138. حوار مع محلل فني - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
بنكمل النهاردة الجزء التاني من لقائنا مع أ/ هيثم عبد السميع، عضو مجلس إدارة الجمعية المصرية للمحللين الفنيين ورئيس لجنة الخريجي ومؤسس قناة المنبة الفني على اليوتيوب.. بنتكلم مع أ/ هيثم عن التحليل الفني، إيه هو والهدف منه ولو حابب اتعلم او اشتغل فى المجال ده ازاي انضم للجمعية المصرية للمحللين الفنيين
https://www.youtube.com/@zoka2020 :تابعوا قناة أ/ هيثم على اليوتيوب
https://www.estaegypt.org/ :الجمعية المصرية للمحللين الفنيين
:في الجزء الثاني
(01:20) الناس بتستخدم إيه النهاردة عشان يبتدوا يشتغلوا بالتحليل الفني؟ -
(06:28) كلمني عن القناة بتاعتك، وايه اللي خلاك تعملها وعايز منها ايه؟ -
(11:57) في الحلقة بتاعتك انت بتحاول تغطي اللي هيحصل تاني يوم في السوق؟ -
(13:38) تقريباً بتغطي كام سهم يومياً؟ -
(14:44) لو واحد لسه بيفتح النهاردة انت شايف ازاي يقدر يستخدم القناة بتاعتك؟ -
(18:46) هل كل اللي انت بتقوله بيتحقق أو يبقى صح؟ -
(23:38) ممكن سريعا تكلمني على ايه اللي بيحصل في اجتماع داخل الشركه؟ -
وبكده يكون لقائنا مع أ/ هيثم انتهى، ابعتولنا اسئلتكم والمواضيع اللي حابين نتكلم عليها في كلام ينور
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة هنكمل اللقاء بتاع الاسبوع اللي فات يارب تكونوا استمتعتوا بالحلقة اللي فاتت و هسيبكوا مع حلقة الاسبوع ده
(01:20)
عمر: طيب، انا النهاردة قاعد في البيت وسمعت عن حاجه اسمها التحليل الفني، انت قولتلي أهم حاجه السعر والحجم عشان ابتدي احلل الرسوم البيانية بتاعتي دي، في هذا الزمن وفي هذه الأيام حد لسه بيبتدي انت قولتلي زمان كنت بتشتغل بياهو فاينانس أعتقد الموضوع تطور الأيام دي، قولنا الناس بتستخدم إيه النهاردة عشان يبتدوا يشتغلوا بالتحليل الفني؟
هيثم: بص الدنيا تطورت اوى وفكرة الذكاء الاصطناعي وفكرة أن شركات بتعمل مواقع بتوفر فيها البيانات، بتبقى متأخرة طبعاً مش لايف، لايف دي بيبقى ليها سعر تانى دي الوحيده اللي بيبقى ليها سعر غير كده الاسعار بتبقى متاخره شويه فهم بيستفيدوا بقى من الاعلانات والكلام ده كله قصاد ان انت تخش عندهم تعمل حركة في الموقع عندهم وببلاش تقدر تروح العالم كله
المشهورين حالياً
https://www.tickerchart.com/ar/
كل الحاجات عالمية بمعنى الكلمة يعني بتيجي تكتب كود بيوديك للسهم في إندونيسيا ولا في البرازيل ولا في الأرجنتين ولا في روسيا او امريكا، امريكا طبعاً أكبر بورصات في العالم وأكبر سوق في العالم، فالمواقع دي بتقدر توفرلك سواء كان في المنطقة العربية أو على مستوى العالم، سهم في استراليا او عمله أو سلعة او الكلام ده كله بل بالعكس بيوفرلك خدمات ازاي تربط بين سلعة وسهم وسوق والكلام ده كله لأ بيوفرلك حاجات كتير وبيجي عند بعض الخدمات بتبقى بفلوس وده موضوع تاني بس أعتقد ان اللي موجود دلوقتي مجاني اعتقد انه كافي جداً جداً انك مش بس تبقى مجرد مبتديء لا تبقى محترف كمان مع دراسة طبعاً ومع القراية الكافية جداً ومع المجهود انك تبني الاستراتيجي بتاعتك
