111. ما يسأله المستمعون - الجزء العاشر
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنكمل باقي اسئلتكم، مش حابين نخلي الناس تستنى فترة طويلة عشان تسمع الإجابات، مش عاوزين نتأخر عليكم، فهنغطي النهاردة شوية اسئلة تانية مهمة ودايما ابعتولنا أسئلتكم احنا بنجمعها وبنجاوب عليها في حلقات ما يسأله المستمعون
(01:33) صندوق الاستثمار في الذهب في مصر ما له وما عليه؟ -
(03:15) هل يوجد تعارض في تعدد المهام؟ -
(07:07) إيه الفرق بين صناديق الاستثمار وأذون الخزانة وإيه المخاطرة في الحالتين لو عن طريق البنك؟ -
(09:40) إيه السن اللي اقدر ابدأ فيه التوعية المالية لأولادي؟ -
(13:55) إيه النصايح اللي تقدر تقولها لنا عن استخدام الذكاء الاصطناعي في الاستثمار؟ -
(15:48) مجلة كلام ينور الإلكترونية -
شكراً على وقتكم، أبعتولنا حابين نتكلم في ايه الحلقات اللي جايه.. ولو قريتوا العدد الأول من مجلتنا الإلكترونية أبعتولنا آرائكم ومقترحاتكم ولو لسه تقدروا تحصلوا على نسختكم المجانية من هنا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
احنا بس اضطرينا نكمل السلسله بتاعه أسئلة المستمعين يعني حبيت اغطي شوية اسئلة تانية مهمة حسيت اننا مش هنقدر نستنى يعني مش عايز اخلي الناس تستنى فترة طويلة عشان تسمع الإجابات، فالنهاردة انا هكمل باقي اسئلتكم ودايما في اي وقت ابعتولي بحيث انا ممكن الأسئلة بتاعتكم هجمعها يعني مش لازم اكون عملت ستوري او سألتكم انتم عايزين تسمعوا ايه لا في اي وقت انت تقدري تبعتلي وانا هجاوب عليك حتى لو بعد فتره من خلال الحلقات دي
(01:33)
في سؤال بيقول: صندوق الاستثمار في الذهب في مصر ما له وما عليه؟
انا مبصتش يعني بشكل مركز على صندوق الجديد اللي نزل أو بيطرح بس انا هرجع واقول كل واحد لازم يعمل الواجب ده مع نفسك يعني مهما انا قلت أو حاولت اقول ده كويس وده وحش أو العيوب والمميزات او أياً كان انا بجتهد زيي زيكم، انت زي ما بتعمل اختيارك لصندوق الاستثمار بتاع الأسهم أو الصندوق استثمار بتاع السندات تعمل نفس الطريقة للذهب
اولاً لازم يكون المصدر جهة متراقبة مالية من الهيئات، فاهمين هما بيعملوا ايه، مصاريف الصندوق متبقاش عالية، تقدر تسترد وتخش الصندوق بسهولة، التسعير يكون فيه شفافية انك تشتري دهب، تسعير الذهب ده بيحصل ازاي؟ هل هو متوافق للسعر العالمي ولا لا؟ السهولة بتاعه التنفيذ بتاعه الموضوع، اعتقد هتلاقى ناس كتير غطت الموضوع ده جمع اسئلتك وأسأل الأسئلة دي وشوفي الفرص البديلة اللي قدامك لشراء الذهب، هل هتعرف تشتريه احسن من خارج الصندوق ولا من جوه الصندوق، انا عايز الناس تعمل كده يعني انا مش عايز اقولك ده من احسن الصناديق اللي شفتها في حياتي أو ده من أوحش الصناديق مش هتبقى استفدت حاجه عشان لو في يوم من الأيام ظهر صندوق تاني تعرف تقيموا وتفكر فيه تعرف تستثمر فلوسك بطريقة أفضل
