126. ما يسأله المستمعون - الجزء 11
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهارده ميعادنا مع جزء جديد من ما يسأله المستمعون، اخترنا مجموعة أسئلة ممكن تكون مفيدة للمستمعين بشكل عام، واحنا دايما بنطلب منكم تبعتولنا كل الاسئله اللي بتفكروا فيها، احنا دايماً بنقول ان كل واحد له سن وظروف ودخل وحالة مادية مختلفة عن التاني فمهما كان مهما كان السؤال بتاعك بسيط أبعتهولنا وهنجاوب عليه
: أسئلة الحلقة
(02:02)
بسبب عدم استقرار العملة في الوقت الحالي مش عاوزة احط صندوق التقاعد او حساب الطوارئ في حساب بنكي، في الحالة دي ازاي هقدر افصل فلوس صندوق التقاعد عن صندوق الطوارئ؟(06:02)
إيه مصادر و مواقع موثوقة لمتابعة البورصة المصرية؟(07:50)
لو عايزه ادخل عالم الاستثمار أو البورصه ايه الكورس اللي ممكن ابتدي بيه؟(10:30)
CI30 إيه الفرق ما بين استراتيجيات صندوق
EGX30ETF وصندوق
وصندوق أزيموت فرص؟
لو عندك مقترحات ازاي نطور محتوى كلام ينور او لو شايف ان ممكن نعمل حاجه بطريقه احسن او شايف ان احنا ممكن نغير حاجه يا ريت دايماً تبعتولنا آرائكم ومقترحاتكم
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكم في حلقة جديدة من بودكاست كلام ينور
النهارده ميعادنا مع حلقة أسئلة المستمعين اخترت كام سؤال اللي بحس انهم ممكن يكونوا بشكل عام يقدروا يفيدوا المستمعين التانيين دايما هطلب من الناس أو بطلب منهم دايما يعني انهم يبعتولنا على صفحتنا على انستجرام او فيسبوك او تويتر بكل الاسئله اللي انت بتفكر فيها
طبعا دايما بقول ان كل واحد عنده حاله مختلفه من الحالات الماليه بتاعته ظروفه سنة دخله كل ده كله مهما كان السؤال بتاعك بسيط لو حابب تسأله ابعتلنا لو مردتش عليك مباشرة دايما برد عليه في الحلقات دي
برده بفكر الناس ان احنا ابتدينا نعمل منطقة تسجيل على الموقع بتاعنا نزلنا عليه المجله بتاعتنا وان شاء الله ننزل عليها حاجات يعني عندي كذا فكره شغال عليهم بس هو الموضوع بياخد شوية وقت للتطوير ولو حد عنده مقترحات ازاي ممكن نطور محتوى كلام ينور وازاي نفيد المستمعين كلهم لو انت شايف ان احنا ممكن نعمل حاجه بطريقه احسن او شايف ان احنا ممكن نغير حاجه يا ريت تبعتلنا دايما
(02:02)
اول سؤال هاخده النهارده على الانستجرام من مستمعة اسمها بيبتدي بحرف الميم، الاستاذه ميم زي ما كانوا زمان بيعملوا كده في الراديو عشان بس الخصوصية مش هنقول اسم المستمع..
