127. ما يسأله المستمعون - الجزء 12
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
استكمالاً لأسئلة المستمعين اللي جاوبنا عليها في الحلقة اللي فاتت عملنالكم حلقة جديدة وجزء جديد من ما يسأله المستمعون عشان نكمل رد على باقي اسئلتكم ويا رب تكون الحلقة مفيدة
: أسئلة الحلقة
(01:20)
هل لو أخدت قرض واشتريت شقة، هل القرار ده ليه جدوى اقتصادية؟:حلقات ليها علاقة بالعقار
56. أهمية العائد على الاستثمار وتطبيقه على العقارات
(09:05)
شخص عليه دين وحجم الدين ومصدر الدخل مش مساعد انه يسدده والحل الوحيد من وجهة نظره انه يبيع عربيته بس هي ضرورية جداً.. هل في اي افكار ممكن تساعد ان الدين ده يدفع؟(12:55)
كصاحب شركة امتى اوزع الأرباح للمساهمين وامتى اسيب الفلوس جوة الشركة؟ وأمتى ابتدي اعلي مرتبي كموظف جوه الشركة؟
ابعتولنا أسئلتكم سواء على الإيميل أو على صفحتنا على السوشيال ميديا وهنجاوب عليها في حلقات ما يسأله المستمعون القادمة ودايماً بنأكد لو في أي وقت عندك سؤال ومش حابب اننا نجاوب عليه في الحلقات عرفنا انه سؤال شخصي، خصوصية المستمعين دايماً محفوظة
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
انا عملت حلقة تانية النهاردة اكمل فيها أسئلة المستمعين، حاسس انها مهمه وبرضه بتخرجني من الخط اللي انا بفكر فيه و بتوديني في حتت جديدة ممكن أكون عايز أدور فيها أو عايز اطلع إجابات بشكل أفضل للناس، هسيبكوا مع الجزء التانى من أسئلة المستمعين وهستنى دايماً أسئلتكم سواء على الإيميل أو على صفحاتنا على السوشيال ميديا واتمنى يارب تكون حلقة مفيدة
(01:20)
السؤال اللي جاي من مستمع الأستاذ ب هو بيبتدي بيقول عندي سؤال مهم جداً وانا بصراحة قريت السؤال وهو سؤال مهم جداً جداً ولطيف واعتقد هيفيد ناس كتير من اللى بيسمعونا لأنها مشكلة متكرره مع الناس
السؤال بيقول عندي سؤال مهم جداً وعندي حاجات كتير تعتبر واقفة عليه ومش عارف اخد قرار فيه الموضوع اني عايز اخد قرض من البنك واشتري شقة لأن طبعاً مفيش كاش اني اجيب الشقه الفكرة اني ضد فكرة القروض بس اللي في دماغي اني اصلاً بستثمر في البورصة كل شهر 10% من مرتبي بقالي فترة وان خلال 5 سنين حد اقصى هتكون ارباح الاستثمار قادرة انها تدفع تمن القرض بتاع الشقة مع الحفاظ على الأصل اللي هو الشقة وطبعاً الاستثمار..
