131. ٨ مراحل فالطريق للحرية المالية (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بعد ما أتكلمنا كتير في مواضيع مالية مختلفة ومصطلحات مالية كتيرة أهمها مصطلح الحرية المالية
حبينا النهاردة نعرّفك "الطريق" للحرية المالية نفسه بقى شكله عامل ازاي؟
٨ مراحل مالية مختلفة في الطريق للحرية المالية
ازاي تحط نفسك على الطريق وتعدي من مرحلة لمرحلة وإيه مميزات وعيوب كل مرحلة هو ده موضوع حلقتنا النهاردة
01:34 مرحلة الاعتماد المالي -
02:13 مرحلة الملاءة المالية -
03:00 مرحلة الاستقرار المالي -
04:24 مرحلة الأمن المالي -
07:32 مرحلة الثقة المالية -
09:59 مرحلة الاستقلال المالي -
11:36 مرحلة الحرية المالية -
12:28 مرحلة الوفرة -
هدف حلقة النهاردة هو إنك تعرف أنت واقف في أي مرحلة مالية عشان لو محتاج تاخد خطوة لقدام تعرف المرحلة اللي جايه محتاجه منك إيه وتبدأ تشتغل عليها عشان توصل للي بعديها واللي بعديها وهكذا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
اهلاً بيكوا في حلقة جديدة من بودكاست كلام ينور
بعد ما أتكلمنا كتير في مواضيع مالية مختلفة ومبدأ الحرية المالية والمصطلحات الكتير اللي أتكلمنا عليها حاولت النهاردة أجهز حاجه بتكلمك على الطريق نفسه بقى كله شكله عامل ازاي يعني النهاردة بعد ما تسمع الحلقة أنت ممكن تكون عارف مكانك أو حضرتك ممكن تكوني عارفه مكانك في الطريق بتاع الوصول للحرية المالية ، نقدر نعرّف مراحل مختلفة إيه اللي بيميزها ، إيه العيوب في كل واحده فيهم ، تقدر تحط نفسك على الطريق ازاي وهكذا لأن برده طول ما أحنا ماشيين كده وأنت مش عارف أنت واقف على أي أرض أو في أي مكان أعتقد الموضوع صعب شويه.. فأنا النهاردة هتكلم على 7 مراحل ومرحلة صفر يعني ٨ مراحل تقريباً في الطريق بتاع الحرية المالية
01:34
المرحلة رقم صفر اللي هي الاعتماد المالي
اللي هو أنا واحد مازلت لسه في الجامعة ، أنا أعتبر شخص معال يعني حد بيعولني ، معنديش دخل ثابت ، أهلي أو أي حد بيصرف عليا فده يعتبر المرحلة صفر أنا لسه مبدأتش ، معنديش أي دخل ولكن عندي مصروفات فلازم حد يغطيلي المصروفات دي والمصروفات دي بتتغطى من حد غيري
01:59
محتاج أعمل إيه عشان أخرج من المرحلة صفر يا إما يبقى عندي وظيفة ثابته بدخل ثابت ، يا إما يبقى عندي مشروع معين أنا بشتغل فيه هو ده اللي هينقلني للمرحلة رقم 1 وهي مرحلة الملاءة المالية
02:13
مرحلة الملاءة دي النفقات بتاعتك في الحلقة بتاعة الميزانية مثلاً أتكلمنا على المصروفات بتاعتك دي بتتغطى من دخلك وبتتغطى من دخلك بالكامل في المرحلة دي أنت تقدر توفي الألتزامات بتاعتك لو عندك فاتورة ، عندك سحب عشان تدفع قسط معين أياً كان أنت عندك القدرة إن الـ 100 جنية أو دولار بتاعتك اللي بتخشلك كل شهر بتاخد منها مصاريف يا 100 يا أقل
