110. ما يسأله المستمعون - الجزء التاسع
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
سألنا الناس على ستوري إنستجرام إيه الحاجات اللي بتدور في دماغكم وحابين تسألوا عنها، حلقة النهاردة هي الرد على الأسئلة اللي وصلتنا منكم في جزء جديد من حلقات ما يسأله المستمعون
(01:08) لو انا أعزب الأحسن أقعد مع أهلي ولا أأجر شقة لنفسي وانا هنا بتكلم على تكلفة الفرصة البديلة؟ -
(03:02) هل المخاطرة في سبيل تحقيق النجاح صح أم خطأ وازاي احسب نسب المخاطرة في شيء جديد؟ -
(05:35) لو هبدأ البيزنس الخاص بيا احط قد ايه من استثماراتي فيه؟ -
(10:35) حد بيسأل عن الاستثمار الزراعي سواء حصة في شركة أو يشتري أرض والشركة تديرها أو في صناديق الاستثمار؟ -
لو السؤال بتاعك متردش عليه في حلقة النهاردة ابعتلنا تاني سواء على انستجرام أو فيسبوك أو تويتر وهنرد عليك في رسالة خاصة وإن شاء الله نكمل باقي الأسئلة في الحلقات اللي جايه من ما يسأله المستمعون
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بكم في حلقة جديدة من بودكاست كلام ينور
النهارده ميعاد الحلقه اللي بناخد فيها الاسئله بتاعتكم، احنا عملنا كده ستوري على انستجرام سألنا الناس إيه الحاجات اللي بتدور في دماغكم وعايزين تسألوها وكالعادة زي ما بنعمل كل 10 حلقات جمعنا شوية اسئله وهحاول اغطي معظمها
(01:08)
هابتدي بأول سؤال، انا مش هقول طبعا اسم الناس اللي بتسأل عشان خصوصية، بيقول لو انا لسه أعزب الأحسن أقعد مع أهلي ولا أأجر شقة لنفسي وانا هنا بتكلم على تكلفة الفرصة البديلة؟
تمام .. بمنتهى البساطة هرجع للحلقة بتاعة الميزانية وهرجع اشوف الإيجار بمصاريفه وكل الحاجات اللي حواليه يعني انا مش هبص للشقة اللي انت هتقعد فيها لوحدك كرقم لأ انا لازم أخد في اعتباري كل الحاجات اللي هتبقى مكلفة بالنسبة لي زي مثلاً الكهرباء والمياه والصيانات اي حاجه ممكن تحصل لا قدر الله في الشقة وانا هحتاج أصلحها من الاستخدام
كمان هبص على المواصلات لأن مثلا بشوف ناس بتتكلم معايا في واحد مثلا البيت اللي هو قاعد فيه مع أهله لكن شغله قريب لكن لو نقل ممكن ميعرفش ينقل في حتة قريبة وممكن يحتاج يزود مواصلات
طب بمنتهى البساطة هنا عشان تعرف تكلفة الفرصة البديلة بتاعتك لازم تاخد كل الحاجات اللي ليها علاقة بالقرار بتاعك وتحطها في الميزانية.. طب امتى ممكن اروح لو انا حاسس ان النقلة دي إني لما أقعد لوحدى هتزود في السعادة بتاعتي او هتخليني مستقل أو هتخليني مستريح وممكن مثلا تخليني اعمل إنتاجية أكبر في شغلي، ممكن تخليني مركز وتفتحلي فرصة تانية، انا معرفش ايه البدائل اللي ممكن تكون في الحاله بتاعتك بس هرجع تاني للميزانية، لو انت دخلك كبير وتقدر تنقل لوحدك مش لازم يبقى كبير بالمعنى الرقمي.. بشكل عام قصدي لما تحط كل الحاجات دي في ميزانيتك يبقى شكلها لطيف وهتزود سعادتك وهتزود إنتاجيتك هقولك أنقل ولكن لو لا يبقى اعتقد خليك على الوضع اللي انت فيه احسن
(03:02)
سؤال تاني بيقول هل المخاطرة في سبيل تحقيق النجاح صح أم خطأ او ازاي احسب نسب المخاطرة في شيء جديد؟
