14. بدايات الادخار - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
.. اهلاً بيكوا في الجزء التاني من بدايات الادخار
: اتكلمنا في الجزء الأول عن ازاي تبدأ ادخار ، حلقة النهاردة تكمله لكلامنا مع ناصر على الادخار وبنرد على تساؤلات زي
يعني ايه ادخار؟ -
ازاي أختار نوع حساب التوفير المناسب من البداية؟ -
هل كل الفلوس اللي انا بحوشها احطها في حساب توفير ولا أوزعها على كذا حاجه؟ -
أنا بحوش لإيه؟ -
دور المستشار المالي؟ -
امتى ابقى عارف ان ده الوقت المثالي اني ابدأ استثمار؟ -
ازاي أعلم طفل يحوش؟دور المدرسة في تعليم أولادنا الادخار؟ -
The Earlier The Better لو انت بتسمع الحلقة دي ولسه مبدأتش لازم تعرف ان
انت ممكن تسمع الحلقة وتحس بإحباط وممكن برده تاخدها تنبيه ليك عشان تبدأ ، ولازم تعرف الوقت عمره ما هيفوت مهما كان سنك.. ابدأ. الموضوع مش سهل ومحتاج تعود نفسك وتعرف هدفك وتحط الخطه المناسبة لظروفك وتلتزم بيها مهما كانت العوائق وكل ما تبدأ بدري كل ما بشكل كبير معدل الادخار بتاعك هيقل مع الوقت وهتقدر تعيش حياة أحلى بكتير
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Ahmed Nasser @Instagram Ahmed Nasser @Twitter : تابعوا ناصر على
Transcript:
عمر 0:46: اهلا بيكوا في الجزء التاني من حلقة الادخار ، زي ما اتكلمنا المرة اللي فاتت عن ازاي نبتدي ، ناصر هيكمل معايا الجزء التاني من الأسئلة ويارب نكون بنحاول نغطي اجزاء من افكاركوا ليها علاقة بالادخار
ناصر 01:10: طيب.. السؤال اللي عاوز اسئلهولك دلوقتي ايه.. ديما انا بحس وانا بكلمك على تجربتي الشخصية ديما بحس ان لما بتتكلم مع حد في انك عاوز تحط فلوس على جنب بتلاقي ردود كتيرة اوي عن نوع حسابات التوفير ، في ناس كتير تقولك لأ في مرحلة معينة مينفعش الفلوس تفضل في حساب التوفير لأ لازم تسيب رقم معين خلينا نقول من 3-6 شهور من مرتبك في حساب التوفير والباقي لازم تشتري بيه حاجه تعمل بيه ان شالله إستثمار صغير ، انا فاهم الرد بتاعك دلوقتي ، بس انا بقولك دي معظم الردود اللي يا لو مقرأتش عنها سمعت عنها من ناس ، ناس اشتغلت معاهم وناس اتكلمت معاهم وناس صحاب ، اللي هو الادخار نفسه يتحط فين فانت تنصح بإيه؟ يعني ايه نوع حساب التوفير اللي انا مفروض اختارة اساسا من البداية لو انا بحط فلوسي في حساب توفير، وهل المفروض كل الفلوس اللي انا بحوشها دي احطها في حساب توفير ولا تتوزع على كذا حاجه ، ولو هتتوزع على كذا حاجه هتتوزع على إيه؟ ايه الحاجه اللي مفروض أحط فلوس فيها والمخاطرة فيها مش عالية لدرجة اني ابقى بعمل الهدف زي مانت بتقول كده إدخار مش استثمار عنيف.
عمر 02:40 : ماشي.. طيب ، النوعية انا برده مش هقررها انا هشوف ايه اللي بيتعمل او ايه النماذج الموجودة وهشوف نفسي وشخصيتي عايزة ايه ، بمعنى احنا مش كلنا مخلوقين زي بعض كل واحد عنده قدرة على تحمل المخاطر بشكل معين ، بمعنى ناصر يقدر يتحمل مخاطرة عمر ميقدرش او العكس.. فأولاً لازم أعرف نفسي ، لازم أعرف أنا بحوش لإيه ، يعني لازم زي ما اتفقنا الأول هحط معدل الادخار بتاعتي قد إيه من مرتبي اللي هي حوالي %15 زائد أو ناقص حسب ظروفك ، الـ15% دي هخدها عندي نطاق كله عبارة عن ايه اول حاجه الكاش ، الكاش ده اللي مفهوش مخاطرة حساب توفير في البنك ده مفهوش اي مخاطره انا بكلمك طبعا بشكل عام بس كل واحد بيرجع لتحمل المخاطرة بتاعته.. كاش بعديها السندات اللي هي أقل مخاطرة في الأدوات المالية كلها ، وبعد السندات أنا بس عاوز اشوف الأًصول علشان الواحد بس بينسى الكلام ده..
