144. من أنتم؟ (3) نحن نعلم عنك الكثير
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
في الجزء الأول من (من أنتم؟) سألناكم مجموعة من الأسئلة اللي ليها علاقة بالحياة المالية طبعاً والنهاردة بعد تقريباً سنة ونص رجعنا سألناكم نفس الأسئلة تاني.. في حلقة النهارده بنعرض لكم نتايج الأسئلة وبنقارنها بنتايج الجزء الأول عشان نشوف مع بعض إيه التطورات اللي حصلت في الفترة اللي فاتت وبناءاً على إجاباتكم واختياراتكم بنقدر نختار الموضوعات اللي بنحس انها مهمة بالنسبة لأغلب الناس
: أسئلة الاستبيان
(01:42) هل بتحس أن صحتك النفسية بتتأثر بحياتك المالية؟ -
(02:46) عندك خطة مالية؟ -
(03:44) هل حسبت مصاريف اقتناء حيوان أليف قبل ما تشتريه؟ -
(04:25) هل فكرت في خطة للتقاعد؟ -
(04:43) بتضايق لما بتاخد قرض؟ -
(05:45) هل تعرف إيه أفضل استثمار ليك؟ -
(06:24) ازاي بتحاول تزود دخلك -
(07:20) هل تعاملت قبل كده مع شركة سمسرة؟ -
(07:48) هل تعرف أنواع صناديق الاستثمار؟ -
(08:19) الفلوس غاية أم وسيلة؟ -
(08:48) نفسك تكون غني أو ثري؟ -
(09:00) هل ممكن تستثمر في العقار؟ -
(09:30) تخيلك عن خطة التقاعد بتاعتك؟ -
(09:50) بتسمع كلام ينور على موقع كلام ينور ولا منصة للبودكاست -
الاستبيانات اللي بنعملها كل فترة ممكن تاخد من وقتك ثواني بس كل ما الناس تشارك أكتر كل ما الإحصائيات هتكون مفيدة بالنسبة لنا عشان اولاً نعرفكم أكتر ونشوف التطورات اللي بتحصل معاكم ونشوف محتاجين نشتغل على إيه أكتر.. لو حابب تشارك في الاستبيانات اللي جايه اعمل متابعة لحسابنا على انستجرام @kalamyenawar
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكم في حلقة جديدة من بودكاست كلام ينور
كنا عملنا حلقة زمان اسمها من انتم بنحاول منها نعرف ازاي المستمعين بيجاوبوا على اسئلة معينة اسئله ليها علاقه طبعا بالحياة المالية، فاحنا عملنا مؤخرا نفس الاسئله حطيناها على الصفحة بتاعتنا على انستجرام والنهارده انا هعرض نتايج الاسئله دي مره تانيه وعايز اقارن ما بين اللي كان الناس بيردوا عليه يمكن من سنه أو سنه ونص كنا عملنا الموضوع ده ازاي الكلام ده اتغير دلوقتي
(01:42)
اول سؤال كان: هل بتحس ان حياتك النفسية بتتاثر بحياتك المالية؟
زمان: 90% ايوه - 6% لا
دلوقتي: 91% ايوه - 9% لا
طبعا النتائج متقاربة جدا هنعتبر ان النتيجه واحده ان السؤال ده دايما هيقدر موجود ودائما الاجابه بتاعه الناس معظمها تأثر، من خلال البودكاست ده احنا بنحاول نخلي الناس صحتها النفسية تتحسن بفهمها للمجال المالي، لفهمها بميزانيتها، لفهمها هي بتعمل ايه في حياتها وطريقها رايح بيها لفين.. ولو حد قدر يوصل للحرية المالية ده موضوع تاني اعتقد كل ما بتفهم ميزانيتك كل ما تفهم مصاريفك كل ما بتفهم الكلام ده كله طاقاتك بتقل في المفاجآت بتبقى مركز والكلام ده كله فانا دايما بدعه الناس انها تحاول طبعا احنا كلنا كلنا بنتاثر ولكن بدرجات أقل
(02:46)
السؤال اللي بعده كان بيقول: عندك خطة مالية؟
زمان: 86% لا - 14% اه
النهارده: 67% لا - 33% اه