بتقول انا مش عاوزه في الوقت الحالي احط صندوق التقاعد بتاعي او حساب الطوارئ في حساب بنكي في صورة شهادة استثمار مثلاً بسبب عدم استقرار العملة ففكرت اننا اشتري ETFs مختلفة فهي ممكن تكون شايفة نظراً لعدم استقرار العملة او التضخم في الدولة اللي هي عايشة فيها مش هيسمح لها تحافظ على قيمة الفلوس فهي فكرت في حاجه زي الـETFs ولكن في الحالة دي ازاي هقدر افصل فلوس صندوق التقاعد عن صندوق الطوارئ مع العلم ان المبلغ اللي معايا هيغطي اول 3 شهور من ميزانية صندوق الطوارئ وده نص الهدف بتاع صندوق التقاعد
طيب أولاً انا سعيد جداً بالسؤال لأسباب كتير.. ان هنا في وعي في اختيار فئة الأصول اللي بتناسبها هي مش مستريحة للعملة المحلية في الدولة اللي هي فيها زي ما قولنا والحاجة التانية اللي عاجباني أن صندوق الطوارئ لازم يبقى موجود، وصندوق التقاعد لازم يبقى موجود برضه وكون انها عارفه ان المبلغ اللي معاها هيكفي نص صندوق التقاعد ممكن مثلاً تكون راحت للحلقة بتاعة قد إيه المفروض تكون محوش في السن الفلاني والكلام ده كله فأول حاجه بس انا حابب أشكرها على السؤال صيغته كويسة ومظبوط وهي فاهمة هي بتعمل إيه فدي أول ملاحظة على السؤال
تاني حاجه السؤال بيقول ازاي هفصل الفلوس، طيب أنا النهاردة موضوع الفصل ده موضوع نفسي انا حاطت صندوق الطوارئ هنا وعملت صندوق التقاعد هنا، انا عن نفسي ممكن أفصل الحاجات بإكسيل فايل يعني ممكن حساب الطوارئ يكون محطوط مع حساب التقاعد هما الأتنين في نفس المكان مفيش مشكلة انا كعمر ممكن أعمل كده، وهروح على الإكسيل فايل بتاعي بتاع المحفظة بتاعتي أو المكان اللي بتابع فيه الثروة بتاعتي او المدخرات بتاعتي، ممكن أعمل إكسيل شيت بيقول والله انا عندي الـ 5 دول في الأماكن دول الـ 5 دول ممكن يكونوا حسابات أو مقتنيات زي دهب حقيقي ومن خلال الشيت ده هقدر حتى لو الفلوس محطوطة على بعض وحتى لو عندي حساب واحد هقدر ابتدي اقول نسبة الفلوس دي اكس في حساب الطوارئ واكس في حساب التقاعد وابتدي اتابع افتراضاً مثلاً من الشهر الجاي انا كده خلصت حساب الطوارئ مش عايز احط فلوس في حساب الطوارئ، فهبعت فلوس في نفس المكان لأنه نفس الحساب في الحقيقة ولكن على الشيت بتاعي هبتدي اعمل تحديث وازود حساب التقاعد بتاعي بالنسبة اللي انا دخلتها
الفصل ده تاني حاجه نفسيه يعني الناس بتحب تعمل ظرف تحط فيه فلوس الولد الأول والولد التاني بس هي هي نفس النتيجة في الاخر لو انت جمعت الفلوس دي في مكان واحد وعملت عليها استثمار واخدت العوائد في نفس المكان يعني افتراضاً الحساب ده اشتريت مثلاً مجموعة من صناديق الاستثمار وعملت 10% السنة دي و10% السنة الجاية آه هينزل الأرباح بتاعتك هتزيد على حجم المحفظة تاني بس ده من جوه الإكسيل شيت بتاعي أنا ممكن أقسم الموضوع ده وأقول اه انا حساب التقاعد بتاعي زاد بنسبة 10% وحساب صندوق الطوارئ بتاعي زاد بنسبة 10%
فأنا بنصح الناس دايماً يكون عندها تتبع هي عملت هنا حاجتين كويسين جداً هي عرفت هي عايزة إيه، حطت أهدافها وعملت معيار كويس انها المفروض النهاردة واقف كام فاضل بس اننا نظبطه ونحطه على ملف إكسيل او نظام تتبع أقدر أتابع بيه الاستثمارات بتاعتي فمعنديش مشكلة اني احطهم في نفس الحساب
(06:02)
السؤال التاني النهاردة إيه مصادر و مواقع موثوقة لمتابعة البورصة المصرية ده من الاستاذة ص
في مصادر كتيرة ممكن الواحد يبص عليها زي اول حاجه الويب سايت الرئيسي بتاعي البورصة المصرية برده في شركة اسمها شركة مباشر كنت زمان بستخدمها هناك بيدك تفاصيل عن الاسهم وتحليل لشوية صناديق استثمار