(03:40)
عمر: وبعدين كمان اعتقد ده هياخدنا كمان لوجود فيديوهات كتير اونلاين ومصادر حتى لو حد حابب يقرأ أو يذاكر لوحده، يعني احنا وقتنا برضه كله كان معتمد على الكتب مكنش في لسه يوتيوب أو كان في حاجات بس محدودة جداً يعني اعتقد انت النهاردة مش محتاج تعتمد على الكتاب زي ما انت بتقول يعني من المصادر اللي انت ذكرتها ساكسو بنك اللي هو يعني راعي معانا في البودكاست ده تقدر تستخدم الرسوم البيانية بتاعته
هيثم: أنا من اوائل الحاجات اللي استخدمتها ساكسو بنك وكان عنده منتج غريب جدا كنت بستغرب انا كنت بنكش في الحاجات دي بطريقه، يعني سوري في اللفظ ، كنت احب ادور كان عندي الفضول قوي أوي، كان عنده منتج عن أنواع اللحوم الموجودة في وقت من الأوقات ما اعرفش موجود دلوقتي ولا لأ انا بحكيلك على قصة من 20 سنه
فكنت الاقي البرجر ليه بورصة لوحده وليه رسوم بيانية لوحده فكنت هتجنن هو ايه ده انت بتعمل مخططات رسوم بيانية ازاي للنوع ده لنوع اللحوم ده ولحوم الأبقار، يعني كان وهم بالنسبة لي ولا انواع الرز والكاكاو انا فاكر ان المميزات دي كانت توقيتات بس عقد سبتمبر، عقد ديسمبر والكلام ده كله لكن انت داخل كمان في الانواع ده كان بالنسبالي حاجه جديدة وجامدة جداً في ساكسو بنك بصراحة
عمر: قريب جداً قرأت عنوان كده ان عصير البرتقال عشان ده ليه مميزات بيتداول عصير البرتقال كان طالع جداً جداً الفترة اللي فاتت كان طالع جداً لسبب ما معرفش اسعار عصير كانت بتطلع جامد
هيثم: عشان داخلين على الشتا
عمر: اه او اياً كان السبب هو من الحاجات
هيثم: اللي الطلب عليه كبير
عمر: اه
هيثم: بقى ليه مخططات، ما دام بقى ليه سوق منظم وقادر تجيب منه بيانات بدون تلاعبات وعلى فكرة برافو اوي انهم عارفين يطبقوا ده بيوجدلي منتجات كتيره ممكن اربطها بحاجات كتيره، ممكن تربط الحاجات اللي تخص الشتاء بعصير البرتقال مثلاً
عمر: ماهو فعلاً كده في مثلاً موسم حصاد معين بتاع حاجه معينه العرض فيه اقل فالاسعار ابتدت تطلع، طبعاً اكبر سوق في السلع هو سوق البترول الميزات بتاعته متداولة فهي طبعاً السهولة على الناس النهاردة بجد انك تعرف تفتح وتجيب المعلومات دي بطريقة اسهل شوية
(06:28)
عمر: طيب ده هياخدني في حتة تانية خالص وجود الانترنت والكلام ده كله مع وجود فيديوهات واليوتيوب انت مؤخراً اتكلمنا قريب وقولتلي انك عملت قناة على اليوتيوب بتاعتك، انا هقولك انطباعي عن القناة دي انا بحس ان هي بتدخلك جوه اجتماع بتاع المحلل الفني في شركة بتاعة إدارة محافظ او في شركة سمسرة.. مظبوط؟
هيثم: بس بالجمهور بقى مش في اوضة مغلقة
عمر: كلمني كده عن التجربة دي وكلمني ايه اللي خلاك تعملها وعايز منها ايه.. الحاجات اللي ورا القناة بتاعتك؟
