146. الاستثمار في زمن التضخم في فئات الأصول المختلفة (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
النهارده بنتكلم على الاستثمار في زمن التضخم، من الحاجات اللي سألتونا عليها في الفترة الاخيرة كتير، والتضخم ده بيحصل في العالم كله لأسباب اقتصادية معقدة لها علاقة بأداء الدول ولكن النهاردة احنا بنبص عليه من ناحية الفرد، ازاي الفرد يستثمر في هذه الظروف! وليه الطبقة المتوسطة هي اكتر طبقة بتتأثر وقت التضخم.. ازاي نتجنب الموضوع ده ونعدي من فترات التضخم العالي من غير ضرر
01:42 تعريف التضخم -
04:02 التنوع في الاستثمار هيساعدك تتجنب مخاطرة التضخم -
05:27 فئات الأصول اللي بتأدي كويس في فترات التضخم العالي -
06:13 فئة السلع -
07:20 فئة العقارات -
09:25 فئة الأسهم -
11:38 ازاي نعرف القطاعات اللى هتستفيد وقت التضخم؟ -
12:13 السندات المحمية ضد التضخم -
13:44 فئات الأصول اللي بتأدي بشكل سيئ في فترات التضخم العالي -
14:20 فئة الودائع -
14:52 شهاده الاستثمار / الصكوك أو سندات طويلة المدى -
18:31 ايه اللي بيخلي الطبقة المتوسطة تختفي لما يحصل تضخم؟ -
في حلقة النهاردة حاولنا نتكلم على أكبر 4 فئات أصول بتحميك وقت التضخم، لو شايف إن في فئات أصول تانية بتحميك اكتر ابعتلنا.. احنا دايماً مستنينكم تبعتولنا آرائكم و استفساراتكم على صفحتنا على السوشيال ميديا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهارده انا عايز اتكلم على موضوع الاستثمار في الظروف لما يكون في دولة ما تضخم بشكل كبير دي من الحاجات اللي اتسألت عليها في الفترة الاخيرة كتير واحنا بنشوف التضخم ده بيحصل في دول كتير يعني شفناه قبل كده في دول في العالم كله
أسباب التضخم ترجع لحاجات اقتصادية معقدة لها علاقة بالدولة، لها علاقة بحاجات كتير ولكن انا عايز ابص عليها من ناحية الفرد ازاي يتعامل في هذه الظروف، ازاي يستثمر
هنبص على فئات الأصول وبعدين عايز اتكلم على زي ما بنقول في الظروف دي ايه اللي بيحصل ان الطبقة المتوسطة هي اكتر طبقة بتضر، ازاي نتجنب الموضوع ده وازاي نقدر نعدي من فترات التضخم العالي لانها بتبقى صعبه جدا على الناس
01:42
اول حاجه هبتدي بيها دايما هو تعريف التضخم، التضخم هو فقد العملة المحلية بتاعتك للقوى الشرائية بتاعتها ده ملخص موضوع التضخم
ان انت بيبقى عندك عمله والعملة دي لأسباب معينة بتفقد القيمه الشرائيه بتاعتها فأنت كواحد مستثمر دايما بتحاول تحافظ على القيمة الشرائية بتاعتها يعنى انت النهاردة عندك فلوس عايز الفلوس دي تجيب لك نفس الحاجه كمان سنه كمان سنتين كمان 10 سنين ومش بس كده انت كمان عايزها تزيد اكتر من التضخم، يعني المستثمرين دايما بيبصوا على الحسبه دي بيبقى توقع لنسبة التضخم في الدولة اللي هم بيستثمروا فيها وبيشوفوا العائد على الاستثمار بتاعهم وبيحاولوا يجيبوا عائد على الاستثمار على من التضخم ده عشان يبقى هنا في حاجه اسمها خلق القيمة الحقيقية اللي هو انت بتزود بتعمل زيادة حقيقية للقوة الشرائية بتاعتك في هذه الدولة
