحة من الخبراء -
.. ابعتولنا آراءكم ومقترحاتكم و ايه المواضيع اللي حابينا نتكلم فيها في الحلقات القادمة
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة عايز اتكلم على موضوع يمكن ذكرناه بشكل متقطع في حلقات كتير قبل كده ولكن عايز اتكلم عليه من وجهة نظر مختلفة خلال الحلقة كده واحنا ماشيين هتاخدوا بالكم اننا هتكلم على نفس الموضوع بس من زوايا مختلفة على الضغط المجتمعي
الضغط المجتمعي حاجة موجودة من الاف السنين، لو قرينا قصص بتاعة زمان في أي عهد أو أي زمن هنلاقي إن التصرفات الفردية بتبقى نابعة من إرضاء المجتمع او من إرضاء الناس اللي حواليا بس النقطة اللي عايز اتكلم عليها النهاردة بتعملك ايه في طريقك المالي في طريقك للحرية المالية في طريقك للاستقلال المالي في صحتك النفسية والمالية حاجات كتير جداً ومع ظهور الإنترنت والتطور التكنولوجي الـ 10 15 سنة اللي فاتوا اللي هو غالباً محدش شافه قبل كده في تاريخ الإنسانية الضغط المجتمعي زاد بشكل كبير
لأن انا النهاردة مبقتش بس بسمع عن حد عمل حاجه، ده فلان سافر الحتة الفلانية او فتح مشروع، أو راكب عربية أو أو لأ ده أنا بقيت أشوفها أونلاين وبقيت اشوفها في نفس ذات اللحظة اللي الراجل اشترى فيها العربية راح حاطط صورة او سافر سفرية أد إيه هو مبسوط وسعيد
احنا كابني ادمين احنا عندنا الحاجه دي جوانا وزي ما قولت هي مش من النهاردة بس دي عبر آلاف السنين ولكن الإنترنت سرع الموضوع أو على القوة التأثيرية بتاعة هذا التحيز أو هذا التركيز مع الناس يعني الناس بقت مركزة جداً جداً مع ناس يعني تسأل واحد تعرف فلان يقولك اه كذا كذا كذا طب هو عرف المعلومات دي ازاي والحاجات دي لسه حاصلة بسبب وجود الإنترنت
فأنا النهاردة هتكلم من زاوية تانية مختلفة ازاي دي ممكن تأثر عليك وازاي ممكن نتجنبها حاجات كتير جداً من العيوب بتاعة الموضوع ده
(03:28)
أول حاجه عايز اتكلم عليها هي عادات الإنفاق، عادات صرف الفلوس مع الاسف وجود الضغط المجتمعي ده بيخلي في تضخم في أسلوب الحياة بتاعك لانك بتحاول تشوف اللي جنبك بيعمل إيه، بتشوف هو عايش ازاي ومع الأسف انت بتحاول تقلده وممكن في أوقات كتير جداً ده بيبقى خارج إمكانياتك المادية
فأول حاجه بتأثر عليك في عادات الإنفاق بتاعتك إنك بتتأثر بأسلوب الحياة بتاعة الناس التانية، بتنسى ميزانيتك، بتنسى انت مفروض تعمل إيه وبتتأثر وبتبتدي تصرف مشكلتي مش انك تصرف مره او مرتين المشكلة انها تبقي دي شكل حياتك، إن ده الحد الادني او ده المطلوب يبتدي انك تحس ان دي من أساسيات حياتك اني اعيش في اللايف ستايل الفلاني أنا معنديش مشكلة انك تعيش داخل المقدرة بتاعتك، داخل الماديات اللي انت تقدر تستحملها لكن ده لازم يكون جوه الميزانية بتاعتك فهرجع هنا وأقول حل موضوع التضخم اللي سببه اسلوب الحياة انك لازم دايماً ترجع لميزانيتك وترجع تتأكد إنك تقدر تعيش في المستوى المعيشي ده