هيثم: بص يا عمر انا فترة كبيرة، انا اصلاً بحب فكرة او هي في الطبيعة بتاعتي في الاجتماعات بتاعتنا بنعمل بريزنتيشن بشكل كويس بس دايماً كان عندي هاجس انا ليه مش بتكلم مع ناس كتيره ليه لازم اطلع في التلفزيون ولو تفتكر كنت انا وانت بنطلع في التلفزيون في برامج البورصة زمان بس كان بشكل متقطع واخرنا نطلع مره في الاسبوع مرتين طيب وبعدين في كل يوم جلسة وساعات نطلع مره كل اسبوعين حسب الظروف لو تفتكر في القنوات اللي كانت مهتمه ساعتها في البورصة والكلام ده كله طيب الاجتماع المصغر ده ليه مش عدد أكبر بنتكلم معاه فدي كانت هاجس بالنسبالي ازاي اوظفها
جه بقى معاها موضوع الكورونا في 2020 كله قاعد في البيت عندنا وقت كتير اوي مبنعملش حاجه خالص فجتلي الفكرة دي موركش حاجه غير انك تفتح اليوتيوب وتتفرج على حاجات فلقيت ناس بتتكلم هو انا ينفع اسجل واوصل للناس دي برضه، اقول رأيي طيب ممكن أقولكم رأيي يا جماعة لو سمحت فلقيت انه اه ينفع فعرضت الموضوع على اصحابي ايه رايكم لو عملت كده قالولي بتتكلم جد حلو اوي تمام، اعمل فيديو الاقي 20 مشاهده بس انتو صحابي بس اللي بتشوفوه، تاني اسبوع بقو 45 طيب ابطل كفاية ملهوش لازمة محدش بيسمعك اصلاً بس قولت لأ كمل مش مشكلة حتى لو 45 ايه المشكلة ايه المانع لو 45 او 50 او 20 حتى ايه المشكلة لما توصلهم عن طريق انك تتعب شوية وتتكلم
طبعاً الحفظ للأمانه صحيح مكنش كبير اوي فبالتالي الفيديوهات كانت 5 - 10 دقايق شوية بشوية لقيت العدد بقى 200 في شهر بعد شوية قدرت اوصل لـ 500 واثبت عليها كذا شهر حلو، شوية شوية على آخر 2020 كنت قدرت اوصل لـ 1000 مشاهدة، طبعاً التدرج في السوق بتاعنا مش سريع يعني اليوتيوب في مجال البورصة مش هتلاقي نفسك عملت ملايين المشاهدات ولا حاجه لان لسه المجتمع مش كبير في اليوتيوب بس لقيت ان ربنا كرمني ووصلت لـ 2000 مشاهدة في الوقت الحالي مش وحش، 2000 او 2500 في اليوم الواحد انا بعملها بشكل يومي \
بص يا عمر انك تقدر توصل في المنبة الفني، القناة اسمها المنبه الفني، قدرت توصل لبيوت وناس كتيرة تعرفها او متعرفهاش مفيش حته انك حصري لحد دي احنا اتعلمناها في الجمعية لو تفتكر ان انت لازم تنشر المعلومة بتاعتك مش لازم تقفل على نفسك في دايرة مغلقة ومتوصلش للناس لأ لازم توصل للناس وتقولهم المعلومة وانت عارف كويس جداً ان احنا حتى في الجمعية ارخص الاسعار في تاريخ البشرية لحد دلوقتي في مجال التحليل الفني فايه المشكلة انك توصل ببلاش برضه هو لازم توصل بفلوس ايه المشكلة وفي نفس الوقت انا خرجت طاقتي وعرفت اقول اللي عندي لناس كتيرة اوي
وطبعاً احلى حاجه لما تلاقي تعليق، متشكرين جداً، والحاجات دي لعلمك بتأثر جداً لما تلاقي حد يقولك برافو، انا استفدت امبارح، بس حضرتك قولتلنا السهم الفلاني، فتلاقي بقى تفاعل جميل في التعليقات مع ناس متعرفهاش ومش بالضرورة تتدخل في خصوصياتهم ولا هما يتدخلوا في خصوصياتك انت بتوصلهم المعلومة بشكل علمي الحمدلله، ملتزم اوي بالحته دي ومش عايز اخرج عنها حتى لما بيبقى في احداث دولية ولا سياسية بتاثر في السوق اقوله خلي بالك متاخدش بالكلام ده بص للبيانات وهتقدر تقرا الاحداث دي بدري شوية، تعالى نقراها مع بعض، تعالى نشوف الرسوم البيانية دي بتقول ايه يعني بحاول اطبق الناحية العلمية بشكل سليم بنسبة كبيرة
عمر: العلمية اكتر من العاطفية