ناصر 04:30 : لو انا الشخص الاولاني بتاع الكاش هختار حساب التوفير على اساس ايه ؟
عمر 04:35 : فيه "الكاش" اللي تقدر تسيله وتروح تسحبه من ماكينة الصرف ، المرحلة اللي بعدها اللي هيديك عائد عليها ياما "حساب توفير" ياما "وديعة" ، انت بتدي الراجل ايه قدام ده بتديله حق في عدم استخدام فلوس ، يعني انت بتقلل السيولة بتاعتك ومتقدرش تروح تسحبهم في أي وقت تقوله هقعد 3 شهور او 6 شهور أيا كان سنة أو سنتين كل بلد ليها معدل فائدة مختلفة ، برده مش عاوزين نخش في القصة دي عشان كل بلد ليها علاقة بالعملة وده موضوع كبير، بس خلينا نقول الودائع بالعملة المحلية بتاعتك بعد كده بتروح "للسندات الحكومية" دي بتدي نسبة أعلى من الكاش ودي تعتبر عائد خالي من المخاطرة ، ده المعيار اللي هو مبتخدش خطورة اوي لما بتسلف الحكومة بعد كده بتروح على "السندات عالية العائد" اللي هي السندات الأخطر شوية اللي هي بتاعة الشركات مش الحكومة وبعد كده ممكن تروح للمرحلة اللي بعدها هتروح "للدهب والأسهم" و "العقارات" في نفس المنطقة كده بالزائد أو الناقص ، يعني ساعات بيبقى في دول فيها مخاطر أقل أو مخاطر أكبر وبعدين بتروح ف الاخر خالص انك تفتح "شركات" فبتستثمر في شركة مبتدئة أو أيا كان ، حاجه مش مدرجة او حاجه مش على البورصة ، بس انا بنسبالي انا عايز أخد الـ 5% ، الـ 5% زمان كانت أسهل بكتير من النهاردة يعني النهاردة البنوك مش بتديك 5% على الدولار مثلا خلينا نتكلم على الدولار ، زمان كان الـ 5% بتاخدها على العائد الخالي من المخاطرة ، يعني الحاجات بتاعة الحكومة هي اللي بتطلع المعدل ده ، النهاردة انت محتاج تاخد مخاطرة أعلى شوية فممكن تبتدي تتحرك أكتر والسندات الحكومية برده غالبا مش بتديها ، فالـ 5% غالبا بتلاقيها عند سندات الشركات في نطاق المخاطرة بتاعهم او على العقارات انت بتشتري بيت العائد بتاعة بيبقى 5% او أيا كان برده انا مش عاوز أتطرق انا هعمل الـ 5% دي من فين النهاردة انا عايز أركز على الادخار.. هو يعني ايه إدخار؟
ناصر 07:28 : الجانب بتاع الادخار
عمر 07:30 : الجانب بتاع إدخار ، 15% زيادة او ناقص حسب ظروفك ، وكل ما تبتدي متأخر التأخير ده هيعطلك جامد علشان انت لو مش محوش أي حاجة في الـ 30 المعدل بتاعك انت بالفعل متأخر مرة واحدة عن مرتبك السنوي اللي انت المفروض أصلاً تعمله ، طب انا عندي 40 ومحوشتش يبقى انا متأخر 3 مرات عن مرتبي السنوي يبقى لازم من الـ 40 للـ 50 أحوش جزء أكبر كتير من دخلي وأجيب عوائد أعلى بكتير علشان ألحق أحصل عند الـ50 6 مرات ، فعشان كده بقولك كل ما تبتدي بدري كل ما بشكل كبير معدلات الادخار بتاعتك بتبقى أقل فتقدر تعيش حياة أحلى بكتير والمثال اللي قولتلك عليه لو انت ابتديت بـ 15% من 20 لـ 40 وانت عرفت تعمل عليها عائد 10% في السنة انت بعد الـ 40 سنة مش هتحتاج تحوش حاجه لان فلوسك هتبقى بالفعل ابتدت تشتغل لوحدها انها لوحدها هتوصلك للتقاعد.