لو انت مخطرتش كده انت بتأثر على الإنسان المستقبلي بتاعك اللي اتكلمنا عليه كذا مره قبل كده لو اخدت قرار انك هتتأثر باللايف ستايل وهصرف وهعيش وكده وهنسى الراجل بتاع قدام انت بتضحي بمستقبلك المالي
(05:03)
الحاجة التانية في عادات الإنفاق اللي ممكن نتكلم عليها الإنفاق الاندفاعي واحنا اتكلمنا عليه قبل كده اللي هو انا نازل وزعلان ومضايق فروحت عامل قرار شراء اندفاعي من غير ما أفكر، فلان الفلاني جاب أيفون وانا بتمشى في المول وفافتكرت فاضايقت فروحت شاري ايفون جديد، أو مغير عربيتي أو اشتريت لبس جديد مش محتاجه، فالشراء الاندفاعي هو نوع من أنواع عادات الإنفاق الغلط اللي بتأثر وممكن تكون من مصادرها انها بتجيلك من الضغط المجتمعي
(05:36)
تاني حاجه هنقولها عن الضغط المجتمعي ممكن يعملك إيه في الكارير بتاعك أو في مستقبلك العملي نفسه، هنلاقي ان الناس بيبقى عندها ضغط مجتمعي من المجموعة اللي حواليها سواء الأهل أو الأصحاب أنك بتحاول تدور على أحسن شغلانه متقبله مجتمعياً، يعني على افتراض ودي حاجة واضحة زمان كان يقولولنا يا دكتور يا مهندس في أي حاجة أنت مجتمعياً متقبل الدكتور والمهندس لأن عندهم رسالة معينة أو بيبين نوع معين من أنواع الذكاء، ان انت شاطر انك عرفت توصل وتبقى دكتور او مهندس وهكذا
القرار ده مع الاسف انا مش بقول ان المهن دي وحشه ولكن انت بتنسى تماماً إيه المطلوب في المجتمع إيه اللي بتحبه ايه، ايه مزيج بين حاجه بتحبها وحاجه مالياً بتعمل فلوس كويسة ممكن يكون مهندس معين ده مش كارير كويس مالياً لأن بعد 10 20 50 سنة المهندس ده اصلاً مش هيبقى موجود او نوع معين في الطب انت اخترته والطب ده يندثر أو بيبدلوا الآلة او الكلام ده كله
اختيارك لمستقبلك العملي حتى لو في نص كاريرك، حتى لو مش طالب وفي نص الكارير بتاعك لازم تبقى واخد بالك إيه الحاجات المطلوبة في المستقبل، إيه الحاجات اللي مادياً العائد بتاعها عالي لأن القرار ده هيفرق في دخلك وفي مستقبلك وفي محفظة التقاعد بتاعتك
يبقى هنا انا بس مش بقول للناس 100% فكروا في الفلوس ولكن بقول خلي بالك من بند الفلوس وانت بتختار الشغل، وخلي بالك من بند الفلوس وانت بتفرق ما بينها وبين الضغط المجتمعي اللي انت حاسه من المجموعة اللي حواليك
(07:30)
تالت حاجه هتكلم عليها هي الديون وازاي في طريقك الضغط المجتمعي ممكن يجمعلك ديون وهضرب مثالين من حاجتين اتكلمنا عليهم قبل كده
العادات المعيشية اللي اتكلمنا عليها اننا عايز اواكب العصر بس معييش فلوس فعندي مشكلة في الميزانية فبتدي اجمع ديون، الديون دي ديون استهلاكية، والديون الاستهلاكية دي غالباً مش هتديني فلوس بعد كده لأننا استهلكت خلاص الحاجة فمع الوقت انا مش عارف اغطي العجز الموجود في ميزانيتي وعايز اعيش حياة لطيفة فبجمع دين فالضغط المجتمعي بيساعدك تجمع دين