حلو قوي.. اولاً عشان احقق نجاح لازم اخد مخاطرة في اي حاجه يعني احنا لما بننزل الشارع رايحين الشغل احنا بناخد مخاطره اه ممكن تبقى مخاطره قليلة ومحسوبة ده كله لكن الشارع فيه خطوره عليك اي حاجة انت بتعملها انت بتاخد من مخاطره
المشاريع بتبقى اصعب شويه لان انا مببقاش عارف احسب الموضوع عشان كده السؤال ده ازاي احسب نسب المخاطرة دي
لو هحسب نسب المخاطرة دي اول حاجه الناس بتعملها لما بتعمل دراسات على مشروع بتشوف القطاع عامل ازاي، بتشوف فرص نجاح الشركات، بتشوف تاريخ الشركات في نفس المجال ده عملت ايه، ايه أخطائهم، ايه مميزاتهم، ازاي اتعلم من تجارب الناس اللي قبلي اللي عملوا حاجات صح او عملوا حاجات غلط وابتدي ابني الحاله بتاعتي
يعني قبل ما افكر افتح المشروع وقبل ما افكر الم فلوس وابيعه لاصحابي واقول يلا بينا يا جماعه نعمل كذا ونعمل كذا انا لازم اعمل دراسة حتى فكرية للموضوع لازم لو سألتك انت بتفتح الموضوع ده ليه طب اللي قبلك عملوا ايه لازم يبقى عندك اجابة وإجابة وافية وإجابة بأرقام مش انا حاسس او انا شايف او اللي بيحصل حواليا كده فهما دول بيفتحوا كل حاجه فانا هروح افتح زيهم
وارجع واقول الانترنت ووجود مصادر النهاردة كتير جدا من مراكز إحصائيات سواء في الدولة اللي انت عايش فيها أو من تقارير شركات خاصة عاملاها معلومات كتير، يبقي ازاي احسب المخاطرة ان انا اجمع معلومات كل ما اجمع معلومات وكل اما اعرف حاجات عن اللي انا عايز اعملها كل تلقائيا بيقلل المخاطرة
بيقلل المخاطرة يعني ايه يعني بيقلل الغموض، أنا مخي هيبقى جاهز آه غالباً حصل كذا وكذا مع الناس اللي قبلي فغالباً لو أنا حصل وعملت كذا كذا بنسبة كذا هيطلع الناتج كذا فأنت بتحاول تقلب الموضوع عمرك ما هتتوقع بنسبه 100% اكيد بس انت بتحاول تتوقع اوحش سيناريو أو الحاجات اللي ممكن تحصل غلط وبتحاول تحمي نفسك منها في الأول فبالتالي انت قللت المخاطرة
(05:35)
سؤال بيقول لو هبدأ البيزنس الخاص بيا احط قد ايه من استثماراتي فيه؟
ده من احلى الاسئلة اللي ممكن تكون جاتلي لسبب ان هنا التحجيم مهم جدأ جداً يعني انا دايما كنت بتكلم على مش لازم تبقى فأحسن فكرة استثمارية، مش لازم تبقى فى أحسن حاجه هتجيبلك عائد لانك لسه متعرفش انت لسه بتبدأ وبتجرب ولكن لما هتاخد مخاطرة في مشروع خاص التحجيم مهم جدا
لان افتراضاً أخدنا الجانب الأول: انا موظف ومش عايز استثمر خالص او مش عاوز اخد مشاريع خاصه انا الفلوس اللي هحطها في الفكرة صفر، هاخد الجانب التاني: ان انا هاخد كل ما أملكه وحطه في مشروع
النموذجين دول مش بيدوني الاختيار ان انا يبقى عندي استثمار في شركة ناشئة أو فكرة والحاجه دي لما بتنجح بتبقى العوائد بتاعتها عاليه جدا، فلازم ألاقي المنطقة المريحة، كل واحد طبعاً على حسب حالته وظروفه والكلام ده كله لكن لو نسّبنا الموضوع بالنسبه لثروتي حتى لو ثروتك صغيره لما بنسّبه بنستريح اكتر
بمعنى ايه.. انا افتراضاً حسبت كل الأصول بتاعتي وكل التحويش وكل الاستثمارات بتاعتي في الذهب والأسهم وفي العقار واياً كانت فئات الأصول اللي عندي وقلت انا معايا 100 دولار او معايا 100 الف جنيه او 100 الف دولار او اياً كان الرقم
