109. ازاي تتعامل مع الخسارة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
الخسارة هو مصطلح بيتكرر كتير جداً في عالم الاستثمار بشكل عام، مع رواد الأعمال، المستثمرين في جميع المجالات، كلمة الخسارة مرتبطة جدا بالاستثمار.. يعني إيه خسارة؟ وليه بتحصل؟ ازاي ممكن تتعامل معاها؟ في حلقة النهارده بنتكلم على الخسارة والأحاسيس اللي بيمر بيها المستثمر في المرحلة دي
(00:49) مجلة كلام ينور الإلكترونية -
(02:35) مفهوم الخسارة -
(04:06) الخسارة من العوامل اللي بتأثر على طريقة الاستثمار -
(05:58) المخاطرة بتيجي من ايه؟ -
(10:19) ايه اللي بيحصل في الخسارة؟ -
(11:37) ازاي اغير عقليتي وافهم ان الخسارة جزء من العملية؟ -
(13:36) جودة الفكرة -
(15:18) تنويع الاستثمار -
(18:43) اسأل نفسك هل الـ 5 سنين الجايين كويسين ولا لا؟ -
(19:18) التعليم والخبرة -
(21:12) توقيت السوق -
(23:00) جودة الأصل وخطة الاستثمار -
يا رب تكون حلقة مفيدة، هنستناكم تبعتولنا آرائكم في مجلة كلام ينور الإلكترونية! ونشوفكم في حلقة جديدة الأسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
(00:49)
تحديث على حاجة احنا بنعملها على الموقع بتاعنا هتلاقوها، بشراكة مع شركة الأهلي ممكن و شركة اكت فايننشال - والدور الأكبر كان لشركة الأهلي ممكن - عملنا مجلة الالكترونية
المجلة دي هنحاول نصدرها ان شاء الله كل 3 شهور تقريبا يعني هنحاول نعمل 4 أعداد كل سنه، المجلة دي بشكل عام امتداد للي احنا بنعمله في كلام ينور، هنحاول نغطي فيها نماذج ناجحة في الوطن العربي، هنحاول نعمل مقابلات مع ناس، هنحاول نكتب معلومات تاريخية عن العالم المالي، نصائح، مقتبسات من حلقات، وفي حاجات تانيه احنا لسه بنفكر نحطها ولكن عشان بس توصل للمجلة دي انت محتاج تعمل حساب على موقع كلام ينور، من خلال الحساب ده هتلاقي فيه قسم جديد احنا بنحاول نعمله، احنا بنحاول نعمل كده منطقة اعضاء، المنطقه دي هيبقى فيها شويه مصادر مختلفة عن اللي احنا بنعمله في البودكاست المسموع لو انت عاوز تكمل اكتر
في افكار كده في دماغي هبتدي واحده واحده اعملها في الايام اللي جايه عشان يبقى في شويه مصادر يعني تطور كده الحمد لله بعد سنتين ابتدينا نفكر اننا نتوسع اكتر، نتوسع بحاجات تفيد الناس بشكل مباشر وتبتدي انها تشتغل بيها ففكرنا نعملها من خلال الموقع
فممكن تبص كده على الموقع وتسجل معانا حسابك وعايز برضه رودو أفعال الناس هل دي حاجة مفيدة؟ هل ممكن نغير فيها؟ إيه الأفكار الموجودة، برضه عملنا حتة كده لمقالات المستمعين لو الناس اللي بتسمعنا حابه تكتب أي حاجة ممكن برضه تبعتولنا
(02:35)
النهاردة أنا عايز أتكلم على موضوع الخسارة، الخسارة هو مصطلح مكرر كتير في عالم الاستثمار، هنلاقي أفلام كتير أو اي حاجه بتتكلم على البورصة او الاستثمار بشكل عام، رواد الأعمال، المستثمرين في جميع المجالات، كلمة الخسارة مرتبطة جدا جدا جدا بالاستثمار
