143. وقفة مع النفس (تقييم سنوي لأداءك)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
اتكلمنا في الحلقة 141 عن المركز المالي بتاعك وازاي تخطط لمستقبلك، النهارده بنتكلم على نظام مراقبة أو تقييم سنوي لأداءك هيخليك تعرف أنجزت إيه السنة اللي فاتت وتحدد أهدافك للسنة الجديدة، ولما تحط لنفسك نظام مراقبة هتقدر تشوف حاجات مكنتش شايفها ومع الوقت نظامك هيتحسن والميزانية بتاعتك هتتظبط أكتر
:بنتكلم في الحلقة عن
(02:57) أهم إنجازات حققتها السنة اللي فاتت؟ -
(04:24) الصعوبات اللي واجهتني السنة اللي فاتت؟ -
(05:13) هل كنت منتج كفاية السنة اللي فاتت؟ -
(08:40) تحديد أهداف واضحة ومناسبة للسنة -
(09:11) ترتيب الأهداف بالأولوية -
(10:19) تكسير الأهداف لحاجات أصغر بجدول زمني -
(12:38) عادات جديدة تخليني ألتزم بالهدف اللي انا حطيته -
(13:22) مراقبة التطورات -
(13:38) التوازن ما بين صحتك النفسية وتحقيق الأهداف -
.. متنساش في الاخر السنة لو حققت إنجازات تكافئ نفسك وتشجعها
استنونا الاسبوع اللي جاي
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلاً بيكوا في حلقة جديدة من بودكاست كلام ينور
احنا اتكلمنا في حلقة قريبة كده عن ازاي تبص على المركز المالي بتاعك لو انت في أول السنة وازاي تعرف انت عملت ايه والكلام ده كله وازاي تخطط للمستقبل، النهاردة عايز ابص على حاجة تانية بنصح الناس تعملها ممكن كل أول سنة برضه بس مش هنتكلم عن الحتت المالية وازاي استثمرت والكلام ده كله انا عايز النهارده اتكلم على حاجات ليها علاقة بأداءك سواء انت مستقل او بتشتغل في وظيفة ثابتة في شركة كبير أو شركة ناشئة او أياً كان اللي انت بتعمله لأن انا دايماً بحس ان الناس بيجيلها هوس انها تسيطر على المصاريف اللي هي بتدفعها يعني لما بنبص على الميزانية دايماً بلاقي الناس بتتكلم على المصاريف بلاقي الناس بتتكلم على ازاي اوفر هنا، انا مش عارف اوفر هنا او مش عايز اعمل كده بس احنا دايماً بننسى الخط الأساسي اللي هو أول حاجه موجودة في الميزانيات اللي هي الدخل بتاعك فعايز مع حلقة النهاردة اننا نحط نظام او هيكل كده ممكن الناس تعمله وتكرره كل سنة مش بنصح الناس تعمله كتير كفاية مرة واحدة في السنة، النظام ده لو مشيت فيه هيخليك على الأقل تعرف انت بتحقق ايه او مبتحققش ايه لأن الناس ممكن تقعد سنين في وظيفة وتنسى ومتبقاش بتجدد مبيتعملهاش تقييم سنوي مع مديرها بشكل مظبوط فمبتبقاش عارفه هي بتعمل ايه وبتنسى برضه انك تحط الكلام ده مكتوب على ورقة او على ملف اكسيل تقدر ترجعله في يوم من الأيام وتشوف انت كنت عايز ايه في السنين اللي فاتت حققته ولا محققتوش والكلام ده كله ده موضوع مهم جداً
(02:57)
أول حاجه هعملها في الشيت ده او في طريقة التقييم بتاعتي عشان ابتدي اشجع نفسي كده اعرف ايه الحاجات اللي انا حققتها وممكن نخليهم 3 بالكتير أوي، إيه أهم 3 حاجات انت عملتها السنة اللي فاتت؟