هيثم: بالظبط بحاول امتص منك الحتة العاطفية وتعالى معايا في السكة العلمية وفي نفس الوقت بقولك تطبيق عملي مش بقولك كلام كتب حصل خلاص وانتهى لا الحلقة كل يوم وبالتالي في تفاعل كل يوم خلال الجلسات، بنتكلم بليل جلسة بكرا هيبقى فيها ايه
(11:57)
عمر: حلو قلي بقى بالظبط بقى مثلاً الطريقة اللي انت بتعمل بيها الحلقة انت بتحاول تغطي في الحلقة دي ايه، بتحاول تغطي اللي هيحصل تاني يوم في السوق؟
هيثم: بالظبط، هو اول حاجه فكرة اننا اظهر بوشي دي مش عجباني خالص لأنها ملهاش اي معنى اننا نقعد نشوف بعض ونسلم على بعض انت اللي يهمك اني اوصلك المنهجية العلمية بطريقة سليمة وبطريقة مختصرة شوية طبعاً كلمة مختصرة مع حلقة 45 دقيقة فانت لازم تغطي رقم كبير من الاسهم يعني، فانا ببدأ بشكل منطقي وبشكل علمي بأني بطرح هنتكلم في ايه النهاردة وبعدين بخش على المؤشر الرئيسي طبعاً بقسم تحت المؤشر الرئيسي ايجي اكس 30 اخد الاسهم الرئيسية بتاعه واخلص اخش على ايجي اكس 70 أخد الاسهم الرئيسية بتاعته اللي حصل فيها تفاعل لأن في أسهم بتجاهلها يوم او اتنين لان مفهاش حركة او اتكلمنا فيها قبل كده ومفيش جديد فيها يعني حتى بلاقي في التعليقات هو حضرتك ليه سبت السهم الفلاني ده انا كنت بشوفه كل يوم فاجي تاني يوم يا جماعة خلوا بالكم بس السهم ده مفهوش جديد يتقال انا بس بحاول اطرح الجديد لان احنا كده هناخد يومين تلاته بنتكلم في القناة في الحلقة فاهم قصدي فدي المنهجية اللي بمشي بيها في السوق المصري لغاية دلوقتي
(13:38)
عمر: يعني انت تقريباً بالمتوسط كده بتغطي كام سهم يومياً؟ تقريباً يعني مش لازم يكون رقم ثابت يعني من 10 لـ 15 سهم؟
هيثم: في الوقت الحالي بنوصل من 30 لـ 40
عمر: ماشاء الله
هيثم: بنوصل لـ 30 و 40 متنوع ما بين ايجي اكس 30 وايجي اكس 70 لأن اليومين دول السوق المصري وصل لأرقام جديدة في أحجام التداول، احنا لما كنت بنوصل في 2008 800 مليون ولا مليار جنيه تنفيذات في اليوم كنا بنقول واو ده رقم يعني، احنا النهاردة يوم لما مش بنفذ خالص بنفذ 3 مليار ونقول التداول النهاردة كان متوسط احنا بنوصل لـ 4 و 5 مليار وفي بعض الحالات الاستثنائية بنوصل لـ 7 مليار بس الرنج بتاعك بقى من 4 لـ 5
دولة زي مصر تستحمل يبقى في منتجات كتيرة انك تتكلم فيها ويبقى في احجام هو الـ 4 او 5 مليار دول هيتركزوا في سهمين 3 لا هتلاقي ايجي اكس 100 اللي هو متكون من ايجي اكس 30 و 70 فيه 100 سهم دول لوحدهم بيتحركوا كل يوم في حركات كتيرة فلما تاخد منهم كل يوم 30 و 40 شامل المؤشرات اعتقد مقبول شوية
(14:44)
عمر: طيب انت النهاردة زي ما بتقول بتتابع الأسهم، بتدي أهداف سعريه للاسهم، بتحط نقط وقف خسارة زي ما اتكلمنا قبل كده
هيثم: استراتيجي
عمر: ازاي الناس تقدر تستخدم القناة بتاعتك يعني.. لو قولنا واحد لسه بيفتح النهاردة وعنده محفظة او اسهم في البورصة المصرية انت شايف ازاي يقدر يستخدم القناة بتاعتك؟