ناصر 08:40 : مفهوم ، واللي هو ان انت عند الـ 40 كده ولا كده انا فاهم ان ده حاجه نظري ، بس انت لو اتعودت على عادة انك بتحوش وتحط فلوس على جنب ، والعادات بتروح بصعوبة فأنت هتبقى في حالة أفضل وبتدي لنفسك فرصة أحسن وإلى آخره
ناصر 09:00 : انا عايز اسألك سؤال انت بتتكلم في ان احنا في العشرينات و التلاتينات وحاجات كده وانا بكلمك من مكان انا بقولك اهو احنا خلصنا مدارس واشتغلنا وروحنا وجينا وسافرنا ورجعنا ، وانا اقدر اقولك اني عندي بتاع 5% ثقافة مالية مقدرش أقول أكتر من كده ، يعني انا بقدر افهم و اقرأ الأخبار وأفهم الدنيا اللي بتحصل حواليا واقرأ كشف حساب البنك بتاعتي وأحاول أفهم هو عاملة ازاي ، بس انا بحاول اوصلك فكرة ان هو لو احنا بنطبق المثال العملي ده علينا كا ناس معندناش ثقافة مالية مظبوطه انا بتكلم على نفسي كمثال فأنت ديما بتبدأ من ورا ، انا مش عاوز اتكلم على المثال ده انا عايز اسألك على مثال تاني خالص ، إزاى نعلم ولادنا او الجيل الصغير ان هو فعلا يبتدي يبقى فاهم يعني ايه النموذج اللي انت شرحته ده ويبتدي من وهو صغير ،
ازاي أعلم طفل صغير ان هو يحوش؟
عمر 10:16 : بص هو اولا اللي انا شرحته ده نموذج من 500 الف موديل ، يعني الناس بتنصح بـ 500 ألف طريقة ، زي مثلاً هتخس ازاي طب ما تعمل الدايت ده او ما تعمل الكلام ده ، يعني زي ما بيقولوا كل شيخ وله طريقة دي واحد ، اتنين دي إستراتيجية انت ممكن تعملها على حالتك انت ، يعني الموضوع لازم يتعمل تخطيط لكل واحد على حسب ، علشان كده بره في امريكا والدول المتقدمة في حاجه اسمها المستشار المالي هو ده اللي بيدرس حالتك ويساعدك انك تعمل الخطة الصح ليك ، طيب انا كأب اتأخرت في الادخار وعلى فكرة الناس كلها أونلاين لما الأرقام دي ابتدت تطلع الناس كلها بهدلت الدنيا لأن الراجل الأمريكاني العادي مش محوش حاجه ، الشعب الأمريكي اللي هو الحالة بتاعتة مادياً أعلى بكتير جداً من دول في العالم هم نفسهم مش محوشين حاجه محدش محوش حاجه ومش بقولك اللي بقولهولك ده مفروض كلام سهل او الناس كلها عارفاه
ناصر 10:30 : الكورونا انا فاكر كان في فترة لما كانوا بيتكلموا على الشيكات التحفيزية وكانت من ضمن الحاجات اللي انا مره قريتها مش فاكر الإحصائية بالظبط كانت ايه بس ممكن نطلعها بس انه معظم الأمريكان اللي في سن الشغل وبيشتغلوا معندهمش فلوس في حسابات التوفير أساسا، فهم الأغلبية مش محوشه ودي حاجه تخض يعني
عمر 11:58 : وجزء كبير من الناس اصلا لو النهاردة اتصفت من شغل هو هيعلن إفلاسه لو هو بطل شغله لأن هو عليه ديون معينة مش هيعرف يسدها ، وعلشان نبقى واضحين الكلام ده مش بسيط واظن الناس مش هتعرفه بسهولة.. طيب
عمر 12:20 : أعمل ايه لأولادي ؟
