132. مقتطفات مالية - الجزء الثالث
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة هي الجزء الثالث من حلقات بعنوان (مقتطفات مالية) واللي بنلخص فيهم أهم النقاط والمواضيع اللي اتكلمنا عليها في الحلقات اللي قدمناها من أول ما بدأنا.. وهنكمل النهاردة مجموعة جديدة من المقتطفات المالية
: مقتطفات الجزء الثالث
(01:21) الحلقة (56) :أهمية العائد على الاستثمار وتطبيقه على العقارات -
(02:05) الحلقة (57) : كل ما تريد معرفته عن ثاندر - الجزء الأول (أحمد حمودة) -
(02:47) الحلقة (58) : كل ما تريد معرفته عن ثاندر - الجزء الثاني (أحمد حمودة) -
(03:58) الحلقة (59) : 8 مراحل في الطريق للحرية المالية -
(04:45) الحلقة (62) : داخل دماغ المستهلك -
(05:37) الحلقة (63) : خطوات تنفيذ الميزانية -
(06:30) الحلقة (64) : مخاطر سوق الأسهم -
(08:01) الحلقة (66) : المجال المالي كوظيفة (وائل غنيم) -
(08:56) الحلقة (67) : الفرق بين الموظف ومؤسس الشركة - الجزء الأول (أمين الخولي) -
(10:50) الحلقة (68) : الفرق بين الموظف ومؤسس الشركة - الجزء الثاني (أمين الخولي) -
(12:02) الحلقة (72) : ما وراء القطاعات -
(13:10) الحلقة (73) : توزيعات الأرباح في البورصة (أحمد يوسف) -
(15:12) الحلقة (74) : تقسيم، شطب، إدراج الأسهم في البورصة (أحمد يوسف) -
(16:55) الحلقة (75) : حلقاتك برجالاتك -
(18:08) الحلقة (77) :مؤشر شرا المستهلك - مقياس التضخم -
(18:50) الحلقة (78) : العقارات كاش ولا تقسيط -
(19:43) الحلقة (80) : نتحاسب بعدين -
(20:11) الحلقة (81) : ما وراء السندات -
(21:13) الحلقة (82) : المحفظة الكلاسيكية (60-40) -
(22:13) الحلقة (84) : بدايات الكلام عن الأكل والفلوس -
(22:58) الحلقة (85) : حوار مع مستثمر - اكت فاينانشال - الجزء الأول -
(24:42) الحلقة (86) : حوار مع مستثمر - اكت فاينانشال - الجزء الثاني -
(26:48) الحلقة (87) : حوار مع صديق (بين الماضي والحاضر) -
حبينا نسهل على الناس الجديدة تعرف المواضيع اللي أتكلمنا عليها.. يارب الحلقة تكون مفيدة ونشوفكم الاسبوع الجاي في حلقة جديدة إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
الحلقة دي بتجيب مقتطفات من الحلقات وهناخد كده الهايلاتيس بتاعة كل حلقة أو لو في تلخيص معين أو في فكرة معينة كنا بنحاول نقدمها في الحلقات تبقى مفيدة بحيث الناس الجديدة ترجع تسمع الحلقات لو هي حابه المواضيع دي وبالنسبة للناس القديمة اللي بتسمع معانا من الأول ومتبعانا على طول برده هي حاجه مفيدة فيارب تستمتعوا معانا ولو حد بيسمع من الموقع بتاعنا هتلاقوا في Transcript بتاع الحلقة روابط لكل الحلقات المتغطية في الحلقة وهسيبكوا تستمتعوا بالحلقة النهاردة
(01:21)
الحلقة (56) :أهمية العائد على الاستثمار وتطبيقه على العقارات
العائد على الإستثمار برده هي الطريقة الوحيدة إنك توحد بيها وحدة الربحية.. ناس كتيرة جداً بيجوا يسألوني مثلاً والله احنا عاوزين نشتري بيت نشتريه في الحته دي ولا الحته دي انا مبقدرش أرد عليهم من أحساسي أو والله المنطقة دي شكلها أحلى لأ لأن بنلاقي ساعات مناطق ممكن تكون الخدمات فيها أقل ولكن أسعارها مع الوقت بتعلى لأن بيبقى فيها ندرة معينة أو فيها طلب أو مثلاً القطاع اللي عايش فيها عنده زياده في الدخل بتاعه أعلى من قطاع اللي عايش في المنطقة التانية فاللي هيوحد لي هنا هو العائد على الإستثمار.. معلش انا بكرر النقطة دي كذا مره بكذا شكل عشان أبين قد إيه هي مهمه