هيثم: حلو اوي النقطة دي بص يا عمر الحتة دي انا فعلاً ودي اللي ساعات بتخليني اطول شوية لسهم سهم وساعات الناس بيزعلوا مني يا هيثم احنا فاهمين النقطة دي انت ليه مصر توضح النقطة دي، عشان في ناس جديدة بتفتح القناة لأول مره فلازم يبقى فاهم الاستراتيجي انك تشتغل على ايه مهواش اتولد فاهم تحليل فني فهو لازم اخاطب من اول اللي مش عارف لسه بيفتح القناة من اول وجديدة وبيتعلم او متعلمش اصلاً تحليل فني عشان اقدر اجذبه لفكرة انك متبقاش عاطفي وانت بتشتغل او العواطف بتاعتك تظهر وقت الشغل حاول تتجنبها، لو قعدت اتكلم من ناحية منهجية بحته في الأول في كل يوم بدون ما اخد في اعتباري الناس اللي متعرفش او تعرف على بسيط اوالناس الجديدة يبقى انا هظلمهم معايا وهما مش هيستفادوا حاجه وهيقولولي طيب نبقى نجيلك لما ندرس تحليل فني طيب ما هو ده ضاع مني وهيفضل يتخبط كتير في السوق طيب لأ تعالى انا كل يوم بمشي بشكل مبتدأ شوية اوقولك فاكر امبارح اتكلمنا في ايه طيب الجديد كذا وكذا، وخلي بالك واعيد وازيد في الحتت الفنية وكتير مبصدق ألاقي حته تعليميه جوه سهم واروح ماسك فيها بكل قوتي اقول خلي بالك من الإستراتيجية بتاعتنا هتبقى كذا
الحتة التعليمية دي في الأول اخدتها بخوف اني ادمجها في الناحية العلمية دي انا كنت خايف الناس يكون رد فعلها سلبي على الموضوع فوجئت ان الناس عجبها الحتة دي جداً اني بحاول احط الحتة التعليمية بمجرد ما بلاقي حاجه تناسب الحتة التعليمية مع حاجه عملية حقيقية حصلت
في سهم من سنة كاملة اسمه ليسيكو كما يقول الكتاب وربنا كرمني وقولت يا جماعة خلي بالكم انا مبقولكش اخرج بس بقولك خلي بالك لو الدعم ده اتكسر ده اهم عندي من اي دعم تاني لان كده الشكل اكتمل خلي بالك وتاني يوم لما اتكسر اهو بدأ يتحقق نبدأ نقلل المراكز بتاعتنا والاستراتيجي بتاعتنا تبقى كذا، السهم ده نزل تقريباً 60 - 70 من قيمته السوقية بناءاً على حتة تعليمية اتكلمنا فيها
الناس بقت فاكرهالي من وقته من سبتمبر 2022 كل ما يجي رايزنج ويدج يقولي اه الحتة دي بتاعتك احنا عايزين نسمع الحته دي تاني ممكن لو سمحت تبص تلاقي تعليقات الناس ابتدت تتفاعل معاك وده شيء بيفرحني جداً وده حته اتعلمناها في الجمعية انت لازم تعلم غيرك العلم مبيوقفش عندك لازم يوصل للي بعدك فأنك توصل حته تعليمية مع حته عملية حقيقية يستفيد منها في إدارة محفظته بشكل شخصي ده شيء بيفرحني جداً يعني
(18:46)
عمر: طيب هسألك سؤال مهم، هل كل اللي انت بتقوله بيتحقق أو يبقى صح؟
هيثم: بص مش عايز اتغر بس بنسبه كبيره، انت متوقعتش مني الاجابة دي اكيد عشان انت عارفني بص طالما ماشي باستراتيجي مينفعش تبقى غلط، يعني ايه مينفعش تبقى غلط مدام في استراتيجي وبقولك في نقط وقف خسارة مانا بقولك خش صحيح هنا بس انا قايلك في نقطة وقف خسارة فهيبقى فنسبة الغلط هتبقى ضعيفه جداً
عمر: ودي الميزة في موضوع التحليل الفني زي ما انت قولت لو السوق فاجأك وعمل حاجه انت مش متوقعها انت كنت متخيل ان السوق هيطلع مثلاً وحصل العكس والسوق نزل فأنت الاستراتيجي بتاعتك بتحميك انك تحط وقف خساير، بس مجموع التوصيات بتاعتك بشكل عام في الاخر المفروض تبقى ايجابية لأن انت مينفعش مثلاً تحط 10 توصيات والـ 10 يطلعوا وقف خسارة انت هتعمل فلوس لما إعداد الأهداف تتحقق وفاهم ان في اوقات معينة لما الأسواق بتقلب مثلاً او الدنيا متبقاش لطيفة بتلاقي انك دخلت في كذا وقف خسارة ورا بعض معناها أن حالة السوق بشكل عامل مش إيجابية