الحاجة التانية حتى في الكارير لما اتكلمنا، انت مثلاً عايز تبقى دكتور او مهندس او اي حاجه، روحت اخدت دين كبير عشان تاخد شهادة من جامعة معينة فهنا بتحط عليك عبء دخل في المستقبل انت بعته وخلاص او اديته للراجل اللي انت هتدفعله الديون بتاعتك
فالضغط المجتمعي من الحاجات اللي بتزقك تحط ديون كبيرة عليك، ولو حطيت ديون كبيرة عليك غصب عنك هتبتدي تتأخر في رحلتك المالية ورحلتك للتقاعد فناخد بالنا ان اسلوب الحياة واختيار الكارير بتاعك والضغط المجتمعي كلهم هيأثروا عليك في حجم الدين الموجود عليك النهاردة
احنا برضه بيسمعنا ناس من كل حته في العالم فأي حاجة هنقولها في الحلقة دي انت ممكن تكون بتشوفها، موجودة في المجتمع بتاعك او في البلد اللي انت عايش فيها او لأ بس بشكل عام الحاجات دي موجودة ممكن متخبطش فيها النهاردة ممكن قدام انت مش في المرحلة الفلانية دي فمش هتشوفها
(09:13)
طيب، نيجي بعد كده للاستثمار ودي رابع نقطة ازاي الضغط المجتمعي ممكن يأثر على الاستثمار بتاعك
هنلاقي ان الناس دايماً في حاجه اسمها سياسة أو عقلية القطيع، انا بشوف أصحابي بيعملوا إيه النهاردة مثلاً أصحابي كلهم بيعملوا مشاريع شركات ناشئة، الضغط المجتمعي هنا زقني أروح أعمل مشاريع ناشئة، والله الضغط المجتمعي النهاردة قالي روح اشتري كريبتو فروحت اشتريت كريبتو، الضغط المجتمعي قالي انا بشتري دهب مثلاً أو عملة معينة أياً كانت الطريقة
لما يكون المصدر بتاع الفكرة بتاعتك هو الضغط المجتمعي او المجموعة اللي حواليك هتعرف انك ممكن تكون متأثر بعقلية القطيع، فخلي بالك القرارات الاستثمارية بتاعتك لازم تكون قرارات استراتيجية، زي ما اتكلمنا قبل كده في كذا حلقة اللي هو انا بقعد وبشوف أول السنة انا هعمل إيه باقي السنة، انا عايز اشتري المحفظة الفلانية الموزعة بالطريقة الفلانية، انا ركزت واخدت قراري لوحدي، ممكن يكون النهارده الاستثمار في الأسهم مش احسن حاجه عشان القطيع مش شايفه او الناس مش شيفاه بس ده مش معناه ان بعد 10 أو 15 سنة هيبقى ده احسن استثمار، فممكن تكون انت بتعمل حاجه بشكل منهجي، بطريقة مظبوطة الناس مش موافقة عليها النهاردة او مش شايفة جدواها الاقتصادية ولكن انت فاهم جداً انت بتعمل إيه
يعني مثلاً أنا بشتري مجموعة شركات مقيدة في البورصة معينة اسعارها كويسة جداً بالنسبة للتاريخ، اسعارها بالنسبة للربحية، محفظة متنوعة، صندوق استثمار أياً كان انت بتعمل إيه ولكن الجمع او القطيع مش شايف الكلام ده
يعني لو شوفنا مثلاً أسواق طلعت السنادي بدون ذكر دول، في أسواق طلعت 70 و 80% أسواق أسهم بس بتشتري مؤشر معين مثلاً لو جيت من سنتين هتلاقي ان القطيع مكانش بيتكلم عليهم خالص، محدش بيقولك استثمر في الاسواق دي خالص ولكن لو انا جاهز ومركز وعارف انا بعمل ايه وبحط فلوسي براحة انا ممكن اكون مستثمر في السوق ده وعندي استثمارات في السوق ده ولكن القطيع مقاليش حاجه