(02:05)
الحلقة (57) : كل ما تريد معرفته عن ثاندر - الجزء الأول (أحمد حمودة)
عمر: أنت لما أبتديت ثاندر كنت عايز تعمل إيه؟ يعني أنت كمؤسس لثاندر أنت عايز إيه؟
أحمد: حاجتين.. أول حاجه أعتقد إن كل حد من حقه يبقى عنده فرصة أن فلوسه تشتغل ، يبقى هو قاعد في البيت وعنده خيار إن فلوسه بتشتغل ومتكونش الفرصة دي متاحه لناس معينه .. ثاندر موجود عشان كده عشان يبقى كل حد عنده هذه القدرة ، أنا بصراحة كمان من الحاجات اللي وأنا بفكر ابدأ ثاندر كانت بدل ما بنخرج جمعة وسبت بنخرج يوم الجمعة ويوم السبت بنشيل الجزء اللي كنا هنخرج بيه نستثمره أو ندخره عشان مستقبلنا
(02:47)
الحلقة (58) : كل ما تريد معرفته عن ثاندر - الجزء الثاني (أحمد حمودة)
عمر: أنت بتختلف إيه عن البنك العادي يعني أنا النهاردة لما بروح البنوك المشهورة زي البنك الأهلي، بنك مصر أنا فاهم البنك بحوله فلوس بيفتحلي حساب بحط فيه فلوس بحوش والكلام ده كله من ناحية فتح الحساب يفرق إيه حسابك عن حساب البنك؟
أحمد: أنا بس عايز أرجع وأقول لك دايماً إن احنا منتج مكمل للبنوك، غالباً عشان تستخدمنا هتلاقي ليه علاقة بالبنك هتعمل التحويل من عندنا أو هتودع في أحد حساباتنا في البنك احنا جزء من منظومة الخدمات المالية اللي في مصر وعمتاً بنشتغل مع البنوك
احنا بنينا منتج مناسب أكتر للجيل الجديد من حيث التجربة اللي بنوفرها للناس بشكل إننا نمرة واحد عندنا هي تجربة العملاء وإن احنا نشيل كل العوائق فبدل ما تروح لحد الفرع وتاخد اجازة من شغلك وتفضل مستني في طوابير عشان يتفتحلك حساب من على موبايلك، من على تطبيق بنفس اللي انت متعود تشوفه بنفس تجربة المستخدم ، كله على تطبيق أنا هسهلك كل حاجه لو عايز تكلم حد هتلاقي حد على طول بيرد عليك خلقنا تجربة ماشية أكتر مع الأفراد
(03:58)
الحلقة (59) : 8 مراحل في الطريق للحرية المالية
بعد ما اتكلمنا كتير في مواضيع مالية مختلفة ومبدأ الحرية المالية والمصطلحات الكتير اللي اتكلمنا عليها حاولت النهاردة أجهز حاجة بتكلمك على الطريق نفسه بقى كله شكله عامل ازاي يعني النهاردة بعد ما تسمع الحلقة إنت ممكن تكون عارف مكانك أو حضرتك ممكن تكوني عارفه مكانك في الطريق بتاع الوصول للحرية المالية ، نقدر نعرّف مراحل مختلفة إيه اللي بيميزها ، إيه العيوب في كل واحدة فيهم ، تقدر تحط نفسك على الطريق ازاي وهكذا لأن برده طول ما أحنا ماشيين كده وأنت مش عارف أنت واقف على أي أرض أو في أي مكان أعتقد الموضوع صعب شويه.. فأنا النهاردة هتكلم على 7 مراحل ومرحلة صفر يعني 8 مراحل تقريباً في الطريق بتاع الحرية المالية
(04:45)
الحلقة (62) : داخل دماغ المستهلك
زي ما كلنا عارفين السوبر ماركت أو الطلبات الأساسية في الحياة الأكل والشرب ، يعني لما أبص على الميزانية بتاعتي هلاقي إن الحاجات دي من الأساسيات مش من الكماليات احنا كلنا لازم نصرف جزء من فلوسنا هناك ، ولكن مع الاسف في ناس كتير جداً لما بتيجي تبص على الميزانية بتاعتها الحتة دي بالذات مبتبقاش بتتصرف بعقلانية كاملة.