وهنا يمكن انا بسأل المستمعين بتوع كلام ينور او المتابعين على الصفحة ولكن اللي عجبني هنا أن ⅓ الناس تقريبا عندها خطة مالية من اللي جاوبوا على الاستبيان ده ففي تحسن أن الناس فهمت انها يبقى عندها خطة مالية ودي حاجة تبسطني وبرده من الناس اللى بيسمعونا اللي معندهمش خطة مالية، الخطة المالية هي ان انت تبقى فاهم مصاريفك، فاهم ميزانيتك، فاهم دخلك بيجي منين، ازاي تزوده، ازاي يبقي عندك خطة للتقاعد، ازاي يبقي عندك طريقه للتحويش، ازاي تبني أصول، ازاي متبقاش بس محوش فلوس بغرض التحويش انت بتحوشها بغرض الاستثمار وهكذا فده يعني ما معنى الخطة المالية
(03:44)
في سؤال بعد كده: لما جيت تشتري حيوان أليف هل حسبت الحسابات بتاعتك ولا لأ، يعني حسبت مصاريفة؟
زمان: 20% آه - 80% لأ
دلوقتي: 30% آه - 70% لأ
فبرضه ممكن يبقى في ارتفاع في نسب الناس اللي بتحسب قرار بتاعك لشراء الحيوان، أو اقتناء الحيوان، أو تبني الحيوان الأليف ده انت حسبت وركزت وعرفت قبل ما تاخد القرار وطبعاً احنا عايزين دايماً الناس تبقى أكتر عارفه ممكن تعمل إيه
(04:25)
السؤال اللي بعده بيقول: هل فكرت في خطة تقاعد؟
زمان: 77% لأ - 23% آه
النهاردة: 66% لأ - 34% آه
تقريباً نفس النسب، الـ ⅓ تقريباً ابتدا يفكر في التقاعد، كان الـ ¼ وبقى الـ ⅓ فدي برضه حاجه مبشرة
(04:43)
السؤال اللي بعده بيقول: بتضايق لما بتاخد قرض؟
زمان: 88% أيوه - 12% لأ
دلوقتي: 90% أيوه - 10% لأ
ولكن اللي انا بس عايز اغيره في السؤال، أن القرض مش دايماً وحش، لو بتشتري أصل لو بتمول فكرة معينة او مشروع معين أو اصل معين بيجيب دخل والدخل ده بيدفع أصل القرض التمويل ساعات بيبقى مفيد.. تاني فهمك للتمويل وفهمك انت بتاخده ليه، واحنا عملنا كذا حلقة على الاستثمار العقاري مثلاً ليه ساعات بيبقى كويس انك تاخد فيه تمويل واتكلمنا على شكل القروض وطبعاً لازم نقول ونرجع نقول القروض الاستهلاكية مشكلة وملهاش معنى لو انت مش بتجيب عائد عليها وهتدفع عليها فوايد فدايماً انت ممكن تعيش في نطاق امكانياتك احسن ما تستهلك اكتر من دخلك فيمكن الناس معظمها مضايقة عشان هي بتاخد قروض استهلاكية فانا بس هرجع واقول لو نوع قرض مظبوط انا معنديش مشكلة معاه
(05:45)
تعرف افضل استثمار ليك؟
زمان: 14% آه - 86% لأ
النهاردة: 47% آه - 53% لأ
يعني تقريبا 50/50 نص الناس عارفه ايه هي افضل استثمار ليها ودي من اكتر الإجابات اللي عجبتني ان الناس اللي متابعينا اتحسنوا جداً في أن هو واحد مثلاً بيحب الدهب، واحد بيحب الأسهم، واحد بيقول انا بحب اشتري عقار اياً كان بس انك اصلاً تعرف إيه الاستثمار المناسب بالنسبة لك ده حاجه جميله جداً فإننا نروح من 86% لتقريباً 50/50 دي حاجة جميلة جداً ومبشرة
(06:24)
بعد كده سألنا الناس: ازاي بتحاول تزود دخلك؟
زمان: 26% بطلب زيادة في المرتب - 74% دخل إضافي
النهارد: 22% بطلب زيادة في المرتب - 74% دخل إضافي
نفس النسب تقريباً والاجابتين هما اطلب زيادة في المرتب او اعمل شغل إضافي، الناس بتتجه أكتر للشغل الإضافي ولكن انا مع ان الناس برضه تحاول تطلب زيادة في المرتب مع تغيرات الموجودة في سوق العمل كل يوم، مع انك ممكن يبقى عندك امكانيات وتطور نفسك وتصرف على نفسك وتاخد كورس وتطور الأدوات بتاعتك كفرد ممكن تزود دخلك الناس دايماً بتحاول تشتغل وتحط مجهود أكتر وتزود دخلها بس انا نفسي الأرقام والناس تبتدي تطلب زيادات في المرتب والزيادات دي تكون جاية من حقها انها طورت نفسها
(07:20)
السؤال اللي بعده: هل تعاملت مع شركة سمسرة قبل كده؟
زمان: 84 % لأ - 16% آه