قبل ما اشوف المستقبل أنا عايز أعرف انا عملت ايه في السنة اللي فاتت وده لما ابتدي اكتب النجاحات بتاعتي السنة اللي فاتت يعني مثلاً عرفت ازود مرتبي بطريقة معينة أو اخدت كورس في حاجه معينة كان نفسي اتعلمها او مديري قال عليا حاجه كويس أياً كان النجاح اللي أنت حققته واحد صاحب شركة حقق سنة كويسة جداً السنة اللي فاتت مثلاً، وهنا انا بتكلم بس على التحقيق أو النتائج ده اول حاجه
(03:42)
تاني حاجه لو كان عندي هدف من زمان عايز احققه، في النقطة الاولانية انا عايز اشوف نجاحات صغير، هنا انا عايز أشوف هدف كبير انا قفلته، مثلاً عندي شركة وببيع حاجه وبقيت أكبر حصة سوقية، عينت ناس والناس دول كان من اهدافي أمرنهم كويس والناس دي بقت كويسه أياً كان الحاجات اللي انا عملتها.. فأول قسم هنا هعمل على النجاحات بتاعتي، سواء النجاح ده كان حاجه صغيرة أول هدف كبير و هبتدي احطه في الشيت ده
(04:24)
تاني حاجه هبص عليها هبص على الصعوبات اللي واجهتني، إيه الصعوبات اللي واجهتني السنة اللي فاتت وهكتب الصعوبات دي ولازم اكتب جنبها طرق حل الصعوبات دي بمعنى إيه.. اننا كان مثلاً عايز اخد كورس معين وفشلت اني اخده وهكتب جنبه انا فشلت اني اخد الكورس ده بسبب اني مثلاً معنديش وقت او الشغل كان كتير اوي او لسه مخلف جديد وعندي مسؤوليات في البيت أياً كانت الحاجه اللي خلتك متعملش الحاجه دي وبعدين اكتب جنبها كمان ازاي ممكن السنة الجاية اعمل الموضوع ده.. يبقى انا اول حاجه عملت الإنجازات، تاني حاجه عملت الصعوبات اللي واجهتني
(05:13)
تالت حاجه هعملها هعمل تقييم سريع للإنتاجية بتاعتي هل انا كنت منتج ولا لأ، هناخد مثلاً الشغل والبيت والعلاقات العامة مع الأصحاب والأهل هل أنا في الـ 3 حاجات دول كنت منتج او حطيت مجهودي ووقتي فيهم وهل طلعوا لأ انا كنت ممكن أشتغل أكتر، لأ انا كنت ممكن أقضي وقت أكتر مع أصحابي أو أهلي، لأ انا كنت ممكن أقضي وقت أكتر في البيت لو واحد متجوز مع عيلته والكلام ده.. فالـ 3 حاجات دول انا عايز أقيم الإنتاجية بتاعتهم واشوف انا موزع وقتي ازاي واشوف أنا محتاج السنة اللي جايه مثلاً أحط وقت أكتر في البيت انا مقصر السنادي مع ولادي فمحتاج أزق أكتر في الحتة دي
لأن الـ 3 حاجات دول مرتبطين ببعض، يعني احنا السعادة او تحقيق الذات أو أياً كان اللي انت عايز توصله من التطبيق اللي احنا بنعمله النهاردة هو في البيت لو واحد عنده عيله، في الشغل، هو الأصحاب والأهل والعلاقات الإجتماعية بشكل عام فلما نبص على الـ 3 حاجات دول مع بعض نلاقي ان حد مقصر في واحدة من الـ 3 هتلاقي إن الإنتاجية بشكل عام بتتأثر التوازن ما بين الـ 3 مهم جداً فعشان كده انا عايز اشوف الكلام ده شكله عامل ازاي ما بينهم وبين بعض وازاي ممكن أغيره في السنين اللي جايه
(06:46)
أنا حطيت الـ 3 حاجات دول بعد كده انا عايز اعمل تحليل لردود الفعل ممكن اروح للبيت، للمكتب، لأصحابي، نفس الـ 3 مصادر دول واخد التقييم بتاعهم هل انا كنت كويس في الشغل ولا لأ.. طب ليه، واتكلم مع مديري طب ايه اللي ممكن يحصل، شايفني ممكن اطور نفسي ازاي؟ ايه اللي ناقصني.. ومع اصحابي والله المجال الفلاني لو بيشتغلوا في نفس المجال هما بيعملوا ايه.. وهكتب التقييم بتاع الناس في المراجعة بتاعتي