طيب السؤال ده أنا هجاوب عليه من كذا ناحية يعني
أولاً الملائمة بتاعة الفرد، يعني إيه الملائة يعني انا بيجيلي 100$ أو 100جنيه كل شهر فلازم اول حاجه اعملها لو انا هاخد قرض القرض ده انا محتاج ادفعه يعني في المثال اللي الاستاذ ب بيديهولنا في المثال ده انا محتاج ادفع القرض من الشهر الجاي اول سؤال هسأله هو طبعاً مفيش إجابة واحده بس أول سؤال هسأله لحد بيقولي الكلام ده هقوله طيب انت لو اخدت قرض هل القرض ده هيضغط عليك؟ قد إيه هو من ميزانية بتاعتك يعني لازم اتأكد إن اقساط القروض اللي انا هاخدها أو التمويل لازم تكون ليها مكان في الميزانية بتاعتي المكان ده مش بس اقدر ادفعه لأ اقدر ادفعه ومش هيضغط عليا نفسياً لأن مشكلة الناس انها بتحط أحجام التمويل بتاعها غلط بالنسبة للميزانية بتاعتها فهو غالباً هنا عايز ياخد قرض سواء يجيب بيه الشقة كلها او هيحط مقدم ويقسط الباقي مع الشركة ففي الحالة الأولانية لازم اعرف تمن القرض ده قد إيه وهيخش قد إيه وفي الحالة التانية لو انا بس بمول المقدم بس بتاع البيت ده لازم احط في الميزانية بتاعتي تسديد المقدم وتسديد الأقساط اللي باقية على الشقة لحد ما استلمها الاتنين دول لازم يبقوا في الميزانية بتاعتي وهو عشان المثال بتاعه بيقول انا بستثمر 10% من دخلي ومتوقع ان الاستثمارات بتاعتي تسد في الاخر طيب هل انت هتعرف تحافظ على الـ 10% ولا لأ فلو قلنا ان 10% من دخله بيروحوا للاستثمار لازم نتأكد انهم هيفضلوا موجودين، ولو ده المقدم نتأكد ان القسط بتاع القرض ده هيفضل موجود والحالة التالته اللي هي الاقساط اللي باقية على الشقة هقدر ادفعها ولا لأ بحط الـ 3 حاجات دول على الميزانية
طيب بالنسبة بقى للقرض ممكن الواحد يبقى شوية كرييتف يشوف مثلاً طريقة يحاول مثلاً ياخد سلفة من ناس حواليه او من اهله او من الناس القريبين بحيث الفوايد متبقاش عالية يعني بنصح الناس انها دايماً تجرب كل الحلول، ممكن واحد عنده كاش شايلة على جانب مش حاطه في أي استثمار تعرفه هياخد 6 شهور يشتري بيه حاجه فانت ممكن تتكلم معاه انك تاخده يعني تحاول تبقى مبدع في الطرق اللي انت بتحاول تجيب بيها الفلوس
الحاجه اللي بعد كده اللي لازم اخدها في الاعتبار أن التمويل ده في ناس بتعتبر انها عايزة تاخد تمويل إسلامي فبشجع الناس انها تروح تشوف البدائل الإسلامية حاجه من بنك إسلامي تمويل على البيت ممكن برضه تشوفه
طيب بالنسبة للفوايد اللي انا هدفعها على القرض انا في العادي مبحبش او مبحبش الناس تاخد القروض او التمويلات للصرف او للسلع الاستهلاكية يعني مبحبش امول أكل وشرب بقروض او حاجات بتستهلك حتى لو مدارس لو لبس او سفر مبحبش اعمل كده لأن دي مش أصل الحالة الوحيدة اللي ممكن اسمع من ناحية اقتصادية بحتة انك تشتري أصل ، البيت هنا يعتبر بالنسبالي أصل فلو قلنا ان انا بدفع فوايد على القرض ده ولكن سعر العقار نفسه بيزيد سنوياً فانا لو واخد مقدم 10% من تمن الوحده وواحده ككقرض عشان ابتدي والوحدة نفسها بتطلع 10 أو 15% في السنة فغالباً ده أعلى بكتير من الفوايد اللي أنا بدفعها لأن انا بدفع الفوايد على الـ 10% فقط ولكن سعر الوحدة بيطلع بالكامل عن الـ 10% فمن ناحية هل اخد قرض واشتري بيت ده ليه جدوى إقتصادية آه ليه جدوى اقتصادية لو المكان اللي انت اشتريته ده بيطلع بأعلى من الفوايد