تاني انت لو عودت أبنك أن هو ياكل كويس من وهو صغير جزء كبير جدا من عاداته السيئة في الأكل مش هتحصل لو هو تقبل الموضوع ، لو هو شخصيته قبلت الموضوع ، علمته انه ياكل كويس ، لو علمته ينام كويس هيعرف ينام كويس ، لو علمته يحوش كويس هيحوش كويس بمعنى انت اولاً لازم تعرفه قيمة الفلوس ، ولازم تعرفه القيمة الإقتصادية بتاعة انك لما هتدفع في حاجه في تكلفة فرصة بديلة لما هتصرف على حاجه في حاجه تانية مش هتيجي ، بداية الموضوع ليه عشان أعلمهم من الأساس ان الـ 10 / 15% تيجي في الأولويات ، أن الادخار لازم أربيه في مخه ان ده من أولوياتك مع أول مرتب.. ممكن واحد يقولي انا مبعرفش أحوش وهو عنده 22 سنة طيب هروح رايح لشركة عقارات وياخد بيت صغير أصغر بيت في العالم بس هيجبره انه ياخد 10% من مرتبه كل شهر من وهو عنده 22 سنة ، يجي وهو عنده 25 سنة بقى عنده بيت والبيت ده غالباً هيطلع الـ 4 / 5 % اللي احنا عاوزينهم انا قصدي طريقتك اللي انت هتعملها مش فارقة معايا شوف حد يعملهالك يعني شوف أقرب مستشار مالي تعرفه أتكلم معاه أعملها ازاي او اقرا او هات كتاب
ابنك هتعلمهاله يبقى اولا هنعلمه أن الادخار ده بيجي في الأولويات وده اللي بحاول اقولهولك النهاردة دي اهم حاجه ، طيب لو حصلي كارثة بقى انا في العشرينات والثلاثينات وحصلي كارثة ما مدش أيدي على الجزء ده من حساب التوفير ده زيه زي المصروفات انا مبشوفهوش بيجي و يخرج فبرده من الحاجات اللي أنا أعلمهاله الألتزام بتاع اللي هو نجيب حصاله او اي حاجة بشكل معين ان انا هحط فيها فلوس والفلوس دي عمرها ما هتطلع وبعد كده رياضيا هقعد اتفرج معاه على اكسل وهحط الافتراضات بتاعتي ولو هم أكبر شوية في أواخر المدرسة أو في أوائل الجامعة وابص عليها ونعمل الحسابات دي مع بعض ونشوف الهدف وانا عندي 30 سنة او 40 سنة ، على فكرة الكلام ده ممل جدا انا عارف ان محدش هيتكلم ان هو بيقعد يعمل كده انت بتحط إستراتيجية واستراتيجية طويلة. هو الحاجه الأكبر بقى انه يخش في نظام التعليم اللي انا بقوله ده يخش بدري في نظام التعليم بس ده مش بايدي ، انا بقولك انا هشتغل على اللي انا اعرفه ابني او قريبي او صحاب أيا كان دي الحاجات اللي انا شايفها ممكن تتعمل
ناصر 15:35 : بص انا تعليقي على اللي انت بتقوله انه ممل ، انا مش هقولك ان دي اكتر حاجه مسليه في الدنيا اننا اقعد امسك جدول واشوف لو عملت ايه واحتمالات يمكن ممل بالنسبة للأغلبية يعني انا بالنسبالي دي حاجه مش ممل بصراحه بس خلينا نقول انها حاجه فيها تمرين ثقيل شوية بس اللي انا عايز اوصله انه هو مفيش هدف بيتحقق من غير ألتزام يعني انا الحاجه اللي خرجت بيها من اللي انت قولته كله هي فكرة الألتزام ، مش مسأله حتى فكرة أننا نعود حد أن التحويش من المصروفات الثابتة أو لأ ماهو جزء كبير من اني اعود حد انه من المصروفات الثابتة جاي من الالتزام بيه ، فكرة ان انا مقربش من الفلوس دي وفكرة ان العائد الكويس من الحاجة بأجله علشان انا عارف ان الصورة الكاملة بتقول ان انا من مصلحتي أأجله وده بيرجعنا تاني لمثال التخسيس اللي انت قولت عليه في الأول ان انا ممكن اكل دلوقتي الآيس كريم او ممكن اكل الاكل الكويس وأختار الاكل الكويس وأبقى عارف ان صحتي هتبقى أحسن خلال 10 سنين و20 سنة وهكذا