فبس انا مش عايزه اقول ان انا جايلي فرصه استثماريه مثلا هتديني 20% والتضخم اللي انا في البلد اللي انا عايش فيها 30% فكده معناه ان انا حققت خسارة على الورق اه هبقى كسبان 20% ولكن قوتي الشرائية نزلت 10% فلازم ناخد بالنا جدا واحنا بنستثمر من نسب التضخم في الدول اللي احنا عايشين فيها ولازم نعرف ايه هى الأدوات والأصول اللي انا لازم اتجاه من خلالها
يبقى زي ما تكلمنا كده على التضخم لازم تبقى فاهم ان كمان في مخاطرة من القوة الشرائية دي لما بتضعف انت كمان قدرتك على زيادة مرتبك مبتبقاش بالسرعة يعني مش بس القوه الشرائيه بس بتضعف لو انت راجل بتجيب دخل في اوقات كتير جداً بنشوف لو انت عندك مرتب معين والمرتب ده مبيزيدش بنسبة التضخم فهنا لازم الأصول تحميك شويه لو عندك أصول وعندك مدخرات وعندك أدوات تقدر تحاول تحميك شويه لو انت مش عارف تزود مرتبك بالسرعة المطلوبة
تاني بكرر أن الاستثمار هنا مهم جدا جدا جدا انه يحميك في الظروف دي لأن زي ما قلنا انت مش عارف تزود مرتبك بالسرعة المطلوبة فلازم الاستثمار بيبقى بالشكل الصحيح في هذه الفترة
04:02
الحاجه كمان المهمة التنوع في الاستثمار يعني مفيش أصل واحد هتنشن عليه هو اللي هيطلع احسن واحد في ظروف التضخم، ممكن يكون التضخم بيجي بأشكال مختلفة، بطرق مختلفة فلتنوع في الاستثمار وتكوين محفظة متنوعة مهم جدا وهيساعدك ان انت تتجنب المخاطرة الموجود في التضخم
زي ما قلت في الأول كده الطبقة اللي بتحمي القوة الشرائية بتاعتها بتفكر بهذه الطريقة، المستثمرين لازم يفكروا لو انت عاوز تحول فكرك من فكر فقط استهلاكي وتبقى مستثمر لازم تفكر بالعقلية دي والعقلية دي لازم تبقى عندك على المدى الطويل يعني انت ممكن يجي عليك فترة تضخم في اول سنه انت محققتش نتائج كويسه قوي ولكن لو الأصول بتاعتك مظبوطة وشراك مظبوط والحاجه اللي عندك مظبوطه مع الوقت هتعيد تسعيرها وهتحافظلك على القوى الشرائية بتاعتها على المدى الطويل
فهرجع واكرر زي ما كررت في حلقات كتير جدا انا كمستثمر مش ببص على السنة أو السنتين انا بحاول ابص على المدد الزمنية الطويلة لأنها هي دي اللي بتفرق جدا في حياتك وهي اللي بتفرق في حماية الأصول اللي عندك
05:27
تعالوا بقى كده نتكلم بشكل كده مبسط ايه هي الأصول اللي بتعمل اداء كويس في فترات التضخم العالي.. تاني الحاجات دي مش لازم تبقى عندك النهاردة،ـ مش لازم تطلع كل الفلوس اللي عندك وتروح تشتريها وتجري بسرعة الحق اشتري.. لأ انا عايزك تكون محفظتك دي على وقت طويل تشتريها بالراحة وتوزع الاستثمارات على قد ما تقدر والعملية دي عملية طويلة المدى فمش لازم النهارده لو انت معندكش الحاجات اللي احنا هنقولها النهارده يبقى انت عملت مشكلة او انت كده مش عامل اللي عليك لأ بالعكس حضرتك ممكن تاخد الوقت انك تكون المحفظة دي بالراحة وتستثمر على المدى الطويل
06:13
أول فئة من فئات الأصول دي هي فئة السلع، الناس دايماً بتتجه للدهب أو الفضة للأستثمار وأكتر الدهب وبتشتريه بشكل خام مش مصنع عشان متبقاش بتخسر فيه وهي بتبيعه وبتشتريه وبتعتبر من الحاجات اللي بتحمي في فترات التضخم العالي وده لسبب أن الدهب بشكل عام بيتسعر بعملة زي الدولار فليه سعر وليه بورصة عالمية من أكتر الأسواق اللي فيها سيولة وتقدر تبيع وتشتري في أي وقت لو روحت لتاجر بتاع دهب هيشتري منك في أي وقت مفيش حاجه اسمها أنا مش عايز الفترة دي فالسيولة بتاعتها عالية جداً وبتحميك زي ما قولنا من التضخم لأنها بتسعر بعملة عالمية ليس لها علاقة بالدولة اللي انت عايش فيها يعني مثلاً انا عايش في فنزويلا وفي تضخم في العملة بتاعتي ملهمش دعوة بالعملة المحلية هو دايماً بيسعر الدهب أو السلع بشكل عام على طريق الدولار