(07:28)
بعديها هو النمو بس النمو ده مش هقدر اعمله أول سنة لو انت لسه بتعمل الحاجه دي لأول مرة فأنت معندكش النقطة دي بس في المستقبل هاخد الحاجات اللي اتكلمنا عليها قبل كده واشوف التطور بتاعي شكله عامل ازاي في النقط اللي اتكلمنا عليها، أول سنة كنت عايز احقق حاجتين محققتش، تاني سنة حققت، رابع سنة مش عارف عملت ايه وهكذا فتبتدي ممكن تشوف عبر السنين النمو بتاعك عامل ازاى فدي النقطة اللي انا عاملها وكده هبقى وصلت للمعلومات اللي انا عايزها من اني ابتدي اخطط للسنة اللي جاية
كده انا جمعت المعلومات بتاعتي و شوفت عملت ايه السنه اللي فاتت شوفت التحديات بتاعتها شوفت الإنتاجية بتاعتي عاملة ازاي وبعدين روحت لميت تقييمات الناس اللي حواليا ولو عندي نمو شخصي فانا شوفت كده التاريخ بتاعي ماشي لحد دلوقتي ازاي وده الجزء الاول من تحليل الماضي بتاعك او تحليل السنة اللي انت واقف عليها مع السنين اللي قبلها هيجي بقى السنة اللي قدام بقى هنعمل إيه السنة اللي جاية فهبتدي اعمل جزء تاني كده بقول انا عايز اعمل ايه
(08:40)
اول حاجه لازم احط أهداف واضحة بمعني اني اقدر أقيسها، اقدر احققها ومناسبة للوقت بتاعتي بتاع الحياة ده يعني مقولش والله انا عايز ابقى ملياردير السنة اللي جايه ودي حاجه صعبه فلازم تكون حاجه اقدر احققها ولازم تكون في مقدار السنة اني اقدر احققها خلال السنة، يعني برضه متاخدش حاجه المفروض تحققها بعد 3 او 4 سنين وتحطها وتكبسها وده معناه هدف واضح
(09:11)
بعد ما نحدد الأهداف بتاعتي الخطوة التانية هبتدي ارتب الأهداف بتاعتي، هبتدي اطلع الأهداف المهمة في الأول وبعدين الأقل اهمية فالأقل أهمية والسبب في كده ايه.. ان الناس ممكن يبقى عندها 6 أهداف ولكن واحد منهم بجد هو المهم وهو اللي هيغير حياتك واللي لو عملته ممكن يساعدك في زيادة الدخل بتاعك فالطبيعي ان ده لازم يطلع فوق وده اهم في تحقيقه من الـ 5 التانين يعني مش عايزين ناخد العدد الأهداف بس اللي انا محتاج احققها لازم ابتدي ارتب الأهداف بتاعي
(09:47)
بعد ما رتبتهم هخليهم قابل للتنفيذ.. يعني انا محتاج ازود مرتبي ده هدف مهم، طريقة زيادة المرتب دي بتبقى عاملة ازاي اننا مثلاً ألتزم أكتر في الشغل او ابتدي أركز أكتر في الشغل او لو انا حد بتاع مبيعات Sales ابتدي اركز في الأرقام بتاعتي اكتر محتاج اخد كورس في الحاجة الفلانية، محتاج أعمل وظيفة زيادة في الشغل.. هتبتدي تكسر الهدف ودي النقطة التالتة بتاعتي في الأهداف وتحديد الأهداف
(10:19)
تالت نقطة هكسر الأهداف بتاعتي دي لحاجات صغيرة لأنه آه كلنا عايزين نزود مرتباتنا ولكن أنا مش عارف ازاي ازود المرتب ولكن لما ابتدي اقطعه لحاجات صغيرة هبتدي اعرف انا كعمر ازاي هعرف أنفذه اصلاً
بعد ما أكسره هبتدي احط جدول زمني يعني انا في الربع الأول هركز على الحاجة الفلانية، في الربع التاني هعمل الحاجة العلانية دي، على اخر السنة هكون خلصت الكورس بتاعي لو عملت الحاجه التالته اللي مفروض اعملها السنادي على اخر السنة هيبقى معايا الهدف غالباً بيتحقق ليه بنقول اننا نكسرهم عشان لما بتكسرهم انت هنا بتقدر تحط الهدف حيذ التنفيذ يعني احنا كلنا عندنا اهداف بس انا مش عارف انفذه ازاي فكسرته وحطيته ووضحته في دماغي