الهدف من الحلقة مش انك متشتريش خالص أو أنك تقعد تقلل من استهلاكك مش ده هدف الحلقة خالص ، الهدف انك تكون واعى بطريقة صرفك وتعرّف عقلك ازاى بيفكر وازاي بيفرق بين اللى أنت عاوزه واللي انت محتاجه.. والفرق بينهم كبير! ممكن حاجه تكون عايزها وحاجه تكون محتاجها واحنا في الاساسيات هنا بنميل أكتر ناحية الاحتياجات.
(05:37)
الحلقة (63) : خطوات تنفيذ الميزانية
هل عمرك حسيت إنك بتعمل ميزانية كويسة ولما بتيجي تنفذها بتواجه صعوبات؟ يعني أنت عارف مثلاً الحساب بتاع البيت محتاج تصرف قد إيه في الشهر ، ومثلاً كهربا وماية كل البنود بتاعة الميزانية اللي احنا اتكلمنا فيها قبل كده.. هل بتحسوا إن التنفيذ صعب؟ ممكن يكون صعب لسبب إنك معندكش خطة تنفيذية لهذه الميزانية يبقى تعالوا نقسم الموضوع اتنين أول حاجه أنا بكتب الميزانية على الورق ، بتوقعها أول السنة بنعمل تقديرات ولكن لما بيجي التنفيذ في الحياة بنلاقي صعوبات عشان أقلل من الصعوبات دي عليا لازم أنظم نفسي ولازم يبقى عندي حاجه تانية اسمها الخطة التنفيذية.. ازاي هنفذ الميزانية بتاعتي دي على أرض الواقع
(06:30)
الحلقة (64) : مخاطر سوق الأسهم
من أكتر الاسئلة اللي بتجيلي من ناس بالذات معندهاش خلفية عن الاستثمار عموماً ازاي استثمر في الأسهم، يعني ممكن انت ميكونش عندك مدخرات كتير أو لسه بادي طريقك وسمعت أن في حاجه استثمار ديماً اللي بيشدك موضوع البورصة، أنا عايز استثمر في البورصة القصص ديماً بتاعة الاستثمار بتيجي عن طريق البورصة ومع الأسف ده كله بيبقى دافع من الأفلام أو القصص الجميلة واللي مش جميلة اللي الناس بتسمعها عن البورصة فأنا عايز من خلال حلقة النهاردة أتكلم بس على المخاطرة بتاعة البورصة ، أفصص الموضوع كده وأقسمه لنقط صغيرة كتير بحيث إن انت تفهم أنك بتعرض نفسك لما بتخش البورصة لمختلف أنواع من المخاطر وهي مش بس مخاطرة إن السهم اللي بتشتريه ينزل أو يطلع، أنا عايز أعرفك النهاردة بطريقة نوعاً ما طريقة علمية المخاطرة هي بس مش إن سعرك ينزل، إيه اللي بيخلي سعرك ينزل أو يطلع بعيداً عن أداء الشركة نفسه في حاجات تانية حوالين الموضوع عايز أتكلم فيها النهاردة معاكو بإستفاضة وأنا مش ضد إنك تستثمر في البورصة أنا ضد إنك تستثمر في حاجه أنت مش فاهم فيها أو مش عارف إيه المخاطرة اللي أنت بتحط نفسك جواها
(08:01)
الحلقة (66) : المجال المالي كوظيفة (وائل غنيم)
عمر: الخبرة VS المعرفة بتبص للموضوع ده ازاي؟
وائل: الخبرة مهمه جداً ودي هتكتسبها مع الوقت ، وهتكتسبها أكتر وهيبقى ليها ثقل لأن ممكن يبقى في خبرات مع الأسف مش مهمه أوي لأن أنت محطتش الوقت الصح في المكان الصح عشان تخدم نفسك وتزود خبراتك ، برده الوقت الصح والمكان الصح والناس الصح زمايلك في العمل في منهم اللي هيفيدك وفي منهم اللي مش هيفيدك في منهم اللي هتقدر تستفيد منه بشكل يومي وفي منهم اللي المجال العمل مش هيتيح لك تحتك بكل الناس كل يوم لكن أنت هتنقي كده مين يقدر يثقلك الخبرات بتاعتك دي وتحاول تقرب منه
(08:56)
الحلقة (67) : الفرق بين الموظف ومؤسس الشركة - الجزء الأول (أمين الخولي)
عمر: آه لأن أنا متأكد أن حتى اللي بيسمعونا النهاردة في ناس عايزة تتحرك من دي لدي أو من دي لدي في اللي فاتح شركته وعايز يرجع موظف وفي الموظف اللي عايز يفتح شركته فالأتنين بيسمعونا النهاردة أعتقد يعني