هنا أنت في المرحلة اللي هي عندي ملاءة أقدر أصرف على نفسي مش محتاج حاجه من حد مش لازم يكون عندي مدخرات مش لازم يكون عندي أي حاجه ، ممكن برده يكون عندي ديون بسيطة ولكن الدخل الشهري بالنسبالي هو بيغطيه فدي المرحلة رقم 1 مرحلة الملاءة
03:00
بعد كده هنخش على المرحلة رقم 2 اللي هي الاستقرار ، الاستقرار ده هكون بعمل نفس الحاجه اللي كنت بعملها في مرحلة رقم 1 اللي هو أنا بدفع اللي عليا وكل اللي احنا أتكلمنا عليه ده وأبتديت احوش دخل إضافي بسيط بحطه في صندوق الطوارئ
لو أنا قدرت أوصل إن يبقى عندي صندوق طوارئ يبقى أنا عندي نوعاً ما استقرار مالي ليه؟ لأن أنت في المرحلة صفر والمرحلة 1 لو حصلك لا قدر الله أي مشكلة أنت محتاج تروح تستلف ، محتاج تروح تستلف يبقى أنت هتعمل عجز في الميزانية بتاعتك وهكذا لكن في المرحلة 2 هنا اللي هي مرحلة الاستقرار بقى عندك جزء من دخلك انت بتعرف تحوشه باستمرار وحطيته وكونت صندوق الطوارئ بتاعتك وبمجرد إنك كونت صندوق الطوارئ هنا فأنت مش هتمد أيدك لقرض أو هتروح تاخد حاجه عشان تسد اللي عليك فمن هنا جت كلمة الاستقرار إن أنت الميزانية بتاعتك مبقتش بس بتكفي المصاريف بتاعتك ولكن هي عندها شوية فائض ده ما يمنعش إن في المرحلة 2 دي يبقى عندك ديون زي دين لسداد بيت أو عربية ده طبيعي جداً مدام القسط داخل في الميزانية بتاعتك فده يعتبر بالنسبالي مفهوش مشكلة أنت عندك استقرار أنت عارف تدفع عربيتك ، عارف تدفع بيتك ، ومازلت عندك صندوق للطوارئ
يبقى هنا اللي بيميز مرحلة رقم 2 عن المرحلة رقم 0 و 1 إن احنا بقى عندنا حاجتين صندوق الطوارئ وعندي الوعي إني أبتدي أحوش جزء من دخلي شهرياً
04:24
نيجي بقى للمرحلة 3 وهي مرحلة الأمن المالي المرحلة دي اللي بيميزها إني بعد ما بنيت صندوق الطوارئ بتاعي فأنا صندوق الطوارئ ده بيحميني في المواقف الصعبة وهكذا ، أنا بحاول أقفل كل القروض اللي عليا وخاصة القروض الإستهلاكية اللي هي بتبقى فوايدها عالية ، قصيرة الأجل ، جايه من بطاقات ائتمان وهكذا أنا بحاول أقفل كل الحاجات دي بقى عشان الفلوس اللي معايا ابتدي أوظفها في أماكن أحسن
فالمرحلة دي بتتميز إن أنت برده بتظبط الميزانية بتاعتك بتحاول تخليها شكلها جاهزة أكتر أنها تستثمر لأن انت هنا بقى عندك فائض وبتقفل كل الديون اللي عليك في المرحلة رقم 3 وبعدين هنبتدي نبص في المراحل اللي بعد كده على الاستثمار
05:14
وهنا في حاجه مهمه جداً يمكن أخدت بالي منها إن الناس بتحاول تنط المراحل يعني ممكن مثلاً حد يبقى في المرحلة رقم 1 أو في المرحلة رقم 2 وبيحاول يعمل المرحلة رقم 5 أو 6 أنا معنديش مشكلة إنك تبقى بتتعلم الحاجات دي ، معنديش مشكلة إنك تبقى واعي وعندك دراية بالحاجات دي ، معنديش برده مشكلة إنك تجرب بمبالغ صغيرة ولكن أنا بحب ديماً أمشي بالترتيب لأن تاني رحلة الاستقلال المالي ده موضوع طويل جداً وبياخد وقته
زي اللي بيتمرن وبيحاول يعمل أصعب حاجه أول يوم في التمرين أنا بالنسبالي أنا بحاول أمرن نفسي وأمرن مخي وامرن إسلوبي إني مينفعش أبقى مستثمر كويس ورائع وجميل وأنا معنديش أصلاً ميزانية كويسة في الخلفية