لما بتعمل الحاجات دي كلها مكتوبة الموضوع بيتغير تماماً لأنك لما بتكتب الحاجه بتعتبر اكنك عملت عقد ما بينك وبين نفسك وتاني عايز تحطها على ملف اكسيل عايز تكتبها في نوته في ناس بتكتب اليوميات بتاعتها في نوت لحد النهاردة وفي ناس بتستخدم الورق ممكن تعلقها على الحيطة قدامك اي حاجه بس امشي في الخطوات دي
يبقى هنحط الهدف، هنعمل ترتيب أو فقه الأولويات ايه اللي يطلع فوق، وبعدين اخد كل هدف أكسره اديله حاجتين حاجات صغيرة اقدر انفذها وجدول زمني هنفذه عبر السنة ازاي
(11:40)
النقطة اللي وراها هبتدي احط موارد تحقيق الهدف ده، الموارد هنا عبارة عن وقت أو فلوس أو المهارات بتاعتك دول الـ 3 حاجات اللي انا هحطهم لكل هدف، يعني لو كورس هضطر ادفع فلوس فلازم يبقى عندي جزء من الميزانية بتاعتي موجه للهدف ده، وقت يعني هحجز يوم في الاسبوع او يوم في الشهر او كل يوم او اياً كان محطوط للهدف ده في دماغي، المهارة هل انت عندك القدرة او الإمكانيات انك تحققها ولا لأ وتعرف هي موجودة ولا لأ لو محطتش المورد بتاعك انت مش هتحققه يعني في مثال بسيط واحد اشترك في الجيم، اشتراك الجيم ده معناه اني بدفع فلوس هنا يعني انا حطيت المورد بتاعي عشان تحقيق هدف صح فدي النقطة الرابعة بتاعتي هنا في ان انا احط مورد للهدف بتاعي
(12:38)
النقطة الخامسة اننا هعمل عادات تخليني ألتزم بهذا الهدف اللي انا حطيته العادات دي عبارة عن انك بتعود نفسك انا مثلاً عايز ابقى مركز في الشغل فالعادة الجديدة اللي هعملها اننا هبقى في المكتب الساعة الفلانية لأن مثلاً انا اول ساعتين تلاتة في الشغل هما أكتر وقت بكون رايق فيه أو أكتر وقت بعمل فيه إنتاجية فبعد كل الإجتماعات بتاعتي عن نص اليوم الأول واحطه في النص التاني.. أياً كانت الطريقة اللي هتعمل بيها الموضوع ده بس انت هنا بتحط عادات دخلتها، إيه العادات اللي هتحطها لكل هدف عشان تبتدي تمشي عليها
(13:22)
بعد كده هعمل مراقبة حوالين السنة انا ممكن اعمل مثلاً كل 6 شهور أو سنة كل واحد يرجع يبص والله انا كان عليا الحاجات الفلانية طيب انا عملت ايه وابتدى أراقب التطور بتاعي
(13:38)
هنا انا اتكلمت على الحاجات اللي المفروض تعملها مش عايز انسى ان صحتك النفسية مهمه جداً فلازم تعمل توازن دايماً اننا مبقاش عندي هوس او حاطت على نفسي قدر كبير من الضغط عشان انفذ الأهداف دي.. لأ انا عايزك تبقى برضه بتدى نفسك مساحة ان يكون عندك علاقات اجتماعية كويسة، يبقى عندك شبكة تواصل كويسة، صحتك النفسية تبقى مظبوطة لأن تاني احنا قولنا لو انت معندكش الحاجات دي بشكل عام انت مش هتعرف تحقق اهدافك فدايماً خد بالك انك تحط الاولوية لنفسك انك تبقى مبسوط متعملش الحاجات دي بس عشان المفروض تعملها لأ انت المفروض تعملها وانت مبسوط، المفروض تحسن حياتك، المفروض تعمل توازن ما بين الحاجتين دي حاجه مهمه جداً عشان برضه الناس اللي بتعمل العكس تماماً بتشتغل زيادة عن اللزوم وبتشوف ان الشغل زيادة عن اللزوم ده هيوصلها في حتة لأ هو ممكن يبوظ علاقاتها الإجتماعية ممكن يبوظ البيت ويبوظ حاجات تانية كتير انت محتاج التوازن بشكل عام عشان تعرف تحقق اللي انت عايزة