(03:15)
هل يوجد تعارض في تعدد المهام؟ يعني هل ده بيصعب النجاح؟
طيب السؤال ده معناه ايه هرجع للمثل المعروف "صاحب بالين كداب"، هنا تعدد المهام بالنسبة لي ان عندك فكره واتنين وتلاتة وخمسة وشغال فيهم كلهم مع بعض او انت عندك شغلانه واحده أو فكرة واحدة حاطط كل تركيزك فيها، أنا نفسي قعدت أفكر في السؤال ده لما جالي قبل ما أجاوب على الحلقة انا فكرت فيه شويه اجابتي هتكون بسيطة جداً في اول حياتك لما ابتديت انا مثلا شغل اخذت السؤال ده على نفسي انا في اول حياتك ممكن نتكلم في أول خمس أو 10 سنين ممكن حتى 15 سنه شغل انت بتبقى محتاج تبني نفسك، محتاج تبني كاريرك، محتاج تبني شخصيتك انت لازم تعرف انت اصلا بتشتغل ازاي الكلام ده كله، معندكش خبرة في الاول قدام هيبقى عندك خبرة في الأول تعدد الأفكار صعب جدا، وانت مبتبقاش جاهز ان انت تعرف تدير 3 4 حاجات في نفس الوقت بصراحه
لما يبقى عندك خبره خلينا نقول مثلا هنجري الشريط كده 15 سنة من الشغل، بعد 15 سنه انت نوعاً ما عرفت مميزاتك وعرفت عيوبك وعرفت ايه قوتك وهكذا فأول حاجه انك بتبقى فهمت نفسك شويه من الخبرات، تاني حاجه ودي انا برضه حسيتها ان انت ممكن تعمل كذا حاجه لسبب ان انت ممكن تكون بتعرف تدير ناس يعني مثلا انا بعمل البودكاست ده جنب شغلي انا مش لازم اعمل كل حاجه في البودكاست لأ انا ممكن يبقى عندي ناس بتعمل حاجات معينة وانا بعمل حاجة معينة، الناس المميزة في حاجه معينه هتعملها وانا هعمل حاجه تانيه وهكذا
فتوزيع وقتك في أول حياتك لو أنت عندك فكرتين تلاتة انت مش هتعرف توزع بطريقة صحيحة لما يبقى عندك خبرة وتجارب وشغلت ناس وأديتهم مهام وجربت نفسك والكلام ده كله انت ممكن فعلاً تعرف تعمل كذا حاجه جنب بعض
وهنلاقي ان رواد الاعمال وانا كنت حتى بستغرب ازاي رائد أعمال يبقى عنده 15 حاجه بيعملها مثلا الراجل بتاع تسلا عنده تسلا وعنده تويتر وعنده حاجات في الذكاء الاصطناعي وعنده مثلا حاجات بيبنيها انا معرفش سبيس اكس والكلام ده كله طبعا ده مثال كبير قوي زياده عن اللزوم يعني بس انا دايما كنت ببص للناس دي اللي هو انت ازاي عندك وقت في اليوم بتعمل الحاجات دي كلها مع الوقت ابتديت أتعمق في الموضوع كفكر كمان لقيت انه اكيد مبيعملش كل الحاجات دي ناس، عنده مصادر معينة بتزود وقته يعني لو هو بيشتغل 8 ساعات وعنده أفراد حواليه فلأ الإنتاجية بتاعته بقت 50 أو 60 ساعة في اليوم مع ان هو اصلاً بيشتغل 8 ساعات ان مثلا عنده 3-4 جنبه هم اللي بيديروا وهو بس بيبص بشكل عام
فتلخيصاً للإجابة في أول حياتك منصحش بتعدد المهام، منصحش ان انت تبقى مشتت لأن انت المفروض تبقى مركز والمفروض تبقى بتبني كاريرك ودي اهم سنين في حياتك عشان هما دول اللي هيترجموا قدام لما تترقى وتبقى مدير وتبقى صاحب شركة، لما تبقى راجل في شركة عالمية انت عشان توصل هناك لازم تبقى مركز كويس جدا جدا في الاول فتعدد المهام اعتقد يجي قدام مش في اول حياتك