طب اعرف الكلام ده ازاي انا ممكن اقعد احسب واحط الأقساط بتاعتي لمدة 5 أو 10 سنين أياً كانت المدة المتوقع الوحدة دي تطلع بأد إيه في السنة وأحسب الفوايد اللي البنك بيحاسبني عليها هعرف وقتها هل ده ليه علاقة إجابية او بيطلعلي فايدة اقتصادية من هذا القرار فده من ناحية التفكير انا هعمل ايه هقعد مع نفسي واحط الكلام ده كله وهعرف ميزانيتي وهعرف قد إيه الفوايد اللي انا هدفعها وهعرف المتوقع العقار ده هيطلع قد إيه
الحاجه الأخيرة اللي انا لازم احطها في الاعتبار ان وانا عليا قروض انا لازم أجيب دخل يعني انا في العادي لو مش مداين من حد ومعنديش فلوس وخسرت شغلي الموضوع بيبقى اسهل شوية فانا ممكن اقول لواحد اه لو انت عندك صندوق طوارئ، لو عندك مدخرات على جانب لو حصلتلك لا قدر الله حاجة في الشغل انت ممكن تقعد 6 شهور، 3 شهور تدفع الاقساط اللي عليك لأنها لو داخل الميزانية بتاعتك وعندك صندوق طوارئ فأنت عامل حسابك ان في الفترة اللي هسيب فيها شغلي ممكن اسحب من صندوق الطوارئ بتاعي او ممكن ادفع اللي عليا لأن انا طبعاً مش عايز الناس تبقى اولاً عليها مخاطرة كبيرة إنها بتاخد حاجه هي مش هتقدر تتحملها لو لا قدر الله سابت الشغل الحاجه التانية الضغط النفسي اننا دايماً عايش لازم اشتغل ولازم افضل اشتغل ده برضه حاجه صعب جداً فهرجع واقول تاني كل حاجه مختلفة عن التانية لازم تقعد وتحط أرقامك وتعرف المخاطرة موجودة فين، فرصتك انك تسيب شغلك عالية ولا واطية طبعاً في حاجات بره أيدينا بتحصل من حين لآخر يعني مش هنقدر نحسبها ولكن بشكل عام انا هقعد وهعرف هل الموضوع ده هيضغط عليا ولا لأ لو مش هيضغط عليك على المدى الطويل غالباً القرار ده هيبقى صحيح ولكن لازم تبقى عارف ايه اللي انت بتاخده
حاجه كمان على موضوع العقار بشكل عام احنا عملنا حلقات احنا ممكن نحطها في الشو نوتس ازاي تحسب العائد على العقار بتاعك، تشتري كاش ولا تقسيط والكلام ده كله في كذا حلقة عملناها قبل كدة فبرضه هرجع للسؤال اللي جاوبنا عليه انت برضه ممكن ترجع تسمع الحلقات دي بالذات لو فاتتك لأنها ممكن تديك رؤية كده على موضوع العقار بشكل عام
(09:05)
في سؤال تاني والمستمع كان بيأكد على عدم ذكر اسمه، بيقول لو في شخص قريب وعليه دين وحجم الدين ومصدر دخله مش مساعد انه يسدد خالص وهو شايف ان الحل انه يبيع عربيته عشان يسدد بس هي ضرورية جداً ممكن يعمل إيه لو في اي افكار ممكن تساعد ان الدين ده يدفع؟