هنلاقي دايماً ان تاريخياً القطيع أو المجتمع كله بيسخن على فئة أصول معينة في أوقات تماماً غلط، الناس كلها يلا بينا نعمل الحاجة الفلانية، انا فاكر وانا صغير كان في فترة كل الشوارع كان فيها انترنت كافيه أو سايبر كافيه يمكن موجودة لحد النهاردة بس مش بالكميات بتاعة زمان كان في فترة الناس كلها بتعمل الموضوع ده مش معنى كده اني لازم ابيع كل حاجتي واسيب مجال تخصصي واروح افتحه، مهو خلاص المشروع ده في مرحلة معينة الناس كلها هتعمله مش هيبقى أرباح وهيبقى في منافسة والكلام ده كله
برجع هنا واقول قراراتك الاستثمارية لازم تبقى بعيد عن سياسة القطيع وسياسة القطيع دي جاية من الضغط المجتمعي.. كده احنا اتكلمنا على طريقة الاستثمار أو اختيار استثماراتك دي رابع نقطة
(12:02)
خامس نقطة بقى التخطيط للاستثمار نفسه، طريقة الادخار والتقاعد بتاعتي ازاي بعملها تخطيط، لو قعدت مع واحد صاحبي وقولتله انا عايز استثمر في حاجه تعملي عائد في سنة او سنتين او حاجه هتعملي عائد في 10 أو 15 سنة
الضغط المجتمعي هيخليك تغير استراتيجيتك من أنك تستثمر في المستقبل الطويل لأنك تستثمر لبكرا الصبح، دايماً في ضغط في التخطيط، مين ضامن يعيش 10 15 سنة، مين ضامن انك تعمل أرباح في الفترة الفلانية فتعالى نستثمر في حاجه مداها قصير
فالضغط المجتمعي بيغير لك فكرتك عن المدى القصير والطويل دايماً بيحاول يزقك لدلوقتي لأنه معندوش النظرة المستقبلية الطويلة لأنه مقضاش وقت او مقعدش ياعم هتشتري يااه دي هتستلمها بعد 8 سنين، ياااه دا هتستلمها بعد 6 سنين، يااه هتقعد تدفعها 20 سنة مفهوم ولكن لو الاستثمار مظبوط والحاجه محسوبة بطريقة اننا العوائد بتاعتي هتبقى ايجابية وفي المقابل هاخد موقف المضاربة على المدى القصير الضغط المجتمعي اسهله انه يضغط عليك تستثمر في حاجات قصيرة الأجل وده عكس تمام الفكر اللي بنتكلم فيه دايماً أنه حاول تبعد عن المدى القصير وخليك على المدى الطويل.. دي خامس نقطة بتكلم عليها من حتة الضغط المجتمعي
هعيد كده سريعاً اللي اتكلمنا عليه اتكلمنا في الأول على عادات الإنفاق، طريقتك في الصرف، اتكلمنا على ازاي اختار الكارير اللي على المدى الطويل هيعملي عوائد كويسة او حتى لو انا شغال في حتة معينة ازاي اختار الحتة الكويسة اللي فيها بعدين اتكلمنا على الديون وتراكم الديون بسبب الضغط المجتمع، وبعدين اتكلمنا على طريقة اختيارك للاستثمارات وسياسة القطيع وبعدين اتكلمنا على استراتيجية المدى القصير والمدى الطويل و ازاي الضغط المجتمعي بيزقك تعمل استثمارات في المدى القصير
(14:13)
سادس حاجه هتكلم عليها بقى الضغوطات المالية، ازاي انا دايماً بحس اننا ايه ده انا سبت العربية وسيبت شكلي المجتمعي وروحت استثمرت انا غالباً شكلي وحش في المجتمع ده برضه حاجه من الحاجات اللي الضغط المجتمعي بيعملها فيك اللي هو انا ازاي مش عارف اسافر، أو ازاي انا مش عارف اصرف على فكرة السعادة ملهاش علاقة بأد إيه انت صرفت، انت ممكن تصرف مبالغ صغيرة وتكون سعيد جداً، وممكن تصرف مبالغ كبيرة جداً ومتبقاش مبسوط هي ملهاش علاقة ولكن الناس دايماً غصب عنها