(14:48)
اخر حاجه واللي هربطها بالحلقة الاخيرة موضوع الموازنة المالية التخطيط المالي والمركز المالي بتاعك عايز اشوف بقى ازاي كل ده انعكس عليك، انت لما تقعد تعمل المركز المالي بتاعك وتشوف الأهداف بتاعتك هل حققت الكلام ده كله ولا لأ ودي هربطها اكتر بالحلقات اللي فاتت هل الكلام ده أترجم لفلوس ولا لأ هل انا لما أخدت الكورس ده فعلاً مرتبي زاد ولا لأ، هل لما عملت الحاجة الفلانية دي ساعدتني ولا لأ.. فلازم نربط الكلام ده في الاخر بالدخل بتاعي
الهدف من الحلقة دي او الهدف من القاعدة السنوية مع نفسك انك بتطور في ذاتك وبتحاول توصل لدخل أكبر، مننساش برضه اننا لما نوصل ونحقق نجاحات لازم نتبسط ولازم نصرف على نفسنا فلو عملت حاجه زي مكافأة انك في الاخر السنة لو حققت او دي سنة كويسة جداً تبتدي تحتفل بيها يعني مش عايز الناس دايماً تبقى قافله على نفسها جداً انها مركزة جداً في الشغل او مش مركزة خالص الناحيتين حاجة مش كويسة حاجه في النص لطيفة حط أهدافك وظبطها بالطريقة اللي اتكلمنا عليها اعمل التقييم بتاعك السنوي ويارب كل سنة عن سنة يبقى في تطور لكل الناس اللى بيسمعونا ويحققوا كل اللي هما عايزينه وده تاني هيقدر يوصلك يبقى عندك ميزانية مظبوطة وتقدر تحوش منها وتقدر تتقاعد في المستقبل ان شاء الله بشكل مريح
هرجع واقول تاني ملخص الحلقة دي ازاي الناس تبص على الدخل أو الإيرادات بتاعتها ازاي ممكن تزودها وازاي ممكن تزودها بخطوات حقيقة تكسر المشكلة بتاعتك بالطريقة اللي احنا اتكلمنا فيها استخدم الاسلوب اللي يريحك مش لازم تعمل حاجه مكرره مع الوقت هتلاقي النظام بتاعك تطور اتحسن وكل سنة عن سنة هتلاقي انك بترجع تبص على السنين اللي فاتت وتقول ايه ده انا كنت بعمل الحاجات دي ودلوقتي بقيت احسن، ايه ده أنا كنت وحش في دي والنهاردة بقيت كويس.. الحياة العملية حياة طويلة لما تبتدي تتابع من بدري هتبتدي تشوف حاجات في نفسك مكنتش شايفها
شكراً جداً على وقتكم الاسبوع ده و اشوفكم الاسبوع الجاي
Translation of some words and terms:
Freelancer مستقل
Startups الشركات الناشئة
Obsess استحواذ
Cost Management إدارة التكاليف
System نظام
Structure بناء
Achievements الإنجازات
Goal هدف
Market Share الحصة السوقية
Section قسم
Productivity إنتاجية
Practice يمارس
Balance توازن
Feedback Analysis تحليل ردود الفعل
Feedback تعليق
Review مراجعة
Growth نمو
Relevant مناسب
Actionable فعالة
Role دور
Timeline الجدول الزمني
Resources موارد
Skills مهارات
Habits العادات
Focus ركز
Meetings الاجتماعات
Monitoring يراقب
Financial Budgeting الموازنة المالية
Financial Planning التخطيط المالي
Reward جائزة
Revenue Line خط الإيرادات
Track مسار
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #وقفة_مع_النفس