www.mubasher.info
برده ممكن من خلال تطبيقات شركات السمسرة لو حضرتك فاتح حساب شركة سمسرة نقدر نتابع من عليه اتكلمنا قبل كده مع ثاندر اعتقد بيبقى عندهم نشرات اخبارية او بيبعتوا ايميل لو انت مسجل معاهم ممكن من خلال التطبيق نفسه تتابع أسعار الأسهم والكلام ده كله
فاعتقد المصادر الإخبارية والمواقع الرئيسية حتى ممكن انا جوجل ممكن الناس تدور على شركات تانيه او مواقع اخبار اخرى ممكن تساعد، اعتقد ان المعلومات مفيهاش مشكله الايام دي زي ما دايما بقول هنلاقي مصادر كتير فدول الحاجات اللي فكرت فيهم في الإجابة على السؤال ده
برده على نفس موقع مباشر ده برده عايزه ازود حاجة ان انت لو حابب تغير البلد يعني ممكن تبص على الموقع هتلاقي في السعوديه الامارات البحرين عمان قطر الكويت الاردن تونس المغرب فلسطين والعراق هنلاقي البلاد العربية كلها موجودة على الموقع مباشر تقدروا تاخدوا فكرة لو حد عايز يبص على الأسواق الآخرى ولو حد مقيم في اي دولة تانية حابب يستثمر فيها فأعتقد المصدر ده من المصادر اللطيفة يعني
(07:50)
السؤال اللي بعده من أستاذه أ بتقول لو انا عايزه ادخل عالم الاستثمار او البورصه ايه الكورس اللي ممكن ابتدي بيه؟
الميزه اللي انا بقعد اقولها في الاستثمار انه مش لازم تبقى اكتر خبير او عارف كل حاجه او زي مثلا هندسه او الطب ان انت عايز اعمل عمليه لواحد فلازم علميا ابقى عندي القدره ان انا اعرف كل حاجه و دواخل وخارج الأمور ودي بتتعمل ازاى والكلام ده كله الاستثمار في ميزه مهمه جدا ان احنا ممكن نعمله فقط باننا يبقى عندي فائض في الميزانية بتاعتي وابتدي استثمر الدخل ده ايا كان أداة الاستثمار لو حضرتك مش محترف او واحد تشتغل في مجال المالي انت مش محتاج تدرس او تحط الوقت الكبير اللي الناس متخيلاه يعني مش لازم اعرف الحالة الاقتصادية بتاعه الدوله دي شكلها عامل ازاي اول مشروع الفلاني ده بيعمل ايه لا انا ممكن زي ما بنقول دايما استثمر بطريقه سلبيه زي الاستثمار ولكن لو حد حابب اعتقد طرق التعليم المختلفة في ناس بتحب تذاكر من لوحدها في ناس بتحب تقرأ الكتب في ناس بتحب محاضرات الكلام ده كله أنا مش هرشح جهات تروح لها تديك دراسات لان انا مش متابعه قوي الصراحه اللي بيحصل في العالم الكورسات ده والكلام ده كله بس هقول ان انا لازم ابتدي بالكتب المشهوره اللي هي ممكن تكون موجودة بسهولة اون لاين اتكلمنا قبل كده على كتاب مشهور اول اللي اسمه
The Psychology of Money
إن هو بيفتح لك اصلا الطريقه للتفكير لو انا عايز استثمر بطريقة معينة تانيه هبتدي ادور على الكتب اللي فيها طريقتي هنلاقي تاني في اماكن كتير اون لاين وتقييم للكتب تقدر تشوف التقييمات والمراجعات بتاعه الكتب بسهوله جدا فشوف الموضوع اللي انت عايز تذاكره او تشوفه دور على الكتب اللي هي تقييماتها عاليه
بالنسبه بقى لموضوع انك تبقى محترف ده موضوع تاني خالص يعني ممكن ابتدي ابوس على شهادات زيي
شهادة المحاسب المعتمد CA
او
شهادة محلل استثمارات بديلة معتمد CAIA
ممكن برده الناس تدرسها ممكن ناس تعمل دراسات لو انت مخلص الجامعه بتاعتك في الاستثمار فالمحترفين بيبقى ليهم طرق اخرى ولكن انت هنا بنسبة كبيرة الناس بيسمعونا غالبا بيشتغلوا في مهن أخرى أو في مجالات أخرى فهرجع واقول تانى واكررها كل مره اعمل فائض في الميزانية بتاعتك وحوش واستثمر في فئات الأصول المختلفة بمنتهى البساطة
(10:30)