06:04
هنلاقي المراحل الأولانية كلها بتركز على حالتك المادية ، توزيع الثروة بتاعك موجود ازاي ، انت بتدفع مصاريفك ولا لأ ، قفلت ديونك ولا لأ قبل ما نبتدي حتى نتكلم في أول 3 مراحل خالص عن الاستثمار فدي نقطة مهمه جداً لفتت إنتباهي برده عايز أقولها لحضراتكم لأن بيجيلي ديماً اسئلة كتير جداً جداً والناس مثلاً عليها ديون كتيرة جداً وبتحاول تستثمر ما هي ملهاش معنى لو أنت مش قادر تقفل ديونك أو عندك الفائض الكافي في دخلك إن أنت تقفل ديونك قبل ما تبتدي تستثمر لأن أنت كده بتحط مخاطرة على مخاطرة وده من وجهة نظري مش هيوصلك للحرية المالية
06:40
برده حاجه أكتشفتها من خلال رحلتنا في البودكاست ده إن الناس بتقف في أول 3 مراحل دول يعني الناس صعب جداً تعبر من المرحلة 3 للمرحلة 4 ليه؟ لأنها ممكن متكونش جاهزة نفسياً ، ممكن ميكونش عندها الميزانية أو الوضع المالي الكافي ولكن هوفي الأخر بالنسبالي عبارة عن تنظيم ، ممكن خوف من البدء في الاستثمار حاجات كتير جداً
فهنلاقي لو ببص على الناس على أصحابي هنلاقي إن الناس كلها يا إما في المرحلة 2 يا إما في المرحلة 3 أغلبية الجموع بتبقى في الحته دي ، يا إما هو خلاص عنده الأمن المالي مش مستريح فمش قادر يفكر في حاجات مش قادر ياخد مخاطرة أو خلاص يا دوب هو عايش يوم بيوم ومش بيفكر في المستقبل فدي ميزة البودكاست أنا بحاول أنقل الناس للفكر اللي هو لأ أنت ممكن بقى تعدي للناحية التانية وتشوف وهنشوف الكلام ده من خلال المراحل اللي جايه
07:32
هنخش على المرحلة 4 مرحلة الثقة المالية وأنا بالنسبالي دي من المراحل المهمه جداً جداً إن أنت تخش فيها لأنها بتديك ثقة في الحياة نفسها بتنقلك في مرحلة من اللي هو أنا كنت بقبض كذا وبصرف كذا وخلاص لأ أبتديت أوجه المدخرات بتاعتي ، احنا ممكن نكون في المرحلة 3 أو المرحلة 2 كمان ممكن كنا ابتدينا نحوش بشكل منتظم عشان نكون صندوق الطوارئ بتاعنا أو نقفل الديون فأنا عندي التجربة بتاعة التحويش هنا ما زالت موجودة فأنا في المرحلة 4 أكيد لسه بحوش والمفروض أبتدي احوش
طب أنا إيه اللي هيفرق عندي في المرحلة 4 إن أنا هيبقى عندي خطة ، هنا أول مرة هبتدي أحط خطة إستثمارية أنا هعمل إيه بالدخل بتاعي لازم يبقى عندي حاجات مثلاً ممكن تديني عوائد قصيرة الاجل أو طويلة الأجل أياً كان ممكن واحد مثلاً ابتدي يستثمر في محفظة متنوعة فيها أسهم أو عقارات أو فيها بيت صغير أرض أي حاجه زي ما أنتو عايزين ده مش موضوع الحلقة النهاردة بس أنا بقى عندي خطة مالية ذكية بحاول بقى أخد منها جزء من الدخل بتاعها بيتدي يخش عندي في الميزانية فمكان الدخل مش هيبقى عندي بس الدخل اللي جاي من الشغل أو المشروع بتاعي لأ هيبقى عندي جزء من الأرباح اللي داخله من مشاريعي أو محفظتي المتنوعة فدي المرحلة 4 بتتميز بخطة إستثمارية
08:55