أمين: فخلينا نتكلم عن بعض الناس عندها تجربه عملية انه حاول وأتعلم دورس معينة والتاني بيفكر وخايف من حاجات معينة أنت دخلت في صلب الموضوع من ناحية أول قرار ممكن حد ياخده بيفكر يفتح شركة ولا لأ كلمة رائد أعمال بمعنى إيه ده اللي بيفرق عن الموظف إن أنا عندي استعداد والقدرة في سبيل اني هاخد مميزات وعائدات مالية وغير مالية إن أنا اخد خطوة زيادة ميبقاش عندي دخل ثابت (مضمون) هو مضمون غير لو حصل مشكلة في الشركة نقصوا عدد العاملين زودوا بس في إحساس عندك إن في جرعة ثابتة من الدخل الشهري بيجيلك وبالنسبة لبعض الناس دي حاجه مريحة وسهله وهي فعلاً مريحة وسهله حسب الدخل اللي بيجيلك لأن في ثبات وبعدين لما نتكلم في الاستثمارات هنتكلم على العائد من الاستثمار هيبقى في زيادة او نقص ده نوع من المخاطر بس الثابت ديماً أقل مخاطرة وده بيدفعلك أقل الحاجه الثابتة طالما مضمونه الناس مستعده تاخد أقل شوية لأنها مضمونه والحاجه المتغيرة هيبقى عايز عائد اعلى لأنه مش ضامن فلازم قبل ما الواحد يفكر هيغير الدخل اللي بيجيله من وظيفة لدخل ممكن يكون أعلى بإنه يعمل شركته هل الفروقات من شهر لشهر ولا من سنة لسنة هتأثر عليه ولا لأ فلازم توقعاته انه يجيله عائد أعلى أو يكون عنده مميزات تانية مستعد إنه يبقى في نوع من المخاطرة أنه ممكن شهر ما يجيش معاه كويس أو شهرين ولكن هو مرتاح في الشغل ده فده يعوض ده دي أول حسبه
(10:50)
الحلقة (68) : الفرق بين الموظف ومؤسس الشركة - الجزء الثاني (أمين الخولي)
عمر: أنا عمري ما بنصح واقول انت المفروض تبقى موظف أو تفتح شركة أنا مش هدفي اني اوجه الناس ان دي احسن من دي أو دي اظرف من دي زي ما احنا ديماً بنقول كل واحد عنده شخصية معينة ، تركيبة فكرية معينة
أمين: ظروفه الحالية والإلتزامات اللي عليه
عمر: الحاجه المشتركة في كل الحاجات اننا نفكر ونحط الارقام بتاعتنا ونحاول نعرف العوائد بتاعتنا سواء انا في وظيفة او هفتح شركتي وبعدين أخد القرار من ناحية علمية مش من ناحية عاطفية يعني هو ده اللي احنا بنحاول نعمله لكن انا زي ما بخوف الناس من مخاطر معينة في الفكرة زي ما في عوائد جميلة ورهيبة وامثله ناجحه كتير اخدت الخطوة وعملتها فأنا ديماً بقول احنا كل اللي بنعمله هنا اننا بندردش مع بعض
أمين: بنوضح الصورة ، بنشوف الناس ممكن تروح تدور فين وتسأل فين وتستشير مين انك تفكر في كل العناصر اللي بتخش في الموضوع
(12:02)
الحلقة (72) : ما وراء القطاعات
حلقة النهاردة أنا حاسس إنها مهمه جداً لكل الناس ، الناس اللي عايزة تستثمر ، الناس اللي عايزة تبتدي شغل ، الناس اللي عايزة تستثمر مع أصحابها ، أو حتى المديرين اللي قاعدين في الشركة اللي بيخططوا لمستقبل الشركة والكلام ده .. ليه لأن النهاردة احنا هنتكلم عن القطاعات والقطاعات هي من أهم الحاجات اللي أنت لازم تفهمها في مجال الأعمال يعني النهاردة أنا لما أروح أفتح مطعم ، المطعم ده هو بينتمي لقطاع جوه الإقتصاد ، يعني إيه قطاع يعني مجموعة من الأنشطة بتعمل نفس الحاجه هنلاقي مثلاً لو روحت فتحت سوبر ماركت فأنا مرتبط هن بقطاع التجزئة مثلاً ، فتحت مثلاً المواد الغذائية يبقى ممكن تبقى تصنيع أو زراعة يبقى هنا التصنيع حاجه والزراعة حاجه تانية خالص ليه لازم أفهم القطاع بتاعتي لأن ده هيأثر على قرارات كتير جداً في طريقة الإستثمار ، حجم الإستثمار بتاعي ، محفظتي .. حاجات كتير جداً هنحاول نغطيها النهاردة في الحلقة أنا بس ببتدي كلامي بقول إن الحاجه دي غصب عنك بتأثر عليك .. القطاع اللي أنت عايش فيه بيأثر عليك