النهاردة: 74% لأ - 26% آه
يعني تقريباً ¼ و ¾ ، فالـ ¾ بيقولوا لأ متعاملتش والـ ¼ بيقولوا آه وانا برضه بنصح الناس انها حتى لو هتبتدي بحاجة صغيرة، لما تتعامل مع شركة سمسرة يبقى انت فتحت على نفسك سكة انك ممكن تبتدي تستثمر في الاسهم حتى لو بتتمرن او بتجرب بمبالغ صغيرة الموضوع بالنسبالي مفيد
(07:48)
السؤال اللي بعده: هل تعرف أنواع صناديق الاستثمار؟
زمان: 83% لأ - 17% آه
دلوقتي: 59% لأ - 41% آه
فمعنى كده ان الناس بقى عندها وعي يعني ايه صندوق استثمار طلعت من 17% لـ 41% فالناس عندها وعي او متابعينا مش هقول الناس بشكل عام، متابعين البودكاست بقى عندهم وعي أكتر بصناديق الاستثمار ودي حاجه بالنسبالي بسطاني
(08:19)
السؤال اللي بعده بيقول: الفلوس غاية أم وسيلة؟ احنا كنا عملنا عليها حلقة قبل كده
زمان: 90% وسيلة - 10% غاية
النهاردة: 89% وسيلة - 11% غاية
فهي هي تقريباً نفس النسب الناس بصه على الفلوس انها وسيلة هتحقق لها كل الأهداف بتاعتها عن انك بتجرى ورا رقم معين ده أغلب الناس، طبعاً كل واحد عنده الحرية في الإجابة اللي هو عايزها
(08:48)
السؤال اللي بعده بيقول: نفسك تكون غني أو ثري؟ برضه عملنا حلقة عليها قبل كده
زمان: 17% غني - 83% ثري
النهاردة: 26% غني - 74% ثري
يعني ايه غني ويعني ايه ثري احنا اتكلمنا عن الموضوع ده قبل كده ممكن الناس ترجع لو عايزة تعرف الفرق ما بين الأتنين
(09:00)
هل ممكن تستثمر في العقار؟
زمان 75% آه - 25% لأ
النهاردة: 84% آه - 16% لأ
ده برضه حاجه لطيفة ان الناس بقت عندها قابلية أكتر أنها تستثمر في العقار
انا عارف اننا بنتكلم بس على المجموعة بتاعة كلام ينور او الناس اللي متابعينا وعايز اكرر برضه الاحصائيات دي مش احصائيات عامة، دي إحصائيات ليها علاقة بالمستمعين بتوعنا، أنا برضه عايز اعرف مين المستمعين بتوعنا وبيفكروا ازاي فمن كل وقت للتاني بنحط استبيان
(09:30)
خطة التقاعد؟
زمان: 74% ناس عايزة تسافر وتتفسح - 26% ناس عايزة تقعد تتفرج على التلفزيون
النهاردة: 77% ناس عايزة تسافر وتتفسح - 23% ناس عايزة تقعد تتفرج على التلفزيون
فتقريباً نفس النسب الـ ¼ و ¾ ودي برضه حاجه مفيهاش إجابة صح بس بتوري الناس اكتر فالاغلبية بتبقى عايزة تسافر وتشوف أماكن جديدة
(09:50)
آخر سؤال عندنا: بتسمع كلام ينور
زمان: 25% على الموقع - 75% على منصات البودكاست
النهاردة: 24% على الموقع - 76% على منصات البودكاست
فغالباً معظم الناس اللى بيسمعونا بيسمعونا على منصات، تقريباً الـ ¼ والـ ¾ فأياً كان انت بتسمعنا من أي منصة أو على الموقع مباشرة بشكرك شكراً جزيلاً انكم بتسمعونا وبتدونا الوقت وبتقضوا معانا الحلقات في كلام ينور
لو حابب برضه تشارك في الاستبيانات دي احنا بنعملها على صفحتنا في الانستجرام : @kalamyenawar بتبقى دايماً ستوريز بتاخد منك ثواني بس كل ما الناس تشارك أكتر كل ما الإحصائيات بالنسبة لنا بتبقى مفيدة ونرجع نتكلم معاكم فيها ان شاء الله كمان هنعمل الاستبيانات مع الوقت ونكرر نفس الأسئلة ونشوف التطور بتاع الناس بس بشكل عام النتايج لطيفة الناس متجهة اكتر ناحية الاستثمار، متجهة أكتر ناحية التفكير في فلوسها وفي حياتها فبشكر كل الناس تاني واشوفكم ان شاء الله الاسبوع الجاي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #من_أنتم_3