لما نسّبته هنا لـ 100 انا اتكلمت مع مخي كده خليته يفكر بطريقة مختلفة أنا مش هبص هنا على الرقم كرقم لوحده لأ انا هشوف انا عايز من داخلي 20 دولار 30 دولار 35 دولار هبتدي اعمل توزيع الثروة بتاعتي في الاصل ده او الفكره دي من الـ 100 بتاعتي
طيب ايه الرقم اللي كويس احطه في مشروع خاص، المشروع الخاص يعتبر من الاستثمارات عالية المخاطرة يعني في فرص كتير ان هي متنجحش بعرفش إحصائيا بيبقوا كام شركه بتتعمل وبتفشل بس غالباً اغلبية الأفكار مبتنجحش على المدى الطويل لأن الناس متخيله إعمل بيزنس مطاعم إعمل بيزنس أكل الناس مش بتبطل تاكل، ممكن نلاقي إن أكتر من 70% من المطاعم بتفتح ومبتكملش يعني قريت مره احصائية ان 50% من المطاعم عالمياً يعني بتقفل في اول 6 شهور مش متأكد من الارقام بس هي كانت حاجه مرعبه بهذا الشكل لكن احنا شايفين دايما الحاجات الناجحة فبنتخيل ان اي حد هيفتح أي حاجة بأي فكرة هينجح ولكن دي مش الحياة في أرض الواقع
لو 50% بيقفلوا بعد 6 شهور غالبا مثلا 70% بيكونوا قفلوا بعد 3 4 سنين
يبقى أنا هنا المشروع على حسب مخاطرة القطاع اللي داخل فيه أولاً هل هو قطاع مخاطر جداً هل صعب انجح فيه لازم اسأل نفسي كل الأسئلة دي وبعدين ممكن احط مدى لو الفكره اللي انا شايف مثلا إن الفكرة مفيهاش مخاطره عاليه قوي ودي حاجه مميزه هطلع في آخر المدى لو الفكر خطر جداً هنزل في آخر المدى بتاعي، طيب المدى ده احدده ازاي؟ انا بشوف مثلا من 20 لـ 35% أنا بضرب اي ارقام معاك وانا بفكر من 20 لـ 35% فلو الفكره مفيهاش مخاطرة رهيبة وفي فرص للنجاح والكلام ده كله اطلع لحد 35% هحط ثلث ثروتي واحط التلت انا لسه ما زال عندي التلتين اقدر احطهم في أصول تانيه توزع الاستثمار بتاعي لو خسرت التلت انا مش هموت اه هيبقى صعب اكيد هاخد جزء منها مش هخسر 100% لو حتى الفكرة باظت ممكن يبيع الأصول ونقفل المشروع والكلام ده كله فالفلوس ممكن يرجعلي جزء منها ولكن لو انا حاطط 100% تعرف اعيش بعديها لو المشروع فشل
الترتيب بتاع الفكرة اولاً احدد هل هي مخاطرة عالية أو مخاطرة واطية، احدد المدى اللي من داخلي اللي ممكن نقول من 1 لـ 5 اللي هو 20% وبعدين من 1 لـ 3 اللي هو 35% اعتقد ده مدى مناسب تقدر تعمل بيه حاجات تانيه بقية الفلوس بتاعتك تقدر تعمل بيها حاجات تانية وتقدر توزعها ودي طريقة التفكير والتسلسل الفكري بتاعي يعني ممكن تختلف معايا ممكن متوافقش بس انا لو هفكر هفكر كده
ممكن واحد تاني يقولي لأ أنا عايز أخاطر اكتر ودي فرصة حياتي والكلام ده كله انا عايز اطلع اكتر من 35% دي حاجه ترجعلك دي نظري مش اكتر يعني
(10:35)
في حد بيسأل على مشروع في الاستثمار الزراعي سواء مشاركه في سهم شركة يعني حصة في شركة بتستثمر في الاستثمار الزراعي أو يشتري أرض والشركة تديرها وتجيبله عائد على الأرض دي وعايز يقارنهم بالاستثمار في صناديق الاستثمار على المدى البعيد؟
يبقى احنا عندنا 3 حاجات اشتري حصة في شركة خاصة بتستثمر في الاستثمار الزراعي، اشتري أرض وأأجرها لشركة والشركة تجيبلي دخل، أو استثمر في صناديق الاستثمار دول الـ 3 حاجات اللي صاحب السؤال بيسال عليها