عمر 16:56 : طب انا هسألك سؤال بسيط انت عاوز تعلم الكلام ده في المدارس مثلا ده حل من الموضوع ، اللي هو السيد الخبير هيقولك طب ما تيجي نعلمه في المدارس.. طب أنت معلمتنيش اصلاً ازاي أكل في المدارس ، في حد بيعلم حد انه ياكل ازاي؟
ناصر 17:18 : بالعكس انا لو اتعلمت أكل في المدارس فأنا اتعلمت في البيت أكل أكل كويس وأتعلمت في المدرسة أكل أكل وحش
عمر 17:24 : طيب أيه أهم بقى تحوش فلوس ولا تأكل كويس؟ يعني لو انت عايز تدى ابنك معلومة هتعلموا يأكل ازاي ولا هتعمله يستثمر ويحوش فلوسه ازاي؟ ايه الأهم بالنسبالك
ناصر 17:48 : لأ أعلمه ياكل
عمر 17:49 : طب ما دي أصلاً محدش بيعلمها
ناصر 17:59 : انا معاك ، انا مش بقول ان ده دور المدرسة ، اللي أنا عايز أقوله إنه هو انت في مرحلة ما علشان زي ما انت بتقول عليها انها حاجه ممله وانا ولد عندي 16 سنة وفي مدرسة معنديش الأهتمام ده ، عمري ما هيجي في مخي اقعد اقرا عن التحويش وهعمل ايه وانا 22 سنة و أول مرتب عمرها ما هتيجي في مخي ، ده اللي انا عايز اوصله هو ممكن ميبقاش دور المدرسة أنه يعلمني اني ابقى مستثمر بس ممكن دور المدرسة انه يفهمني ان انا من ضمن أولوياتي اني احط فلوس على جنب مثلاً
عمر 18:41 : انا معلمتكش تبقى مستثمر النهاردة ، انا مقولتلكش روح اشتري ايه واعمل ايه ومش عايز علشان مش فارقه
ناصر 18:50 : ايوا ما ده اللي انا بقوله ، على فكرة انا وانت بنتكلم في نفس الحاجه ، انا اللي عايز اوصله ان اللي انت قولتهولي ده حاجه أساسيه محتاج اعرفها وانا أصغر ، انا مش عاوزك تعلمني ازاي ابقى مستثمر لأن غالباً وانت بتعلمني وانا عندي 16 سنة انا مش هفهم انت بتقول ايه بس هفهم لما تقولي لازم يكون عندك الانضباط ، ان انت لما يبقى معاك 100 جنية متصرفش 100 جنيه
عمر 19:17 : الحته دي فيها حاجه ، هقولك حاجة قد ايه انت بتحب الانسان اللي هو أحمد ناصر كمان 10 سنين بالمقابل مع اللي بيحب الإنسان أحمد ناصر النهاردة
ناصر 19:28 : وده جزء من الألتزام
عمر 19:30 : طبعاً اكيد ، انت بتشيل حاجة لناصر بعد 10 سنين ، يعني مثلا عمر الساعة 11 بليل طالب أوردر دليفري ، هو عمر اللي هيصحي بكرا الصبح هيبقى زعلان ، بس عمر بتاع بليل هيبقى فرحان اوي و يخش ينام في منتهى السعادة ، عمر هيبقى صاحي الصبح مش طايق نفسه علشان أكل الساعه 12 بليل 2800 كالوري صح؟ فإنت بتعمل ايه الادخار عبارة عن ايه هو تضحية عمر بليل لعمر الصبح وعمر بليل بتاع عمر كمان 10 سنين ، بعيدا عن أن الأعمار بيد الله ، انت بتحاول تحوش لنفسك قدام او لعائلتك او للملاءة المالية بتاعتك كلها أولادك وأهلك وقرايبك والكلام ده كله
ناصر 20:43 : لأ وهو ده الأخذ بالأسباب يعني مهو محدش عارف عمره بس هو البني آدم بيحاول يعمل الصح
عمر 20:48 : ومش معنى كده اني بقولك وانت عندك 20 سنة تفكر في ان انت عندك 65 سنة يــاه هو مين هيبقى عايش! انا بتكلم على معيار انا مش بتكلم على انت مفروض تعمل ايه انت ممكن تتفوق على المعيار ده جدا ممكن تيجي وانت عندك 60 سنة وانت محوش 800 مرة من دخلك الله اعلم ربنا كرمك وفتحت شركة والشركة كبرت ، وكنت مستثمر في الفيسبوك ، وكل حاجه مشيت صح في حياتك وانت عندك 65 سنة بقيت أغنى راجل في العالم ، وممكن تكون عملت كل حاجه صح وحصل حاجات في نص طريقك آخرتك ، سحبت من المدخرات بتاعك ايا كان لقدر الله موصلتش للطريق اللي انت عايز توصله ، انا كل اللي بقوله ايه ان ده معيار انت بتحاول توجه نفسك عليه.. فاهم قصدي؟