انا عايز النهارده اكسر كده الكلمة يعني ايه خساره؟ وليه بتحصل؟ ازاي ممكن تتعايش معاها؟ وايه سببها اصلا اللي بتخلينا نفكر فيها؟
حاجات كده كتير ليها علاقة بكلمة خسارة؛ لأن فهمك لمفهوم الخسارة من وجهة نظري هيحسن ازاي كلنا بناخد القرارات الاستثمارية وازاي نقدر نعيش معاها، ازاي الحياه تبقى افضل وانت معاك استثمار وانت فاهم ايه النتائج بتاعته، وإيه اللي هيحصلك في الطريق
يعني انا النهارده هتكلم على موضوع الخسارة ده هشرح احاسيس المستثمر بيحسها بيمر بيها او مراحل معينه، المراحل دي طبيعيه ولكن انت كمستثمر جديد ممكن تبقى متخيل دي حاجه وحشه اوي و دي حاجه صعبه قوي، صعب اتعامل معاها اللي انا عاوز افهمهولك ان ده جزء من العملية الطويلة المدى اللي احنا كلنا بنمر بيها كمستثمرين
(04:06)
اول حاجه بتيجي في دماغي لما بفكر في كلمة الخسارة نفسها احنا دي بنخاف من الخسارة كبني ادمين يعني لان احنا بطبيعتنا بنحاول نبتعد عن المخاطرة، بنحاول نبتعد عن المخاطرة دي ممكن تكون حاجه جايه جينيا فينا من مراحل التطور بتاعه طريقة عيشه الإنسان
الإنسان كان في الأول في غابات مفتوحة وفي حيوانات بيحاول يتجنب المخاطرة لأن وقتها الخسارة كانت عالية جدا الخسارة انك مثلا لو طلع عليك مجموعة من الحيوانات فجأة وهجموا عليك الخسارة هنا هي حياتك وحياة الناس اللي معاك
فكان اللي محطوط على الترابيزة المخاطرة بتاعتك عالي جدا انك مثلا تخرج تحاول تصطاد في الفتره اللي الناس كانت بتصطاد فيها أو هي دي طريقة جمع الاكل يعني ده طبيعي ان احنا جسمنا النظام بتاعنا متأثر بالعوامل دي ممكن عبر آلاف السنين ممكن ما يكونش من بعيد قوي تاريخ يعني كان فيه قبل بقى طريقه الاكل طبخ والزراعة والكلام ده كله الناس كانت بتعتمد على الصيد
فطبيعي ان انت كانسان الحاله دي المخاطرة بتاعتك هي حياتك او مخاطره المجموعه اللي انت عايش فيها فأنت ما بتحبش تاخد خسارات كبيرة بالحجم ده ولكن مع الوقت الحياة تطورت والاكل بقى موجود بشكل أكبر وبسهولة ما بقاش في مخاطره على حياتك انك تاكل وكده الأنظمة اتغيرت ولكن التحيز بتاع الخسارة لسه ما زال جوانا كلنا بشكل أو بآخر ده من العوامل اللي بتأثر بالتالي على طريقة الاستثمار لان طريقه الاستثمار فيها مخاطرة
(05:58)
المخاطرة هنا بيجي من ايه؟ بيجي من عدم وضوح الناتج بتاع العمليه انا هعملها يعني انا لو جيت قلتلك تعالى نعمل استثمار معين وأنا مش عارف نتيجه الاستثمار ده قده فيه عدم وضوح النتيجة النهائية بتاعتي انا عارف هاعمل ايه وعارف هاستثمر في ايه هتقولي اشتري الحاجة الفلانية خلاص فهمنا ان انا هشتري ايه ولكن النتيجه بتاعته مش معروفه فهنا يعتبر حاجه اسمها عدم وضوح للنتيجة بتاعه القرار بتاعي ده
طيب لو جبتلك استثمار تاني اسهل شويه وقلتلك لا انا هنا انا عندي نتيجه وعارف احنا هنعمل ايه هتديني فلوس هتاخد عائد ربح مثلا 10% هتلاقي هنا أن الوضوح قلل المخاطرة جامد ليه لان المستثمر هنا نتيجه العمليه بتاعته