(13:10)
الحلقة (73) : توزيعات الأرباح في البورصة (أحمد يوسف)
ازاي الشركة بتوزع أرباحها في السوق؟ يعني لو أنا عندي حصة في شركة وعندي أسهم.. ازاي الشركة بتوزع الأرباح بتاعتها؟
أحمد: هو طبعاً توزيع الأرباح بيبقى ديماً احد أهم أسباب الأستثمار لناس كتيرة مش مجرد إنه عائد على رأس المال بس ده هو كوبون الكاش أو كوبون الأسهم هو اللي بيبقى فارق كعائد لناس لما بيبقوا مستثمره إن يجيلها دخل تاني غير المرتب من الشغل أو عمل خاص أو أي حاجه .. فالعائد أو توزيع الكوبون أهم حاجات الناس بتستثمر ليه الكوبون واضح وصريح بيطلع من أرباح الشركة مش من رأس مال الشركة ، الشركة بتحقق أرباح وعلى أساسها ممكن توزع كوبون ، والكوبون نوعين حسب سيولة الشركة في وقت معين أو على حسب هدف الأستثمار ، هدف الشركة بتكبر ازاي وبتسخدم الفلوس اللي هي بتطلعها من الأرباح دي هل عشان تكبر الشركة او على أساس أن هي تدفع للمستثمرين بتوعها بس فالنوع الأولاني طبعاً هو الكوبون كاش بيبقى واضح وصريح بيطلع من أرباح الشركة بيتحدد بنسبة معينة في العادة الشركات بتدي إرشاد تحديد معين إن أنا عادة مثلاً في الـ 3 سنين الجايين هوزع نسبة كذا من أرباحي أو مش هوزع لأن أنا عندي صرف على النفقات الرأسمالية معينه إننا نزود الصرف فيها فمش هيبقى عندي سيولة أوزع كوبون كاش .. وإلخ فالكوبون الكاش مباشر جداً بيطلع من الشركة ، الفلوس دي بتتوزع على المقاصة لو احنا بنتكلم على مصر وعلى أساسه بيبقى السمسار بيجمع بناءاً عن العملا من الشركات فالعميل مش لازم يتدخل في الموضوع إنه يجيله فلوس الكوبون بتاعه
(15:12)
الحلقة (74) : تقسيم، شطب، إدراج الأسهم في البورصة (أحمد يوسف)
عمر: طيب هروح معلش لموضوع تاني تقسيم الأسهم وده احنا بنشوفه في مصر والدول العربية وفي أمريكا حتى قريب مثلاً آبل قسمت ، جوجل قسمت ، تسلا أظن قسموا الحاجات الكبيرة دي كلها قسمت أسهمها ، بنسمع على تقسيم الأسهم ده كتير .. إيه هو تقسيم الأسهم؟
أحمد: هقولك على حاجه تقسيم الأسهم ده زي ما أنت بتقول الشركة أصدرت 100 سهم سعر السهم ده 10 جنيه ، أنا في مرحلة ما من كتر ما الشركة كبرت السعر السوقي للسهم وصلت لـ 1000 جنيه ، فـ 1000 جنيه ده مبلغ كبير جداً إني اشتري بيه أسهم في ناس بتستثمر في السوق بـ 200 جنيه يعني الراجل ده مش عارف يشتري ولا سهم فهو مش هيشتري السهم ده ولو معاك 500 جنيه برضه مش هتعرف تشتري السهم ده وحتى لو معاك 10000 جنيه بالنسبالك إنك تصرف 10000 جنيه إنك تشتري 10 أسهم بتحس المبلغ أو الأستثمار مش شايل همه زي ما بيقولوا يعني أنا صارف 10000 جنيه ويجيلي 10 أسهم ماشي أنت العائد ده بيبقى نسبي بس ناس كتيره بيدوروا على أسهم إنك تمتلك كمية كبيرة من الأسهم بعدد فلوس بتاعتك فأنت دلوقتي تقسيم الأسهم ده بما إنك بتاخد السهم كـ رأس مال وبتقسمه على عدد معين عادة في ناس بتقسم على 5 أو على 10 وفي ناس بتقسم على 100 على حسب سعر السهم ده هينزل فين ميزة التقسيم بتاعة الأسهم إنه بيزود سيوله للسهم لأن عدد المستثمرين اللي ممكن يشتروا القيمة السعرية للسهم الواحد بيزيد والسيوله في السهم بتزيد ، وحاجه زي ما بيقولوا في التداول برضه بتقل