07:20
تاني فئة أصول هي العقارات، فئة العقارات هنا وخاصة العقارات اللي بتجيبلك ربح شهري أو إيجار شهري بتعرف تأجرها والسبب أن في فترة التضخم العالي بيبقى في ضغط من الأسعار في كل حاجه يعني السلع اللي انت بتشتريها من السوبر ماركت أو من أي حته السلع الإستهلاكية بتزيد سعرها فبالطبيعي أسعار الإيجار في الدولة دي بتزيد بالعملة المحلية
لما سعر الإيجار بيزيد ده بيدفع سعر العقار نفسه ككل انه يطلع، وده السبب اللي بيخلي أسعار العقارات يعني أنا بسمع بقالي سنين إن في دول فيها العقارات غالية جداً أو هتغلى والناس مش فاهمة هو ليه الغلا ده مبيخلصش هو دايماً الأسعار في ازدياد والسبب يرجع إن القيمة الإيجارية بتاعة الوحدات دي مع الوقت بتزيد
14:44
طيب كل ما العقار ده يبقى مميز أو كل ما يكون هو عنده ميزة تناسبية مع العقارات اللي جانبة كل ما كمان اسعاره هتطلع أكتر وكل ما سعر الإيجار يعلى هيطلع سعر البيت أكتر وهكذا يبقى العقارات من الحاجات اللي بتحميني
08:43
يبقى الحاجتين دول احنا قولنا السلع والعقارات الأتنين دول سعرهم بيحميك في الفترات دي والدهب برضه عشان أنا مقولتش الموضوع ده إن الدهب ممكن كمان متشتريهوش من خلال الخام نفسه ممكن تشتريه عن طريق صندوق استثمار مقيد على البورصات، ونفس الكلام بالنسبة للعقارات ممكن تشتري صندوق استثمار مقيد على بورصة ما يبقى عندها هي العقارات فمش لازم تجمع فلوس العقار بالكامل عشان تستثمر ولكن ممكن تشتري حصة في صندوق استثمار نفس الكلام للدهب فالناس اللي عايزة تستثمر بمبالغ صغيرة دي الفرصة انك ممكن تشتري صناديق دي
09:25
تالت حاجه من الحاجات اللي الناس ممكن تشتريها هي الأسهم، والأسهم ممكن متكونش بتسعر لحظياً يعني لما بيحصل تضخم في البلد مش هتلاقيها تاني يوم على طول سعرت التضخم ده بالكامل ولكن على مدار سنة أو سنتين تلاتة ممكن تلاقي الاسعار ابتدت تطلع وتعوض
يعني إيه اللي بيطلع الأسهم؟ المستثمر خارج هذه الدولة كان بيشتري السهم النهاردة ده بـ 100 وحصل تضخم في العملة أو القيمة الشرائية بتاعتها نزلت 50% فـ بالنسباله النهاردة بدل ما بيشتريه بـ 100 هو النهاردة بيشتريه بـ 50 لأن العملة المحلية ضعفت فلما هو بيبعت عملة خارجية مثلاً زي الدولار للدولة دي هو بيعرف يشتري نفس عدد الأسهم ولكن النهاردة بـ 50 فهيبتدي يحصل طلب على الأسهم دي فهيزق سعرها فأنت لو مستثمر داخلي جوه البلد دي أنت هتستفيد من زيادة الأسعار
10:27
الحاجه كمان المهمه جداً وهنا هنرجع للحلقة بتاعة القطاعات يمكن وإيه هو القطاع مهم جداً انك تختار القطاعات اللي هتستفيد من التضخم يعني مش كل الشركات هتستفيد بنفس النسبة هنلاقي إن حد مثلاً بتاع خدمات أو حد بتاع منتجات الأفراد، الشركات اللي بتعرف ترفع أسعارها وقت التضخم، الأسهم بتاعة الشركات دي ممكن كمان أدائها يبقى أحسن من الأداء العام بتاع السوق
11:02