فلو اديناله فرصتين استثمار واحدة من غير وضوح وواحده بوضوح احنا بطبيعتنا هنتجه للحاجه الواضحة عشان كده هنلاقي في دول كتير الاستثمارات بتاعه الناس بتبقى في حاجات الثابت بيقول لك يعني يا عم خلاص انا عارف إيه اللي هيجيلي، عارف ايه اللى هاخده من الموضوع خلاص انا هتجه في هذا الاتجاه بيفضلوا دايما انهم ياخدوا المخاطرة الاقل لانه عارف النتيجه في الاخر
يبقى احنا عرفنا المخاطرة وهي عدم وضوح النتيجة وعدم وضوح النتيجة دي في سنة في سنتين في 5 في 10 سنين في 50 سنة من حياتك الاستثمارية بس انت مش عارف ايه اللي هيحصل وفي الحالة التانية انت عارف حاجه
يبقى أول حاجة التحيز بتاع انا عايز اعيش وما اخدش مخاطره كبيره هيزقنا كلنا غصب عننا اننا نروح ناخد الحاجه اللي نتيجتها واضحة لكن الحاجه اللي بتبقى نتيجتها واضحة بيبقى في مخاطرات تانيه فى دماغى انا محسبتهاش يعني مفيش حاجه بلا مخاطر مفيش حاجه ببلاش انت لازم في الاول وفي الاخر تاخد نوع من أنواع المخاطرة
(08:08)
طب لو واحد قاللي بقولك ايه اديني فلوس وهديك 10% وانا متأكد خلاص ان هو هيديني 10% خلاص النتيجه هنا واضحه ايه بقى المخاطرات أفكر فيها؟ هل الراجل ده اصلا عنده القدره انه يرجع الفلوس يبقى هنا المخاطرة مبقتش في العائد هنا المخاطرة بقيت ان هو اصلا يعرف عليه الفلوس طيب اديتها لمؤسسة مالية هل المؤسسة المالية دي جدير بالثقة ولا لأ طيب هل مثلا هيحصل حاجه في النظام بتاع الدوله دي أو في العملة بتاعتها يحصل فيها مثلا انهيار ولا لا ففي مخاطرات اخرى غير العائد لازم ابتدي ابص عليها
لو انا بشتري بيت البنت اصلا هيتسلم في ميعاده ولا لا هل هعرف ااجره بسهوله ولا المخاطرات لازم ابص عليها بشكل أعلى واكبر ومش بس في العائد ولازم ابص على المجموع بتاع الحاجات دي كلها مع بعض
(09:06)
يبقى انا النهارده لما اجي أقيم استثمار كده امسك ورقه وقلم واشوف العوامل كلها هي ايه مش العائد فقط بصيت على العائد تمام بصيت على الجودة بتاعه المؤسسة المالية أو الشخص تمام فكرة ان الحاجه دي تنجح اصلا من عدمها يعني لو بحط في مشروع الصغير هو اصلا ممكن ينجح ولا لا تمام فأنا لازم أعدي على الحاجات دي كلها عشان اصلا العائد ده يتحقق طيب هتقول لي ان في حاجات اللى بيقولوا عليها خالية من المخاطرة اه ان انت ممكن تدي فلوسك للحكومه او بتدي سندات او الكلام ده كله اه هيجيلك عائد بعمله هذه البلد اكيد ولكن في مخاطرة على القوة الشرائية بتاعه العمله دي دي سواء كان دولار يورو استرليني او عمله محليه من الدوله اللي انت عايش فيها كل العملات ما زالت فيها مخاطره
حتى لو رحنا للناحيه الثانيه بتاعه الكريبتو وما كريبتو والحاجات دي في برده مشكله ازاي تحتفظ بيها وهكذا فبرده فيها مخاطرة فأنا عايزك الأول تعرف يعني ايه مخاطره تعرف ازاي تحسبها وتفهم النتايج اللي ممكن تضرب او تبقى ضدك أو ضد مصلحة حضرتك