السؤال اللي بعده سؤال ظريف جدا من مستمع الاستاذ م ده برده بيخليني اركب ابص الميزه بالاسئله بتاعه الناس انها بتخليني ارجع ابص على الحاجات اللي ممكن ما كنتش واخد بالي منها او كده او شفتها ومش مركز فيها فدائما عايز اشكر الناس انها بتبعتلي الاسئله دي لأنها حتى بتزودلي المعرفه بتاعتي بشكل عام
سؤاله بيقول إيه الفرق ما بين استراتيجيات الصناديق الـ 3 اللي هنقول على اسميهم دلوقتي
CI 30 الصندوق الأول
EGX30ETF الصندوق التاني
الصندوق التالت أزيموت فرص
الموضوع ده ممكن اصلا اتكلم فيه في حلقه كامله عادي بس انا هحاول اجاوب عليه بسرعه وبعدين ممكن نتكلم عليه باستفاضه في مره ثانيه الفروقات ما بين صناديق الاستثمار لان ده موضوع لطيف جدا
اول حاجه صندوق سي آي 30 وصندوق إي جي إكس إي تي أف 30 اللي قولنا اساميهم أول 2 برضه احنا هنحط الكلام في الشو نوتس عشان لو محدش سامع او انا بقولهم بطريقة مش واضحة هي هتبقى موجودة في الشو نوتس او على الموقع تقدروا تبصوا على الاسامي دي تاني
الصندوقين دول دي مؤشرات، يعني إيه صناديق مؤشرات يمكن نكون اتكلمنا عليهم قبل كده في حلقات اي شركة بتروح تصدر صندوق استثمار الاستراتيجية بتاعها سلبية
يعني إيه سلبيه يعني أنا باخد مؤشر معين وبتفق مع واحد مصدر للمؤشر ده في الحالة بتاعتنا دي الصندوقين دول بيتبعوا مؤشر اسمه إي جي إكس 30 المؤشر ده فيه أكبر 30 شركة من حيث القيمة السوقية في مصر
الراجل اللي بيصدر الصندوق ده كل اللي بيعمله بيروح زي مراية كده يمشي مع مؤشر ده،المؤشر بيقول ان الاسهم دول الـ 30 اسم دول هشتريهم ومش هفكر، اكبر واحد كذا أصغر واحد كذا من 1 لـ 30 هبتدي اشتري عدد الاسهم بحيث ان النسب اللي جوه الصندوق ده تطابق المؤشر ده فانا لو توقعت ان المؤشر بتاع السوق المصري في الحالة دي اللي هو إي جي إكس 30 طلع % السنادي انا متوقع ان الصندوق بعد كل المصاريق يبقى طالع قرب الـ 50% يعني 50% مثلاً ونقول مصاريف الصندوق 1% في السنة فالصندوق ده هيبقى طالع 49%
لقينا المصاريف بتاعتنا اقل نص% ربع% يبقى المفروض اتوقع انه طالع الـ 50% إلا ربع% مثلاً فده فكرة الصندوق السلبي اللي هو مدير الاستثمار بتاعه مبيفكرش يروح ياخد الأسهم دي بنفس الأوزان ويحطها في الصندوق ده طيب دي صناديق مؤشرات
CI Capped و EGX30ETF الاتنين بقى اللي بنتكلم عليهم النهارده
في فروق صغيرة ما بين الصندوقين دول مع انهم هما الاتنين بيتعبوا نفس المؤشر لكن في فرق
اول حاجه إي جي أكس 30 ده بياخد المؤشر هو بالظبط يعني افتراضاً النهاردة الـ سي أي بي وزنه 28% فصندوق إي جي اكس ده لو فتحته هتلاقي ان جواه 28% من حجم الأسهم بتاعته محطوطه في الـ سي أي بي
سي أي 30 كابت بيعمل هنا حاجه مختلفة بقى بيعمل نفس الاسامي دي ولكن بيحط حد أقصى للـ 15% في الأسم يعني لو وزن الـ سي أي بي في المؤشر 30% هينزله لـ 15% لو افتراضاً في شركة تانية فوق الـ 15% دي هينزلها للـ 15% هو بيعمل سقف بيحاول يحمي المستثمر ويوزع استثماراته بشكل متنوع اكتر مفهوش مخاطرة يعني دي نظرية الناس اللي فاتحين الصندوق ده مش عايزك تاخد أكتر من 15% في اسم واحد
طيب الكلام ده المفروض بيقلل المخاطرة، ليه أحط فلوسي كلها 30% في سي أي بي مثلاً ولكن الأداء على المدى الطويل اختلفت المدارس بقى في مدارس بتقولك لا اشتري المؤشر زي ما هو الشركات اللي بتكبر دي بتكبر لسبب وأوزانها بتكبر بسبب فخليك قاعد جوه المؤشر زي ما هو ومتعملش حد اقصى في مدرسة تانية بتقولك لأ انا مش عايز ألاقي سهم كبير اوي في المحفظة وانا بخاف والكلام ده كله انزله لـ 15 فالحد هنا بيجي عشان يحمي المستثمرين