ناصر 21:40 : مظبوط ، تبقى انت ديما عارف ترجع نفسك للمكان اللي انت عايز متحدش عنه كتير علشان الدراسة واضحة ، نقطة بتوصلك لنقطة
عمر 21:53 : هل انا متأخر ولا لأ ، فأنت النهاردة أي حد هيسمع غالباً هيضرب الأرقام في دماغه و يعرف هل هو متأخر ولا هل هو سابق و 80 /90 % من الناس هتبقى متأخرة.. فاهم قصدي هو ده اللي انا بحاول أقوله.. طيب انت بتسمع الحلقة دي ومبتديتش حلك ايه؟
The Earlier The Better
هو الموضوع صعب زيه زي الأكل انك تحافظ على أكلك او نومك أنت برده مفروض تنام عدد ساعات معين لو اخدتهم من جسمك انت بتتأثر ويومك بيتأثر وهكذا.. عندك ايه اسئلة تاني؟
ناصر 22:46 : عندي اسئلة تانية بس حاسس انها محتاجه تبقى حلقة لوحدها ، يعني انا كنت عايز اسألك النهاردة ايه المرحلة اللي انا ابتدي ابقى عارف ان ده الخط اللي ما بين ان انا مجرد بحوش فلوس على جنب مقابل ان ابقى عارف ان ده الوقت المثالي اني ابدأ استثمار او أتابع نوع من الاستثمار ، وكنت هسألك ايه الحاجات اللي توصي بيها ، بس انت كلمتني شوية عنها بس انا فعلا حاسس انها محتاجه حلقة كاملة عن الموضوع ده
عمر 23:22 : هقولك حاجه انا قولتلك في أول مثال حوش 10% من دخلك وخد كام 5% عائد ، طيب لو تضاعف معدل الادخار وقتها انا اقبل بعائد اقل يعني لو قولتلي انا مش هحوش 10% انا هحوش 20 وهروح اعمل عليهم 2% في البنك بدل ما اعمل 5% ، مش عارف أعمل 5% مش عاوز أخد مخاطرة وانا صغير مش عايز اخد مخاطرة أيا كان مش فاهم ، انا انصح انك تزود المساهمة وخد مخاطرة اقل ، طيب وانت بتحوش لقيت ربنا كرمك وعرفت تبتدي توزع استثمراتك بطريقة معينة ، هل تبطل تحويش؟ لأ ، أسبق يعني طول مانت ماشي في مستوى معين من الادخار عمرك ما تقلله يعني لو دي حاجه خارجه منك من غير ما تضغط على حياتك ومن غير ما تغير نمط حياتك او أيا كان متقللش الادخار لأن ممكن يجيلك لحظة في حياتك تخلف تبقى محتاج فلوس تدخل جامعة أيا كان معدلات الادخار بتاعتك هتقل جامد
"Fair" في جروب اسمه
او حاجه كده في أمريكا مش فاكر يعني ده جروب بيشتغل لمدة 10 /12 سنة في حياته بيحوش 75 – 80 % من دخله ويتقاعد ده بقى الناحية التانية خالص ، ده بقى بيروح لمعدلات ادخار أعتقد بتوصل لـ 80% هو مبيعملش اي حاجه في حياته هو متخرج وواخد شهادة مثلا جامدة جدا وبيشتغل شغلانه جامدة جدا
ناصر 25:26 : بس عايش في اوضه و يلبس شرابين وبدلتين
Goldman Sachs عمر 25:30 : وبيشتغل في