(10:19)
بعد كده بقى هنقل بقى لو حصل خسارة ايه بقى اللي بيحصل الناحيه دي
اولا لازم تبقى فاهم ان الخسارة هي جزء من العملية يعني انا دخلت استثمار مينفعش اعمل في الاستثمار هو مثلا قاللي هديك 12% في السنة مينفعش أتخيل أن 12% في السنة عوايد في السوق الأسهم مثلا أو أياً كان انهم هيجولي يوم واحد في الشهر هنا بندخل عامل جديد اللي هو التذبذب بتاع الاستثمار بتاعك التذبذب ده ممكن ينزل اول شهر 2% يطلع 5% ينزل 3% ويقعد يتحرك بأرقام غير متوقعة ولكن انا كراجل مستثمر انا فارقه معايا انه على مدار خمس سنين او 10 سنين أيا كانت المدة اللي انا داخل فيها الاستثمار ده انا عايز الاستثمار من الاول للاخر يزيد بالـ 12% انا مش فارق معايا ايه اللي بيحصل في النص
اللي بيضايق المستثمرين وبيخليهم دايما يخافوا ويغيروا في قراراتهم في نص العملية ساعات بيشوفوا خسارات جوه العمليه دي بتوصل ل 10 15 20% وفي الأزمات الكبيرة قوي ممكن يشوف خسارات 30 و40%
(11:37)
طيب انا ازاي اغير العقلية بتاعتي وافهم ان ده جزء من موضوع ؟
ان انا ما يبقاش عندي توقع ان العوائد بتاعتي تبقى جايه في خط مستقيم متوزعة على حسب الوقت لا لا انا فاهم ان النهارده ده جزء من تمرين بتاعي
يعني انا زي ما بقول كده انا بلعب دوري، الدوري الانجليزي مثلا 38 ماتش مينفعش اكسب كل الـ 38 ماتش ممكن تحصل اكيد يعني ممكن تيجي في يوم من الايام فرقة تكسب 38 من الماتش ولكن انا ممكن في النص اخسر واتعادل واخسر خسارات وحشه ويحرجوني واللعيبه عندها مشاكل والكلام ده كله لكن انا كمستثمر مهتم اني اكسب الدوري بالكامل اللي هو حصيلة 38 ماتش عن اقرب منافس ليا ومش بس كده انا ممكن يكون عندي حلم اكبر ان انا ممكن اقعد 10 سنين احاول اخد منهم 5 دوري، ممكن يبقى عندي هدف أعلى من الهدف الاولاني ان انا اكسب دوري واحد
فلو انا عندي الصوره الكبيره في دماغي موضحها بالنسبة لي هبتدي اتقبل الخسارات اللي هي في المدى قصير فمهم جدا جدا ان انت تبقى فاهم ان انت عندك سياسة استثمار طويل الأجل وهيحصل في النص حاجات لازم تستحملها ده جزء من التمرين بتاعك ده جزء من التعب ده جزء من صعود السلم وهكذا ما تخليش الاستثمار بتاعك يتأثر فقط عشان حصل جواه مواقف معينة
ممكن حد محظوظ يبتدي عمره ما يخسر في الاستثمار ده او ممكن حد يبتدي في أعلى نقطة في سوق معين مثلا ويكمل على مدار سنتين تلاتة بيستثمر وفجاه بعد كده يطلع كسبان بعد ما السنتين تلاتة دول يحصلوا في الأزمة الفلانيه اللي معديه عليه
التوقيت بتاع بدايتك للاستثمار ممكن ياثر على تجربتك جوه الاستثمار والتوقيت ده مش بايدينا دي ممكن تكون حاجه بالحظ دخلت النهارده بالصدفه فتحت حسابي في الوقت ده وعملت كده وعملت كده وعملت كده
(13:36)