هيثم: بالظبط اذا كان سؤالك انك بتحقق مكاسب كتيرة، لأ مش بالضرورة اكون محقق مكاسب كتير انا مش مطالب اني احقق مكاسب لأ انا ولأ انت ولا المستثمر، امال احنا مطالبين نعمل ايه اول جملة اتعلمناها في اول صفحة في الكتاب "تقليل الخسائر هو العامل الرئيسي في تحقيق الأرباح" تخيل الجملة دي احنا واخدنها من الاجانب مش احنا اللي مخترعينها يعني هما لما جم يألفوا التحليل الفني عملوا الطريقة دي ففكرة الاستراتيجي دي مهمه فنسبه التحقق الكلامي بنسبة كبيرة هيبقى منطقي لسبب بسيط انك يا إما هتحقق مكاسب يا إما خساير، لو عندك مركز قديم فأنت بتعمل بيع هنا وبتعمل إعادة دخول إذا حصل استراتيجي في النزول باظ وبقي في الدخول مش هينفع تبقى انت الغلط المنطقي لو انت استخدمت الاستراتيجي، متشتريش ومتلتزمش بنقط الخسارة وترجع تقول انا خسرت كتير اما فين نقطة وقف الخسارة؟ انت فاهم قصدي فحكاية التحقق بتاعة التوصية بتعتمد بشكل رئيسي على انك ملتزم بيها من الناحية الفنية، استراتيجي شغل فاهم قصدي وخصوصاً في حاجه بتبقى قائمة على فكرة العائد والمخاطرة، مش منطقي اقولك اعمل نقطة وقف خسارة 1:1 والسوق بيطلع صعود، المنطقي لو السوق بيطلع يبقى في 1: 2 ، 1: 3، 1: 4 وبندي نقط فوق بالطريقة دي لو السوق فعلاً في حالة سيئة بيبقي 1:1 وبقولك ألتزم وبعيد وبزيد عليها التزم جداً جداً بإيقاف الخسارة
لسه حاصله معايا امبارح سهم أبو قير للأسمدة زي ما عمل دعم كويس اوي والناس تقدر ترجع للحتة دي في المنبة الفني 6 ديسمبر، قولت يا جماعة زي ما هو مدي إيجابي جوه الجلسة متستناش معايا الغلق مع السهم ده بالذات في الوضع اللي احنا فيه، الدعم لو اتكسر جوه الجلسة أخرج وقلل مراكزك بنسبة كبيرة جداً متقلش عن 50% لو مش عايز تخرج وقد كان السهم على قد ما كان مدي اشارة كويسة انه يطلع على قد ما هو مستحملش ضغط البيع جوه الجلسة وضرب السهم جوه الجلسة ضروري انك تنبه على النقطة دي وانت بتشرح الاستراتيجي بتاعة تاني يوم
(22:53)
عمر: هايل، حلو جداً انا بالنسبالي اللي عاجبني في الموضوع بتاع القناة لأن انا عندي خلفية عن التحليل الفني وشوفت ازاي بتشرح وشوفت ازاي حد لسه جاي النهاردة اول مره يسمع عن الموضوع ده ويسمع عن حاجه اسمها التحليل الفني فيبتدي يتابع الفديوهات بتاعتك هيفهم وهيتعلم زي ما انت شرحت قبل كده ان انت بتخاطب الناس الجديدة، بتخاطب الناس اللي عايزة تعرف يعني ايه تحليل فني دي حاجه بجد عجبتني في الفيديوهات اللي انت بتعملها
وعجبني كمان انك بتعملها زي ما قولت اكنك في اجتماع جوه الشركة، يعني شركات إدارة الأصول أو شركات السمسرة بتعمل نفس الاجتماعات دي داخل الشركات مظبوط
هيثم: بالظبط
(23:38)
عمر: يعني ممكن سريعا تكلمني على ايه اللي بيحصل في اجتماع داخل الشركه هل بتجتمع مثلا مع مدراء الحساب وتتكلم معاهم؟