برضه في قطاع تاني او نوع معين من الشركات المقيدة في هذه البورصة اللي هي مثلاً بتجيب دخل بالدولار أو دخل خارجي ليس له علاقة بالدولة دي يعني مثلاً شركة سوفت وير مقيدة في دولة ما وبتبيع لشركات بره فأرباح الشركة دي مش هتتأثر بالعكس هي ممكن تزيد أو يكون دخلها بالدولار، شركة 100% من دخلها بالدولار بس هي مقيدة بالعملة المحلية هنلاقي الشركات دي بتستفيد في الفترات بتاعة التضخم لأنها ملهاش علاقة باللي بيحصل في الدولة اللي هي مقيدة فيها لأن هي ممكن يكون أرباحها جايه من بره
11:38
طيب ممكن نعرف الأسهم دي منين؟عن طريق السمسار بتاعك، عن طريق قسم الأبحاث بتاعهم، عن طريق الراجل بيساعدك تدور حسابك عن طريق المستشارين الماليين بالتأكيد ممكن تسأل الناس دي ايه هي مجموعة الأسهم اللي ممكن تكون بتستفيد في فترة التضخم وتعمل محفظة متنوعة هناك صناديق الاستثمار اكيد بتبقى شايف الحاجات دي فطبيعي مدير الاستثمار ممكن يكون في الفترات دي بيحول محفظته اللي هي بتستفيد في فترات التضخم
12:13
رابع حاجه ممكن نتكلم عليها يمكن دي مش موجوده قوي في الدول العربية لكن الناس اللي بتستثمر في الاسواق الامريكيه هتلاقيها موجوده حاجه اسمها "السندات المحمية ضد التضخم" ده بيبقى سند من أدوات الدخل الثابت لكن الفايدة بتاعته مربوطة بالتضخم بتاع الدولة يعني السنه ده بيديك مثلا التضخم في الدولة 2% هو بيديك 2% لما التضخم بيبقى 6% هو بيديك فايدة أو عائد 6% ده مش موجود عندنا ولكن الميزة في الفوايد دي ان هو بيحميك في حالة أن أسعار الفايدة بشكل عام بتزيد هنلاقي مثلا ان السنتين اللي فاتوا في زيادة كبيرة في الفايده في السوق الأمريكي هنلاقي ان الفايدة طلعت من 1.5 لـ 2% مثلا لحد النهارده قرب الـ 5%
هنلاقي ان السندات المحميه ضد التضخم العوائد بتاعتهم عيلت جامد الفتره الاخيره عشان هي بتتبع الفايده العالمية مع الاسف مش موجود المنتج ده في الأسواق المحلية أو الأسواق العربية يعني انا ما شفتوش هو في امريكا اسمه "الأوراق المالية المحمية من التضخم" دول بيعملوا نفس الأداء ومقيدين على البورصة في صناديق استثمار برضه تستثمر فيها
ده بشكل عام اربع حاجات ممكن نقول انهم بيحموا تضخم ومهمين جدا اننا نبقى فاهمين الحاجات دي
13:44
ايه الحاجات بقى اللي بتأدي وحش جدا في الوقت بتاع الفوائد لما بتبقى عاليه او التضخم بيبقى عالي ثاني الفوائد بتبقى عاليه الكاش اول حاجه مشكلته انه بيخسروا دي اكتر حاجه بتخسر في فترة التضخم العالي
يعني انا لو عندي كاش وحطه في البيت مع الاسف لو التضخم في البلد اللي انا عايش فيها 20% 30% فانا طبيعي خسرت 20% و 30% من القوة الشرائية بتاعتي ده يعتبر من اوحش الاستثمارات الوقت ده ولا يعتبر استثمار يعني لانه لسه كاش
14:20
طيب ايه الحاجه التانيه الودائع كل الحاجات دي مع الأسف بيبقى دائما أضعف من التضخم ومش بيحافظ ممكن يحافظ على جزء الجزء الخسارة بتاع القوة الشرائية بتاعتك ولكن هو عمره ما هيحافظ على القوة الشرائية بتاعتك لان عمر البنوك ما بترفع الفايده بسرعه انها اعلى من التضخم وخاصة في الأسواق الناشئة والعربية ده اللي غالبا بيحصل
14:52
النوع التالت الوحش لو عندك حاجه طويله المدى زي مثلا شهاده الاستثمار أو صكوك أو زي ما بنقول سندات طويلة المدى مثبت انا الفايده 3 سنين 5 سنين مدة طويلة انا مثبت عند 10% والتضخم بتاعي في الدولة 20% فأنا مع الاسف القوة الشرائية بتاعتي سنوياً هتخسر 10%