(07:07)
السؤال اللي بعده بيقول: ايه الفرق بين صناديق الاستثمار وأذون الخزانة وإيه المخاطرة في الحالتين لو عن طريق البنك؟
طيب انت لو هتروح تشتري أذون خزانة فأنت بتروح تشتري الأذن نفسه، الأذن نفسه ده مين بيصدروه الحكومات فأنت هنا بتستثمر بشكل مباشر في الأذن انت اشتريت ورقة دين سند سواء بقى صك لو اسلامي او سندات عادية هنا اللي واخد منك الفلوس الحكومة اللي بتصدر السند ده
طيب في صندوق الاستثمار انت بتعمل ايه انت بتروح تدي فلوسك لواحد الواحد ده عامل زي شركه ناس مجمعة فيها فلوس والشركه دي اللي هو صندوق الاستثمار بيستثمر بالنيابة عن المستثمرين موجودين فهنا انت هتبقى في الصندوق عندك توزيع للمدخرات بتاعتك جوه يعني لو ده صندوق سندات عشان نقارن بس المثال الأول بالمثال التاني هو عنده كذا سند مش سند واحد
المخاطرة هنا ايه لو انت مثلا سند معين دي شركه معينه اول دوله معينه بلدي فلست او الشركه دي فلست او كده انت اخدت المخاطرة على هذا السند فقط ولكن في مثال صندوق الاستثمار أنت هنا وزعت استثماراتك على كذا سند ده اول ميزه لصندوق الاستثمار السند مباشره
طيب ايه تاني ان انت في صندوق الاستثمار يبقى عندك واحد متابع الاحوال لو حصل كده لو حصل اي حاجه هو بيغير من غير ما انت تحس بحاجة فمفيش مجهود السند انت لوحدك انت لازم تعمل المجهود ده
طيب ايه مميزات ان انا اشتري السند بشكل مباشر انه بيديك عائد ممكن اعلى لان مفيش مصاريف إدارة مفيش مصاريف صندوق نفسه انت بتشتري السند من المنبع نفسه فمفيش اي عملات داخليه
لو بتشتريهم من نفس البنك يعني بنك عرض عليك سند تعليق صندوق استثمار في هنا المخاطرة في الحالتين واحد لأن البنك هو الوسيط في الحالتين فالأمان موجود في الناحيتين يعني اسفه ده يعني مقارنه سريعه ما بين ان انت تشتري الصندوق مباشرة أو تشتري السند مباشرة
نفس الكلام ده على الاسهم، يعني همد الكلام ده للأسهم بنفس الطريقة لو انت اشتريت سهم شركة واحدة أو اشتريت صندوق استثمار للشركات هي هي نفس الفكرة
(09:40)
السؤال اللي بعده بيقول: إيه السن اللي اقدر ابدأ فيه التوعية المالية لأولادي؟
طيب التوعية المالية هنا مش بس اللي هو ازاي تستثمر فلوسك ازاى تحقق عائد او ازاي تعمل مضاعفة لأ التوعية المالية بالنسبة لي معرفتهم تكلفه الفرصه البديله اللي هو لو انت عملت كده انت هتخسر كده لو انت اخدت قرار هنا عواقبه كده والمميزات كده انا بالنسبه لي هو مش لازم يفهم فلوس أنا عايز اعلم اولادي اكتر كيفية اتخاذ القرار، كيفية التفكير بشكل منطقي بدعم من بيانات مش احاسيس على قد ما نقدر طبعا ازاي ياخدوا القرار