طيب اول حاجه لما هفكر في حاجه زي كده هفكر في العائد، ايه العائد اللي انا متوقعه في الـ 3 حاجات دول يعني لو انا أخدت حصة في شركة يبقى لازم اقعد مع صاحب الشركة أو مدير الشركة وانا مش بدير هنا انا واحد بيقولي انا هدير طيب العائد بتاعك هيبقى ازاي لو هو معندوش فكره العائد السنوي بتاع الشركه المتوقع هيجى ازاى يبقى هو عنده مشكله اصلا في المشروع، لازم اي حد مدير بيبني شركة يعني لو لو رجعنا لحلقات الشركات الناشئة انا النهارده لما اقعد مع مستثمر لازم يبقى عندي حسابات معينة، انا النهارده هجيب دخل بطريقة معينة وعندي مصاريف والمفروض اكسب في اول سنه كذا وفي تاني سنه كذا وفي تالت سنه كذا فهاخد العائد ده واشوفه هل هو عائد طبيعي وارجع اقول برضه اني لازم اشوف القطاع ده بيعمل كام الشركات الشبيهة عملت قد ايه مش لازم اعمل بحث رهيب يعني انا هسأل عادي ناس في المجال والكلام ده كله ولازم اطلع عائد
طيب انا هنا عائد عندي رقم ايه بقى اللي مرتبط بهذا العائد كمان ان انا هيبقى عندي حصة أقلية في الشركه لان انا مش صاحب الشركه هيبقى عندي مثلا 5% 10% 20% من الشركة انا هنا حصة أقلية يعني ايه حصة أقلية يعني انا معنديش القدرة ابيع اسهمي في أي وقت معنديش القدرة اغير في قرارات الشركة المديرين هم اللي هيديروا انا بس مستثمر في جوه الشركة يبقى دي عيوب الفرصة دي، المميزات عندي عائد والعائد ده ممكن يبقى عائد رهيب او عالي او قليل معرفش، والمخاطرة بتاعتي ان انا حابس فلوسي في حاجه مش هعرف اطلع منها فلوسي ده كده اول حاجه
تاني فكرة ان انا هشتري ارض والشركة هتديرها وتجيبلي عائد هنا التملك أو الحصة هنا مبقتش في حاجه مع الشركه في كيان انا معنديش سيطرة عليه انا اشتريت الأرض، حتى لو الارض دي حصة صغيرة أو رقم صغير بعدد الأمتار ولكن في الاخر دي الارض بتاعتي يبقى هنا التملك مش أسهم تملك في الأرض التملك في الأرض يعتبر مخاطرته أقل من النموذج الأول ليه لأن أنا عندي القدرة اني اخد قرار على الأرض بتاعتي يبقى هنا المخاطرة أقل من النموذج الأول، طب العائد غالبا المفروض يبقى أقل لأن أنت هنا واخد مخاطرة أقل لأن أنت عندك الحريه انك تبعها، متأجرهالوش وتشوف حد تاني يأجرها فالعائد غالباً على الأرض بيبقى حوالين رقم معين ونعرف نسعر الموضوع ده بسهولة جدا لاننا هنشوف الأراضي في المنطقة دي بتتاجر بكام الدخل كام فهعرف في أول يوم مننساش برضه حاجه إن الأرض سعرها بيطلع فأنا المفروض ابقى عارف ان المنطقه دي على مدار السنين اللي فاتوا الأرض كانت طلعت كم % وقتها هعرف احسب العائد اللي هو ما بين الإيجار اللي انا لميته والزيادة السعرية في الأرض فهنا انا حسبت العائد بتاعي وأقارنه بالعائد بتاع النموذج الاول يبقى أنا هنا قارنت العوائد ببعض والمخاطرات ببعض
نيجي لصندوق الاستثمار الاختيار التالت، صندوق الاستثمار في نفس الميزة بتاعه الأرض ولكن احسن كمان ان انا اقدر اتخارج منه في 5 دقائق يعني اقصد في نفس الشهر في نفس الاسبوع نفس اليوم اي حاجه أياً كان فهنا المخاطرة أقل في صندوق الاستثمار من حيث الدخول والخروج اول واحده انا حابس فلوسي، تاني واحده انا حابس بس هي بتاع، تالت واحده لا انا ممكن اخش واخرج اللي هي صندوق الاستثمار