ايه بقى المهم؟ هارجع وأقولها دايما الجودة بتاعه الاصل اللي انا بشتريه، جودة بتاعه الفكره بتاعه الاصل اللي انا بشتريه يعني انا بشتري أيا كانت الحاجه اللي احنا بنتكلم عليها انا مثلا بشتري بيت بحاول اشتري احسن بيت مميز اقدر ااجره اقدر ابيعه بسهولة وهكذا لو دخلت في ازمة في البلد اللي انا فيها غالبا هياخد شهور وبعدين يبتدي يعوض الخسارات اللي هو عملها على المدى الطويل الدخل بتاعك من الايجار اللي جاي لو هو بيزيد مع الوقت هيغطيلك الخسارات اللي بتحصل وهكذا
يبقى هنا جودة الأصل نفسه مهم نفس الكلام لو عندي اسهم بتعمل احسن من الاقتصاد اللي موجود فيه بتزود أرباحها وبتكسب وشركات كويسه جدا وهكذا مع الوقت هيعالج الموضوع ده
(14:19)
اول هنلاقي شركات كبيرة زي أمازون وجوجل وآبل في فترات معانا خسروا 270% من القيمة السوقية بتاعتهم يعني ممكن المستثمرين يكونوا خسرانين 50 60% هل ده حصل لمده 20 30 سنة؟ لا هو بيبقى حاجات معينه بتيجي في النص بتخلي الأسهم دي تنزل بتخلي الناس تخاف بتخلي الناس تبطل تحط فلوس وبتخلي الناس تبيع اصلا وتحقق خسارتها انا مش عايزك تبقى من الناس دي او مش عايزك تبقى من الناس اللي بتخاف لا انا عايزك تبقى متأكد أن الأصل بتاعك هو أصل كويس وطول ما انت عندك ثقة فيه زي ما بتفتح فكره او مشروع او مجهود عندك في شغلك انت بتحاول تعمل اكتر حاجه عندك وبتسيب النتائج للوقت ففي الوقت للأسهم دي بتنهار انت بالعكس لازم تكون من الناس اللي بتشتري امازون ابل وجوجل الحاجات دي كلها بتزود استثماراتك مش بتقللها عشان التجربه اللحظيه اللي انت بتمر بيها على المدى القصير
(15:18)
اللي بيساعدك كمان انك تتحمل الخسارة وده مبدأ احنا اتكلمنا فيه قبل كده كذا مره وهو التنويع في الاستثمار، التنويع في الاستثمار هنا انا مش عاوزك تنوع في الاسهم بس مش هتشتري سهم واحد والكلام ده لا انا عايزك توزع حتى في الأصول مع الوقت انا عارف ان في ناس ممكن تكون بتسمعنا لسه بتبتدي حياتها المالية والكلام ده ممكن يكون بعيد عليها بس لا انا عاوز العقلية او الناس اللي عندها اصول تبقى مختلفه تاني نرجع ونقول دي بتعتمد على كل واحد والفرص اللي قدامه والبلد اللي هو عايش فيها ومجال شغله والكلام ده كله بس العقلية بتاعتك مهم جدا ان هو يتوزع يتوزع في الأصول مثلا عندي عقار عندي اسهم عندي دهب عندي ارض عندي حاجه بأجرها أيا كان الفئه اللي انت فيها اللي بيحصل هنا ايه ان انت بتلاقي فيه فترات معينة الأصول دي مبتمشيش مع بعض يعني بتلاقي مثلا حاجات بتحقق خسارة وحاجات بتحقق فمكسب ممكن في السنين اللي في النص دي التنويعي يساعدك انك تحافظ شويه على شكل المحفظة بالكامل
ممكن نلاقي واحد عنده 50% من الثروة بتاعته او من دخله موجودة في العقار وعنده 50% اسهم مثلا يعني ونلاقي ان الاسهم في البلد دي بتمشي في وقت بتطلع والعقار مبيطلعش والعكس بيحصل مثلا يعني بقول أي مثال في الفترات اللي بيحصل كده هنلاقي محفظته بتبقى مستقرة بشكل عام ده خسران 10 وده كسبان 10 يبقى محفظة محصلهاش اي حاجه السنه دي فبيحميه ويجي في سنة الاتنين بيطلعوا مع بعض يعمل عوائد السنتين دول يعوضهم في هذه السنة .. فالتنويع في فئات الأصول هنا بيساعدك تتحمل الخسارة، يساعدك تنام احسن وبيساعدك تبقى مستريح وبيساعدك ان انت متبقاش قلقان