(16:55)
الحلقة (75) : حلقاتك برجالاتك
النهاردة أنا هتكلم على موضوع ليه علاقة بالزيادة بتاعة الفلوس بشكل متضاعف بسبب الوقت، النهاردة أنا هتطرق للموضوع بطريقة مختلفة شوية بإننا هبص على مين أكتر واحد عنده وقت في الدنيا – طبعاً الأعمار بيد الله زي ما أحنا عارفين – ولكن العمر المتوقع لطفل لسه مولود هو يعتبر أكتر من والده أو والدته بس إحصائياً مش بتكلم على هل دي حقيقة ولا لأ فلو جينا أتكلمنا من ناحية الوقت هنلاقي إن البيبي المولود الجديد عنده فرصة للاستثمار – أنا عارف إن الموضوع ممكن يبقى غريب شوية لو فكرنا فيه بالطريقة دي – ولكن هو الوحيد اللي عنده الوقت الأطول في الاستثمار ومن هنا هنرجع نقول إن غالباً الناس أول ما بتولد بتبقى فرحانة وبيبقى في طبعاً مصاريف كتير على الأب والأم لتوفير أحتياجات ولكن بننسى إن في يوم من الأيام الطفل ده محتاج جامعة ، محتاج يتجوز ، محتاج مصاريف قدام وعمرنا ما بنخطط لها
(18:08)
الحلقة (77) :مؤشر شرا المستهلك - مقياس التضخم
هدف الحلقة النهاردة إني أعرفك أن في حاجه اسمها مؤشر أسعار المستهلك والمؤشر ده تقدر تتابعه وتقدر تعرف الحاجه اللي أنت بتستثمر فيها هل هي بتجيبلك العائد المطلوب عشان حتى تحمي فلوسك بس وتعرف تاخد الأرقام دي وتحطها في الميزانية بتاعتك وتشوف انت بتصرف ازاي وتاني أحنا بنحاول هنا نبص عليها مش من الناحية الأقتصادية بتاعة الدولة أنا مش عايزك تعرف إيه اللي بيحصل في الدولة أنا عايزك تعرف إيه اللي بيحصل في بيتك وإيه اللي بيحصل في ميزانيتك وازاي تقدر تحارب التضخم بـ إنك بس تغير شوية من العادات بتاعتك أو تشوف انت بتصرف أعلى فين أو أقل فين وتحاول جوه البيت عندك يبقى معدل التضخم أقل من الدولة اللي أنت عايش فيها
(18:50)
الحلقة (78) : العقارات كاش ولا تقسيط
في الحلقة دي أنا عايز أوريك طريقة جديدة تقدر تقارن بيها البيوت عشان نقارن في الأخر الحاجات كلها بنفس المنطلق يعني بنوحد طريقة المقارنة مش بس في السعر ، ومش بس في سهولة الدفع لأ أنا عايز أعلمك طريقة دفع جديدة النهاردة، برضه الحاجه اللي احنا هنستخدمها النهاردة هتخلينا نفكر هل ندفع العقار ده كاش ولا ناخد خطة الدفع اصلاً؟ يعني لو الشركة المطورة بتقولي خد الحاجه دي بـ 1000 أو أدفعها 1500 على كذا سنة ، هل الـ 1000 دي اصلاً سعر كويس إني أخده ولا لأ ، هل هما مش هقول بيضحكوا عليا بس بيحاولوا يدوني تخفيض أقل من المطلوب؟ ولا أعلى من المطلوب؟ في حالات كده وفي حالات كده فأنا عايزك من الحلقة دي تعرف ازاي تاخد القرار ده
(19:43)
الحلقة (80) : نتحاسب بعدين
النهاردة هتكلم على موضوع شوفناه في الفترة الأخيرة وأنتشر واعتقد الناس كلها بتشوفه في الأماكن اللي فيها شوبينج اللي هو تشتري دلوقتي وتقسط مش مع التاجر نفسه أو الراجل اللي بيبيعلك لأ مع شركات مختصة لتمويل الأفراد تمويل ممكن نسميه متناهي الصغر أو صغير
(20:11)
الحلقة (81) : ما وراء السندات