هتقول ايه انا عندي اسهم طب الأسهم دي مش بتحقق لي سعادة بس فلان الفلاني راح اتفسح، مظبوط ولكن ده النهاردة انت لو الأصول بتاعتك كبرت وبقى عندك دخل وبقى عندك حاجه بتجيبلك دخل انت ممكن تسافر كذا مره بعد كده فأنت مش بتضحي للأبد انت بس بتضحي من النهاردة لقدام لحد ما يبقى عندك الأصول او الحاجات اللي تقدر تجيبلك الدخل فلو انت حطيت ده في دماغك هتعرف ان الضغط المجتمعي اللي بيحصلك النهاردة بسبب الناس اللي حواليك ده حاجه مؤقتة + ان الناحية التانية الراجل او الست العايشة فوق امكانيتها هي هتعمل قروض او هيبقى عندها ديون اه هي اتبسطت في الفترة اللحظية اللي بنتكلم فيها النهاردة ولكن هي ممكن تعيش سنين قدام من الضغوطات المالية لأنها محافظتش على الحاجات اللي أتكلمنا عليها قبل كده، فهو عقلية معينة المفروض تعيش بيه
(15:50)
سابع حاجه ريادة الأعمال، عايز اتكلم عن ريادة الأعمال شوية كده، الضغط المجتمعي غالباً هيحبطك من أي فكرة انت عايز تعملها يعني انا واحد فكرت في فكرة، فكرة كويسة جداً وانا مش مع ان الأفكار هي احسن حاجه في هذا الزمن هو التنفيذ يعني الناس عندها ملايين من الأفكار مش دي المشكلة طيب ازاي هتنفذ فكرتك طيب وصلت لأزاي هنفذ فكرتي وحطيت النموذج المالي والكلام ده كله
الضغط المجتمعي دايماً بيخوفك من الفشل ودايماً بيقولك لو فشلت معناها ان قرارك ده خاطئ وانا عكس هذا الكلام تماماً، لأنك النهاردة الفشل ده ممكن يكون بسبب غلطاتك او بسبب النظام أو سوء التوقيت اسباب كتير جداً فمش معنى ان حد حاول وفشل معناها انه غلط لأ بالعكس انت ممكن تكون اتعلمت ازاي تعمل فريق، ازاي تعمل منتج، مرة واتنين وتلاتة قصص النجاح العالمية للي بنشوفها والناس الموجودة في الجرايد والكلام ده كلهم مولودين من فشل بعد فشل بعد فشل وبعد كده في مرحلة ما بينجحوا فالضغط المجتمعي بيعمل فيك خوف من الفشل، لأ خلاص خليني قاعد في الوظيفة، خليني قاعد في اللي انا بعمله ومش هاخد عمري مخاطرة، خليني بأمان الحمدلله ربنا ساترها والدنيا ماشية تمام وعمرك ما هتكون رائد أعمال
انا مش بقول ان الناس كلها لازم تبقى رواد أعمال ومش بقول ان الناس كلها جاهزة ان يبقى عندها ريادة أعمال ولكن بقولك ان الضغط المجتمعي في هذا الوضع دايماً بيخوفك من الفشل، اللي انت اصلاً كرائد أعمال المفروض متبقاش خايف منه، لو انت خايف منه من أساسه من غير الناس المفروض اصلاً متعملش حاجه
فكل اللي بقوله هنا ايه مش كل الناس جاهزة تبقى رائدة اعمال بس لو انت جاهز تبقى رائد أعمال وعندك الفكرة وعندك طريقة تنفيذها وعندك مالياً ازاي هتعملها ومفكر في كل حاجه من قبل أصلاً ما تبتدي يبقى انت ممكن تاخد المخاطرة وتجرب حتى لو انت خايف ان شكلك هيطلع وحش قدام المجتمع لو الموضوع فشل في حاجات كتير جداً في العالم مكنتش هتحصل لو الناس كلها خافت الطفرات التكنولوجية دي كلها مكناش هنشوفها لو الناس كلها خايفة، يعني رسالتي في الحتة دي بس ان خلي بالك المجتمع هيضغط عليك دايماً انك متخدش سكة ريادة الأعمال