في المرحلة 4 برده مش معناه ان احنا خلاص هنستقيل من الوظيفة ومش هيبقى عندي دخل لأ طبعاً احنا هنا لسه مازلنا في الطريق احنا مقولناش ان انت وصلت خالص أنت بس عندك ثقة في طريقة إدارتك للفلوس ابتديت تطمن شوية لو حصلي حاجه على الأقل عندي 10 / 15 / 20 / 30% من الدخل بتاعي جاي من الاستثمارات اللي أنا بعملها ، فأنت هنا ما زلت موظف بتحاول تجيب دخل
09:23
أعتقد برده هنا أنا لاحظت حاجه وأنا ببص على المراحل المختلفة إن المرحلة 4 دي غالباً أطول مرحلة في الوقت يعني عشان أول لمرحلة 5 أنا هضطر أدي وقت طويل في المرحلة 4 عشان ابتدي أحوش الأصول اللي مع الوقت تبتدي أسعارها تطلع وتبتدي هي تدخلي دخل مع الوقت أكبر وهكذا فمن ناحية الوقت ممكن أتحرك من 1 لـ 2 ومن 2 لـ 3 بسرعة من 3 لـ 4 حتى مفهاش مشكلة من 4 لـ 5 هنا هناخد وقت شوية في 4 يعني دي هتبقى معظم حياتنا العملية
09:59
لأن المرحلة 5 وهي مرحلة الاستقلال المادي دي المرحلة اللي هتبتدي الأصول اللي أنا بنيتها في المرحلة 4 تغطيلي مصاريفي بشكل كامل
إفتراضاً مثلاً انا موظف وقعدت طول حياتي أحوش وصلت لسن 45 حتى قبل سن التقاعد بفترة طويلة ولادي خلاص دخلوا الجامعة ، مصاريفي ابتدت تنزل فالدخل السنوي اللي أنا محتاجه بقى رقم أقل مثلاً من 10 سنين لما كنت أنا في قمة صرفي وعندي أصول تقدر تدخلي الدخل ده فأنا هنا ابتديت أقدر أستقل مالياً إننا ممكن أسيب الوظيفة
يبقى المرحلة 5 هي المرحلة اللي أنت بتحس خلاص إن انت الأصول اللي عندك تقدر تغطي الدخل اللي نقص من الوظيفة وتقدر تصرف على كل المصاريف اللي أنت بتعملها في حياتك لما توصل للحظة دي يبقى أنت هنا مستقل مالياً
10:57
برده عايز أقول إن الرقم ده .. مفيش رقم ثابت ، مفيش سن ثابت أنت ممكن تصل إلى هذه المرحلة وأنت عندك 30 ممكن واحد مش متجوز خالص معندوش أي إلتزامات هو وصل للإستقلال المادي بتاعه بدري ، ممكن واحدة مش متجوزة ، واحدة مطلقة أياً كان الوضع الإجتماعي ففي دخل معين بغطي ممكن انت تكون راجل عندك 60 سنة فأنا مش عايز أحط رقم اللي هو لو وصلت للرقم الفلاني يبقى أنت وصلت للإستقلال المالي مفيش حاجه اسمها كده ، كمان الدولة اللي أنت قاعد فيها الميزانية بتاعتك شكلها عامل ازاي فـ المرحلة دي كل واحد بيوصلها على وضعه الخاص
11:36
المرحلة 6 بعد الاستقلال المالي هي الحرية المالية ، وهنا هنفرّق ما بين الاستقلال والحرية المالية
الاستقلال هنا هو أنت ممكن لوحدك تقدر تعيش سواء أنت أو المجموعة اللي عايشة معاك أو أياً كان إن أنت ميزانيتك مظبوطه ، الحرية المالية هنا أنا هاخد خطوة زيادة إن أنا هيبقى عندي فائض دخل يسمحلي اعمل أفكار جانبية ممكن مثلاً مشروع جانبي يبقى أنا بغطي حياتي وكمان عندي فائض أعمل مشروع أو عندي فلوس كافية لو عاوز أسافر في أي وقت أو عايز أعمل أي نوع من أنواع الكماليات هنا معنديش مشكلة لو وصلت للمرحلة دي بقى أنت وصلت للحرية المالية من المراحل اللي بنتكلم عليها
12:28