يبقى انا لو عندي الحاجات دي وانا شايف ان انا في فتره هيفضل فيها تضخم بشكل عالي لازم ابتدي أحول استثماراتي من الكاش او اشباه الكاش زي الودايع، زي شهادات الاستثمار زي الحاجات دي كلها ان انا ابتدي اروح الناحية التانية
وطبعاً لو عندي الحاجة الرابعة اللي هي الحاجات اللي بتأدي بشكل وحش لو انا عندي استثمار في شركة سواء كانت عامة على بورصه او مع اصحابي او بزنس خاص والشركه دي مبتعرفش ترفع اسعارها زي تضخم يعني وانا داخل أي بيزنس لازم اخد بالى من حاجه وانا بفكر فيها لازم هل انا عندي القدره على رفع الاسعار زي التضخم ولا لأ لأنك لو معرفتش ترفع الأسعار زي التضخم مع الأسف مع الوقت انت كده بتضيع قيمة الاستثمار بتاعك لأن الخامات هتزيد عليك 30 / 40% وانت مش عارف ترفع السعر غير 10 / 15% فالأرباح وهامش الأرباح بتاعتك هيبقى فيها مشكلة فدي الحاجه اللي مفروض متعملهاش
16:40
تاني ببساطة كده الفرق في الحاجتين إيه؟ الحاجات اللي بتأدي كويس والحاجات اللي بتأدي وحش ان في الحاجات اللي بتأدي كويس انت عندك مستثمر سواء خارجي او داخلي يعني سواء جوه الدولة اللي انت عايش فيها أو خارج الدولة اللي انت عايش فيها هو معندوش مشكله انه يشتري الحاجات دي بشكل اغلى عشان التوقعات ان الحاجات دي في مستقبل سعرها هيترفع اكتر
يعني زي ما قلنا الدهب هو بيتسعر بسعر عالمي للدولار لو سعر الدهب اتغير طلع مثلا انت هتكسب عليه بالدولار ولو سعر الصرف نفسه في هذه الدولة نزل انت برضه هتكسب عليه بالعملة المحلية بتاعتك لانه هيعيد تسعير نفسه
العقارات زي ما قلنا انا عندي قوه في الإيجارات لما سعرها بيطلع بيطلعلي سعر البيت، الحاجة التانية إن في جزء كبير بيبقى من خارج الدولة اللي انت عايش فيها او من خارج الدولة بتاعه العقارات اللي انت هتشتري فيها ممكن يكون فيها مستثمرين أجانب جايين، ممكن يكونوا من نفس الدولة بس هم جايين من بره او بيحولوا فلوسهم من بره، فلما بيحصل تضخم جامد وقيمة العملة بتنزل هو بالنسباله البيت ده رخص عليه ويبقى في طلب على الحاجه دي
نفس الكلام على الأسهم واحنا ذكرنا المثال ده ان في مستثمرين خارجيين ممكن يبقوا عندهم مبسوطين ان العملة سعرها نزل فهو النهارده هيشتري اسهم اكثر فهيبتدي يرفع الحاجات فلازم ابقى واخد بالي ايه الحاجات اللي في الخلفية اللي مخليه السلع او فئات الأصول دي تعمل عوايد دي
ولكن على الناحية التانية موضوع الكاش والفوايد والودايع دي كلها مع الاسف مش هتعيد تسعير نفسها لانك دخلت بعقد مدته محددة بفايدة محددة متقدرش تكسره
18:31
بمنتهى البساطة ايه اللي بيخلي الطبقة المتوسطة تختفي زي ما الناس كلها أو أن الناس تنزل طبقة طبقتين لما يحصل تضخم جامد ان ببساطه الناس اللي في الطبق المتوسط معندهمش كمية كافية من فئات الأصول اللي احنا اتكلمنا عليها يعني معندوش مدخرات حاططها في استثمار معين يحميه
بنلاقي ان الناس دي معظمها حاطه فلوسها في الأنواع اللي بتخسر في فترة التضخم وهنيجي بعد 5 سنين من التضخم القوي هنلاقي الناس دي فقدت القوة الشرائية بتاعتها فهو مش عارف يعيش في نفس المستوى مش عارف يجيب دخل يزود مرتباته وهكذا