طيب بشكل عام الناس ممكن تبقى انا هبيع العربية والعربية دي ممكن تكون مصدر دخلي او بستخدمها في أساسياتي الحياتية والكلام ده كله وهضغط على حد قصادة عشان يدفع ده وخاصة انه قريب يعني فأعتقد ان الحل دايماً هيبقى تسديد مبالغ حتى لو صغيرة يعني مع الاسف اننا معملش اي حاجه واقعد فترة طويلة مش باخد اي حاجه خالص او اننا اخد كل حاجه مره واحده في الحالتين بحسهم زيادة عن اللزوم يعني فاللي انا انصح بيه هنا ان ممكن نقعد مع بعض ونتفق اننا اعمل جدولة حتى لو المبلغ ده هاخد منه 1% او 2% في الشهر ولو ربنا كرمه بحاجه وباع حاجه او جاله فلوس من شغله او من حته تانية يبتدي يزود في المبالغ
الفكرة اننا ابتدي اخد حتى لو مبالغ صغيرة ان انا هنا حطيت الراجل اللي عنده دين ده في نظام يخليه يشوف امل انه يقدر يسدده واحنا في الحلقه اللي فاتت اتكلمنا على قد ايه مهم جدا ان انت يبقى عندك زخم ان انت خلاص ابتديت تدفع وتركز فكل ما بدفع حاجه صغيره بحس ان الدين بيقل عليا فده بيحمسني ادفع اكتر وبيخلي التركيز بتاع الشخص اننا بقى عايز أخلص الدين ده فيلا حاول اجيب فلوس اجيب حاجه من هنا او من هنا
فمن وجهة نظري اول حل اننا ناخد مبالغ صغيرة، حتى لو هي كانت صغيرة من اصل المبلغ مش مهم بس على الأقل بينا ان في نظام، تاني حاجه انا ممكن طبعاً بالاتفاق اننا لو عايز اخفف عنه الدين شوية يعني انا من ناحيتي احاول اساعد ممكن اقول له طيب خلاص حاول ترجع 10 او 15% اقل بس انا مش هدي الاختيار ده غير لما ابتدي اشوف الحد اللي قدامي ده ملتزم وخلاص هستعوض ربنا في باقي الفلوس لان ممكن تكون حالته والوضع المالي بتاعه بجد المبلغ ده كبير عليه ومش قادر يدفعه ففي الناحيتين دول ممكن يخلوا من وجهه نظري يعني بسيطه الموضوع ده يتحل
طبعا برده هزود حاجه صغيره ان الكلام ده لو اتكتب يبقى افضل يعني حتى لو مكتوب في ايميل او في رساله لما الحاجات بتتكتب وخاصه في الديون بتخلي عند الناس هو خلاص التزم قدامك مش بس بالكلام لا ده كتبها ومش لازم طبعا بعقده نمضي عليه وكده بس حتى لو رساله في يومين او على وتساب او ماسنجر او اي حاجه بتخلي الطرفين ملتزمين قدام بعض بالشروط الجديدة دي فيعني ده بمنتهى البساطه وممكن بعد شويه يتعسر تاني بس على الاقل احنا حددناه الخطوط بتاعتنا وزي ما قلت انا ممكن بعد شوية اديله حافز تاني انه طيب هنقلل 10 15% من الدين ده بس خلينا ملتزمين ونكمل مع بعض
وطبعاً حضرتك ممكن تاخدي الفلوس دي بعد كده وتستثمرها حتى لو مبالغ صغيرة تقدري تحطيها على جانب في اداة استثمار فتبتدي تعوضلك الدخل اللي راح منك لأن طول ما الفلوس معاه مبتعرفش تستمرها ولكن لما تبتدي تاخدي اجزاء منها صغيرة على الأقل هتبتدي تستثمرها
(12:55)
في سؤال تاني بيقول انا عندي بيزنس وشغال امتى اوزع الارباح للمساهمين بتوعي وامتى اسيب الفلوس جوه الشركه؟ وبرضه تكملة للسؤال ده لو انا بدفع مثلاً لنفسي مرتب قليل امتى ابتدي اعلي مرتبي كموظف جوه الشركة لأننا اه صاحب عمل والكلام ده كله بس برضه عليا مصاريف والكلام ده كله فلازم يبقى عندي دخل؟