آخر مرحلة هي المرحلة 7 وهي مرحلة الوفرة وهي إني انا خلاص ممكن وقتها أنا مش بعمل الحاجات دي أنا كمان عندي إدارة أموال ممكن تكون بشكل محترف أكتر مدي فلوسي مثلاً لشركات إدارات أصول ، عندي محفظة كبيرة بتستثمر في قطاعات مختلفة ، عندي مصنع كبير خلاص أنا هنا عندي وفرة مالية الدخل السنوي اللي بيجيلي كذا ضعف من اللي أنا بصرفه كل شهر أو كل سنه فأنا عندي وفرة مالية ممكن تورث حتى للأجيال اللي بعدي مش لازم لأسرتي بس أقدر أعديها لعيلة وعيلتين تحتي كمان هنا موضوع الوفرة
وطبعاً كل ما بنعرف المراحل كل ما عدد اللي بيوصل للمراحل ده بيقل بطبيعة التوزيع يعني هنلاقي معظم الناس في العالم يعني هتلاقيهم ما بين المرحلة 2 و 3 و 4 و 5 مثلاً ، هنلاقي المرحلة 6 و 7 والمرحلة الأولى خالص اللي هي 0 و 1 مفهاش ناس كتير جداً لأن الأغلبية بيبقوا ديماً في النص
13:30
فالمرحلة 7 دي زي ما قولنا عندي وفرة زيادة أقدر أعمل حاجات كتير معنديش مشكلة مادية وهكذا ولكن اللي بقوله للي بيوصل للمرحلة دي إن في أمثلة كتير جداً بنشوفها من سوء إدارة مالية معينة أفكار معينه أو مخاطرة معينه بتتاخد بيخلي الناس تنزل من المراحل دي ترجع لورا فديماً خلي بالك مش معنى إنك وصلت للمرحلة دي هي مرحلة مضمونة إنك تفضل عايش فيها أو توصل للمرحلة اللي بعديها لازم كل مرحلة يبقى ليها خطة لازم يبقى ليها طريقة في التنفيذ يعني مش عايز الناس تفتكر إن خلاص أنا كده استريحت وخلاص معنديش مشكلة والفلوس اللي جايه قد اللي بيصرفها ومفيش مشكلة لأ بيظهرلك من آن لآخر مشاكل تقلبات في الإقتصاد حاجات كتير لازم تبقى انت واعي بيها ازاي تدير محفظتك الاستثمارية
14:22
قبل ما أقفل النهاردة أخدت بالي من كل المراحل إن الموضوع هو عبارة عن دخل ومصروف تبسيطاً للمراحل دي كلها أنت كمية الدخل بالنسبة للمصروف بتاعك ده محدد جداً جداً أنت في أي مرحلة ، طريقة إستثمارك للفلوس اللي جايه دي بتحدد برده
أنا النهاردة بس عايز أديك أمثلة كتير على كذا شكل في الحياة لكذا حد عايش بالطرق دي وأنت تعرف نفسك أنت في أي مرحلة عشان لو محتاج تاخد خطوة للأمام تعرف المرحلة اللي جايه محتاجه إيه فتبتدي تشتغل عليها عشان توصل للي بعديها واللي بعديها وهكذا
15:00
نرجع نقول تاني هو مصروف وميزانية لازم تبقى جاهزة ، لازم تبقى معموله والاستمرارية عشان نعدي من كل المراحل دي لازم ندخر ، لازم نستثمر الموضوع بسيط جداً مفهوش تعقيد ومفهوش صعوبة متقولش صعب أوي أنا في مرحلة رقم 1 أو 2 ازاي هوصل للمرحلة رقم 6 و 7 أي حد وصل للمراحل دي هو عدي بالحاجات دي أنا بس بحاول أنقلك التجارب اللي الناس بتعملها .. شكراً جداً جداً على وقتكوا الاسبوع ده وأشوفكوا إن شاء الله الاسبوع الجاي
Translation of some words and terms:
Expenses النفقات
Budget الميزانية
Emergency Fund صندوق الطوارئ
Once بمجرد
Saving مدخرات
Short Term قصيرة الأجل
Balance Sheet توزيع الثروة / الموازنات
Assets الأصول
Survive يعيش
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #مراحل_للحرية_المالية #إعادة