بنلاقي ان الطبقة المتوسطة بتنزل ولكن بنلاقي ان الناس اللي بتمتلك عقارات تمتلك اسهم والسلع والحاجات اللي احنا اتكلمنا عليها دي بنلاقيها بالعكس انت بتنزل تشوف الشارع ناس بتصرف وتقول ازاي بيصرفوا هو بيبقى غالباً في جزء في المجتمع حتى لو كان صغير كنسبة ممكن يكون 5% 3% 2% ولكن هي دي الطبقة اللي حافظت على القوة الشرائية بتاعتها فببساطه انت هنا في ناس حافظت على الشرائية بتاعتها فالتضخم ده مخدتش بالك منه أو عيشت جواه عادي والدنيا تمام وفي طبقة تانية معرفتش تحمي نفسها في التضخم مع الاسف ان الأعداد الأكبر بكتير هي اللي موجوده مبتحميش القوى الشرائية بتاعتها
طيب في حاجات زي العقار هتقولي ده محتاج فلوس كتير قوي مش من اول يوم هعرف اجيبه انا معنديش مشكله لو انت صغير، لو انت في نص كاريرك ولسه عارف المعلومة دي النهارده وهتبني محفظتك أن يبقى عندك جزء مع الوقت هيبقى موجود يعني الكلام اللي بقوله النهارده مش عاوزك تصحى بكرا الصبح تشتري بيت او لازم كل تحويشي يروح في ايه لأ هو الهدف من الحلقة دي ان انا اعرفك الأسباب ورا الموضوع ومع الوقت وحتى لو بكميات صغيرة من الفلوس حطيتها على جنب عشان تحوش أول مقدم عشان تشتري بيت ومع الوقت أبتديت تدفع البيت وحصل إن البيت ده بدأ يدخلك إيجار والإيجار ده أبتديت تشتري بيه حاجه تانية وهكذا وهكذا
مش قادر أقعد أكرر الموضوع ده أكتر من كده النهاردة يمكن كررته كتير وفي حلقات قبل كده الموضوع عمره ما هيتحل في يوم وليلة هي تغيير عقلية وتغيير طريقة في الاستثمار والتفكير والموضوع بياخد وقت طويل
بس يعني ده بمنتهى البساطة من وجهة نظري إيه اللي بيخلي الطبقة المتوسطة تختفي زي ما الناس بتقول على طول والطبقة التانية تظهر أو طبقات جديدة بتظهر بس عشان هما عندهم فئات الأصول دي فمع الوقت حاول غير تفكيرك حاول غير طريقة استثمارك حاول احمي مدخراتك في فترات التضخم العالي وحاول دايماً تزود من الجودة يعني لو اخترت عقار وهتستثمر في العقار حاول تستثمر في العقار المميز اللي سهل في تأجيره سهل في بيعه سهل في شراه حاجه يكون دايماً فيه سيولة عالية على قد ما تقدر
يارب بس الحلقة دي تكون وضحت النقطة دي وهستني برضه تعليقاتكم لو في فئات أصول تانية بتحميك اكتر في التضخم وانا مذكرتهاش يعني حاولت أختار يعني 4 حاجات هما اللي بشكل عام يمثلوا 80 90% من فئات الأصول الموجودة ممكن ناس تقولي في مثلاً الكريبتو ممكن ناس تقولي شركات ناشئة أياً كان اللي انت شايفه ممكن تبعتلي تقولي رأيك لو في أي حاجه أنا نسيتها ولو وصلت معايا للحته دي أحب دايماً اشكر الناس انها سمعتنا لحد الآخر و أشوفكم إن شاء الله الاسبوع الجاي
Translation of some words and terms:
Real Value Creation خلق القيمة الحقيقية
Risk مخاطرة
Diversity التنوع
Long Term المدى الطويل
Inflation التضخم
Commodities السلع
Liquidity السيولة
Real Estate العقارات
Demand طلب
Utilities خدمات
Consumer مستهلك
Financial Advisors المستشارين الماليين
Inflation Protected Bonds السندات المحمية ضد التضخم
Treasury Inflation Protected Securities الأوراق المالية المحمية من التضخم
Rents الإيجارات
Mindset عقلية
Mentality عقلية
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #التضخم #إعادة