النهاردة أنا هتكلم على السندات وده نوع من أنواع التمويل زي ما قولنا احنا ممكن لو بنفتح مشروع أو عندنا فكرة التمويل بيبقى ديماً عن طريقتين ، عن طريقة إني أطرح حصة في الشركة بتاعتي وده بيبقى في شكل أسهم ، النوع التاني إني بطرح سندات والسندات دي بتبقى عبارة عن نوع معين من القروض ولكن القرض ده مش من البنك ، مش بروح استلف من البنك لأ أنا بطرح سند والسند ده بيتداول في سوق ثانوي زي البورصة كده بيداول الدين بتاع شركة معينة أو دولة معينة أو حاجه معينة الفكرة إن أسعار الأقتراض دي بتأثر زي ما قولنا على مستوى الدخل بتاع المستثمر نفسه اللي هيستثمر في السند نفسه أو في الأداة المالية دي ، فهو العائد بتاعة بيتغير بتغير أسعار الفايدة ، في نفس الوقت لو حضرتك مودع في البنوك ، والبنوك بتروح تستثمر في الأدوات دي فلما الفوايد بتعلى أو بتنزل بتفرق عليك
(21:13)
الحلقة (82) : المحفظة الكلاسيكية (60-40)
محفظة الـ 60/40 دي استخدمت أكتر حاجه في حسابات التقاعد بتاعة الناس بره يعني بتروح للمستشار المالي يقولك طيب احنا عايزين نعمل محفظة.. طيب شكلها عامل ازاي؟ بيقولك الـ (60/40) دي محفظة الكلاسيكية أتفق عليها الناس طبعاً كل حاجه ليها مميزات وليها عيوب ولكن المحفظة دي على المدى الطويل من خلال الأبحاث والأرقام ، يعني أرقام كتيره شوفناها قبل كده المحفظة دي بتهدف على المدى الطويل انك بعد 3 سنين أو 5 سنين عمرك ما بتبقى خسران فيها وده لأسباب أقتصادية لأن الأسهم والسندات تاريخياً يعني في الـ 100 سنة اللي فاتوا بيتحركوا عكس بعض ، في سنين بيحصل أنهم بيطلعوا مع بعض وبينزلوا مع بعض ولكن أغلبية الوقت لما بتلاقي صعود جامد في الأسهم ممكن تلاقي هبوط في السندات والعكس ، لما بنلاقي الأسهم مبتطلعش وتلاقي السندات بتطلع جامد
(22:13)
الحلقة (84) : بدايات الكلام عن الأكل والفلوس
النهاردة حلقة غريبة شوية بالنسبالي وهي جايه من سؤال من حد من المتابعين بتوعنا على الانستجرام بعتلي بيقولي احنا عايزين نسمع حلقة عن علاقة الأكل بالفلوس يعني اللي هو زي الأكل الصحي والوجبات السريعة الغير صحية والحاجات دي كلها عايز بس قبل ما ابتدي الحلقة اقول إني عمري ما درست طب ومليش علاقة بالطب ، ومش بتكلم هنا من الناحية العلمية على قد ما ببص للموضوع من ناحية فلسفية بشوف إيه المعطيات اللي قدامي أكني بدردش معاكو أو مع واحد صاحبي قاعدين كده بنتكلم في الموضوع مش هتبقى زي معظم الحلقات اللي بنتكلم على العائد والحسابات بالأرقام والكلام ده كله وإلى حد بعيد هي جايه من تجربتي الشخصية فممكن الحاجات دي يبقى ليها معنى وممكن لأ ، ممكن حد طبياً يهاجم المعلومات اللي بقولها بس تاني أنا معنديش فكرة عن الموضوع ده علمياً أنا بتكلم فيه من وجهة نظري.. يعني نعتبرها دردشة كده
(22:58)
الحلقة (85) : حوار مع مستثمر - اكت فاينانشال - الجزء الأول
عمر: مين هو المحلل المالي و شغال فين؟ كلمنا بقى على شخصية المحلل المالي ده
مصطفى: في نوعين من المحللين في واحد مستثمر وواحد مسوق للاستثمار فأنا مستثمر ، شركة أكت فاينانشال شركة استثمار فأنا عندي محللين ماليين داخل الشركة دورهم انهم يدرسوا الشركات ويطلعوا قيم عادلة دي غير قابلة للنشر دي بتتعرض على لجنة الاستثمار داخل الشركة عندنا عشان ناخد قراراتنا الاستثمارية فده أداء داخلي المحللين عندنا بيطلعوا دراسات للشركات اللي بنستثمر فيها عشان نستخدمها احنا في قراراتنا الاستثمارية فده نوع المحلل اللي في جانب الشراء فالمستثمر بيحلل لنفسه