هيثم: على مدار الـ 21 سنه اللي اشتغلناهم، الاجتماعات دايما بتبقى في الغرف المغلقة فكنا دايما بنتكلم طبعا تنوعت وتطورت أدوات الشرح من اول مجرد لاب توب ابقى ماسكه في ايدي اللي هو بيبقى فيه بروجيكتور بتشرح عليه وكده بس في الاخر انت بتحاول تقنع مش تقنع مش بالضروره تقنع المطلوب مني ان انا اوصل الصوره اللي انا شايفها، الاستراتيجي اللي انا شايفها اللي تشتغل بيها
طبعا النقطه اللي هقولك عليها دي مهمه سواء كنت بخاطب شركة سمسرة، الاجتماع جوه مع مدراء حساب او متداولين أو جوه إدارات محافظ السلوك بيختلف طبعا، إدارات المحافظ ما بيهتمش بفكره ان انت تقوله بكره الدنيا ماشيه ازاي هو عايزك تشرح له كمان 6 شهور كمان سنه انا رايح فين ايه المنتج اللى يخش فيه يبقى اكتر ربحية على مدار 6 شهور لسنه
الكلام بقى بيختلف لما تيجي تتكلم مع مدراء حساب لشركات تداول الأوراق المالية السمسرة النهاردة لأ الموضوع مختلف هو عنده عميل عايز يشتغل كل يوم، يتداول كل يوم يتداول النهاردة وبكرا او كل يومين او كل اسبوع مرتين او 3، يعمل ايه
انا الاستراتيجي بتاعتي المفروض متزيدش عن اسبوع أو أكتر حتة انا اقدر اجمع بقى الاتنين دول في مكان واحد في القناة ده شيء كان ممتع جداً بالنسبالي لأن في كل البرزنتيشنز اللي علمتها على مدار الـ 21 سنة اللي فاتت دي كلنا كنت ساعات بحس اننا محبوس شوية جوه سجن اسمه انك ملتزم انت بتكلم مين بتكلم مدراء حساب في شركات تداول أوراق مالية ولا مدراء صناديق ومحافظ انت بتخاطب مين طبعاً ببقى نفسي أطلع حاجات تانية بس انا ببقى ملتزم بقواعد البرزنتيشن اللي ببقى فيه لأن زي ما قولتلك بتوع إدارات المحافظ والصناديق مش مهتمين يعرفوا بكرت في ايه في السوق مهتمين يعرفوا استراتيجي بتاعتك بتاعة 2024 هتتم ازاي الربع الأولاني حتى انت هتعمل ايه وفي نفس الوقت المدى القصير زي مدراء الحساب اللي عايزين يوصلوه للعملاء بتوعهم مش بيبقى عايز يعرف السنة الجاية هيحصل ايه هو يهمه بكرا وبعده هيحصل ايه ده حابسني جوه حاجه وده حابسني جوه حاجه فحتة انك تطلع في القناة تقدر تعبر عن كل الزوايا وكل الأنماط السعرية اللي بتظهر وكل الدنيا دي بتديك مساحة من الحرية والأنطلاق وتقدر تطلع كل اللي عندك اللي ربنا كرمنا بيه يعني ان احنا اتعلمناه في حياتنا وخبرتنا وربنا رزقنا بيها عشان اقدر اقولها للناس
عمر: أنا مبسوط جداً بالمجهود اللي انت عاملة يا هيثم والله
هيثم: ربنا يباركلك يا عمر
عمر: أنا عارفك من زمان وعارف قد ايه انت بتحب موضوع التعليم وتنشر التعليم ومجهوداتك في الجمعية اللي هي برضه كل الناس اللي بتشتغل في الجمعية هي جمعية غير هادفة للربح الفلوس اللي بتخش الجمعيه دي بترجع تتصرف تاني على الناس اللي موجوده جوه الجمعية الطلبة ولا النشاط نفسه لكن المحاضرين والناس اللي بتدرس انا عارف ان هم يمكن لحد النهارده محدش بيعمل منها فلوس تطوعي وانا كان ليا الشرف ان انا في يوم من الايام
هيثم: كله تطوعي للامانه هو ده شيء، أنت ما زلت جوه اللجنة تدريس مش هنسيبك