عادي ، ممكن يكون بيشتغل في جوجل معندوش مشكلة بس هو عنده هدف أنه وهو عنده 30/35 هياخد مراته اللي هي بتعمل نفس الحاجه زيه تقريباً ويريحوا ويبدأوا يلفوا العالم ويخلفوا عيال ويتفرجوا على الدنيا دا مدرسة ، أكيد أنا مش بقول للناس مفروض تعمل كده وبيعمل حاجات تانيه بس بيبقى عنده حرية مالية ، انا مش واخد الفلوس هنا بكلمك عليها إن هي مصدر سعادة أو أنا عاوز احوش علشان تبقى عايش الدنيا انا بقولك اللي هو ازاي تحميك بإنك تاخد إسهامات صغيرة خلال حياتك كلها من غير ما تضغط على مستوى المعيشة بتاعك علشان يبقى عندك 50/60/70 سنة وبتتقاعد عادي ، مصدر أمان ، زي غالبية الناس ما بيعملوا ، مش هقولك روح حوش 70% وتقاعد وانت عندك 35 سنة دي مش معموله لكل الناس.. فأنا فالأول رداً على السؤال بتاع اللي هو أشترى إيه و اعمل ايه مش هو ده المشكلة يا مكتر الأصول والبيوت اللي انت ممكن تشتريها و الأسهم وصناديق الإستثمار الحاجات دي كلها موجودة في العالم كله ، اللي مش موجود ايه معدلات الادخار المظبوطه
ناصر 27:12 : النواة
عمر 27:15 : آه ، الناس بتدور انا هجري قبل ما أمشي ، انا معايا 10 آلاف دولار أقعد بقى أفكر فيها أنا هشتري تسلا ولا هشتري آبل و جوجل وهي مش مبنيه أصلاً ليك مش مبنية للـ 10 آلاف دولار ، الحاجات دي مش معموله إن أنت تستثمر فيها ، وحتى لو عملت منها فلوس فظيعه لسبب ما دخلت في حاجه صح وده مستحيل انك تعرف تعملها على 30 / 40 سنة
ناصر 27:47 : ده من نموذج للتكرار
عمر 27:51 : هتقعد تعمل كده لـ 30 او 40 سنة هتبقى انت بصراحة حاجة فزة محصلتش
ناصر 27:56 : عبقري
عمر 28:00 : بس اللي انت ممكن تعمله لـ 30 / 40 سنة ايه! ان انت تحوش 10% من دخلك اللي هي الطريقة المملة ،
Warren Buffett الناس كلها بتقعد تتكلم على
وامثال ناس بتستثمر ، الناس دي عندها قدرة في المخ انه يقعد 60 سنة يستثمر فلوسه ، نفسياً الناس مش مبنيه كده الراجل العادي اللي ماشي في الشارع زيي وزيك مش مبنيين زي الناس دي فمينفعش أخد أكتر مثال ناجح في التاريخ واقول انا هعمل زيه وهنستثمر في كل الأفكار الصح ، مستحيل
ناصر 28:42 : صح ، بس هو عمتاً الفكر ده موجود في كل حاجه يعني انت بتبقى متخيل ان انت ابنك بتوديه مدرسة الكورة فأنت متخيل انه محمد صلاح ، وكل الولاد الصغيرين متخيلين انهم محمد صلاح انا اقصد انه اكيد هيطلع منهم موهوبين وهيلعبوا وهيروحوا ويجوا بس ديما احنا بيبقى عندنا الـفكر بتاع ان انا هعمل الحاجة فأنا عيني ومخي على أحسن واحد عملها في تاريخ ما اتعملت
عمر 29:13 : بس عارف كلنا ممكن نعمل ايه؟؟ كلنا ممكن نحوش 10% من مرتبنا
ناصر 29:20 : هي دي خلاصة الحلقة النهاردة على العموم انا غير اني انبسطت جدا النهاردة و الفترة الجاية عايزين نعمل كذا حاجه بس يبقوا موجهة اكتر للاستثمار وهشتري في ايه ، يعني احنا غطينا النهاردة شوية موضوع التحويش المرة الجاية عايزين نعرف نشتري ايه لو انا معايا فلوس والفلوس دي عاوز اعمل بيها حاجه وعاوز اطلع عليها الـ 5% اللي اتكلمت عليها النهاردة اعمل ايه واتصرف ازاي اشتري ايه وايه الحاجات اللي فيها مخاطرة أعلى من التاني عاوزين نعمل حلقة تانية على الموضوع ده بس النهاردة اعتقد أننا غطينا نقطة التحويش دي بالكامل
عمر 30:04 : تمام ميرسي جدا يا ناصر واتمنى اني مكنش جبتلك اي احباط ولا جبت لأي حد بيسمع احباط لان انا بقولك انا عارف ان الموضوع قاسي يعني