يعني مثلا امثله بسيطه انت النهارده نازل مع ابنك رايح بيه المحل تجيبله هدية لو انت حددت له ميزانية، حدد له رقم يصرفه في المحل ده يبقى انت بتغرس فيه اول حاجة ان انت لازم يبقى عندك ميزانية، انت النهارده مش لازم تقول له أنا بعلمك الفلوس أو أنا بعلمك التوعية المالية لأ انت بتحط له حاجات معينه اللي هو احنا رايحين هنصرف كده
لما اروح هناك وانا واقف معاه في المحل بقوله احنا خلاص اتفقنا ان انت معاك 100 جنيه هتصرفهم طيب الـ 100 جنيه دي هتجيبلك حاجه هتقعد معاك 3 دقائق وهتبوظ او هتقعد معاك اسبوع وهتبوظ أو هتقعد معاك سنة.. فأنت بتقوله انت عايز تتبسط لمدة قد ايه؟
فهنا انت هتخليه يفكر ازاي ياخد قرار بالفلوس اللي عنده جوه الميزانية بأطول وقت ممكن كمثال لو انت عايز تخليه يفكر في حاجة طويلة شوية
طيب خلاص هو أختار أنا عايز أشتري الحاجة الكبيرة دي، طيب هنروح نشوف الحاجه نروح نشوف الحاجه الكبيره اللي عجبتني هتقعد معايا سنه طيب هل في حاجه موجوده في المحل مثلا تقدر تقعد نفس السنه دي ولا هي حاجة واحدة؟ فلو ظهر لي مثلا حاجتين ثلاثه ممكن اقول له والله لا ده فيه ثلاث حاجات، طب احنا خلاص شلنا كل الحاجات اللي ملهاش لازمة واللي هو هتبوظ والكلام ده كله فأنا هنا بصيت على الـ 3 حاجات، طيب تعالى نقارن الجودة بتاعه الـ 3 حاجات دول والله دي متصنعه شكلها حلو ودي شكلها هتستحمل لا دي ممكن تتكسر هنا فأنت بتعلمه المخاطرة بشكل غير مباشر احنا اه ممكن نتبسط بيها سنه بس هي من طريقة تصنعها ومن شكلها ممكن متعيش
فانت مش لازم تغرز له موضوع الفلوس اللي هو خلي بالك سعر الصرف اهو الدولار بكام الجنيه بكام المفاهيم دي اصلا معقدة على الناس الكبيره هرجع للأساسيات بتاعه التمويل الشخصي اللي هو ميزانيه لازم التزم جواها هو لو راح صرف الـ 100 جنيه بس هو كده التزم لو اختار بطريقه مرتبه فهو حط لنفسه استراتيجية وحط لنفسه هدف نفس اللي احنا بنحاول نعمله ككبار هنا في البودكاست احنا بنحاول ننقله للولاد بس بطريقه لذيذه ان هم يفهموها لو حقق الهدف في الاخر لازم برده تكافئوه والله انا مبسوط جدا ان انت حققت الهدف وجبت حاجه بجد هتبسطك والكلام ده كله لان مع الاسف انت ممكن تخلي ابنك توديه كل يوم المحل ويقعد يشتري ويطلع في الاخر مش مبسوط يبقى انت هنا بتعلمه قيمه الحاجه برضه
المكافأة هنا لما تكافئوه انت انت جبت حاجه كويسه وثاني يوم انت بتتكلم عليها وبتحاول تحفزه أنت هنا بتغرس جوه دماغه حتة لما انت عملت مجهود وعرفت تجيب حاجه كويسه وبعدين انا كافأتك عليها يبقى احنا العملية نفسها نجحت بالنسبة لك وهتديله نوع من أنواع الثقة بالنفس
دي الطريقه اللي انا انصح بيها ان انت تعلمها بطريقة غير مباشرة مش لازم تكلمه على الفلوس غير لما يبقى عنده وعي يعني نقول مثلا 13 14 سنة يمكن ممكن بقى تبتدي تدخله في المبادئ الأصعب يعني ايه اسهم، يعني ايه فلوس، يعني ايه دهب والكلام ده كله