برضه التنويع الجغرافي بتاع الموضوع بيساعد جدا في الحته دي واتكلمنا الحلقه بتاعه الاستثمار حتى في البلد اللي خارج اللي انت عايش فيها مهم جدا لسبب ده لان انت ممكن يبقى عندك ده جاي من ان انت عندك اسهم في دولة وأسهم في دولة والدولة دي مفيهاش مشكله والدولة دي فيها مشكله وبعدين يحصل أن الدولة اللي فيها مشكله تعالج المشكلة فالأسهم تطير بتاعتها والدوله اللي مفيهاش مشكله ما يحصلش فيها حاجه فيبقى في عوائد غير مرتبطة ببعض في المحفظه بتاعتك
تاني احنا بنبتدي والناس صغيره معندهاش مشكله لو ابتديت صغير بس العقلية دي لازم تبقى موجوده عشان لو جاتلك فرصه انك تنوع بيها حتى لو بمبالغ صغيره ممكن تبتدي تعملها
(17:38)
حاجه مهمه تانيه لازم اقف فيها واقفه مع نفسي كل سنة، كل أول سنة أبص على المحفظه بتاعتي شكلها عامل ازاي اشوف هل اللي انا كنت متوقعه بيتحقق ولا لا، هل الاستثمارات حتى اللي بقى لها ثلاث اربع خمس سنين معايا حققت اللي انا عايز اعمله ولا لا وبعدين ممكن ابتدي اعمل تنويع آخر في بدايه السنه الجديده يعني مثلا عندي أصول طبعا عمري ما اختار كل الحاجات اللي بتكسب بشكل مؤكد يعني بس عندي أصول وعندي جزء من المحفظة مثلا فكرة معينة والفكره دي لا تنجح مش قادره تنجح او مش عارف اعمل او مش حاسس ان في 5 سنين الجايين في فرصه انها تنجح او ايا ممكن وقتها ابطل اضخ فيها فلوس واضخ في حته تانيه في المحفظة لازم كل سنة انا بقول مش اكتر من كده يعني متقعدش كل 6 شهور او كل 3 شهور تقعد تغير في قراراتك لا كل سنه مع السنة المالية بتاعتك تقعد تبص والله انا عندي الحاجات دي طب اغير هنا طب طب ازود هنا وخلاص بمجرد ان انت وصلت النقطه دي انت هتكمل بقيت السنه من غير ما تفكر
(18:43)
هنا مهم جدا ان انت مش عشان الخمس سنين اللي فاتوا كانوا وحشين ان انت تبطل تستثمر في الخمس سنين الجايين لا انا عايزك تسال نفسك سؤال هل الخمس سنين الجايين كويسين ولا لا كل مره يعني مهم ان احنا نحاول نعرف ايه اللي هيحصل في الاستثمار ده في السنين القادمه مش في السنين اللي فاتت وفي طرق كتير جدا ممكن اقرأ توقعات محللين، ممكن احاول اربط نقط كده من الحاجات انا مقتنعه بيها، حاجه أنا مؤمن بيها عايز استثمر فيها أيا كانت الطريقة اللي انت هتوصل لقرارك في الخمس سنين الجاي بس هنا نقطه ان انا عايزه اعمل واقفه سنوية نراجع فيها المحفظه بتاعتنا
(19:18)