عمر: كنت بدرس في الجمعية في الفترة اللي كنت فيها في مصر والجمعية كانت من الحاجات اللي خلتني اخش المجال ده زي ما انت عارف فانا حاسس انك بتعمل الموضوع ده بشغف وموضوع القناة ومبسوط ان القناة دي برضه محرراك ومخلياك تعمل اللي انت عايزة وانا متأكد ان مع الوقت كمان المحتوى هيتطور ويتحسن وهيكبر وهيتشاف اكتر بإذن الله
هيثم: إن شاء الله
عمر: في أي حاجه تحب تقولها، اعتقد اخذت من وقتك كثير بس لو عايز تختم بحاجه في حاجه حابب تقولها
هيثم: لا لا انا اللي يهمني فكرة أن الناس تهتم قوي ان المعلومه ما تقفش عند حد وتقفل عليها افتح المجال يعني في مثال انا تعلمته جوه الجمعية أدلق شويه من اللي معاك عشان تقدر تستوعب جديد طلع من اللي عندك عشان تقدر تسيب مساحه جديده تتحط لك عامه جديد دي هتحط لك ما تفتكرش ان المعلومه دي نهاية العالم وان انت عندك المعلومات سرية للعالم كله ابدا انشر الثقافة
نشر الثقافه الماليه اللي انت عاملها دي انا عجباني جدا انك مش بتقف عند حد افتح وصل للناس الناحيه الفنيه الناحيه الماليه المعلومه اللي توصلك متفكرش تحتفظ بيها وتقول دي حصري ليا انا مش بتكلم على فكره حقوق الملكيه الفكريه بالعكس حقوق الملكية الفكريه حاجه ما اقدرش اتعداها لكن توصل معلومه تفيد بيها غيرك وده كان هدفي الرئيسي فاللي بعمله في قناه المنبة الفني ان انا مش عايز المعلومه تقف عند حد يا جماعه خد مني وروح استفيد وفيد غيرك
لما حد قالي ان في ناس بتاخد افكارك تنشرها هي ايه المشكله انت فاكرني هضايق الفكره عجبتك ورحت نشرتها من غير ماتقول اسمي ما تقولش بس انشر المعلومه ووصل للدنيا هي دي الحته اللي قامت عليها فكرة الجمعية المصرية للمحللين الفنيين يا عمر وانت عارف كده كويس الفكره دي استمرت معانا جيل ورا جيل زي ما كنت في يوم من الأيام علموني بأقل اسعار ممكنه احنا بنحاول نوصل للناس باقل اسعار للجمعية الغير هادفة للربح اللي الناس بذلت عمرها كله فيه مش انا بس لأ ده في ناس تانية وانت عارف من اول مؤسسي الجمعية كله بيبذل عمره كله فيه عشان الفكرة دي بس ان العلم ميقفش عند حد كمل ووصل لغيرك بس.. انا اسف اني طولت عليك
عمر: لا خالص بالعكس نهاية جميلة والبودكاست برضه بيحاول يمكن عشان متأثرين بالجمعية ومن أساسات أننا بدأنا حياتنا في مكان بيدي احنا بنحاول برضه ومن خلال قناتك ومن خلال المجهود اللي احنا بنعمله اننا نوصل المعلومة دي للناس خاصة الناس اللي بتبتدي وبنحاول نوصلها كمان في صورة سهلة وبسيطة انها تتفهم، تاني بشكرك جداً على وقتك يا هيثم ومبسوط أننا قضينا الوقت ده مع بعض
هيثم: شكراً جداً يا عمر، شكراً جداً جداً
عمر: شكراً جداً لكل الناس اللي وصلوا معانا لحد هنا وان شاء الله اشوفكم الاسبوع الجاي
Translation of some words and terms:
Volume حجم
Data بيانات
Delay متأخر
Traffic حركة
Globalization العولمة
Setup إعداد
Sponsor راعي
Charts الرسوم البيانية
Features الميزات
Exclusive حصري
Risk Reward مكافأة خطر
Support دعم
Signal إشارة
Trade تداول
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #التحليل_الفني #الجزء_الثاني