(13:55)
السؤال اللي بعده بيقول: ايه النصايح اللي تقدر تقولها لنا عن استخدام الذكاء الاصطناعي في الاستثمار؟
انا هنا هروح اكتر للناس اللي هي مهتمة بالبورصة أو بتكوين المحافظ الاستثمارية أيا كان فئة الأصول هم دول اللي ممكن يستخدمه اكتر الذكاء الاصطناعي في تحسين العملية كواحد مثلا مدير صندوق عايز يستخدم الذكاء الاصطناعي ان هو يعمل محفظه بشكل احسن ياخد بيانات كثير ويحللها يعني رسوم بيانيه بطريقه اذكى ولكن على مستوى الانسان العادي اعتقد ما زال ان انت تلتزم بالميزانيه وان انت يبقى عندك فائض في دخلك وان انت تستثمر في اصل يجيب لك فلوس والقصد ده ممكن ما يبقاش انت بتعمل فيه مجهود خالص زيك ما قلنا امثله كتير جدا زي مثلا بتشتري ذهب او بتشتريه عقار للايجار او تشتري اسهم او بتستثمر في حصه انت ما لكش دعوه في الشركه اصلا هي بتدير نفسها الحاجات دي انت مش محتاج فيها الذكاء الاصطناعي النهارده ان انت تختارها لان في ادوات جاهزه وممكن آلية اتخاذ القرار انت ما تعملهاش حد يعملها بالنيابه عنك على مستوى الراجل اللي هو غير متفرغ اللي بيشتغل دكتور ومهندس والكلام ده كله اعتقد يمكن انا غلطان بس اعتقد لحد دلوقتي المفاهيم اللي احنا اتكلمنا عليها دي اهم بكتير جدا من تطوير العمليه بتاعتك المهم اصلا يبقى عندك عمليه المهم ان انت يبقى بتحوش عندك ميزانيه عارف انت بتعمل ايه، بتستثمر، بتحاول تقلل الديون بتاعتك وتحاول تخرج من الديون بتاعتك على قد على قد ما تقدر تحاول ما تدفعش فوائد او ما تستلفش في حاجه انت مش عايزها دول اهم بكثير جدا جدا جدا من استخدام ذكاء اصطناعي في الاستثمار
(15:48)
مجلة كلام ينور الإلكترونية
عايز افكر الناس برده احنا عملنا مجلة الكترونية، المجلة دي هنحاول نصدرها ان شاء الله كل 3 شهور تقريباً يعني هنحاول نعملها 4 أعداد كل سنه، المجلة دي بشكل عام امتداد للي احنا بنعمله في كلام ينور هنحاول نغطي فيها نماذج ناجحة في الوطن العربي، هنحاول نجيب مقابلات مع ناس، هنحاول نكتب معلومات تاريخية عن العالم المالي، نصائح، مقتبسات من حلقات
عشان بس توصل للمجلة دي انت محتاج تعمل حساب على موقعنا ومن خلال الحساب ده هتلاقي قسم جديد عملناه حاجه زي منطقة أعضاء المنطقه دى هيبقى فيها شويه مصادر مختلفه عن اللي احنا بنعمله في البودكاست المسموع
وزي ما بقول دايما لو انت بتسمعنا لحد هذه اللحظة الحلقه دي بشكركم شكرا جزيلا على وقتكم ان شاء الله اشوفكم الاسبوع الجاي
Translation of some words and terms:
Experience خبرة
Resources مصادر
Senior أعلى / أقدم رتبة
Global عالمي
Directly مباشرة
Personal Finance تمويل شخصي
Process عملية
Section قسم
Member Area منطقة الأعضاء
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #ما_يسأله_المستمعون #الجزء_العاشر