حاجه مهمه برضه كمان عايز ازودها التعليم والخبرة دول حاجتين انت هتعرف تاخدهم مع الوقت الاستثمارك انت دخلت اخدت قرار وشفت النتائج بتاعه وغيرت وعملت كل انا قلنا عليه ده مع الوقت انت هتتعلم تعليم ده ممكن يكون من خلال كورس او من خلال قراءة كتاب او اي حاجه او من خلال التجربه ده كله بالنسبة لي تعليم التعليم ده هيخليك تتعامل مع الخسارة بشكل احسن سنه عن سنه يعني مثلا ممكن يكون عندي حاجه في المحفظة حصلت لي قبل كده ممكن تكون نازله 30 40% عادي انا مع الوقت ابتديت اعرف اتعامل معاها احسن كتير جدا عن ما ابتديت اول يوم في الاستثمار بتاعي ليه لان انا بقيت عارف ان انا عندي نظام و بفكر بطريقه معينه ممكن تكون صح او غلط مش بقول ان انا عندي احسن طريقه مفيش حد عنده احسن طريقه بس تقبلي للخسارة على المدى القصير بقى اعلى بكتير، الاحتمال بتاعي للخسارة بقى أحسن بكتير ده جه منين ده جه غالباً من الخبرة والوقت مع ان انا بغير في طريقة تفكيري بفتح صدري اكتر ان انا اعيش مع الخسارة عادي مفيش مشكله
(20:35)
المهم عندي بقى في المحفظه بشكل كامل ممكن يبقى عندي أصل بينزل اه بس شكل المحفظة بالكامل مهم جدا الحته دي الناس أصلها بتقعد تركز في ايه ده انا عملته وحشه قوي وانا خسرت كل فلوسي يبقى انت ممكن تبقى حاطط رقم كبير ملهوش لازمه استحمل المخاطرة هنا عوامل كتير ممكن تأثر عليك في ان انت تتقبل الخسارة ولكن مع الوقت انت هتبتدي تعمل حجم احسن هتقول خلاص انا مش هحط اكتر من 20% في الحاجة الفلانية، 50% في الحاجة العلانية وهكذا فهقدر اتعايش مع الخسارة أفضل فالتعليم من أهم الحاجات
(21:12)
حاجه كمان بحس ان الناس بتحاول تعملها بتحاول تعمل توقيت للسوق توقيت للسوق ده معناه إن انا بحاول انقي وأنشن على الوقت اللي انا هشتري فيه الأسهم انا مستني لحد ما الاسهم تنزل و والأسهم مبتنزلش والأسهم تروح طالعة تجري وانت مستثمرتش انت قاعد عمال تحوش فالتوقيت هنا ممكن يعرضك للخسارة على الطويل اكثر لان انا بحاول انقي والموضوع مش سهل ان انت تعرف تنقي الوقت المظبوط بالملي ان انت تشتري الحاجه الفلانيه
ولكن لو عندك خطة استثمارية في الوقت الوحش برده هتعرف تستثمر انت هتشتري في جميع الأوقات لو عندك متوسط تكلفة الدولار أو أياً كانت الطريقة اللي ممكن تستثمر بيها لو عندك النظام انت خلاص هتشيل من عندك عامل الوقت بتاع السوق ولو شلته ده هيقلل إحصائيا فرصك خساره لان انت بتشتري في جميع الاوقات مثلا حاجه معينه
متزودش عامل زياده حاول تقلل العوامل عليك حاول تحول قرارك انه يكون حاجه سهله حاجه بتاخد مجهود او حاجه بتضيع وقتك وهكذا
(22:24)
حاجه كمان في الخسارة الصبر الصبر مهم جدا دايما بتقولي ان الوقت والمدى الطويل هو اللي بيعالج معظم مشاكلك فلو انت معندكش صبر ومعندكش قدره على تحمل الوقت فدي مش اللعبة بتاعة حضرتك، حضرتك مفروض متستثمرش لان مفيش حاجه بتحصل من يوم وليله الموضوع عملية طويلة على مدار سنين فلو انت معندكش الصبر الكافي ان انت تسمح لفرصتك الاستثمارية انها تؤدي الغرض منها انت غالبا مش هتحقق النتائج اللي انت عايزها
(23:00)