طيب لما نزلته من 30 أو 28 لـ 15 % الـ 15% اللي أنا اخدتهم من السي آي بي دول هروح أخدهم واوزعهم على باقي المؤشر يعني هو مش هياخد فلوسك دي يحطها كاش او يروح يشتري بيهم حاجه بره المؤشر لأ هو هينزل يوزع بحسبه كده معينة هيوزع الـ 15% الباقيين على الـ 29 اسم اللي تحتيهم الكلام ده هنلاقيه مكرر في أمريكا
ممكن واحد يقولك لأ انا هعمل صندوق تالت باستراتيجية تالته هو ده مش موجود في مصر يعني بس هو في 30 اسم الـ 30 اسم زي بعض هقسم الـ 100 على 30 والوزن بتاعي هيبقى كده في كل الأسهم زي بعض فدي بس الفرق بين الصندوقين ان ده في سقف لحجم السهم جوه الصندوق والتاني بياخد نفس حجم المؤشر ولكن الموضوع عشان منتلخبطش الاتنين بالنسبالي صناديق مؤشرات الراجل بيروح الصبح يحاول يعمل حسبة رياضية معينة يطلعلك الاسهم اللي مفروض تبقى جوه الصندوق
طب حاسب الصندوقين ازاي هتلاقي ان كل صندوق ليه مؤشر بيتبعه يعني الراجل اللي عامل إي جي أكس هيبص على الإي جي أكس ويقولك هو طالع السنادي 50% صندوقك طالع 49% كده تمام انت حققت اللي عليك
لأ اي جي اكس طالع 50% وصندوقي طالع 20% يبقى لأ الراجل ده مش عامل شغله وعنده مشكلة بس بنلاقي طبعاً صناديق المؤشرات دي بتبقى مقننة ومتابعة فغالباً هتلاقي على المدى الطويل انها ماشيه مع المؤشر بنسبة كبيرة يعني انا بصيت على إي جي أكس 30 كمثال يعني لأ هو ماشي مع المؤشر بشكل كويس
طيب هنروح للصندوق التالت اللي هو أزيموت فرص ده معناه ان هنا مبقاش صندوق مؤشر هو راجل بيستثمر في السوق المصري في الحالة دي ولكن مدير الاستثمار عنده القدرة انه يبعد عن الأوزان الموجودة في المؤشرات هو آه هيستثمر بس ممكن يستثمر بره الـ 30 شركة دول ممكن ياخد شركة مش موجودة جوه المؤشر ويحطها وممكن يرفع وزن عالي وحاجه واطي هو راجل بيذاكر الشركات وبيعملك محفظة والمحفظة دي بتطلع في شكل الصندوق
طيب مزايا وعيوب النشط والسلبي هنعتبر ان الصندوق أزيموت ده نشط على المدى الطويل في مدارس بتقول ان الإيجابي بيكسب، مديرين الاستثمارات مبيعرفوش يعملوا الاداء بتاع السوق لكن في حاجات تانية ان في الأسواق الناشئة ففي الحالتين لو السوق طالع بنسبة كبيرة الاتنين بيبقوا طالعين ولو السوق نازل بنسبة كبيرة الاتنين بيبقوا نازلين ولكن القدرة على أداء مدير الاستثمار انا مقدرش احددها في حلقة واحده ده عالم كبير جداً ليه الصندوق ده احسن وليه دي قصة كبيرة جداً بس انا النهاردة بحاول افهم الناس و اشرح ايه الفرق بين الصندوق النشط اللي فيه حرية لمدير الاستثمار أنه يعمل اللي هو عايزة والصندوق السلبي اللي هو صندوق مؤشر بيختار مؤشر معين وبيحاول يتبعه
وبرضه انتو لو دخلتوا دوروتوا اونلاين على الصناديق دي غالباً هتلاقوا الكلام ده مكتوب من الجهات المصدرة ودايماً في كل صندوق نشرة اكتتاب ممكن تخش تقراها لو حابب تعرف اكتر عن كل صندوق
شكرا جداً جداً على وقتكم معانا النهاردة لو وصلت لحد هنا بحب اشكرك على وقتكم معانا وان شاء الله اشوفكم الاسبوع الجاي
Translation of some words and terms:
Etfs = Exchange Traded Fund صناديق الاستثمار المتداولة في البورصة
Physical طبيعي
Tracking تتبع
Benchmarking معيار
Passive Fund الصندوق السلبي
Mirror يعكس الصورة
Activ Fund الصندوق النشط
Capping سقف
Index مؤشر
Opportunity فرصة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي#ما_يسأله_المستمعون #الجزء_11