(18:11)
آخر نقطة هتكلم عليها اللي هي الثامنة والأخيرة، الضغط المجتمعي مش دايماً هيخليك تحاول تطلب النصيحة من الخبراء.. أكيد أنا فاهم، أكيد أنا عارف، أنا بعمل إيه، ليه أروح اسأل خبير، ليه أروح أتكلم مع عمر مثلاً تبعتولي مثلاً.. دايماً هيبقى عندي حتة اننا شغال وعملت فلوس واستثمرت اولاً انت ممكن تكون خايف لما نتكلم أو لما تكلم حد خبير انه يقولك اللي انت بتعمله ده غلط ويشكك في قراراتك فالخوف من التشكيك في آرائك بيمنعك انك اصلاً تتكلم، زي ما واحد يروح لدكتور نفسي مثلاً يكلمه على حاجه نفسيه عنده مع انها مصنفه مرض، الامراض النفسيه تصنف مرض زيه زي الدكتور العادي، نفس الكلام في الراجل بتاع الفلوس انت خايف تروح تقوله انا اشتريت البيت ده او اشتريت الأسهم دي او القرار ده والقرار ده وحش جداً ولكن ممكن تكون قعدتك مع الراجل ده، او سؤالك مع الراجل ده هيغيرلك حاجات تسوى فلوس كتير جداً لأنك عندك وقت وعندك طريقة في المضاعفة و و وكل الكلام اللي اتكلمنا عليه في الحلقات القديمة
فإن أنت تاخد 5 دقايق من وقتك او ساعة او ساعتين وتروح تاخد كورس، الضغط المجتمعي هنا انت خايف من شكلك قدام الراجل اللي انت هتكلمه او خايف من شكلك لو الناس عرفت انك بتسأل حد عن الفلوس لأن كل واحد متخيل انه عارف يعمل إيه
فأنا أنصح الناس على قد ما تقدر تعمل بحث وتبص على الحاجة تقرأ كتب وتكلم مختصين وتكون رأيك لأن القرار ده ممكن يفرق معاك سنين وفلوس قدام كانت هتجيلك لو انت بادي او في نص الطريقة حتى متأثر بس بالجمع والناس ومتأثر بالزحمة وبتاخد قراراتك كلها عاطفياً انت بس عايز حد يظبطلك دماغك فالخوف من النصيحة أو الخوف اننا اتكلم معاه او حتى اني اكون مكسوف انى اتكلم معاه ده ممكن يعطلك جامد في طريقك للحرية المالية
اتكلمنا على 8 نقط النهاردة نصيحتي اللي بقولها كل مرة الناس لازم تحاول تعيش في إمكانياتها، بتاخد 100 دولار تحاول تعيش جوه الـ 100 دولار وتحوش جزء منها وتستثمر.. الحد الوحيد اللي هيتأثر من قراراتك الاستثمارية مش جارك مش صاحبك مش اخوك.. انت الوحيد أو انتي الوحيدة اللي هتتأثري بالقرارات الاستثمارية بتاعتك.. شكراً جداً على وقتكم
Translation of some words and terms:
Peer Pressure الضغط المجتمعي
Spending Habits عادات الإنفاق
Inflation تضخم
Lifestyle أسلوب الحياة
Minimum الحد الأدنى
Within داخل
Impulsive Spending الإنفاق الاندفاعي
Combination مزيج
Herd Mentality عقلية القطيع
Systematically بشكل منهجي
Asset Class فئة أصول
Investment Planning التخطيط للاستثمار
Retirement التقاعد
Short-Term Speculative Position موقف المضاربة على المدى القصير
Financial Stress الضغوط المالية
Mindset عقلية
Financial Model النموذج المالي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #الضغط المجتمعي