ناصر 30:22 : بص هقولك على حاجه تاني ده يرجع لنوع البني آدم يعني انت ممكن تبص عليها بإحباط وممكن تبص عليها بان انا مفروض ابدأ اتصرف دلوقتي ، لأن انا زي ما انت قولت لو انا اخدت ده كمنبه كحاجة تفوقني يبقى انا لو في التلاتينات هيبقى احسن لما استنى للاربعينات وأحسن ما استني للخمسينات.. انا الدرس اللي طلعت بيه النهاردة رقم 1 الانضباط رقم 2 ان الوقت عمره ما بيفوت اني ابدأ وكل ما ابتدي دلوقتي احسن ما ابتدي بكرا فانا مش باصص لها من وجهة نظر الإحباط بصراحة
عمر 31:06 : بظبط ، واحنا برده دورنا اننا نتكلم زي ما انت قولت في الحاجات التانية اللي هو فين وليه وازاي تجبر نفسك انك تحوش وتحط نفسك في مواقف عامله ازاي علشان متصرفش بس اتمنى الناس اللي بتسمعنا يكونوا كلهم في العشرينات عشان يبتدوا بدري وميرسي جدا جدا على وقتك يا ناصر وميرسي لكل الناس اللي وصلوا معانا لحد دلوقتي ابعتولنا على الإيميل بتاعنا و استنونا الأسبوع الجاي ان شاء الله
Translation of some words and terms:
Vehicle مركبة او وعاء
Saving Accounts حسابات توفير
Small Investment استثمار صغير
Saving إدخار
Recommend تنصح
Risk مخاطرة
Objective هدف
Aggressive Investment استثمار بقوة
Models نماذج
Risk Tolerances تحمل المخاطرة
Saving rate معدل الادخار
Around حوالي
Spectrum نطاق
Bonds سندات
Financial Instruments الأدوات المالية
Asset Class الأصول
Liquidate يسيل
ATM ماكينة صرف آلي
Deposit وديعة
Interest Rate معدل الفائدة
Rates معدل او نسبة
Government Bonds السندات الحكومية
Risk Free Rate معدل عائد خالي من المخاطرة
Benchmarkمعيار
Equities الأسهم
Real estate عقارات
Listed مدرجة
Exchange البورصة
corporate bonds سندات الشركات
yield معدل
Aspect جانب
Returns عوائد
Dramatically بشكل أكبر
Retirement تقاعد
Theoretical نظري
Claim يدعي
Bank Statement كشف حساب البنك
Financial Literacy ثقافة مالية
Strategy استراتيجية
Financial Advisor مستشار مالي
Average عادي
Stimulus checks الشيكات التحفيزية هي شيكات ترسلها حكومة الولايات المتحدة إلى دافعي الضرائب لتعزيز قدرتهم الشرائية وتحفيز النشاط الاقتصادي
Populations السكان
Liquidation تصفية
Opportunity Cost تكلفة الفرصة البديلة
Fixed ثابت
Expense مصروف
Discipline انضباط والتزام
Mathematically رياضياً
Assumptions افتراضات
Target هدف
System نظام
Spreadsheet جدول
Fixed expense مصروف ثابت
Delaying gratification الإشباع المؤجل
Interest مهتم
Savant رجل علم
Outperform يتفوق على
Guide يرشد او يوجه
Versus مقابل
Pursue يتابع
Contribution إسهام
Financial Independence حرية مالية
Through out خلال
Majority Population أغلبية الناس
Invest استثمار
Replicate يتكرر
Genius عبقري
Stamina قوة
Psychologically نفسياً
Oriented موجهة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي # الإدخار #الجزء_الثاني #حساب_توفير #المستشار_المالي