في نوع تاني من المحللين مسوقين الاستثمار زي شركات السمسرة زي بنوك الاستثمار الناس دي بتسوق للاستثمار يعني بتبيع منتجاتها للغير للمستثمرين اللي عايزين يستثمروا فبيطلعوا بحوث وتقارير عن السوق وعن الشركات المقيدة فيه ويبدأ يقولك والله انا شايف القطاعات دي قطاعات واعدة للاسباب الفلانية ، الاسهم دي شايفها بتداول أقل من قيمها العادلة عشان انا شايف ان القيم العادلة تساوي كذا فأنا شايف ان الشركة دي هتنموا بشكل كبير في المستقبل بسبب 1 ، 2 ، 3 افتراضات معينة فيبدأ يحلل ويدرس الشركة وينشر التقارير دي لعملاء الشركة بتاعته بحيث انه يشجعهم على اتخاذ قراراتهم الاستثمارية فيستفيد منهم في المقابل انه ياخد أتعاب إدارة استثماراتهم أو تنفيذ استثماراتهم داخل بنك الاستثمار
(24:42)
الحلقة (86) : حوار مع مستثمر - اكت فاينانشال - الجزء الثاني
أخر حاجه هسألك عليها يا مصطفى أوقات الخسارة انتو بتخشوا في أوقات بتبقوا خسرانين بتتعاملوا ازاي مع الخسارة نفسياً معنوياً ، الأفلام كلها القديمة الأبيض وأسود اللي هو راجل بيطلع انا خسرت كل فلوسي في سوق القطن
مصطفى: وينتحر عادة
عمر: آه ديماً بينتهي بالأنتحار كلمني كده على الخسارة وازاي بتتعاملوا مع الخسارة وبتحسوا بإيه والكلام ده يعني
مصطفى: بص زي ما قولتلك في نوعين من الخسارة في خسارة على الورق انت بتشوفها أحياناً ودي بتحصلنا كتير ساعات تشتري سهم وتلاقي نفسك بعد شهر خسران في السوق عشان في مشكلة حصلت ، الكورونا أثرت على أداء الشركة أو القطاع ، اصل دلوقتي في مستثمر أجنبي بيبع في السوق فالسهم نازل بغض النظر عن السبب دي خسارة غير مؤثرة لأنها خسارة ورقية انت محققتش خسارتك بالبيع فعلاً ، انت كنت شاري حاجه بـ 10 جنيه النهاردة تمنها بقى 8 جنيه فانت خسران 20% بس انت مبعتش ففي الأخر انت لسه محققتش خسارتك ، في يوم من الأيام السهم بقى بـ 15 جنيه فأنت كسبان 50% ونسيت خالص الـ 2 جنيه اللي نزلهم السهم وطلعهم تاني دول لأن انت محققتهمش فدي خسارة المفروض غير مؤثرة وعشان كده أنا كنت نصحت الناس من شوية ان اللي يخش ميحصلوش توتر بفكرة انا أمتى محتاج ابيع لو السهم نزل شوية أو لو السهم طلع شوية لأننا خلاص انا عارف انا شاري فين ورايح فين والهدف بتاعي ان الشركة دي تساوي كذا فأنا في مرحلة زمنية معينه هتخارج من السهم ده بالشكل ده فدي الخسارة لكن أحياناً آخرى بتحصل خسارة حقيقية وده وارد في البورصة ووارد في الحياة بس الناس مبتحبش تشوف انت فالاخر ممكن تعمل مشروع وتفشل، تخش تشارك واحد في شركة والشركة تفلس دي مواضيع بتحصل
(26:48)
الحلقة (87) : حوار مع صديق (بين الماضي والحاضر)
عمر: النهاردة الموضوع غريب شوية وأعتقد زي ما قولنا كده المعرفة القديمة دي هتساعدنا اننا نجاوب على الاسئلة بتاعة النهاردة مع بعض ونمشي كده في الحلقة دي موضوع حلقة النهاردة ان احنا عايزين نعرف إيه اللي ممكن كنا بنعمله زمان واحنا صغيرين بعد ما عدينا بالخبرات وبعد ما عدينا بالكارير والحياة وموضوع التعامل مع الفلوس والكلام ده كله إيه المعلومات اللي احنا ممكن نعرفها يعني عن نفسنا بعد الوقت ده كله
شكراً جداً على وقتكم معانا النهاردة وأشوفكوا إن شاء الله الاسبوع الجاي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #مقتطفات_مالية #الجزء_الثالث