أولاً في ناس بتعمل نسبة الدخل بتاعك او مرتبك ليه علاقه بالأرباح بتاعتك او بالمبيعات بتاعتك بشكل عام يعني ممكن تحطها على المبيعات او ممكن تحطها على الارباح بتاعتك اخر السنه لو انا مثلا في المدير الشركه فانا مثلا 10% من المبيعات بتاعتي دي تبقى غالبا من المرتب بتاعي او 5% ايا كانت النسبه اللي انت بتشوفها القطع بتاعك تقدر تعملي ده لنفسك كده نسبه كذا فانا مرتبي هيبقى بكذا لاني هقدر اربطه بان الشركه بتكبر وبعدين ممكن اوقفه عند حته معينه ان انا اخلص وصلت لمرتب بتاعي او القيمه السوقيه بتاعتي ما ابتديش اعلي اكتر من كده لان طبعا كل الناس عارفه المرتب بتاع الوظيفه الفلانيه الرنج بتاعها كذا فحتى لو ارباحك او مبيعاتك بقت ارقام كبيره جدا احنا نوقفها عند الحته دي فده ردا على الجزء بتاع المرتب انت ممكن تشوف من البنات اللي عندك السنين اللي فاتت كلها ايه الرقم ده اللي هو ممكن احطه بالنسبه للمبيعات او بالنسبه للارباح وبعدين كل سنه اعمل مراجعه وهشعب مع الناس اشوف في نفس الوقت انا مش عايز اكون بضغط على الشركه نفسها انها تكون متحمله مرتبي لو هو رقم كبير يعني
طيب امتى بقى اوزع للمساهمين وامتى اسيب الفلوس جوه الشركه البديهي واقتصاديا لو حضرتك بتعرف تعمل عائد على الفلوس تجوا الشركه اعلى من اللي انت بتعرف تعمله في البنك هو تغيير اي استثمار اخرى يبقى غالبا لازم تحط الفلوس دي في الشركه يعني واحد قال لي انا بلف الفلوس دي بره او مرتين او ثلاثه في السنه وبشتري بضاعه وببيعها والكلام ده كله والعائد على الفلوس دي لو جوه الشركه هو مثلا 30% والبنك مثلا بيديني 15% او 20% طبعا انا كمساهم هقوله لا ما تطلعش الفلوس ما توزعهاش على المساهمين وخليها جوه الشركه اشتري بيها بضاعه اكتر وتوسع واكبر والكلام ده كله لان فلوس جوه الشركه احسن من انها تتوزع
مين اللي يقدر يجاوب على السؤال ده مدير الشركة او صاحب الشركه ليه لان هو اكتر واحد عنده دراية بالسوق هو اكتر واحد عارف المخاطر طب هو مثلا كان بيعمل السنتين تلاتة اللي فاتوا 30 أو 40% بس هو شايف ان السنتين الجايين هيعمل 15% أو 20% بس عشان ظروف السوق بتتغير فهيبتدي يقول لا انا محتاج كده اوزع ارباح اكتر
فبمنتهى البساطة لو الفلوس دي حضرتك هتعرف تستخدمها لو ليها استخدام جوه الشركه وكمان انت ممكن تقولي لأ ملهاش استخدامه خلاص انا كبرت ومش هعرف اكبر اكتر من كده فخلاص انا هوزعها
فببساطة لو الفلوس دي عائدها أعلى جوه الشركه خليها جواها لو مش هتعرف تعمل عليها تعمل عليها فلوس أعلى من العائد الموجود في السوق خرجها ووزعها على المساهمين
وبكده نكون وصلنا لنهايه الحلقه اتمنى تكون الاسئله اللي انا اخترتها من ضمن الأسئلة اللي وصلتنا تكون مفيدة للناس لو في اي وقت عاوز تبعت اسئله ومش عايزها تتذاع ابعتلي السؤال وقولي انا مش عاوزه يتذاع في الحلقة ده سؤال شخصي، الخصوصية بتاعه الناس محفوظه دايما عمري ما هروح استخدم اسمك عشان لو الناس بتقلق من الكلام ده وبشجع الناس دايما انها تبعتلي اسئلها شكرا جدا على وقتكم ان شاء الله اشوفكم الاسبوع الجاي
Translation of some words and terms:
Down Payment مقدم
Creative مبدع
Consideration اعتبار
Linking ربط
Insides الدواخل
Extreme شديد
Revenue ربح
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي#ما_يسأله_المستمعون #الجزء_12