طيب العوائد بتاعة صندوق الاستثمار صعب جدا التوقع ولكن برضه وخاصة في البورصات الكبيرة والمتطورة انت عندك الأداء بتاع الأسهم مثلا في القطاع موجود في 100 سنه فتقدر ترجع وتقرأ وتشوف على مدار مثلا 10 15 سنة الأسهم عملت ايه، لو قسمنا التاريخ ده 100 سنة في 10 سنين يعني لو أبتديت مثلاً 1900 لـ 1910 الأداء كان عامل ازاي أيا كانت الطريقة اللي انت هتقطع بيها التاريخ وتعرف العوائد ولكن بشكل عام هتعرف العائد على الاستثمار في صندوق الاستثمار المفروض يبقى كم % فهنا لما طلعت العائد بتاع صندوق الاستثمار بقى عندي 3 حاجات اقارنهم ببعض الـ 3 عوائد موجودين والـ 3 مخاطرات موجودين هرجع بقى وأشوف مع نفسي ايه اللي انا عايزه هل انا عايز احبس فلوسي ولا لا هل انا عايز اخد عائد متوسط ومحبسش فلوسي قوي ولا عايز اعمل ايه يعني هبتدي اتحرك على مصفوفة المخاطر بتاعة الـ 3 حاجات دول مع بعض هنا تاني لما نقارن الـ 3 أفكار ببعض لازم أقارن المخاطرات ببعض وأقارن العوائد ببعض وأحاول أوحد الموضوع عشان تبقى المقارنة حقيقية وسليمة وتاني ترجع تختار حسب تحملك للمخاطر كل واحد عنده القدرة على تحمل المخاطر والحجم بتاعك يعني متروحش تحط 100% من دخلك في اول اختيار اللي هو اعمل مشروع واتحبس فيه ومعرفش اخرج فلوسي والكلام ده اعتقد دي حياة صعبة فأنت ممكن توزع
حاجه اخيره في حاجات ممكن تتعمل النهاردة والحاجات التانية تتعمل بعدين يعني مثلا فرصة الأرض دي ممكن متتكررش تاني مش هعرف الاقي الأرض دي بالحاجه دي بالكلام ده كله وانا بجد عايزها فأنا ممكن ازنق نفسي في الأول اني اجيب الأرض دي ومع الوقت أي مدخرات ليا أحطها في صناديق الاستثمار أو العكس ممكن استثمر في شركة النهاردة عشان الفرصة دي مش هتتكرر تاني واشتري الأرض بعدين واشتري صناديق الاستثمار بمبالغ صغيرة
خلي بالكم ان الـ 3 فرص دول برضه لازم أبقى عارف اننا صندوق الاستثمار انا ممكن اخشه بأي رقم في أي وقت الحاجتين التانيين دول هيبقوا فيهم افتراضات تانية اننا مثلاً لازم أحط ثمن الأرض أو ثمن حصتي في الشركة أنا بس بحاول أديكوا الـ 3 أفكار ممكن تاخد الـ 3 نماذج دول وتطبقهم في أي حاجة تانية في حياتك بنفس الطريقة احسب العوائد احسب المخاطر وخد قرارك بناءاً على المعلومات
النهاردة أنا حاولت أغطي كده الأسئلة اللي حسيتهم مفيدين بشكل عام للناس في عندي أسئلة أكتر بعتذر اننا مجاوبتش عليها المرة دي إن شاء الله هعملها في الحلقات اللي جاية لو أنا مردتش عليك وكنت انت مستني رد سؤالك في الحلقة دي برضه ياريت تبعتلي تقولي تاني انت مردتش عليا رد عليا في الرسايل الخاصة سواء على انستجرام أو فيسبوك أو تويتر بعتذر لو مغطتش كل الأسئلة وإن شاء الله نكمل أسئلتنا في حلقات المستمعين في وقت قريب شكراً جداً على وقتكم
Translation of some words and terms:
Case حالة
Resources مصادر
Reports التقارير
Automatically تلقائيا
Uncertainty الغموض
The Worst Scenario اوحش سيناريو
Sizing تحجيم
Risk مخاطرة
Extreme الجانب
Net Worth صافي الثروة
Range مدى
Research بحث
Developed متطور
Risk Matrix مصفوفة المخاطر
Risk Tolerance تحمل المخاطر
Assumptions افتراضات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #ما_يسأله_المستمعون #الجزء_التاسع