عايزه اقفل الحلقه دي بحاجتين مهمين جدا جدا جوده الاستثمار بالنسبة لي هي اهم حاجه اترجم العوائد بتاعتي على المدى الطويل يعني لو عندي شركات باختار منها طبيعي ان انا عايزه اشتري احسن شركات كجودة كجودة معناها ان هي شركه بتعمل فلوس مستمره انها تعمل فلوس وعندها حصة سوقية ومش هتموت ومش هتفلس اللي هو انت لو فكرت بمنتهى البساطة مع واحد صاحبك بتفتحوا مشروع انت مش عايزة يعمل معاك الحاجات دي فكل ما أعلى في الجودة بتاعة الأسهم بتاعتي كل ما أعلى في المحفظة بتاعة الأسهم بتاعتي كل ما يكون الجودة هنا أحسن
نفس الكلام على الحاجات اللي فيها مقارنة ببعض زي بيوت كل ما قال لي الجوده بتاعه البيت كل ما غالبا العوائد بتاعتي هتبقى احسن والاستثمار تسسيله هيبقى أسهل وتأجيره هيبقى أسهل وكل حاجه أسهل ففي أي فئة أصول بتبص عليها الجوده مهمه جدا جدا انت بتفكر تعمل الفكره بتاعتك
النقطة التانية اللي انا بقعد اقولها 50 مره كل مره وممكن الناس تكون وزهقت منها أنت تستثمر على المدى الطويل وتستثمر على المدى الطويل بخطه والخطة دي أنت بتحطها وبتراجعها وبتعمل تعديلات بسيطة عليها ولكن أنت بتلعب لعبة طويلة فلازم يبقى معاك خطة
فلو نقيت جودة عالية وعندك خطة للاستثمار أعتقد هتعرف تعيش مع الخسارة بشكل افضل من اللي بتحصل لك على المدى القصير لو انت مش واثق في النقطتين دول يبقى انت عندك مشكله ارجع تاني أكد على الجودة بتاعه الأصول اللي معاك وأكد على خطتك كذا مره ومع الوقت تأكد إن أنت هتتعاملوا مع الخسارة بشكل أفضل وطول ما الخسارة متحققتش طول ماهي خسارة ورقية هي في الحقيقة عندها الفرصة ترجع تاني وتعوض لو الجودة عالية
(25:11)
يا رب تكون الحلقه دي مفيدة هي حلقة شويه كده عامة عن نفسيات المتعاملين أو نفسيات المستثمرين اللي هم المستثمرين الكبار اعتقد ان الحاجات دي بتبقى موجوده في دماغهم او بيفكروا بالطريقة دي لان انت ممكن تقرا كتب كتير وتقرا نماذج وفي ناس عندهم حظ وعملوا فلوس فجأة ضربت معاهم لا انا بكلمك اكتر على الناس اللي هي بتستثمر على المدى الطويل وبتفكر تحط فلوسها وأفكارها نفس الكلام ده على مشاريعهم لازم برضه أفكر في جودة المشاريع كل حاجه يعني وانت بتعمل أي حاجة لازم تفكر في الجودة بتاعة الاستثمار بتاعك
شكراً جداً جداً جداً على وقتكم وإن شاء الله أشوفكم الأسبوع الجاي
Translation of some words and terms:
Update تحديث
Access وصول
Section قسم
Release يطلق
Direct مباشر
Concept مفهوم
Outcome نتيجة
Risk Averse النفور من المخاطر
System نظام
Hunting الصيد
Uncertainty عدم الوضوح / عدم اليقين
Survival نجاة
Risk-Free بلا مخاطر
Credible جدير بالثقة
Target هدف
Short Term مدى القصير
Investment Strategy استراتيجية الاستثمار
Asset أصل
Mindset عقلية
Wealth ثروة
Stable مستقر
Uncorrelated Returns عوائد غير مرتبطة
Tolerance الاحتمال
Experience خبرة
Dollar cost averaging متوسط تكلفة الدولار
Marketshare الحصة السوقية
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #التجيز_للاستثمار_المحلي